فنـــون التعــامــل مــع الآخريـــن .. تجارب الأعضاء الفعلية

[عماد حمدي]

فنــون التعـــامل مع الآخريــــن

:blink:<< تجــارب فعليـــة وحقيقيـــة للأعضـــــاء >>

:sad: مقـــدمــــة :

الانسان اجتماعي بطبعه يحب تكوين العلاقات وبناء الصداقات ..

والملاحظ ان الفرد مهما كان انطوائيا فانه يسعى لتكوين علاقات مع الاخرين وان كانت محدوده ..

ويصعب بل ربما يستحيل عليه الانكفاء على الذات والاستغناء عن الاخرين..

وبما ان الناس لهم طباع مختلفه فاذا يجب ان لا نتعامل معهم بنفس الطريقة لاختلاف تركيب نفسياتهم ..

يختلف أسلوب التعامل أيضا باختلاف الشخصية. فطريقة التعامل من شخص شكَّاكٍ وحسَّاسٍ ..

تختلف عنها مع شخصٍ سويٍّ, فالطريقة تختلف باختلاف الشخصيات والصفات التي تكون بارزةً فيهم.

فن التعامل مع الاخرين .. مفتاح قلوب الناس !!

من هنا إخواني وأخواتي الأعضاء .. سنتكلم عن تجاربنا الحقيقة في التعامل مع الأخرين ..

هناك أنواع عديده من الناس .. نقابلهم يوميا ً سواء في العمل ( العصفورة wst:: ) . او في الشارع ... الخ

أذكر لنا تجربتك الفعليه وكيف تعاملت مع هذه الأنواع :-

بعيدا ً عن الأسلوب الفلسفي .. فنحن هنا نتحدث عن تجاربنا الحقيقة ..

1- الإنســان العصفـــورة :sad:

* دا أهم واحد ( في أي شركة هتلاقيه ) أوعي حد يقولي نصطاده ty:)

2- الإنســان سيء النيه ( الشكـّاك )

3- الإنســـان الحاقد وعدو النجاح ( دائم الحقد عليك ومش بيحب يشوفك ناجح أبدا ً )

4- الإنســـان الحاسد " أعوذ بالله " :closedeyes:

5- الإنســـان المستفّز ( دايما ً أسلوبة مستفزّ ويخليك تشيط وتولع )

6- الإنســــان البااااارد والبطيء في عملة وتعاملة

7- الإنســان العداوني أو العصبي ( اللي بيشاكل دبّان وشه ودايما ً عصبي )

8- الإنســـان الجاهل مدّعي المعرفة ( الفتيت واللي شايف نفسة زويل )

9- الإنســـان المتعالي والمتكبّر ( دائم التكّبر بالمصطلح الشبابي كدة " رسّيــــم " )

10- الإنســـان الثرثار ( لك لك ع طول مبيفصلش زي الثلاجة )

هناك أنواع آخري كثيرة .. كويسة جدا ً .. لكن الإنسان صاحب الصفات الحميدة

والطباع الحسن لا توجد مشكلة في التعامل معه لكن هذه الأنواع الشائعه والصعبة ..

إذا أدرت أن تطرح علينا نوع آخر وكيف تعاملت معه .. تفضل ..

المطلــوب بقا :

* كل عضو يكتب رقم الشخصية وليكن . ( 1 ) الإنسان العصفورة ..

ويحكي الموقف ....... الخ , وبعد كده إتعامل معاه إزاي .. بمعني الموقف لواحده , والحل والتعامل لواحده

أترككم الآن . لنستمتع سويا ً من تجاربنا . ونفيد بعضنا ً البعض ...

md2:

أخوكم

Omda2006

Emad Hamdy

تم تعديل 16 أبريل 2010 بواسطة omda2006

[رضوي]

السلام عليكم ورحمة الله وبركاته

مبروك علي الموضوع الجديد ........... والجيد

اكيد كل واحد فينا مر بتجربة في التعامل مع بعض الشخصيات

ولكن في بداية الامر احب اقول حاجة مهمة

ياريت ماننساش مبدأ الفروق الفردية ............ بمعني انه مافيش طريقة واحدة للتعامل مع كل البشر يقدر يعملها كل البشر حتي ولو كانت تجمعهم صفة واحدة !!!

حد فاهم حاجة ؟؟؟؟

طيب

هقول موقف اتعاملت فيه مع

1) العصفورة

وزي ما قلت الشخصية دي موجودة في كل مكان .......... تلاقي نفسك قاعد في آمان الله وحد بيفتن عليك ............ لا وكمان ايه بقول كلام تاني خالص ............ شوفتوا الجمال

في بداية استلامي العمل قابلت الشخصية دي ............ وانا اصلا مش بعمل حاجة ولا بقول حاجة ولا بكلم حد ........ ودي كانت هتموت بسبب اني مش بتكلم ........... وطبعا كالعادة قالت اني مغرورة وتنكة .........

المهم

يوم روا التاني .......... لقيت الناس بتاخد عني افكار غريبة ( دة لانها فشلت انها توسوس للمدير ......... ببساطة لانه يعرفني)

وبعد لما عرفت مين اللي بيوسوس .......... تعمدت معاها التجاهل التام

واكتشفت ان الاسلوب دة بيستفزها اكتر .......... وبقت اكتر عداءً ضدي وبتكرهني لاني مش بكلمها خالص .......... في حين اني بدأت اكون اجتماعية مع زمايلي الاخرين

وفضلت كدة معاها ........... تجاهل تام لحد لما هي زهقت مني

بس برده مابطلتش وسوسة

ونقل اي حاجة ............ كلام تصرفات

او حتي تخترع حاجة وتنقلها والسلام

بس انا اتعودت علي الوضع وهي كمان اتعودت علي الاهمال مني .......... لحد لما ربنا سهلها واخدت اجازة طويلة

الخوف بقي لما ترجع

[kitkat]

أنا قابلت كل دول بس خليني اكلمك عن اكتر شخص يحرق دمي

10- الإنســـان الثرثار ( لك لك ع طول مبيفصلش زي الثلاجة )

والفضولي تحديدا (انت اتجوزت؟ اتجوزت امتي-معاك ايه دلوقتي -طيب ربنا يخلي وساكن فين...)

ههههههههههههههه الشخصية الي تحسسك انها عارفاك من 30 سنة وبتتكلم معاك بمنتهي العشم والتطفل والفضول والغتاتة ومش بيفصل علي رأيك !!!!!!

ده بقا بأغير الموضوع معاه علي طول بمنتهي اللطافة يعني أروح مغير الكلام علي اي حوار يخص الشغل وفيه ناس أجارك الله ماعندهاش نعمة الاحساس ومش بيفهموا برده (ده بحكم عملي في مجال مليان جهلة وأميين ربنا يصلح حالهم وحالنا)

[عماد حمدي]

رضووووي ..

أولا ً شكرا ً علي مرورك ونتمني منك المتابعة والتواصل معنا .. لو عندك أي تجربة آخري مع الأنواع التانية دي ..

ثانيا ً فعلاً مفيش طريقة واحده نقدر نعملها كلنا علشان نتعامل مع شخصية معينة .. لإختلاف ذات كل شخص .

لكن بقدر الإمكان أنا أقصد طريقة التعامل وليس فن تنفيذها !! ياريت تكون وصلتلك وجهة نظري وأنا أقصد ..

ان ممكن تكون الطريقة واحده لكن فن التنفيذ والحبكة تختلف من شخص لآخر ..

ثالثا ً نقدر نقول ان طريقة التعامل مع الإنسان العصفورة من وجهة نظرك :-

العصفورة = التجاهل التام

أشكرك مرة تانية .. ومنتظرين متابعتك ..

كيت كات ..

أشكرك يا زوق ع تفاعلك معانا .. وفعلاً الشخص الفضولي يعتبر من أكتر الشخصيات المستفزّة ..

لكن تختلف رده الفعل من إنسان لآخر في طريقة التعامل معاه .. وطريقتك كويسة وكمان الشخص عديم الإحساس ..

شكلك تعبت جااااااامد

نقدر نقول ان طريقة التعامل مع الإنسان الثرثار من وجهة نظرك :-

الثرثار و الفضولي= تغيير الموضوع

أشكرك يا كيت كات .. وخدلك بريك .. وتعالي تاني قولنا كل واحد من دول عملت معاه إية

منتظرين باقي الأعضاء ..

تم تعديل 16 أبريل 2010 بواسطة omda2006

[Damo]

السلام عليكم

احييك يا استاذ عماد على الموضوع الجميل ده.

انا اعتقد ان كلنا قابلنا ناس بالمواصفات دي في حياتنا. بالنسبالي طريقة تعاملي مع كل اللستة اللي فوق دي تقريبا هي هي. يا اما اتجاهلو يا اما اخدو على قد عقلو.

هبقى ارجع افصص واحد واحد بعد الغدا

[عماد حمدي]

السلام عليكم

احييك يا استاذ عماد على الموضوع الجميل ده.

انا اعتقد ان كلنا قابلنا ناس بالمواصفات دي في حياتنا. بالنسبالي طريقة تعاملي مع كل اللستة اللي فوق دي تقريبا هي هي. يا اما اتجاهلو يا اما اخدو على قد عقلو.

هبقى ارجع افصص واحد واحد بعد الغدا

مستنينك ومتتأخريش علينا ..

أنا بايت هنا النهاردة لأن عن نفسي فااااااااااااااشل في التعامل .. مع كل اللستة اللي فوق دي ..

تم تعديل 16 أبريل 2010 بواسطة omda2006

[لماضة مصرية جدا]

السلام عليكم و رحمة الله و بركاته

سؤال ناطط من دماغي....الا يا ولدي انت مش حاطط اي حاجة ايجابية ليه؟؟؟

طب ما هو برضه فيه الانسان الايجابي الطموح....المركز اوي في شغله.... اللي طول الوقت عمال يتحدي نفسه عشان يعمل حاجة جديدة...مش ده برضه يستحق مننا ان احنا نعرف نتعامل معاه ازاي....من غير ما نبقي كوبي منه......يعني من غير ما نقلده كده خبط لزق.....و ازاي نقرب منه عشان نتعلم من غير ما نقطع عليه حبل الافكار... دي وجهة نظري بس انا شايفة ان حل الكل الانماط اللي انت بتقول عليها انك تركز علي نفسك اكتر....و تبني نفسك اوي.....لانك كده بتزود قيمكت في المكان اللي انت فيه.....و مش هتلاقي وقت اصلا انك تحلل الكائنات الطفيلية اللي حواليك

بالنسبة للفصايل الستة اللي انت ذكرتهم خلينا ااقولك ان كلهم بيتواجدوا في بني آدم واحد.......واحد ماسك منصب هو مش قده....يعني القميص واسع عليه...فتلاقيه عمل ايه....راح مجند واحد مالوش لازمة في الحياة عشان يبقي العصفورة بتاعته.....و بككده يضمن انه يعرف المستخبي......مع ان المستخبي مش حكاية اصلا....بس هو مش قادر ينافس مهنيا الاخرين و حاسس دايما انهم مصدر تهديد ليه...و ده لانه حاسد و حاقد...

و لانه مش اد المكان اللي هو فيه تلاقيه بيتكلم كلام في الهجايص.... و مش فاهم حاجة....بس ايه بقي ثقة و هو بيتكلم يعني يحسسك انه قابل مثلا بوزان بتاع الخريطة العقلية ...و لا هو صغير كان بيشتغل كتف لكتف مع لجاردنر بتاع الذكاءات المتعددة

و التوليفة دي كفيلة جدا انها تستفز اي حد فاهم.......

و بناء عليه

الاستراتيجية.....لو هو منصبه اعلي منك:

1- اتفرج بقي علي اد ما تقدر........يعني بلاش تطلعه حمار....و حاول متعرضشي وجهة نظرك......و خصوصالما تبقي متفوق عليه مهنيا.......يعني ابقي اقعد انت و وهو كده ع جنب و حاول تباصيله الافكار اللي نفسك تتنفذ....و تاني يوم في الجتماع طبعا هتلاقي كل افكارك بتتقال بس علي لسانه هو.....معلشي استحمل

2- اتعود ان مش كل افكارك تتقال بصوت عالي...و دايما احتفظ بفكرة او اتنيني بنسميهم كده....افكار آخر الصفحة...يعني م الاخر....و دول تطلعهم في الوقت المناسب و قدام الشخص المناسب.

3- الشخص العصفورة ده شخص اليف جدا...اتعود انك توصل من خلاله الرسايل اللي انت عايزها توصل بطريقة غير مباشرة.....و اعمل نفسك دايما مش فاهم... او مش عارف......دور العبيط يكسب اوي

4- الشخص العصفورة برضه......اوعي تتجاهله... ليه بقي..... لانك لما تخليه قدام عينيك هتقدر تسيطر علي هو بيقول ايه و مبيقولشي ايه...لما تتجاهله هيقول عنك حاجات من وراك و هتلاقي نفسك دايما في موقف الدفاع.... لا يا حلو... انت خليه كده زي كورة اليويو تتنطط فوق لتحت بس الخيط في ايدك.

دول حبة كده علي ما قوسوم

و ان شاء الله ارجع تاني

بس يا ولدي

نصيحة

اتكلم ااقل...اسمع اكتر......اتفرج من بعيد

صدقني هتستمع جدا...حتي لو حواليك سيرك البني آدمين ده

بس خلاص

فوتك بعافية

[ابو حودة]

عماد

الدنيا مش شغل وبس وما تحاولش تخلي تجربتك في الشغل تلقي بظلالها على حياتك كلها

بمعنى ان دايما يكون عندك بدائل لان الانسان بدون بدائل هيكون عنده مشاكل كتير

لانه عنده احتمالين فقط هما النجاح او الفشل في هذا الهدف

ليه انا بقول كده لان كل الشخصيات اللي انت قلت عليها دي موجودة في جو العمل فقط تقريبا

يعني انت عندك محيط العائلة ومحيط جيرانك ومحيط اصحابك وهكذا

يمكن تقول ان ده نوع من فلسفة الامور بشكل زائد لكن ده مش حقيقي اوعى تخلي حاجة واحدة تطغى على

الحاجات التانية في الحياة والجماعة الاجانب او الغربيين ناجحين لانهم عايشين حياتهم زي شغلهم

انا مثلا كنت في شركة مالتي ناشونال محدش كان عنده لاب توب كله عنده دسك توب والسبب انه بمجرد انتهاء العمل

خلاص بح مفيش حاجة اسمها شغل من البيت ويوم الويك اند تلاقيهم بيدوروا على افضل طريقة لاستغلال اليوم

مش احنا ممكن نتصل ببعض في التليفون نناقش مشاكل حصلت في الشغل

اسف لو كنت غيرت الموضوع

[عماد حمدي]

السلام عليكم و رحمة الله و بركاته

سؤال ناطط من دماغي....الا يا ولدي انت مش حاطط اي حاجة ايجابية ليه؟؟؟

أهلا ً يا لماضة ..

مهو أنا قولت ان فية أنواع تانية إيجابية وكويسة جدا ً .. بس دول مفيش مشكلة في التعامل معاهم لأنهم أصلا ً كويسين .. بس الأنواع اللي فوق دي من وجهة نظري من اصعب الأشخاص اللي ممكن الواحد يتعامل معاها لذلك وجب تسليط الضوء والتركيز عليها أكتر

هناك أنواع آخري كثيرة .. كويسة جدا ً .. لكن الإنسان صاحب الصفات الحميدة

والطباع الحسن لا توجد مشكلة في التعامل معه لكن هذه الأنواع الشائعه والصعبة ..

إذا أدرت أن تطرح علينا نوع آخر وكيف تعاملت معه .. تفضل ..

حلو أوي تفسيرك للأنماط الخاصة بالشخصيات دي .. في شكل حدوتة كدة أحيكي عليها

الشخص العصفورة دا خنقني بشكل رهيب ..

مهو حتي لو الواحد كان في حالة زي ما قالت رضوي .. دا من النوع اللي بيألف كلام لانه مش قادر يمسك عليكي حاجة .. فتلاقيه مش عارف يأذيكي إزاي .. أو حس أنه مبقاش لية دور فعال ( في الزقزقة ) يقوم يألف قصص وحكايات .. حتي التجاهل والكلام معاه مش هيجيب نتيجة ..

فية ناس إستشرتهم وفتحت معاهم الموضوع دا قالوا ان هناك حلين .. هما الآتي ودا من واقع تجربة حقيقة وقعت ..

1- طبيعي انه هيقوم بدروة ويفتن عليك وينقل أخبار حصلت أو محصلتش ..

ستفاجأ بردة الفعل من الشخص المنقول له الأخبار .. فسيادتك هتعمل اية ..

قال تقف في وسط الشركة وقدام كل الموظفين وتجيب المنقول له وتجيب العصفورة ..

وتمسك العصفورة تنتف ريشها .. ويبقي ع الملأ .. ويكون بأسلوب محترم ومهذب لكي تحافظ ع شخصيتك وإحترامك أمام زملائك .

بعد تنتيف الريش اللي حصل .. فإنها لا تعاود الطيّران والتحليق مرة أخري ..

كذلك ستفضح أمرة أمام الكل .. مع أنه معلوم لدي شركتك كلها انه العصفورة ولكن .. في السر ..

لكن الآن سيبقي مكشوفا ً وسيعيش بعد ذلك وحيدا ً والمنقول له الأخبار لم يثق فيه مرة أخري ..

وربما تكون هذه الجرئة التي تقوم بها ستفك عقدة بعض الألسنة ويفاجيء بهجوم شرس من باقي الزملاء ..

ويقعدلة يومين في الشركة .. ومش هيطيق نفسة من تعامل الناس معاه والرخامة وكدة .. ويمشي .. نزهقة في عيشتة ياعني

2- أنا الواحد يحاول يتقرب منة أكتر ويصاحبة ويتقي شرة .. وبرده التعامل معاه يكون بحذر

دا من واقع تجربة ناس فتحت معاهم الموضوع دا ..

متابع ,,

تم تعديل 16 أبريل 2010 بواسطة omda2006

[عماد حمدي]

أبو حوده

الأول نشكرك ع مداخلتك ومشاركتك معانا .. لكن أيا كان سواء في العمل أو مع الجيران أو حتي الأصدقاء نفسهم ..

في أي حته هتقابل ولو نوع واحد بس من الأنواع دي ..

الناس مش كلهم حلوين .. ولا كلهم وحشين

الحلو والكويس والشخص الإيجابي .. التعامل معه سيكون سلس وبه شيء من المرونة وهتلاقي ريتم الحياه سريع

لكن تكمن المشكلة مع الأنواع والشخصيات الآخري .. وانا لا أقصد العمل بحد ذاته ,,

وبالطبع نحن نسير ع مبدأ

إفتراض حسن النيّه لحين إثبات العكس ..

الشخص السّوي والإيجابي .. بيتعامل مع أي شخص يقابلة أول مرة بحسّن نية .. إذا كان الشخص الأخر كويس ..

فلنكمل مسيرة ما بدأناه من حسّن نيه وطيبة معاملة .. لكن إذا ظهر العكس ..

فيجب أن تكون لديك الأسلحة المناسبة لا أقصد الهجوم ولكني أقصد الدفاع ..

في كيفية التعامل معه حتي لا يؤذيك سواء كان في عملك أو كان مع أحد جيرانك أو أصدقائك ..

وكيف تكون دبلوماسي في التعامل مع هؤلاء .. كل هذا يحتاج إلي فن وتكتيك مناسب ..

ياريت تكون وجهة نظري وصلت لسيادتك واشكرك مرة تانية

[mekkawy]

عمدة يا ثقافة

ايه يا باشا المواضيع الجامدة طول الوقت دي ... ربنا يوفقك و إلى الامام ....

بأحجز مكان بس عشان عارف ان الموضوع ده هيتزحم ... لأني خلاص فاصل فاصل حاليا ... ألا أنا ما حكتلكوش هنا حكاية الراجل البني الللي حكيتها في موضوع النصائح العاتشفية ؟

أصل أنا يا سيدي عاوز أقوم أنام عشان هأصحى بدري أكوي البدلة البني و القميص البني و أجهز الكرافتة البني و ألمع الجزمة البني أم خرام مش السادة ... عشان أجهز النضارة البني و ألبس الساعة البني .... عارف كل ده ليه ؟؟؟ (انظر اسفل الصفحة)

مكاوى ... الراجل البني يحب البني

[kitkat]

ههههههههه انا واخد بريك من زمان ووصلت معايا لمرحلة الادمان دلوقتي :wub:

شوف اانا افتكرت نوعين تانيين

اولا 8- الإنســـان الجاهل مدّعي المعرفة ( الفتيت واللي شايف نفسة زويل )

ده بقا انا اتعرضتله كتير هو غالبا بيبقي طيب جدااااااااا وعايز يثبت نفسه باي شكل ولو سالته في موضوع هو مايعرفوش ممكن يتهرب من الرد باي شكل ويروح يسأل ويرد عليك بعدها بيوم ولا اتنين

حل الشخصية دي من وجهة نظري انك تحسسه انه عالم (جاهل لا يعلم أنه جاهل، فذاك أو سفيه فاتركوه، وهذا الجهل هو الجهل المركب ) وفي نفس الوقت تفوقه كل شوية ببصلاية قصدي سؤال جامد في العضل علشان تنبهه لخطورة ادعاء العلم

بس خلي بالك لازم تفضل تنفخه اوي قبل السؤال مباشرة هههههههههه

اما الصنف الذي قابلته فللأسف هو نفسي : انا يا اخي الفاضل لغاية اول امبارح كنت فاكر ان فيه ناحية معينة انا مقطعها علم

للاسف رحت مقابلة عمل واختلفت مع من قابلني في نقطتين فاضطر الرجل مشكورا ان يكيلني بسؤالين 3 في العضل wst::)

بصراحة نزلت وانا اقول : وفوق كل ذي علم عليم .....

الصنف التاني المجادل : ياسيدي عليه عسل اوي ههههههههه عايز يجادل وخلاص وعلي غير علم

ودي بتبان اكتر مع الستات : عندهم قدرة ورغبة في الجدال ياسيدي ياسيدي المهم تجادل وخلاص

بس طبعا لازم نراعي غرور الانثي وتحسسها ان فعلا عندها وجهة نظر قابلة للتطبيق :happy:

شكرا علي الموضوع الممتع ده وصبرك عليا هاحكيلك مواقف !!!!

تم تعديل 16 أبريل 2010 بواسطة kitkat

[عماد حمدي]

الصنف التاني المجادل : ياسيدي عليه عسل اوي ههههههههه عايز يجادل وخلاص وعلي غير علم

ودي بتبان اكتر مع الستات : عندهم قدرة ورغبة في الجدال ياسيدي ياسيدي المهم تجادل وخلاص

بس طبعا لازم نراعي غرور الانثي وتحسسها ان فعلا عندها وجهة نظر قابلة للتطبيق :happy:

:wub: يا خراااااااااااااااابي هتقلبلنا الدنيا دلوقتي لو أي أنثي دخلت وشافت ردك دا ..

هيطلع عينك wst:: هههههههههههه انته اللي اتسحبت من لسانك .. استلقي وعدك بقا من اللي هيجرالك منهم

انا بايت النهاردة هنا .. ومتابع ,,

تم تعديل 16 أبريل 2010 بواسطة omda2006

[Damo]

1- الإنســان العصفـــورة po::

زاي ما حضرتك قولت دول موجودين في كل حتة!!! انا مالي بقى؟! انا مش انسانة غامضة و سلوكي مش مشكوك فيه. و لو راح قال حاجة لاي حد اكيد الحد ده عارف برضو انو غاوي كده..ولا ايه؟و زاي ما هو غاوي كده لو في حد غاوي يصدقو الاتنين ميلزمونيش!!

2- الإنســان سيء النيه ( الشكـّاك )

كان عندي مدرس كده في نيو زيلاند. غاوي يشكك في اللي رايح و اللي جاي. بس انا كان عندي مهارة الكبس..ايوا مهارة..اول مرة تسمع عنها! اولا مكونتش بروحلو الا في الشديد القوي و ببقى عندي فكرة عن هو ممكن يقاوح في ايه. و لما يقاوح في حاجة متوقعة او لاء بفضل انا باااارده و ارد عليه بمنتهى الادب و انا عارفه ان الحق معايا. و كل رة كنت انا اللي بكسب المعركة.

3- الإنســـان الحاقد وعدو النجاح ( دائم الحقد عليك ومش بيحب يشوفك ناجح أبدا ً )

خلاص مش هيشوفني بنجح..مش لازم اقوله على كل كبيرة و صغيرة. مش لازم يعرف كل ما انجح. لو عرف بالصدفة..هعملو ايه يعني بدل ما يقعد ياكل في نفسو ما يروح يشوفلو حاجة يفلح فيها هو كمان

4- الإنســـان الحاسد " أعوذ بالله "

برضو مش لازم اقول كل حاجة لاي حد. و انا مقتنعة ان لو ايماني قوي مش هتأثر بأي حاجة

5- الإنســـان المستفّز ( دايما ً أسلوبة مستفزّ ويخليك تشيط وتولع )

نفس المدرس اللي نمرة (٢). ردة فعلي البرووووود و انا عارفه انو بيعمل كده بقصد.

6- الإنســــان البااااارد والبطيء في عملة وتعاملة

وقع حظي في اول سيميستر في الجامعة كانت ال lab partner بتعتي كده. بطيئة و مبتحضرش قبل اللاب و افضل انا شايله الشغل كلو لوحدي و هي قعده تتفرج. و في كذا مرة الوقت يزنق مني في الاخر و هي قعده مدلدله رجليها بمنتهى البرود ولا حتى تعرض مساعده اللي هي مفروض يكون عندها دم و واقفة تعمل اللي وراها اساسا. بعد كده بقيت اديلها اوردر تعمل ايه بالظبط بدون زعيق ولا خناق بس بنبرة حادة. بقت تسمع الكلام وبعدين في مرة بعد اللاب و احنا ماشيين قولتلها لو سمحتي حضري للاب الجاي عشان غير هضطر اطلب مساعدة حد من المشرفين علينا. و ده كان تحذير غير مباشر اني هشتكيها لو مش اتعدلت. و فعلا مفيش مرة بعد كده جات اللاب بالبركة زاي قبل كده.

7- الإنســان العداوني أو العصبي ( اللي بيشاكل دبّان وشه ودايما ً عصبي )

اللي استقبلنا في مكان خدمة المهاجرين كان كده. عصبي جدااااا. بيتنرفز بشكل كوميدييييي. بصراحة كنت مش بقدر امسك نفسي قدامه. كل ما اجي اكلمو افطس من الضحك و هو يتعصب عليا اكتر. مش عارفه مكنتش بعاملو بطريقة معينه..يمكن كنت بخدو على قد عقلو. بس كنت علطول بضحك في وشو.

8- الإنســـان الجاهل مدّعي المعرفة ( الفتيت واللي شايف نفسة زويل ) wst::

اسييييبو يخلص كلامي للاخر بعدين اقول اللي عندي. غالبا الحوار بيخلص هنا. و لو هو مش مقتنع برضو خلاص هسيبو!! مش هتحايل عليه عشان حضرتو مصمم على حاجة غلط..مش انا اللي هخسر

9- الإنســـان المتعالي والمتكبّر ( دائم التكّبر بالمصطلح الشبابي كدة " رسّيــــم " art:) )

نفس مدرس نمرة (٢) و (٥). نفس طريقة التعامل.

10- الإنســـان الثرثار ( لك لك ع طول مبيفصلش زي الثلاجة )

اوختشيييي حبيبتشييييييي :wub: . من واقع خبراتي :happy: الناس اللي غاوية لوك لوك دي..مش محتاجة حد يسمعها. وقت اما ابقى عندي دماغ اسمعها بسمعها. وقت لما ابقى معنديش دماغ...مبسمعهاش. معظم الوقت بسيب اللي في ايدي و اسمعها عشان بتصعب عليا (اختي الصغيرة بقى). لما بسرح منها بتفضل تتكلم برضو مش بتفرق معاها.

و كان برضو عندي وحده صاحبتي كده في نيوزيلاند. كنا قريبين من بعض جدا جدا. ده كان عيب فيها برضو انها بتتكلم كتير قوي. بس كنت بستحملها عشان هي ساعدتني كتير و وقفت معايا في اوقات صعبة و كنت بحس ان اقل حاجة اقدر اعملها عشان اشكرها او اعبر عن تقديري للي هي عملتو اني استحمل العيوب الهايفه دي.

لو بقى حد مش بستحملو و هو عارف و عندو جرأة انو برضو يقعد يرغي كده انا كمان هبقى عندي جرأة اقطع كلامو و اقلب الحوار و استأذن و امشي

تحياتي

دامو

[Damo]

الصنف التاني المجادل : ياسيدي عليه عسل اوي ههههههههه عايز يجادل وخلاص وعلي غير علم

ودي بتبان اكتر مع الستات : عندهم قدرة ورغبة في الجدال ياسيدي ياسيدي المهم تجادل وخلاص

بس طبعا لازم نراعي غرور الانثي وتحسسها ان فعلا عندها وجهة نظر قابلة للتطبيق

بص بقى يا استاذ كيت كات...التصرف ده بينرفزني بينرفزني بينرفزنيييي. كان برضو معايا واحد كده في الجامعة في فظل الالماني. لما نختلف على حاجة تتقال ازاي كان يسكت. و بعدين انده البروفيسير اسا;ه و اطلع غلطانه و اكتشف انو عارف و سايبني..طب ليه! ما كذا مرة هو يثبت وجهة نظرو و اقتنع و اقوله ايوه انت صح و العكس صحيح. لزمتها ايه بقى المرات اللي بيقرر يخدني على قد عقلي!!! بتنرفزززززز :happy:

[عماد حمدي]

DAMO

شكرا ً ع مرورك .. وتابعينا

الموضوع فعلاً مهم جدا جدا مش علشان انا اللي عاملة لا علشان الناس عديمة الخبرة تستفاد منه من واقع تجارب حقيقة وليست فلسفية ..

من خلال بحثي ع النت في كيفية التعامل مع الناس وبمجرد الضغط ع زر إبحث ..

تفاجئت بالكثير من الموضوعات والكتب والمراجع وكلها تتكلم عن هذا الموضوع ..

لكن عندما قرآت بعضها .. شعرت أننا فعلاً عرب مش زي الأجانب زي ما وضح أبو حودة ..

لقيتهم بيعرضوا مشاكل ومواقف فلسفية جدا ً جدا ً جدا ً وصعب أوي انها تكون في مجتمعنا ..

وكملت بحث لقيت برضة أغلب المنتديات بتحط مواقف ( بتحصل لواحد أجنبي آه والله ) ويقول خصائص الشخصية دي

ويقول حلها ..

DAMO مثلا ً ردت عن كيفية تعاملها مع الشخص ( 1 و 2 و 3 ) من واقع تجربة خارج نطاق العمل ..

طيب لو كانوا دول معاكي في العمل هتعملي اية .. اكيد هتتعامل بطريقة تانية .. بالرغم من انها نفس الشخصية وليكن (2)

خاصة إنها قالت ( الشخص الحاقد وعدو النجاح ) هيعرف منين هوه لازم احكيلة ع كل حاجة .. طيب هوه موجود معاكي في عملك

وشايف كل اللي بيحصلك من ترقيات .. مكافأت .. الخ

فبتالي فهو شخصية مفروضة عليكي وهكذا رقم ( 1 و 2 ) ولابد من أن تأخذي حذرك جيدا ً ..

أعتقد دلوقتي إن الموقف هوه اللي بيحدد طريقة التعامل مع الشخص دا ( حتي ولو كان شخصية واحده )

الموقف والبيئة المحيطة هي اللي تحدد ..

شكرا DAMO مرة تانية .. ومنتظرين مشاركتك معانا مرة تانية ,,,

أنا بايت هنا :happy:

متابع ,,

تم تعديل 17 أبريل 2010 بواسطة omda2006

[kitkat]

الصنف التاني المجادل : art:)

يا خراااااااااااااااابي هتقلبلنا الدنيا دلوقتي لو أي أنثي دخلت وشافت ردك دا ..

هيطلع عينك هههههههههههه انته اللي اتسحبت من لسانك .. استلقي وعدك بقا من اللي هيجرالك منهم

أنا الي جبت ده كله لنفسي هههههههههههه كل مرة اتسحب من لساني واقعد ادور علي خاصية التعديل :))))))

لا وهما مايتوصوش

الصنف التاني المجادل : ياسيدي عليه عسل اوي ههههههههه عايز يجادل وخلاص وعلي غير علم

ودي بتبان اكتر مع الستات : عندهم قدرة ورغبة في الجدال ياسيدي ياسيدي المهم تجادل وخلاص

بس طبعا لازم نراعي غرور الانثي وتحسسها ان فعلا عندها وجهة نظر قابلة للتطبيق po::

بص بقى يا استاذ كيت كات...التصرف ده بينرفزني بينرفزني بينرفزنيييي. كان برضو معايا واحد كده في الجامعة في فظل الالماني. لما نختلف على حاجة تتقال ازاي كان يسكت. و بعدين انده البروفيسير اسا;ه و اطلع غلطانه و اكتشف انو عارف و سايبني..طب ليه! ما كذا مرة هو يثبت وجهة نظرو و اقتنع و اقوله ايوه انت صح و العكس صحيح. لزمتها ايه بقى المرات اللي بيقرر يخدني على قد عقلي!!! بتنرفزززززز md2:

والله انتي نموذج للأنثي العاقلة لكن الي قابلتهم غير حضرتك مش كده وخصوصا في الشغل

لما زميلة في الشغل (سكرتيرة) أقلها تبعت فاكس معين او جواب او او وتقلي ليه ؟ اصل احسن نعمل كذا وكلامها غلط خالص احاول افهمها مش عايزة تقتنع عايزة تقاوح وخلاص بس بتبقي لطيفة خالص والله مسلية

المهم انا بقا باعمل نفسي بافكر في كلامها وارجعلها بوعد ان المرة الجاية هاننفذ فكرتها wst::

زميلك بتاع فصل الالماني ده سيس (ندل يعني ) wst:: ولا تنرفزي نفسك خالص شكله بتاع مقالب انا ماكنتش باعمل كده لو فيه طرف تالت :happy:

مع العلم ان الست لو مش بتجادل تبقي مملة اوي بصراحة الراجل يحس انه عايش مع واحد صاحبه :wub:

[الباشمهندس ياسر]

الصنف التاني المجادل : ياسيدي عليه عسل اوي ههههههههه عايز يجادل وخلاص وعلي غير علم

ودي بتبان اكتر مع الستات : عندهم قدرة ورغبة في الجدال ياسيدي ياسيدي المهم تجادل وخلاص

بس طبعا لازم نراعي غرور الانثي وتحسسها ان فعلا عندها وجهة نظر قابلة للتطبيق

طب قلبي معاك

و ربنا يستر علي قلبي عندك م الدم اللي هيملي المكان بعد شويه

[kitkat]

طب قلبي معاك

و ربنا يستر علي قلبي عندك م الدم اللي هيملي المكان بعد شويه

مفيش طريقة تخليني اعدل المشاركة دي ؟

ههههههههههههه والله انا هأدعي ساعة الفجر دي ربنا ينجيني من العذاب

تعاطفك لوحده مش كفاية يا باشمهندس ياسر اعمل اي حاجة :happy:

تم تعديل 17 أبريل 2010 بواسطة kitkat

[الباشمهندس ياسر]

تعاطفك لوحده مش كفاية يا باشمهندس ياسر اعمل اي حاجة

لسه جاي من عند الحلاق

:happy: