إبنتى 8 سنوات و "خالف تعرف" ( احترت واحتار دليلى)

[joo]

كيف اتعامل مع ابنتى البالغة من العمر 8 سنوات

فهى تحس بشخصيتها وبنفسها واصبحت تطبق مثل

( خالف تعرف )

[se_ Elsyed]

أطفال كتير جداً يا جو لديهم نفس الشخصية

إبني عُمر أكبر من بنتك بسنه .. لكن دماغه جزمه قديمة

لكن أنا اتعامل معه بطريقتين مختلفتين :

1- هناك مواقف لابد للسلطة الأبوية أن تكون موجودة ولا مجال لكي ينفذ هو رأيه .. لكن الإقناع مطلوب إلى حد كبير هنا

2- هناك مواقف اخرى لابد ان تُشعر فيها الطفل بشخصيته المستقلة .... ودي هاتعاني منها كلما أقتربت أبنتك من مرحلة المراهقة ...

[kitkat]

خلي بالك ياجو انت لسه كنت بتتكلم في موضوع الجيل الموكوس

خلي بالك الاطفال دلوقتي مابقوش اطفال وتضحك عليهم بشوكولاتاية ولا وعد زائف

عموما اتبع سياسة الثواب والعقاب معاها من غير ضرب طبعا العقاب حرمان من فسحة او تنزلوا كلكم وتشتروا اي حاجة لكن هي لا

ربنا يخلي يا مان :happy:

[joo]

سدئونى انا ساعات بحس انى مشلول مش عارف اتصرف ودائما بخاف من بكرة

يعنى لما تكبر تقول انا كنت بكرة بابا علشان كان بيحرمنى او بيعاقبنى اوبيضربنى او استهتر بمشاعرى

زى ما دائما كل واحد فينا جواة لحظة الم من ابوة او امة ومش عاوز يكررها مع اولادة

[جنه]

كل فتره فى مرحلة الطفوله ليها صفات خاصه بيها اهم حاجه نعرف ازاي نتعامل معاها بحذر علشان تعدي على خير.

سن 7-8-9 سنين هو سن التمسك بالراى و العناد لمجرد ان الطفل يحس ان عنده شخصيه وانه مش اى كلام.

السن ده عايز مسايسه لاخر نفس طبعا مع وجود حزم و صرامه في بعض المواقف و الاحيان.

انا مثلا لما كانت بنتي فى الفتره دي كانت دائما عايزه تعمل عكس اللى المفروض يتعمل (وانا كنت لسه صغيره وما عنديش خبره فى الحته دي) فكنت باصمم انها تعمل الصح باصرار وهي تعند فللاسف الشديد فضلت فيها صفة العند و التحليق خارج السرب الى يومنا هذا

(دخلت الان مرحلة المراهقه 15 سنه وما زالت خالف تعرف- الله المستعان).

في بنتي التانيه استفدت من التجربه اللى فاتت و كنت بسايسها لابعد الحدود و اخليها تعمل الصح عن اقتناع منها فعدت الفتره دي على خير الحمد لله.

انا بدرس اطفال في السن ده 7-8 سنين , ودائما في الديسكشن سيشنز كل طفل بيتمسك برأيه باصرار و بيحاول يقنع اصحابه ان هو اللى صح طبعا انا بسمعهم من بعيد وبسايرهم و ابين لكل واحد ان رايه مهم جدا لحد منوصل لرأى يرضي غرور كل طفل(اه يا راسي).

الخلاصه مسايسه مع حزم.

[مصرية اوى]

تصرفات الابناء فى المرحلة دى بتكون نابعة من رد فعلهم على طريقة معاملتنا لهم

يعنى لو قلنا للبنت مثلا انتى دايما بتتصرفى بطريقة خالف تعرف هتحط دا فى دماغها وكمان بيكون هدف لها ان اى صرف يكون مخالف عشان تتعرف

لو قلنا دماغك ناشفة اوى هنلاقيها حى لو هى عاوزة توافق على الطلب بدون جدال هتجادل لانها عارفة ان دا الخط اللى مشيتوها فيه

انا شايفة انى لما تقول للبنت انها عكس كده وتكرر دا لها هتتغير

لأن دى مرحلة عمرية انتقالية بتتكون لسة فيها شخصيتها وكلامنا بيؤثر فيها جدا .

[joo]

طيب هى دلوئتى جت من المدرسة ومامتا عمالة تقول لها اقلعى هدومك وعلقيها

فمسمعتش الكلام ورمتها على الارض 00 ولبست هدوم شتوى

مامتها قالت لها البسى صيفى الدنيا حر جدا فبكت واصرت انها متقلعهاش

مامتها صممت وزعئت ولبستها الهدوم الصيفى وهى الان بتنفخ وزعلانة

طيب العند دة اتصرف معاة ازاى وازاى مخليهاش متنرفزة لهذا الحد

[مصرية اوى]

انا شايفة ان الشخصية العنيدة مش لازم نصمم معاها على فعل الحاجة

انما نعرفها اننا مش حابين تصرفها دا

وبعدين لو ما نفذت كلامنا نهملها ونحسسها اننا رافضين تصرفاتها بس بطريقة سلبية يعنى من غير زعيق وعصبية ممكن نخاصمها ونقلل كلامنا فترة معاها

هى نفسها بعد كده هتعيد نظرها فى تصرفاتها بعد تكرار دا منكم لانها مش هتكون مبسوطة من اهمالكم لها .

[لونا]

أنا كنت رديت عليك يا جو في موضوع بئر الأسرار .. ياريت تجرب الحاجات اللي قلت لك عليها

طيب هى دلوئتى جت من المدرسة ومامتا عمالة تقول لها اقلعى هدومك وعلقيها

فمسمعتش الكلام ورمتها على الارض 00 ولبست هدوم شتوى

مامتها قالت لها البسى صيفى الدنيا حر جدا فبكت واصرت انها متقلعهاش

مامتها صممت وزعئت ولبستها الهدوم الصيفى وهى الان بتنفخ وزعلانة

طيب العند دة اتصرف معاة ازاى وازاى مخليهاش متنرفزة لهذا الحد

بالنسبة للموقف اللي كتبته ده

1) لازم طبعاً البنت تدخل من المدرسة تقلع هدومها و تعلقها و تتشطف .. ده لازم

2) لازم تشيل الملابس الملقاة على الأرض ..ده لازم

3) لبست ملابس شتوية .. مامتها تنصحها إن اللبس ده حيضايقك وافقت كان بها

رفضت هي حرة لأن ده مش حيؤذي حد غيرها

لكن في (1) و (2) الأذى حيوصل لغيرها.. فلازم نصر على إنها تسمع الكلام

كمان الطفل العنيد لازم نعدي له شوية .. يعني مش كل موقف نعلق عليه

و خاصة لو حاجة مش مهمة أوي .. أو إن حصل أكثر من صدام مع الطفل العنيد في اليوم نفسه

فطبعاً لو إتكرر الصدام بيه دوناً عن إخواته .. حيشعر إنه مضطهد ..

و ربنا يهدي أولادنا كلنا

[joo]

وهى الان اصبحت تزعأ وتصرخ بصوت عالى مستفز لما تدايئ من حاجة

وانا الصوت العالى بينرفزنى وكل مرة اقول لها تكلمى بصوت واطى شوية وبلاش نرفزة

تسبنى وتمشى هى بتزعأ وتقول ( اية الارف دة حاجة تطهأ ) وتنفخ

بيبأ نفسى اقوم اضربها بس بمسك نفسى