لوحة القادة

اكتر حاجة تجنن في الموضوع ده إن الناس اللي مفروض إنها متعلمة وفاهمة وكبيرة .. ومفروض إنها هي اللي توعي وتفهم الناس الجاهلة .. تلاقي الناس المتعلمين دول ماشيين مع الرايجة وبيفرحوا مع الفرحانين .. فرحانين بإيه يا ترى .. هل يا ترى مصر نجحت في الثانوية العامة بمجموع كبير وهتروح كلية الطب فعشان كده فرحانين .. ولا مصر كسبت بطولة أمم أفريقيا تاني مثلا فعشان كده فرحانين ... فرح العمدة اللي اتعمل ده واتصرفت عليه كل المبالغ دي .. اتعمل عشان ايه ؟؟ يعني ممكن يكون المبرر الوحيد المنطقي إننا قدرنا ننجز حاجة كبيرة ومحتاجة مجهود كبير زي ده في سنة واحدة بس .. بتهيألي هي دي الحاجة الوحيدة اللي ممكن يكون ليها تبرير .. بس لو احنا سلمنا بالمبدأ ده .. ليه بقى كنا بندرس في كتب التاريخ ( والله كتب التاريخ ) إن الخديوي إسماعيل كان سفيه ومبذر وضيع فلوس مصر لما عمل افتتاحية ضخمة للقناة الأصلية ( مش الصيني التقليد ) وعزم كل ملوك وأمراء أوربا .. ده الراجل ده على كده كان مفروض يعمل حفلة أد اللي عملها 100 مليون مرة .. إنه قدر يحفر القناة كلها من قرن ونص من الزمان في 10 سنين بس .. وبالفاس والمقطف بس .. لا في كراكات ولا اوناش ولا وسائل مواصلات ولا أي حاجة خالص غير معادلة واحدة ( قوة وعزيمة المصري + الفاس + المقطف ) .. يعني حى فرح العمدة اللي حصل ده عشان إننا أنجزنا حاجة كبيرة زي دي في سنة واحدة .. طله برضه ما يستاهلش .. لأننا سنة 1869 يعني من حوالي قرن ونص من الزمان .. قدرنا نحفر القناة كاملة في عشر سنين بس .. ومن غير أي وسائل مساعدة خالص غير الفاس والمقطف .. يعني معنى كده إننا قدراتنا أكبر بكتير جدا جدا جدا إلخ إلخ إلخ من حفر التفريعة الجديدة دي في سنة واحدة بس .. طبعا أنا مش هتكلم عن الجدوى الاقتصادية للمشروع .. لأن مداخلة الأخ هيرو .. رقم 55 .. فيها الكفاية للي عايز يقرا ويعرف .. ويحلل .. مش يهلل .. النقطة الأخيرة اللي عايز اتكلم عليها .. هي أرض النفاق الذهبية اللي بقينا عايشين فيها .. لما وزارة الأوقاف توزع خطبة موحدة على المساجد بمناسبة افتتاح القناة وتشبه فيها حفر قناة السويس .. بإنه زي حفر الخندق في غزوة الخندق .. ولما إذاعة القرآن الكريم تخصص برامجها للحديث عن قناة السويس .. ويطلع فيها ضيف يقارن بين السيسي وبين سيدنا يوسف وسيدنا إبراهيم وسيدنا محمد .. يبقى ده معناه ايه ؟؟ معناه .. إن النهاية هتكون سودا .. للأسف ..

بخصوص القص واللصق بدون تعليق من السادة الأعضاء ================================ حرصنا - فى محاورات المصريين - على أنه على المتحاور كتعبير عن إحترامه للقراء أن يضيف تعليقه على الخبر المنقول و رأيه فى مصداقية الجهة التى ينقل منها وما هى النقطة فى "المنقول" المتعلقة بموضوع المناقشة و كذا عن رأيه فى الخبر - سلبا أو إيجابا - و تداعياته إن كان صحيحا أو خاطئا ولذلك فقد كان من قواعد المشاركة فى المحاورات هذه القاعدة لذلك فإننا نهيب بالسادة الأعضاء المحترمين وبالذات ممن دأبوا على هذا السلوك الذى ينم عن عدم تقدير للأطراف الأخرى فى الحوار ويكررونه - بإصرار واضح - سواء بلصق أخبار .. أو .. مقالات .. أو .. فيديوهات بدون تعليق أو كلمة من جانبهم الالتزام بقواعد المشاركة التى كان قبولها شرطا للانضمام إلى هذه الباقة من السادة المحترمين (فريق الإشراف والتنسيق)

طيب و ليه تستخسر في الشعب المصري الفرحة بعد المآسي اللي مر بيها في السنوات السابقة ؟!! مش يمكن ما صدقوا يفرحوا بحاجة او محتاجين لأي فرحة اكتر من كدا بكتير ... فرحة انجاز مشروع كبير في وقت قياسي باموال مصرية متحديين كل الصعاب و الارهاب و المشاكل التي تحيط بنا ... تحدي الذات و اثبات للعالم ان المصريين مازالوا واقفين على اقدامهم و لم ينفرط عقدهم يستاهل الفرحة الفرح دا معمول بتمويل رجال الاعمال مش من الخزانة المصرية وهو فرح مشرف لأ مش الوحيد الهدف كما قلت من قبل انك تثبت امام العالم ان ما مرت به مصر لا يمكن ان يفقدها الارادة و ان الفرح الكبير دا اما يمر بسلام معناه ان مصر آمنة و يمكن للسواح ان يعودوا لمصر حضرتك بتدرس في التاريخ حاجات كتير غلط ما جاتش على فرح العمدة احنا مش عاوزين مكسب خالص من القناة الجديدة باقولها باعتباري مساهمة في تمويلها حضرتك مادام مش مقتنع بجدواها الاقتصادية يبقى اكيد ما ساهمتش فيها... يبقى اكيد مش هتكون فارقة معاك مع العلم ان ولا أعظم اقتصادي في العالم يقدر يحسب بدقة الجدوى الاقتصادية منها و للزميل الفاضل هيرو مداخلة فيه فيديو بعنوان ( ضربة قاضية للسيساوية على التلقزيون المصري ) الضيف نفسه بيقول ماحدش يقدر يحدد الجدوى الاقتصادية من التفريعة ) كلها تكهنات وحسابات تقريبية ..وزي مافيه ناس بتقول انها مش هتكسب ولا لها اي لازمة فيه ناس بتقول العكس ... ودا عنده براهينه و دا عنده برضو براهينه دا معناه نفاق و مسح جوخ ان شاء الله النهاية هتكون بمبي ... ليه التشاؤم دا ؟!!

هذا هو ما كُتب اليوم كتقرير عن الحدث " هدية مصر الى العالم " في الجريدة الأولى بدوقية لوكسمبورج. سأحاول القيام بعمل ترجمة (قدر إمكانياتي اللغوية) للمقطوعات الى قمت بتظليلها، وأرى ان لها علاقة مباشرة بما نتحاور حوله:

لا لا ماكنتش منتظر منك الرد ده يا عم ابو محمد بأه يعني عشان انا ماعنديش حاجة تحت البلاطة تقوم تقولي مالكش انك تسأل طب بلاش دي انا عندي واحد قريبي من اللي شارين وقالي اسألي في الموضوع ده عشان يعرف فلوسه راحت فين تنفع الحكاية دي بالنسبة للنت انت عارف ان النت مليان بلاوي والواحد عقبال ما يتحقق من معلومة بيتعب اوي عشان كده قلت ان حضرتك موثوق منك فتريح قريبي اللي موكلني اسأله

المركب المحروسة جميل و تستحق الفرجة عليها و لكن بدماغ بارد ألا يتعرض ذلك مع ضوابط الأمن الصناعي ؟ ما سبق كان إستهلالا لابد منه المركب مصنوع من الخشب منذ 150 سنة .... ظريف جدا أننا إستعملناها بهذه الطريقة حتى الآن و ربنا سلم حتى الآن !! المطلوب أخذ قرار موضوعي و بدماغ بارد لإحالتها للإستيداع يمكن تحويلها لمتحف ثابت ليت هذه الرسالة تصل للمسئولين قبل أن تحدث كارثة و يضحك العالم علينا ألا هل بلغت اللهم فإشهد

حضرتك اخوان !!! حضرتك 6 ابريل !! حضرتك عميل !!! بتسأل = بتفكر= عاوز تفهم = مواطن مصري غير مرغوب فيه حاليا

الحمد لله المشروع خلص على خير وانجزنا عمل بطولي وكما يقول البعض انه مشروع لها اهداف طويلة المدى واهداف خفية ورسائل تطمين لدول العالم واننا سنعرف بعد رحيل العمر باننا لم نكن نطارد خيط دخان كما قال الشاعر نزار قباني الان وبعد ان هدأ العرس هل من حقنا ان نعرف ما تم صرفه على هذا المشروع من اموال الشعب وما تبقى منه كم من المبالغ صرفت الى الجهات الخارجية (الكراركات حوالي 75% من كراكات العالم) واعتقد ان الاستاذ عادل ابو زيد اثار هذا الموضوع امس ولكنني عندما بحثت عنه لم اجده ولعله قام بحذفه بعد نشره عايزين نعرف اتصرف كام ولا هاتقولولي دي اسرار عسكرية ما يصحش تسأل عنها

رأيت أن أستهل مداخلتى باقتباس من أحد أصدقائى وكان تعليقا على كتابات لبعض "المفكرين المتحنطين" بدت "مبهرة" للبعض لأنها مطعمة "ببعض" الاصطلاحات المتخصصة يقول صديقى : :) بعد أن انتهينا من حكاية استحالة تنفيذ المشروع فى عام واحد وبعدما انتهينا من حكاية الترعة والطشت ظهر الكلام الآن فى "الجدوى الاقتصادية" ولا أدرى فى الحقيقة لماذا تأخر الكلام - عنها وفيها - لمدة عام كامل ؟ ما علينا من موضوع توقيتات إثارة القضايا ودلالاتها "فى الغالب" ستكون هذه هى آخر مداخلاتى فى هذا الموضوع إلا إذا :):) .... :) وذلك لأنى أريد أن أفتح موضوعا جديدا له علاقة بهذه القناة التى وصفها جمال حمدان فى عنوان أحد كتبه بأنها "نبض مصر" والذى أهداه لـ "أبطال العبور" فى عام 1975 وأفرد لها جزءا معتبرا - لأهميتها فى عبقرية المكان والزمان - فى موسوعته "شخصية مصر" التى صدرت فى 1981 أريد أن أقول فى موضوع "الافتتاح" وتفريعاته .. وبالذات تفريعاته أن هذا المشروع - أيا كانت تسميته - هو جزء من كل أو لو حبيت أحط بهارات عشان الكتابة تبقى "مبهرة" أقول إنه مجرد Activity فى مشروع كبير حتى المشروع الكبير ده ممكن نعتبره Activity فى مشروع أكبر إنما مفيش مانع نتكلم عنه كـ "مشروع قائم بذاته" لمن لا يريد - أو لا يستطيع - رؤية المشروع الكبير والمشروع الأكبر المشروع له فوايد "مباشرة" وفوايد "غير مباشرة" .. وله فوايد "ملموسة" وفوايد "غير ملموسة" والأخيرة ستظل "غير ملموسة" لفترة تطول أو تقصر حسب مؤهلات من يمعن فيها النظر والفوايد سواء الفوايد "المباشرة" أو "الغير مباشرة" والفوايد "الملموسة" أو "الغير ملموسة" منها ما "يمكن قياسه" سواء بالكيلومتر أو بالوقت أو بالدولار والجنيه ومنها ما "لا يمكن قياسه" بأى من تلك "المقاييس" أرجو إنى ما اكونش دخلت فى كلام متخصص أو شبه متخصص يمكن تفسيره على إنى باوسع وأتوِّه الموضوع لتيأيس القارئ وجعله يرفع الراية البيضاء معلش سأبتعد عن شبهة الكلام المتخصص وشبه المتخصص وادخل فى الموضوع بالبلدى المشروع الكبير هو مشروع "تنمية" محور قناة السويس والأكبر هو "التنمية" بوجه عام معلش هارجع تانى لحتة متخصصة "التنمية" غير "النمو" عشان الناس اللى يهمها أوى موضوع "النمو" فى حركة التجارة العالمية وبالتالى عدد السفن المارة بالممر الملاحى (قبل وبعد) إنت عاوز تعمل المشروع ده .. وما عندكش فلوس تكفى .. يعنى هتعتمد على المستثمرين وبصراحة سمعتك زى الزفت .. لأ وإيه .. طالع من ثورتين يقطموا وسط أجدع دولة سمعتك إنك "فوضوى عشوائى" .. سمعتك إنك بلد "غير مستقر" سمعتك إن مفيش حاجة عندك بتنجزها كما هو مخطط لها .. ده لو أنجزتها أصلا سمعتك إنك بلد مضروب بالإرهاب .. ونظامك :) يترنح مستثمر مين العبيط ده اللى هتكون عنده "ثقة" فيك وفى بلدك وشعب بلدك وحكام بلدك ؟! يجيلك ازاى وانت سمعتك "الزفت" سابقاك بفضل مجهود وتعب من "الغريب" و "القريب" ؟! يبقى كان لازم تبعت رسايل للعالم .. "الغريب" و "القريب" 1) بالنسبة للثقة بين الشعب وحكامه أعتقد الرسالة وصلت فى خريف 2014 عندما تدفقت مداخرات (82% منها من أفراد) بمجرد الدعوة وتم تدبير المطلوب وزيادة .. فى زمن قياسى (يادى القياسى :):) ) 2) بالنسبة للثقة فى الإرادة السياسية وبالتالى بين المستثمر والنظام أعتقد ظهرت بوضع تحدى فى أغسطس الماضى تمنى البعض أن يكون هو "الضربة القاضية" للانقلاب ولم تكن ضربة ولم تكن قاضية .. بل خرج منها "الانقلاب" أكثر قوة وحاز على ثقة أغلبية الغريب والقريب 3) بالنسبة لأنك بلد مضروب بالارهاب فالإنجاز كما هو مخطط وفى زمن قياسى ودون أن يجرؤ الإرهاب المتمركز بالقرب من مكان المشروع على الاقتراب منه كان أوضح وأفصح رد 4) بالنسبة لفوضويتك وعشوائيتك وبيروقراطيتك فى أى عمل فالنظام والإدارة السليمة الحازمة المحترفة للمشروع وحفل افتتاحه كانت رسالة لا تخطئها عين 5) حضور هذا العدد من ملوك ورؤساء وأمراء وممثلين رسميين لهذا العدد من الدول لحفل الافتتاح رسالة واضحة أنك لست وحدك وأن العالم واخدك على محمل الجد ومهتم بيك وبيساعدك أو بيجاملك ماسبق بعض من الفوايد "الغير مباشرة" و "الغير ملموسة" لأنها لا يمكن قياسها بالكيلو أو بالوقت أو بالجنيه والدولار أنا مستغلس نفسى لأنى حاسس انى طوِّلت وكل ما اكتب تيجى على بالى فكرة ابقى عاوز اكتبها .. يعنى مش هنخلص باقول كفاية كده .. حتى عشان أسيب شوية للموضوع الجديد اللى "ناوى" اكتبه .. بس ربنا يسهل واقدر تحياتى للجميع .. ونتقابل بإذن الله .. وحسب رغبة من يريد .. إما التقابل بود .. أو التجاهل ويا دار ما دخلك شر

شهاة حق .. العزيز herohro ليس ممن " يلطعون " مداخلات منقولة من غير ما يقول رأيه فيها ... بصراحة لا اجده يفعل أكثر مما يفعله أغلبيتنا، وليكن من متابعة موضوعنا هذا منذ بدايه تفاعله فيه. المداخلة 55 التي عناها العزيز " شرف الدين " (التي نقلها بتصرف) ماينفعش يتقري جزء أو أكثر منها .. لكن لازم تتقري كلها على بعضها ... صاحبها الأصلي إجتهد ووثق معلوماته بها بمصادر .. وبشكل مُبسط، ومتسلسل على طريقة السهل الممتنع ... أذن فمن يريد أن ينقضها أو ينقض جزء منها، وجب عليه اولاً قراءتها ومن ثم تفنيدها والرد عليها أو على الجزء الذي يعجبه بذات المستوى ,,, أى أيضاً بذكر المصادر، وليس بناء على آراء، أو إستنتاجات أو خبرات حياتية أو ميول وعواطف شخصية ! أو التدقيق في خطأ ما ربما يكون قد وقع فيه من قام بعمل هذا التحليل ... وليكن مثلاً تلك النقطة:

احنا احسن حاجه نعملها عشان ام دجدج و خلفتها يجيلهم شلل رباعي ... نلم 64 مليار تانيين ونقوله اردمها يا سيسي واحفرهالنا جنبها بشويه.

"محروسة عبر الزمن" صوت/أداء يحيى الفخرانى جميل ويستاهل يتشاف https://www.youtube.com/watch?v=mHWAMekEMpI

إلى دجدج ابن ام دجدج سيبك من قناة ولا تفريعة ولا ترعة .. ولا حتى طشت إنت فاهم يعنى ايه بلد تعمل مشروع قومى فى زمن قياسى و افتتاح عالمى وسط منطقة اقصى طموحات نص شعوبها انهم ميبقوش لاجئين :) يا جدع افرح انت وامك .. ما تخافش .. لا وِشَّك ولا وِشْ أمك هيتشققوا لو شلتوا التكشيرة

المطلوب عمل نفس ما تم عمله مع مشروع " اللواء " عبد العاطي ونظرية صباع الكفتة !

الحقيقة ان الجهاز طلع كفتة فعلا و طلع شكلنا وحش قدام اللي يسوى و الإخوان