لوحة القادة

الكلام عن رحيل السيسي وان البلد حتتخرب لو رحل الكلام ده بيستفز الناس اللي عاوزين دولة مدنية وحريات وضد الانظمة العسكرية و ردهم دايما: يعني هو مفيش غير السيسي دي مصر مليانة رجال حلو اوي همة فين؟ فين اللي ابدى استعداده انه يمسك البلد؟ انا شخصيا لما قالوا على البرادعي والتغيير بعتت من السعودية توقيع للانضمام 2011 لكن فين راح البرادعي؟؟ بخ محدش عايز يشيل اساسا ومكفرين اللي شايل وهاريينه قلة ادب ويقولوا هو اللي مانع الناس انهم يطلعوا ببرامج انتخابية فين الناس اللي مستعدة تشيل لو رحل السيسي؟؟ اللي خايفين يقدموا برامجهم دول حايحكموا دولة ازاي؟ والا همة زي المدرس مش عارف يعمل كنترول على 25 عيل ؟؟ ومنتظرين حد يدخل يضبط لهم الدنيا وبعدين يقول لهم اتفضلوا يللا احكموا البلد؟؟؟!!! ياريت مانكونش نسينا ان هو اللي اتصدر ومفيش غيره عملها اللي خايف يتصدر ده ان شاء الله حايحكم ازاي؟؟ وياترى ممكن ننتظر منه ايه؟؟ المصيبة ان محدش عايز يشيل فين خلال 8 سنين الانشطة الحزبية اللي توصل حزب للحكم ؟؟؟ احنا بالصلاة ع النبي كده لا لينا في ديمواقراطية ولا سياسة ولا احزاب احنا عايزين جراندايزر ينزل يشيل مصر على ايده ويلف بيها ويطلعها فوق وواحدة من حوريات ديزني بعصاها السحرية تعدل المايلة وتحولنا كلنا بجناحات! ماتفوقوش خليكوا في انتظار البطل الخارق انا عن نفسي صوتي للي شايل بالفعل ولما يبقى يظهر غيره يقول له عنك هات الشيلة نبقى نتكلم غير كده نتيجته خراب وفوضى وانا كمواطنة مش موافقة على خراب وفوضى تاني بعد احداث يناير 2011 كان في اكبر فرصة للتغيير وضاعت كنتوا فين يا احباء التغيير؟؟ ايه الضمان انها ماتضيعش تاني وتضيعنا معاها؟؟ التجربة اثبتت اننا كشعب لسه مش متحملين مسؤولية أنفسنا حتى وعايزين نتشال ونتخدم ونستهلك ونزبل الشوارع ونزعل لو حد قال لنا : كخ نشكر ربنا ان في حد شايل وقابل بقلة الادب والسخافة والامارة والتريقة والوقفة ع الواحدة في كل خطوة يعملها لا ولسه حابب يعرف الناس انه الكلام اللي بيتقال عليه باطل!! اوكي السيسي مش احسن حد ومش ملاك وماعدلش المايلة و..و..و اوكي فين البديل؟ فين البديييييييييييل؟؟ انا افهم اللي مش عايز يشيل ومعندوش حلول ينقطنا بسكاته "من كان يؤمن بالله واليوم الآخر فليقل خيرا أو ليصمت" ملحوظة: ده مش رأي سياسي دي كلمة حق عشان مش حابة اكون شيطان اخرس