لوحة القادة

معظمنا جرب خدمة الترجمة من جوجل ويمكن كل الي جربها يتفق معايا ان الترجمة غالبا مبتكونش على مستوى احترافي ده ان كان النص الناتج مفهوم من الاساس .. من كام شهر كنت مضطره اعتمد على جوجل في ترجمة بعض النصوص الي بحتاجها في دراستي .. كنت بعدل في الترجمة الناتجة كتير وبعتمد على حصيلتي اللغوية باكثر مابعتمد على النص "الجوجلي " الي بلجأ له دائما كحل اخير مع المصطلحات الصعبه الي كتير برضه كان زيه زيي مبيكونش عارفها .. الجديد بقى اني استخدمت الجوجل من يومين .. ايه ده .. ايه الي حصل .. فاضافة للمزايا الي كانت موجوده فيه اصلا زي انه ينسق لك النص العربي بنفس تنسيقك للاجنبي بحيث انك تقدر تترجم الفقرات .. او اتاحته لقاموس انجليزي انجليزي بيشرح معاني الكلمه بشكل واضح جدا ممكن تستعين بيه فيما لو لم تناسبك الترجمة العربية او عجزت عن فهمها الجديد ان الترجمة اصبحت احترافية بشكل مذهل .. يمكن اكتر حاجه كانت بتضايقني في ترجمة الجوجل انه بيفرض عليك معنى واحد فقط لكل كلمة وقت ماممكن تحتمل معاني اخرى لا تستطيع الوصول اليها مالم تستعين بالشرح الانجليزي لها .. ما اكتشفته ومعرفش بقى ان كان خاصية قديمة او تمت اضافتها حديثا ان لو نقرت على الكلمه العربية المترجمة هيتم تحديدها ( هايلايت ) مع تحديد الكلمه المقابلة لها في النص الانجليزي .. نقرة كمان لتكتشف ظهور قائمة بالمرادفات المحتملة للكلمه دي وبتكون دقيقة جدا وشاملة لكل المعاني تقريبا .. اختار منها الي يناسبك ليتم ادراجها في النص او اكتب المعنى الذي تريده لتستبدل بيه الترجمة .. خاصية اخرى بيوفرها الجوجل ترجمة وهي قراءة النص العربي او الانجليزي والجديد ان القراءة سليمه الى حد كبير حتى بالنسبة للنصوص العربية الي عادة بتفشل البرمجيات في نطقها بطريقة سليمة .. طبعا الترجمة من الجوجل بتوفر لغات كتيرة جدا ممكن الترجمة مابينها وكمان بتوفر خدمة الترجمة حتى لو انت مش عارف النص الي بترجمه ده مكتوب بأي لغة .. البرمجيات بتتعرف عليه تلقائيا وتترجمه لك للغه الي تختارها .. ومش هقول بقى عن خدمة ترجمة الابحاث الجاهزه يعني لو بتدور على بحث في موضوع معين فالجوجل هيجيبه لك مترجم جاهز لغايه عندك باللغه الي تطلبها منه هو واي فيديوهات متعلقة بالموضوع الي بتبحث عنه .. خدمات تانية كتير بتوفرها جوجل ترجمة الي بصراحه مش قادره اخفي انبهاري بالتطور المتلاحق فيها .. بجد ياريت نستفيد من الخدمة دي ونحاول نتعرف على الامكانيات الاخرى المضافة فيها .. معادش لنا حجة بقى .. المعارف كلها متوافرة على الانترنت بلغاتها الاصلية والجوجل ترجمة اهو موجود يساعد الي عاوز يتنور ..