لوحة القادة

فاكرنى ؟!أنا اللى اديته ازازة المياه واحنا واقفين فى طابور محطة البنزين.. أنا اللى وقفت بعربيتى علشان تعدى الشارع لما كنت مع الأولاد.. أنا اللى لما عربيتى عطلت, لقيتك سبت اللى فايديك على الأرض علشان تزق معايا.. أنا اللى لما ماكانش معاك فكة عند الكشك حاسبتلك.. أنا اللى زعقت معاك لسواق الميكروباص علشان يهدّى, و دافعنا عنه لما الأمين افترى عليه فى الكمين.. أنا اللى اتخانقت مع العيال اللى ضايقوا أختك فى الشارع يوم زمان.. أنا اللى انت لحقته على باب المحل لما نسيت محفظتى عند الكاشير.. أنا اللى لما صُدفة بصينا لبعض من شبابيك عربياتنا فى الزحمة ابتسمنا.. أنا اللى انت حوشت ما بينه و بين سواق التاكسى لما خيّشت فيه, و ماسبتناش إلّا لما صلينا على النبى و بوسنا دماغ بعض لأن الموضوع كان بسيط.. أنا اللى وقفت عالطريق فى المغربية علشان تكسر صيامك ساعة الفطار.. أنا اللى سألتك على السكة, خفت إنى اتوه و مع إنه مش طريقك قولتلى تعالى ورايا لحد المكان.. أنا اللى شوفته واقف فى الطابور علشان يحاسب, فاستأذنتلى الناس أحاسب الأول لأن مفيش معايا الا حاجة واحدة مشتريها.. أنا اللى مارديتش أقلب الصفحة و انت قاعد جنبى فى المواصلة لما لقيتك لسة مشغول بالكلام.. أنا اللى انت مسكتله باب المترو علشان يلحق ينزل فى المحطة.. أنا اللى ساعة الشدة و غياب الأمان ملقيتش غيرك و انت مالقيتش غيرى علشان نتحامى فى بعض.. ......... قالولى إن انت ضد البلد و الدين و ضدى و كلام كتير, و عرفت انهم قالولك عنى نفس الكلام.. قلت أسألك ... فاكرنى؟! cpd