لوحة القادة

اتفرج وشوف الشعب المصرى بيعمل ايه http://www.youtube.com/watch?v=h5GSfSRY2PQ الشباب المصرى بينظف ميدان التحرير

علي فكره..انا تقريبا قدرت احدد مشكلة الريس تقريبا..ما عندوش دش في البيت..شكله كان مانعه عشان أخلاق الولاد ما تبوظش عشان كده لا عنده الجزيرة..ولا حتي شبه الجزيرة هو عمال يتفرج علي القناة الأولي..و التانية..و اللي بيأكدوله ان المواطنين التزموا بحظر التجوال و زمانهم اتعشوا و شربوا لبن بالمبيدات المسرطنة و ناموا من زماااان

كلنا اليوم يد واحده...مسحيين ومسلمين....ضد الإرهابي الحقيقي.....نظام حسني مبارك يا اغابى يا غريب مش وقته الله يكرمكم

دي مش من أخلاقي يا أغابي ، وده مصدر الخبر الذي لم أره أصلا على التلفزيون ولكني وجدته في مصادر موثقة موقع أخبار الجزيرة أخبار ياهو مكتوب أرجعي للموقعين وقولي هل زودت حرف أو أنقصت حرف ولا لأ ؟؟ انك تطلع المسيحين كانهم كذا وكذا (...) وهل المسيحيين البابا شنودة أو غيره ، وهل المسلمين شيخ الأزهر أما الغرض اللي جوايا الـ(مش كويس) على حد تعبيرك فتشهد عليه مشاركاتي بالمحاورات أنا نقلت خبر موثوق ولم أعقب عليه بأي شئ، ولكني نقلته لأنه أستفز مشاعري للغاية. ولكنك صوبتي وجهة نظرك بطريقة مباشرة وياليتك أستفسرتي هل هناك أصلا غرض (مش كويس) من هذا النقل أم لا.. شكرا اعتقد يا اغابى ان ده مش وقت مسيحيين ومسلمين تانى بقه كفايه ال بيحصل لنا دلوقت فى مصر اخونا الغريب او غيره انا و انتى و كلنا مش بنغلط لما ننقل خبر كما هو من مصدره و بلاش الحساسيات ال مش وقتها دلوقت الله يخليكى كفايه ال احنا فيه...اهالينا فى مصر فى رعب و منهم المحاصر و القلق مش سايبنا و لا بينيمنا الليل

فعلا موقف الازهر مخزي و كما منعت الكنائس الخروج للمظاهرات في اول يوم خرج المفتي و علماء الازهر بفتوي لتثبيط العزائم و مع كل دا خرج شباب مصر كل واحد يتمني نفس الاماني و بتطلع لنفس المستقبل و شايل كفنه علي ايده زي ما بيقولو لسبب بسيط ان كل واحد معدش بيثق في كلام موظفين الحكومه و اجمل حاجه حصلت في الايام الصعبه دي فعلا هو الاتحاد و الاقتراب و اظهار المشاعر الحقيقيه لكل افراد الشعب و ليس المواقف الرسميه المقصود بها الفرقه اعمالا لمبدا فرق تسد والله شعبنا جميل و طيب و فطرته حلوه اوي بس يسيبونا فحالنا من غير فتاوي الازهرو لا كلام الكنيسه

يا نهار اسود عليهم و على عيشتهم هو في ايه انتوا فييييييييييين يا اخوانا حد يفهمني لسا بتطبلوا ليه؟؟؟؟؟؟؟؟؟؟؟؟ زي امبارح الناس كلها مالية التحرير و دول على قناة النيل للاخبار جايبين كوبري 6 اكتوبر فاضي و كان فاضل يرشقوا شوية حبيبة و واحد بيشوى درة لزوم الرومانسية الكوحيتي للشعب المصري الغلبان استغفر الله العظيم ياااااااا رب ارحمنا منهم بقىىىىى

السلام عليكم و رحمة الله و بركاته المشروع القومي الجديد..... هو فعلا جديد؟؟؟؟ و لا كان و لا زال حلم جوه كل واحد فينا.... مهما بعدنا بس كان جوانا استاذي أسد و حضرتك بتطرح المشروع القومي الجديد لقيت نفسي بفكر بيوم الرجوع.... يوم ماآخد التذكرة و مش بس بوردينج اقلاعو لا هبوط.... ده يوم لما آخد قرار.....و اقول لنفسي انا راجعة و مشمرة دراعاتي و مستعدة دلوقتي اني اعزق في الارض الطيبة دي....اللي احيانا كنت بتساءل....يا تري الارض العفية دي هتفضل صامدة لغاية امتي يا تري الارض العفية دي.... هي فعلا فيها حاجة حلوة و لا انا اللي عايشة في حالة نيرفانا و منفصلة تماما عن واقعي دلوقتي لما الحلم...مبقاشي حلم و لما السؤال بقي ليه الف و الف وش مصري يقولي....ان احنا بخير... و معدننا نضيف و ارضنا عفية و هتفضل كده و البركان اللي انتفض......صحيح هتطلع منه "لافا"....لكن اللافا دي هتسيب وراها ارض من اخصب ما يكون و انا بفكر في المشروع القومي...... حلمت....و متأكدة المرة دي ان حلمي هيبقي حقيقة...أكيدة حلمت...ان المغترب...اللي هو انا...و حضرتك.... و ناس كتيرتانية.... و اطفال كتير اتولدت بعيد عن الارض الطيبة... و وولاد لسه هتتولد...و عايزين نسقيها حب الارض فكرت ان المشروع القومي دوت.....لازم....يضمنا لازم نلاقي فيه حقنا......حتي لو احنا بعيد...من حقنا يبقي لينا صوت في اي حركة سياسية بتحصل علي ارض الوطن من حق كل حد فينا انه يكون ليه بذرة حلم... مشروع.... جميعة خيرية...... ان شاله حتي محاضرة يديها.....لاخواتنا هناك.... حاجة تربطنا...و ترجعنا.....و تقولنا ان احنا قادرين نساعد حتي لو ظروف العودة دلوقتي مكانتشي متاحة زمان ابتدينا مجموعة شباب....جمعية صغيرة...عشان اطفال اللويكيما.....كانت احلامنا زي ما قال عنها اللي حوالينا منتهي الجنون......و نحتنا في الصخر عشان الحلم يبقي حقيقية و انهكتنا القوانين.....و في لحظة تيه استسلمنا و كل منا سافر علي مدينة من مدن الاغتراب النهاردة.... وحشني الحلم..... وحشني ارجع ليه..... وحشني اكمله..... وحشني اصحيه تاني بين الضلوع وحشني....نرجع نقاوح تاني..... وحشني ....نرجع نبني و من مافيش... بس المرة دي.....ما بقاش فيه مافيش.....حقيقي بقي معانا راس مال كويس و لله الحمد بس بقي معانا و ده الاهم راس مال تاني......من الايمان....من اليقين.....ان لسه مصر ارض عفية.....و خصبة من شوية بصيت في عقدي...و عرفت ان باقي لي في بلد الاغتراب سنة....و حطيت لنفسي اللي بنسميه "خطة تنفيذية".....و كتبت...الحروف.....و حطيتها في قلب الدايرة و قولت لنفسي...."م...ص....ر" هي قلب الهدف حطيت خطة بناء.......حقيقي هي ليا......بس حبيت احطها و اناببني هناك في البلد الوحدي حيث دوما انتمي هفكر في الف بذرة ترجعني تاني.... و المرة دي راجعة و كلي حنين... و يقين... و ايمان....اني ببني لولادي..... في ارض عفية جدا جدا جدا بتعرف امتي تصحي.... و بتعرف امتي تقوم صباحكم...مشروعنا....المصري جدا جدا جدا

لماذا لم يفجر القاعدة الكنائس بعد جريمة انسحاب الأمن من الشارع ؟ كل الكنائس ليلة الجمعة الماضية كانت مغلقة و بدون حراسة تماما بعد انسحاب الأمن ، والفوضى والتخريب تعم الشوارع،وفى شارع شبرا خرج المتظاهرون – شباب الثورة الحقيقين -يكسرون فى قسم الساحل الجديد ولم يحرقوه خوفا على كنيسة سانت تريزا من إن يلحقها الضرر. وعلى بعد خطوات وبشارع أبو طاقية كنيسة سرجيوس قام الشباب مسلمين ومسيحيين بحمايتها من البلطجية بعد دعوة الجامع بنزول الشباب لحماية الشارع من بقايا الشرطة والبلطجة والحزب الوطنى الذى فقد شرعيته فى الشارع الذين ينهبون ويسرقون لترويع المواطنين . رغم انسحاب الأمن من الشوارع وبالطبع ترك الكنائس بدون حراسة ،وانتشرت مظاهر الفوضى والتخريب والدمار الذى طال حتى أقسام الشرطة والمحاكم ، إلا أننا لم نسمع عن عملية إرهابية واحدة ضد اى كنيسة ،ولم نشاهد جيش الإسلام الفلسطينى يقوم بتفجير احد الكنائس تنفيذا لفكر القاعدة،ولم نر متظاهر واحد يلقى بطوبة على احد الكنائس ،رغم إغلاقها وعدم وجود حراسة. وبالطبع نظرية المؤامرة عادت تلح على ذهنى مرة أخرى ،بان يكون حبيب العادلى وبقايا نظام الطاغية وراء إحداث الفتنة الطائفية فى مصر وليس تنظيم القاعدة كما يردد ليبث الرعب فى قلوب المصريين جميعا وليس الأقباط. وإذا رجعنا بالذاكرة إلى الوراء والى تسعينات القرن الماضى ، نشرت صحيفة النبأ قصة الراهب المشلوح،التى أثارت الأقباط وشحنتهم وجعلتهم يتظاهرون بالكنائس ،وزرعت الفتنة بين المسلمين والأقباط. ولم نكاد ننتهى من قصة الراهب المشلوح إلا وامن الدولة اخترعت قصة إسلام وفاء قسطينين وسربتها إلى وسائل الإعلام لتثير الضغينة بين المسلمين والأقباط . وبعد سنة تقريبا سربت امن الدولة لأحدى الصحف "سى .دى" مسرحية الكنيسة بالإسكندرية الذى تسبب فى إثارة المسلمين وخروج المظاهرات التى تهتف ضد الكنيسة ،مما أدى إلى خروج احد المواطنين المسلمين وطعن احد المسيحيين بالكنيسة . وقبل عام وبالتحديد فى عيد الميلاد المجيد جاءت إحداث نجع حمادى الذى راح ضحيتها 6 أقباط ،واصابة اكثر من 20 وتسبب ذلك فى احتقان طائفى من الأقباط ضد المسلمين ،وتردد فى وقتها إن نائب الوطنى وراء هذه الأحداث. وبعده بعام جاءت تفجير حادث كنيسة القديسين ليزداد الاحتقان لدى الأقباط ،إلا أن المواطنين المصريين تداركوا هذا الخطر ووقفوا ضد هذه الفتنة. وجاءت ثورة الغضب يوم الجمع لتؤكد إن النظام وراء هذه الأحداث ليبعد الناس عن مطالبه الحقيقة ،إلا أن احمد ومايكل ومحمد وجرجس ومارى وخديجة كلهم خرجوا يوم الجمعة الماضية وأيديهم فى أيد بعض وهم يهتفون " الشعب يريد إسقاط النظام" ، الذى كان وراء كوارث المصريين http://www.youm7.com/News.asp?NewsID=345158

انا بصراحة مش عارفة ليه طالبة معايا اغاني وطنى اليومين دول مع ان 6 اكتوبر عدت والعاشر من رمضان وعيد الثورة لكن مش عارفة ليه عاوزة وحابة اسمع اغاني وطنية كل واحد يسمعنى على زوقه اغنية وطنية تكون غالية عليه

النظام نفسه أطول بينما الناس وراها مسؤوليات وأشغال وهتتعب من التظاهر في النهار والحراسه في الليل وده هو هدف التأخير المتعمد الذي يمارسه مبارك ونظامه في كل خطوه ... انهاك المتظاهرين وكسب المعركة بالنقاط وليس بالضربة القاضية. استمرار التظاهر في ميدان التحرير كان له هدف رمزي وتحقق ... والآن كسر حاجز الخوف من الأمن وضمنت حرية التجمع والتظاهر بعد دحر ميليشيات الأمن المركزي ... لكن طالما المراكز الحيوية القريبة من الميدان مثل وزارتي الداخلية والإعلام لم تصل اليها الجماهير فالنظام لن يهتم كثيرا بتجمع الناس في الشوارع والميادين المفتوحة. رأيي أن يتم استغلال الزخم الذي تحقق - والذي من الصعب أن يتكرر لو خمد - والانتقال للخطوة التالية ... وهي اختبار موقف الجيش الفعلي بمحاولة السيطرة على ماسبيرو أو بنقل المعركة الى سراي القبة ... الجيش سيكون أمام حل من اثنين ... إما البقاء على الحياد وفي هذه الحالة سيتلقى النظام ضربة إضافية لأنه سيدرك أن الجيش قد تخلى عنه ... أو سيرد بالقوة المسلحة وبذلك ينكشف موقفه أمام الناس وتتّضح نواياه ويدخل في معركة خاسرة مع الشارع (مع احتمال حدوث حالات عصيان بالجملة وانهيار القيادة العسكرية الموالية لمبارك) ... وفي الحالتين فإن النظام خاسر ... أما بقاء الغموض في موقف الجيش مع استمرار النظام في تنفيذ مخططه وزيادة ساعات حظر التجول تدريجيا لتشمل اليوم بأكمله والعودة التدريجية للأمن الى مراكزه وانحسار التغطية الإخبارية مع بقاء حظر الانترنت والاتصالات وبدء الخلافات والانشقاقات بين قادة الانتفاضة فمعناه الموت البطئ للثورة وهذا ما يسعى اليه النظام.

R.N.N | شبكة رصد التحرير | المتظاهرون يضعون شاشات عملاقة لمشاهدة قناة الجزيرة ..16 minutes ago قريت عالجزيرة ان فيه شباب من المتظاهرين دلوقتى بيخترعوا دوائر تليفزيونية عشان يبثوا من خلالها لمعظم القنوات ومنها قناة الجزيرة الله عليكم يا شباب مصر والله حرام يعيشوا بره وكل مجهوداتهم لدول تانية غير مصر

الأخ الفاضل أعتقد ان سياسية النفس الطويل اللي بيتبعها معنا..هتأثر عليه هو كمان حتي لو بشكل غير مباشر قرأت اليوم خبر من الجزيرة ان عمان خسرت في البورصة بسبب الأوضاع في مصر أكتر من 800 مليون ومش بس عمان..اقتصاد كل الدول العربية تأثر تأثرا شديدا بل..و اقتصاد العالم شركة اوبك نفسها بتقول ان ممكن يحصل مشاكل بترلية بسبب الأوضاع في مصر و أعتقد ان ان شاء الله ان دي ممكن تكون ورقة الضغط علي الدكتاتور لكي يبدأ هو في الركوع و ليس نحن ..فنحن لا نركع الا لله تعالي و دي عناوين من الجزيرة اليوم تؤكد ان شاء الله صحة ما أقول أحداث مصر تشعل أسعار النفط تخفيض التصنيف الائتماني لمصر و غيرها من الأخبار

صحيح فين لعيبة الكورة اللى ناس كانت بتهتف لهم...وتشيلهم على الأعناق؟؟؟ فين المطربين بتوع الأغانى الوطنية و ماشربتش من نيلها... مافيش حد بيطلع يحمس الشعب ليه ...الناس بتسمع أغانى أكتوبر كأن دى كانت أصدق فترة مرينا بيها و خلصت فين تامر حسنى اللى كان بيطلع أغنية كل ثانية فين الفنانين اللى اتفقوا انهم هيعملوا و يسووا؟؟ فاكرين لما اتجمعوا و عملوا أغنية عشان محمد الدرة؟؟ الناس اللى ماتت دى ما تستاهلش يتجمعوا يعملوا اى منظر؟؟

http://www.youtube.com/watch?v=9QzlSsa2hik

عندى اقتراح غريب شويه عايزه ادعو لحمله لتنظيف مصر تانى يوم يمشى مبارك نفس الشباب الى بيحموها ينزلوا يكنسوا و نبداء نظيف نظيف

د. نبيل فاروق الثورة فى (مصر) اشتعلت بالفعل ... ربما لا تبدو للأمن كثورة ، وإنما كموجة من الغضب ، يمكن السيطرة عليها ، ولكنها فى الواقع ، وبكل المقاييس ....ثورة .... وسيناريو أية ثورة فى التاريخ ، لم يبدأ بثورة ؛ لأن الثورة نفسها هى المشهد الأخير من السيناريو ... السيناريو يبدأ دوماً بموجة غضب ... غضب ضد الظلم .... والقهر ... والفقر .... والتعذيب ... والجوع .... ولقد بدأت تلك الموجات منذ زمن طويل ... بدأت مع الاعتصامات ، والاحتجاجات ، وفقدان الأعصاب ، وتحدًَّى السلطة ... ووفقاً لسيناريو كل الثورات ، لم يفهم النظام ما يحدث ... ولم يتعامل معه كما ينبغى .... النظام دوماً يراها كموجة ... موجة واحدة ... ويتعامل مع كل موجة ، بالأسلوب الوحيد الذى يفهمه ... بالقمع ... النظام ، أى نظام غاشم ، لا يرغب أبداً فى التعامل مع شعبه ، باعتباره راع ، ومسئول عن رعيته إنه يصَّر دوماً على التعامل باعتباره السلطة .... الطاغية .... الفرعون ... وهذا لأن هدفه لا يكون دوماً صالح الشعب ، بل يكون لديه ، فى أجندته الخاصة ، هدف واحد لاغير .... البقاء ... ولأنه نظام ديكتاتورى ، فهو يرفض ، وبشدة ، فكرة تداول السلطة ؛ لأن تداولها يعنى أن يكون على العرش اليوم ، وبين الناس فى الشارع غداً ... وهذا ما يرفضه ... وبشدة ... ومن أهم سمات النظم الديكتاتورية ، عبر التاريخ كله ، هى أنها أكثر الدول التى تتحدًَّث بمناسبة وبدون مناسبة ، عن الديمقراطية .... والحرية ... والشفافية ... والعدالة الاجتماعية ... ثم لا يشعر الشعب بذرة واحدة من كل هذا !!!!!... ولذلك يثور الشعب ... ويبدأ سيناريو الثورات باحتجاجات سلمية ، ووقفات احتجاجية ، ومطالب متواضعة .... وتواصل السلطة عنادها ، وإصرارها على البقاء ... وتبدأ موجات الغضب .... فى البداية ، تكون موجات فئوية محدودة ، يمكن السيطرة عليها ، واحتوائها بعدد من التصريحات المغلوطة ، والمنانشيتات الصحفية الكاذبة ... ثم تمتزج المطالب الفئوية .... وتزداد حدة الموجات ... وتزداد ... وتزداد ... ومع إصرار السلطة على سياسة قمع الموجات ، والعناد مع الشعب ، ومع تحديها للإرادة العامة ، ومواصلة تشبثها بالبقاء فى السلطة ، تبلغ حدة الغضب الشعبى ذروتها .... وتنطلق موجة كبيرة ... موجة لا تحمل أية مطالب فئوية هذه المرة ... بل مطالب شعبية ... مطالب شعب ، لم يعد يحتمل سياسة القمع والتخويف ، وغياب الديمقراطية الحقيقية ، والشفافية السياسية .... وتكون تلك الموجة ، فى المعتاد ، أعنف من كل ما سبقها ... أعنف بكثير ... ولكن النظم الديكتاتورية دوماً لا ترى الحقيقة ... ربما لأنها نظم عمياء ... أو صمَّاء ... أو ربما لأنها لا ترى شعبها ، ولا جوعه ، ولا نفاد صبره ... لأنها لا ترى دوماً سوى شئ واحد ... مقعد السلطة ... ذلك المقعد ، الذى هى مستعدة للتضحية بالشعب كله ، فى سبيل البقاء عليه ... وإلى الأبد .... وهنا تنطلق أقوى موجة ، لدى كل الشعب ، وكل القلوب ، وكل العقول ... موجة اليأس ... تلك الموجة ، التى يشعر معها الشعب بأنه صار أشبه بفأرحاصرته فى ركن ميت ... فأر فقد كل أمل فى الحياة ، ولم تعد لديه سوى وسيلة واحدة ... الهجوم ... وحتى عند هذه النقطة ، يواصل النظام شعوره بالسيطرة على الموقف ، فمازال لديه أمن وحشى ، مثلما كان لدى رئيس (تونس) المخلوع ، ونظم سيادية قوية ، مثل التى كانت لدى شاه (إيران) الراحل ، وسيطرة اليكترونية رقمية ، كالتى تمتع بها ديكتاتور (رومانيا) ... وعندما تنطلق الموجة العملاقة ، لا يهادن النظام ، بل يستخدم الأسلوب الوحيد الذى تربى عليه وأتقنه ... القمع ... النظام سيسعى إلى ضرب الغاضبين بمنتهى الوحشية ، وإصدار قرارات قمعية ، وتصريحات إعلامية كاذبة ... سيضرب رجال الأمن .... ويضربون ويضربون ... وسيتلقى الشعب الضربات .... وربما يفر من امامها فى البداية ... لكنه سرعان ما يعتادها ، وويستعد لها ، ويقارن بينها وبين كل ما يتحمله بالفعل ، ثم يتخذ قراره بالهجوم ... أو معاودة الهجوم ... وفى كل ثورات العالم أجمع ، وعبر التاريخ كله ، لم يصمد أى أمن ، مهما كانت قوته ووحشيته ، أو كان جبروته وظلمه ، أمام موجة غضب شعبية عارمة ... بالطبع سينسى الأمن أنه جزء من الشعب ، وسيعتبر نفسه مجرد عبد وخادم مستكين ومطيع للنظام ... وسيضرب بمنتهى القوة ... والوحشية ... والعنف ... والشراسة ... ولكن المشكلة أن الأمن ، مهما كان عدده ، هو أقل بكثير من الشعب ، حتى ولو نسى هو نفسه انه جزء من هذا الشعب ، وليس قوة احتلال أجنبية ، جاءت للسيطرة على شعب محتل ... سيدرك الأمن هذا ، فقط فى حالة واحدة ... عندما يواجه غضبه شعبية عارمة ... سيدركه فقط ، عند فوات الأوان .... وعندما ينتقل الأمر إلى المرحلة التالية من السيناريو ... فكل سيناريو الثورات ، عبر التاريخ ، انتهى لصالح الشعب .... والشعب وحده ... والأمن ، فى كل الثورات ، عبر التاريخ أيضاً ، كان المشعل الأساسى للثورات ، والمزكى لنارها ... والأمن ، عندما يحاول قمع الثورة ، فهو لا يفعل هذا ، فى المراحل الاخيرة ، من أجل النظام أو رجاله ... أو حتى بقائه ... إنه يفعل ذلك ، من أجل نفسه ... ففى قرارة كل رجل أمن ، يعادى شعبه ، طاعة لنظام ديكتاتورى غاشم ، يدرك أنه يرتكب جريمة فى حق الشعب والوطن والتاريخ ... وهو ، ككل مجرم ، يخشى العقاب ... يخشى أن تنجح الثورة ، وينتصر الشعب ، ويحاسبه عما اقترفه ضده من جرائم ... يخشى أن يصبح ضحية نظام ، أطاع أوامره ، فشاركه جريمته ... الأمن يقاتل ، بكل العنف والشراسة ؛ لأنه يخشى الشعب ... والشعب ، عندما تقترب نهاية السيناريو ، لم يعد يخشاه ... والخطير جداً ، فى المشاهد الأخيرة للسيناريو ، أن الشعب لن يجد أمامه ، سوى أن يتعامل مع الأمن بالوسيلة نفسها ... بالقوة ... والعنف ... والشراسة ... والوحشية ... وبأعداد هائلة ، لا قبل لأية أجهزة أمنية ، مهما كانت قوتها ، بالتصدى له ومواجهته ... وهكذا ، وفى نهاية سيناريو كل الثورات ، يدفع الأمن الثمن ، فى حين يفر النظام ، الذى سخره لظلمه ، تاركاً الساحة تلتهمه ... وفى المشهد الاخير ، دوماً تنجح الثورة .... ربما يسقط ، من أجل نجاحها ، مئات الضحايا والشهداء .... ولكنها دوماً تنجح ... وعندما تهبط كلمة النهاية ، تكون للشعب الكلمة الأخيرة دوماً ... ويبدأ عهد جديد ... عهد صنعته ثورة ... ثورة شعب .

أحلي كومنت علي راصد الوحيد الملتزم بحظر التجول فى مصر هو حسني مبارك

سياسة النفس الطويل بس المشكله ان ثورات الشعوب لا يمكن التنبأ بما سوف يحدث الشعب لو شعر باليأس هتبقى مشكله الحكومه كالعاده بتتعامل مع الموقف على انها مظاهره وهتعدى الناس لو حست ان السلم مش هيمشى هتبقى مشكله الناس دلوقتى معنوياتها مرتفعه جداً واحد بس يقول الله اكبر هجوم وهتبقى مشكله يا ايتها الحكومه اليس فيكم رجل رشيد يا ايتها الحكومه الا نتخلى ولو للحظه عن المصالح الشخصيه الشعب لا يوجد لديه ما يبكى عليه لا يمكن التنبأ برد فعل الشعوب الثأره اليس فيهم رجل رشيد تحياتى عنبو

اخر كارت بيلعب بيه الفضائيات الخاصه ( الناس مش متفقه على فتره ما بعد مبارك) و الى اتحقق لغاية دلوقت انجازات غير مسبوق............ و الحمد لله ...........لحظه لالتقاط الانفاس و ترتيب الاوراق ...............و نشوف الحكومه حلوه او لا كنافه بايته

الكلام ده مش حينفع يا ريم و خصوصا هنا السلطات هنا مؤيدة لنظام مبارك و مش حتسيبنا نعمل أي حاجة من دي استني اما الأمور تستقر و يسقط النظام فعلا ساعتها مش حيبقى في حاجة اسمها مغتربين أصلا الكل حيخلص عقده و ينزل ممكن الكلام ده يعملوه مغتربين أمريكا و كندا و اوروبا و استراليا عادي أما في الدول العربية مستحيل و على رأي اخواننا السعوديين يا غريب خليك أديب

انا كنت بتفرج امبارح على التلفزيون المصرى شيخ الازهر فى نفس البيان بردوا قال نفس الكلام ليه التركيز على البا با بس

يا غريب اول حاجة محتاجين رابط الخبر عشان منرميش الناس بالباطل تانى حاجة الراجل متكلمش عن راى الكنيسة او موقفها الراجل بيتكلم عن نفسه شخصيا وده حرية فكره وتعبيره يعبر عنه زى ميحب (يعنى اللى بيؤيد النظام ده مش حرام) المفروض اننا ديمقراطيين وعندنا حرية تعبير اللى يهمنى انه متكلمش عن جموع المسحيين فى مصر لان المسحيين تصرفهم مختلف عن كلام البابا والحمد لله ان الامور كلها واضحة للجميع

معلشي لو سمحت يا استاذى الفاضل لو سمحت ما تعممش - فى ظباط كتير مالهمش اى ذنب فى اللى بيحصل - مش بتتكلم حضرتك عن يهود ماهما الشرطة مصريين - دول اللى كانو ينزلو فى نص الليل وحضرتك فى سابع نومة وبتاكل رز مع الملايكة وهما بيستقبلو الرصاص فى جسمهم بدالك علشان يحموك ويوفرولك الامن - طول السنين شايلين عنكم بلاوى من قطاع الطرق واللصوص وتجار المخدرات وقاطنى الجبال ياريت ما ننساش دور الشرطة وتعبهم لو سمحتم بغض النظر عن البعض منهم اللى متهور فى تعامله مع المواطنين ياريت برضوه ما تسخنش الجو لان اى ظابط هيموت دمه وذنب اولاده فى رقبتك وما اعتقدش ان داه هو هدف المظاهرات انهم يقتلو ظباط الشرطة ولا ايه بلاش تسخين ضد الشرطة لو سمحت واذا كان على الشهداء فى الظباط والمجندين شهداء كتير اوى ياريت تحاسب على كلامك

يا جماعة لازم الكل يشوف الفيديو ده http://www.facebook.com/video/video.php?v=159983217385498&oid=158901657489942&comments انا مالقتوش على اليوتيوب لسه ده فيديو عملتو المصري اليوم بيوضح احداث و مشاهد مافيش ولا قناة جابتها

يبقى اكيد كلام صحيح ان كان في مؤامرة كبيرة من داخل جهاز الشرطة هدفها توريط ظباط كتيير شرفاء وذلك بفتح السجون و دفع البلطجية للسيطرة على الاقسام وا خذ الاسلحة يا جماعة احنا لازم نعمل نداء علشان نلحق اللي اتبقى من رجال الشرطة المحترمين انهم ينزلوا يشاركوا المتظاهرين و يعرفوا الشعب انهم معاهم الموضوع في مؤامرة من قيادات الجيش الكبيرة مع قلة من قيادات الشرطة الوسخة علينا كلنا نبلغ اهلنا من ظباط الجيش و الشرطة انهم عليهم الا يتعاملون باي عنف كان مع المتظاهرين في الميدان ياجماعة مصر لازم تصمد كمان يومين و كل الوضع هيتحل ربنا يستر عليكي يا مصر

أميل جدا لتصديق ذلك فقد عرفنا على المستوى الشخصي في محيط العائلة والأصدقاءالعديد من ضباط الشرطة الشرفاء و كنت في قمة الذهول مما حدث و ألجمتني الصدمة حتى عن الاستفسار الفساد مهما كثر فهو كالبالون دبوس صغير كفيل به شوفى اللى حصل يا مصرية الموضوع مخطط مش من مسؤليين لا داه فى جهة معينة بعتت بلطجية انا امبارح كلمت قرايبي فى مصر وانا كنت قلقانة ليا 3 ايام مش عارفة اكلمهم واطمن عليهم واحد رائد شرطة والتانى مقدم فى الصبح كانو فى معسكر التجنيد اطمنت عليهم وقالولى احنا فى المعسكر وقالولى الوضع صعب جدا - لاننا نازلين باليل امر تكليف - خدمة - وان اغلب اصحابهم فى اقسام الشرطة كانو اما بيهربو باى لبس مدنى واما انهم اتقتلو وفى من اصحابه كتير اتقتلو فعلا وما كنوش عارفين يحكو معايا براحتهم يعنى اغلب الكلام على التلفون بالمتغطى - لانهم فى المعسكر وكمان ال4 قرايبي 2 فقط ردو عليا والاتنين التانين ليهم كذا يوم ما رجعوش البيت وكلنا قلقانين عليهم - على فكرة ظباط الشرطة اتظلموا اوى فى الموضوع داه انا بقولكم كدا مش علشان قرايبي لكن بجد صدقونى حكولى كلام كتير امبارح انا كلمتهم امبارح الصبح وباليل قالولى ان ناس كتير من العساكر والظباط اتقتلو وكانت الناس بتهجم عليهم وهما مش راضيين يستعملوا الرصاص لان ما عندهمش اوامر باستعمال الرصاص ضد المتظاهرين - خاصة داخل اقسام الشرطة اللى هى مش مظاهرات ما هما الظباط اتقسمو جزء ينزل المظاهرات وجزء يبقى موجود جوة اقسام الشرطة اللى جوة قسم الشرطة حاولو يتحملو مع الناس اللى هجمو عليهم - لكن هما كانو بيتفاجأو بان الناس عاوزة تقتلهم ومش عارفين ليه وبيدخلو يولعو نار فى قسم الشرطة ويسرقو القسم وصدقونى حكولى كلام مرعب وربنا معاهم انا لسة مش عارفة حصل معاهم ايه امبارح باليل ربنا يسترها عليهم ويرجعو لبيتوهم واولادهم سالمين يارب طب ما الشرطة مصريين يعنى هما اعداء مصر والوطن مثلا ؟؟ - المفروض الناس ما تتعاملش معاهم كدا برضوه الشرطة ليهم هيبة القانون انا مش بدافع بس فعلا انا قولت قبل كدا ان الشرطة دول بيتعاملوا مع مجرمين وناس بلطجية طول الوقت - يعنى لازم نعرف ان الظابط بيتعامل مع فئة معينة من الناس اغلب اليوم وداه طبيعي ان شخصيته يكون حازم وصارم - الدكتور بيتعامل مع المرضي - والمهندس بيتعامل مع العمال والظابط بيتعامل مع المجرمين اللى حصل فى اقسام الشرطة والناس تهجم تطلع المحبوسين جوة القسم وتولع فيه هل هى دى المظاهرات السلمية ولا بلطجة وكمان تقتل الظباط والمجندين اللى جوة قسم البوليس الموضوع فعلا فيه اغلاط كتير وفى مؤمرات كتيرة هل على الفيس بوك الشباب كانو مخططين ان فئة من الناس هيهجمو على اقسام البوليس ينتقموا انتقام شخصى من من كل ظابط شرطة - يعنى فى نفس التوقيت ناس هجمت على قسم امبابة والمطرية ومصر الجديدة والزاوية وبولاق شبرا واقسام تانية كتير جدا فى نفس الوقت داه مخطط ضد الشرطة لازم نبقى عارفين كدا - وانا كلامى مصدر موثوق انا امبارح مع ابن عمتى حكى معايا حاجات مرعبة - كدا حرام اوى وهو اكتر حاجة مضايقاهم سرقة السلاح - كمية كبيرة اسلحة اتسرقت من اقسام الشرطة قالى الاسلحة دى لو استعملت غلط هتتقتل ناس مدنين كتير قالى انا مش مهم انا كظابط معرف مراتى وولادى يا اغابي وقت ما انزل من البيت ممكن ما ارجعش تانى - بابقى نازل امر التكليف وعارف انى ممكن ارجع ميت لمراتى - لكن السلاح داه ممكن يستعمل فى انه يقتل مدنين مش ظباط شرطة قالى احنا دلوقتى كل الظباط نازلين بالرشاشات بدل المسدسات الميرى يعنى الرد بالرصاص على اى حد معاه سلاح مسروق لكن الناس العادية فى الشوارع ايه ذنبهم - قالى كل اللى حصل داه خيانة للبلد فى جهة معينة باعت مصر وبعتت ناس فقط تأذى اقسام البوليس وتقتل الظباط وعساكر الشرطة وتولع فى الاقسام وتطلع المساجين وتسرق السلاح وخلصت المكالمة معاه على كدا وربنا يحافظ عليهم

انا عندى سؤال بس عمال يزن على دماغى بقاله يوم هو الجيش ولائه لمصر وللشعب ولا ولائه للرئيس ؟ الانتفاضه اللى حصلت دى مافيش حد خطط ليها ولكنها طالعه من الناس الناس كلها تعبانه الناس كلها بتقول لاء فيه ناس اعرفهم لا كان ليهم فى حاجه خالص وكانوا ماشين جوه الحيط والاغرب كمان انهم ناس فلاحين يعنى مش بيعرفوا يقرأو ولا يعرفوا ان فيه حاجه فى الدنيا اسمها فيس بوك وفاكرين ان الانترنت ده اكله او حاجه تانيه يعنى ناس على الفطره وطالعين فى المظاهرات وبيقولوا لاء كل الناس بتقول لاء فى نفس واحد بدون ترتيب بدون تجميع بدون اى حاجه اساسا الناس كلها تعبانه سواء الغنى والفقير المثقف والجاهل طيب الناس مطلوب من الناس دى تعمل ايه اكتر من كده مطلوب ايه منها يعنى علشان الجيش يحمى البلد ؟ مهو استحاله الناس تفضل كده ؟ الحياه فى مصر واقفه خالص لازم الجيش يتحرك لانقاذ مصر لانقاذ البلد لازم القياده تسمع وتنفذ رأى الناس والا سوف تتحول من مظاهره سلميه الى مالا يحمد عقبااااااااااه أسأل الله العظيم رب العرش العظيم ان يجعل فى القياده رجل رشيد يخاف على هذا البلد العظيم وعلى هذا الشعب الكريم وان يجنب البلاد شر فتنه نحن فى غنى عنها اللهم امين تحياتى عنبو

الرئيس مبارك يعتقداعتقادا راسخا انه هذه الملايين التى تكرهه لا تفهم مصلحتها واذا كان فيه 10 مليون تكرهه فهناك 70 مليون لم يشاركوا لأنهم يحبونه .. الرجل استهل عهده بتصريح علنى لا زلت أذكره انه الشعب المصرى غير مؤهل للديموقراطية وهذا ما يفسر لما كل مرة كانو يختارون نيابة عن الشعب فى كل انتخابات عاوزين تاخدى منى بلدى يا ولاد الكلب؟ بعد ما فنيت عمرى فيها حربا وسلاما؟ أجيب قصر منين زى القصر الجمهورى؟ .. أحفادى يعيشو فين؟ عاوزين ايه أكتر من كده؟ ما أنا سايبكم ترغوا بقالى زمان ايه هتنهبوا؟ عاوزين تحرمونى من حبيبة قلبى شرم الشيخ .. أنا انكم شعب جاحد ما بيختشيش .. هذا هو ملخص خطاب وأفعال وتحركات مبارك الأيام الماضي

http://www.facebook.com/photo.php?fbid=494125657675&set=a.493689677675.268523.586357675

بسم الله الرحمن الرحيم ليا عدة نقاط عايز اوضحها بعد ما قريت كل مداخلات الأفاضل أولا: حتى الآن تحققت مكاسب هائلة 1- العز بن العز اللي خلى الحزب اتهز - احمد عز طار 2- نظيف ابو مخ نضيف طار واكيد طار معاه بعض الوزراء سيئي السمعة 3- تم تعيين نائب للرئيس ( صحيح ده مكنش مطلب لينا لكن برضه اهو مكسب ومننساش إنه بقاله 30 سنة بيحكم ومش راضي يعين نايب، بعد كده لما يضطر يعين نايب له خلال يومين بس من الضغط يبقى ده مكسب كبير ) 4- اختفى جمال مبارك عن الأنظار ( لكن الاختفاء ده منقدرش نقول عليه مكسب اكيد لأنه ممكن يكون اختفاء تكتيكي ) دي مكاسب المباشرة ثانيا: المكاسب الغير مباشرة 1- الناس قهرت الخوف من الشرطة وابتدت تنزل الشوارع وتهتف من غير خوف 2- اظهرت الشدة معدن الشعب المصري الأصيل اللي كان محتاج النار دي عشان تجلي الصدا من عليه 3- اظهرت شباب مصر الرائع اللي عنده استعداد يفدي البلد بروحه - بس للأسف نظام الحكم الفاسد معيشه في غيبوبة مفاقش منها إلا يوم الجمعة بالليل 4- كشفت حقيقة بعض الناس اللي يمكن كنا فاكرين انهم زي الحكومة عايشين في البرج العاجي ومش هامههم لكن ظهر انهم برضه فيهم جزء خير كبير وأخص منهم بالذكر اتنين خالد يوسف المخرج: اللي كنت بكرهه جدا وبكره افلامه جدا لكن بجد اول مرة احترمه كان يوم الجمعة حسيت انه يمكن في اتجاهات في افلامه انا برفضها تماما لكنه جريء وشجاع ومخافش من النظام وخرج مع الناس ضده شيريهان: اللي اول ما سمعت صوتها في قناة الجزيرة قلت ياااااااه هي فين دلوقت - وكلمتها العظيمة ( محدش يعايرنا بالحرية اللي اديهالنا - الحرية دي من حقنا ) في مكسب كمان اتحقق عايز اقول عليه - ولو انه مكسب غريب شوية اني اتأكدت اكتر واكتر ان في قيادات عندنا سواء في الجيش او الداخلية مخها نضيف ولسه بتقدر تحط خطط جهنمية ( لكن يا رب الخطط الجهنمية دي تكون في جميع الاتجاهات مش في اتجاه الشعب بس ) المهم ده اللي اتحقق ودي المكاسب اللي اتحققت لحد دلوقت ثانيا: ايه المطلوب في الأيام اللي جاية 1- اننا نثبت على مطالبنا وأولها رحيل مبارك - ده المطلب اللي مفيش تنازل عنه مهما حصل ( وإلا يبقى معندناش إرادة - وأغنية شادية العظيمة - ولا شاف العناد في عيون الولاد وتحدي الزمن - يبقى الاغنية دي خلاص معادتش تنطبق علينا ) لازم نثبت مهما حصل ومهما كان ومهما طال الزمن ( حتى لو قطع علينا المية والنور ) وطالما هو الموضوع دخل في طور العند - يبقى عِند بعِند بقى. ومش عايزين نقول مبارك يستنى لحد نوفمبر اوكي - زي ما المهندس تيمور ( احييه لأنه كان حامل راية 25 يناير هنا في المنتدى ) قال - لأننا لو تنازلنا عن الطلب ده يبقى كل اللي عملناه محلك سر - لأن لحد نوفمبر - * هيكون النظام رتب أوراقه من تاني - * صعب ان حالة التجمع والانصهار اللي فيها الشعب المصري دلوقت ترجع تاني لو مبارك رجع في كلامه وقرر الاستمرار في الحكم - *ثالثا: وده الأهم إن لو النظام فضل والناس رجعت هديت تاني أنا متأكد انه هتبدأ حملة اعتقالات رهيبة في جماعة 6 ابريل وما شابهها - وأول واحد هيعتقل هنا من منتدانا الباشمهندس تيمور 2- المظاهرات لازم تبتدي تتحرك من داخل ميدان التحرير باتجاه المواقع الاستراتيجية - زي التلفزيون - من غير تكسير برضه - ولازم المظاهرات تتحرك ناحية مصر الجديدة - وعايزين نفتكر ان الزين ما هربش إلا لما المظاهرات قربت من قصر قرطاج وساعتها زي ما قال الاستاذ / أحمد سيف موقف قيادات الجيش هيتكشف بجد - والمواقف الضبابية دي هتبان ونعرف إذا كان الجيش فعلا معانا ولا هو بس بينيمنا 3- لازم كل نشطاء المحافظات زي ما قالت / الاستاذة ريمو يتحركوا للقاهرة - ودي فكرة ممتازة - ولازم عدد اكبر من سكان القاهرة يخرج - لازم الشباب يروحوا يدعو الناس في البيوت انها تخرج دعوة من أول وجديد تاني 4- لازم نستغل التجمعات الهايلة دي ونبدأ في السريع السريع في جمع التوقيعات اكتر على مطالب الجمعية الوطنية للتغيير في جميع المحافظات وأنا واثق إنها مش هتقل عن 5 مليون في أسوأ الأحوال - ساعتها ده هيقوي موقف الدكتور البرادعي جدا ( ومش عايزين يا جماعة نظن سوءا بالراجل - الراجل عمره ما طلب الحكم - ولا حتى مطالب التغيير السبعة كان فيها تنحي مبارك - مطالب التغيير السبعة هيا تغيير الدستور والانتخابات والحاجات التانية ) عشان كده هو أنسب رجل للمرحلة دي 5- لازم نصبر ونتأكد ان النصر حليفنا بشرط الصبر ( يا أيها الذين آمنوا اصبروا وصابروا ورابطوا واتقوا الله لعلكم تفلحون ) دي أنسب آية للموقف دلوقت - في تفسير الكشاف للزمخشري - (وصابروا) أعداء الله في الجهاد أي غالبوهم في الصبر على شدائد الحرب لا تكونوا أقل صبرا منهم وثباتا والمصابرة باب من الصبر ذكر بعد الصبر على ما يجب الصبر عليه تخصيصا لشدته وصعوبته (ورابطوا) وأقيموا في الثغور رابطين خيلكم فيها مترصدين. ده اللي احنا عايزينه دلوقت المصابرة والمرابطة - وصدقوني النصر قادم

جاء لي حالا كلام جديد من احدى صديقاتي و هي محل ثقة عندي من مصدر موثوق فيه لديها من ضباط الأمن من أسرتها و قد نشرته في الفيسبوك على صفحتها هذا التفسير اعتبرته مقنعا جدا فليس من المعقول ان كل ضباط الشرطة صغارا و كبارا ليس منهم رجل رشيد إليكم نص الكلام أميل جدا لتصديق ذلك فقد عرفنا على المستوى الشخصي في محيط العائلة والأصدقاءالعديد من ضباط الشرطة الشرفاء و كنت في قمة الذهول مما حدث و ألجمتني الصدمة حتى عن الاستفسار الفساد مهما كثر فهو كالبالون دبوس صغير كفيل به

لااااااااااااا اثبتوا مطاطي راسك ليه يا استاذ محمد؟؟؟؟؟؟؟؟؟ دا انا ما عرفتش ارفع راسي و افتخر و اقول بعلو الصوت اني مصرية غير اليومين دول امبارح كنت في مطار جدة و اختي اتصلت بيا قالت انه المخفي عين نائب له كان هاين عليا اتنطط و اصوت من الفرحة انا مصرية انا مصرية قولت الحمدلله مدام بدأ بالتنازلات يبقى احنا ماشيين صح و دا وقت اننا نكمل و نحس اننا عملنا حاجه بجد هو مرعوب و الكلاب اللي حواليه مرعوبين زييه اوعي اليأس يدخل قلبك الليل مهما طال لابد النور هايطلع و احنا صبرنا 30 سنة على ابن التيييييت دا مش قادرين نصبر كمان كام يوم و الله هايغور في ستين الف داهية ومصر بولادها اللي يفرحوا القلب هما اللي هايبقوا امبارح و اول و انا شايفة البلد بتولع كان هايجيلي انهيار عصبي و الله و عياط هيستيري و الضغط ارتفع بس رجعت قولت في نفسي لما بيكون في مرض مش كويس منتشر الحاجة الوحيدة اللي بتطهره الناااااااااااااااااااااااار و احنا بلدنا بقالها 30 سنة اتملت امراض الدنيا يمكن النار تطهر الارض و النفوس عارف حتى لو ما حصلش حاجه فعليه احنا برضو كسبانين كسبنا اننا غيرنا فكرتنا عن شباب مصر كسبنا اننا عرفنا ان ما فيش فرق في البلد دي بين مسلم و مسيحي كسبنا اننا عيدنا اكتشاف نفسنا كسبنا اننا قهرنا الخوف من امن الدولة و الامن المركزي و المباحث و الشرطة كسبنا اننا حسينا لاول مرة من زماااااااااااااااااااان اوي اننا لسا عندنا كرامة مكاسب مهمة اوي يا استاذ محمد مش عاوزين نضيعها باليأس و النفس القصير البيه التنح اللي لزق و مش عاوز يطلع نفسه طويل مع انه على باطل يبقى الاولى اللي على الحق هما اللي نفسهم يطول بالنسبة بقى للي حاصل على الارض ليا رأي و مش عارفه صح و لا غلط شبابنا و اهلنا بقالهم ست ايام واقفين بس في ميدان التحرير محلك سر و بيقولوا الامن هاينتشر في كل مصر ما عدا ميدان التحرير دا معناه انهم هايسبونا نهبهب في ميدان التحرير و هما هايكملوا حياتهم عادي دا هايخلي الناس تزهق و تحس ان ما فيش اي تقدم انا شايفة ان كده ما ينفعش لازم الامر يتطور كل محافظات مصر مقلوبة بس معلش في الاتحاد قوة و في التفرق ضعف ليه الناس في المحافظات ما تطلعش على القاهرة اولا العدد هايزيد جدا ثانيا الوقفة لازم تكون بتهدد البيه بشكل مباشر لازم المكان يتغير لازم يكون عند جحره عشان يترعب حاجه تانية هما حاليا شايفين ان الناس طالعة و قاعدة و بيقولوا الاجواء كأنها احتفالية و البيه الحماااااااااار هايطلع تاني بمنتهى قلة الادب يقولوا مش قولتلكم دول بيتسلوا خاليهم يتسلوا لأ احنا لا طالعين نتسلى و لا نرفه عن نفسنا شوية و ماشيين عشان كده لازم الناس دي يختاروا حد يتكلم و يتفاوض بالنيابة عنهم مع البهايم اللي لحد دلوقتي مش فاهمين او بيتغابوا علينا البرادعي انسان ايده نضيفة و مخه مرتب و ذكي و عاش و شاف الناس المحترمة عايشة ازاي و عشان كده اول ما جه اتكونت الجمعية الوطنية للتغيير و بدأت حملة التوقيعات عدد كبير وقع على البيان و لله الحمد انا منهم فا الشباب يتوكلوا على الله و الكل يمضى على التوكيل انه يتكلم بالنيابة عننا مع السلطة الزايلة ان شاء الله انا شايفة انهم يستغلوا الجمع و الحشود الموجودة و يبدأوا حملة التوقيعات و انا شايفة ان ما شاء الله الاعداد كبيرة يبقى كده البرادعي له الحق انه يتكلم بالنيابة عننا بدل ما يطلع افندي حمار يقول باي صفة السايح دا بيتكلم عن شعب مصر احنا عاوزين نديله بقى الشرعية اللي يتكلم بيها عننا الراجل ما قالش انه عاوز يبقى رئيس و كرر كتير ان مصر لازم تخلص نفسها انا مش المخلص و اهو حصل مصر كلها بدأت تخلص نفسها زي ما هو كان نفسه يبقى جه الوقت اننا نختار حد بنثق فيه و في نزاهته يمثلنا و يتكلم عننا في المرحلة دي ياااااااااااااااااا رب نصرك الذي وعدت بدأنا يا رب نغير من نفسنا ارضى عنا يا رب و غيرنا للاحسن و وفق ارض الكنانة و خير اجناد الارض لما تحب و ترضى اللهم آمين اللهم آمين اللهم آمين

أرانى مختلف معك تماما فى هذا الرأى الموجودين فى ميدان التحرير ليسوا مندوبين عن قبيلة من قاموا بإختياره ليسوا اعضاء فى قبيلة بل ممثلين عن النسبة الأكبر من شعب مصر من قاموا بإختياره فى بيان رسمى تمت إذاعته على الفضائيات هم نفسهم من نالوا تأييدك عندما تحدوا بصدورهم طلقات الأمن المركزى وقنابله وبلطجيته من قاموا بإختياره ليتحدث الى النظام ورأس النظام هم من نصفق لهم ونصفهم بأنهم هم شباب مصر الشجعان. وفى النهاية فالرجل لم يعلن فى يوم أنه يطمع فى أن يكون رئيس دولة او رئيس حكومة أو حتى غفير إلا إذا طلب منه الشعب ذلك. أظن أنك تأثرتى بالكلمتين اللى قالهم اللواء السابق على قناة الجزيرة من شوية. وبعدين خلينى أسألك إنتخابات إيه اللى بتتكلمى عليها؟ انتخابات مجلس شعب جاء بالتزوير واكثر من 95% منهم مطعون فى عضويتهم للتزوير؟ ام رئيس دولة مستولى على الحكم بانتخابات مزورة حكم فيها البلد 30 سنة بقانون طوارئ انحدر فيها بمستو مصر إلى الحضيض؟ وعمومالو البرادعى تولى تمثيل مصر ، فاطمأنى هو قال انه سيتولى الإدارة لفترة انتقالية يتم فيها وضع قواعد دستورية محترمة تضمن للكل ان يحصل على حقوقه الإنسانية

بسم الله الرحمن الرحيم كان نفسي تسمعوا ماجد بيه الشربيني أمين التنظيم الجديد وهو بيتكلم دلوقت مع منى الشاذلي سوف نعمل وسوف ننظم وسوف نعيد الفصل في الطعون وكل الكلام الحمضان ده دلوقت يا جماعة سيبوكم من كل المحطات الفضائية ومن كل المشاهد التليفزيونية احنا لازم نعرف كذا نقطة أولا: كل اللي حصل امبارح ده من نهب وسلب وكل الكلام الفاضي ده انا متأكد تمام انه كان تمثيلية لإلهاء الناس عن المظاهرات ومطالب المظاهرات واسألوا نفسكم ... شوفوا احنا كام عضو في المحاورات اكيد كلنا لنا قرايب واهل في مصر سيبوكم من الاستغاثات والنداءات ويا بابا ويا ماما ويا ستو والرصاص جنبنا والبلطجية تحتنا والقتلى والجرحى وكل الوش ده في حد من أهالينا جراله حاجة انا عن نفسي ليا اخت في مدينة نصر واخت في حلوان اختي في مدينة نصر راحت شغلها النهاردة وامبارح ومفيش حاجة واختي التانية كانت لسه جاية من الشغل برضه دلوقت ومفيش حاجة كل صوت الرصاص وكل السلب والنهب اللي سمعناه ده كان تمثيلية هدفها الهاء الناس عن المظاهرات والاهتمام بالأمن فقط دلوقت الموضوع ابتدى ياخد منحى جديد تماما وهو منحى طول النفس الجيش مش هيقرب من المتظاهرين سواء لأن رجال الجيش شرفا أو لأنهم عندهم تعليمات بعدم الاشتباك ولكن الجيش في نفس الوقت مش هيسمح ان المظاهرات تقرب من الخطوط الحمرا وهي بكل وضوح في صلاح سالم - مصر الجديدة وفي نفس الوقت الشرطة هترجع تاخد أماكنها تاني وكأن شيئا لم يكن طب والمساجين اللي هربوا هيرجعوهم ازاي يا ترى إلا لو كان الهروب ده تمثيلية !!!!!!!!!!!!!!!!!!!!!!!!!!!!!!!!!!!! وسيب المتظاهرين يعملوا اللي عايزينه لأنهم مش هيكسروا ولا هيخربوا حاجة لأنها سلمية سلمية وجيش البلد الشريف اللي بيحمي مصر مش هيتعرض للمتظاهرين لأنهم أبناء الوطن لكن جيش البلد الشريف برضه هيفضل يحمي مبارك بصفته رئيس مصر وبصفته القائد الأعلى وفي نفس الوقت يتم تشكيل الحكومة الجديدة وتبدأ تاخد شوية إجراءات عشان تبان انها ابتدت تمارس مهامها وأكيد من المهام دي انها تريح الناس شوية عشان الناس تبتدي تهدا وتقول كفاية كده ويفضل الريس ريس ويفضل المتظاهرين يتظاهروا واللي فينا نفسه أطول عشان كده لازم نعرف أن المعركة دلوقت نقدر نسميها معركة النفس الطويل لو هنثبت على مواقفنا يبقى لازم نعرف إن الموضوع محتاج صبر وهياخد وقت يا إما يتم نقل المظاهرات خارج ميدان التحرير والتوجه بيها وبكل وضوح لمصر الجديدة او نثبت في أماكننا بميدان التحرير مهما طال الزمن اسمعوا الخبر ده لسه جاي مع منى الشاذلي نجحت قوات المسلحة في القبض على 700 مسجون من سجن وادي النطرون طب مسكوهم فين يا ترى وبالسرعة دي وفي الظروف دي !!!! دلوقت المعركة معركة النفس الطويل واللي فينا نفسه أطول

ياريت ياجماعه نتعاون ونبعاتها للبرامج ونشيرها علي الفيس وتويتر

باقي وثيقه الشرطه واللي عايز الجزء الاول ممكن انزله تاني

المنظر يخلي الجسم يقشعر والله مش هما دول شباب مصر اللي قالوا عنهم أنهم لا يجيدوا إلا الكورة والفيس بوك والبانجو ربنا يحميكم يا شباب ، ويرجعكم بيوتكم فرحانين ومرضيين

من يحكمني .. يجب أن يضمن أمني وسلامتي .. من يسهر على أمني وسلامتي اليوم .. هم شباب مصر العظيم .. إذن من يحكم مصر اليوم هم شباب مصر العظيم

طيب يعنى حضراتكم عايزين نكتة دلوقت تخفف حدة التوتر ؟؟ طيب دى نكتة حقيقية .. قبل كدة كان عندنا موضوع بيتكلم على .(( تحوير الكلام على السنة العوام )) ..وكان ليا مداخلة او مداخلتين تقريبا اتكلمت فيهم عن هنية اللى ( شغالة عند اختى وتقريبا يعنى هى متربية ف بيتنا ).. اتكلمت امبارح اطمئن على الأهل .. و..هنية اخدت التليفون وردت عليا . بسألها...ازيكم ياهنية وعاملين ايه؟؟ عاملة ايه يانونا ف اللى بيحصل ده؟؟ قالت لى ... ياابلا سلوى انا تعبت قوى ومش عارفة حابقى اعرف اروح بيتنا ازاى ؟؟ ده انا ساكنة ف محطة مصر و.. دلوقت عاملين...حصر تبول ..ف الشارع . بصراحة؟؟؟ المكالمة كلهااااا مش فاكرة منها غير انى كنت بضحك بهستيريا .. شعبنا ده جميل قوى قوى قوى .. ومكانش يستاهل كل البهدلة اللى حصلت له ف خلال كل السنين اللى فاتت.. ان شاء الله كل الخير حايحصل...

قلت من قبل في موضع آخر ان هذه الثورة ستعلم الاجيال معنى الانتفاض والكرامة .. ومرحلة الخسائر هي مرحلة مؤقتة .. بإذن الله ستنقشع غمامتها ان عاجلا او اجلا .. هي فاتورة لا بد من دفعها في اي حركة تصحيح .. ولها ثمنها هذه الايام لن تكون عادية في تاريخ مصر او تاريخ محيطها العربي .. سيذكر التاريخ هذه الايام .. بمشيئة الله .. ستكتب عنها الروايات والمسرحيات والقصائد .. ستنتج عنها افلام سينمائية .. تماما كما كتبت آلاف الروايات والافلام عن الحقبة الناصرية او ثورة الضباط الاحرار .. وكأن الكاتب الذي سيكتب عن هذه الثورة قد توقف في الصفحة الرابعة الآن .. باقي عدة صفحات بيضاء او سوداء ... وبإذن الله انها بيضاء .. اما من سيقرر ان يبيض باقي الصفحات او يسودها فهو انتم .. عيون العرب كلهم .. بل عيون العالم .. تتجه اليكم الان .. فاكتبوا صفحات مستقبلكم كما تحبوا ان يقرأها من يأتي بعدكم اتخيل بعد عشرين عاما .. جد يحكي لاحفاده عن فخره بأنه كان من ضمن من قاموا بالثورة .. عن فخره بأنه كان من صناع قراره ومستقبل ابنائه واحفاده .. واتخيل الواحد منكم يقول لتلك الاجيال .. لولا الله ثم ما قمنا به وقتها لما كنتم تتمتعون بهذه الخيرات .. وبهذا التعليم .. وبهذه الصحة .. وبهذا التخطيط .. وبهذا البناء والعلم اتخيل اسماء الشوارع .. شارع خالد سعيد .. شارع سيد بلال .. اتخيل محمد وادوارد .. كل منهم يشعر بالاطمئنان على نفسه و من معه .. محمد ينتخب جرجس .. وادوارد ينتخب ابراهيم .. ولا يحتاج احد منهم لوصاية او حماية او شعور بالعزلة .. بل يملي من يراه هو المناسب فقط اتخيل بعض من خسر امواله يحتفظ باصولات تثبت خسارته .. ليبرزها بفخر مستقبلا ويقول .. انظروا .. كنت ممن دفعوا ثمن الحرية .. تماما كما يحتفظ بعض قدامى المحاربين بندوب المعارك التي خاضوها ويتركوها علامة بارزة دون علاج لتكون وسام فخر تعلم الاجيال معنى التضحية والكرامة هذه المرحلة هي اقسى لحظات المخاض .. والتي لن يكون بعدها الا الفرحة وصوت صراخ الحرية الذي ينسي الفرد كل الآلام وهي مرحلة ضرورية .. لقد خلقنا الانسان في كبد وانتم شعب اراد الحياة .. فلا بد لليل ان ينجلي .. لكنه لن ينجلي بدون تضحيات واموال و جروح اصبروا وصابروا ,, ودعوا التاريخ يكتب اسمائكم .. فكلنا ننظر اليكم .. و اثبتوا لكل المتخوفين صدق ظنونكم بإذن الله .. دعوهم يقولوا .. كم كنتم صادقين .. وكم كنا مخطئين .. شأن ثورتكم لا يعنكيم وحدكم .. ستأثر علينا جميعا .. ولن يكون التأثير الا ايجابيا بحول الله وقوته عوضك الله يا ابو الاسيان ... احتسبها في سبيل الله .. وسيعوضك الله خيرا منها .. فقط احتسبها في سبيل الله .. وسيجزي الله مكافأتك انه على كل شيء قدير

سلفيين ايه بس ولجان ايه ياعم مسافر الله يرضى عليك انا خايف بكره تقولوا السلفيين هم اللى عملوا الثورة الناس كلهم متعاونين مع بعض ، مفيش حاجة اسمها سلفى واخوانجى او مسلم ومسيحى. الناس يا أخى هم من يقومون بتنظيم أنفسهم كل شارع وكل تقاطع مقسمين نفسهم ومعاهم البوابين وسهرانين ورادى بالليل ، والمناطق اللى انا باتكلم عنها مافيهاش واحد سلفى ، وبعدين السلفيين اللى بتقول عليهم حيبقوا مشغولين بغيرهم والا حايحرسوا بيوتهم؟ بلاش والنبى الكلام اللى يفور الدم ده.

كلنا يتألم لما يحدث الأن ... لكن من منا لم يتألم عندما يولد له مولود وهو يرى زوجته خلال 9 أشهر تتألم وتجاهد وتتعب .. وعند الوضع تتعرض للموت .. ولا أعتقد هناك أم لم تعتقد 100 % أنها ستموت عند الولادة من شدة الألم ؟.... ومن منا فكر في الذهب اللي في إيده أُستخرج من باطن الأرض بالساهل .. وبيلاقوا في الجبال غوايش وأساور وخواتم جاهزة من غير تعب ؟ وأعتقد بل أكاد أُجزم إن العملية لو كانت سهله ولو كان خرج 10 أنفار لميدان التحرير ينادون برحيل الطاغية .. واستجاب ورحل .. ما كناش هانعرف قيمة تلك النعمة اللي إسمها حُرية ... إيه ده لأنها سهل أهي .. 5 أو 6 يطلعوا .. ارحل يا جزمه .. يرحل الجزمة على طول ... الله دي وصفه سهله .. أما لما نتعرض لمحنة ونرى التراب والغبار ينتفض من على معدن وكنز كبير إسمه شباب مصر الواعي اللي طلع يحررنا .. وهو نفسه واقف يحمينا بعصايا ماسكها في إيده وينضرب عليه نار من الشرطة تارة .. وتارة أخرى بالأمس من المجرمين اللي عاوزين يسرقوا بيت جيرانه ويروعوهم ويهددوهم ..... الشباب اللي كنا ناسينه ومحطمينه وينقول عليه فاشل وبتاع شات وفيس بوك وبنطلونات ساقطة وشباب روش طحن بينزل بيتحرش بالبنات في شارع جامعة الدول وما ينفعش الا في شرب البانجو وكبيره قوي لو إتخرج يدور له على فرصة يهرب بها خارج مصر سواء بمركب تغرق في وسط البحر أو يتذل في بلاد العُرب اللي كانوا أخواني في يوم من الأيام مش كنا بنقول عليهم كده أيها السادة ومش حاسين بهم ؟ عايزكم تتخيلوا معي بإذن الله عندما تنقشع الغُمة ونبقى دولة محترمة لها دستور محترم وفيها مساواة وعدل ومواطنة ... كلنا بنحب بعض ونستحمل بعض على الحلوه والمُره .. مش هاقول هانبقى مجتمع ملائكي .. لكن اقصد إننا هانبني بلدنا بحب ... وهانتعب عشان عارفين إننا هانلاقي مكافأة ... تخيلوا معايا وإنت شايف الشخصيات اللي إنت بتفتخر بها هي من تقود البلد أحمد زويل وزير للتعليم البرادعي وزير البحث العلمي مجدي يعقوب وزيراً للصحة العالم مصطفى السيد وزيراً للتربية والتعليم شخص مثل أحمد رشدي وزيراً للداخلية .. شخص مثل أبو غزالة وزيراً للدفاع ... شاب صغير محترم ونابغ في مجال التكنولوجيا وزيراً للإتصالات فلاح فاهم وواعي وخايف على بلده وطالع من طين مصر وارضها الطيبة وزيراً للزراعة ... عامل مجتهد ذاكر وعلم نفسه وحرفي ماهر وزيراً للصناعة .... أي محاسب أو إقتصادي يبقى وزير للإقتصاد والتخطيط مش واحد بيسب الدين للناس أما أعضاء مجلس الشعب وماحدش يقول له عيب ... تخيلوا معظم ميزانية البلد وهي توجه للتعليم والبحث العلمي والصحة وطظ في اي حاجه إن شالله ناكل عيش وملح لمدة 5 سنوات بس نزرع تعليم وعلم وصحة في الناس اللي السوس نخر عظمها وخلاص ما بقاش فيها من الكبد الوبائي والسرطان وشرب مياة المجاري .. عشان نحصد تقدم وكرامة .... تخيلوا كل ده معايا وقولوا لي رأيكم ؟ عذراً ... كثير من الزملاء بعت لي بالأمس وكتب على العام بالمنتدى أو أتصل في التليفون ويكادوا يسبوني عشان كنت بأسخن الناس ولا أتوقف عن الكتابة منذ تقريباً 10 سنوات عن حريتنا كمصريين وعن ضرورة التحرك وخلع هذا النظام الظالم بالقوة ... وهما بيقولوا : عاجبك كده ولعتها ؟ وكأن مصر كلها كانت مستنيه كلامي أنا .. وكأن كل الملايين دي كانت عايشة في رخاء وأنا اللي سخنتها ... وكأن كان في طُرق عديدة كنا ممكن نمشي فيها ونتجنب ما يحدث لكننا أقتصرنا الطريق وأخترنا طريق التخريب والتضحية .. كلا أيها السادة .. الكل كان يشعر بنفس الظلم ... الكل كان يرى بعينه ديكتاتور ظالم لا يعرف الله ولا يتقيه فينا ويسرقنا وينهبنا ويحكمنا بالحديد والنار لمدة 30 عاماً وعاوز يكمل كمان 6 سنوات ويورثها لأبنه ... الكل كان يرى أنه أصبح مغيباً ومصاب بكل أمراض الشيخوخة وجميع الفاسدين من حواليه بيسندوه عشان يبقى موجود ولو كان حتى مومياً كما كان الحبيب بور قيبة في تونس .. عشان وجودهم من وجوده .. الكل كان يرى أحمد عز وفساده وتجبرة .. وفتحي سرور وصفوت الشريف ونفاقهم ... الكل كان يرى حبيب العادلي وبطشة وتنكيلة بالشعب ... لا اُخفي عليكم ... أ عادل بيتصل الأسبوع الماضي يقول لي خف شويه إنت لسه ما جربتش يعني إيه أمن الدولة ... أقسم بالله العظيم ولا يهمني ... لأني ساعتها هاعرف إني بأضحي عشان سبب وهدف نبيل .. والحمد لله لا ممسوك بأبيع بانجو ولا بافتري على النظام العادل الديمقراطي وأخرج عن الحاكم بأمر الله بمنتهى الظلم مني ... هل كلنا ما كناش شايفين ذلك ؟ هل فينا حد كان عنده طريقة تانية غير كل الطرق اللي حاولنا من 30 سنة ننصحهم بها أو نوصل صوتنا لهم ونقول لهم خافوا ربنا فينا حرام عليكم الشعب قرب ينفجر ؟ وأظن كلنا شوفنا المناظر اللي قبصوا عليها أمبارح كانت بتسرق وتنهب وتروع الناس .. إيه كنا أول مره نشوفهم ؟ مش هما دول سكان العشوائيات المطحونين ؟ مش هما دول اللي كانوا طبقة وسطة وغلابة زينا لكن إنسحقوا وأنطحنوا والأغنياء والحيتان داسوا عليهم ومصوا دمهم لحد ما خسفوا بهم الأرض وسكنوهم بالمقابر مع الميتين .. وسكنوهم في عشش في العشوائيات فأنتشر بينهم زنا المحارم وتفتحتهم أعينهم وهم صغار على مناظر الكبير نفسه ما بيشوفهاش ... وأكلوا من الزبالة .... وشربوا مخدرات قبل سن العاشرة وخرج منهم التوربيني وعصابات أطفال الشوارع .. والبنات اللي موجوده في الشارع وبتُغتصب ليل نهار تحت الكباري .. بل بينجبوا أطفال في الحرام في الشارع برضوا .. وهم منتشرين بالملايين والصالح منهم بقى سواق توك توك أو سمكري سيارات إيه .. مش كلنا كنا شايفين ده ليل نهار ومتوقعين إنفجارهم في أي لحظة ؟ تخيلوا إن ما كانش في ثورة في ميدان تحرير .. وقرر هؤلاء الملايين اللي بيمثلوا أكثر من 40 % من عدد سكان مصر يعني 32 مليون بني أدم بالشكل ده ... تخيلوا مليون منهم بس كانوا خرجوا علينا وأكلونا زي ما شوفنا أمبارح واول ... كنا هانقول سي السيد وأمثاله هما اللي عملو ا كده ؟ أو كنا هانهرب ونسيب لهم البلد ؟ ولا كنا هاندفن راسنا في الرمال أكتر وأكتر ؟ أقول لكل زملائي الأعزاء ... إن أستنشاق هواء الحرية .... والإستمتاع بلحظة واحده تشعر بها إنك إنسان له كرامته وأحترامه ... اقسم بالله كل ده يساووي عُمر بحاله عشت ومُت فيه وإنت مُهمش ومالكش صوت ولا هدف .. وزي ما روحت زي ما جيت ... مش دي حياة ملايين من الناس أيها السادة ؟ ييجي الدنيا يتعلم ويشتغل ويتجوز ويخلف وبعدين يموت ... ومش مهم الحشو .. هو كان إيه ؟ مش مهم .... طب كان له هدف ؟.. برضوا مش مهم .. طب عمل إيه في حياته زيادة عن سوري يعني اللي الحيوانات بتعمله بالفطرة ؟ برضوا مش مهم أهو جايين الدنيا ما نعرف ليه ولا رايحين فين ولا عاوزين إيه ؟ عفواً للإطالة عليكم .. ولكن حبيت اوضح وأقول للجميع إننا في مركب واحد .. إذا نجت ستنجوا بنا جميعاً . .. وإنها بإذن الله لن تغرق طالما كلنا إيد واحده .. وطالما كلنا بنضحي بدون تبرير أو بدون ملامه وعتاب بيننا ... وطالما كنا بنحب الوطن والأرض اللي عُمرها ما اساءت إلينا أو حرمتنا من حاجه .. لكن اللي حرمونا كانوا الكلاب الظلمة اللي شايفنيهم دلوقت وهما بيهربوا زي الفئران المذعورة وهانجيبهم كلهم بإذن الله .. وبلدنا هاترجع لينا .. وثرواتنا اللي إتنهبت على مدار عقود من الزمن هاترجع لينا .. أخيراً .. عاوزكم تتيخيوا أولادنا وهما مش محتاجين يهاجروا بره مصر .. وهما رايحين المدرسة بمنتهى التفاؤل .. وهم مش بيفكروا في المستقبل المظلم لبلد بتتباع ... وهما بيطلعوا في بيئة صحية ونظيفة ومحترمة .... لا أتكلم هنا عن ثراء فاحش وإنا كلنا يبقى معانا عربيات وثروات في البنوك .. ولكن أتكلم عن كرامة وعزة وحرية .

ياجماعة لايوجد بديل بلاش ننفعل ونمشى ورا شعارات كاذبة وبعض المنتفعين من ثورة الشباب امثال البرادعى وطلعت السادات والاخوان وغيرهم الرئيس اخد مبادرة جيدة للاصلاح وكلف نائبه بفتح باب الحوار دعونا نستفيد من تلك الفرصة ثانيا تعيين نائب اقفل باب التوريث وهو انجاز كبير فى حد ذاته ... ثالثا ولاية الرئيس تنتهى رسميا بعد عدة شهور دعوه يكمل تلك الفترة حفاظا على استقرار البلد

http://www.youtube.com/watch?v=tuiIhW5VVbk&feature=player_embedded#at=27 mf_p: يا ريس دي من سنتين و ده رأي عام ف التخريب بص ف لحية الشيخ الله يكرمك مفيهاش ولا شعرة بيضا .. بأة دي يوم 25 يناير 2011؟؟؟ .. انا عارف انه مش موضوعنا ولا وقته بس معلش لزوم الحق انا مالى ومال الحيه بيضا ولا حمرا ده راجل اتكلم فى حاجه وقال فيها رأيه وكان شايف ان الاعتصامات والاضرابات تخريب قبل سنه قبل اتنين مش دى المشكله هو الراجل قال رأيه اللى المفروض مستمد من الدين يعنى خلاص هو حر ورأيه يحترم هنقول انه خاف على البلد وانه وانه وهنحسن الظن به لكن متجيش بعد كده تقولى مباركه بقى ونركب الموجه لا هنا لازم نقف ياااااااااارب انصرنا وا تخذلنا عارف لو الانتفاضه منجحتش والله العظيم هتشوف العجب ياااااااااارب لا تخذل شعبنا ياااااااارب ياااااااااارب اول مره الناس تشعر بالامل يااااارب حققه ياااااااارب

البابا شنودة يعلن تأييده لمبارك أعلن بابا الإسكندرية وبطريرك الكرازة المرقسية شنودة الثالث أمس الأحد تأييده للرئيس المصري حسني مبارك، الذي يواجه انتفاضة شعبية تتصاعد وتيرتها يوما بعد يوم. وقال شنودة الثالث في تصريح للتلفزيون المصري الرسمي "اتصلنا بالرئيس وقلنا له كلنا معك والشعب معك. فليحفظه الله لمصر". وأضاف "آلمني ما شهدته من تجاوزات خلال الأيام الماضية... ونحن ننتظر أن يعود الآلاف من الشوارع والمدن.. كلنا بانتظار مستقبل أفضل". وأعرب بابا الإسكندرية عن استعداده "للتعاون مع الأزهر" للمساعدة على "حفظ الأمن والاستقرار ودوام صحة الناس في البلاد". وأشاد بالقوات المسلحة التي قامت، وفقه "بعمل قوي في حماية المواطنين والتصدي للخارجين على القانون". وتشهد مصر منذ الخامس والعشرين من يناير/ كانون الثاني الحالي احتجاجات واسعة تطالب الرئيس مبارك بمغادرة سدة الحكم، وإقرار إصلاحات سياسية واقتصادية. وقد تحولت الاحتجاجات إلى مواجهات مع قوات الأمن أسفرت عن مقتل أكثر من مائة شخص على الأقل وإصابة المئات بجروح.