بوب كورن بالتوفي .. كلمه روعة قليل عليه ..

[doha]

للامانة الاختراع ده مش بتاعي .. انا كنت بتسوق في سوبرماركت قريب كده ولقيت اكياس زي الشيبسي فيها بوب كورن بنكهات مختلفة من بينها التوفي والكراميل ..

عادة باكل الفشار بالملح وملح كتير كمان .. اول مرة بصراحه اجربه مسكر ..

قلت اجيب كيس من باب التجربة ..

وجربته .. طلع بصراحه .. جواهر .. فيشار السعاده كما اطلقت عليه

رحت اشتريت منه تاني .. وتالت ..

بعدين قلت مبدهاش بقى مش معقول كل مااعوز انقنق فيشار مسكر اروح اجيبه من هناك .. خمنت كده طريقة العمل هيكون ايه يعني فشار عادي وعليه توفي عادي .. وقد كان .. عملته وطلع ايه .. رووووووووعه

المقادير بقى ..

هنحتاج ذرة فشار .. سكر .. زبده صفراء .. ملعقتين زيت .. ملعقة ماء

هنحط ملعقتين تلاته زيت على النار في حلة واسعه لها غطاء طبعا

هنحط في الزيت حبتين او ثلاثه ذره .. هنتركهم لغايه ماتفرقع الحبات الي حطيناها وتبقى فشار ففي الحاله دي نعرف ان الحلة بقت سخنة بشكل كافي فهننزل بكمية الذرة الباقية ..

هنحط قد ايه؟

تقريبا من نصف الى ثلاث ارباع كوب ذرة فشار لكل ملعقتين تلاته زيت

هنقلب الذرة كويس مع الزيت

ونخليه على النار

اول مانسمع حبة ذرة بدأت تنفش نروح على طول مغطيين الحلة بتاعتنا

من وقت للتاني نهز الحلة

هنلاحظ ان صوت الفشار وهو بيطرقع في الحلة بيزيد اول مانوصل للمرحلة دي نوطي النار على الحلة ونترك الفشار يستوي براحته

بعد دقيقة او اثنين هنلاحظ ان الصوت بدأ يتباطأ في الحاله دي نطفي على الحلة خالص عشان نضمن ان البوب كورن مينحرقش

نستنى شويه لغايه مايهدأ ويبطل يطلع صوت ونفتح الحلة ..

في كسروله صغيره هنجيب كمية من السكر نقول مثلا نصف كوبايه او اكتر شويه

هنحط عليها ملعقة مية ( ممكن نستغنى عنها )

هنرفعها على النار واحنا مجهزين على جنب قطعه زبده صفراء تقريبا ملعقتين كبار

هنقعد نقلب السكر على نار متوسطه لغايه مايبدأ يكون لون بني .فاتح مش غامق طبعا

هنرفعه من على النار ونقلب كويس بعدين نضيف الزبده ونستمر بالتقليب

هنرفعه من على النار

هنحط البوب كورن في صينية ونصب عليه بسرعه التوفي الي عملناه ونقلب

نتركه لما يبرد ونذوق بقى احلى بوب كورن مسكر ممكن تشوفوه

[Simba]

دي وصفة هايلة

دي وصفة سهلة

بس لو قولت لحد من اصحابي بوب كورن هيقولي انت بتشرب مخدرات :lol:

[عماد حمدي]

دي وصفة هايلة

دي وصفة سهلة

بس لو قولت لحد من اصحابي بوب كورن هيقولي انت بتشرب مخدرات :lol:

هههههههههههههههههههههه

[engmido]

مع انى مدقتوش الا انه برافو وووووووووووووووو مدام ضحى

ويكفيكى المحاولة

وده بصراحة اللى بيعجبنى فيكى

[بركة]

جربي يا دودو كده وحطي على السكر قبل ما ترشيه على الفشار معلقة ممسوحة صغنونة

بكينج باودر هتلاقي السكر عمل فقاقيع كتير وبقا بيفور

روحي علطول صاباه على الفشار بيخللي توزيع السكر اسهل على الكمية كلها

جربي كدة :lol:

[doha]

جربي يا دودو كده وحطي على السكر قبل ما ترشيه على الفشار معلقة ممسوحة صغنونة

بكينج باودر هتلاقي السكر عمل فقاقيع كتير وبقا بيفور

روحي علطول صاباه على الفشار بيخللي توزيع السكر اسهل على الكمية كلها

جربي كدة :lol:

فكرة مش بطاله ياريت تجربوها برضه وتقولوا رايكم

اما عن نفسي فللاسف خلاص نويت مش هعمله تاني غير ممكن بعد شهرين تلاته

بصراحه لذيذ بشكل خرافي لدرجه اني خلصت الكمية الي كنت عملاها

وبما ان النوع ده سعراته الحرارية اجرامية فاعتقد مش من الحكمه ابدا اني اعمله تاني في الفترة دي

جربوا بقى ياجماعه وابقوا احكوا لي على النتيجه .. من الآخر حد ياكلهولي ويطخن بدالي