عاوز تلعب رياضة وتخس بقى وتعيييش .. اقولك انا ازاي

[doha]

وحدة اعرفها من جنسية عربية غير خليجية ..هي مقاربة لي في السن وماشاء الله تبارك الله عندها اكثر من طفل ومع ذلك صعب تقول غير انها مازالت في الجامعه ..

ماشاء الله الجسم المشدود الي مفيهوش ولا نقطه دهون وبطبيعه الحال برغم الولادات المتكرره الا ان بطنها مسطحة .. مفيش عندها لا كرش ولا حتى تلميح عنه ..

مكدبش عليكم انا قلت اكيد عاملة عملية شفط دهون او شد معدة .. مش ممكن يعني هيكون ده جسمها الطبيعي ..

في مرة بندردش فعرفت منها انها بتلعب رياضه .. سألتها ان كانت عملت اي عمليات للتخلص من البطن خاصه بعد الولاده قالت نهائيا .. ورتني ذراعها قالت امسكي .. بمسك .. مش دراع .. ده ماشاء الله كتلة عضل.. كأني بمسك كورة كفر مليانة مش مفسية زي بعض الاذرع التانية .

تأكدت ساعتها انها فعلا رياضية .. وصميمه كمان ..

بصراحه دي اول مرة اشوف انسان حقيقي جابت معاه الرياضة نتيجه بالشكل الفتاك ده .. من زمان عارفه ان الناس بتلعب رياضه لتحسين شكل الجسم .. وانا نفسي مارستها لعدة فترات في حياتي بس طوال الفترة دي كانت فكرتي ان الرياضه ( بتساعد ) على التنحيف او بتنزل بعض مناطق الجسم مش كلها او يعني اهوه بتدي شكل الى حد ما حلو احسن اكيد من غير الرياضه لكن مش ممكن انها ( تنحت ) البني آدم كده او تظبطه بشكل مثالي بالطريقة دي ..

طبعا هي ماشاء الله بقالها سنين مواظبة على الرياضه .. واجمل مافي الموضوع انها مش بتروح جيم ولا يحزنون وانما في بيتها وبدون الاستعانة بمدرب او صديق .. والاحلى من كل ده اني سألتها من يومين عن برنامجها الرياضي بالظبط .. بتعمل ايه وبتتصرف ازاي عشان يطلع معاها النتيجه دي ..

كلامها دخل مزاجي اوي .. وحسيت انه سهل التطبيق الى حد ما وممكن ببعض المجهود يبقى برنامج حلو للي حابب يمشي عليه ويعتمد الرياضه كاسلوب جديد في حياته ..

هقولكم باذن الله على التفاصيل بس ندالة مني .. خليها في مداخلة جاية ..

[بركة]

يللا يادودو

يللا يادودو :wub:

[fatfouta]

مستنيينك يا اوختشى

[ام نور محمود]

انا معاك يامعلم

[قلب ابيض]

ما انا ياااااااااااااما قلت رياضه يا نااااس

اقل ما فيها مشى كل يوم ساعه بس

الف حمد وشكر لك يارب

ومع ذلك ............

يالا يا دودو

يالا يا دودووووووووو

[mekkawy]

ايه يا هندسى النظام .؟؟

الستات دي هيخسوا لوحدهم و احنا قاعدين ولا ايه ؟؟

هو الموضوع حريمي بس ولا مسموح للرجال بالاشتراك ؟؟

طبعاً بدون اختلاط كل فريق له أيامه

مكاوى ... الرياضي

[تامر مصطفى]

كأني بمسك كورة كفر مليانة مش مفسية زي بعض الاذرع التانية .

حكاية الكورة دي جامدة جداااا

انا شخصيا عامل زي الكورة الكفر المليانه بس منفوخة زيادة حبتين لغاية ما قربت تفرقع واي حاجة في الدنيا ممكن الاقي ليها وقت الا الرياضة دايما ابقى مش فاضي ومعنديش وقت مع ان هنا في الكويت كل منطقة سكنية فيها ممشى اكثر من رائع والممشى القريب مني فيه أجهزة رياضية لعامة الناس ..... بس فين بقى اللي يلتزم ويواظب .

شوفوا لنا حل سريع بدون تعب

[mekkawy]

حااااااااولت كتير و مفيش فايدة فيا

مرة خسيت 4 كيلو في 10 ايام من المشى بس و قلة الأكل ... لما جيت هنا قولت هأمشي كل يوم الصبح و هأعمل رياضة و اظبط نفسي و ام العيال تيجي باة تلاقي توم كروز مستني في المطار ... بس شكلها هتيجي تلاقي ابراهيم نصر :(

أريد حلاً ... و الله ما هينفع كدة ... كل يوم أسوف و أجل ... لما نشوف أخرتها مع الوصفات الجامدة

مكاوى ... سادة من غير تحابيش :)

[hebapharm]

مداااااام ضحى.....

....ارجوكي قولي بسرعه ...ارجوووووووكي

[pink rose]

الجماهير العريضة تنادي ضحى ضحى انتي فين يا ضحى

يالا يا ستي عشان الوضع الحالي عندي مش تمام بعد حوار الحمل الاخير دا

و لازم ارجع اظبط في السريع عشان اتخنقت من نفسي

عاوزة انزل اد 6 كيلو كده

سؤال على جنب

حد شاف اسالوا رجاء النهاردة؟؟؟؟؟

[jasmin hamed]

الله يكرمك يا ضحى يا بنت ام ضحى

انا كنت ناويه انزل موضوع عن الريجبم تحبو ندمج الموضوعين و نخليه الى عايز يخس و خلاص ولا ده لوحده و ده لوحده

كنت نويه انزلكم من كل الاصناف اشى اتكنذ اشى دكتور عبد العال اشى دكتور نيوترشن اشى الثوث بيتش و كده يعنى

و كلو بقى ..............كلو قال كلو قال ............ جعوا بقى

انما الرياضه ديه معرفش عنها ابدا عشان كده

يالا يا دودو

يالا يا دودووووووووو

[doha]

لكل الجماهير المنتظره في الاستاد . حالا حالا هيبدأ الماتش .. متستعجلوش على رزقكم ..

مكاوي .. ابدأ من دلوقت بجد هتبقى مفاجأة سارة جدا لما تقابلهم في المطار ويلاقوا شعبان عبد الرحيم قصدي شعبان كروز مستنيهم في المطار .. بجد متضيعش الفرصة دي من ايدك ..

ملاحظة ( ياريت كل ست او كل راجل بعيد عن اسرته وقدامه مالايقل عن شهر لغايه مايشوفهم يبدأ من دلوقت يعمل اي حاجه بتفرق جامد الامور دي على فكره لان الي بقاله كتير مشافكش هو اكتر حد بيسعد لما يلاقيك بعد الغيبة دي متغير .. للاحسن )

جاسمين .. ياريت تعملي موضوع للرجيم ده شيء هام جدا .. بس ياريت تخليه موضوع مستقل واوعدك باذن الله هشارك معاكي فيه اصلي حرس قديم اوي اوي وقضيت في الخدمه دي يجي عشر سنين وحفظاها من اول المارشال كالوري لغااايه الصول دشتي .. سيري على بركه الله يانورماندي واحنا وراكي ..

قلب ابيض .. المشي سيد الرياضات عن نفسي اعتمدته فترة كام شهر كرياضه اساسية ووحيده ومقولكيش نزلت وقتها قد ايه ولا بقيت عامله ازاي .. الي معندوش رياضه غير المشي ممكن جدا تكفيه ومش خساره ابد كل دقيقة الواحد يخصصها للمشي بغرض اللياقه ..

وبالتاكيد شكرا لكل الجماهير الي علقت ومعليش بقى انا ( علقتكم معايا ) لالشيء وانما عشان اكتر ردود للموضوع وبالتالي اضمن رفعه عشان يستفيد منه اكتر عدد من القراء .. منا قلت لكم ندالة .. بس بغرض خير والله ..

ونخش بقى على لب الموضوع .. من غير قزقزه ..

[doha]

في مرة بقى قلت مبدهاش حتما ولابد اسألها عن تفاصيل برنامجها الرياضي إيه .. وعلى فكره لما قلت ان دراعها كورة كفر مكانش قصدي في الحجم بالعكس حجم الذراع عادي جدا زي اي ست طبيعية لكن الماده نفسها المكون منها الدراع او الماتيريال . عضل مش دهن زي ماعند الاغلبية . يعني بالظبط زي الفرق مابين الضغط على مخده اسفنج واخرى قطن مع ان الحجم واحد الا ان ( المقاومة ) بتختلف ..

رحت سألتها .. والست والله ماقصرت اجابت باستفاضه ..

اولا انا عارفه انها مخصصة ساعة يوميا للرياضة .. كل يوم كل يوم مفيش حاجه اسمها يوم ويوم او تشتغل يومين وتبطل الثالث .. هي ماشاء الله منتظمه على كده بقالها على كلامها اكثر من عشر سنوات .. وبصراحه انا مصدقاها لان واضح عليها اوي ..

ثانيا هي مش مفتوله العضلات زي مالبعض ممكن يتصور .. يعني لو مقالتليش انها بتلعب رياضه ممكن اوي مكنتش خمنت وكنت هفتكر ان دي طبيعة جسمها او ان في تدخل جراحي حاصل والسلام .. بس بعد ماقالت لي وبالصدفة كنت بتفرج امبارح على التلفزيون ومرت لقطه لمنى زكي في فيلم ( دم الغزال ) وهي بتنظف صالة رياضية . . ذراع مني زكي في الصورة نفس الذراع ( ابو كفر ) الي بحكي لكم عنه وواضح اوي انها بتمارس الرياضه هي كمان ..

ثالثا زمان ايام ماكنت بلعب رياضه المدربة كانت بتقول بان الاجهزه كلها كلام فاضي وان الاساس هو الايروبيكس او التمارين البدنية الي بنمشي وراها فيها .. فضلت على الاعتقاد ده كتير وحتى لما كنت بروح بعد كده جيم تاني برضه مكنتش بهتم اوي بالاجهزه الي كنا بنستخدمها ( للتسخين اوالاحماء ) فقط وانما كان تركيزي كله على التدريب مع المدربة .. صاحبتي دي اثبتت خطأ هذا الاعتقاد .. هم هناك مبيلعبوناش على الاجهزه توفيرا لها مش اكتر على اساس ان العدد غير كافي .. بينما على مايبدوا الاجهزه تغنيك تماما عن المدرب فيما لو اجدت استخدامها وعرفتي تنوعي مابينها .

رابعا نخش بقى على تفاصيل برنامجها الرياضي ..

عندها غرفة مخصصاها للرياضه فيها خمس اجهزه .. محدش يتخض دلوقت نعرف ان مش شرط العدد ده من الاجهزه ممكن نستبدل حاجات بحاجات اخرى انما مشوها دلوقت خمسه عشان الحسد .

نمرة واحد بتلعب على جهاز الجري الرياضي .. السير يعني .. قالت ده بتستخدمه تسخين او احماء .. في البدايه كانت بتلعب على سرعه بطيئة مشي يعني ويوم بعد يوم بقت تزود السرعه لغايه ماوصلت دلوقت بعد سنوات على السرعه 9 وهي ماقبل الاخيرة . .بالنسبة للي معندوش سير ممكن يعمل تمارين احماء عاديه وممكن جدا حركه انا بحب اعملها من وقت للتاني انك تجيب كرسي وتحطه وتسند علي ظهر الكرسي وتقعد تمشي في مكانك وتجري كمان وايدك لسه على ظهر الكرسي .. محدش هيقولك بتعمل ايه وكأنه سير برضه ..

خلصت مشي على السير وتسخين بتقول كده انا مرنت عضلات رجلي . . تخش بقى على الجهاز نمره اثنين وهو العجلة الرياضية .. قالت تقضي لها وقت برضه على العجلة وبكده تكون مرنت عضلات الفخذين والاجناب .. مش هقولكم تستبدلوا العجلة بأيه بس ممكن جدا لو عندك عجلة عيالك قديمه ومش محتاجينها وكان حجمها مناسب شيل السير بتاعها واقعد بدل في مكانك ( بس متخليش العيال تشوفك ) او ممكن تعمل تمارين عجلة في الهواء بانك تستلقي على الظهر وتبدل برجلك كانك في عجله .. ممكن برضه تعمل تمارين الغضط والحاجات دي بس اسهل من ده كله اشتري لك عجله رياضية ووفر على نفسك وجع الدماغ ..

بعد ماخلصت العجلة ترتفع لاعلى شويه فتبدأ تمرن عضلات المعده .. عندها جهاز رياضي اعتقد اسمه آب جيم .. الي هو عباره عن تستلقي على ظهرك والجهاز ده زي نصف دائرة كده له زي مخده صغيره تبقى تحت راسك ولما تدفع الجهاز بايدك يرفع راسك وبالتالي تنثني على نفسك كده فتمرن معدتك .. عارفينه ؟ الجهاز ده بيعمل تمرينات البطن المعتاده ولو معندكش الجهاز ببساطه نام على الارض على الظهر . اعقد ايدك خلف رقبتك . ادفع الرقبة للامام ورجلك مشدوده هتكون النتيجه انك هتبقى جالس على الارض ارجع نام تاني وكرر العملية ..

كده خلصنا ثلاث اجهزه ومرنا الرجل والاجناب والمعده .. نخش بقى على الصدر . .

يتبع ..

تم تعديل 15 أبريل 2010 بواسطة doha

[سكر]

يعنى السر فى شى واحد

ساعه واحدة رياضة كل يوم مهما كانت المشغولات حتى لو فى الحمام

[mekkawy]

في انتظااااااااااااااااار البقية ... و الله هأجتهد ان شاء الله و هأحاول أنفذ التعليمات دي

و فعلاً بتفرق كتير أوي لو الواحد أهله جم شافوا متغير ... خاصة لو كان التغير هو اختفاء الكرش

الكلام مش ليا طبعاً .. كرش ايه و بتاع ايه ... ده الواحد حتى سمباتيك خالص

مكاوى ...

[hOuSsAm]

من الحجات الجامدة اوى واللى فرق معايا فى حياتى حجتين

1- نط الحبل (ونط الحبل ده بيظبطلك الجسم كله وبالذات الرجلين والضهر صدقونى جامد جدا بس متنطوش على ارض صلبة سيراميك ولا بلاط لانه ممكن يجيب خشونة رجلين نطوا فى جنينة او على ارض رملة)

2- الجرى

[doha]

وقفنا فين امبارح ؟ ايوه عند تمرين عضلات الصدر ..

قالت ان عندها مش جهاز وانما اداة تشبه نصف دائرة كده ( هي وصفتها بصراحه مشفتهاش بس حاولوا تتخيلوها معايا ) قالت بانها بتمسك الاداة دي وتحرك ايديها تماما كما لو كانت بتنكش في الارض ( بتعزق يعني بالفاس بس بلهجتهم ) هي عملت بايديها كده كأنها بتضرب بحاجه في الارض .. قالت تكرر الحركه دي كذا مرة ..

بعدين تمسك الاداة النصف دائرة دي ( تخيلوا معايا انها ماسكه عصاية مقشة .. اعتقد هتوفي الغرض تماما .. ) هتمسكها من الطرفين بحيث تكون ايديها متباعدتين بعدين ترفع ايدها لفوق وتنزل لتحت .. طبعا بتحاول كمان ترجع بايديها لورا شويه خلف راسها وهي مازالت ممسكه بالعصاية .. بتقول لاحظي عضلات الصدر في الحركه دي هتلاقيها بتتحرك معاكي ومن هنا تعرفي انك بتمرني العضلة دي ..

يبقى كل واحد يجري على المطبخ يفك المقشة بتاعتهم ( من غير ماتخلي المدام تشوفك مش عاوزين خسائر بشرية ) ويبقى بكده وفرت عل نفسك الجهاز الرابع ..

قالت بعد كام دقيقة تدريب بالاداة دي بتكون خلصت خلاص الصدر تتجه بقى لتمرين الذراعين ..

بتجبي الدمبلز .. عارفينها الي هي اثقال كده بتتمسك في الايد .. هتبدأ الاول تمسك كيلو في كل ايد بعدين اثنين وهكذا . .. لو معندكش الاثقال دي ابسط حاجه ممكن هات زجاجة مياه معدنية واملاها مية بتعمل نفس النتيجة تقريبا نفس الوزن .. امسك زجاجه في كل ايد . .

هتبدأ ترفع ايديك الاثنين في وقت واحد بحيث تبقى عامل زي حرف T او كانك على وشك الطيران .. هترفع ايديك كده لفوق شويه وانت مازلت ماددهم بشكل افقي بعدين تنزلهم بالراحة جنبك تاني .. هتكرر العملية دي .. للجنب .. لتحت .. للجنب .. لتحت ..

هي بتعملها ماشاء الله 300 مرة .. طبعا هي قالت الاول هتبدأ بعدد بسيط من المرات بعدين تزود كل شويه لما توصل للعدد الكبير ده ..

خلصت الحركه دي تبدأ ترفع ايديها لفوق خالص وهي برضه شايلة الاثقال بحيث تبقى وهي ايدها ممدوده لفوق شكل حرف I هترفع لفوق وتنزل لتحت مش لجنبها وانما لتحت تقريبا على اكتافها .. متخيلين ولا اشرح اكتر ؟

هتكرر الحركه دي 60 مرة ..

وبس على كده تكون خلصت تمرين عضلات الجسم كله .. في خلال ساعه كاملة كل يوم ..

طبعا ممكن احنا منعرفش المده اللازمه لكل واحد من التمرينات دي قد ايه بس وبما ان الرياضه بتجيب نتيجه واضحه خلال اول اسبوعين فالواحد يتمرن ويحاول ينوع خلال الساعه دي بعد اسبوعين يبدأ يبص لنفسه في المرايةكويس اوي يشوف ايه الجزء الي محتاج تمرين اكتر ويركز عليه او يطول مدته وايه الجزء الي تمرن زياده عن اللزوم وبرز عن بقية الاجزاء بالغلط فيخف عليه شويه . وهكذا في النهايه هتظبط معاكم العملية ..

هي قالت بان الواحد لازم يلعب رياضه مش عشان يخس وانما ـ وعلى حد كلامها ـ ( عشانك انتي ) تحسي بنفسك وتحافظي على صحتك.. قالت اذا مابدك تسألي في نفسك مين راح يسأل عنك ؟

دي كانت تجربة صاحبتي وبصراحه اجدها تجربة تستحق التنفيذ ..

في مداخلات تانيه باذن الله ممكن اكتب لكم مزيد من التجارب الرياضية وياريت الي عنده تجربة او معلومه ممكن تفيد يحطها هنا عشان نستفيد كلنا بالخبرات المختلفة ..

بالمناسبة

[mekkawy]

قلنا هنبني و أد أحنا بنينا السد العالى

و الله يا مدام ضحى كنت ناوي و عازم و تمام التمام ... بس صحيت متأخر :( .. مهو انا ما اعرفش اعمل الحاجات دي غير من 6-7 صباحاً غير كدة مفيش

بس على فكرة أنا رياضي قديم و التمارين اللي قوليتها دي منتاااااازة .. 12 سنة هوكي يا جماعة ... تاريخ و الله ... و بطولات و منتخب مصر ... بس الله يسامحه الشغل بأة ... ايييييييه ... عامة

أنا تجربتي مع المشي كانت ممتازة ... كنت بأمشي كل يوم أو يوم يوم لمدة 10 أيام بس كان مشي بذمة و ضمير و تركيز ... و كنت مخفف في الأكل جامد أوي .. كنت بأكل مشويات و سلاطات و فواكه و بعدت بس عن النشويات و الحلويات اللي أنا مدمنها

النتيجة كانت 4 كيلو و كسبت التحدي من واحد صحبي :)

بس بعد ال4 كيلو مباشرة سافرت عمان لمدة 15 يوم ... رجعت زايد 6 كيلو بأة :lol: بس مش لحاجة غير الجنك فود و الوجبات السريعة و الكربوهيدرات المتمثلة في الشيكولاتة و السناكس

مكاوى ... شوكلاتة مشكلاتاية

[doha]

أنا تجربتي مع المشي كانت ممتازة ... كنت بأمشي كل يوم أو يوم يوم لمدة 10 أيام بس كان مشي بذمة و ضمير و تركيز ... و كنت مخفف في الأكل جامد أوي .. كنت بأكل مشويات و سلاطات و فواكه و بعدت بس عن النشويات و الحلويات اللي أنا مدمنها

تجربتي برضه مع المشي اكتر من ممتازه هو الرياضه الي بنصح بيها الكل بصراحه بس المشكلة ان مش دائما الواحد بيبقى قادر عليه ..

اهم حاجه ان المشي يكون بشكل منتظم يعني كل يوم وبالكتير خالص يوم بعد يوم ..

هتخصص طقم مناسب للمشي اهم مافيه بنطلون مريح مش مهم يكون تريننج بس اي بنطلون فضفاض يوفي الغرض ( بس مش لدرجه جلابية يعني وتخيطها من النص ) وطبعا اكرمكم الله جزمه كوتش مريحه او حتى ( شبشب ) يكون طري ومش بكعب عالي ..

المشي يكون بخطوة سريعه نسبيا ولا يحتسب هنا المشي الهوين او الفرجه على الفتارين دي متنفعش مبتجيبش نتيجه ..

يفضل تحدد لنفسك هدف مثلا تروح تجيب عيش من المخبز البعيييد الي على بعد ساعه مشي من بيتكم مثلا ..

في البدايه كنت بروح مشي وارجع في تاكسي ومع الوقت بقيت بروح وارجع مشي ..

ممنوع نهائيا تتشري وانت ماشي في الطريق اي عصائر او بيبسي او ماشابه .. هتعطش في اول كام يوم خذ معاك زجاجه مياه معدنية صغيره واشرب منها كل ماتحس بالعطش .. بعد فترة من ممارسة المشي حتى شرب الماء مش هتفكر فيه ..

[doha]

من الحجات الجامدة اوى واللى فرق معايا فى حياتى حجتين

1- نط الحبل (ونط الحبل ده بيظبطلك الجسم كله وبالذات الرجلين والضهر صدقونى جامد جدا بس متنطوش على ارض صلبة سيراميك ولا بلاط لانه ممكن يجيب خشونة رجلين نطوا فى جنينة او على ارض رملة)

2- الجرى

فعلا نط الحبل بينزل الوزن جامد لانه بيحتاج مجهود كبير وبالتالي بيحرق سعرات كتير ..

عيبه الوحيد اني قرأت قبل كده انه بيسبب للسيدات ( هبوط الرحم ) انا بصراحه مش عارفه ايه المقصود تحديدا بالمصطلح ده بس شكله كده حاجه مش كويسه ..

عن نفسي بخاف منه من بعد ماقريت المعلومه دي في كذا مكان .. ممكن تكون مش صحيحه بس المغامرة برضه مش مطلوبه في الامور الي زي دي ..