لوحة القادة

قال الراوي بعد ان تم اعتماد رأي الصندوق .. واشاع المشرفين انه الرأي الصدوق .. امتلأت جيوب المشرفين بريع الكتاب .. وانقسم المحاوراتيين لاقسام واحزاب .. عند الإشراف قد فاضت الخزانة .. وتيمور تم ايداعه بالزنزانة .. في المحاورات .. طغت الجدالات .. بمختلف الترددات .. ان هناك تلاعب بالاصوات .. وتغيير لراي بعض المشاركين والمشاركات .. وحسبنا الله العزيز المكين .. على ما كان يجري في الخفاء ولا نعلمه .. او كان يجري في العلن ولا نفهمه .. مرت ايام ثلاثة وتيمور في غياهب السجون .. و كان في سجنه يقاسي كل انواع الشجون .. فتارة يغضب ويهدد بالويل والثبور .. وتارة يستسلم لعظائم الامور .. وغالبا يحلم بحكمة الشجاع الصبور .. ويترك لعقله التخطيط ويقرا ما بين السطور .. ثم قال بعد طول تفكير .. وبعد عناء وتدبير هي والله ثورة تأكل الاخضر واليابس .. وتنزع الظالم و تفك المحابس وعلى هذا الراي قد طاب عزمه واستراح الخاطر .. ان هي الا ايام وتفتح العنابر .. فويل لكم يا بني اشراف -------------------------------------- المكان : ساحة المحاورات الزمان : بعد ثلاثة ايام من حبس تيمور الحدث : يخرج تيمور من السجن وقد طالت لحيته .. يستقبله الرجال بالاحضان والنساء بالزغاريط اوز اوز : كفارة يا معلم حسام عبد الفتاح : اوعى تفتكر اني كنت قاعد ساكت .. انا عملت المستحيل عشان اخرجك .. عارف يا هندسة لو ما كانوش خرجوك النهاردة كنت هاعمل ايه ؟ .. انا ساعة الجد ماليش حل .. التونسي : الله فرجها .. الله فرجها تيمور خيوله مسرجها والحرية عالي درجها من قلب الحبس مخرجها العطار : ضايعين من غيرك والله يا ريس .. ربنا ما يرضاش بالظلم اركتكت : متشكر خالص مش عارف من غيركم كنت هاعمل ايه والظالم ليه يوم .. تامر مصطفى : على ايه الغاغة دي بس ؟ .. هو مانديلا يعني اللي طلع من حبسه ؟ طارق حسن : مبروك الافراج يا عمدة .. دقنك طالعة اهو .. انت بقيت اخوان ولا ايه ؟ اركتكت : آآآه بس على اللي عدى عليا في الحبس .. كانوا يعذبوني كل يوم .. ما تقوليش ابو غريب .. ولا جوانتانمو هند علي : عملوا فيك ايه يا ضنايا يا ابني .. شكلك متشحتف خالص تامر مصطفى : ما عملوش فيه حاجة يا مدام هند .. انتم مكبرين الموضوع ليه بس .. تلاقيه اترزع كم كف على كم شلوت وخلصت القضية ضحى : اعتقد دلوقتي بقى واضح رأيي اللي قلته من اول وكلكم كدبتوه .. قلت من اول انهم مش هيسيبوا اللي صوت بلأ على مزاجو .. واهو كلامي طلع كله صح .. بس فين اللي بيفهم ؟ حسام : سبتهم يضربوك ليه .. الفجرة .. عارف لو انا مكانك ؟ كنت طبقت كل الكونغ فو والتايكوندو بخلقتهم .. اصلي لما ازعل ابقى وحش اوي اركتكت : هو انا قادر عليهم كلهم .. ؟؟ دول استخدموا كل حاجة .. كهربا .. انتزاع اضافر .. سلخ .. تكسير عضام .. كل حاجة قلب ابيض : يا ضنايا يا بني .. كل ده ؟ تامر مصطفى : يا ماما قلب ابيض ما تصدقيش كل حاجة بقى .. اهي اضافره زي الفل بس هو اللي عايش الدور اوي بوسي : ايوة .. انت اوفر اوي يا تيمور .. عقدة اضطهاد متجذرة دامو : ايه متجذرة دي يا بوسي ؟ اوزاوز : ايه بلوفر دي يا بوسي ؟ اركتكت : يا جماعة متشكر خالص .. تعبتكم معايا :flr1: اما اولئك ال ( تيييييييييييييت فاقول لهم .. جررررررررررررر قلب ابيض : بص يا ابني يا تيمور .. احنا ياما اختلفنا معاك بس بالظرف ده كلنا معاك .. تلاقيك على لحم بطنك يا عيني .. تعال عندنا بالديوانية بتاعتنا اصلي عاملة طاجن مسقعة باللحمة تاكل ايدك وراها تامر مصطفى : ما تتعبيش نفسك يا ماما قلب ابيض .. الراجل زي الفل اهو .. تلاقيه لسه متغدي اركتكت : تلات ايام ما اكلتش فيها حاجة يا ماما ... تصوري .. بندق : يا راجل مش لسه باعت لك امبارح صينية بط بالبردقان ؟ اركتكت : اخدوها الظلمة ..وتعازموا عليها اوزاوز : معذورين والله .. انا لو مكانهم هاعمل اللي عملوه لونا : ممكن تعطيني وصفة الطبخة دي ياشيف بندق ؟ .. طول عمري نفسي اعمل صينية بط بالبردقان اوزاوز : وانا طول عمري نفسي اكل بط بالبردقان الساري : وانا طول عمري نفسي افهم .. ازاي بط .. وبردقان ؟؟ اركتكت : انا اعتذر يا ماما قلب ابيض .. خبز الاحرار هو الثورة :happy: لن يدخل الزاد فمي حتى انتقم اوزاوز : شششششششش .. اسكت انتا .. احنا معاكي يا قلب ابيض .. مايصحش نكسفك برضو نغسل فين ايدينا ؟ اركتكت : كلنا مش هناكل اي حاجة لغاية ما نثور عليهم بقى .. ثوار .. نتحد .. من اجل القضية تامر مصطفى : اول مرة اتفق معاك .. يالله يا سيدي روح اعمل لك ثورة هناك بعيد اوزاوز : ثورة مين يا عم انتا .. تقول لك طاجن مسقعة باللحمة .. باللحمة يا راجل انتا قلب ابيض : والله يا تيمور يا بني انتا كسفتني .. فعلا .. ناكل ازاي والظلمة دول ياكلوا عيش الغلابة ؟؟ دامو : يعني ايه مسقعة يا اوزاوز ؟ يعني حاجة ساقعة ؟ اوزاوز : يعني داهية تاخد تيمور هو و ثورته --------------------------------- المكان : ساحة المحاورات الزمان : بعد اربعة ايام من حبس تيمور الحدث : يخرج تيمور مع مجموعة ضخمة من ثوار 31 فبراير مرددين هتاف .. الاعضاء يريدون اسقاط الاشراف فتفوتة : انشرووووووا .. ثورة .... انشرووووووووا .. مصيبة ... انشرووووووووا مظاهرات ضخمة يقودها تيمور المراغي .. تتجه الى مبنى الاشراف الرئيسي .. المظاهرات تقطع طرق المحاورات .. وتغلق الميادين .. ومعانا هنا بعض المتظاهرين .. نسمع بيقولوا ايه .. تعال انتا يا فندم .. انتا يا اللي لابس الطربوش .. ممكن تعرفنا بنفسك ؟ احمد سيف : انا باحث عن الحقيقة .. مدافع عن الحرية فتفوتة : ممكن تقول لنا مطالبكم ايه من الثورة دي ؟ احمد سيف : اعادة الاستفتاء .. الغاء الاشراف .. فتفوتة : متشكرين خالص يا استاذ .. ومعانا استاذ تاني .. ممكن تعرفنا بنفسك ؟ كومنق سوون : انا من سيجتث راس الظلام .. انا الذي سيحرق اكبادهم فتفوتة : وعايز ايه من كل اللي تعملوه ده ؟ كومنق سون : قطع رأس الافعى الكبرى .. فرعون هذا المنتدى .. سي السيد فتفوتة : ومعانا واحد هنا كمان ويظهر انه متحمس اوي .. انتا مين سعادتك ؟ حسام : بصوا .. انا مش هاسكت تاني .. انا هاطربقها فوق دماغهم كلهم .. انا هاحرق .. انا هاثور .. انا فتفوتة مقاطعة : طيب بالراحة شوية .. التف بتاعك غرق المايك .. قول اللي انت عايز تقوله بس بهدوء شوية لو سمحت حسام : انا مش هاقبل يعدلوا الاستفتاء زي ماهما عايزين .. من حقنا نقول كلمتنا المهندسة : انتا يا راجل انتا مش كنت معاهم وعايز تعطي الخزرانة للمشرفين عشان يضربونا ..؟ حسام : لا لا لا .. دي كانت مسرحية .. اخدعهم عشان يحزنوا عليكم ويطلقوا سراحكم فتفوتة : كانت معكم فتفوتة .. في بث حي ومباشر من قلب المظاهرات --------------------------------------------------- المكان : مبنى الاشراف الرئيسي الزمان : بعد خمسة ايام من حبس تيمور الحدث : المشرفين مجتمعين في قاعة الاجتماعات .. يتزعمهم سي السيد سي السيد : ايه المصيبة دي .. بيعملوا ايه دول ؟؟ ابو محمد : ثورة ايها المعلم الفاضل .. ثورة مضادة .. ثورة فئوية .. ثورة جياع اسد : انا في شدة الحزن .. في شدة الغضب .. في شدة الزعل .. سي السيد : طب نعمل ايه ؟؟ الادفايزر على وشك الوصول .. .. ولو شاف الغاغة دي هيبهدلنا المشرف محمد : انا رأيي نخلص عليهم .. نحرقهم سلوى : لا .. لا .. انا رايي نفلت عليهم شوية بلطجية .. مع جمال وبغال وحمير سكوب : انا اشوف نتفاوض معاهم .. ونسكتهم بشوية فلوس سي السيد : ولا حل ينفع .. عايز حل جذري فلانة : هو اللي عامل الهرجلة دي كلها تيمور .. بس ما ينفعش دلوقتي نحبسه تاني .. احسن هيولعوا اكتر سي السيد : طب رسوني على حل .. الادفايزر طيارته قربت .. يجي يشوف المنتدى بالمنظر ده ؟ سكوب : مافيش حل غير اللي قلته .. اندهو تيمور ومعاه تلاتة من كبار القادة بتوعوا .. الراجل ده مصدق نفسه اوي .. قولوا له انت جدع اوي .. وانت احرجتنا .. وانت بطل .. انفخوه كدا شوية .. سي السيد : ننفخ مين يا ابو جونيور .. انتا شايفنا نفيخة بلاليم ؟ .. من امتى بندادي ونطبطب على الفوضى ؟ سكوب : يا سي السيد الزمان اتغير .. هو انتا فاكر المنتدى بقى زي ايامنا لما كنا نمشي في الميادين والعالم توطي تبوس ايدينا ؟ وما يرفعوش عينهم بعنينا ؟ ده جيل بايظ .. ولو ما نفعتكش العصايا .. جرب الطبطبة فلانة : اتفق مع سكوب .. اهو على راي المثل ايه اللي رماك ع المر .. اللي امر منه .. وما فيش امر من المراغي دا مصرية متغربة : يا عم سي السيد مافيش داعي تعصلج دماغك اكتر من كدا .. احنا كلنا عارفين ان دماغك ساعات تبقى عاملة زي الجــز .. أ .. أ .. زي الجزرة .. ايوة هي الجزرة .. الجزرة آه .. الجزرة والعصايا .. أبو محمد : الفاضلة مصرية متغربة .. انا ما فهمتش انتي عايزة تقولي ايه ؟ مصرية متغربة : لا .. لا ولا حاجة .. اقصد سياسة الجزرة والعصايا .. ليه ما نطبقهاش معاهم .. ؟ سي السيد : يا ما كان نفسي استخدم العصايا وبس .. لكن نعمل ايه .. انا خلاص .. هيجيني شلل .. لو شاف الادفايزر المنظر ده اللي بالساحات والميادين هيطردنا كلنا ونبقى نبيع سميط وجبنة احسن لنا امرنا لله .. حد يندهلي الاركتزفت ده سلوى : انا ما افضلش نناديه لان ده هيخليه يحس انه مهم اوي .. وتكبر الحكاية بدماغه وهو من غير حاجة اصلا مفكر نفسه جيفارا .. وهيقعد يتدلع ويتنطط علينا ويقول انا مش عايز اتفاوض معاكوا .. افضل حل ننزل احنا بنفسنا ونكلمهم فرد فرد ونحاول نهديهم أسد : نعم يا مدام سلوى أؤيدك .. جداً .. جدا .. ابو محمد : الفاضلة سلوى .. احييكي على الفكرة الجهنمية سي السيد : إذن .. الى الميدان --------------------------------------------- المكان : ساحة المحاورات الزمان : بعد ستة ايام من حبس تيمور الحدث : يتفاجأ الاعضاء بتواجد المشرفين معهم .. يكلمهوهم و يستمعوا منهم سي السيد : انا مش عارف انتم عاملين الدوشة دي كلها ليه .. محنا قدامكو اهو وابوابنا مفتوحة على طول .. اسد : كلام سي سيد صح .. لماذا هذه الغاغة .. لماذا .. لماذا .. ضحى : اهو المشرفين جم اهم .. مش قلت لكم هينزلوا وما فيش داعي من الثورات دي ؟ .. عشان تعرفوا اني كنت صح وكنتم كلكوا تغلطوني .. اهو طلع كلامي صح اهو حسام : انا ماليش دعوة يا ابو الاسيان .. هو تيمور اللي عمل الليلة دي كلها .. انا ماليش دعوة اركتكت : آه يا جبان .. وعاملي فيها سبع البرومبا اول .. ؟؟ bsh:) حسابك هيبقى معايا بعدين حسام : ماليش دعوة بيك يا راجل انتا .. هو انا من امتى اعرفك .. بليز يا ابو الاسيان .. سماح النوبة دي دياب : ايه مالها النوبة بس .. ؟ بطلوا تجيبوا سيرة بلدنا ع الفاضي والمليان .. ايه العنصرية دي زوهيري : عن نفسي .. جيت افسح كلبي .. اصله مخنوق اليومين دول :closedeyes: سي السيد : يا جماعة هدوء بليز .. احنا مش جايين نعاقب حد .. احنا جايين نتفاهم معاكو باللتي هي احسن .. انتم عايزين ايه ؟؟ كومنق سوون : نريد اجتثاث الباطل اركتكت : نريد اعادة الاستفتاء .. نريد اسقاط الاشراف .. بل نريد اسقاط الادفايزر شخصيا مغتربة : نريد صيانة حقنا الدستوري الذي كفله لنا قانون المحاورات رقم 73657456 والذي ينص انه في حالةاي تلاعب بنتيجة الاستفتاءات من قبل المشرفين فإنه تلغى عضوياتهم الشرفية ويحالوا للتحقيق في لجنة يكون للاعضاء عضو ممثل فيها يحمل ما لا يقل عن 50 تقييما ايجابيا احمد انور : نريد عدالة .. مساواة .. نريد مساحة اكبر للتوقيع تتسع لصوري الضخمة اصل الصور اللي باعرضها بتوقيعي صغيرة اوي وعاوزها تغطي نص الصفحة على الاقل جويرية : عايزين احصنة وجمال كوسيلة مواصلات بالمنتدى سقراط المصري : نريد ان تمنحوني جائزة اكثر توقيع شهي على الاطلاق بينك روز : نريد ان يكون لنا مطلق الحرية في تغيير اسامينا باي وقت لماضة مصرية جدا : نريد شعاع امل يخبط على قلب كل واحد مننا ويمنحه طاقة دفء يشعشع على كل ضحكاية تطلع من كل شفة تزغرط حوالينا تامر مصطفى : نريد تثبيت توبيك مغتربي الكويت .. حرام عليكوا بأة سلوى : يا جماعة بالراحة شوية .. ايه المطالب دي كلها .. ؟ هنوفر ايه ولا ايه اوزاوز : نريد لحمة راس .. نريد كبدة جملي .. نريد بط بالبردقان مسافر زاده الخيال : نريد تغيير اسم المنتدى من محاورات المصريين الى محاورات العرب .. حسام : كل دي مطالب يا مجرمين .. احنا اسفين يا ريس .. والله انتم مستحملينا كتير سي السيد : خلاص فهمتكم .. انا فهمتكم .. اكتبوا طلباتكم دي وابعتوها برسالة للاشراف واحنا هندرسها اسلام المصري : ياما كتبنا وارسلنا وعملنا وفعلنا وما فيش فايدة دريم وذ مي : انا مش عايزة حاجة .. انا عايزة بس اقول لكم ربنا يسعدكم زي ما بتسعدونا دايما ابو محمد : اعتقد كلام الفاضل سي السيد واضح جدا .. وكمان كلام الفاضلة سلوى .. وكمان طلباتكم واضحة .. بس اكتبوها و بطلوا الدوشة دي اركتكت : يا عمي الفاضل احنا مش عاوزين اي حاجة من ديت عايزينكم تشاركونا وبس عايزين نحس انكم مننا واننا منكم مش عايزين تحسسونا انكم بابراج عاجية مش عايزين نشوفكم مرة بالاسبوع مصرية متغربة : هو انت فاكرنا ايه .. احنا بشر طب والله العظيم احنا بشر المشرف عضو عادي وبيؤدي الاشراف كتكليف . . انا مذهولة .. مصدومة هو انتم شايفينا ايه ؟؟ جلاميد مالهاش قلب ؟ دامو : مصرية متغربة .. يعني ايه جلاميد ؟ شرف الدين : يا سيدتي الفاضلة .. ما قلناش انتم مش اعضاء .. بس انتم اعضاء مميزين .. بعقولكم الكبيرة .. وتاريخكم .. عايزين بأة تتعاملوا معانا كأفراد زيكم ... طب والله العظيم احنا كلنا بنحبكوا ونتشكر فيكوا كلكم .. بس انتم اللي بايديكم ترجع المحاورات صالون ثقافي .. اعطوا شوية مساحة حرية .. ما تخلوش المنتدى قالب واحد جامد .. الناس تختلف وهتفضل تختلف ليوم الدين بدل ما تزعلوا اننا بس بقينا بننشر اخبار .. ليه ما تحاولوش تنزلوا مواضيع ليكو ثقيلة مش برضو احسن من لما تنسحبوا .. ؟ واهو الموضوع اللي يكون خفيف يروح بسرعة .. والموضوع الجامد .. يفضل مرفوع دايما هو ده اللي كنتم تعملوه زمان سي السيد : انا بكل مكان موجود .. اكتر مشاركات .. اكتر تقييم .. اكتر .. شرف الدين : ما ننكرش كل ده .. بس عايزين روح اكتر .. مش عايزينكم تتخانقوا .. تحجروا على بعض الاراء .. عايزين بس تخفوا علينا شوية من بعض القرارات وساعتها صدقني .. مش هتحتاجو اي صندوق .. لا صندوق نعم ولا صندوق لا لان راينا كلنا فيكم هيبقى واحد ومبني على الاحترام والتقدير مهما اختلفت نظرتنا بالدين او السياسة او ... او .. او سي السيد : يا سيدي كلام جميل وكلام معقول ما اقدرش اقول حاجة عنو .. بس برضو انتم عليكم بلاوي زرقا .. ساعات تقلبوا المنتدى شات .. و مش ممكن نطبطب ع المخالفات .. لازم تتواجه بحزم اركتكت : واجهها يا سيدي بحزم .. بس برضو بشوية روح .. مش كدة حلو ؟ :happy: - فترة صمت - سي السيد : بص يا ابني انت وهو .. انا اختلف مع بعض وليس كل اللي قلتوه .. بالنسبة لطلباتكو دي اوعدكم ادرسها .. انا ومجموعة الاشراف اركتكت : مش عايزينكم تدرسوها .. عايزينكم بس تفكروا فيها شوية .. وما تردوش علينا بالتوبيك دا لانه مش مكانه .. ردوا عليها بعقولكم وفكركم .. واهم حاجة بقلبكم :happy: سي السيد : خير ان شاء الله .. يالله يا مشرفين .. كل واحد ع القسم بتاعه .. رسالتهم وصلت اركتكت : خير ان شاء الله .. يالله يا ثوار .. كل واحد على شغله .. رسالتكم وصلت ضحى : شفتوا ازاي .. ؟ قلت لكم الحوار هو افضل طريقة .. بس ما صدقتونيش .. عشان تعرفوا ان كلامي صح .. لماضة : صباحكم .. طاقة فرح .. تنور كل ايامنا وليالينا فتفوتة : السلام والوئام يعودان للمحاورات .. خبر جديد لانج .. انشروووووووووا التونسي : اللي نشرها اللي نشرها اهو ده اللي يا روح قلبي قشرها قشر القشرة وبان اللب والله وحشنا يا سيدي الحب اللي نشرها اللي نشرها دريم وذ مي : انا فرحانة .. انا فرحانة .. انا هايغمى عليا من الفرحة حسام : اوعى تفتكر يا تيمور اني كنت هاسيبك .. دي كانت تمثيلية بس .. ولا انتا عارف حسام حبيبك عمره ما يفلسع اركتكت : اعمل فيك ايه بس .. مضطر اسامحك .. مهو مش ممكن المشرفين يبقوا احسن مننا .. ويسامحونا ويتحملونا .. قلب ابيض : يسامح مين على مين .. فيه ايه بالضبط يا باشمهندس ؟؟ اصل لي تلات ايام غايبة عن المنتدى ومش عارفة جرى ايه سمبا : حصل كل خير يا ماما قلب ابيض .. انا مش مصدق وداني .. سمعت اسد وهو ماشي يقول انا في شدة السعادة .. في شدة الفرح .. _____________________________ قال الراوي قرر المشرفون التنازل عن ريع الكتاب للاعضاء .. تطبيقا للنتيجة الحقيقية للاستفتاء .. ورفض الاعضاء استلام الغنيمة .. لان المشرفين احق بتلك التكريمة .. ووصل بحمد الله الادفايزر .. في موكب مهيب مثل جريندايزر .. ليتفاجأ بالشعب الكريم يهنؤونه بالسلامة .. و يقولوا ان لا ثورة في حضرة الكرامة .. و قرروا ان يستفيدوا من ريع الكتاب في تحسين المنتدى .. فجاوزت شهرته الافاق وجاوزت كل المدى .. واصبح شعار كل من يكتب حرفا في التوبيكات .. افتخر فانت تكتب بالمحاورات وانشد طائر الليل الحزين : اليك فاتنتي .. ازفك التهاني لقد امسيت في عالمي الثاني منتصرا لمستقبلي .. لحاضري .. لقلمي فلا تقولي لي متى سيزول المي زال الالم .. ورفعنا العلم انها ديباجة السعادة فلا تنتظري الاشادة اعتبريها من قلبي إفادة سلاما .. لكل من غادرنا وذهب .. وقال كلاما من ذهب وننتظر الاياب .. بكل شوق ملتهب لك وحدك .. فاتنتي .. ------------------------------------- كتب كلماتها الطائر .. وغناها زوهيري .. واضافتها لماضة لفراشة المساء بالاحساس فقط .. وقرأها كل المحاوراتيين .. وقام باخراجها الساري - تمت -

أنا آسف يا محاورات المصريين أولا مع الحرية اللي عشناها هنا بدون قيود يعني أنا مثلا واحد من الناس بقول كل اللي أنا عايز أقوله وعمري ما خدت إنذار للآن وأنا اعتبر إن بعض الأشياء ممكن تكون مشروعة في حوارنا وممكن يعتبرها البعض تطاول أو شخصنة مش مهم المهم يكون فيه فكر أنا آسف لأن بعض المداخلات بقى فيها كلمة أو نصف كلمة أو إشارة بدون فكر أو مضمون مفهوم وبعض المداخلات أقل ما يقال فيها إنها إسفاف وبعد صدور الكتاب عن المحاورات نرى هنا الدفاع عن شخصية عليها علامات استفهام كثيرة ويقول عنها فكر ....... هي دي الصورة اللي هتكون في كتاب بعد كده عن المحاورات؟ هي دي الصورة اللي ممكن نرتضيها في الصالون الثقافي؟ أضف إلى ذلك عمليات النقل المنظم والموجه الذي سيقابله نقل للرد وهكذا طيب إحنا رايحين فين

بلغنى اليوم أنه ستقام ندوة عن محاورات المصريين فى نقابة الصحفيين بالقاهرة يوم الثلاثاء الخامس من أبريل الساعة السادسة مساء. ما سبق كان إستهلالا لابد منه سيتم فى الندوة عرض كتاب محاورات المصريين و سيتم الحوار عن جهود محاورات المصريين طوال عشر سنوات فى التحريض على الثورة. ليس عندى - الآن - مزيد عن التفاصيل و سأتابعكم بمزيد من التفصيل .... كما أن الأمر مفتوح لمقترحاتكم.

لقاء الامين العام لجامعة الدول العربية...عمرو موسى امس مع منى الشاذلى فى العاشرة مساءآ لن اجدد من نفسى لرئاسة جامعة الدول العربية وكفاية عشر سنوات وخصوصا بعد 25 يناير انا قولت بحضور الرئيس حسنى مبارك ان ثورة تونس ليست بعدية ونفسنا انكسرت وهذا قد يولد الانفجار وارجعوا الى حديثى فى الشروق والمصرى اليوم لقاء يستحق المتابعة بكل مافيه من ايجابيات وسلبيات لعمرو موسى لكى نتعرف اكثر على مرشحى الرئاسة القادمين http://www.youtube.com/watch?v=VII9XitNipw&feature=youtu.be&a

المادة72: الأهلى هو المصدر الرئيسى للتشريعات والقوانين نقل مقر مجلس الشعب الى استاد القاهرة استقبل السيد الرئيس شوبير باراك اوباما فى استاد القاهرة وبما انه خلفيته كروية هنتكلم عن "عضلة" الانتاج اول قرار : اعدام مرتضى منصور رميا بالسى ديهات " السيد الرئيس شوشوبير يعلن ان بيبسي هي الراعي الرسمي لرئاسة الجمهوريه شوبير يمنع السي ديهات من دخول مصر علشان يلعب بمزاجه شوبير يقول ياأنا يا منصور في مصر..أنا تاريخ .. أنا لعبت وأتلعب بيا علي جميع المصالح استبدال علم مصر بعلم الاهلي نفي مرتضي منصور الي بورتو أبو عجوة شوبير يلغي الدستور ويؤلف الكتاب الأحمر شوبير يلغي قانون الاحزاب ويقول كل ما تحزب قد خان شوبير يلغي الحرس الرئاسي ويستعين بالالتراس الاهلي علاء صادق بعد سمت 3 سنوات يقود ثورة ضد شوبير في ميدان التحرير بعد منع السي ديهات في مصر يعلن مرتضي منصور عن حوزته لفلاش ميموري ضد شوبير

الدعوة السلفية تستنكر الأكاذيب الإعلامية ضدها الحمد لله والصلاة والسلام على رسول الله، أما بعد؛ فتعلن "الدعوة السلفية" عن عدم تنظيمها غدًا لأي مسيرات أو وقفات في أي مكان بالإسكندرية أو غيرها. كما تعلن "الدعوة السلفية" على أنها على عهدها بالدعوة إلى الله بالحكمة والموعظة الحسنة، وأنها لم ولن تتعرض لغير المسلمين، والعصاة مِن المسلمين في حياتهم أو في طرقاتهم بأي نوع مِن الأذى. وأن "الدعوة السلفية" في ظل الغياب الكامل لأجهزة الأمن لم يُؤثر عنها أي شيء من ذلك؛ فكيف تقوم به بعد عودة رجال الأمن؟! وأن "الدعوة السلفية" عبر تاريخها تستنكر أن يكون العنف أسلوبًا دعويًا شرعيًا! وتستنكر الدعوة أن تقوم "بعض وسائل الإعلام" بترديد بعض الأكاذيب، واختلاق وقائع لو كانت صحيحة؛ لوجب عليهم تصويرها، وأن تكون مُثبتة في محاضر الشرطة. وإن الحوادث الأخيرة في "قنا" و"المنوفية" ثبت أن السلفيين برآء منها، كما ثبتت براءتهم مِن الاعتداء على د."البرادعي" مِن قبل، وأن ما يذاع مِن أكاذيب حول إلقاء "مية نار" على المتبرجات، أو فرض الجزية على غير المسلمين؛ هي محض افتراءات وأكاذيب لا أساس لها. ومع ذلك تصر "بعض وسائل الإعلام" على ترديد هذه الأكاذيب! ونحن نحذر الجميع مِن أن "بعض وسائل الإعلام" يلعب دور "الثورة المضادة" الذي ربما يكون السلفيون أول ضحاياه، ولكنهم لن يكونوا آخره. وحينئذٍ سيقول الآخرون: أكلتُ يوم أكل السلفيون. نسأل الله أن يعصمنا مِن الفتن ما ظهر منها وما بطن, وأن يمن علينا بالأمن والأمان. الدعوة السلفية بالإسكندرية http://www.salafvoice.com/article.php?a=5250&back=

طبعا العنوان ده هو عبارة عن إلهام من الثورة المصرية الي الثورة البريطانية..و هي عبارة عن مجموعة تعليقات ساخرة علي الثورة البريطانية.. اتفضل يا عم وشوف المصريين بيعملوا ايه..ده احنا شعب مشكلة من الدستور

ده علي أساس ان عقلاء المنتدي كلهم ضد كل ما هو سلفي.. و أي حد بيؤمن بالمنهج نفسه..أو بيتبعه يبقي مش من العقلاء الموجودين هنا؟؟ هي الناس خلاص حصرت المنهج السلفي كله في بعض أشخاص؟..يعني لما يتكلم شيخ سلفي مثلا و ما يعجبكش كلامه..يبقي ترمي المنهج كله بالتهم؟؟ انت شايف ان هو ده المنطق و العقل؟؟ يعني لما ظابط شرطة يظلم و يستخدم سلطاته لأغراض غير مشروعة..آجي و أقول ان الشرطة عموما كمهنة..كلها نصب و ظلم و جور؟ وبعدين يعني ايه آمل ألا اترد علي هذه المداخلة؟ فيه مداخلة سابقة للأخت ذهبية لما اعترضت علي موضوعك اللي كنت بتتكلم فيه عن جماعة من المصلين طردوا طاقم كان جاي يصور فيلم من المسجد..و قلتلها انها باعتراضها ده بتجر علي نفسها ما لا يحمد عقباه...مش عارف..ده تهديد ده يعني ولا ايه؟ ياريت قبل ما تهاجم المنفرين و تقول ان أسلوبهم منفر وقاسي..تنظر لأسلوبك الأول

اتفق مع الاستاذ عادل ابو زيد في مايخص ردود ( الشات ) وانها احد اهم الاسباب الي ادت لاختلاف مستوى المواضيع الآن عما كانت عليه سابقاً .. لاحظت كثرة هذه النوعية من الردود مؤخرا بل وطغيانها على السواد الاعظم من المواضيع المطروحه .. عن نفسي توقفت عن متابعه العديد والعديد من المواضيع في الفترة الاخيرة بسبب كثرة ( الدردشه ) المحتوية عليها والتي تعيقني تماما عن متابعه الحوار ... اكيد مش مقصود بردود الشات هنا الردود غير الجدية او المازحه في طبعها وانما الردود الموجهة لشخص او مجموعه اشخاص باعينهم والي في الغالب لا تهم غيرهم بل ربما لا تهمهم هم انفسهم لو رجعوا لها بعد فترة من الزمن .. الردود الي لاتستغرق من صاحبها اكثر من وقت كتابته لها ... عادي جدا ان يحتوي اي حوار جاد او هادف على رد او اثنين لا علاقه مباشرة لهم بالموضوع او مجرد رابط انساني بين كتاب الردود المختلفة .. لكن ان يبقى ده سمه اي حوار بل وان يصبح عاده لدى البعض الرد لا لان لديه اضافة مثرية للموضوع وانما لان لازم يرد على كل رد وخلاص .. اعتقد الوضع ده يمثل عبء كبير جدا على المتابعين وهيرتد سلبيا على مستوى المواضيع المطروحه في النهاية .. بقيت نقطه اخيرة وهي ان ردود الشات ليست منبع المشكلة وانما هي احد نتائجها .. المشكلة الرئيسية لدينا ليس نوعية الحوار ذاته وانما نوعية من يتحاور .. الشخص الي يقرأ ثم يفكر ويحلل واخيرا يكتب خلاصة ماوصل اليه مبيعملش كده عشان هو غاوي تعب وانما لان دي ( طبيعته ) وطريقة تعاطيه مع الامور اجمالا . . طبيعه قد تكون اصيله فيه من البدايه او تكتسب مع الوقت نتيجه انخراطه في مجموعه تغلب عليهم هذه السمه في التفكير .. وجود مجموعه نشطة من هذه النوعية كفيل بايجاد منتدى يحتوي على مواضيع قيمة بردود ذهبية تستحق ان تبقى في ذاكرة النت ولاجيال قادمة .. نفس الامر ينسحب على مواضيع الشات والحوار غير المثمر .. فالردود غير المفيده على الاطلاق او تلك التي ( تهلهل ) اي حوار وتحوله الى جلسه سمر او سهرة ( صباحية ) لم تاتي هكذا عن عمد وانما ربما هذا اقصى مايستطيعه اصحابها .. وبطبيعه الحال فحتى لو تواجد مجموعه من الاشخاص من ذوي الفكر ضمن مجموعة اكبر ممن لا يميلون ان يكونوا كذلك اويفضلون الحل الاسهل وهو الدردشة او النقل فالنتيجه المتوقعه هي تحول الفئة الاولى لتسلك طريقة الثانية في التعاطي مع الامور وفي اساليب الطرح .. هجرة الاقلام الجيده وعزوف آخرين منهم عن المشاركه مع عدم وجود مايغري باستقطاب عقول جديده كلها اسباب اكثر من منطقية لانحدار مستوى الحوار والمواضيع في اي منتدى مهما كانت شهرته ومهما امتلك من تاريخ عريق .. ردود الشات والدردشة ونقل الاخبار او مايمكن ان نطلق عليه ( الافلاس الفكري ) هي نتيجه طبيعية وحتمية في حالة كتلك .. اسمح لي سيدي الفاضل فعلى مابدى لي فالنقاش هنا ليس عن حذف الافكار المخالفة وانما الردود غير المثمرة والتي لا تعود على العموم بفائده الهم الا قطع الوقت .. استشهادك بالآية الكريمه في غير محله على الاطلاق فماقالته اليهود لم يكن من باب الدردشة او العبث وانما هي عقيده لا تخلوا من تطاول على الخالق .. والله سبحانه لم يكتفي بذكر ماقالوه وانما كان ذكره لتفنيده والرد عليه وهو ماقاله سبحانه في تتمة الآية ... لو اراد الله الابقاء على فكر اليهود او مادونوه في كتبهم لما انزل القرآن الناسخ لما يقدسونه من كتب ... هذا النسخ هو في حقيقته حذف كامل لكل ماقالوه أو اضافوه وبقاء هذه الكتب بالنسبة لنا كمسلمين لايعدوا احتفاظ احدهم على جهازه بنسخه من حوار طويل تداخلت فيه اراء جانبية تشتته وتغير مضمونه بما اقتضى من صاحب الموقع حذفه من صفحة موقعه واعاده ارسال موضوع جديد ... اعتقد ان الآية الصحيحه للاستشهاد بها في هذا المقام هي قوله تعالى " قد افلح المؤمنون الذين هم عن اللغو معرضون " تحياتي ..

انا بكل احترام وتوقير وتقدير اسجل اعتراضي الشديد على تدخل الادارة بالحذف لاي مداخلة مادامت لا تحتوي ما يسيئ الى الاداب العامة او الاسائة المباشرة او حتى المبطنة الى احد الاعضاء ,, انا سمعت كتير وقليل عن الرقابة على الفكر انما حنوصل اننا عشان معانا صلاحيات نتحكم في عقول الموجودين اكتبوا بالطريقة الفلانية ماتسلموش على بعض ما تهزروش ما تتواصلوش بينكم وبين بعض !! ونجد اننا اصبحنا كالاقلام السابقة اللي بتدخل مره في الاسبوع وخلاص ,, حذف المداخلات لها ظوابط اكيد الكل ملتزم بيها انما المحتوى الفكري وتحديد مدى عمقه او ملائمته او تقييمه متروكه للناس هنا تحكم عليه انما اننا نصادر الاقلام ونحذف المداخلات فده شيئ اسجل مره اخرى اعتراضي الشديد عليه ,, احترامي لمقامكم الكبير عادل بك لكن حرية التعبير خط احمر مادامت لم تتعارض مع القيم و الاخلاق ,, حتى لو رصيدي اللغوي او مستوايا العقلي توقف عند المرحلة الابتدائية من حقي ادخل واكتب واشارك بكل حرية ,,

طيب تحت الاقامة الجبرية ده على اساس انه متهم فى قضية ولا تحت الاقامة الجبرية عشان بنهدى الناس وخلاص طيب لو تحت قضية مش بيتقدم للمحاكمة ليه ليه فساد 30 سنة ودم الشهداء مش بيتسال عليه يا فرحتى بالاقامة الجبرية وهو قاعد معزز مكرم مش بيتاحاكم

السلام عليكم الإخوه الكرام جزاكم الله خيرا . اخى الحبيب إسلام تفضلت و قلت يا إسلام المؤمن كَيِس فَطِن كما تعلم و من الفطنه التثبت من الخبر بكل الطرق مثلا معرفه مصداقيه الخبر من استقرائه ..مثلا جريده مشهوره و معروفه بموقفها من الاسلام و اتباعه مثل اليوم السابع مثلا عندما تنقل خبرا هكذا ْو تكتب فيه اولا مبالغه مريبه فى العدد ثم ما ادراه انهم كما يدعى انهم سلفيون هل المقصود الإشاره الى الحادثه نفسها ؟؟ام المقصود و المراد تشويه ما يسمى السلفيه و انهم همجيون و دمويون و هذا حالهم قبل الوصول الى الحكم فماذا لو حكموا بالفعل. ثانيا يا إسلام و انت المثقف المتابع التاريخ الذى تتكلم عنه ما لهذه الجماعات التى رأينا و سمعنا ما فعلته فى الثمانينات و بدايه التسعينات و خصوصا فى الصعيد و السلفيه و السلفيين التى يتم تشويهها الان الجماعه الاسلاميه و من انبثق عنها مثل الجهاد مختلفه كثيرا و منهجها العنيف كما نسب اليها عن السلفيه و السلفيون ومنهجهم و مواقعهم موجوده و شيوخهم معروفين يا اسلام و يمكنك التأكد بنفسك . لقد هوجموا ايما هجوم لانهم لا يكفرون الحكام و لا يدعون للخروج عليهم و لا يدعون للاضرابات و شق عصا الطاعه ,, و لا يعتمدون الشده اساسا كمنهج إلا بضوابطه الشرعيه فهل بين يوم و ليله صاروا كما يركز عليهم الاعلام الان و يشوههم الموضوعيه فقط هى المطلوبه و لا داعى للتحامل

زغرتى يا ام حنتيرة ...... منتخبنا اتغلب فى الدقيقة الاخيرة زغرتى يا ام عطيات ...... منتخبنا طلع من التصفيات ...زغرتى يا ام تبارك ......... منتخبنا معرفش يلعب من غير مبارك زغرتى يا ام نرمين ....... اللاعيبة كانوا تايهين زغرتى يا ام اعتماد ....... ح...سام غالى نسى التعليمات ...زغرتى يا ام عبدون ....... معرفناش نجيب جون زغرتى يا ام كالابالا........ لا ابو تريكة لعب ولا شيكابالا زغرتى يا ام اسماعيل ..... حسن شحاتة هيستقيل

قال الراوي تم الانتهاء من الاستفتاء .. بعد انا ادلوا برايهم الاعضاء .. و سرت التمتمات والهمهمات .. وترقب الجميع نتيجة التصويتات .. فمنهم من قال لأ وخاف على مغبة قولته من المشرفين .. ومنهم من قال نعم طامعا في مزايا وتحسين .. و قد كانت هناك بعض المشاجرات من الفريقين ... فكم من اثنين افترقا بعد ان كانا صديقين .. اما في المركز الرئيسي للاشراف .. فقد بدا واضحا ان لا احد منهم يخاف .. فقد اطمئنوا على النتيجة المبدئية للاصوات .. وشرعوا لذلك في تجهيز الاحتفالات .. وبينما هم في احتفالاتهم يعمهون .. جائهم خبر جعلهم يتكدرون .. وانقلب الفرح حزناً في دقائق .. فقد ظهرت النتيجة والحقائق .. كان من كدرهم هو المشرف ابو محمد المناضل .. اذ قال لهم يا معشر السادة الافاضل .. لا تفرحوا فقد ظهرت نتيجة الاستفتاء .. ويبدو اننا كنا بغاية الغباء .. اذ اعتقدنا اننا ضمنا مبكراً النتيجة .. واخبرنا بذلك الادفايزر وحماته بيجة .. هنا انتفض غاضبا سين سين .. وقال له بتقول ايه يا عم المرجفين ؟؟ .. وازاي النتيجة المبدئية طلعت حدوتة .. هي مش مبشرانا لسه فتفوتة ؟؟ قال ابو محمد وهو شبه منكسر .. لقد اخطأت فتفوتة خطأ لا يغتفر .. قرأت النتيجة للاسف بالمقلوب .. ونشرتها في المنتدى والخبر كذوب .. وجعلتنا نرتاح للنتيجة دون ان نسعى لتغييرها .. والان فات اوان تعديل الاوضاع او اعادة تسييرها .. فلقد اقفلنا الصندوق .. قالت سلوى وهي على وشك البكاء .. وكيف نحول الدفة لصالحنا يا رفقاء ؟ .. هل حقا فات الاوان يا سكوب .. ولم يعد يجدي البكاء على اللبن المسكوب .. ؟؟ قال سكوب وهو متشتت بالافكار .. ان الوضع ينبغي له اعادة اعتبار .. هل ينفع مثلا اعادة الاستفتاء ؟؟ .. و نبدأ نحن بالتأثير في الخفاء .. ؟؟ قال سين سين يا ابا جونيور اعادة استفتاء ليه ؟؟ .. الناس ستسأل لماذا وكيف وفين و فيه ايه ؟؟ .. ونعرض انفسنا للمشاكل .. فاعطوني حلا يا افاضل قالت فلانة وهي ترشف كوب القهوة البرازيلية .. ان لابد لنا ان نضبط اطراف العملية .. ما رأيكم ان نلغي تصويت بعض الاعضاء المعارضين .. حتى يصبح الفرق في صالحنا وتنعدل الموازين .. وبهذا تكون الغلبة لنا بشكل قانوني يرضي كل الاطراف .. فما رايكم بفكرتي اللوذعية هذه يا بني إشراف ؟؟ هلل المشرفون وكبروا الإله .. وعادت الابتسامة لتغزو الشفاه -------------------------------------- في اليوم التالي .. وبينما كان الجميع ينتظر اعلان النتيجة .. وجدوا الاعلان الاداري التالي : انه نظراُ لقيام بعض الاعضاء بارتكاب بعض المخالفات القانونية في عملية التصويت .. فقد تم ارجاء النتيجة لحين استجواب من تم ضبط مخالفاته .. عليه فإن النتيجة ستعلن بعد عدة ايام .. وسنوافيكم بحينه بالنتيجة النهائية يرجى من تصله منا رسالة على بريده الذهاب فورا لمكتب التحقيق عند المشرف الإداري الخاص به شكرا لتفهمكم ،، فريق الاشراف ------------------------------------- مركز التحقيق في مبنى الاشراف الرئيسي .. تدخل شيكو لحضور جلسة التحقيق عند المشرفة سلوى سلوى : بصفتي المسؤولة عن الأعضاء الرايقين اوي ,, ممكن اعرف انتي صوتي بايه ؟ شيكو : صوت بلأ طبعا .. اصلي كنت مفروسة اوي ساعتها سلوى : قرر الاشراف بالاجماع عدم احتساب صوتك .. وذلك لمخالفتك للقانون الخاص رقم 4335 / 76 .. القاضي بأنه لا يحق التصويت للي بيهدروا المال العام شيكو : انا اهدرت المال العام ؟؟ امتى الكلام ده ؟؟ سلوى : ايوة عملتي مشاكل .. انتي مش ملاحظة انك اكتر واحدة بتستخدم الوان في ردودها ومشاركاتها؟؟ .. عمرك ما استخدمتي اللون الاسود اللي كلنا بنكتب بيه .. الالوان دي عهدة ياختي .. مخليينها للتوضيح مش للبهرجة .. ورازعة كل رد ليكي ستين سطل بوية .. شيكو : وماله لما ارزع الردود بتاعتي الوان .. اصلي معتبراها زي علبة المكياج بتاعتي .. هي بقت بفلوس ؟؟ سلوى : طبعا بفلوس .. دي بتتقل السيرفر يالدلعدي .. ده غير الصور .. يا خرابي .. مافيش رد ليكي الا بصورة ؟؟ شيكو : الى // مجهولة حضرتك فارساني اوي .. صورة قطة مفروسة سلوى : شايفانا بتوبيك مسجل بعلم الوصول ؟؟ .. صحصحي للون يا ام الوان انتي .. عموما اتسحب تصويتك يا اختي .. هل لديك اي اقول اخرى ؟ شيكو : هاقول ايه غير اني مفروسة ..؟؟ كتبتها بالاسود .. عشان تنبسطوا ------------------------------------- مركز التحقيق في مبنى الاشراف الرئيسي .. يدخل سمبا لحضور جلسة التحقيق عند المشرف اسد اسد : بصفتي المسؤول عن الاعضاء الرومانسيين ،، عايز اسئلك .. انتا ما تختشيش ؟ سمبا : اعترض انك تكون مسؤول عننا .. انت فين والرومانسية فين .. عمرك كتبت قصيدة .. ؟ اسد : اي نعم .. كتبت قصيدة في شبابي .. كانت غزلاً رقيقا في المحبوبة .. مش شعر فاحش زي بتوع حضرتك سمبا : نهايته .. عايزين مني ايه ؟ اسد : انت تصويتك اتلغى يا فندم .. وانا في شدة الحزن .. في شدة الغضب .. اتلغى تصويتك يا استاذ .. اتلغى سمبا : يا عمي انت هتغنيها ؟؟ اتلغى ليه ان شاء الله ؟ أسد : بصفتك منتمي لجماعة محظورة .. مش انتا من تنظيم بتوع الاتوبيس .. ؟ سمبا : يا سلام .. ؟؟ ليه هو انتم النهاردة اكتشفتم فجأة اني محظور ؟؟ وبعدين منتم رفضتوا تثبيت التوبيك بتاعنا .. هتعاقبونا ليه بعدم التصويت ؟؟ أسد : لا .. انتم بتتحركوا بشكل جماعة صغيرة داخل المنتدى .. ودي مخالفة لدستور المحاورات .. بعدين جماعتكم قايمة على اساس عنصري .. اساس عنصري يا فاجر .. اساس .. عنصري .. انا في شدة الغضب .. سمبا : يا عمي هي جات علينا احنا .. ما تشوف بتوع السعودية .. ولا عشانهم حبايبكم .. ممكن تقول لي اسم مشرف واحد بس مغترب بالكويت ؟ أسد : انا في شدة الغضب .. انت بتشكك في نزاهة المحاورات .. مش ممكن .. اقبل ابدا .. تشكك فينا .. انا زعلت سمبا : زعلتك دي ؟؟ .. ده ظلم .. انت مفتري اوي علينا يا عم الغضنفر .. ده انا ابنك سمبا .. ما شفتش الاسد الملك ؟؟ اسد : ما اتفرجش على عبط العيال دا .. ده .. عبط .. عيال .. المهم .. صوتك اتلغى .. انت وباقي التنظيم المحظور ايها الشاب الرقيع .. سمبا : تحظروا التنظيم متى ما تكونوا عايزين .. وتسمحوا فيه متى ما تكونوا عايزين اسد : النتيجة خلاص .. اجمعنا عليها وصوتك اتلغى .. اتلغى .. هل لديك اي اقوال اخرى .. ؟؟ سمبا : ايوة عندي اسد : قول يا سيدي .. اشجيني .. اطربني سمبا : انا في شدة الحزن .. في شدة الغضب .. ----------------------------------------- مركز التحقيق في مبنى الاشراف الرئيسي .. يدخل اوزاوز لحضور جلسة التحقيق عند المشرف سي السيد المشرف سي السيد : بصفتي المسؤول عن الاعضاء الخناشير اللي زي حضرتك .. عايز اسئلك سؤال يا بني ادم انتا .. انتا باي حق تصوت ؟ اوزاوز : ومين قال اني كنت عايز اصوت .. ؟ انا شفت زحمة وطابور افتكرت بيوزعوا لحمة راس .. اخرتها طلعت ورقة بيضا .. قمت باصم فيها سي السيد : آه صح .. منا شفت البصمة بتاعتك .. وتبصم ليه يا بني ادم ؟؟ قلنا لكم علموا على القرار بتاعكو بس .. اوزاوز : منا فكرتها فيش وتشبيه سعادتك .. سي السيد : ولما انت مش عارف بتبصم ليه ؟؟ وبتختار لأ ليه ؟؟.. يا بني حرام عليك الواحد بتجيه جلطة من كتر ما فهمنا فيكو وقلنا لكم ده استفتاء .. يعني تختار .. لو عايز الاشراف ينتفعوا بايرادات الكتاب يبقوا تقول نعم يا بني ادم .. .. مش عايز و مستخسر حضرتك فينا الشويتين دول يبقى تتنيل وتقول لأ .. كيميا دي يا خواتي ؟ اوزاوز : يا عمي وانا مالي .. دي بلدكم انتم يابا .. اصل المنتدى بتاعكو ده كنت داخله عشان اسئل عن تاشيرة .. بس كسلت اقوم بعدها سي السيد : عموما صوتك اتلغى .. لان فيه بنات كتير ارسلوا لنا رسايل انهم كانوا يترعبوا من حضرتك .. وخايفين يخشوا الطابور عشان حضرتك موجود .. يعني حضرتك اثرت بشكل غير مباشر في عملية التصويت اوزاوز : ياختي اسم الله !!.. ومين الغندورة اللي اتخضت دي ؟ سي السيد : دودو هانم .. بتقول انها خافت من شكل حضرتك .. دي افتكرتك غودزيلا يا راجل .. وعندك سوسو قدمت شكوى وقالت انها لقت وسط الطابور فرانكشتاين .. ده غير حورية عين اللي افتكرتك ابو رجل مسلوخة اللي يخوفوا بيه العيال اوزاوز : ايه الاسامي العصافيري دي !! دودو و سوسو وحوحو ؟ طب انا ذنبي ايه ؟؟ سي السيد : ده غير ان زوهيري باشا بنفسه .. انسحب من التصويت بآخر لحظة .. وقال ان شكلك عمل له اكتئاب اوزاوز : يعني عيان .. ؟؟ طب ما يروح الاقزخانة سي السيد : ده غير ان ردودك خالية من الاحاسيس .. يا راجل .. تهدي مغتربة في عيد ميلادها كبدة جملي ؟ اوزاوز : مالها الكبدة الجملي بس .. ؟ دي مش مايصة زي باقي انواع الكبد .. وتقرمش سي السيد : عموما .. لجنة الاشراف رأت ان شكل حضرتك بيأثر على سلامة ونزاهة التصويت .. بناء عليه .. قررنا حذف تصويتك مع توجيه ملاحظة ليك بضرورة عمل عملية تجميل بوشك اللي بين قوسين ده اوزاوز : يا عمي اعملوا اللي انتو عاوزينه .. بس بسرعة وحياة والدتك .. العطار بيشوي ومش فاضل الا كم سيخ عايز الحقهم سي السيد : انت مش هتبطل ترمرم بأة ؟ .. نهايته ....هل لديك اي اقوال اخرى يا متهم ؟ اوزاوز : الزمالك هيقطعكم بعون الله .. بس خلوا الدوري يرجع ---------------------------------------- مركز التحقيق في مبنى الاشراف الرئيسي .. تدخل دريم وذ مي لحضور جلسة التحقيق عند المشرف محمد المشرف محمد : بصفتي المسؤول عن الاعضاء اللي مالهومش فيها .. قررنا الغاء دريم وذ مي مقاطعة وهي تبكي : انا هاعترف يا ابيه .. هاعترف والله .. ما كنش قصدي والله ازعل سعادتك المشرف محمد : فيه ايه يا بنتي .. ؟ هو انا قلت حاجة ؟ دريم وذ مي : كلو من مغتربة .. هيا قالت لأ وسمعتها تقول كلام كبير مش فاهماه حضرتك .. قمت قلت الست دي بتتكلم كلام زي الفل .. قمت عملت زيها بس توبة يا ابيه المشرف محمد : يا بنتي ما تهدي شوية وبطلي عياط .. عموما انا حسيت بكدة برضو قمت لاغي صوتك من اصلو لانه تحت تأثير العضوة الفاضلة مغتربة .. عندك اعتراض ؟ دريم وذ مي : والنعمة الشريفة ما عنديش اعتراض يا ابيه .. ولو عملت شقاوة مرة تانية ابقى خاصمني حضرتك .. المشرف محمد : بصي .. تخرجي من هنا ع البيت عدل .. مش عايزك تعملي قلق تاني دريم وذ مي : حرمت والله يا ابيه .. لو حضرتك عايزني افتن على حد انا جاهزة المشرف محمد : لا شكرا بس اندهي لي مغتربة .. بعد خمس دقايق تدخل مغتربة لمكتب التحقيق .. المشرف محمد : اهلا وسهلا .. انستي وشرفتي .. بأة صوتنا اتبح واحنا نقول مش عايزين تشوشروا ع المصوتين .. وحضرتك بتشوشري على دريم ؟؟ مغتربة : في البدء دعني اعترض سيادتك على انك تحقق معايا .. انا انتمي لمجموعة الاعضاء العباقرة .. اللي المسؤول عنهم الادفايزر شخصيا المشرف محمد : الادفايزر في جزر البهامس .. وانا احل محلو معتربة : اسمح لي يا سيدي ان اطعن في شرعيتك .. فحسب قانون المحاورات البند رقم 23442 في سنة 1938 .. نرى القانون ينص بوضوح انه في حالة غاب الادفايزر تمنح الصلاحيات للنائب .. والمنتدى بقى له 30 سنة بدون نائب .. ده خرق للميثاق .. لكني ارى المشرف محمد مقاطعا : انتي يا ستي هتعلمينا شغلنا ؟؟ بطلي الارقام دي اللي تنقطيها علينا كل شوية .. انتي تصويتك اتلغى يا افندم .. مغتربة : وهذه ايضا اعترض عليها فخامة المشرف .. إذ ان صيرورة اي عملية ديموقراطية ان تلبى فيها كافة المعايير .. والتأثير مقبول ضمن ضوابطه الدستورية .. والفاضلة دريم ما هددتهاش .. هيا بس سمعتني وانا باتجاذب اطراف الحديث بالحلقة 1 مع اوزاوز .. فتفتق ذهنها عن ان تقوم بتقليدي .. هل تعلم يا سيدي الفاضل انه حسب دراسة اجراها معهد غيليوم الاول في ولاية .. المشرف محمد مقاطعا : تصويتك اتلغى .. ومش هاطلب منك اقوال اخرى .. اللي بعدوووو ------------------------------ مركز التحقيق في مبنى الاشراف الرئيسي .. تدخل مجموعة من الاعضاء لحضور جلسة التحقيق عند مصرية متغربة مصرية متغربة : بصفتي مسؤولة عن الاعضاء المبالغ فيهم .. وبصفتي ما عنديش وقت عشان ورايا شغل بالبيت .. وبصفتي اصغر واحدة بالمشرفين حيث كدة رموكم عليا .. مش عايزاكم تتعبوا قلبي بأة .. طائر الليل الحزين : اليكي .. يا سيدتي اقول .. وانا في بحر التساؤل يا ترى ما هناك .. ولماذا العراك .. اين منا ذاك الود القديم والسؤال المستديم مصرية متغربة : يا راجل انتا بتخرف بتقول ايه .. ؟؟ ود قديم ايه ونيلة ايه .. ؟ انا اعرفك يا راجل انتا ؟ حسام : ايوة يا مشرفتي الفاضلة .. ما ترحميهوش .. ده هالكني بالاشعار بتاعته اللي جابت لي القرحة .. قال ايه .. شجر الليمون يذبل ايضا .. طب وماله التفاح ؟؟ .. طب وماله البردقان ؟. هو شجر الليمون اللي بيذبل بس .. ؟ لا وقال ايه .. محسسني انه هو اللي اكتشف المعلومة دي .. انا عارفها من ايام كنت اسبح بالترعة بمركز شربين بترعة غنيم .. مصرية متغربة : انت ايه اللي جابك اصلا .. ؟ مش انت مصوت بنعم ؟ حد بعتك او طلبك .. ؟ حسام : لا والله يا حاجة محدش بعتني .. بس قلت اتدخل يمكن تعوزوا خدمة مننا .. احنا جدعان اوي .. ومعليش برضو انتي مهما كان حريم .. والاشكال دي انا عارفها كويس .. ما يجوش غير بالعين الحمرا .. مصرية متغربة : اتفضل اطلع برا وورينا عرض اكتافك .. الاونطة دي ما بتاكلش معانا .. حسام : طب اجيب الخزرانة .. ؟ مصرية متغربة : هوينا بس يا راجل انتا .. قبل ما ارفع فيك تقرير .. امشي ( يغادر حسام القاعة محبطا ) مصرية متغربة : بص يا طائر .. انت متهم باغراق المنتدى بالقصائد اللي عمالة تخر منك كل شوية .. و ده خلا الكتير من الشعراء يعتزلوا الساحة .. وده احتكار واحنا ضد الاحتكار .. ده غير انك وظفت شعرك للتأثير على اللي صوت بلأ .. عندك اقوال اخرى .. ؟ طائر الليل الحزين : رباه .. ما اقسى الليالي .. غابت خليلتي .. وماتت احوالي يالسوء حظي .. وخيبة آمالي اذنبي ان اسمو للمعالي مصرية متغربة : ممكن تسمو برى .. ؟ اللي بعدوووووووووو قلب ابيض : فيه ايه يا مدام .. بالراحة شوية .. طبلة ودني اتخرمت مصرية متغربة : انتي بأة يا ستي عليكي قواضي مش قضية .. دعم لوجستي لتنظيم محظور .. تتأخري دايما عن المواضيع وبكل مرة تقولي : يااااه كل ده حصل وانا مش دريانة .. ولا تقولي يااااااااه يعني اغيب عن المنتدى يومين كل ده يحصل .. الثورة قامت وانتهت وانتي حضرتك مش موجودة معانا .. ؟ .. حتى بالاستفتاء انتي اخر واحدة صوتتي .. ؟ قلب ابيض : ما انا مشغولة يا بنتي .. ورايا جيش اعمل لهم طواجن ومحاشي وتورتات مصرية متغربة : المهم .. صوتك اتلغى .. عندك اقوال اخرى ..؟؟ قلب ابيض : ماذا اقول واى شىء اقول وما اكثر من قول قيل وبالقول لم يقال المهندسة : فزورة دي يا ماما قلب ابيض .. ؟ مصرية متغربة : تعالي انتي بأة يا حبة عيني .. انتي قضيتك قضية .. انتي يا ست انتي مخلية عيالك يعملوا دوشة وقت الاستفتاء وما خلوناش نعرف نشتغل .. البت ليلى واخواتها دول ما تركوش حد بحالو .. بقى يرضيكي البت ليلى تتشعلق على قفا الاستاذ احمد سيف وتوقع طربوشه ..؟؟ الراجل الكبرا دي بركة المنتدى تعمل فيه كدا .. ؟؟ عشان كان عايز يصوت بنعم .. ؟ المهندسة : يا اختي الفاضلة انا مش شايفة فيها حاجة يعني .. فيها ايه لما تحب تلعب معاه شويتين .. مش هو برضو باحث عن الحقيقة ومدافع عن الحرية .. ؟ خلاص .. دي حرية بنتي .. ودي برضو حقيقتها .. مالوش حق يشتكي مصرية متغربة : طب بنتك التانية ما خلتش الشيف بندق يعرف يطبخ .. دخل المطبخ لقاه زي معرض الفخار لما يعدي فيه تور هايج .. الاطباق تكسرت .. المواعين اتبهدلت .. الملح دخل ع الفلفل على الصويا وبقت حكاية .. الراجل انهار يا عيني وبقى يعيط لاول مرة وهو ما بيقشرش البصل .. قلب ابيض : ياااااااااااه .. كل ده حصل وانا مش دريانة ؟ المهندسة : يا ستي المشرفة ما فيهاش حاجة لو العيال يهزروا معاه حبتين .. قال يعني كسروا عدة مطعم مكسيم الباريسي ولا عدة الشيف رمزي ؟؟ مهو برضو هارينا سمك الفترة الاخرانية مصرية متغربة : طب ومكاوي .. الراجل البركة .. تشد دقنو ليه .. ؟ المهندسة : اصلها افتكرت دقنو تركيب .. اصل عندها لعبة بابا نويل شبه مكاوي بالضبط .. بس الدقن متركبة مصرية متغربة : عموما خلاص .. صوتك اتلغى وابقي شوفي حل لبناتك دول .. عندك اقوال اخرى ؟ المهندسة : انا جاني الهسهس .. بس هاقول ايه .. مصرية متغربة : تعالي انتي بأة يا بينك روز .. دورك جه المهندسة : مين بينك روز دي .. ؟ قصدك انا .. متشكرة خالص مصرية متغربة : مش انتي يا ريا ... قصدي صاحبتك سوكينة .. بينك روز وريمو سابقا .. انتي يا ست انتي مش حتحرمي ؟؟ .. مش قلنالك ما تجيش الاستفتاء غير لما يخلص عشان ما تجيش امطار .. ؟ اهي جات امطار يا ستي والدنيا غرقت قلب ابيض : ياااااااااااه .. هي ريمو غيرت اسمها ؟؟ كل ده يحصل وانا مش دريانة ؟ بينك روز .. ريمو سابقا : طب وانا ذنبي ايه بس .. هي السحابة تحبني .. عشان تعرفوا اني بركة :closedeyes: مصرية متغربة : مش كفاية غيرت اسمك بنفسي .. لا وايه .. تروحي جدة تغرق سيول .. تروحي الرياض يجيلها غبرا .. تروحي الاسكندرية تغرق .. حرام عليكي بأة بينك روز : لا لا .. انا تخصص امطار وسيول بس .. مصرية متغربة : وبعدين كل شوية تغيري الصورة بتاعتك .. مرة قوس قزح ومرة علم مصر ومرة مش عارفة ايه .. ودلوقتي طالعة بورد .. كل شوية يتلخبطوا الاعضاء فيكي المهندسة : انا ما غيرتش الفراشات بتاعتي من ساعة ما سجلت .. واسمي ما غيرتوش لان جوزي اختاره ليا وقال مش عايزك تدخلي باسم دلعدي مصرية متغربة : ممكن بأة تسكتي انتي وتخليني اعرف اشتغل .. ؟ بينك روز : وفيها ايه لما اغير صوري .. منتي كمان تغيري توقيعك كل شوية .. مرة التغيير يبدأ من مش عارفة ايه .. ومرة التغيير بدا بالفعل .. ومرة لا التغيير مابدأش كنت بهزر معاكو .. محنا كمان اتلخمنا معاكي مصرية متغربة : يا بنتي انا مشرفة .. عارفة يعني ايه مشرفة ...؟؟؟؟؟ بينك روز : اعملي يا ستي اللي انتي عايزاه بأة .. هانقول ايه بس .. كل دي مسرحية عشان تمسحوا تصويتنا .. مصرية متغربة : هل لديكي اقوال اخرى .. ؟ بينك روز : آه .. ممكن تغيري اسمي لو سمحتي .. اصلي اكتشفت ان التغيير الحقيقي يبدأ من الداخل .. عايزة ارجع اسمي الاولاني مصرية متغربة وقد استبد بها الغيظ : الطلب مرفوض .. امشوا من وشي كلكوا الساعة دي .. امشوا .. ---------------------------------------------- مركز التحقيق في مبنى الاشراف الرئيسي .. يدخل اركتكت لحضور جلسة التحقيق عند لجنة مكونة من كل المشرفين باستثناء الادفايزر ومحمد يوسف سين سين : بص يا ابني .. لما قررنا نستدعيك احترنا نحطك مع اي مجموعة .. يعني انتا من الاعضاء الرايقين اوي .. وانتا من الاعضاء الرومانسيين .. وانتا من الاعضاء الخناشير .. وانتا من الاعضاء العباقرة .. وانتا من الاعضاء اللي مالهومش فيها .. وانت من الاعضاء المبالغ فيهم .. حيث كده .. قررنا نحاكمك جميعا اركتكت : انا البحر من اي النواحي اتيته :flr1: رومانسي في شعري ثائر في قضيتي مبالغ فيه .. احيانا فلانة : انتا متهم بستين الف قضية وقضية .. ايه يا راجل الملف بتاعك الاسود ده ؟ مافيش جنحة مارتكبتهاش .. ؟ اركتكت : س ك ر يا عمي سي السيد هع هع هع هع هع hypr: المشرف محمد : باشمهندس تيمور .. انت متهم بالثورة ضد المنتدى و بلبلة الراي العام اركتكت : لا والله ؟؟ .. حلوة بلبلة الرأي العام دي .. زي ملايات اوزاوز اللي يقول نبللها عشان ما تدخلش غبرا اهو اللي يتبل .. ينشف يافندم ولا الديموقراطية بامريكا بس ;) ابو محمد : باشمهندس تيمور .. انت متهم بتأليب الناس ضد الاشراف .. وخلق فوضى في الاقسام اركتكت : تأليب آه .. صباح التأليب يا باشا .. :flr1: طب والله انت راجل سكرة يا شيخ محمد اوبا .. اسف .. قصدي .. يا ابو محمد طب خد دي اسد : انت متهم بتشويه صورة المشرفين عند الاعضاء .. انت متهم بانك خليتهم يتصوروا اننا هنزور الاستفتاء .. انت متهم اركتكت مقاطعا : يا عمي خلاص .. عارف اني متهم بستين نيلة ونيلة .. المهم هتعاقبوني ازاي .. ؟ المشرف محمد لباقي المشرفين : ده جنني وقت الطابور يا سادة يا افاضل .. قاعد يتنطط بكل مكان زي فرقع لوز سي السيد : شوف يا راجل انتا .. قررنا بالاجماع تجميد عضويتك مدة تلات ايام .. وسحب صوتك من الاستفتاء .. وتخفيض تقييمك بمعدل 100 نقطة .. هل عندك اقوال اخرى .. اركتكت : ايوة عندي .. سلوى : قول يا اخويا وخلصنا اركتكت : هو مش قول قول .. بس حكمة مصرية متغربة : يابني تعبت قلبنا .. قول وخلصنا اركتكت : لو جمدتم اركتكت .. هيطلع لكم الف اركتكت .. فلانة : هو ده اللي عايز تقوله؟؟ .. خلاص اقفل المحضر اركتكت : لا لا لا مش ده اللي عايز اقوله .. ده بس قول عابر سي السيد : عبر عليك قطر يا بعيد !!.. يا بني انتا مش هتخلص اهلنا .. ؟ حكمتك ايه قول وخلصنا اركتكت : مصر فوق الجميع اسد : وايه دخل مصر بقضيتك انتا ..؟ اركتكت : مافيش دخل .. بس لو بصيت بتدقيق .. هتكتشف .. wst:: اسد لمجموعة المشرفين : بيقول ايه الراجل ده ..؟ حد فاهم حاجة ..؟ سكوب : ما تبصليش ليا يا اسد .. كل اللي حيلتي زمزمية امل .. بس عموما انا هاخلص الليلة دي .. ابني يا تيمور .. بطل بقى الشقاوة بتاعتك دي .. وامشي جمب الحيط اركتكت : ترضى يا سكوب تقول لجونيور امشي جمب الحيط ؟ ولا هتعلمه ازاي يبقى مدافع عن القضية ..؟ انا راضي ضميرك سي السيد : يابني هيا فين ام القضية بتاعتك ديا ...؟ انت هاتعمل دور الضحية بالعافية !! بص .. انا خلقي ضيق .. مش عايزين نسمع اقوال اخرى ولا نيلة ولا بتاع .. صوتك اتلغى .. انت مجمد .. ومش عايز اسمع منك اي حرف بعد كده .. امشي اطلع برة ع الحجز عدل .. برة برة برة اركتكت : :shs: ------------------------------------- تم اعتماد ننتيجة التصويت بنسبة 70% نعم .. 30% لأ غضب من غضب .. حزن من حزن .. فرح من فرح .. : وقال طائر الليل الحزين الى ... من تعرف نفسها جيدا وددت لو سكبت يا فاتنـتي بعض القصائد لكني ممنوع .. بأمر الحكومة .. وأمر المعابد لساني مقطوع .. وقلبي موجوع .. كم انا في ظرف دقيق .. منذ ان اغلقوا الصناديق قصقصوا جناحا الطائر .. فكيف اجتاز المعابر .. وبقى الليل الحزين .. يا فاتنــتي ----------------------------------------------- كتب كلماتها الطائر .. وغناها زوهيري .. .. وروتها اغابي في ( احكي يا شهرزاد ) .. و نشرتها سلوى كإعلان إداري يتبــع ،،

في الماضي السعيد كانت تلك الجملة بلكنة الجنوب الجميلة تتردد بطبيعة تلقائية .. مصر و السودان هتة واهدة .. و لكن ولي هذا الزمن السعيد الذي أخذ كل شيء جميلآ معه و ترك لنا فقط حزازيات و انانية .. مشاكل تعصف بالعالم كله و ها هي عاصفة جديدة تلم مكوناتها كي تعصف علي السودان و ما هي الا فترة قصيرة و ستصل الينا تداعياتها .. علينا أن نتحرك الآن فى مصر بأقصى سرعة ممكنة... لأنه بعد ايام تقل عن اصابع اليد الواحدة سيقرر سكان جنوب السودان مصيرهم.... و الذي من جراءه و حتى وقت قليل مضى كنا نعتقد أن هناك سيناريوهين فقط... الأول أن يختار سكان الجنوب الوحدة وهو احتمال لا يزيد على 5٪... أو يختاروا السيناريو الثانى السيئ بالنسبة لنا وهو الانفصال... وهذا الاحتمال هو المرجح للأسف من قبل غالبية سكان وقادة الجنوب.. وأوروبا وأمريكا وبلدان أفريقية كثيرة مؤثرة... والآن هناك السيناريو الثالث الكارثى أو الكابوسى وهو الحرب بين الشمال والجنوب. بالطبع مصلحتنا كدولة مجاورة أن يختار سكان الجنوب خيار الوحدة... ولكن ولأن السياسة لا تعرف التمنيات... فقد بات مؤكدا أنهم سيختارون الانفصال... خصوصا أن رئيس حكومة الجنوب سيلفا كير و معه الأغلبية الساحقة لأهل الجنوب أعلنوا بوضوح أنهم سيصوتون لصالح الانفصال.... بل و بدات الترنيبات لهذا الأنفصال مع اول يوم في الأستفتاء ... اعود لأحتمال الحرب لأنه احتمال وارد و له سوابق عديدة في السودان .. حتي الآن لا يوجد ما يقلق علي الحدود بخلاف بعض المناوشات .. و لكن التاريخ يعلمنا ان في تلك الحالات تكفي شرارة صغيرة .. او حادثة فردية كي تندلع شرار حرب أهلية بين ابناء وطن واحد مثال الهند ... كوريا .. اليمن ..الخ الخ ... و عليه و في حالتنا تلك خيار الحرب لم يعد مستبعدا بين الشمال والجنوب ليذكرنا بالحرب الدامية بينهما منذ عام 1983 حتى توقيع اتفاق السلام فى مدينة نيفاشا الكينية فى 2005 والذى أنهى حربا وحشية استمرت 20 عاما. إذا حدثت الحرب لا قدر الله.. فهل نحن فى مصر مستعدون لآثارها وتداعياتها؟!.. هل فكرنا فى تقدير تأثيرها على تدفق مياه النيل إلينا.. هل فكرنا فى تأثيرها على المشروعات المصرية هناك.. أو على تدفق كثير من اللاجئين إلى مصر؟ هل فكرنا فى تأثيرها على بقية السودان.. وماذا لو فكر إقليم دارفور فى الانفصال ايضا... إلى آخر عشرات الأسئلة التى تؤثر على صميم أمننا القومى؟! اللاعبون الأجانب فى ملف السودان الآن صاروا كثر.. من أمريكا إلى إسرائيل... ومن الصين إلى إثيوبيا... ومن فرنسا إلى بلدان الجوار. كان مفترضا أن نكون اللاعب الأكثر تأثيرا هناك بحكم أشياء كثيرة.. من اللغة والدين إلى التاريخ والعلاقة الخاصة نهاية بالحفاظ على مصالحنا خصوصا ضمان تدفق مياه النيل. الواقع سيئ وليس هذا وقت الحساب ومن المسئول عن تراجع تأثيرنا وهواننا على أنفسنا وعلى الآخرين... الآن علينا أن ندرس ونفكر ونضع خططا لكل السيناريوهات... حتى لا تتم مفاجأتنا مثلما يحدث فى كل القضايا.

اكتسبت جماعة الاخوان المسلمين الشرعية حين دعاها عمر سليمان للحوار قبل سقوط نظام حكم مبارك .. وهى الجماعة التى كانت قبل ذلك محظورة (على ورق الجرائد فقط) رغم أنها فازت فى البرلمان قبل الأخير بثمانية وثمانين مقعدا (حوالى 20% من المقاعد) .. وفى تلك الأثناء وبالتحديد فى خريف 2007 تناولت الصحف ووسائل الإعلام والمنتديات بالتعليق برنامجا لحزب تطلعت الجماعة إلى إنشائه .. قبل ذلك كانت الجماعة ترفع الشعارات العامة التى تدغدغ مشاعر الغالبية المسلمة من شعب مصر المتدين بطبعه .. ولكنها شعارات ظلت حبيسة اللافتات والهتافات .. وكانت الجماعة تسكت فى عجز عندما يواجهها السؤال وكيف ستنفذون هذا الشعار أو ذاك .. مثلا .. فى كل مناسبة ترفع لافت مكتوب عليها "الإسلام هو الحل" .. حسن .. ما هو الحل الاسلامى للبطالة .. ما هو الحل الاسلامى لمشكة المياه والصرف الصحى .. ما هو الحل الاسلامى للسحابة السوداء .. ما هو برنامجكم لحل مشاكلنا ؟ ثم ظهر برنامج الحزب الذى ارادت الجماعة إنشاءه وفى هذه الأيام .. وبعد نتيجة الاستفتاء على التعديلات الدستورية والتى ترجمها البعض على أنها انتصار فى غزوة مظفرة شنها التيار السياسى المتأسلم بقيادة جماعة الأخوان (ولى تحفظات على هذه الترجمة) أصبح معظم الشعب المصرى يتساءل .. وماذا لو فازت الجماعة بأغلبية مقاعد البرلمان أو حتى بمنصب رئيس الدولة .. لماذا الخوف منهم .. كيف ينظرون إلى الدولة المصرية إذا تحقق ذلك الفوز ؟ فى الباب الثانى من البرنامج الذى عنوانه (الدولة والنظام السياسى) .. وفى الفصل الأول منه (الدولة) وفى الفقرة (هـ) من هذا الفصل نقرأ : حسن هى دولة مدنية كما نص الفصل الأول من الباب الثانى .. ولكن فى الفصل الثالث (السياسات والاستراتيجيات) من الباب الأول (مبادئ وتوجهات الحزب) نقرأ هذه الفقرة إذن دولة مدنية على قمة السلطة فيها هيئة من كبار علماء الدين .. هيا بنا نناقش هذه المعادلة

من يستحق أن تقبل يده أيها الجمل الشيخ : حافظ سلامة الشيخ المجاهد التاريخ المشرف المجيد المليء بالشجاعة والبسالة والوطنية والكرامة والجود http://www.facebook....A9/132467307277 أرفع القبعة لك لأنك التاريخ والرمز المشرف في الجهاد أقبل يدك لأنك قدت المقاومة الشعبية في السويس أقبل يدا تبرعت لجميع أسر شهداء السويس ثم تناضل لأسر شهداء التحرير أقبل يدك لأنك طالما عانيت من السجن والاضطهاد والتعذيب ربنا يرجعك بالسلامة من ليبيا

صباح الخير يحكى انه في يوم من الايام .. قرر الادفايزر الهمام .. راعي الذمام .. ان يجمع المحاوراتيين والمحاوراتيات .. ومن منهم قد مضى ومن هو آت .. ووقف فيهم خطيبا .. وقال اننا قد جمعنا امرنا .. واستشرنا اهل الحل والعقد من المشرفين والمشرفات .. واصحاب اليد الطولى في المشاركات .. والحاصلين على اعلى التقييمات .. واتفقنا على اصدار ام المفاجآت .. كتاب يضم خلاصة المشاركات .. سابقة ما سبقنا بها منتدى في العالمين .. يحمل اسم محاورات المصريين لكن قبل ان نطرح الكتاب في الاسواق .. وقبل ان نوقع على طبع الاوراق .. طرأ لنا أمر لم نحسب له حساب .. أخر كما ترون نشر الكتاب لمن يعود ريع النشر ؟ .. ومن يتحمل هذا الامر ؟ .. ان اصطفيتها لنفسي قلتم .. قد آثر نفسه علينا ونحن من سود الصفحات .. وان قصرته على المشرفين قلتم باي حق هذه الامتيازات ؟؟ .. ولماذا استفردهم بالعطية .. ونحن نعيش اجواء الديموقراطية ؟؟ وان وزعتها عليكم جميعا .. قال احدكم اتتساوى حصتي انا .. الذي بلغت مشاركاتي قرابة الالفين .. بمثل من هو في المنتدى ابن يومين ؟ والحق اقول لكم .. اننا بمركز الاشراف لم نستقر على حال .. ولا عرفنا اجابة هذا السؤال .. فقال لنا ابو الاسيان .. وهو الحكيم المفوه اليقظان .. من قال ان المحاوراتيين يرفضون ان يقتسم الاشراف الغنائم ؟؟ .. فوالله ما عرفناهم الا كراما عن فتات الولائم .. فاطرح يا سيدي الادفايز بهذا المنتدى الاستفتاء .. ليقل نعم من رضى لنا بالغنيمة .. وليقل لا من يرى انها ظليمة .. وهكذا يستقر بنا الحال .. وتنهي هذا الجدال ايها المحاوراتيين الاشاوس .. دونكم وصندوق الاستفتاء .. اهجموا عليه هجمة من لا يرى صندوق بعده .. وليقل كل رأيه صفق الحضور طويلا .. واخذوا يهنؤون بعضهم البعض بأن قيض الله لهم مثل هذا الادفايزر .. الذي يستشيرهم بكل صغيرة وكبيرة .. وكل قضية خطيرة هنا قال الباشمهندس تيمور .. هي دي الديموقراطية .. هي دي الحرية :happy: اللي شفته بعيني النهاردة مش هايصدقوه اصدقائي في منتدى احباب الفوركس .. ولا اصدقائي في منتدى حركة 6 ابريل ولا اصدقائي في منتدى المعماريون ولا اصدقائي في منتدى صناع الحياة وهاقول لاصدقائنا وائل غنيم وانجي و اسماء محفوظ :happy: وقالت فتفوتة : صورت كل اللي اتقال وسجلته .. وهانشره في كل مكان .. في الفيس بوك .. تويتر .. شبكة رصد .. شبكة جن ازرق .. المهم انشره وقال تامر مصطفى : وانا هانتج افلام عن الخطبة دي .. اخيرا يا مصر .. اخيرا هتشوفي اولادك يعملوا ايه وقالت دامو : i am happy وقال سكوب وهو يغالب دمعة تأثر : يا سلام .. وانا اللي كنت اقول محاورات تايهة يا ولاد الحلال .. لقينا المحاورات خلاص اما ضحى فقد قالت بواقعيتها المعروفة .. وبتجردها الصريح : طيب دلوقتي خلونا من اجواء الزغاريط والزفة البلدي .. وخلونا نفكر .. هنقول ايه .. نعم ولا لا ؟ قالت اغابي : يا سلام يا استاذة ضحى .. بقى دي عايزة سؤال طبعا هنقول لا .. مش من حقهم طبعا يحتكروا الارباح ليهم .. ياما تعبت وسهرت وانا اكتب مشاركات .. قسم الصحة والنفساويات يشهد على كده .. واخرتها يوزعوها بينهم ؟ ياما حرمت نفسي من الغطا عشان يستغطوا .. ياما حرمت نفسي من العشا عشان يستعشوا قالت لماضة : والله مش عارفة انا اقول لا ولا آه .. يعني لو قلنا نعم مثلا .. يجرى ايه ؟ هما ياما تعبوا وما تنسوش انهم يشتغلوا من دون اجر .. زي ما بيقولوا دايما ( وش اي واحد من فريق الادارة صباحك .. حيرة .. ما تعرفيش تقولي معاها .. آه ولا لأ قال حسام .. حسام عبدالفتاح سابقا : حيرة ايه يا لمضة انتي .. هي دي فيها حيرة .. طبعا هنقول نعم .. مش عايز احصل صاحبي عنبي ومن خاف سلم .. انتي عارفة معناها ايه قولة لأ ؟ يعني هنخليهم يتفرسوا مننا .. ويقولوا بصوا .. اعطيناهم ديموقراطية واول ما جربوها جات على راسنا احنا .. انا من ناحيتي متنازل ياختي وهاقول نعم صرخ اركتكت : نعم مين يا روح والدك ؟ ؟؟ نعامة ترفس بمصارينك .. لا تنازل :happy: لا استسلام :happy: انا مجاهد .. مناضل .. ثائر .. من الخيمة قال التونسي : يا عمي ريحنا شوية من الشعارات الحنجورية بتاعتك .. انا هاقول نعم باة .. مش ناقصين وجع دماغ قالت مغتربة : لنعرض الامر على لغة الارقام .. المتخوفين من نعم يمكن يشكلوا نسبة تزيد او تنقص قليلا عن 50 بالمئة .. في هذه الحالة سيقف الاشراف عاجزا عن الحاق الاذى باللي صوتوا بلأ .. لان نسبتهم كبيرة .. يختلف الامر في حال الاغلبية الكاسحة .. وبلغة الاحصائيات .. فان المصوتين بلأ سيشكلون نسبة كبيرة لو كان الفوز لصالحهم .. يختلف الامر جذريا في حالة فوز المصوتين بنعم .. .. لان استقصاد المشرفين سينتفي بانتفاء العلة .. هذا اذا ما اخذنا بعين الاعتبار العامل المحفز لتصويت من قالوا بنعم وهو في حالتنا الراهنة الخوف من ملاحقة المشرفين وترصدهم لمن صوت ضد قرار انتفاعهم بريع الكتاب .. في كل الاحوال فإن المنطق البراجماتي النفعي للمصوتين بنعم قد لا يسعفهم بالضرورة .. لأن اوزاوز مقاطعا : يا ست بالراحة شوية الله يخليكي .. معاكي بصمجية بالمنتدى .. يعني الخلاصة ها تقولي آه ولا لأ ؟ مغتربة : سأقول لأ طبعا .. لكني ضد مبدأ استغلال الخوف من المشرفين للتصويت الديموقراطي .. التصويت الحر ينبع من قناعة بلا مؤثرات او ضغوط قالت هند علي : يارب نجتاز هذه الغمة .. وترجع لنا مصر زي ما كانت واحسن قال سمبا : ترجع مصر ازاي زي ما كانت يا مدام هند ؟ .. واحنا كنا عاملين ثورة ليه ؟ قالت هند علي : والله مش عارفة يا بني .. التصويت ده شكله مش هيجيبها لبر قالت لماضة : حبة تفائل كدا يا مدام هند .. هو التفائل ايه غير شوية مشاعر صايعة .. بتبص لقدام .. وتخلي لكل ضحكاية من قلب كل واحد مننا .. انشودة فرح تزغرط على بلكونة الامل .. لما يشعشع .. صباحك .. تفائل قد السما .. مغموس بالزيت الحار قال ايمن : عن نفسي هاقول نعم .. بس ليه تتخانقوا على حاجة لسه ما بينتش .. كل واحد يروح للصندوق ويقول رايهه اللي هو حر فيه قالت مصرية متغربة : مش فاهمة ليه فزاعة الاشراف والمشرفين .. عاملين زي الاولاد اللي هيشتروا كفن لابوهم وهو لسه عايش .. الاشراف مسؤولية .. حضارة .. الاشراف .. قوة .. الاشراف .. هو اني ادافع عن افكارك وانظمهالك .. مش اني اصادرها لأ .. وبعدين هاينوبنا كم ملطوش يعني .. ؟ هو احنا بنبيع كتاب لا تحزن ؟ يا ريت ما كنا عرضنا الكتاب من اصلو .. حزني والمي .. كبير .. مش عشان ان فيه ناس قالت بوشنا لأ .. بس لاني للاسف اكتشفت ان فيه ناس بعد كل تعبنا منهم .. يبصوا لنا بصات .. غريبة انا مذهولة .. مصدومة اغابي : ما تعيطيش يا اختي .. بس هيا دي الديموقراطية .. لازم تتحمليها وما يصحش تقولي اننا بنبنص بصات غريبة :angry2: رؤوف : هاقول نعم نعم نعم .. واللي مش عاجبه بقى يهوينا مصرية متغربة : اصيل والله يارؤوف.. :blush: دريم وذ مي : ممكن اقول حاجة يا ابلة مصرية متغربة بس بليز ماتخاصمينيش .. ينفع اقول لأ .. ؟ مصرية متغربة : دي حريتك الشخصية يا بنتي ..القرار لازم ينبع من ذاتك .. بس مستعدة تتحملي القرار ده ؟ دريم وذ مي : في الحقيقة .. أ .. أ .. مصرية متغربة : ماشي يا ستي .. قولي لأ .. بس خليكي فاكراها :glare: سمبا : ايه هو الارهاب الفكري ده .. يعني لو مش عايزينا نصوت بتاخدوا راينا ليه بالاول ؟؟؟ ابو محمد : اهدأ يا حاج .. مافيش حاجة للصوت العالي .. وبعدين صوتك بينرفزني .. سمبا : فيها حاجة يا سيد الناس لو قلت لأ ؟؟ انا هاقول لأ .. هاقول لأ ابو محمد : من حقك تقول لا بس مش من حقك ترفع صوتك كده .. عندنا بنات بالمنتدى سمبا : وايه دخل البنات برفع الصوت .. ؟ ايه الاستفزاز ده بأة ابو محمد : اهو انت كده بتشوشر على المصوتين .. وبتعطيهم ايحاءات ان اللي هيقول نعم ياعيني يبقى مسكين وضعيف وغلبان .. وان اللي صوته عالي هو البطل والثائر والافلام بتاعتكو دي سمبا : !! اناقلت كل ده .. ؟؟ امتى .. ؟ وبعدين ايه دخل ده بوجود بنات معانا بالمنتدى .. ابو محمد : اهو انت كده بتشتت الموضوع .. معليش .. الحوار كده ما ينفعش .. جويرية : انا هاقول نعم .. كبر راسك يا استاذ ابو محمد .. صوتي هيوصلك واقول نعم اما دول اللي بيقولوا لأ .. لهم يوم ان شاء الله شرف الدين : يا جماعة ما تستهدوا بالله بأة .. اللي عايز يقول نعم هو حر واللي عايز يقول لأ هو حر واللي مش عايز يصوت برضو هو حر ها تقلبوها غم ليه .. كومنق سوون : انى ارى رؤوسا قد اينعت .. وحان قطافها .. واني بأذن الله لمقتطفهامن جذورها سي السيد : ما تهدي اللعب يا كابتن .. جذور ايه .. وتقتطف ايه .. ؟؟ هو بردقان ؟ ده تصويت كومنق سوون : بردقان .. يوسف افندي .. مشمش .. زر بطاطا .. هذا لن يغير من الحقيقة شيئا سي السيد : حقيقة ايه ؟؟ كومنق سوون : ستعلم قريبا يا كبيرهم .. عن اذنك .. سأذهب للتصويت ---------------------------------- قال طائر الليل الحزين : اليها .. تلك التي ترنو بعينها في هدأة الليل لن انساكي .. ولاجلك .. واحتراما لمواثيق سجلتها خطانا حين كنا في سن الصبا سأظل وفيا للحظ عينك الشفاف في لغتي .. وسأسطر لكي .. يا أمة الله .. ابياتا اسكبها في اذنيكي ذات القرط المتدلي واقول لك .. وحدك .. سأصوت بلا .. فأنتي قراري .. ---------------------------------------------- غني الابيات السالفة زوهيري .. تحت عنوان ( من وحي الصندوق ) .. على عوده الرنان .. وعملت فتفوتة لها شير بالفيس بوك يتبع ..

نريد ان نفهم اين نجد نزاهة القضاء لانشكك فى كل القضاه نعلم ان منهم من يتقى الله اليس هم هم القضاة اللذين عاشوا معنا عصر حسنى مبارك كاملا ونرى القضايا تتمايع امام اعينهم واصحاب الحق يبكون ليل نهار هل من منصف سبحان الله ونرى القضية تتحول من شخص الى اخر لانه يعلم ان هذا القاضى سيحكم بحكم الجانى يحتاجه فى مصلحته هل القضاه اللذين يحققون الان هم من حققوا وحكموا على هشام طلعت مصطفى وممدوح اسماعيل نعم ولكن كيف كانت تطبيق الاحكام حكم مخفف واخر يعيش فى الولايات المتحدة وغيرهم من اذا كان اكياس دم فاسد ولا الاشياء المسرطنة ونرى القضايا تتحول من لجان الى لجان حتى تموت القضية وينسى الناس هل هذا قضاء مستقل ام القضاء ايضا مطبخ تطبخ فيه الاحكام لماذا القضاء يقعد سنين حتى يحكم فى قضية واحدة لانريد احكام وفقط نريد تنفيذها ايضا هل القضاء حقا مستقل الان وليس له دعوه بالشئون الخارجية للبلاد ام يأخذ فى حكمه جميع المصالح خارجيا وداخليا هل يوجد ضغوط خارجية على القضاء لصالح اشخاص اذن متى يستقل القضاء

انا دلوقتى اتأكدت ان الصفحة الرسمية للمجلس الاعلى للقوات المسلحة هما بيقرأو فيها كل تعليقات الناس اللى بتتبعت ليهم لما بلال فضل قال لاحد قيادات الجيش احنا وحشتنا البيانات بتاعتكم كانت بتطمنا وكنا بنحس ان انتوا قريبين مننا....رد عليه وقاله احنا بنقرأ كل حاجة يا بلال وكل تعليق واى فيديو بيضعوه الناس عالصفحة وادى البيان رقم 29 طلع بيكذب عدة اخبار كان الناس بيرددوها الايام اللى فاتت دى...واولهم ان مبارك سافر وانه تحت الاقامة الجبرية اقرأو البيان....

ساذج من يقول لك أنت تافه، فلكل شيء في هذه الدنيا خطره، مهما كان صغيرا أو ضئيلا ... ..وقد تغير أنت الدنيا، وقد تفتح عينك غدا فتكشف شيئا، وقد تكون وأنت الجندي اليوم قائد المعركة غدا فقط لا تقل على أحد إنه تافه احترم كل شيء مهما صغر شأنه، الطفل والحشرة وزبال الطريق وجرسون المقهى وبهلوان السيرك ومن لا حيلة له أو صولجان في يده فالله وحده يعلم من في الغد يكون في يده الصولجان إذا فعلت ذلك فإنك سوف تخطو أول خطوة لتكون رجلا حكيما د/مصطفي محمود

I totally agree with you تحياتي, :hi: أمير,,, working dates.bmp

مع حالة السيولة والغربلة اللي فيها المجتمع المصري بعد ثورة 25 يناير المباركة كان من الطبيعي ان يُصاب المجتمع بحالة من البلبلة الفكرية ... يعني بالبلدي ناس كتير ما بقتش عارفه راسها من رجليها .. والدنيا بقت هيصه وهات يا تبادل إتهامات هنا وهناك أنت سلفي ظلامي رجعي وبترشوا المتبرجات بمية النار وهما ماشيين في الشارع وبتقطعوا ودان الناس علانيةً وانت ليبرالي علماني كافر تدعو إلى الشذوذ وأنت تميل إلى أقباط المهجر الداعين إلى الأنفصال أنا مش خايف على فكرة من ده كله لإنها زي ما قلت لكم غربلة وسيولة وبإذن الله نحن سائرون لا محالة إلى حالة الإستقرار لكن المثقفين والطبقة الوسطى والشباب اللي كانوا وقود الثورة وفتيلها .. ده دورهم الأن بعد إزاحة الظلم .. دورهم دلوقت تنويري وتوعوي .. لكن لمين ؟ بالتأكيد لرجل الشارع العادي ... عشان نحمية من الإنقياد وراء أفكار مغلوطة وغزوات مزعومه انا مش باطلب إن كل الشعب يبقى معاه درجة دكتوراه ... لكن على الأقل بأطالب إن يكون عندهم وعي بما يدور حولهم .. وبتعريف صحيح للمفاهيم المُرددة الأن وعيب قوي لما الاقي فتاوى من ناس المفروض إنها مثقفة .. عيب قوي إنهم يخلطوا 1 % من تعريف تلك المفاهيم بـ 99 % من مخاوف واغلاط من عندياتهم لتُثير الرعب في نفوس الناس يعني إيه أول أمس الاقي شباب جامعي محترم واقف أمام دار القضاء بيوجة كلمة أسف لما حدث مع الدكتور البرادعي .. يقوم جاي مجموعة تانية مش عارف منين ما هو ما حدش يقول لي إن دول كانوا عارفين بالوقفة بتاعت الدكتور البرادعي ويروح المناهضين للفكرة دي معتدين بالإيدي على الطلبة والشباب دول ؟ إيه ده ؟ من حق كل واحد يعبر عن رأيه بحرية وسلام لكن ما أقلقني ويحتاج إلى وقفة إنتوا بتضربوهم ليه يا جماعة ؟ نفس الكلام الببغائي .... هو اللي ضرب العراق يا عم ده ليبرالي والعياذ بالله ده بنته متجوز نصراني وكتبوا الكتاب في الكنيسة طبعا دي أفكار مغلوطة كانت محتاجه خمس دقايق تعب من الواحد عشان يتأكد من مصدرها وحقيقتها واعتقد إن حال البلد الان يسمح لشباب ائتلاف الثورة .. او المثقفين الحقيقيين الذين لا يبتغون إلا التنوير وكلمة الحق ... أعتقد إن كل هؤلاء يُمكنهم عقد ندوات بالجامعات ويوضحوا للجميع بمنتهى الامانة مفهوم تلك المصطلحات المتطايرة بحيث غن كل واحد من الشباب الجامعي اللي بيحضر الندوات اللي زي دي يوعي اللي حواليه ولا مانع من أن يذهب هؤلاء المثقفون إلى الأرياف والقرى ونعمل ندوات مُبسطة وبعيدة عن الكلكعة .. بحيث إن لما تيجي عندنا إنتخابات برلمانية الكل يبقى عارف أبسط حقوقه وعارف هدفه وعارف إمتى يقول لا وإمتى يقول نعم ونبقى إحنا السد المنيع اللي يحميهم من الإنقياد وراء الأفكار المغلوطة وأظن كلنا شوفنا موضوع الإستفتاء والتراشق اللي من الجانبيين قساوسة عيني عينك يخطبوا في الناس وإنهم لازم يقولوا لا للتعديلات عشان ما يسمحوش بقيام دولة دينية ومشايخ عاوزينها نعم لإن المسيحيين هايقولوا لأ وبالتالي يلغوا كلمة الإسلام من الدستور وكل ذلك كان بعيد عن الصحة ولا أساس له .. والكل كان بيحرك الناس للأسف زي الشطرنج لتحقيق أغراض في نفسه هو كمان عاوز يبقى دفي دور للإعلام المحترم .. ويكون محايد مش ديماجوجي ... بلاش دي .. ما يكون مُوجه ومحرض لفكر ما ولنا عودة

خايف اتحاد الكورة يسرح حسن شحاته ،،، هيرشح نفسه عالطول للرئاسة

في غياب الشرطة كان السلفيون هم من قاموا بحماية البلد عندنا فكان يخرج من المسجد شيوخ تنظيم المرور وكان يخرج منه شيوخ حراسة الكنيسة حتى حراسة مبنى أمن الدولة شباب ملتح وشيوخ ينتشرون في كل نقاط المرور وقد رأيت ذلك بنفسي المسجد فيه كل أعمال البر وقراءة القرآن ومنهم الصوامون القوامون الذاكرون لله سبحانه وتعالى ذكرا أحس معه بضآلة نفسي ولكن ماذا نقول ؟ لقد أخذت علي بعضهم عدم انخراطه في الشأن السياسي وإيثارهم سلامة الوطن باجتهاد منهم في ذلك فيأتي البعض ويتهمونهم كذبا بضد ما هم عليه وهو العنف هذه هي الطامة ولو أتهمهم الناس بالسلبية لم أكن لأعترض ولكن الغرض مرض يبتلى به بعض الناس وربنا يهدي

أستقبلت الخبر اليوم بمنتهى السعادة وأعتقد إن ربنا بيكلل جهود جميع أعضاء هذا الصرح الثقافي بالنجاح فكل قلم وكل فكر وكل صاحب رسالة قال كلمة حق في هذا المكان في أي وقت . يستحق منا كل التقدير والثناء ومش عارف بقى هي عادة المصريين ولا هايشتروها يعني حتى في الفرح بنفتكر موتانا ... لانني الأن تذكرت كل الذين رحلوا عنا بعد ان كانوا شموعاً تُضيء حياتنا الفكرية أخي وحبيبي وأستاذي الأفوكاتو وعمي كما كنت اناديه .. ا اخناتون والأديب الكبير ابو حميد والشاعر الرقيق هومر ولا ننسى مجهود هذا الإنسان الجميل الفنان هشام عبد الوهاب الذي رحل عنا فجأة بدون ان نوفيه حقه في بناء هذا الصرح حقيقة أنا أفتخر باني انتسب لهذا المكان وأفتخر اكثر بما تعلمته منذ أن أنضممت إلى تلك الزمرة التي تمثل قمة الثقافة والرٌٌقي في هذا المجتمع ... والذي ظن الكثيرون بإنه مات .. او خرج ولم يعد لكن .. ولإننا أصحاب رسالة ثقافية ... لم نياس يوماً او نفقد الأمل في الضوء الذي في اخر الممر ويا له من ضوء .... فلم يكن ضوءاً عادياً .. بل هو شعاع امل أضاء لنا جميعاً المستقبل .... ---------- اؤيد فكرة تلاقي اعضاء المنتدى على هامش الندوة .. واعتقد إن أستاذ عادل يُرحب بمثل تلك اللقاءات الفكرية -------- وأخيراً وليس اخراً .. أشكر اخي الكريم محمد رفعت " المدهش " والذي كانت مدينة جده هي مكان معرفتنا ... شكرًاً يا محمد على مجهودك .. وربنا يجعله في ميزان حسناتك .... ويارب نلاقيك بكره رئيس تحرير كبير في الأهرام بدل أسامه سرايا والأشكال الحمضانة دي

عمرو موسى : سياسي دبلوماسي تقيل يقدر من بكرة يبقى رئيس ، له كاريزما وهو ما يخيف البعض منه أحيانا.. البرادعي : (مع التحفظ طبعا على بعض أفكاره) رجل مؤسسات لن يظهر كشخص ولكن ستظهر أعماله فقط وهو ما نريد ، ليس له كاريزما وهو ما يخيف أيضا لأن الفترة القادمة دولة المؤسسات لم تشتد بعد وبالتالي نحتاج لصاحب القرار الجرئ

فاكرة أول لحظة رومانسية بيننا وإحنا بنترش بمية عربية المطافى يوم 25 .. !!! ليلة الحبر الفسفوري، بدل ليلة الحنة ده عيل أجنده ها يضحك عليكي وياخد النعمين اللي حيلتك لما بتكون بعيد عني بحس بفراغ دستوري تروح تتقدم وحماك يقولك احنا بنشترى شاب ثورى معلش يا حبيبتي مش هنسهر النهاردة نازل اللجنة الشعبية لا يا عمى الطلبات ده كتير , انا فاهم فى الاصول , انا خطبت واتخطبت قبل كده :closedeyes: احلي حاجة فيكي انك ثوراجية بجد مش من اللي نضفوا الميدان ورسموا علم مصر واتصوروا مع صوابعهم الفسفوري صدقيني زي ما بقولك الدستور اتعدل والجواز بقي عرفي فقط احنا لازم نأجل موضوع الخلفة ده شوية مينفعش نجيب عيال يتولدو يلاقوا عندهم فراغ دستورى بحبك حب محبتوش عجلة الانتاج للاستقرار يا حبيبتي وانا جنبك ببقى حاسس بإطمئنان ولا اطمئنان التعديلات الدستورية لما نخلف هنسمي ولادنا : حظر وفراغ وعجلة"انتاج بعد الثورة شالو القايمة وحطو اجندة الزوجة: انا ممكن اسامحك في اي حاجة الا انك تشتمني وتقولي روحي وانت شبه سوزان الجواز دلوقت مينفعش ياخد شرعيه الا من ميدان التحرير .. زمن الاجندات الي بيمشي بيها المأذون دا انتهي خلاص بس انتي أصلا لسه غير مؤهله الديمقراطيه وعشان اكون واضح معاك من الاول يا عمي الاجندات عليا والكنتاكي عليك انني لم أكن يوما أطمع في شبكة أو مال وانما أريد أن أتزوج ..واموت على تراب هذا الوطن العروسه تحدف ملوتوف بدل الورد فى اخر الفرح واللى يجى عليها تبقى هتتجوز الاول هو كل ماتقوم ثوره هاتبيتلى فى الشارع ياحبيبى يقطع المظاهرات وسنينها يعنى حمادة هلال يغنى عروسة وعريس اتجوزو .. و بقى بينهم جواز .. و الجواز جمعهم سوا انت بتستعبط يا مرسي كل يوم تقلي ورايا لجنة شعبية وتسهر لنص الليل ؟ قولي ل باباكي يحدد ميعاد علي البورصه عشان اطلب ايدك اول مرة احس بمشاعر ناحيتك ..وانا بدور علي ملفي وملفك في امن الدولة .... استني يا بيبي ..اظبط الميك اب بتاعي..علم مصر بدء يتمسح فاكرة اما امك ما كانتش راضية تبعتلنا اكل فى اللجان الشعبية انا حاسة انه بيخوني يا ماما كل يوم يرجعلي وش الفجر قال ايه كان في اجتماعات ائتلاف شباب الثورة مكنش فارق معايا انك زملكاوية او انك بتحبي السقا ...بس لما باباكي يكون حزب وطني يبقي انا من سكة وانتي من سكة بص يا عمر ، انت كل ما تتأخر في الخطوبه ، سقف المطالب بتاعتي عمال بيعلي ، انت حر بقي أعملك جدول زمني و لخص وإننى يحز فى نفسى -- مارأيته من بنو منطقتى !! شوفتى ابوكى -- بيرفضنى ياساميه

تونس عملت ثورة الياسمين واحنا عملنا ثورة الأسفين :blink:

مدام ضحى ,, من منا لديه القدرة هنا على وضع المعايير التي نحكم بها على مداخلة ما انها افلاس فكري او كوبي بيست او تشات ؟ مثلا الكلام الموجود في اخر 5 مداخلات لو طبقنا عليه معاييرك وهو ( الردود الموجهة لشخص او مجموعه اشخاص باعينهم والي في الغالب لا تهم غيرهم بل ربما لا تهمهم هم انفسهم لو رجعوا لها بعد فترة من الزمن ) لاصبح من حق مشرف ما في منتدى ما انه ياخد مشاركاتنا انا وانتي واستاذ عادل كده على بعض وفي الريسيكل بن ,, الحرية بمعناها الصحيح السليم غير القمعي ان الكل يكتب ويفكر ويخط بقلمه مايشاء والحكم في النهاية هو للاعضاء فقط ,, قد نجد فلانا من الناس يقعر ويدبج ويحوقل في الكلام ويفتح التوبيكات ولا يجد من يقرأ له او يتفاعل معه ,, و نجد الاخر قد يضع ابتسامة فقط يوصل من خلالها الاف المعاني ,, تقييم الغير ان هذا يصلح للنشر وهذا اقل من المستوى وهذا تشات وهذا افلاس فكري ليس من حق اي كائن في هذا المكان المحترم الكريم ,, حدودك تقف عند المنطقة الخاصة بك انتي اما تقييم جميع الاطياف الفكرية المطروحة من خلال منظور احادي يرى نفسه الاصح والاصلح فخطأ فادح ,, بنفس المنطق نمسك بقى بمقصاتنا الرقابية وننطلق الى افلام الخمسينات والستينات مثلا و نبدأ في المذابح والقص بلا رحمة ,, حتى شخصية هزلية مثل الفنان شكوكو مثلا لن نجد له اثرا في كتب تاريخكم التي ارسيتم حدودها ومبادئها منذ قليل ,, استشهادي بالاية كان سليم لاني اشير ان المولى لم ( يحذف ) مسبة الخصوم بل تركها في القرآن كما هي ,, فما بالكم انتم تقصفون من القلم لطيف الكلم ! حريتي برقبتي ,, اضع وردة اضع ابتسامة اضع علامة تعجب امازح الاطف اغاضب هذا شأني ,, وقراري انا الفرد الحر ,, ولا يطبق على اي احد منا هنا الا المعايير الاخلاقية والاداب العامة فقط اما باقي المعايير فنحن فقط من نؤسس المعايير ,, والعبرة بالصناديق ,, :happy: قصدي بتفاعل الجميع وتعليقاتهم وفطرتهم النقية السليمة ,,

الا يوجد في مصر غير موسي والبرادعي والبسطويسي والصباحي ونور نفسي في رئيس يكون مشروعة القومي هو انتشال الشعب المصري من العشوائيات الشعب الذي قام بثورة 25 يناير يجب ان يعيش في اماكن ادمية يكون التعليم والصحة و البحث العلمي علي قمة اولوياته يقضي علي الفساد والرشوة والمحسوبية والمحليات يتحدث بلغة الشعب والشارع المصري غير مدخن ولا يساعد علي التدخين بقرارات مستفذه ويكون مرتبه مليون جنية في الشهر وده يكون الحد الاقصي للمرتبات في مصر يفتح حساب بنكي يحول عليه مرتبه شهريا ويكون رصيده في نهاية فترة حكمه 4سنوات × 12شهر × مليون = 48 مليون جنية لا يقبل الهدايا والعمولات لا يكون بزنس مان ولا يساعد علي البزنسه في حد بالمواصفات ده ويكون سنة 45 سنة ولا يزيد عن 55 سنة اكيد مصر ولاده

مراوغ استمعت له مرتين إجابات فضفاضة تخرج عن موضوع السؤال لتفادى الإحراج فى نهاية اللقاء لم أخرج بشيئ مفيد حنشوف

http://www.youtube.com/watch?v=VD_BjhHoObo

شكرا فتفوته على الحوار لاني لم اتمكن من مشاهدته على التلفزيون .. ان شاء الله احاول اشوفه قريب .. على فكره كاريزما عمرو موسى مش هي السبب الوحيد لترحيب البعض به تماما كما افتقاد البرادعي للكاريزما مش هي ابدا السبب الرئيسي وراء رفض البعض الآخر .. اقرب لك الصورة .. ممكن جدا انك تستمع لام كلثوم وتتغاضى عن متابعتها ( بصريا ) مكتفي بالهبة الربانية في صوتها الي مظنش حد آخر حصل على مثلها حتى الآن .. وارد برضه انك تتغاضى عن الاستماع باصغاء لهيفاء وهبي مكتفيا بالمشاهده .. طبعا عشان بس تشوف آخرتها مع بنت اللذين دي .. بس ازاي الحال بقى لو ان ام كلثوم كانت تغني فقط .. بصوت هيفاء ؟؟؟؟ على كل اتمنى اننا كمصريين نستحق ان يأتي اليوم الذي نحصل فيه على مرشح يجمع المقومات كلها كمطربة لها حنجرة كلثومية وعيون هيفا .. وحتى ذلك اليوم ملناش غير نختار ونفاضل بين المطروح .. والكاريزما اكيد احد معايير المفاضلة .. والصين مش وحشة برضه . .

الله أكبر ماشاء لا قوة إلا بالله طيب يعني كدو نقول أن الأشية بقت معدن معايا 100 ريال خدها انت وتيمور النص بالنص وحطوها في محفظتكم المالية و تاجروا في البورصة وإشتروا كل الأسهم الجامدة ولما تكسبوا حولوا نصيبي علي بنك سامبا فرع المدينة المنورة بالدولار art:) 100 ريال في السنة ... ممكن يعملوا لك 103 حاجه أخر فُل --------- خلي بالك يا دبدوب إن كل البورصجية شافوا أيام طين في عهد مبارك ... وما تنساش إن كان رئيس البورصة هو ماجد شوقي إبن أخت يوسف بطرس غالي وكان شخصاً يكره نفسه قبل أن يكره الأخرين .. وبالتالي لما كان بيشوف حد كسبان جنيه كان بيطخه بالنار على طول فاللي بيحصل دلوقت هو تعويض جزء من الخساير الفادحةلمدة طويلة تصل إلى سنوات .. يعني على سبيل المثال .. البورصة قبل الثورة بحاجات بسيطة وفي اليومين اللي فتحتهم بعد 25 .. والأيام اللي قفلت فيها كانت الخساير تفوق 200 مليار ومن يوم الأربع يادوب اللي حصل مكسب 17 مليار شوف الفرق أنا شخصياً خسران حوالي 5 مليار هههههههههههه إدعي لي بس أرجع الـ 100 مليار بتوعي ولك فيهم 35 الف ج ..

هذا المقال رائع للغاية نشرته جريدة الشرق القطرية بتاريخ 6/11/2010 أي قبل أحداث الثورات العربية ، المقال يتناول فكرة الفوضى الخلاقة على نطاق الدول منفردة ، ثم تتسع الدائرة لتشمل الفوضى الجيوسياسية على نطاق الإقليم، سأعرض المقال ، وهو طويل نوع ما ولكنه مفيد ، كما أرجو أن يضيف الأفاضل هنا وجهة نظرهم حول مصطلحاته العميقة وأثرها الملموس على الأحداث سواء في مصر (المتأثرة بالفوضى الخلاقة) أو في منطقة كمنطقة الخليج (الغير بعيدة عن الفوضى الجيوسياسية) ، كما أرجوا أن لا تتحول الإراء إلى نظرية المؤامرة بشكل مباشر ، لأني لا أنكر أنه سيكون له نصيب من الطرح .. أترككم مع المقال

http://www.youtube.com/watch?v=PAryUZIXPXI

لما تيجي تتكلم عن النظام القضائي المصري ... ممكن البعض يتهمك بالكفر والزندقة .. لكنني ولله الحمد لا أخشى ذلك .. وأطلق عليه في كثير من الأحيان ... مسخرة بكل ما تحمل الكلمة من معنى فلما تكون عندي قضايا مكتملة الأركان .. على سبيل المثال : 1- غرق العبارة السلام 98 في فبراير 2006 ... ومقتل 1300 نفس بشرية .. وتتحول القضية إلى جُنحة .. وتنزل على ما فيش ... بعد إيه ؟ بعد اكثر من 3 سنوات تداول وتأجيلات أمام المحاكم لحد ما في ناس من أهالي الضحايا أصيبو بالجنون ودخلوا مستشفى الأمراض العقلية .. ومنهم من قضى نحبه كمداً وغماً من غير ان يعرف مصير القاتل الذي يعيش عيشة الملوك الان في لندن هو وأولاده .. وشركاءة بالداخل هم علية القوم ومنهم القاتل زكريا عزمي . 2- مقتل سوزان تميم سنة 2008 ... وليه لحد دلوقت لعب وتسويف ومسخرة مالهاش نهاية ؟ 3- قضايا الفساد المتورط فيها المجرم محمد إيراهيم سليمان .. وفي الأخر ... يقول لك حفظ القضية لعدم وجود أدلة فساد ضده ههههههههههههههه .. اومال لقيتوا أدلة ضدي أنا ؟ وها نحن الان نسير في نفس الطريق في قضايا إفساد 30 سنة ..... وربنايدينا ويديكم طولة العُمر اهم حاجه دولاب العمل ... والحرص على إجراءات التقاضي .. والتأجيل قدر المستطاع للإطلاع والنقض والأستئناف .. وفي الأخر يقول لك " معليش القاضي تنحى عن القضية لإحساسة بالحرج " .. وعيد من الأول يا عبد الموجود ...

طبيعى انك تخاف ,وده شىء ايجابى ,خلى خوفك يعطيك دفعه للتخطيط السليم وتوكل على الله وكفى بالله وكيلا

بكل شده اؤيد هذهالمظاهره وامثالها ...سمعت تعليق من ابنتى كتبته على الفايسبوك ..اثار انتباهى جدا ..كتبت ..انتبه الثوره ترجع الى الخلف !!!!!! وما ضاع حق وراءه مطالب ...ولو صبرررررررنا زى ما بعضنا بينادى صدقونى سنين صابرنى لما اتعودنا الصبر والصبر زهق مننا ايه المانع اننا نشتغل والعجله تدور ومانتازلش عن حقنا ؟؟ ايه المانع اننا نفضل على يد واحده لحد ما تتحقق اهداف الثوره اللى راح فيها زهره شباب ولادنا ؟ اللى بيحصل دلوقتى مخيف جدا ..التسويف فى الامور ده مقلق جدا .. وجود حد زى زكريا عزمى وما يمتلكه من اسرار للبلد مخيف السكوت عنه وعن صفوت الشريف ونظيف وغيرهم مرعب هما فين ؟ وليه البطء فى التحقيقات دى؟ اتذكر برنامج كان عالمحور من شهور لسجينات فى سجن القناطر والله مانمت وقتها ولا نسيته للان...الستات كانوا محكوم عليهم من 3 سنوات ل 15 سنه ليه ؟؟ شيكات وكمبيالات لاتتعدى الالاف منهم اتحبست على كمبيالات بخمسه الاف جنيه كانت بتجهز بنتها اللى فاتها القطر زى ما قالت فكتبت كمبيالات على نفسها وما سددتش ... طيب 5 الاف جنيه وحكم فورى وسجن لامرأه جاهله او حتى متعلمه واللى نهب مليارات ومص دم شعب نستنى عليه ده كله ليييييه؟؟ لابد من الثوره والله واستمرارها مع دوران عجله الانتاج ...هى مرحله عصيبه مافيش شك ولكننا بدأنها ويااارب ثبتنا وساعدنا على الاستمرار كل فى مكانه حتى ان شاء الله ما يضيعش حق وراه مطالب به اعتذر لانى كتبت ومحيت المشاركه لخطأ ما ,,,وسامحونى لجهلى سابقا بأمور كتيره تخص بلدى ...مش عيب انى اتعلم من ولادى

على قناة الحياة برنامح (الحياة اليوم) استضاف المحامي الدولي خالد أبو بكر والأستاذ نصر القفاص مدير تحرير الأهرام. وعاب الأستاذ خالد على الخارجية المصرية تأخرها في طلب تجميد الأموال والأرصدة الخاصة برموز النظام السابق وقال إننا لم نطالب بذلك إلا بعد مرور أكثر من شهر على الأحداث. كما وجه أبو بكر نداء إلى النائب العام للمطالبة بكشف سرية حسابات المتهمين الموجودة في الخارج طوال العام الماضي. الفيديو http://www.youtube.com/watch?v=uJkKF3VkUok&feature=player_embedded#at=202

مقتنعة تماما اننا لو فهمنا ديننا صح.. هنقدر ننهض ببلدنا هنقدر نختار صح و نعمل تجربتنا الخاصة مقتنعة ان ديننا منهج حياة متكامل يكفل الحرية لكل من يعيش في أرض يحكمها هذا المنهج يمكن محتاجين وقت عشان نوصل لده .. وقت الناس تفهم دينها أحسن و تلتزم به اكثر هستنى لما اشوف مين هيطرح نفسه للعمل العام و على اي اساس .. ساعتها اقدر اقرر لكن في كل الحالات لازم اللي يحكم يكون باقتناع الناس و رضاها و يتوفر لنا الاليات لمحاسبته و تصحيح المسار عارفة اني ماجاوبتش اوي على اسئلتك :closedeyes: كالعادة

أنا اقترح علي كل القوي السياسية اللي ناوية تخش الانتخابات القادمة ،، (( إذا لم تتحد كل القوي السياسية بما فيها الإسلاميين تحت لواء إئتلاف الثورة - كما أحلم )) أنا يستخدموا شعار (( كلنا مسلمون )) ردا علي شعارات ،،، الإسلام هو الحل ،، الأخوان المسلمون الخ ،،، عشان ميوقعوش الشعب مرة تانية في فخ إنهم بيختاورا بين الإسلام و غيره أي مواطن مصري بسيط لو خير ما بين الإسلام و غيره ،،،،، هيختار الإسلام علي الأقل بمبدأ عشان ربنا يكرمنا

خد باله من غلطته و لاّ لسة؟ لان الفقرة دي معناها انه مش معترف انه اخطا و اساء التعبير مش فاهمة .. هل مشكلته مع اعتراض الناس على كلامه .. أم مع كلامه نفسه؟؟ يعني لو الواحد عمل حاجة غلط و محدش اعترض قبل كده .. تبقى صح؟؟ عموما .. أعتقد أيامه معدودة

الشهيد..على

النظام السابق اورث بعض الناس وباء (الاخوان فوبيا) حتي لو تصرف الاخوان كالملائكة لازم هايطلع حد برضو ينتقدهم انا مش من الاخوان بس ديه الحقيقة

إكتب يا تاريخ سجـِل كفاحنا و عندنا مليون دليل وثـَّق يا تاريخ إكتب على سطور الشرف و إنظم لنا ديوان طويل إكتب بحبر كرامة المصري الأصيل سجـِّـل شهادة حق إنتفاضة عـِزه للشعب الجميل قام و إنتفضو حـِـلـِـف بسماها و بترابها و بالهوا و النيل لتعود الحريه لأرضه و لا غير الحريه بديل اقسم ليجيب حقه بيده و يشد الهمه و الحيل و يغير دستوره بفرضه و تبرق شمسه فـ حضن الليل حالف يزرع مصر بكده بعرقه و شرفه مـُنى و قناديل و حلف يطرد منها الظالم و يخرجه صاغر و ذليل إكتب يا تاريخ سجل كفاحه و وثـَّـقه.. بمليون دليل *********************** الشعب حدد كلمته : أنا المصـــري زاع ثورته ... أنا المصـــري بعلو الصوت و حق البث مش حصري أنــا المصـــري أنا المصري .. أنا إبن النيل أنا اللي جعلت من الهرم ضهري أنا البنت القويه و أنا الشباب الأسمر أنا اللي في التحرير كفاحي و ثورتي و نـــصـــــري أنا ... أنا ... أنا المــصـــــــــري و إشهد يا تاريخ أنا المـصــــري بقلم : زهرة الجبل

قصيدة انا شارى اجندة انا شاري اجنده بني حاسس ان الحكومه هتاكولني قاعد فى كنتاكي بظبط ...والاخوان عماله تتنطط الدبابه اللي ورايا قدامي والكوكا على طرف لساني باجي اشربها تتدلدق تتدلدق يا عمر ولععع ولع ... يا حسني ولعععع ولع كوكا كوكا كوكا ولعووووهااااااا اشتريت اجنده تانيه وايران دفعتلي فى ثانيه وكتبت وكتبت وكتبت وكتبت كتبت على الاجنده البرادعي ابن حتتنا ضربوني وسحلوني وياريتهم ما ضربوني عوروني ودوخوني يا عمر ولععع ولع ... يا حسني ولععع ولع ولعووووهاااااااا ودي اخرة الخيانه متعملوهاش معايا سيبوني اعيش حياتي وخدوا بدالي حماتي مش هشتري اجنده تاني ولا هتظاهر من تاني

يا إسلام أنا فتحت موضوعا منفصلا لفكرة أخرى غير التي في موضوعك التي هي على ما أظن الفكرة الوحيدة التي لك في كل موضوعاتك من فترة طويلة وهي القول بأن السلفيين دول ناس وحشة رغم تعدد الموضوعات وتطورها هي هي نفس الفكرة - بدأت بانتقادهم في تفكيرهم وكتبهم - ثم تطورت بإلصاق التهم بهم مثلا بأنهم شالوا يافطة واحد وقطعوا ودن واحد وطردوا واحدة من بيتها وهكذا - وأنا في انتظار موضوعات السلفيين قتلوا واحد ودبحوا واحد وغرقوا واحد وفطسوا واحد طبقا للتطور الطبيعي لهذه الفكرة الوحيدة التي فشلت فشلا ذريعا في جعلها واقعا في أذهاننا الفكرة واحدة من سنين والجميع يرد عليك وأنت ماض فيما أنت عليه لا أنت تتغيير ولا نحن نفتنع بشيء يخالف الواقع الذي نعيشه على الأرض من صديقي السلفي وأخويا وزميلي في العمل فلن تعرفني أنت بهم أو ستكذب عليهم ونصدقك مش ممكن طبعا ولكن نفترض افتراضا جدليا أن قولك صحيح وأنهم متطرفون وكانوا يشكلون غالبية الشعب فلا مانع ديمقراطي في العالم أن تعطى الأغلبية الحكم حتى لو كانت هذه الأغلبية يمينا متطرفا كما يحدث في أمريكا وغيرها أبشرك بأن السلفية واقع مصري موجود يتطور الآن سياسيا والذي يعجل بثقلهم هو حملة الهجوم الإعلامي عليهم حضرتك تتكلم عن نفسك من فضلك ولا تجمع في كلامك ولا تعمم قناعاتك علي الجميع فهناك من يتفق معي في الرأي وهم كثر وهناك من يختلف معي وهم كثر ايضا اذا اردت ان تتكلم عن إنحدار المستوي الحواري فيجب عليك ان تذكر ايضا هؤلاء الناس الذين يستخدمون مرادفات غير مقبولة في منتدي ثقافي علي هذه الدرجة من الوعي مثل ذيل الثعبان وضرب الشباشب فلا يليق ان نستخدم مثل هذه الالفاظ عندما نتحاور مع عقلاء المنتدي وبخصوص الافكار فبالرغم من متابعتك لمواضيعي كما تدعي الا انك لا تتابع الا مواضيع واحدة وهي الخاصة بمن انتقدهم لكن يا عزيزي امامك صفحة مواضيعي ادخل عليها وستجد انها ليست كما صور لك خيالك إنه موضوع من موضوعات كثيرة وافكار متنوعة في العديد من المجالات كونتها علي فترات عمري المختلفة قد تكون صواب وقد تكون خطأ وللاسف الشديد ليس لتلك الفئة التي تتكلم عنها المقدرة علي اقناعي واقناع عقلاء المنتدي بغير ما نؤمن به السلفية ليست لها اي ثقل في المجتمع المصري كما تزعم لانهم مازالوا منعزلون عن المجتمع ينظرون اليه علي انه مجتمع ضال يحتاج لتصليح افكاره واتجاهاته اما انك تعيش علي الاوهام فانت حر اما انك لا تسمع الا نفسك فانت حر وانا ايضا حر ولم يذهب مجهودي هدرا كما تتخيل فالحمد لله الكثير يستمع اليّ ويتفهم ما اقولة لانهم لديهم الرغبة في فهم ما اقوله وهذا يكفيني اما من يعتقد انه يحتكر الحقيقة دون غيره ولا يود ان يستمع الا لصوته فقط فهؤلاء معروف نهايتهم التي ستكون مؤلمة لنا جميعا لكنهم اختاروا وعليهم تحمل تبعات اختياراتهم افضل الا ترد علي هذه المداخلة