لوحة القادة

من عاش زمنَ أم كلثوم فقد عاش الدهر كلــَّـه! الكلمات صناعة جديدة للهرم الرابع، ومجرى آخر للنيل، وتوسعة عصرية لوادي الملوك، وإثبات أن الله خلق الإنسان من طين وحبال صوتية . الحروف عن أم كلثوم ذكريات وليست أطلالا، إحياء وليس حديثا عن موت، لمسة رقيقة لشعب يشعر كلما سمعها أنه يشم رائحة النغم الخالد. سلوا قلبي فنحن أيضا نعيش بين ألفينة والأخرى ندندن في خلواتنا بروائعها، فلو هجرَتــْــنا ما هجرناها، ولو احتار دليلنا ما ظلت بعيدة عنا، وفي عصر النبوة ولد الهدى، وفي عصرنا أثبتت أم كلثوم أن الغناء معزوفات الملائكة، وأن مساء أول خميس من كل شهر كان يوم عيد للطيور والبلابل والمصريين والعرب! الأذن تعشق قبل العين والدليل، (غني لي وخُد عنيي) فالــَــمْغنى حياة الروح. لو لم يكن هناك أطباء فأجزخانة الصوتيات تأتيك بما تحتاج إليه، فمريض الضغط يسمع ( انت عمري ) ومريض القلب تشفيه ( يا لية العيد آنستينا) و مريض الزهايمر تــُعينه ( لســه فاكر كان زمان ) و مريض الأرق تساعده ( رباعيات الخيام .. فما أطال النوم عمرا ولا قصَّر في الأعمار طول السهر ). صندوق الذكريات المختبيء في أقصى ذاكرتك، إذا فتحته ستجد لكل مناسبة اسمــًـا، فقصة حبك الأولى هي ( ليلة حب ) وليست ( قصة الأمس )، وأول ابتسامة أنتشيت بها كانت ( من أجل عينيك)، وكل يأس ينتابك يلحقه ( الأمل ). كل التواريخ والأزمنة والأشخاص تتعرض للضعف والتراجع والاختفاء، إلا أم كلثوم فهي تلتصق بالذاكرة ولا تتركها قبل أن يلين القلب ويصنع منها نبضات أخرى. كل وجه استرحت إليه ستجد أم كلثوم غنت له ولو بصوت خافت. كل نصر أو هزيمة وطنية تجد أم كلثوم وقد أمسكت بالجندي المصري والعربي لتسنده، وترفعه، وتساعده في رفع العــَــلــَــم، وتقول له ( طوف وشوف في جنة أرضنا ). كل يوم يمر تعيده أم الكواكب في ( أغداً ألقاك)، فهي بحق ( سيرة الحب ) لكل العرب في انتصاراتهم وهزائمهم. أم كلثوم هي الوحدة العربية؛ فما وجدت عاشقا للنغم من المحيط إلى الخليج إلا كانت هي ملهمته وطبيبته تواسيه وتربت على كتفه و.. تعالج أوجاعه. رأيت وسمعت أم كلثوم في كل بيت عربي، ورأيت مصر تتعرب في آذان غير المصريين، ورأيت العرب يتمصرون بين أنامل السنباطي والقصبجي وبليغ والطويل وعبد الوهاب، وودت أن تكون لنا ذكرى مع فريد الأطرش وصوتها، لكن الزمن ليس كريما في كل الأوقات. أم كلثوم، الوحدة العربية التي لا تنفصل بانقلاب عسكري أو ديني أو سياسي أو حزبي، فهي حبلُ الســـُــرّة في جسد كل عربي، بل هي الرباط المقدس الذي يربط الرباط بمسقط، والجزائر ببيروت، وأم درمان باللاذقية، ونواكشوط ببغداد، والكويت بسوسة والأصيل يلفها، والمنامة بغزة وعَمــَّــأن بطبرق، وبورسعيد بالدوحة، والشارقة بمكناس... لو كنت مسؤولا لجعلت الدقائق الأولى في كل المدارس والفصول والجامعات من حق أم كلثوم لتتفتح المدارك على الجمال حتى تفرش للعلوم والآداب طريقا سوياً. لو كنت مسؤولا لطلبت من كل مسلم ومسيحي قبل الدخول إلى المسجد والكنيسة أن يستمع عدة دقائق لأم كلثوم حتى يعرف أن ( الله محبة ). رحمها الله رحمة واسعة محمد عبد المجيد طائر الشمال عضو اتحاد الصحفيين النرويجيين أوسلو النرويج https://www.youtube.com/watch?v=0wyyfzpcwRo

من أجمل صفات الفن أنه يلغي المسافات والزمن أم كلثوم حلقة "زمكانية" مستمرة الحضور نستحضرها كجمال لا ينتهي اسمح لي هو ليس زمن أم كلثوم بل فنها الأبدي السرمدي.. طبعا اغانيها متنوعة ورائعة مع أجمل الملحنين والشعراء اول معرفتي بيها في طفولتي كانت في فيلم " عايدة" مع المطرب ابراهيم حمودة حبيتها اوي اوبريت عايدة وحفظته في الحادية عشرة من عمري

حاولت أجيب علي السؤال ده ما عرفتش ..... و بصيت حواليا فجأة ... آه صحيح انا ايه اللي بيخليني أحب مصر ..... ايه اللي يخليني عايش بهمومها في الغربة و بعد السنين دي كلها ..... ايه اللي مخلي ابني اللي ماعاشهاش حاطط علمها فوق سريره ..... ايه اللي بيخليني اسيب كل حاجة هنا ممكن تضيف عليا سعادة و لو وقتية ... و أفضل عنها اني اقضي اي وقت فراغ ليا هنا معاكم نتكلم عنها .. عن احلامها .. عن مشاكلها .. عن أمانيها ..... ايه اللي بيخليني كل مرة اسيبها ابتدي ابرمج علي طول رحلة عودتي ليها .... و بعدين سرحت .... و مش عارف ليه جه في خيالي وش ابويا .... اللي هو كل الوشوش في بلدي .... اللي بيخليني أحب مصر ... هما ناس مصر ... تحس كده انه شعب طيب جدآ شعب يبضحك .. بيضحك عالزمن ... بيضحك علي مصايبه ... علي مشاكله علي حكامه .... عامل زي راجل قاعد بيصطاد سمك علي شط النيل ... يصطاد ما يصطادش ... النهر هو اللي بيمشي قصاده و شايل كل مصايبه ... لكن هو قاعد مستني ... مستني ... مسير السنارة حتغمس .... إحنا شعب طيب بجد .. و بالرغم من الصدا اللي ابتدا يمسك في اطرافنا ... لكن جوانا لسه بنحب بعض و لسه بنخاف على بعض... خبرة السنين ممكن تسمعها بكلمات في غاية البساطة من واحد رجل طيب عالمعاش قاعد علي قهوة ...لا يعرفك و لا تعرفه .. لكنه في تلقائية شديدة تلاقيه بيحكيلك عن سنين التعب في عمره ... و ازاي كان بيغزل برجل حمار عشان يجوز بنته ... احنا شعب تلاقيه بيرجع بيته و كله عرق و بهدلة من زحمة الأوتوبيس لكن بهدؤ يتشطف و يلبس بيجامته او جلابيته و هو بيسمع مراته بتحكيله على كل اللي حصل طول اليوم ....و تلاقيه اخر الشهر بيرجع زعلان ومخنوق علشان مادخلش البيت ومعاه حاجه لولاده ... مع ان اول الشهر ده عيدهم ... لكن في النهاية الكل بيحمد ربنا علي نعمته ... تلاقيهم بيتكلموا في الدين والكورة وحتى في العلوم .. حتي الخناقات تسمع فيها كل الشتايم .... و مافيش كام ساعة نفس اللي بيتخانقوا تلاقيهم بيلعبوا عشرة طاولة .... ويقعدوا يضحكوا مع بعض.. اللي يقول نكته .. واللي يتكلم في السياسة .. واللي واللي واللي. في مصر ...تلاقي راجل غلبان بيبيع درة مشوي واقف جنب محل روش و فخم ... تلاقي رئيس مجلس إدارة .. صاحب الميكانيكي ... تلاقي المسلم.. بيصاحب المسيحي .... و تلاقي اللي مش راضي عن الصحوبية دي فيه اللي بيخالفه و يعاتبه من اهل دينه نفسهم .... في مصر الناس بتتنرفز بسرعة ... علي الفاضي و علي المليان ... و زي ما اتنرفزت سرعة بتهدا بسرعة .... عايز تشوف قلب مصر .... دور علي النيل .... النيل ده بقى حكاية لوحده ... هو اللي مجمع مصر كلها .... تلاقي صاحبنا الغلبان لسه عمال بيصطاد سمك ببوصة .. و معدية جنبه باخرة كبيرة فيها سياح ... بص عاليمين تلاقي المساكن الشعبية ... و بص عالشمال تلاقي فنادق و عمارات بريسيبشين و أمن ... العالم دي كلللللللها .... كلها .... بتبص عالنيل و تشعر بالراحة و الهدؤ النفسي .... في مصر كل بلد ليها ولي و قديس .... شيء لله يا حسين شيءلله يا بدوي ... بركاتك يا مارجرجس ... بركاتك يا ست دميانة ... في مصر الأزهر .... و الكاتدرئية .. و الموالد ... و الأعياد الواحدة .... عندنا دماغ و ذكاء يوزن العالم ده كله .. بس مافيش تنظيم و لا إدارة ... . انا بحب مصر ... حتي لو ساعات زي دلوقتي الحب من طرف واحد بس ... لكن العجلة دايمآ بتلف و عمرها ما وقفت علي نقطة واحدة ...

في القصص الرومانسية القديمة .. يكتب المحب رسالة حب .. ويضعها في زجاجة .. ويرمي الزجاجة في البحر .. لا يهم من سيقرأها .. لا يهم هل ستصل إلي حبيبته أم لا .. بل كل المهم .. أنه يحبها .. وتاني .. تاني .. تاني .. بنحبك يامصر ..

:في الغربه لعب- حلويات وشكولاته- اكل نضيف-فسح-علاج-وفلوس كتير ومع ذلك صرخ ابني بكل حرقه من قلبه وقالي اناااا عااااوز انزل مصر غاوي فقر زي اللي خلفه بحبك يا مصر سقراط