لوحة القادة

الواتسآب أحد مفردات السوشيال ميديا ومفروض أنها خدمة جيدة في الأمور الجادة مثل إرسال التقارير الطبية للطبيب المعالج أو إستقبال نتائج التحاليل الطبية من المعامل ، و أكيد تبادل التهنئة على نطاق معقول. قرية الريفييرا في الساحل مكان جيد و هو ملكية تعاونية و قام الشاغلين و الملاك بإنشاء عدة مجموعات على الواتسآب يناقشون فيها شئون القرية … و طبعا اسمي في هذه المجموعات بدأ الأمر أولا كنوع من الاهتمام من جانبي و لكنه تطور الى عبء غير انساني… ماذا تفعل عندما تجد في الصباح ٢٠٠ رسالة و بعد ساعات مثلهم ليس منها ما هو مهم و كلها تدور و تدور في دوامات … قررت أن أتوقف ما رأيكم ؟

اولا اود ان احيي السيد سي السيد على رده الجميل الأدبي الواقعي جدا جدا جدا واللي يصلح بكل المقاييس ان ينشر كقصة قصيرة وانا متأكد انها ستكون ناجحة بكل المقاييس بس نبدأ من أول "بالمناسبة كنت من كام شهر كده بأتكلم مع زوجتي في هذا الموضوع دردشة ........" ثانيا أماني موضوعك جميل ويمس جرح كبير منتشر في مجتمعاتنا الشرقية وزي ما سين سين اوضح في رده حلال شرعا حرام عرفا وتقليدا.. حتى من يتصدى للدفاع عن تحليله لا يقبله لنفسه .. وهذا يؤكد مدى قوة تأثير العرف والتقاليد علينا وعلى حياتنا بشكل عام أرجع اقول في النهاية ان الأنسان يحتاج لمن يرعاه في كبره ومرضه والزوج او الزوجة خير من يفعل ذلك وليس الأولاد ولا زوجات الأبناء ... لن أقدم نصيحة فأنا اعرف ان الأمر شائك و من الضروري ان يرضى جميع الأطراف عن هذا الزواج حتى يسود الود العلاقات الأسرية.. تحياتي

شكراَ يا امونه على الموضوع الرائع ده .. وياريت بالفعل يقوم منتدانا العزيز برمي حجر ولو صغير في المياة الراكدة بمجتمعاتنا العربية اللي للأسف إسلامية إسماً فقط والتي خلطت ما هو إجتماعي بما هو ديني وما بقناش نعرف نفرق بين الحلال والحرام أو المباح والمحظور والعيب واللي مش عيب ... فهل الزواج الشرعي في أي سن حرام ؟ وهل زواج الأرمل - الأنثى - حرام ؟ الإجابة : نعم ... المجتمع يُحرم زواج الأرملة - الأنثى - أما الرجل فلا غبار على زواجه ومبارك إن شاء الله وبالرفاء والبنين لكن تيجي للست تلاقي القطط الفطسانة تطلع وزي مانتي قلتي .. تلاقي العيل من دول اللي لسه كان بياخد مصروفه إمبارح وبيقول على السًكر .. أُكر .. وقف وإتشملل ويتكلم عن برستيجه قدام زمايلة ومنظرة أمام المجتمع أو شكلة قدام نسايبه لما يقولوا له .. يالا يا اللي أمك إتجوزت ... ويقولك مش متخيل واحد تاني يدخل بيتنا غير بابا ... وإزاي ماما تعيش مع واحد غريب بعد بابا الله يرحمه ... وكإنها هاتعيش معاه في الحرام والعياذ بالله .. ده مش بس كده يا ست الكل ... طب خلي واحده ست عايشه مع جوزها أبو عيالها ودي أول وأخر جوازه ليها ... خليها كده تُنجب بعد الثلاثين أو بعد الأربعين مثلاً ويكون عندها عيال حلوين كده في إعدادي وثانوي مش هاقول جامعة .. وشوفي العيال بيبقوا مكسوفين إزاي ... وإزاي ماما تخلف وهي في السن ده وتجيب بيبي الفرق بيننا وبينه 15 سنة مثلاً .. هي مش عارفه إنها كبرت وما يصحش كده .. وناقص يسألوها ويقولوا لها : جبت العيل ده منين أو يعملوا لها تحليل دي إن إيه ؟ .... بلاش كده شوفي يا ستي نظرة المجتمع والذئاب البشرية للمُطلقة الصغيرة في السن أو تحليل المحللين لأسباب الطلاق اللي ياختشي لازم جوزها عرف عنها حاجه بطالة أو إنها نكدية وزهقته في عيشته عشان كده كيكد هير آوت .... وأساساً ممكن يكون الراجل هو اللي إبن ستين في سبعين وطلاقها منه رحمه .... بلاش كده ... شوفي نظرة المجتمع وعواجيز الفرح وستات لا مؤخذه الفسحه لواحده بنت نصيبها إن سنها كبر - من وجهة نظر المجتمع المتخلف اللي عامل جدول ضرب ودراسات ميدانية للسن المناسب للزواج للبنت ( خليني أكبر لك كلمة بنت دي ) أصل الراجل خارج الموضوع حتى لو كان شاب عنده ستين سنة - البنت دي بقى لم يأتيها نصيبها ولسه ما أتجوزتش ، بالمناسبة إمبارح في بريد الأهرام كانت واحده باعته مشكلة بنفس الموضوع ده وإنها قربت شويه على التلاتين وإتقدم لها واحد صديق اخوها وكانت فرحانه به لإنه شخصية محترمة ولكن أخر شي كانت تتوقعه في الدُنيا إن والدته التي تشغل منصباً مرموقاً في الدولة ودائمة السفر لتمثيل بلدها ترفض وتثور وتجول وتعمل فيها أمينة رزق بحجه إنها ترى إن السن المناسب لزواج البنت لازم ولابد وحتماً وقهراً وقصراً يكون ما بين 20 و 23 غير كده تبقى إكسبيرد وما تلزمناش وكمان البنت أكبر من الولد بشهور قليلة ( بتهيألي الست دي تخلت عن وقارها وفرشت الملايه لإبنها وقالت له : بقى من همه .. ياخد واحده قد امه ؟ " ... بلاش دي .. شوفي نظرة المجتمع لزوجين عصافير وعايشين في حب وسعادة وراضيين بقضاء الله وقدره بس أنطبقت عليهم الأية الكريم " لِلَّهِ مُلْكُ السَّمَوَاتِ وَالأَرْضِ يَخْلُقُ مَا يَشَاءُ يَهَبُ لِمَن يَشَاءُ إِنَاثاً وَيَهَبُ لِمَن يَشَاءُ الذُّكُورَ أَوْ يُزَوِّجُهُمْ ذُكْرَاناً وَإِنَاثاً وَيَجْعَلُ مَن يَشَاءُ عَقِيماً إِنَّهُ عَلِيمٌ قَدِيرٌ " وشوفي تبكيت المجتمع لهم وتقليبه لأحزانهم والسؤال المتكرر للست بالذات : هــــا ما فيش حاجه لسه في الطريق ؟ يا كبد أمك يا ضنايا ... ربنا يراضيكي يابنتي ويرزقك بالخلفه الصالحه ... ده في الرايحة والجاية وآناء الليل وأطراف النهار بيتكرر الكلام ده وكإنه إسطوانة مشروخة أو نظرة المجتمع لزوجين متحابين بس يا عيني يابني ما بيخلفوش إلا بنات وما فيش عيل ولد يملا عليهم البيت ويشيل إسم أبوه بعد عمرٍ طويل ... وكإنه يعني هايشيل ديون مصر ويسددها بكمبيالات ويجيب الديل من ديبه :rolleyes: نرجع مرجوعنا لموضوعك لإنك زمانك توهتي مني وأقولك لو الكلام ده والام بعافيتها وصحتها هانقول ماشي أهي مش محتاجه لحد يونسها ويسليها ويرعاها ... طب خليها كده تتعب شويه أو ما تقدرش تخدم نفسها .. ودوري عى الرجالة أمات شنبات دول اللي كانوا واقفين وقفة رجالة ومعارضين زواج أمهم سواء كانوا عزاب أو متجوزين وشوفي موقف كل واحد فيهم إيه ... المتزوج .. هايقولك أنا مراتي مش خدامه عشان تخدم أمي وتغسل لها وتطبخ لها وتنضف البيت !! .... ، طب ورينا نفسك إنت وروح غخدمها زي ما كانت بتخدمك لما كنت بتلبس بامبرز أ و كافوله على أساس إن البامبرز ده إختراع حديث شويتين ... يقولك أنا مشغول وشغال الصبح وبعد الضهر عشان أكفي مصاريف العيال .. طب هات لها شغالة تراعيها ... يقولك منين ده انا ورايا كوم لحم بأصرف عليهم ... طب كنت سيبها تتجوز وتشوف مستقبلها ... يقولك والمجتمع والناس وإخواتي تلبس وتاكل ويبتدي يغني لك اغاني سمير الأسكندراني الوطنية ... والبنات لا يُلامو بصراحة في مواضيع زي دي لإن الست في بيت جوزها مش ملك نفسها وبالتالي صعب تستأذن كل شويه وتروح لمامتها تخدمها وتراعيها لإن ده ممكن يضايق الزوج أو يكون على حساب بيتها نفسه .. أنا شفت وعاصرت حالات زي دي وكل واحد عمل فيها تلات أربع قولي خمس رجاله وأبتدوا يقاطعوا أمهم بعد ما تزوجت ووضعتهم أمام الأمر اواقع وبدأوا يشعروا بالعار لو جت سيرتها بالصدفة ... بالمناسبة كنت من كام شهر كده بأتكلم مع زوجتي في هذا الموضوع دردشة يعني في خضم حديث الثلاثاء اللي باعمله للأولاد كل يوم أربع ونقعد نتباحث في أمور الحياة كأب ديمقراطي متفرنج بيحب الإستماع لجميع الأراء وفي الأخر بينفذ اللي في دماغه حتى لو غلط لكن يكفيهم شرف المحاولة ... ما علينا ... . فراحت هابداني سؤال إجباري وما فيهوش إختيارات ولا إستعانه بصديج خلتني ألف حوالين نفسي .... فقالت لي طب ما أنت باباك متوفي من ييجي 5 سنين ... تعمل إيه يا سين سين لو مامتك جت في يوم وجمعتكوا إنت وإخواتك سواء اللي مصر أو في بلاد الله لخلق الله وقالت لكم : يا سين سين يا بني إنت والجيش اللي وراك دول أنا جاي لي عريس مناسب وعايزه اتجوزه أقضي معاه الكام يوم اللي فاضلين من عمري .. سمعني الفاتحة يا سين سين عشان الرجال ييجي يقابلك وشرب معاك لاشاي ويقولك يا عمي أنا عايز أتجوز مامتك ؟ فكانت إجابة الأخ سين سين المثقف المتعلم خريج المعهد العالي للعزف تحت الماء : في الحقيقة .... وفي الواكع ... أصل .... ما هو ... ما هي .. أصل مامتي حالة خاصة جداً .. وهي عايشه في بيت العيلة وأخويا الكبير ساكن فوقيها و بيراعيها .. فيعني .... كل سنة وإنتي طيبة وروحت متوه الموضوع وشاخط فيها و قلت لها إنت اساساً جايبة لي فنجان شاي من أبو ودن صغيرة عشان تغيظيني لإن ده بالذات ما بأعرفش أمسكه وبيقعد يدلدق على البيجاما ... وأصلاً أصلاً الشاي بارد ليه وسكره كتير ؟ إنت مش عارفة إني بأشرب الشاي في مج والسكر لازم يكون بنسبة 39 % فهرنهايت من مكونات الفنجان ؟ .... وما أشربش الشاي أشرب أزوزه أنا ... وكده يعني بس بجد والله إحنا عايزين ثورة لتغيير مفاهمنا المعفنة اللي إتزرعت فينا منذ صغرنا ولما تيجوا تغيروا ما تبقوش تنسوني الله يخليكم .

هل يمكن ان يصبح الآتي .. عادي بنسبة 90% : - أن يتزوج الرجل مره اخرى واخرى واخرى ، وقتما سمحت له الظروف ولأسباب غير قهريه للزوجه.. ؟؟ - أن تعيش المطلقه حياه كريمه .. بعيدا عن نظرات اهل الحي !! - أن تتزوج المرأه بعد وفاة زوجها بأربعة أشهر بدون تفكير في رد فعل الاخرين .. سواء كانوا اولادها أو اقربائها ..؟؟ - أن تطلق المرأه بعد يوم أو اسبوع أو شهر من الزواج لسبب منطقي ... بدون " كركركركركر .. وياعيب الشوم" وخلافه .. - أن تصرف المرأه على زوجها من املاكها وتوفر له العمل والمسكن والخدم وكل ما يشتهيه.. حباً وكرامه .. بدون دعوات أمة لا الاه إلا الله عليه بالاستقلال التام أو الموت الزؤام.. - أن يذهب الرجل المسن وزوجته أو أيهما الى دار رعايه (طواعيه) ليجدا من يقوم على رعايتهما آناء الليل وأطراف النهار بدون كلل أو إمتعاض .. ويساعدهما على حياه كريمه فيما تبقي من العمر بين من هم في مثل اعمارهم .. ليشاركاهم نفس الثقافه .. بدون ان يتوسل الابناء بعدم فعل هذا لكل الاسباب التي تخطر لك على بال .. وبدون أن يلعن الجيران الابناء .. - أن يترك الآباء تحديد المصير لابنائهم فيما إذا اختاروا اي كليه او معهد او التوجه لتعلم اي صنعه بعيدا عن المدارس .. - أن يصرف الرجل (العادي مش الغني) مكافأة المعاش ويأخذ زوجته في رحله حول العالم تقديراً لها ووفاء .. كي ينسيها عناء الطريق الطويل الذي تحملته معه .. بدون أي يلعنه الابناء ويصفه الجيران بالجنون ..؟ وهناك امثله كثيره !!.. ولكم ان تتخيلوا ان كل ما ذكرته ليس حراماً ولا عيباً .. ولكن ما ابتدعه اجدادي واجدادك .. وآبآئي وآبائك .. ,انا وانت من عادات وتقاليد هي التي اصلتنا للحلال المحرم .. يقول المثل المصري .. كُل اللّي يعجبك .. وإلبس اللّي يعجب الناس" وهذا المثل له دلاله واضحه جدا بأن نفعل ما نشاء نحن .. ما دمنا مستترين و نفعل ما يشاءه الاخرون .. مادمنا مكشوفين .. وصدق الله العظيم عندما قال في كتابه العزيز " يا أيها الذين آمنوا لا تسألوا عن أشياء إن تبد لكم تسؤكم" .. ونحن لم نترك شئ إلا وخضنا في تحليله حسب أهوائنا وحسب ومخيلتنا أكانت مَرَضيه أم صحيه .. لو اننا راقبنا انفسنا بصدق ولو ليوم واحد فقط فيما نقوله .. لذُهلنا مما سمعناه..