مع حكومة الفساد والمفسدين .. مين بيحاسب مين ؟؟؟؟

[se_ Elsyed]

أستوقفني 3 مواقف حدثوا هذا الأسبوع .. خلوني أمشي أكلم نفسي ..

أنا أساساً باكلمها من زمان لأنها هي اللي فاضله لي وبتسمعني بإهتمام ...

بس ما باحاولش أكلمها قدام الناس .. عشان بأخاف من الحقن وجلسات الكهربا :rolleyes:

1- الموقف الأول أصعب من موقف احمد حلمي ...

هو الشو اللي عمله زيكو العجيب الشهير بزكريا عزمي ... في مجلس الشعب رداً على المهازل التي تحدث الأن نتيجة الخصخصة والأضرابات المتوالية للشركات المخصخصة واللي على وشك الإغلاق لإن أصحابها عينهم أساساً على الأرض وعاوزين يبيعوا أراضي تلك الشركات .... فوقف زيكو الأسبوع الماضي وسط أعضاء البرطمان ليقول " لعن الله الخصخصة وحرامية الخصخصة "

أنا تلقائياً ساعات لساني بيفلت وبأشتم ... فقلت له " نعم يا روح خالتك ؟ "

ليه ؟؟؟ هو ما كانش كل شيء على عينك يا تاجر وكان عاطف عبيد ملك الخصخصة بيعمل كل حاجه في النور وكنتوا بتنصصوا معاه ؟

ولا الشركات دي باعت نفسها بنفسها ؟

وبعدين مانت مع الريس كل دقيقة واقرب واحد ليه .. ما بتقولش الكلام ده قدامه ليه ؟

ولا هاتقول ليه .. مش إنت اللي سلكت ممدوح إسماعيل على بره وذنب 1000 نفس ماتوا وأكلهم السمك في رقبتك ؟

---------------

2- الموقف الثاني ...

تصريح وزير النقل الجديد في ندوة عقدها في دار الاوبرا اول أمس وقال فيها " وضع مرفق المواصلات والقطارات بالذات مُزري ... والتجديد والإحلال كان شكلي فقط "

يا نهار إسووووووووووووووود ..

يعني الـ 8 مليار اللي خدتوهم من شبكة المحمول الثالثة وقولتوا هاتعملوا بيهم قطارات لها العجب .. إيه ... بخ كده ؟

والناس اللي فاتوا وهبروا المليارات دي كده خلاص .. فلتوا ؟

-----------------------

3- الموقف الثالث

زيارة وزير التعليم أحمد زكي بدر لمدرسة فنية شهيرة هي مدرسة غمرة الثانوية الصناعية أول أمس .. ووجد إن الألات اللي المفروض الطلبة بيتدربوا عليها لم يتم إستبدالها من سنة 1960

يا نهار إسود - سواد غير الاولاني اللي فوق ده -

يعني من أيام الجنيه الجبس ومن أيام ما كانت العربية بتدور بالمنفله ؟

وطبعاً أقطع دراعي إن ما كانت المدرسة بتصرف مخصصات لصيانة وأستبدال هذه الالات

طب .. إيه ؟

هه إيه ؟

بالنسبة لموقف السادة وزراء التعليم السابقين .. كده خلاص برضوا فلتوا وعملوا اللي عليهم ؟

[joo]

انا حمايا مدير عام التعليم الصناعى فى محافظة 00000 وعرضو علية مصب فى وزارة التربية والتعليم

لكنة رفض وعندما سئلتة عن سبب الرفض قال لى ( يا عم الوزارة كلها حرامية وكلة بيهبش بالملايين اروح انا واشبة نفسى

لية )

وقال كلام اكتر من كدة بكتير كفاية كدة لحسن الحيطان ليها ودان

[fatfouta]

الخبر اهو شوفته الصبح واتفرست بس دايما بتفرس اكتر من التعليقات

كنت بدور على موضوعك يا سى السيد بتاع الإبل ده بس مالقيتهوش عشان احطه فيه :rolleyes:

الراجل ده بصراحةن فارسنى من ساعة ما مسك الوزارة

تم تعديل 14 أبريل 2010 بواسطة fatfouta

[engmido]

والله مهما كان اهو بيتحرك بيعمل حاجة

احسن من اللى كان زى خيال المآتة ولا بيهش ولا بينش ولا كأن فيه وزير تعليم من اساسه