ستاير النسيان نزلت مابقالهاش زمان

[se_ Elsyed]

أعاني من ظاهرة غريبة منذ فترة قريبة وهي " النسيان " فمش عارف هل ده بسبب السن ولا المشاغل اللي كترت ولا نوع الأكل وال في حاجة في الهوا ..

فبعد ان كانت الذاكرة عندي لعدة سنوات مضت – هـيــــه ألا ليت الشباب –512 ميجا .. إنكمشت الأن وتقريباً أصبحت 16 ميجا ..

فعلى سبيل المثال وبدون مبالغة كنت أتذكر أسماء جميع الموظفين الحاليين الذين يزيد عددهم عن 450 وأسماء عائلاتهم كمان وكل المعلومات عنهم ( شغل مخابرات ) وأزيد على ذلك تذكر أسماء ومعلومات الموظفين اللي مشيوا خلال 5 أو 7 سنوات وهؤلاء يعدوا بالمئات .. حاجة كده زي الأرشيف المتحرك ..

دلوقتي كل شيء راح وأنقضى وأصبحت استخدم الأجهزة التعويضية عشان أفتكر ... ما بين الحاجات الإلكترونية اللي بتعمل ريميندر وإشي حاجات على الأوتلوك وإشي قصاصات ورق في كل جيوبي وحاجات تاني ملزوقة على البوليتين بورد والشاشة بتاعت الجهاز ..

وأصبحت هذه المشكلة تسبب لي إحراج ما بعده إحراج .. فمثلاً ألاقي ناس جاية تقابلني ومابقاش عارف أساميهم بس كل اللي فاكره إني أعرفهم ..فبأضطر أستخدم ألقاب السمكرية ما بين يا باشا ويا حاج ويا مستر ويابو ابراهيم ..كلاً حسب مقاسه .. فبعد ما يمشي أنده اللي شغالين معايا وأسألهم مين ده ؟ فيقولوا لي يا راجل ده فلان اللي شغال معانا في إدارة كذا .... لا إله إلا الله ...

ديك النهار قعدت اتفرج على شريط حفل خطوبة إبن عمتي باعتينه لي من مصر – الشريط مش إبن عمتي – المهم .. أقسم بالله إكتشفت إني بقيت في البطاطس لدرجة نسيت أسامي ولاد عمي وولاد عمتي وعيالهم خاصة اللي في محافظات غير القاهرة ونسيت جيراننا ولفيف من الاهل والأصدقاء .. مع إني مابكملش سنة هنا وكل شوية أنط لهم في مصر ..

ونسيت أقول لكم إن شريط الخطوبة مبعوت لي في شهر 9 اللي فات ومافتكرتش إنه معايا إلا دلوقت .. المهم قولت أما أضحك شوية مع اللي في مصر وأبلغ والدتي وأخواتي بإني شفتهم وهما حاضرين الفرح .. فمالقتش حد في البيت وإتصلت بحماتي عشان أسألها " ماما فين " فقالت لي إنها بتحضراليوم زفاف إبن عمتي اللي انا بأتفرج على خطوبته دلوقت .... والله هذا حصل ... حاجة كده زي أفلام السيما ..

المهم جايلكوا في الكلام ..

من أسبوع قاعد مع صديقي هاندي كرافت وكان عندي في المكتب يرتشف الشاي أبو نعناع – كالعادة – وبأحكيله على المشكلة دي .. فالراجل مشكوراً شخص أسباب المرض في حاجتين :

1- عدم التركيز والتفكير في عدة مواضيع في نفس الوقت ..

2- عدم القيام بتمارين تقوية الذاكرة ...

فقولت له بارك الله فيك يا دكتور .. انا متفق معاك في النقطة الأولانية ..

لكن النقطة التانية عدم اللامؤخذه .. التمرين دي هاعملها أزاي يا دكتره ؟.. يعني سيادتك أجيب حبل وأنطلي 100 نطه كل يوم .. ولا أروح ألف القصر الجمهوري اللي في كوبري القبة قد 7 لفات لحد ما أقع من طولي أو الحراس يضربوني بالنار ..

فيبدو أن الراجل كان تعليمه وقف لحد كده .. وقال ماعرفش... بس إديني فرصة قد شهرين تلاتة كده اعمل سيرش عن طريق جوجل واخوانها وأجيبلك معلومات عن التمارين دي ..

فاللي بأطلبه منكم يا زملائي وحبايبي والمجتمع والناس الأتي :

1- حد يطمنني إنه عنده نفس الأعراض دي ... عشان مابقاش لوحدي اللي عيان ( ونس يعني )

2- اللي عنده فكرة عن تمارين السويدي بتاعت الذاكرة يقولينا عليها ويفكرني إني أدعيلوه ساعة صلاة الفجر ...

وهنيالك يا فاعل الخير والثواب ..

[Cleo]

النسيان أحد الأعراض الجانبية للضغط النفسى...

بس عندى سؤال بجد...

هو الضغط النفسى ممكن يؤدى إلى فقدان الذاكرة الشيخوخى "إلزهايمر" ؟؟

[amir]

فاللي  بأطلبه منكم يا زملائي وحبايبي والمجتمع والناس الأتي :

1- حد يطمنني إنه عنده نفس الأعراض دي ... عشان مابقاش لوحدي اللي عيان ( ونس يعني )

2- اللي عنده فكرة عن تمارين السويدي بتاعت الذاكرة يقولينا عليها ويفكرني إني أدعيلوه ساعة صلاة الفجر ...

وهنيالك يا فاعل الخير والثواب ..

يا س . س يا خويا

1 - احنا ونس

2 - حطلب من حرمنا المصون تفكرنى انى افكرك تدعيلى ساعة صلاة الفجر

[فــيــروز]

الحقيقه انا احيان اعانى من مشكلة س.س.

رغم ان ذاكرتى فى المعتاد قويه

بس احيان احس انى مش قادره افتكر اى شئ

او ان حاجات كنت بافتكرها كويس جدا لم تعد عندى القدره على تذكرها

لدرجة انى حاجات كتيره لازم اعمل لها ريميندر وباقى الحيل اللى تحدث عنها المريض المذكور

وسمعت ايضا عن تمارين الذاكره بس مش فاكره هى كانت بتنصح بايه stnd:: والله بجد مش فاكره بس الموضوع مش مضايقنى يا س.س. يعنى الواحد هيفتكر ايه ولا ايه :) احيان النسيان بيبقى نعمه يا جدع و بلاش تتبطر على النعمه لا تزول mf-:

[lالمطحون]

الاخ الحبيب جدا انا ايضا اعانى من نفس المشكله علما بانى مفروض انى كنت شاطر جدا وواخد اعلى الدرجات العلميه لكنى احيانا اشعر ببلاهه غريبه واحس انى فعلا فاقد الذاكره والله انا فى اوائل الاربعينات لكن الحمد لله مش فاهم ايه اللى بيحصل اعتقد ان السبب الرئيسى هو وضع بلدنا المزرى واللى بيخلينا نحاول ننسى حتى الناس وربنا يخلى ريس الطابونه اللى حتى الذاكره ضيعها لنا وعلشان كده لا تقلق وكله هيروح ومساء الفل يااحلى مشرف فى التاريخ

[فــيــروز]

وربنا يخلى ريس الطابونه اللى حتى الذاكره ضيعها لنا وعلشان كده لا تقلق وكله هيروح ومساء الفل يااحلى مشرف فى التاريخ

سؤال خارج المقرر mf-:

انا بالاحظ ان حضرتك فى كل مداخلاتك تقريبا بيكون فيه علاقه بين المداخله و بين الطابونه .. طيب ليه؟ stnd:: هل لهذا علاقه بين الطابونه وبين اسمك؟ هما فى الطابونه دى بيطحنوا القمح تقريبا صح؟ :)

[Handicraft]

يا عم س س اقرى الكلام المكتوب أدناه

------

إذا خذلتك ذاكرتك و أنت في أمسّ الحاجة إليها ، فلا تتكدر ، فكل منا معرض لهذه المشكلة المؤقتة ،

بصرف النظر عن العمر

******

قد ينسى أحدنا رقم بطاقته – هويته – تأمينه الصحي –أو إجازة قيادته – أو ربما رقم الهاتف لأقرب المقربين ، فيتساءل : -" ترى هل هذه أعراض الشيخوخة ؟ "

إن ظهور مثل هذه الأعراض لا تعني بالضرورة الإصابة بالألزماير لأن الذاكرة نظام معقد يقوم على مجموعة من الشبكات لكل منها وظيفتها كالتسجيل و التثبيت أو التخزين و الإسترجاع . هو نظام آلي دقيق للغاية إلا أنه هش ، سرعانما يصيبه الإضطراب عند الإرهاق أو الإضطراب الإنفعالي أو الصدمات العاطفية .

إضافة إلى ذلك فإن قوة الذاكرة تختلف من شخص إلى آخر ، فالبعض يتمتع بذاكرة إستثنائية يكاد لا ينسى شيئا ، و البعض يتمتع بذاكرة تصويرية يسترجع بها أدق التفاصيل ، إلا أن الأغلبية تتمتع بذاكرة عادية أي القدرة على إسترجاع 10% إلى 20% من كم المعطيات التي يستقبلها الدماغ . و يقوم الدماغ بعدئذ بتفريغ ذاكرته من المعلومات غير الضرورية .

هناك شكلان للذاكرة:

أولا : ذاكرة العشرين دقيقة

عندما تقرأ رقم هاتف في الدليل و تتذكره ريثما تطلبه ، أو تقرأ لافتة تراها للمرة الأولى ، أو حركة مضحكة عابرة ، فإذا لم يكن يهمك أمر أحدها فسوف تنساه بعد أقل من عشرين دقيقة ، إذ تقوم الذاكرة بالتخلص آنيّا من تلك المعلومات غير الأساسية لتفسح المجال لما هو أهم ، فالمعطيات التي ركزت عليها سوف تنتقل إلى مراكزها في الدماغ بعد عشرين دقيقة .

ثانيا : الذاكرة طويلة المدى

و تقوم على دعائم ثلاث ، التسجيل و هي آلية تستخدم متداعيات فكرية أو صور مترابطة ، و التخزين وهي آلية تقوم على تبويب المعلوما ت في مراكزها داخل الدماغ و تقوم من حين لآخر بإعادة الترتيب و التبويب وفق المعطيات الجديدة خاصة أثناء النوم ،أما الإسترجاع فهو آلية تخضع للتجربة و التدريب تتم باستخدام مفاتيح تسهل فتح الملف المناسب للموقف .

أنعش ذاكرتك

الذاكرة لا تبلى إلا إذا توقفنا عن استخامها ، و على عكس ما هو شائع فإن الذاكرة أكثر أجزاء الجسم مقاومة لعوامل الزمن ، طالما أن الدماغ في حالة صحية جيدة . أي أنه لم يتعرض لإصابات أو مرض كالتهاب السحايا أو الألزماير أو الأورام ؛ و يؤكد البروفسور ( فرانسوا سيلال ( FTANCOI SILALأن الإنسان قد يفقد قدرات ذهنية معينة إلا أنه يكسب غيرها كالنضج الإنفعالي ، و إختيار القرار الصائب و التقييم المناسب للأمور ، و هكذا يمكن للإنسان الإحتفاظ بنفس الحيوية الذهنية التي كانت لديه في الأربعين مثلا و هو في السبعين من العمر .و يمكن تنشيط الذاكرة ببعض الممارسات و التمارين :

أولا : الراحة و النوم ، فالإرهاق و الأرق يضعفان القدرة على الإسترجاع .

ثانيا : أسلوب التغذية ، و تقوم على الاعتدال في تناول مختلف أنواع الأغذية و خاصة منها الطازجة ، و الابتعاد عن معطبات السيّال الدماغي كالمسكرات و النيكوتين و المخدرات و المنشطات .

ثالثا : مراقبة الشرايين : إصابة الشرايين أو القلب تتسبب بإضطراب الذاكرة .

رابعا : ضرورة ممارسة التمارين الرياضية و أبسطها المشي بين عشرين و ثلاثين دقيقة يوميا

خامسا : ممارسة التمارين الذهنية مثل :

إقرأ هذه المجموعة من الأعداد : 7-1-24-22-8-47-5-19-2-58-4-69-83-73-9-13

بعد ذلك إقلب الصفحة و ردد أكبر عدد ممكن منها ، يمكن للإنسان وسطيا أن يسترجع بين 5 و 9 أعداد .

لأية دول تنتمي العواصم التالية : برلين ، أسلو ، أثينا ، أنقره ، نيروبي ، أتاوا ، دمشق ، لشبونه ، بوخارست ؟ حاول أن تتذكر و ما لم تتذكره إبحث عنه .

ماهي الدول الأعضاء في الإتحاد الأوربي ؟ حاول أن تتذكرها و ما لم تتذكره إبحث عنه .

4- حاول أن تحفظ كل يوم بيتا أو بيتين من الشعر ، أو نكتة ، أو حكمة .

حاول أن تحفظ رقم سيارتك ، علامة ثلاجتك أو فرنك الألكتروني التجارية .

ردد عناوين الأخبار الهامّة التي استمعت إليها الليلة الماضية أو تذكر ما فعلته مساء الأمس .

تعلم كلمة جديدة كل يوم أو كل بضعة أيام و خاصة إذا كنت تدرس لغة ثانية و حاول أن تستخدمها .

ضع قائمة بأسماء المشاهير بين سبعة إلى عشرة منهم و حاول أن تتذكر ثلاثة من أعمالهم كالأفلام بالنسبة للمثلين أو الكتب بالنسبة للمؤلفين أو الانجازات بالنسبة للمسؤولين .

و صفوة القول أن الذاكرة يمكن تدريبها تماما كما العضلات ، و فكرة أن الذاكرة تشيخ هي مجرد أسطورة .

---------

منقول

[se_ Elsyed]

يا سلام .. ما أجمل شعور المريض من دول لما يلاقي العنبر مليان ناس عندهم نفس الأعراض ....

أنا عرفت دلوقت مستشفيات مصر زحمه ليه ..

الحكومة عامله كده عشان ترفع الروح المعنوية للمرضى .. وكمان عشان تخلي الواحد يقول " اللي يشوف بلاوي الناس تهون عليه بلوته "

د/ مطحون كتب

وعلشان كده لا تقلق وكله هيروح

انا اول ما قرأت الكلمتين دول إترعبت وقولت حتى الـ 16 ميجا اللي باتعكز عليهم هايروحوا هما كمان .. يعني هابقى عالجنط ...

بس رجع لي الأمل من جديد بعد تدخل الدكتور النفساوي الشهير الباشمهندس هاندي آل كرفت والكلمتين الحلوين اللي كتبهم

( أنت داخل عالنت منين دلوقت يا هاندي ؟ )

بس لي كام تعليق عالماشي على الوصفات المنقولة بتاعتك يابو الهنود

أولاً : الراحة و النوم ، فالإرهاق و الأرق يضعفان القدرة على الإسترجاع

لأ من الناحية دي أطمئن .. إنت مش كل ماتتصل تلاقيني نايم ؟.. أنا بعون الله بأعمل 10 ساعات نوم يومياً في المتوسط .. ويوم الاجازة بأصحى عشان أصلي وأأكل ..

رابعا : ضرورة ممارسة التمارين الرياضية و أبسطها المشي بين عشرين و ثلاثين دقيقة يوميا

دي صعبة شويه يا دكتره .. طب ممكن ألف مدينة الملك فهد الطبية بالعربية 5 مرات ؟

لأية دول تنتمي العواصم التالية : برلين ، أسلو ، أثينا ، أنقره ، نيروبي ، أتاوا ، دمشق ، لشبونه ، بوخارست ؟ حاول أن تتذكر و ما لم تتذكره إبحث عنه .

ماهي الدول الأعضاء في الإتحاد الأوربي ؟ حاول أن تتذكرها و ما لم تتذكره إبحث عنه .

لأ معليش الحاجات دي موجوده في الكاش ميموري .. لأ محتاجة ذاكرة ولا تخزين ملفات ..

ردد عناوين الأخبار الهامّة التي استمعت إليها الليلة الماضية  .

إنت كده عايز تموتني بالسكتة القلبية .. مش تعالجني

ضع قائمة بأسماء المشاهير بين سبعة إلى عشرة منهم و حاول أن تتذكر ثلاثة من أعمالهم كالأفلام بالنسبة للمثلين أو الكتب بالنسبة للمؤلفين أو الانجازات بالنسبة للمسؤولين .

لأ دي انا لبلب فيها ...

( طب يابني أومال إنت جاي العيادة تتفسح ؟ )

على العموم شكراً لكم جميعاً وربنا يكفيكوا شر المرض .... أنا من النهاردة اول ما هاروح البيت هادخل عالتلاجة أشوف ماركتها أيه .. وأقلب الغسالة وأشوفها كام حصان وهاكتب رقم أي عربية معدية من جنبي وماركة قمصان الموظفين ..

مش عارف ليه أنا متفائل وحاسس إني هارجع تاني 512 ميجا ملاكي جيزة ....

[disappointed]

ذاكرة العشرين دقيقة

عندما تقرأ رقم هاتف في الدليل و تتذكره ريثما تطلبه ، أو تقرأ لافتة تراها للمرة الأولى ، أو حركة مضحكة عابرة ، فإذا لم يكن يهمك أمر أحدها فسوف تنساه بعد أقل من عشرين دقيقة ، إذ تقوم الذاكرة بالتخلص آنيّا من تلك المعلومات غير الأساسية لتفسح المجال لما هو أهم

i.e. Temporary Folders

:) :)

ثانيا : الذاكرة طويلة المدى

و تقوم على دعائم ثلاث ، التسجيل و هي آلية تستخدم متداعيات فكرية أو صور مترابطة

i.e. New Folder

stnd::

، و التخزين وهي آلية تقوم على تبويب المعلوما ت في مراكزها داخل الدماغ

i.e. save this document as

mf-:

[ragab2]

فكرتنى

بالمريض اللى راح للدكتور يتعالج من النسيان

وقال للدكتور أى حاجة أنساها حالا

سأله الدكتور من امتى بتجيلك الحالة دى

قاله حالة ايه يادكتور .. ؟

...

بايخة

صح