لوحة القادة

كلمة حق حسنى مبارك - اولا : رجل محنك سياسيا ومخضرم - ومصر تحتاج فى الكثير من الامور لمثل هذه السياسة وكان له مميزات اهمها انه لم ينساق فى حروب استفزازية ولم يغامر كثيرا بارواح الشباب فى حروب لمجاملة لاى احد ولم يغامر باموال مصر فى سياسة الحروب ثانيا : كان يتحمل الكثير من الشتائم منذ اعوام كثيرة وكان يعطي فرصة للصحف فى التعبير عن ما يريدون بكل حرية وهذا لم يحدث اطلاقا فى عهد انور السادات او جمال عبد الناصر والا كان المصير الاعتقالات - نعم يوجد حرية صحافة في عهد مبارك و هذه ميزاته القليلة - ولابد ان نذكرها - لانها كلمة حق لكن على الجانب الاخر اولا : ما نعلمه جميعا عن اهماله للشعب وتركه فى بئر الفقر والامراض ومساوؤ كل القطاعات من تعليم ومواصلات وبطالة وتامين صحي ثانيا : ابناء السيد الرئيس - كانو يستغلوا جدا منصب والدهم خاصة فى الاستثمارات الاجبارية ثالثا : من يحيطون بالرئيس من نسايب واصدقاء واغلبية رجال الاعمال - كلهم فساد ولهم مصالحهم الشخصية خاصة لو كانو ذو مناصب فى الدولة - ويستحوذون على 60 % من اقتصاد مصر رابعا : المحيطين بالرئيس حسنى مبارك هم الذين اوهموه بان الحياه فى مصر كريمة و رائعة وتسير بما يطمئن القلب وفقا لخطط مسبقة ولم ينقلوا له الصورة واضحة وحقيقية - إما انه كان يعلم ويتعامل مع كلامهم انه يصدقهم واما انه لا يعلم حقيقيا ويصدق تقاريرهم الكاذبة خامسا : يكفى لو قارنا لنقول - ان جمال عبد الناصر مات فقيراً - والتاريخ يشهد - برغم انى لست ناصرية و لا يسعنا ان نقول بعد ما حدث - وبعد ما دفع من دم الشهداء - الا قولنا ارحل سيدي الرئيس ثلاثون عاما من الحكم هذا يكفى - ولتعطي فرصة لرئيس جديد ولتعطي مساحة للشعب لنجرب سياسة جديدة للتغيير وفرصة للتقدم فى كل المجالات بما يتناسب مع مكانة مصر وتاريخها وشعبها وكلنا امل فى ان القادم افضل لاننا دفعنا الثمن سنوات من الظلم ومن دماؤنا لان شعب مصر مثقف وواعى ومؤمن ويعلم يقينا اننا سوف ننهض بمصر الى مستقبل افضل اليوم فقط رايت شعاع الشمس اغابي الميزتين اللي انتي قولتيهم دول حقنا مش بيتفضل علينا بيها الطبيعي ان الحاكم يحافظ علي البلد وعلي اموالها واذا عمل كده فده واجبه وليس فضلا منه اغابي سمعتي عن المسلمين والمسيحيين فس شبرا وهما واقفين يحموا بعض شوفتي ان الفتنه دي كانت ممنهجه عشان مانتحدش ونشوف عدونا شوفتي المصريين لما سابوا الخناق الطائفي عملوا ايه في النظام في 3 ايام

{و لا تهنوا و لا تحزنوا و أنتم الأعلون إن كنتم مؤمنين * إن يمسسكم قرحٌ فقد مس القوم قرحٌ مثله و تلك الأيام نداولها بين الناس} {و لا تهنوا في ابتغاء القوم إن تكونوا تألمون فإنهم يألمون كما تألمون و ترجون من الله ما لا يرجون و كان الله عليماً حكيماً}

بسم الله الرحمن الرحيم كان نفسي تسمعوا ماجد بيه الشربيني أمين التنظيم الجديد وهو بيتكلم دلوقت مع منى الشاذلي سوف نعمل وسوف ننظم وسوف نعيد الفصل في الطعون وكل الكلام الحمضان ده دلوقت يا جماعة سيبوكم من كل المحطات الفضائية ومن كل المشاهد التليفزيونية احنا لازم نعرف كذا نقطة أولا: كل اللي حصل امبارح ده من نهب وسلب وكل الكلام الفاضي ده انا متأكد تمام انه كان تمثيلية لإلهاء الناس عن المظاهرات ومطالب المظاهرات واسألوا نفسكم ... شوفوا احنا كام عضو في المحاورات اكيد كلنا لنا قرايب واهل في مصر سيبوكم من الاستغاثات والنداءات ويا بابا ويا ماما ويا ستو والرصاص جنبنا والبلطجية تحتنا والقتلى والجرحى وكل الوش ده في حد من أهالينا جراله حاجة انا عن نفسي ليا اخت في مدينة نصر واخت في حلوان اختي في مدينة نصر راحت شغلها النهاردة وامبارح ومفيش حاجة واختي التانية كانت لسه جاية من الشغل برضه دلوقت ومفيش حاجة كل صوت الرصاص وكل السلب والنهب اللي سمعناه ده كان تمثيلية هدفها الهاء الناس عن المظاهرات والاهتمام بالأمن فقط دلوقت الموضوع ابتدى ياخد منحى جديد تماما وهو منحى طول النفس الجيش مش هيقرب من المتظاهرين سواء لأن رجال الجيش شرفا أو لأنهم عندهم تعليمات بعدم الاشتباك ولكن الجيش في نفس الوقت مش هيسمح ان المظاهرات تقرب من الخطوط الحمرا وهي بكل وضوح في صلاح سالم - مصر الجديدة وفي نفس الوقت الشرطة هترجع تاخد أماكنها تاني وكأن شيئا لم يكن طب والمساجين اللي هربوا هيرجعوهم ازاي يا ترى إلا لو كان الهروب ده تمثيلية !!!!!!!!!!!!!!!!!!!!!!!!!!!!!!!!!!!! وسيب المتظاهرين يعملوا اللي عايزينه لأنهم مش هيكسروا ولا هيخربوا حاجة لأنها سلمية سلمية وجيش البلد الشريف اللي بيحمي مصر مش هيتعرض للمتظاهرين لأنهم أبناء الوطن لكن جيش البلد الشريف برضه هيفضل يحمي مبارك بصفته رئيس مصر وبصفته القائد الأعلى وفي نفس الوقت يتم تشكيل الحكومة الجديدة وتبدأ تاخد شوية إجراءات عشان تبان انها ابتدت تمارس مهامها وأكيد من المهام دي انها تريح الناس شوية عشان الناس تبتدي تهدا وتقول كفاية كده ويفضل الريس ريس ويفضل المتظاهرين يتظاهروا واللي فينا نفسه أطول عشان كده لازم نعرف أن المعركة دلوقت نقدر نسميها معركة النفس الطويل لو هنثبت على مواقفنا يبقى لازم نعرف إن الموضوع محتاج صبر وهياخد وقت يا إما يتم نقل المظاهرات خارج ميدان التحرير والتوجه بيها وبكل وضوح لمصر الجديدة او نثبت في أماكننا بميدان التحرير مهما طال الزمن اسمعوا الخبر ده لسه جاي مع منى الشاذلي نجحت قوات المسلحة في القبض على 700 مسجون من سجن وادي النطرون طب مسكوهم فين يا ترى وبالسرعة دي وفي الظروف دي !!!! دلوقت المعركة معركة النفس الطويل واللي فينا نفسه أطول

قلت من قبل في موضع آخر ان هذه الثورة ستعلم الاجيال معنى الانتفاض والكرامة .. ومرحلة الخسائر هي مرحلة مؤقتة .. بإذن الله ستنقشع غمامتها ان عاجلا او اجلا .. هي فاتورة لا بد من دفعها في اي حركة تصحيح .. ولها ثمنها هذه الايام لن تكون عادية في تاريخ مصر او تاريخ محيطها العربي .. سيذكر التاريخ هذه الايام .. بمشيئة الله .. ستكتب عنها الروايات والمسرحيات والقصائد .. ستنتج عنها افلام سينمائية .. تماما كما كتبت آلاف الروايات والافلام عن الحقبة الناصرية او ثورة الضباط الاحرار .. وكأن الكاتب الذي سيكتب عن هذه الثورة قد توقف في الصفحة الرابعة الآن .. باقي عدة صفحات بيضاء او سوداء ... وبإذن الله انها بيضاء .. اما من سيقرر ان يبيض باقي الصفحات او يسودها فهو انتم .. عيون العرب كلهم .. بل عيون العالم .. تتجه اليكم الان .. فاكتبوا صفحات مستقبلكم كما تحبوا ان يقرأها من يأتي بعدكم اتخيل بعد عشرين عاما .. جد يحكي لاحفاده عن فخره بأنه كان من ضمن من قاموا بالثورة .. عن فخره بأنه كان من صناع قراره ومستقبل ابنائه واحفاده .. واتخيل الواحد منكم يقول لتلك الاجيال .. لولا الله ثم ما قمنا به وقتها لما كنتم تتمتعون بهذه الخيرات .. وبهذا التعليم .. وبهذه الصحة .. وبهذا التخطيط .. وبهذا البناء والعلم اتخيل اسماء الشوارع .. شارع خالد سعيد .. شارع سيد بلال .. اتخيل محمد وادوارد .. كل منهم يشعر بالاطمئنان على نفسه و من معه .. محمد ينتخب جرجس .. وادوارد ينتخب ابراهيم .. ولا يحتاج احد منهم لوصاية او حماية او شعور بالعزلة .. بل يملي من يراه هو المناسب فقط اتخيل بعض من خسر امواله يحتفظ باصولات تثبت خسارته .. ليبرزها بفخر مستقبلا ويقول .. انظروا .. كنت ممن دفعوا ثمن الحرية .. تماما كما يحتفظ بعض قدامى المحاربين بندوب المعارك التي خاضوها ويتركوها علامة بارزة دون علاج لتكون وسام فخر تعلم الاجيال معنى التضحية والكرامة هذه المرحلة هي اقسى لحظات المخاض .. والتي لن يكون بعدها الا الفرحة وصوت صراخ الحرية الذي ينسي الفرد كل الآلام وهي مرحلة ضرورية .. لقد خلقنا الانسان في كبد وانتم شعب اراد الحياة .. فلا بد لليل ان ينجلي .. لكنه لن ينجلي بدون تضحيات واموال و جروح اصبروا وصابروا ,, ودعوا التاريخ يكتب اسمائكم .. فكلنا ننظر اليكم .. و اثبتوا لكل المتخوفين صدق ظنونكم بإذن الله .. دعوهم يقولوا .. كم كنتم صادقين .. وكم كنا مخطئين .. شأن ثورتكم لا يعنكيم وحدكم .. ستأثر علينا جميعا .. ولن يكون التأثير الا ايجابيا بحول الله وقوته عوضك الله يا ابو الاسيان ... احتسبها في سبيل الله .. وسيعوضك الله خيرا منها .. فقط احتسبها في سبيل الله .. وسيجزي الله مكافأتك انه على كل شيء قدير

\ المسلمون يصلون في حراسه المسيحيين

حاجة لازم اقولها و مفرحاني اوي ا وي اوي صاحبة العمارة عند اختي في مصر الجديدة عندها ولد واحد منزلاه في عز البرد يا حبيبي واقف بطل مع الشباب اللي في الشارع عشان يحموا الأهالي هذا الشاب الصغير مسيحي و 90% من سكان ال 30 شقة مسلمين كان ممكن حتى تقول ده ابني الوحيد و متخليهوش ينزل الشاب المسيحي ده وحيد مامته هو و اللي زيه - بعد ربنا سبحانه و تعالى- بيحموا أختي و بنتها اللي لوحدهم و معاهمش رجالة الفتنة الطائفية كانت أكذوبة كبرى عيشنا فيها النظام اللهم أرنا في هذا النظام الفاسد عجائب قدرتك آآآآآآآآآميييييييييييييييييين

التورتة جاهزة جهزوا السكاكين .. واهتف يا شعب المساكين ...سألوا مين كبيرنا .. قالوا مش لاقين حد نضيف اليدين.. قالوا ثورة شبابنا .. قلت زهرة حلوة.. غرقانة في الطين

من يحكمني .. يجب أن يضمن أمني وسلامتي .. من يسهر على أمني وسلامتي اليوم .. هم شباب مصر العظيم .. إذن من يحكم مصر اليوم هم شباب مصر العظيم

طيب يعنى حضراتكم عايزين نكتة دلوقت تخفف حدة التوتر ؟؟ طيب دى نكتة حقيقية .. قبل كدة كان عندنا موضوع بيتكلم على .(( تحوير الكلام على السنة العوام )) ..وكان ليا مداخلة او مداخلتين تقريبا اتكلمت فيهم عن هنية اللى ( شغالة عند اختى وتقريبا يعنى هى متربية ف بيتنا ).. اتكلمت امبارح اطمئن على الأهل .. و..هنية اخدت التليفون وردت عليا . بسألها...ازيكم ياهنية وعاملين ايه؟؟ عاملة ايه يانونا ف اللى بيحصل ده؟؟ قالت لى ... ياابلا سلوى انا تعبت قوى ومش عارفة حابقى اعرف اروح بيتنا ازاى ؟؟ ده انا ساكنة ف محطة مصر و.. دلوقت عاملين...حصر تبول ..ف الشارع . بصراحة؟؟؟ المكالمة كلهااااا مش فاكرة منها غير انى كنت بضحك بهستيريا .. شعبنا ده جميل قوى قوى قوى .. ومكانش يستاهل كل البهدلة اللى حصلت له ف خلال كل السنين اللى فاتت.. ان شاء الله كل الخير حايحصل...

نكته عالسريع كثير من الزعماء العرب أتصلوا هاتفياً بزين الهاربين بن علي وبيقولوا له : لو نمت بالليل إبقى سيب لنا مفتاح الشقة قدام الباب تحت الدواسة .

مش فاهم يا بشمهندس تيمور دا على اى اساس ان شاء الله فى اوقات فراغهم مثلا يعنى بين الإعتقالات .. بيروحوا يشتروا اسلحة مثلا يعنى ولا ايه اعتقد من الأفضل ما ندخلش فى حوارات جانبية لتخوين فئة من المصريين خلينا نركز على عدونا الأوحد وهو مبارك وشرطته

عن اى نظام كنا نتحدث وعن اى امن كنا نتحدث وعن اى كرامه كنا نتحدث وعن اى حياه كنا نتحدث القادم احسن باذن الله

السلام عليكم و رحمة الله و بركاته عشان الله يكرمه...زي ما كرم السادات و اتنش عيار....قطع النت عن مصر كلها و لسه مستمر ف التصرف الغير مبرر دوت من فضلكم...عايزين نطمن علي اخواتنا و اخواننا المحاورين في مصر لو حد معاه رقم موبايل يتصل و يخش يطمنا لو سمحتم اتصلت بضحي.. و ب...Dreamwith me بحاول اوصل ل...shiko ذهبية بس لسه مافيش رد مش معايا ارقام رضوي و لا طنط هند علي من الاسكندرية خلونا نتطمن عليهم....نسمع صوتهم و نقولهم ان احنا بندعيلهم و معاهم حتي لو من بعيد يا رب يعدي الايام دي علي خير و لا تتوقفوا عن الدعاء

عشان بس في الأول ما حدش يتهمني بإنني من مجاهدي الكيبوردات الذين يهيجون الناس وهم يجلسون في الغرف المكيفة ويحتسون الشاي والقهوة والأنجليش كيك ولا نشعر بما يشعر به أهلنا في مصر .... فأنا بإختصار واحد ممن أكتووا بنيران هذه الثورة العظيمة التي ستُحرر شعب مصر للأبد ... وأقول للأبد لأن خلاص الناس عرفوا طريق الحرية ومافيش حد هايقدر يمنعهم بعد كده مهما كان إنهم يمشوا فيه يجيبوا عمر سليمان ولا أحمد شفيق ولا الجن الأزرق .. خلاص .. المارد خرج من القمقم ولن يستطيع أن يوقفه أحد أما كيف أكتويت وتضررت - لن أقول ضحيت لأنها تضحية لاتُذكر مقارنة بمخاطرة شباب مصر بنفسهم وحياتهم – فببساطة أنا خسرت كل تحويشة عُمري في البورصة المصرية التي أنهارت على خلفية تلك الأحداث .. لان نتيجية الأحداث دي البورصة راحت في داهيه ولسه لو فتحت بكره ولا حاجه هاتروح أكتر وكله هايروح في الأرض لكن أقسم بالله .. والله على ما اقول شهيد ... لم أفكر في تحويشة العُمر او في الفلوس ولو للحظة أو أندم إني كنت من المطالبين بالحرية وبالثورة على الظلم .. على قدر ما فكرت في مصر بلدي ووطني ومسقط رأسي ومآلي ولو بعد حين .... فما أسهل أن يضحي أحدنا بالفلوس ... لكن أن يُضحي بعُمره ... فهذه هي التضحية الحقيقية ... والموضوع فلسفي بحت ولا يحتاج تفكير عميق للسب واللعن أو أمصمص شفايفي وأقول - ما كنا عايشين والحياة ماشية .. إيه لازمتها الدوشة والخراب ده ؟ لأ أيها السادة .. إذا جت على الفلوس فنحن من يصنعها ... وليست الفلوس أو الأموال او العقارات هي من تصنع الإنسان .. وما بالنا عندما يكون مش أي إنسان .. بل يكون إنساناً حُراً أبياً رافعاً رأسه داخل وخارج وطنه ... لن أنسى من 10 سنوات وواحد عامل كهربائي من دولة " مالي " الأفريقية عارفينها ؟ تعتبر من افقر دول العالم ومن اكثرها تعرضاً للمجاعات والمشاكل الإقتصادية .. كان بيشتغل في البيت عندي ولما عرف إني مصري قال لي بمنتهى الكبرياء : شوفت إنتخابات الرئاسة عندنا إزاي كانت ديمقراطية والشعب إختار الحاكم اللي عاوزه ؟ .. مش إنتو مبارك هايفضل طول العمر عندكم وينجح بـ 99 % كل مره ...... ساعتها خجلت من نفسي ومن بلدي ومن ضعفي ومن سكوتي على الظلم وحطيت راسي في الأرض من الخجل ... - حتى زوجتي تبكي الأن بجانبي وتقول : طب وبيوتنا وحاجتنا اللي في مصر .... لو هجم عليها المخربين وسرقوها ؟ فقلت لها وليكن ... إذا كان ده نصيبنا في التضحيات .. يبقى يا أهلاً ويا مرحباً .. ومصير الحق هايرجع لنا عندما تستتب الأمور سريعاً ودعونا من هذا الموضوع لأنه ليس موضوعاً شخصياً للشكوى والآنين .. لكنني هنا أيها الزملاء الاعزاء أحدثكم عن ثمن الحرية ..... هل كنت تظن أن نُستعبد لمدة تزيد عن 60 عاماً منذ ثورة 52 ونُهمش وندوق الذل من العسكر ويعتبرونا خدم عندهم ليست لنا حقوق .. ويستوولون هم على ثروات البلد ومناصبها ويوزوعوا بينهم الألقاب .. فهذا فلان باشا .. وهذه فلانه هانم .. وهذا الزعيم وهذا البيه ... أما نحن فنُعتبر ولاد الجاريه وفلاحين أُجريه عندهم ؟ وعندما نفتح فمنا يقول كبير أفراد العصابة : خليهم يتسلوا ؟ هل كان أحد يتخيل إن حصاد كل سنوات الفاسد دي هايتصلح بين يوم وليلة وبدون ثمن وسلمية سلمية ؟ هل كان أحد يخدع نفسه ويظن أن هذا سيتم إصلاح الوضع من خلال القنوات الشرعية والأنضمام للاحزاب أو الجمعيات الاهلية وممارسة العمل السياسي من خلال لاأُطر القانونية ... وكل تلك الشعارت الجوفاء التي تعتبر جوفاء ولا معنى لها في ظل الحكم الديكتاتوري البوليسي ؟ كثير هاجمونا عندما كنا ننتقد جهاز الشرطة الغاشم ويقولوا : هؤلاء هم من يحمونا ..... طب هو اللي يحيمنا شرط إنه لازم يعذبنا بالتوازي ويحتقرنا ؟ .. وهل الشرطة في الدول المحترمة سايباها سبهلله في مقابل إنهم يحترموا الناس ؟ وأدينا شوفنا كلنا عملوا إيه في وقت الشدة ... مش سابوا أمننا فقط .. بل شاركوا في العمليات الإجرامية وبكره تتضح كل الحقائق لنعرف جميعاً إنهم كانوا أشد فتكاً على المجتمع من العصابات المنظمة . - هانقول وذنب الناس اللي إتخرب بيوتها إيه ... وذنب الشباب اللي ماتوا برصاص الشرطة إيه ؟ هذا يا سادة هو أقل ثمن للحرية .. وقارنوا حالنا برومانيا التي أنتفضت كلها ضد الطاغية شاوشيسكو عاوزين تعرفوا من هو الطاغية ده اللي يُشبه مبارك إلى حد كبير وممكن يكونوا تؤام كمان ؟ -------------------------- يُتبع

الكلام ده مش صح. انا مقدرة انفعالك طبعا. وانا ايضا رأيت (جزء ) من اجتماع مجلس الوزراء الاسرائيلى على البى.بى.سى. ازاى حضرتك تقول ان اسرائيل محتلة مصر؟؟؟يعنى ايه الكلام ده؟؟؟ الكلام ده خطير وملهوش اى اساس من الصحة .. هو اللى حصل فعلا .............بكل شفافية ووضوح وخلينا نتكلم برأس بارد جدا... تم التعامل بين مؤسستين...اسمهم نظام مصر واسرائيل............هو ده اللى حصل بالظبط. يعنى تعامل مصالح .. بمعنى ؟؟؟ اتنين بتعاملوا مع بعض بمبدأ ....الدنيا مصالح ياسى صالح شوف مصلحتك. اديلك الغاز بثلاث قروش ...وآخد منك عمولة . وتدينى شوية حماية من ولاد عمك... كدة يعنى .. وفيه اتفاقية وكلنا ماشيين عليها ومفيش مشاكل وكله تمام من اتنين وتلاتين سنة ....صح؟؟ قامت حركة 25 يناير.....اللى الشباب والمصريين قوى سموها ثورة .. وفيه ناس اسمتها انتفاضة ..,ناس اسموها ( تسالى ) وكل واحد اطلق الاسم اللى يريحه.. خافوا ... خافوا مش بمعنى ...اترعبوا ؟؟؟ لالالالالا هما بس شوية قلق.... شفت البورصة عندهم حصل فيها ايه؟؟ ......بسبب اللى عملناه ؟؟ شفت الغاز؟؟؟ اجتمعوا .....حانعمل ايه دلوقت؟؟؟ خصوصا ان فيه شوية دبابات دخلت منطقة ...غلط..؟؟ قالك بلاش نتهور دلوقت....اكيد عملوا كدة علشان يحموا نفسهم ...بس ده مش موجه لنا ومش لازم نسميه اختراق ف الاتفاقية بتاعتنا.. معايا؟؟؟ مش هو ده اللى حصل؟؟؟ طيب.................. حانهول الدنيا ليه؟؟؟ ومين قالك وأكد لك ان فعلا .......حد أخد منهم اسلحة ايه ومش عارف ايه؟؟ وانهم بيحاربونا وانهم مندسين داخل الشرطة ؟؟؟ كل ده مش حقيقى . خلينا نفكر بالعقل وبدون تسرع وبدون اى انفعال .. خلينا نفكر بكل العقل حتى ف الأخبار اللى بنسمعها او بنشوفها على فضائيات مشكوك فى مصداقيتها . لحد دلوقت... لحد دلوقت... ارادة الشعب هى اللى انتصرت ومحدش يقدر يقف ضد طوفان الشعوب اذا خرجت من القمقم وطالبت بالعدل والمساواة وقبلهم الحرية .. قليل من التفاؤل مطلوب ........حتى لايصاب الجميع بالاحباط والخوف وهو المطلوب ..أو..هذا هو ما يريدونه . دى ثورة قام بها شبابنا ...وتبعه شيوخنا ..ونساءنا واطفالنا . قام بها الشعب المصرى المطحون يطلب بحقه فى ....الحياة الكريمة ....فقط لاغير. نحن لانحارب احد... هذا حقنا... هذه بلادنا... اذا تغير النظام ....نلتزم بمعاهدة السلام...لكن؟؟؟ الغاز....،نحتاجه نحن لشعبنا المرهق ....ليست لدينا اى ميزانية للرفاهية حتى نوزع مواردنا بأبخس الاسعار .. بس خلاص.. وبين البايع والشارى يفتح الله.. مفيش مشاكل تجارية سوف تؤدى لمشاكل حربية ... و... مصر بلدنا احنا.... ودى مشاكلنا احنا الداخلية . وده ثمن الصمت اللى استمر ثلاثون عاما . لكن؟؟ خلاص .. انكسر حاجز الصمت...واتكلمنا. وشوية شوية كل شئ حايتحل . مساء الثقة .. :clappingrose:

لااااااااااااا اثبتوا مطاطي راسك ليه يا استاذ محمد؟؟؟؟؟؟؟؟؟ دا انا ما عرفتش ارفع راسي و افتخر و اقول بعلو الصوت اني مصرية غير اليومين دول امبارح كنت في مطار جدة و اختي اتصلت بيا قالت انه المخفي عين نائب له كان هاين عليا اتنطط و اصوت من الفرحة انا مصرية انا مصرية قولت الحمدلله مدام بدأ بالتنازلات يبقى احنا ماشيين صح و دا وقت اننا نكمل و نحس اننا عملنا حاجه بجد هو مرعوب و الكلاب اللي حواليه مرعوبين زييه اوعي اليأس يدخل قلبك الليل مهما طال لابد النور هايطلع و احنا صبرنا 30 سنة على ابن التيييييت دا مش قادرين نصبر كمان كام يوم و الله هايغور في ستين الف داهية ومصر بولادها اللي يفرحوا القلب هما اللي هايبقوا امبارح و اول و انا شايفة البلد بتولع كان هايجيلي انهيار عصبي و الله و عياط هيستيري و الضغط ارتفع بس رجعت قولت في نفسي لما بيكون في مرض مش كويس منتشر الحاجة الوحيدة اللي بتطهره الناااااااااااااااااااااااار و احنا بلدنا بقالها 30 سنة اتملت امراض الدنيا يمكن النار تطهر الارض و النفوس عارف حتى لو ما حصلش حاجه فعليه احنا برضو كسبانين كسبنا اننا غيرنا فكرتنا عن شباب مصر كسبنا اننا عرفنا ان ما فيش فرق في البلد دي بين مسلم و مسيحي كسبنا اننا عيدنا اكتشاف نفسنا كسبنا اننا قهرنا الخوف من امن الدولة و الامن المركزي و المباحث و الشرطة كسبنا اننا حسينا لاول مرة من زماااااااااااااااااااان اوي اننا لسا عندنا كرامة مكاسب مهمة اوي يا استاذ محمد مش عاوزين نضيعها باليأس و النفس القصير البيه التنح اللي لزق و مش عاوز يطلع نفسه طويل مع انه على باطل يبقى الاولى اللي على الحق هما اللي نفسهم يطول بالنسبة بقى للي حاصل على الارض ليا رأي و مش عارفه صح و لا غلط شبابنا و اهلنا بقالهم ست ايام واقفين بس في ميدان التحرير محلك سر و بيقولوا الامن هاينتشر في كل مصر ما عدا ميدان التحرير دا معناه انهم هايسبونا نهبهب في ميدان التحرير و هما هايكملوا حياتهم عادي دا هايخلي الناس تزهق و تحس ان ما فيش اي تقدم انا شايفة ان كده ما ينفعش لازم الامر يتطور كل محافظات مصر مقلوبة بس معلش في الاتحاد قوة و في التفرق ضعف ليه الناس في المحافظات ما تطلعش على القاهرة اولا العدد هايزيد جدا ثانيا الوقفة لازم تكون بتهدد البيه بشكل مباشر لازم المكان يتغير لازم يكون عند جحره عشان يترعب حاجه تانية هما حاليا شايفين ان الناس طالعة و قاعدة و بيقولوا الاجواء كأنها احتفالية و البيه الحماااااااااار هايطلع تاني بمنتهى قلة الادب يقولوا مش قولتلكم دول بيتسلوا خاليهم يتسلوا لأ احنا لا طالعين نتسلى و لا نرفه عن نفسنا شوية و ماشيين عشان كده لازم الناس دي يختاروا حد يتكلم و يتفاوض بالنيابة عنهم مع البهايم اللي لحد دلوقتي مش فاهمين او بيتغابوا علينا البرادعي انسان ايده نضيفة و مخه مرتب و ذكي و عاش و شاف الناس المحترمة عايشة ازاي و عشان كده اول ما جه اتكونت الجمعية الوطنية للتغيير و بدأت حملة التوقيعات عدد كبير وقع على البيان و لله الحمد انا منهم فا الشباب يتوكلوا على الله و الكل يمضى على التوكيل انه يتكلم بالنيابة عننا مع السلطة الزايلة ان شاء الله انا شايفة انهم يستغلوا الجمع و الحشود الموجودة و يبدأوا حملة التوقيعات و انا شايفة ان ما شاء الله الاعداد كبيرة يبقى كده البرادعي له الحق انه يتكلم بالنيابة عننا بدل ما يطلع افندي حمار يقول باي صفة السايح دا بيتكلم عن شعب مصر احنا عاوزين نديله بقى الشرعية اللي يتكلم بيها عننا الراجل ما قالش انه عاوز يبقى رئيس و كرر كتير ان مصر لازم تخلص نفسها انا مش المخلص و اهو حصل مصر كلها بدأت تخلص نفسها زي ما هو كان نفسه يبقى جه الوقت اننا نختار حد بنثق فيه و في نزاهته يمثلنا و يتكلم عننا في المرحلة دي ياااااااااااااااااا رب نصرك الذي وعدت بدأنا يا رب نغير من نفسنا ارضى عنا يا رب و غيرنا للاحسن و وفق ارض الكنانة و خير اجناد الارض لما تحب و ترضى اللهم آمين اللهم آمين اللهم آمين

بالعكس يا أستاذي ... أنا شايف تعاطف غير مسبوق مع المصريين من العرب جميعا ونظرة إكبار واحترام للشعب المصري لم أرها من فترة طويلة ... ويكفي أن تقرأ تعليقات المشاهدين العرب على شاشة الجزيرة مباشر لتدرك أن الثورة المصرية الآن أصبحت النموذج الذي يتطلع اليه الجميع وأن المصريين اصبحوا أبطالا ورموزا للحرية في أعين الجميع بعد أن كانت صورتهم لفترة طويلة مقترنة بالذلّ والجبن والهوان. إرفع رأسك فأنت مصري.

نقطة تانية عايز اوضحها في اللعبة الكبيرة اللي حصت دي في تونس ايه اللي حصل لما زين العابدين طلب من رئاسة الجيش النزول لقمع المتظاهرين الجيش رفض وقال أنه مش هيتحرك من الثكنات اصلا لقى زين العابدين نفسه وجها لوجه قصاد الشعب بعد ما الشرطة تراجعت ادام المتظاهرين فاضطر الزين للهرب لأن الشرطة تراجعت ادام الانتفاضة والجيش ما اتحركش من الثكنات اصلا فاضطر الزين للهرب وبعد ما هرب الزين حصلت عمليات السلب والنهب من فلول نظام الزين فساعتها بس نزل الجيش عندنا بقى ايه اللي حصل ... وواضح انها خطة جهنمية تم الاعداد لها من فترة طويلة - تحديدا من ساعة اللي حصل في تونس 1- الشرطة تنسحب 2- الفوضى تنتشر 3- الناس تصرخ وتقول اتحركوا انقذونا 4- الجيش ينزل الشوارع ويبقى الهدف المعلن هو حفظ الأمن في حين إن الهدف الحقيقي هو حماية النظام من المتظاهرين ( من دون التعرض للمتظاهرين في الوقت ذاته ) 5- يتم فرض حظر التجوال وزيادته تدريجيا عشان الناس تزهق - وفي حالة الاضطراب الزيادة يتم قطع الكهربا والمية من اجل زيادة الضغط على الناس 6- بعدين الجيش يفضل يحمى مباني الدولة وفي نفس الوقت يمنع المظاهرات من انها تتطور في اتجاه المناطق المحظورة 7- يبقى في الصورة الجيش نزل عشان يحمي الدولة ويدافع عن الناس ( ويمكن ده اللي صغار الضباط فاهمينه ) في حين ان الحقيقة انه بينفذ دوره في الخطة بمنتهى الدقة 8- شوية شوية الأمور تهدى والهوجة تنتهي 9- يظل مبارك في السلطة وسواء مبارك تنحى عن الحكم في نوفمبر الجاي أو لأ فاحنا لازم نعرف حاجة أمريكا عمرها ما عايزة لنا الخير حدش سأل نفسه ليه أمريكا مش عايزة البرادعي مع إن البرادعي عايش اغلب حياته بره مصر عشان البرادعي عايز ديمقراطية وامريكا مش عايزة ديمقراطية عندنا بأي شكل من الأشكال أمريكا عايزانا نبدل ديكتاتور ظالم بديكتاتور آخر أقل ظلما يعني بدل ما الحزب الوطني ياخد نسبة 92% في مجلس الشعب لا كفاية عليه ال 70% اللي يضمنوا له انه ينفذ كل قوانينه ويسيب الباقي لصياح المعارضة أمريكا عايزة شخص يضمن لها أمن واستقرار اسرائيل في المقام الأول وبعد كده يبقى يهتم بمطالب الشعب المصري لكن أهم حاجة انه ميقربش من اسرائيل ولو حصل ديمقراطية اكيد هتكون سياسة مصر ضد اسرائيل بعدين هما بدؤوا يدوا عمر سليمان شعبية ... ازاي تطلع محللة أمريكية تقول ان امريكا كانت تفضل سامي عنان فالشعب المصري يقول يبقى امريكا مش عايزة عمر سليمان اذن يحيا عمر سليمان. وفي نوفمبر ممكن يتم تسليم السلطة إلى عمر سليمان لكن ديمقراطية لالالالالالالالالالالالالا تعديل دستور والسماح بتعددية حزبية لالالالالالالالالالالالالالالا [ أود أن أنوه أنني لا أهاجم عمر سليمان - بل بالعكس أنا اعتقد أنه شخصية محترمة - لكن السلطة المطلقة مفسدة مطلقة ]

كشفت الدكتورة آمال عثمان، رئيس اللجنة التشريعية بمجلس الشعب، عن وجود ٤٨٦ نائباً بالمجلس مطعون فى صحة عضويتهم، موضحة أن ٢٢ نائباً فقط يمثلون ١١ دائرة لم تقدم ضدهم أى طعون، ستعلن اللجنة فى اجتماعها المقبل عن صحة عضويتهم، بالإضافة إلى النواب العشرة المعينين قالت الكلام دى يوم 23/1/2011 تخيلو لما 90 % من اعضاء مجلس الشعب مطعون فى صحتهم يبقى تصحيح ايه بقى اللى بيقولو عليه مفيش تصحيح لازم حل مجلس الشعب واعاده الانتخابات بالكامل بعد ما يغور الحيوان دى الاول طبعا

شيوخ أزهريون وقضاة ينضمون لمظاهرات ميدان التحرير

يا جماعة بالراحة انتم هجمتم عليا ليه كدا مرة واحدة - خلاص هاغير لكم الكلمة بكلمة الاحزاب مع ان الامانة تقتضى نقل كلام الظابط بالحرف الواحد على البي بي سي العربية لانى بانقلكم الخبر زى ما سمعته بالحرف الواحد لكن مراعاه لانكم ممكن يزعلكم الكلام داه انا هاغير الاخوان وابدله بكلمة الاحزاب السياسية وانا بصراحة مش مهم عندى ظابط امن الدولة اللى كان بيتكلم - واكيد العربية هتعيد الكلام بتاعه داه طول اليوم لما تصدعنا بيه لكن انا اعرفكم انتم - فمتقفشوش فيا مرة واحد كدا حرام عليكم - اكمنى غلبانة يعنى :P المظاهرات دى اللى قامو بيها الشباب لكن هل فعلا ممكن اى جهة تنسبها لنفسها فى الاخر على الجاهز كدا الله واعلم كل واحد بيطلع نفسه بريء دلوقتى وبيحاول اللى يعرف يهرب يهرب كان السفينة هتغرق مع ان السفينة لا هتغرق ولا حاجة لو فعلا عمر سليمان مسك الرئاسة نبقى محظوظين واكيد وصله الدرس كويس انه يمشي محترم مع انه هو فعلا راجل محترم خدو دى شموها ولا تزعلوا واحد لزوزو وواحد ل س س وواحدة لمكاوى وواحدة لحوسااااام الورد كله مسموم خلينا نخلص

ولا تقدر لإنها مش بالغباء ده .. وعارفه إن ساعتها الشعب كله هايتوحد .. ولو جيشنا مليون واحد .. ففي خلال ساعة هايتحول 80 مليون .. أقسم بالله أنا أول واحد أروح بلدي وأذهب إلى المعركة ولو بحجر لأدافع عن بلدي وارضي وعِرضي ..

فيديو يثبت تورط جهاز الأمن فى احداث السلب والنهب والحرائق المنظمة التى تعرضت لها المنشئاتِ http://www.youtube.com/watch?v=fvRWZswgt08

يا جماعة فعلا ياريت المتظاهرين يلتزمو بحظر التجوال بعد وقت معين وكدا كدا دى مظاهرات سلمية لان فعلا نهارده هتنضم عناصر غريبة عن المصريين ومخربين واحتمال من خارج مصر - وهيحاولو يستفزو الجيش فعلا اكثر مما نتوقع وهيكون شبابنا هو الضحية وكبش الفداء للمخربين دول وداه هما عاوزينه عاوزين يوقعو الجيش مع الشعب علشان مصر تخرب علشان كدا ياريت الشباب الكويس اللى هما اصحاب المظاهرة يلتزمو بكدا الجيش والصاعقة لازم نهارده يوم حاسم يبقى فى فرصة حقيقية معاهم انهم يعرفو مين الدخيل اللى ناوى يأذى البلد - فى اللحظة دى ويتصرفوا معاه فعلا فى عناصر مندسة ومخربة وغريبة عن ابناء الوطن - هتكون اليوم وسط الشباب المتظاهر بعد وقت حظر التجول ياريت الرسالة توصل ان الشباب يلتزم بحماية البيوت والممتلكات بعد الانتهاء من الاعتصام اليومي فى الاوقات المحددة على راى فتفوتة انشررررررررررررررررو

الصوره دي تستاهل جايزه يا اوز ايه الجمال ده عاوزين نعمل لما نروق توبيك مخصوص عن التحام المسلمين اولمسيحين ده معدننا الاصيل والله امبارح المطرانيات والكنايس فاتحه ابوابها للسيدات المسلمات واطفالهم الخايفين يدخلوا يتحاموا فيها لازم نركز على المواقف دي اصلها هيا دي الاساس اللي بقاله الوف السنين ايه الجمال ده !!!

رجال القوات المسلحة ليسوا عساكر أمن مركزى أو مخبرين سريين دول ولادنا واخوتنا ، وفوق كده متعلمين ومش وغسول دماغمهم ، يعنى برضه حيشغلوا مخهم ، واقصى شيئ يعملوه انهم يقبضوا على المخالف وادعوا ربنا ان ماتحصلش مواجهة بين الجيش والشعب ولو انى لاأعتقد انها ممكن تحصل. وعشان دول ولادنا لازم نخليهم يتصرفوا صح مش حنضعهم في مواجهة مع قوات الصاعقه وحضرتك عارف ان جندي الصاعقه غير جندي الامنا لمركزي سيتم عمل التالي : 1 - المظاهرات تستمر يوميا من الساعه 7 صباحا الى 3 مساءا 2 - يعود المتظاهرون الى منازلهم للراحه ودعم اللجان الشعبيه 3 - تفعيل العصيان المدني وعدم عودة الشعب الى العمل- الا المواقع الحساسه كالمستشفيات مثلا - حتى تنحي مبارك عن الحكم

لا احد يمكنه ان ينسب ما يحدث فى مصر لنفسه لا اخوان ولا معارضة ولا غيره الناس العادين هم صاحب الفضل الأول انهم المصريين وفقط

وعلى فكرة فى منطقة الشاطبى كان طلبة سان مارك هم من يقومون بتنظيم المرور

سلفيين ايه بس ولجان ايه ياعم مسافر الله يرضى عليك انا خايف بكره تقولوا السلفيين هم اللى عملوا الثورة الناس كلهم متعاونين مع بعض ، مفيش حاجة اسمها سلفى واخوانجى او مسلم ومسيحى. الناس يا أخى هم من يقومون بتنظيم أنفسهم كل شارع وكل تقاطع مقسمين نفسهم ومعاهم البوابين وسهرانين ورادى بالليل ، والمناطق اللى انا باتكلم عنها مافيهاش واحد سلفى ، وبعدين السلفيين اللى بتقول عليهم حيبقوا مشغولين بغيرهم والا حايحرسوا بيوتهم؟ بلاش والنبى الكلام اللى يفور الدم ده.

و فين رجال الدين من تنظيم اللجان الشعبيه ولا هو دورهم ينتهى فى خطبه الجمعه و و قداس الاحد ونشوفك الجمعه الجايه و الاحد الجاى السلفيين في الاسكندرية عملوا لجان شعبية بسم الله الرحمن الرحيم الحمد لله وأشهد أن لا إله إلا الله وأن محمد عبده ورسوله ، قال تعالي " وتعاونوا علي البر والتقوي ولا تعاونوا علي الإثم والعدوان " لا يخفي علي أحد ما حدث بعد مظاهرات الأمس من تخريب للممتلكات العامه والخاصه وعمليات سلب ونهب تعرض المجتمع كله لأعظم المخاطر ، وأي مكاسب تحصل للأمه من تدمير وحرق المباني العامه والوثائق والمستندات وإطلاق صراح المجرمين ، وكل هذه المصائب يخشي من تضاعفها في حالة إستمرار الفوضي . والواجب علي المسلمين التعاون علي منع ذلك وحماية الممتلكات العامه والخاصه والتحذير من التخريب والسلب والنهب والسرقات والإعتداء علي الناس. وأولي الناس بذلك هم الصالحون من أبناء كل حي الذين يجب عليهم جميعا التعاون والإجتماع علي النهي عن هذه المنكرات ومنعها ونذكر الناس بأن الأموال العامه ليست مباحه بل هي أعظم حرمه من الأموال الخاصه ، قال الله تعالي " ومن يغلل يأتي بما غل يوم القيامة " فيجب علي كل من أخذ شئ من أموال المؤسسات العامه أو من الأشياء الموجوده فيها أن يرده ويحرم الإنتفاع به لشخصه أو أسرته ، ولنذكر الناس بقول النبي صلي الله عليه وسلم " كل المسلم علي المسلم حرام دمه وماله وعرضه" وليجتهد الصالحون من أبناء كل حي في التواجد في مجموعات ـ لا فرادا ـ لحماية الممتلكات قدر الإمكان وليمنعوا الإجرام والإعتداء ، وليتصدوا لكل من يحاول الإعتداء علي الأعراض والأموال العامه والخاصه وليحرصوا علي تجنب الصدام والإختلاف مع بعضهم أو بعض المتظاهرين لأن غرضنا إقاف الفوضي ومنع دفع البلاد إالي هاوية مجهولة. وفي حالة إختناق المرور ينبغي التصدي لتنظيمة وكل هذا لحين إستقرار الأوضاع ، وفي حالة تواجد قوي الجيش لابد من التعاون معها وتمكينها من حفظ الأمن والإستقرار . ونقترح كتابة لافتات تعلق في الشوارع فيها التحذير من الأعتداء علي أعراض المسلمين وأموالهم نحو ( اتقوا الله في أموال المسلمين ) و ( كل المسلم علي المسلم حرام دمه وماله وعرضه ). ونسأل الله أن يحفظ بلادنا وسائر بلاد المسلمين من الفتن ما ظهر منا وما بطن. الدعوه السلفيه بالأسكندرية قامت الدعوة السلفية بالأسكندرية يوم السبت الموافق 29 / 1 / 2011 م بتكوين لجان شعبية من أبنائها بالتعاون مع أهالي الأحياء والمناطق لحماية الممتلكات العامة والخاصة ، وتنظيم حركة المرور. وقام أبناء الدعوة بالتعاون مع الجيش المصري بحفظ الأمن وتسليم المخربين وفاعلي الشغب. وأصدرت الدعوة بيان بهذا الشأن في وقت سابق.

مش جايب جديد بس جايب أكيد في اتصال هاتفي مع أمي و أبي في الزقازيق أكدولي إنهم عاملين لجان مقاومة شعبية من الشباب في كل شارع و التنظيم كالآتي: إن كل شارع بيطلع منه حد كبير و معروف هو اللي يقود الشباب و يحط عليهم مثلاً واحد من الشباب الواعي يقودهم و معاه باقي الشباب في شارع والدي القائد هو محامي كبير أوي و ابنه وكيل النيابة .. الشباب والدي بيقولي أسووووود .. الشباب دول هم اللي والدي طول النهار و الليل يشتكي من خناقاتهم و شربهم بانجو و حشيش ع الناصية .. هم هم نفس الشباب اللي جابوا السلاح اللي بيتخانقوا بيه و خلوه سلاح يدافعوا بيه عن الشعب و عنهم. أمي بتأكدلي مفيش جنس مخلوق بلطجي قادر يهوب ولا يعتب الشارع .. و كل الشوارع كدة .. لجنة مقاومة في أول الشارع و في اخره و عينك ما تشوف الا النور رجااااااالة مصر غصب عن اي حد و مكملين و خليه يخربها على دماغه ان شاء الله عشان هي مش هتخرب مهما حصل و اللي كان وحش أصبح حلو و اللي كان بيتخانق بسنجة بقى بيدافع بيها عن أخوه و اللي كان بيشرب حاجة بطلها و الله بنشكر السيد الرئيس (ربنا يحرقه بجاز) على توحيده للشعب المصري ضد خطر البلطجة .. نشكره على تغيير الشباب الصراحة من سئ لأحسن بالطبع بالله بنشكرك يا ريس و بنتمنالك الحرق و العذاب و السعير و الحميم و الشلل و الذل و الفقر و المهانة و الفضيحة بنشكرك من كل قلبنا و بنتمنالك من كل ما فينا و من فينا ان تسير عارياً في الدنيا و الآخرة محملاً بالخزي و العار و نتمنالك أسوأ الأمنيات القلبية و نتمنالك الابتلاء في كل عزيز لديك بكل شر قد موجود على وجه الأرض شكراً يا بأف على توحيد المصريين لأول مرة من 30 سنة

أقسم بالله ده إحنا لينا الجنة إن شاء الله والواحد كان صابر غُلب بأضرب بعيني تحت في الموضوعات المشابهه لقيت موضوعا بعنوان " خلاصصصصصصصصص .. عاوزين الخلاص ) أتاريه من موضوعاتي وأنا ناسي كالمعتاد ... من 2004 برضوا والنبي شوفوا الناس العسل اللي هما الشعب المصري اللي لها الجنة دي

الحمدلله حمدا كثيرا اتصلت باهلي كلهم سواء في القاهرة او في اسكندرية خالي في المعادي بيقولي الشباب الله يبارك فيهم عاملين متاريس على مداخل الشوارع و واقفين صاحيين زي الاسود ماسكين عصيان و سكاكين عشان يدافعوا عن اهلنا في البيوت و ممتلكات الناس كمان نفس الحكاية عند بيت بابا و بيت خالتي و بيت اختي في اسكندرية الشباب واقف عشان يتصدى للبلطجية و الكلاب اللي طلقوهم علينا ربنا معاهم و يحميهم و يوفقهم و يباركلنا فيهم يا رب هما الشباب دول اللي الامل فيهم بعد الله سبحانه و تعالى انه يحافظوا على مصر

لو تم ده وأدعوا الله أن يتم يبقى إن شاء الله بعد 10 سنين بالكتير هنكون من الدول العظمى وكلنا على اتم أستعداد ننزل مصر ونبنيها من جديد

كلنا يتألم لما يحدث الأن ... لكن من منا لم يتألم عندما يولد له مولود وهو يرى زوجته خلال 9 أشهر تتألم وتجاهد وتتعب .. وعند الوضع تتعرض للموت .. ولا أعتقد هناك أم لم تعتقد 100 % أنها ستموت عند الولادة من شدة الألم ؟.... ومن منا فكر في الذهب اللي في إيده أُستخرج من باطن الأرض بالساهل .. وبيلاقوا في الجبال غوايش وأساور وخواتم جاهزة من غير تعب ؟ وأعتقد بل أكاد أُجزم إن العملية لو كانت سهله ولو كان خرج 10 أنفار لميدان التحرير ينادون برحيل الطاغية .. واستجاب ورحل .. ما كناش هانعرف قيمة تلك النعمة اللي إسمها حُرية ... إيه ده لأنها سهل أهي .. 5 أو 6 يطلعوا .. ارحل يا جزمه .. يرحل الجزمة على طول ... الله دي وصفه سهله .. أما لما نتعرض لمحنة ونرى التراب والغبار ينتفض من على معدن وكنز كبير إسمه شباب مصر الواعي اللي طلع يحررنا .. وهو نفسه واقف يحمينا بعصايا ماسكها في إيده وينضرب عليه نار من الشرطة تارة .. وتارة أخرى بالأمس من المجرمين اللي عاوزين يسرقوا بيت جيرانه ويروعوهم ويهددوهم ..... الشباب اللي كنا ناسينه ومحطمينه وينقول عليه فاشل وبتاع شات وفيس بوك وبنطلونات ساقطة وشباب روش طحن بينزل بيتحرش بالبنات في شارع جامعة الدول وما ينفعش الا في شرب البانجو وكبيره قوي لو إتخرج يدور له على فرصة يهرب بها خارج مصر سواء بمركب تغرق في وسط البحر أو يتذل في بلاد العُرب اللي كانوا أخواني في يوم من الأيام مش كنا بنقول عليهم كده أيها السادة ومش حاسين بهم ؟ عايزكم تتخيلوا معي بإذن الله عندما تنقشع الغُمة ونبقى دولة محترمة لها دستور محترم وفيها مساواة وعدل ومواطنة ... كلنا بنحب بعض ونستحمل بعض على الحلوه والمُره .. مش هاقول هانبقى مجتمع ملائكي .. لكن اقصد إننا هانبني بلدنا بحب ... وهانتعب عشان عارفين إننا هانلاقي مكافأة ... تخيلوا معايا وإنت شايف الشخصيات اللي إنت بتفتخر بها هي من تقود البلد أحمد زويل وزير للتعليم البرادعي وزير البحث العلمي مجدي يعقوب وزيراً للصحة العالم مصطفى السيد وزيراً للتربية والتعليم شخص مثل أحمد رشدي وزيراً للداخلية .. شخص مثل أبو غزالة وزيراً للدفاع ... شاب صغير محترم ونابغ في مجال التكنولوجيا وزيراً للإتصالات فلاح فاهم وواعي وخايف على بلده وطالع من طين مصر وارضها الطيبة وزيراً للزراعة ... عامل مجتهد ذاكر وعلم نفسه وحرفي ماهر وزيراً للصناعة .... أي محاسب أو إقتصادي يبقى وزير للإقتصاد والتخطيط مش واحد بيسب الدين للناس أما أعضاء مجلس الشعب وماحدش يقول له عيب ... تخيلوا معظم ميزانية البلد وهي توجه للتعليم والبحث العلمي والصحة وطظ في اي حاجه إن شالله ناكل عيش وملح لمدة 5 سنوات بس نزرع تعليم وعلم وصحة في الناس اللي السوس نخر عظمها وخلاص ما بقاش فيها من الكبد الوبائي والسرطان وشرب مياة المجاري .. عشان نحصد تقدم وكرامة .... تخيلوا كل ده معايا وقولوا لي رأيكم ؟ عذراً ... كثير من الزملاء بعت لي بالأمس وكتب على العام بالمنتدى أو أتصل في التليفون ويكادوا يسبوني عشان كنت بأسخن الناس ولا أتوقف عن الكتابة منذ تقريباً 10 سنوات عن حريتنا كمصريين وعن ضرورة التحرك وخلع هذا النظام الظالم بالقوة ... وهما بيقولوا : عاجبك كده ولعتها ؟ وكأن مصر كلها كانت مستنيه كلامي أنا .. وكأن كل الملايين دي كانت عايشة في رخاء وأنا اللي سخنتها ... وكأن كان في طُرق عديدة كنا ممكن نمشي فيها ونتجنب ما يحدث لكننا أقتصرنا الطريق وأخترنا طريق التخريب والتضحية .. كلا أيها السادة .. الكل كان يشعر بنفس الظلم ... الكل كان يرى بعينه ديكتاتور ظالم لا يعرف الله ولا يتقيه فينا ويسرقنا وينهبنا ويحكمنا بالحديد والنار لمدة 30 عاماً وعاوز يكمل كمان 6 سنوات ويورثها لأبنه ... الكل كان يرى أنه أصبح مغيباً ومصاب بكل أمراض الشيخوخة وجميع الفاسدين من حواليه بيسندوه عشان يبقى موجود ولو كان حتى مومياً كما كان الحبيب بور قيبة في تونس .. عشان وجودهم من وجوده .. الكل كان يرى أحمد عز وفساده وتجبرة .. وفتحي سرور وصفوت الشريف ونفاقهم ... الكل كان يرى حبيب العادلي وبطشة وتنكيلة بالشعب ... لا اُخفي عليكم ... أ عادل بيتصل الأسبوع الماضي يقول لي خف شويه إنت لسه ما جربتش يعني إيه أمن الدولة ... أقسم بالله العظيم ولا يهمني ... لأني ساعتها هاعرف إني بأضحي عشان سبب وهدف نبيل .. والحمد لله لا ممسوك بأبيع بانجو ولا بافتري على النظام العادل الديمقراطي وأخرج عن الحاكم بأمر الله بمنتهى الظلم مني ... هل كلنا ما كناش شايفين ذلك ؟ هل فينا حد كان عنده طريقة تانية غير كل الطرق اللي حاولنا من 30 سنة ننصحهم بها أو نوصل صوتنا لهم ونقول لهم خافوا ربنا فينا حرام عليكم الشعب قرب ينفجر ؟ وأظن كلنا شوفنا المناظر اللي قبصوا عليها أمبارح كانت بتسرق وتنهب وتروع الناس .. إيه كنا أول مره نشوفهم ؟ مش هما دول سكان العشوائيات المطحونين ؟ مش هما دول اللي كانوا طبقة وسطة وغلابة زينا لكن إنسحقوا وأنطحنوا والأغنياء والحيتان داسوا عليهم ومصوا دمهم لحد ما خسفوا بهم الأرض وسكنوهم بالمقابر مع الميتين .. وسكنوهم في عشش في العشوائيات فأنتشر بينهم زنا المحارم وتفتحتهم أعينهم وهم صغار على مناظر الكبير نفسه ما بيشوفهاش ... وأكلوا من الزبالة .... وشربوا مخدرات قبل سن العاشرة وخرج منهم التوربيني وعصابات أطفال الشوارع .. والبنات اللي موجوده في الشارع وبتُغتصب ليل نهار تحت الكباري .. بل بينجبوا أطفال في الحرام في الشارع برضوا .. وهم منتشرين بالملايين والصالح منهم بقى سواق توك توك أو سمكري سيارات إيه .. مش كلنا كنا شايفين ده ليل نهار ومتوقعين إنفجارهم في أي لحظة ؟ تخيلوا إن ما كانش في ثورة في ميدان تحرير .. وقرر هؤلاء الملايين اللي بيمثلوا أكثر من 40 % من عدد سكان مصر يعني 32 مليون بني أدم بالشكل ده ... تخيلوا مليون منهم بس كانوا خرجوا علينا وأكلونا زي ما شوفنا أمبارح واول ... كنا هانقول سي السيد وأمثاله هما اللي عملو ا كده ؟ أو كنا هانهرب ونسيب لهم البلد ؟ ولا كنا هاندفن راسنا في الرمال أكتر وأكتر ؟ أقول لكل زملائي الأعزاء ... إن أستنشاق هواء الحرية .... والإستمتاع بلحظة واحده تشعر بها إنك إنسان له كرامته وأحترامه ... اقسم بالله كل ده يساووي عُمر بحاله عشت ومُت فيه وإنت مُهمش ومالكش صوت ولا هدف .. وزي ما روحت زي ما جيت ... مش دي حياة ملايين من الناس أيها السادة ؟ ييجي الدنيا يتعلم ويشتغل ويتجوز ويخلف وبعدين يموت ... ومش مهم الحشو .. هو كان إيه ؟ مش مهم .... طب كان له هدف ؟.. برضوا مش مهم .. طب عمل إيه في حياته زيادة عن سوري يعني اللي الحيوانات بتعمله بالفطرة ؟ برضوا مش مهم أهو جايين الدنيا ما نعرف ليه ولا رايحين فين ولا عاوزين إيه ؟ عفواً للإطالة عليكم .. ولكن حبيت اوضح وأقول للجميع إننا في مركب واحد .. إذا نجت ستنجوا بنا جميعاً . .. وإنها بإذن الله لن تغرق طالما كلنا إيد واحده .. وطالما كلنا بنضحي بدون تبرير أو بدون ملامه وعتاب بيننا ... وطالما كنا بنحب الوطن والأرض اللي عُمرها ما اساءت إلينا أو حرمتنا من حاجه .. لكن اللي حرمونا كانوا الكلاب الظلمة اللي شايفنيهم دلوقت وهما بيهربوا زي الفئران المذعورة وهانجيبهم كلهم بإذن الله .. وبلدنا هاترجع لينا .. وثرواتنا اللي إتنهبت على مدار عقود من الزمن هاترجع لينا .. أخيراً .. عاوزكم تتيخيوا أولادنا وهما مش محتاجين يهاجروا بره مصر .. وهما رايحين المدرسة بمنتهى التفاؤل .. وهم مش بيفكروا في المستقبل المظلم لبلد بتتباع ... وهما بيطلعوا في بيئة صحية ونظيفة ومحترمة .... لا أتكلم هنا عن ثراء فاحش وإنا كلنا يبقى معانا عربيات وثروات في البنوك .. ولكن أتكلم عن كرامة وعزة وحرية .

صباح الخير يا مصر يا ام الدنيا رغم الاحداث المؤسفة اللى حصلت امبارح بس بقيت بنام مستريح طمنونى مصرنا عاملة ايه دلوقتى انا متاكد انها فى ايد شباب امين فى ايد ناس عايزة تعليها بجد فى ايد ناس هتحافظ عليها يارب دايما جمعنا عالاخوة والمحبة وحب الوطن يا عزيز اعزنا يا جبار انصرنا عالمعتدين يا منتقم انتقم من الظلمة والسفلة مصر باذن الله بخير وهتفضل طول عمرها بخير بحب شعبك بفوة شبابك بحضنك الدافى

يا جماعة قعدتوا تسخنوا تسخنوا لحد ما الغضب أعمي العقول كل الشباب راح علي وسط البلد عشان يتظاهر وسابوا وراهم النساء والأطفال والشيوخ عرضة للبلطجية وحكاية اللجان الشعبية مش كفاية لأنهم عزل حتة خشبة قصاد الألي اللي بيتكلموا بالعقل مش مرجفين ولا عملاء لمبارك كلنا أنكوينا بنار عهده الظالم بس لازم يكون في عقل دي حرب خدعة ومكيدة مش هيه يلا بينا وخلاص ثم النت مقطوع في مصر يعني إحنا نتظاهر من ورا الكيبورد ونسيب الناس تدفع التمن

الله أكبر عمليات إستجابة واسعة وإنقاذ فوري لأي حد بيحس بالخطر ما شاء الله على مصر والمصريين أرقام أخرى للأستغاثة أرجو نشرها رقم أخر للجيش في القاهرة فقط 0224184531 ‘تحاد الأطباء العربي 02526233 25286237 0104400045 اللجنة الشعبية بالطالبية 0100935400

http://www.youtube.com/watch?v=tuiIhW5VVbk&feature=player_embedded#at=27 mf_p:

والله تصدق الدمعه هتفر من عينى