ان لم يكن هذا عبث........فماذا يكون ؟؟؟؟؟؟

[Salwa]

تبوير العقل‏..‏ والأرض‏!‏

أستأذن قارئ بريد الأهرام المريض بالقلب أو ضغط الدم أو السكر ألا يقرأ كلمتي حتي لا تنتقل اليه عدوي ما أصابني من ضيق النفس ولسعة الغضب ولوثة العقل بعدما قرأت بأهرام الجمعة‏26‏ مارس خبرين موجعين أقرب ما يكونان إلي التهريج‏.‏

أما الأول‏:‏ بصفحة الرياضة ولأن مصر جف لبنها‏,‏ عقيم من الكفاءات‏..‏ تعاقد مجلس ادارة الاتحاد المصري لكرة القدم مع مدير فني مستورد وهو خواجه ايطالي قادم لنا من بلاد البيتسا لتدريب منتخب مصر مقابل مرتب شهري قدره‏40‏ ألف دولار بالإضافة إلي مسكن‏(‏ طبعا بالمعادي‏)‏ وسيارة وزيارات متابعة اللاعبين داخل وخارج مصر ليصل دخله الشهري نحو‏60‏ ألف دولار‏!!‏

وبحسبة بسيطة إذا افترضنا أن الدولار يساوي‏6‏ جنيهات مصرية فيكون دخله الشهري بالتمام والكمال هو‏360‏ ألف لحلوح مصري من اللحم الحي في‏30‏ يوما بواقع‏12‏ ألف جنيه يوميا بما فيها الجمع والإجازات الرسمية والويك اند بتاع سيادته‏..‏

هذا المرتب كم يساوي بلغة الأرقام لمحدودي الدخل ومهدودي الحيل ؟‏!‏ اضرب‏360‏ ألفا‏*20‏ رغيفا حافا بواقع جنيه تكون المحصلة أن مرتب سيادته في الشهر الواحد يساوي‏7‏ ملايين وربع المليون رغيف حاف بدون غموس من القمح المدعم والمستورد بالعملة الصعبة‏.‏

وأما الخبر الثاني فهو‏:25‏ فدان أرض زراعية داخل كردون المدينة بمدينة دمنهور مزروعة بالقمح ومؤجرة للفلاحين تم طردهم منها ويجري تبويرها عيني عينك تحت سمع وبصر أجهزة الدولة لإقامة استاد رياضي وملعب كرة وسط الأرض الزراعية رغم وجود الظهير الصحراوي لمحافظة البحيرة والذي يستوعب‏100‏ قرية اوليمبية لو أرادت‏..‏ كما أقامت كوبري عملاقا تكلف‏90‏ مليون جنيه قام علي جثة‏100‏ فدان أراض زراعية تم تبويرها بإغراقها بالماء لاستكمال وإنشاء معهد للخدمة الاجتماعية‏..‏ يتم هذا في وقت نحن أحوج ما نكون فيه لسنبلة قمح واحدة حتي أصبح بوار العقل وتبوير الأرض وجهين لعملة واحدة اسمها الخراب

أمير طلب

[se_ Elsyed]

..‏ تعاقد مجلس ادارة الاتحاد المصري لكرة القدم مع مدير فني مستورد وهو خواجه ايطالي قادم لنا من بلاد البيتسا لتدريب منتخب مصر مقابل مرتب شهري قدره‏40‏ ألف دولار بالإضافة إلي مسكن‏(‏ طبعا بالمعادي‏)‏ وسيارة وزيارات متابعة اللاعبين داخل وخارج مصر ليصل دخله الشهري نحو‏60‏ ألف دولار‏!!‏

وبحسبة بسيطة إذا افترضنا أن الدولار يساوي‏6‏ جنيهات مصرية فيكون دخله الشهري بالتمام والكمال هو‏360‏ ألف لحلوح مصري من اللحم الحي في‏30‏ يوما بواقع‏12‏ ألف جنيه يوميا بما فيها الجمع والإجازات الرسمية والويك اند بتاع سيادته‏..‏

هذا المرتب كم يساوي بلغة الأرقام لمحدودي الدخل ومهدودي الحيل ؟‏!‏ اضرب‏360‏ ألفا‏*20‏ رغيفا حافا بواقع جنيه تكون المحصلة أن مرتب سيادته في الشهر الواحد يساوي‏7‏ ملايين وربع المليون رغيف حاف بدون غموس من القمح المدعم والمستورد بالعملة الصعبة‏.‏

لأ ده كلام مش صحيح بالمرة .. لأن كرة القدم أصبحت صناعة لو أتقناها فسنجني من وراءها الملايين ... يكفي أننا لو إشتركنا في أي بطولية دولية رسمية بنفتح باب الإحتراف للاعبينا على مصراعيه الذي يصل سعرهم إلى ملايين الدولارات .. كما لا يجب أن ننسى بإن بمجرد الوصول لبطولة مثل كأس العالم فإن كل دولة مشتركة يتم منحها مبلغ ليس بالقليل لمجرد الوصول ... ده حتى لو أشتركنا في كأس الأمم الأفريقية فهذا دخل مش بطال في حد ذاته يبقى مابالنا لو كسبناها...

وبعدين ده لو تحقق المستحيل ونظمنا كأس العالم 2010 فبالورقة والقلم سيتحقق لمصر إيرادات لا تقل عن 10 مليار دولار وصافي ربح أكثر من 1.8 مليار دولار .. ده غير انها هاتبقى كسبانة بنية أساسية رياضية تكفينا 100 سنة قدام ...

فلا مانع من وجود مدرب أجنبي للمنتخب القومي الذي يمثل الدولة ويكفي ان نرى علم مصر يرتفع عالياً في أي بطولة .. ساعتها الواحد ما بيقدرش يتمالك نفسه وممكن يبكي من التأثر ...

بالله عليكم تسوى إيه لما في الأوليمبياد نسمع عن دولة فازت بميدالية ذهبية وهذه الدولة تسمى " سورينام " أو دولة أخرى تسمى " الرأس الأخضر " .... والله العظيم أنا كنت بأحسب الناس بتهزر وان دي مش أسامي دول أساساً .. وأتضح بعد كده أنها دول وإن عدد سكانهم مايجيش قد طابور جمعية كانت بتبيع فراخ وصلصة في مصر .

[Handicraft]

يا عم س س كرة إيه بس وبطيخ إيه هو الموضوع ناقص ممكن تقوللى فيه كام مدرب اجنبى دخلوا أرض المحروسة بزفة واتصرفت عليهم فلوس الدعم وفلوس رجال الأعمال والنتيجة إيه ممكن تقولى المرة اليتيمة اللى وصلنا فيها كاس العالم كان على ايد واحد بياخد بالمصرى وميحصلش عشر المبالغ التى تنفق على المدربين الأرزقية الذين تستوردهم مصر طبعا 1934 انا ما اعرفش هل كان فيه اصلا مدرب ولا كانوا لعيبة متعاونه.

يا سيدى المبالغ التى تنفق على مدرب لا تعاونه كفاءته وليس معه لاعبين خام توفيرها وانفاقها على تغذية الأطفال فى المدارس الرياضية ياكلوا لحمة يعنى وبروتين ويعلموهم كورة واذاى يبقوا فريق مش كل واحد ياخد الكورة عايز يدخل بيها جون الفريق المنافس لوحده ، هذه هى طريقة اعداد تلك الصناعة لتكون مصدر دخل كما تقول انت أما على الوضع الحالى فلا يصح اطلاقا ان ننفق على هؤلاء اللاعبين الكسر وقلتها كوره وحرق دم احسن.

استفسار المبلغ ده بينفق على مدرب لتدريب لاعبين ماذا لو وزع على المدرسين الذين يعملون بعد الضهر سائقين تاكسى وكاتبين فى محلات ونطالبهم فى النهاية باعداد اجيال متعلمة

[se_ Elsyed]

استفسار المبلغ ده بينفق على مدرب لتدريب لاعبين ماذا لو وزع على المدرسين الذين يعملون بعد الضهر سائقين تاكسى وكاتبين فى محلات ونطالبهم فى النهاية باعداد اجيال متعلمة

حاضر .. أنا هاحاول تقديم طلب إحاطة في مجلس الشعب بإننا نلغي لعبة كرة القدم ونسرح اللاعبين ونشتري لكل واحد تاكسي .. وكل إتنين لعيبه يشتغلوا علي نفس التاكس كل واحد وردية .. اما الإحتياطي فممكن يقفوا في الإشارات يبيعوا مناديل ورق او يسكوا فوط صفرا ويطوقوا القزازا في الإشارات ..

يا عم هاندي شوف الكاميرون والسنغال اللي دول نامية زيينا وأقل مننا بكثير .. شوف بيشار إليهم بالبنان إزاي عشان إتنين تلاتة لعيبه أفذاذ عندهم وشرفوا بلدهم وكانوا واجهه مشرفة لها .

[Handicraft]

سؤال يا ابو السيد:

هل انت مقتنع أن اللاعبين الموجودين على الساحة مؤهلين للوصول لكاس العالم؟ وهل انت مقتنع ان احسن مدرب فى العالم ممكن يعمل من الفسيخ شربات؟

الموضوع موضوع فكر قبل المهارة يعنى اللاعب المصرى عايز يجرى يبرتع فى الملعب لوحده وشوف عندك حازم امام، خالد بيبو ، ... ومتعدش واللاعب صاحب العقلية المتعاونه والمهارة المتوسطة تجده فى محترف فى الخارج مثل احمد حسن لأنه متعاون مع زملائه ويقدر فريق العمل.

طيب كيف يمكن اعداد جيل يحمل مثل هذا الفكر وصاحب مهارة ايضا عن طريق التعليم منذ الصغر واعتقد انه الطريق الوحيد للوصول للعالميه فى أى مجال التعليم وليس الهواية.

تخيل يا اخى حتى فى الكورة لازم نتعلم شوف بقى لو قلت الكلام ده لكابتن حكشة بتاع الأهلى أو الزمالك شوف حيقولك ايه.

"الفريق الوحيد الذى يميل ناحية فكر فريق العمل هو الأسماعيلى والغريب انه عندما ينتقل اللاعب منه لأى نادى آخر يتحول فكره إلى فكر الواحد ومن بعدى الطوفان"

ازاى الحال بقى

[فــيــروز]

يا عم هاندي شوف الكاميرون والسنغال اللي دول نامية زيينا وأقل مننا بكثير .. شوف بيشار إليهم بالبنان إزاي عشان إتنين تلاتة لعيبه أفذاذ عندهم وشرفوا بلدهم وكانوا واجهه مشرفة لها .

طيب سؤال

غير الواجهه المشرفه و البياض اللى يرد الروح ممكن نعرف المردود الاقتصادى لتفوق الكاميرون او نيجيريا فى كرة القدم؟ ممكن نقرا اى دراسه او نرى اى ارقام للقيمه التى سنحصل عليها مقابل ال 360 الف ملطوش اللى سيلهفهم المدرب كل شهر :)

[Sherief AbdelWahab]

المردود الاقتصادي يسهل استنتاجه يا فيروز..مش الاخوة دول بيحولوا عملة صعبة و لا أنا بيتهيألي؟..

كرة القدم تعد من مصادر الدخل القومي للبرازيل و الأرجنتين و الكاميرون و نيجيريا..

اهتمت تلك الدول بالعنصر البشري في لعبة رياضية ،فنالت نجاحا و شهرة دولية..ماذا فعلنا نحن بخريجي الجامعات لدينا؟..

المهزلة الحقيقية التي لم يكتب عنها مخلوق في مصر هي أن يتدخل عضو من مجلس الشعب لتخفيف عقوبة فرضت على ناد ما بسبب مباراة في كرة القدم!..مباراة المصري و الأهلي!

دة يبقى اسمه ايه دة؟...سباع البرمبة من نوام الشعب فشلوا في حماية مدينتهم الحرة من القوانين إياها و فقط استأسدوا في مباراة لكرة القدم و قبلها في حتة تمثال..و الصحافة المغوارة لا تكتب طبعا في تلك المواضيع..عملا بقول الشاعر: لا تنسوا البوووووري!

آه يا بلد!

خلص الكلام

[فــيــروز]

يمكن عشان لسه مافطرتش مش فاهمه مين الاخوه اللى بيحولوا عملات صعبه !! :)

ويا ريت كمان توضيح كيف تعد كرة القدم من مصادر الدخل القومى عشان معلوماتى الكرويه قرويه خالص mfb:

يا ريت توضح يا شريف وعلى راى عادل امام : وضح .. أبن .. أفصح :unsure:

[White heart]

Sherief AbdelWahab كتب:

كرة القدم تعد من مصادر الدخل القومي للبرازيل و الأرجنتين و الكاميرون و نيجيريا..

مش تفتكر يا عزيزى شريف ان كل الدول اللى انت ذكرتها، ما بتعانيش زينا من "انحصار" الرقعه الزراعية، و لا عندهم مشكله مياه؟ .... انا اللى " صدمنى " فعلا فى الموضوع دة هو الخبر التانى بالتأكيد:

25‏ فدان أرض زراعية داخل كردون المدينة بمدينة دمنهور مزروعة بالقمح ومؤجرة للفلاحين تم طردهم منها ويجري تبويرها عيني عينك تحت سمع وبصر أجهزة الدولة لإقامة استاد رياضي وملعب كرة وسط الأرض الزراعية رغم وجود الظهير الصحراوي لمحافظة البحيرة والذي يستوعب‏100‏ قرية اوليمبية لو أرادت‏..‏ كما أقامت كوبري عملاقا تكلف‏90‏ مليون جنيه قام علي جثة‏100‏ فدان أراض زراعية تم تبويرها بإغراقها بالماء لاستكمال وإنشاء معهد للخدمة الاجتماعية‏..‏ يتم هذا في وقت نحن أحوج ما نكون فيه لسنبلة قمح واحدة حتي أصبح بوار العقل وتبوير الأرض وجهين لعملة واحدة اسمها الخراب

ربما لأننى لا أميل الى رياضه كرة القدم، فينعكس هذا فى عدم اهتمامى كثيرا لا باللاعبين، و لا المدربين، على الرغم من تحفظى بالطبع على "هذا الاسراف و التبذير" المبالغ فيه .... و ربما كما تقول ان تلك الرياضه لها مردود أو عائد اقتصادى على بلدنا، و حسب ما فهمت يتمثل هذا المردود فى حاله اقامه المباريات، و البطولات الدوليه على أرضنا، و ما يصاحب ذلك من عوائد ماديه مختلفه و متنوعه، ابتداء من حركه تنشيط قطاعات السياحه المختلفه، و مرورا بالعائد المجزى من وراء المجال الأعلامى، و حتى الحركه التجاريه العامه ... الخ .. الخ ....، كل هذا جميل، و مبشر خير، و لكنى أتسائل هل يعقل أن يأتى هذا على حساب ( أى رقعه زراعيه )!!!!

مثل تلك البطولات أو المباريات، هل هى قائمه للأبد، أم على فترات موسميه و متباعدة نوعا ما؟؟ اليس من أهم عوامل جذب أى اتحاد دولى رياضى، لاختيار بلدنا لاقامه مثل تلك المباريات و غيرها، هو وجود بنيه تحتيه " معقولة، أو فلتقل مقبولة" ؟؟ كيف يتم توجيه الجزء الأكبر من " الميزانيه " أى كانت على اللاعبين، و المدربين، و اقامه الملاعب الرياضيه، على حساب ليس فقط باقى الخدمات ( الأساسيه ) اللازمه للمواطن من قبل أن تكون لازمه الى هذا النشاط، و " الصدمه " الكبرى المتمثله فى "استقطاع" ، و " تبوير " أى رقعه زراعيه ... مهما كانت مساحتها؟؟ ما هى أولياتنا؟؟ كرة القدم، أم القمح، و بتعبير أدق ( الأمن الغذائى )؟؟ معذره انا بصراحه، من وجهه نظرى ( و فى ظل الظروف الحالية التى تمر بها بلدنا ) أعتقد انه هناك أوليات اخرى يجب وضعها فى الحسبان، بل و على رأس القائمه.....

و لهذا أنا أيضا مندهش و مصدوم ككاتب مقال الأهرام ....

[Mohammad Abouzied]

شوية شوية يا جماعة اراضي الدلتا تقريبا بلعها العمران وتفتت لقطع صغيرة صعب اقامة نهضة زراعية عليها ولو تم تبويرها وبناء مؤسسات بدلها مثل الاستاد او معهد خدمة اجتماعية لن يوجد اي تأثير على الاقتصاد المصري لان اغلب هذه الارض طبلت خلاص

اي يعني وصل منسوب المياه فيها لدرجة التشبع واصبح الزراعة فيها محدوده للغاية ولبعض الزراعات فقط حتى تستطيع استغلالها اقتصاديا

والحل هو زرع الصحراء لانها مستوها اعلى من منسوب المياه الجوفيه على الاقل عشر متر وتصريف المياه فيها لايحتاج صرف ابدا واغلب اراضي مصر مستويه تماما وليس كا البرازيل والارجنتين اغلبها جبليه صخرية لا تزرع بالرغم من توفر المياه

وكمية المياه عندنا كافية والحمد الله وتكفينا وتكفي باقي الوطن العربي كله

[ggamal]

يا جماعة تونى بلير مرتبه السنوى 150 الف جنيه استرلينى، بيدفع 40 فى المئة ضرائب، يتبقى منهم 90 الف يعنى الشهر 7.5 الف يعنى 12.7 الف دولار فى الشهر، طب مش اولى نشوف مثلا رئيس وزراء سابق نعطيه نصف مرتب بتاع الكرة يعنى 20 الف دولار فى الشهر، و القامة و تذاكر طيارة ، يضبط حال البلد كلها و احنا برضه الكسبانين مش كده و لا ايه ترالم لاه ترالم لاه ترالم لم لم لم لاه

[مصر عشقى]

يا ريت كانت المشكلة مشكلة فلوس , الفلوس والحمد لله كتير

ناس بتهبش من البنوك وتهرب وناس بتاخدها علشان التمثيل المشرف , لكن المشكلة ان مفيش لا هدف ولا لون ولا طبع

سداح مداح لا زى وطنى ولا مدرب وطنى , ولا بقينا دولة صناعية ولا فضلنا دولة زراعية , ومش عاوزين نعترف بكدة

هوة مشكلة انى مكونش ناجح فى كورة القدم ؟ فية العاب تانية

عندنا فيها رجالة وتماسيح ، سباحة وكمال اجسام ورفع اثقال ووحوش الهوكى بتوع الشرقية اللى جاعوا وحفيوا علشان حد يبص ليهم ، الالعاب الفردية اللى بيجيبوا بطولات ويشرفوا

ولا متحدوا الاعاقة ربنا يديهم الصحة اللى سيبنهم من غير تشجيع ولا مساندة وعمالين نعلف وندلع ونصرف على بتوع الكورة المعوقين فعلا رياضيا ونفسيا وخلقيا وقول زى ما انت عاوز

ياريت ننسى كورة القدم دى قد 25 سنةونوفر الفلوس دى ونعمل بيها مدارس زى اللى اتربينا فيها ملاعب وحوش ولا العيال هتلعب كورة ونطلع جيل رياضى ومواهب رياضية يالتدريب فى الفيديو جيم وياريت نختار لعبة او العاب ممكن نتفوق فيها ونركز عليها ومفيش داعى ننفخ الاولاد اللعيبة زى ما عملنا مع مكسحين كورة القدم

والرياضة لاتكيل بالباتنجان

تم تعديل 13 أبريل 2004 بواسطة مصر عشقى

[se_ Elsyed]

يمكن عشان لسه مافطرتش مش فاهمه مين الاخوه اللى بيحولوا عملات صعبه !!  rs:

ويا ريت كمان توضيح كيف تعد كرة القدم من مصادر الدخل القومى عشان معلوماتى الكرويه قرويه خالص  rs:

يا ريت توضح يا شريف وعلى راى عادل امام : وضح .. أبن .. أفصح  rs:

بصي يا فيروز ... نيجيريا والكاميرون بها عشرات المحترفين في أوروبا والدول المتقدمة .. وكل واحد والتاني سعره اللهم ما صلي عالنبي معدي .. يعني ملايين الدولارات .. وفي نفس الوقت لسه معاه جنسية بلده .. فأصحابنا دول هايودوا الفلوس فين ؟ طبعاً هايحولوها بلدهم وكل أجازة هاتلاقي اللي نازل ومعاه فيديو واللي معاه خلاط واللي بيدخن هاتلاقيه نازل بخرطوشة مارلبورو أو لو ماكنش بيدخن هاينزل بالخرطوشة برضوا بس عشان يبيعها .. كده يعني فهايعملوا إنتعاشه في بلدهم ..

ومنهم ناس وعلى سبيل المثال جورج وايا ده أشهر لاعب في تاريخ ليبيريا الراجل ده بيصرف على منتخب بلاده من جيبه الشخصي وبيساند ويدعم لعبة كرة القدم مساندة شخصية في بلد أنهكتها الحرب الأهلية ... ده بالإضافة إن عندما يُذكر إسم بيليه أو بيكنباودر أوجورج وايا أو روجيه ميلا أو جون أوكوشا او عبده ضيوف او أحمد حسام ( ميدو ) .. الناس على طول بتفتكر بلادهم وان دول لاعبي كرة قدم ... وبتنسى بقى إيه المشاكل اللي عند البلد دي او إيه ظروفها أو موقعها فين على الخريطة حتى...

لأننا لا نستطيع أن ننكر شعبية كرة القدم التى يشجعها أكثر من مليار شخص على مستوى العالم .. ويعمل في مجالها حوالي 5 مليون بني أدم من او اللي بيلم كور ورا المرمى لــــــحد رؤساء الإتحادات ...

انما تعالي كده قولي إسم عاطف عبيد او بطرس بطرس غالي او أبو أشرف ... ولا هاتلاقي حد عارفهم غير الناس اللي بتقف في طوابير الجمعية وبتشتم فيهم أناء الليل وأطراف النهار .

وزي ماقولت لك أن في سنة 2010 فيه دولة أفريقيا من التلاتة هاتنظم كأس العالم ، مصر أو مصر أو مصر ( مصر - جنوب أفريقيا - المغرب ) فإيرادات كأس العالم بتفوق الـ 10 مليار دولار من أبو ستة جنية ونص خلال شهر واحد - تصوري - ... وصافي أرباح يقرب على الـ 2 مليار دورار يا فيروز يعني كل مصري هايركب إما جيب شيروكي أو لو غلبان يبقى هايجيب حتة بيجو 206 الجديدة وباقي الفلوس هايحطهم وديعة في البنك .. والأشية هاتبقى معدن يا تركواز ونقب على وش الدنيا بقى ..

[فــيــروز]

الحقيقه يا c el master "سى السيد يعنى"

انا مش مئتنعه اوى بموضوع التحويلات ده

ما الذى سيجعل اى لاعب احترف فى اوربا يحول نقوده الى بلده الفقير !!

اما من حيث انه سينزل البلد فى الاجازه محملا بالهدايا فهو امر لن يصب فى اقتصاد بلاده الا لو كانت تفرض رسوم جمركيه عاليه زى الجماعه عندنا

كون ان جورج وايا يصرف على منتخب بلاده من جيبه الشخصى شئ لكنه لن يحدث عندنا .. الحقيقه لو منتخبنا القومى وغيره من فرق المكسحين اللى بيتصرف عليهم وعلى مدربينهم شئ و شويات تبناهم رجال الاعمال و صرفوا عليهم يبقى يا الف مرحب يشيلوا .. لكن ان يقتطع من اقتصادنا والوف من الشباب لا يجدون وظيفه بينما شخص واحد ندفع له 360 الف جنيه فى الشهر و الله اعلم بما سنستفيده من هذا الانفاق يبقى سفه ..

الناس على طول بتفتكر بلادهم وان دول لاعبي كرة قدم ... وبتنسى بقى إيه المشاكل اللي عند البلد دي او إيه ظروفها أو موقعها فين على الخريطة حتى...

نوع من المخدر الوقتى يعنى !! وضغط على النعره الوطنيه وابتزاز لمشاعر البسطاء .. وهؤلاء كما يتذكرون بلدهم يتذكرون انهم بلا عمل و غير قادرين على الزواج وفتح بيت وتكوين اسره .. يتذكرون انهم لا يجدون علاجا مناسبا لامكانياتهم !! او مكان آدمى لتعليم اطفالهم .. من اجل هذا سالت فى الاول عن العائد بالارقام وليس بالعواطف و المشاعر .. يمكن احنا هنا فى المنتدى لدينا من الرفاهيه ما يسمح لنا بالحديث عن اهمية المشاعر الوطنيه التى يدغدغها ذكر هؤلاء اللاعبين لكن من المؤكد ان من يعانون ليست لديهم هذه الرفاهيه

انت بجد مقتنع اننا لو نظمنا كاس العالم ستصبح الصوره ورديه كما تتخيل؟ بجد انت مقتنع بالكلام ده؟

[Handicraft]

اوبسسسسسسسسسسسسس

س س خد نوك أوت من تريكيوااااااااااز

rs:

[se_ Elsyed]

خليك محضر خير ياخويا ولو عندك كلمة حلوه قولها .. ولو ماعندكش يبقى خليك في الناموس بتاعك ..

الموضوع يا فيروز ما بيتحسبش كده على الإطلاق ... ولو كل دولة عندها مشاكل من أي نوع ماكنش حد لعب رياضة ولا سمع لهم حس وسبق أن ضربت عدة أمثلة عن دول أصبح الناس يذكرونها لمجرد وجود بطل رياضي لديهم .. وأقرب مثال البرازيل فطبعاً كلنا عارفين أن أحوالهم تصعب على الكافر .. لكن مع ذلك مين أصغير عيل في أصغرها نجع ما يعرفش البرازيل بتوع الكورة ؟...

وبرضوا أرجع وأقولهالك تاني ان أقل بطولة بندخلها سواء كسبنا أو لأ .. بتغطي المصاريف دي كلها ... وعلى فكرة إتحاد الكوره لو ما بيحصلش فيه تهليب بيبقى من أغنى الإتحادات وهو فعلاً كده ... ولمعلوماتك برضوا إن الدولة لا تتحمل أي مليم من مرتب الراجل اللي إنتوا قاعدين تقروا عليه ده ...

بس إنتي عشان بعيد شويه عن المجال ده فماعندكيش تفاصيل كفاية .. لكن أحنا يابنتي أكل علينا الزمان وشرب في هذه اللعبة .. دي صناعة جامده يابنتي بس لو أتقناها وإدينا الصنعة حقها ( وش واحد بتاع دوكو )

أما من ناحية إقتناعي

[انت بجد مقتنع اننا لو نظمنا كاس العالم ستصبح الصوره ورديه كما تتخيل؟ بجد انت مقتنع بالكلام ده؟

ليه لأ ... ده إيه الكآبة والتشاؤم ده ... .. ولحد 2010 مين يعيش .. مش بعيد واحد من عامة الشعب زي س س كده يبقى رئيس جمهورية ساعتها وينغنغنا والحالة تبقى فُل ...

أنا ناوي لو مصر نظمت كأس العالم حتى لو كنت عايش بره هارجع وأأجر شقتي مفروش للمشجعين - بالذات بتوع البرازيل :) - وأقعد عند والدتي اليومين دول بالطول او بالعرض وأخد الواد عمر وهايكون عنده ساعتها 9 سنين ونبيع أعلام وسوفنيرز قدام الإستادات والواد علي ممكن أسفروا بره مصر ، إسكندريه مثلاً عند عمتي أو يلقح جتته على عمه مانمان أو خلتوا كليو ويقف هو كمان قدام إستاد إسكندرية ... واهو في الشهر ده ممكن نعمل مش أقل من 10 بواكي بلا سفر بلا غربه بلا قرف .