لوحة القادة

الأسعار نار نار نار ... نار يا حبيبي نار ... كل يوم في ارتفاع بلا رقيب ولا حسيب و الحجة إيه ؟ تعويم الجنيه و ارتفاع سعر الدولار وكأن كل حاجة بنشتريها مستوردة ما حدش عاوز يعترف انه فاسد وطماع وغشاش سواء كان صانع أو تاجر .. اما الحكومة فعاملة ودن من طين وودن من عجين المشكلة اللي أبشع من الغلاء هي ( الغش التجاري ) يعني احنا أغلب الوقت بندفع فلوس في بضاعة إما فاسدة او مغشوشة او غير صحية ،الخضار و الفاكهة على سبيل المثال مرميين عالارصفة في أسواق او شوارع قذرة معرضين للاتربة وعوادم السيارات و دبان وهوام لا حصر لها ... العيش بيتخبز في افران قديمة ومتهالكة والدقيق بيتخزن في مخازن بتلعب فيها الفئران وبيتوزع في ظروف تشبه ظروف الخضار و الفاكهة .. السكر والعدس و الزيت أساسيات بالنسبة للفقراء ومع ذلك أسعارهم أصبحت فلكية ... اللحوم و السمك والدواجن دول لعلية القوم في مصر ما يصحش المواطن الغلبان يبص على السلع الاستفزازية دي احسن يطق يموت بعد ان اصبح كيلو البتلو ب 210 جنيه و الضاني ب 185 جنيه مع انهم لسه بيتعلقوا عالارصفة بدون غلاف والدبان بيدوقهم قبلنا .. عمركم شوفتوا لحمة في العالم بتتعرض بالمنظر دا ؟! فين الرقابة الصحية ؟! و لو إتخبطنا في راسنا وحبينا نتفسح و اكلنا في مطعم بره حتى _ لو كان من المطاعم الفاخرة _ هنلاقي المطابخ معدومة النضافة .. . يعني من بره هله هله ومن جوه يعلم الله ، والطباخين الله أعلم بصحتهم ونضافتهم ..دا غير وجبات الحمير الشهية اللي بتقدم لنا باسعار باهظة .. والفاتورة المولعة بفعل ارتفاع الاسعار و الضرائب و الطمع .. طب نروح فين ونيجي منين ؟ ! الادوية شاحة و الموجودة سعرها اتضاعف رغم ان المادة الفعالة في الدواء فاعليتها اقل عن نظيرها المستورد . . كل حاجة بايظة ومن أسوأ لأسوأ علشان مافيش رقابة وظبط وربط على أي حاجة .. فاذا كنا بنحارب الفساد والغش وبنحاول نقلل من ارتفاع الاسعار فليه مافيش أي خطوة إيجابية واضحة ممكن يلمسها المواطن في هذا الاتجاه ؟!!