كفاحى

[Handicraft]

ليلة امبارح " ما جاليش نوم" صحيت من عز النوم على هجوم من سرب من الناموس اكل الأخضر واليابس فى جسمى، والشئ الغريب انهم قسموا نفسهم مجموعات ميمنه وميسره ، ويبدأ الهجوم تحاول تنش على اليمين هبا تلاقى اللى على الشمال قرصتك القرصة وانتى ملهى الناحية التانية، وبعد كفاح طويل فى الضلمة قررت انى اقوم بهجوم مضاد :) .

نورت نور الغرفة واخدت سيفى طبعا جريدة طبقتها وبدأ عملية مطاردة لكتيبة الناموس وبدأت الضاحيا تسقط من جيش الأعداء وبدأت الناموسات تهرب بجلدها بعد ما أدركوا حجم الدمار وبعد الخسائر بتاعتهم ما كترت والجثث كانت فى أرض المعركة محدش قادر يدفووووهااا.

والنتيجة ان انتصرت انتصار حاسم فى المعركة بس معرفتش أنام وطول الليل عالم زى شاويش الدرك بالف فى الأوده والسلاح على كتفى وانا دلوفتى بانام على نفسى فمن فضلكم لو حد متمرس فى الحرب على الناموس وخصوصا النوع الصحراوى يقوللى ايه هو السلاح السرى اللى بيستخدمه فى المعارك دى ومش مشكله يكون محرم دوليا لأن المعركة معركة بقاء.

أى نييد يووور هلب بليييييييييييييييز

جندى مجند هاندى كرافت

فريق طاردو الناموسات

[se_ Elsyed]

أى نييد يووور هلب بليييييييييييييييز

يا عم هاندي فك الكيس شوية .. وإصرف على التسليح .. وسيبك من الأسلحة البدائية ...

في حاجة إسمها بف بف أو أي مبيد للناموس ..

في حاجة تاني أغلى شوية .. البتاع اللي عامل زي معطر الجو وبفيشه بتتحط في الكهرباء وبيقض على الناموس ويكفيك 90 يوم .. متوفر في الصيدليات ولدى الباعة الجائلين ..

أو إخطف رجلك لحد أي محل أجهزة كهربائية وهات الجهاز اللي بيكهرب الناموس وعامل زي قفص الفراخ بس حديد .

على فكرة حصلت ظاهرة غريبة في مدينة الرياض الأسبوع الماضي .. فمع إن فصل الشتاء لملم هدومه ورحل عنا وبدا يتسلل إلينا فصل الصيف بلهيبه المعهود وحرارته الحارقة .. إلا أننا فجاة تعرضنا لمدة 4 أيام لعواصف ورياح كادت ان تقتلع البيوت من أساسها وغيوم وضلمه في عز الضهر مع أمطار غزيرة وصلت لدرجة أنك تحس أن المطر عبارة عن كتل حجرية ... وكل ده كان يحدث بشكل منتظم يومياً الساعة 4.30 عصراً ويستمر إلى الفجر في بعض الأحيان ..

وهاندي علشان ساكن في ضواحي المدينة في الهو يعني .. فتلاقي عندهم مياه متجمعة عملت برك ومستنقعات مع نمو حشائش السافانا وأشجار الماهوجني والبلوط .. فكل ده بيؤدي إلى تجمع الناموس والذباب وكل اللي يخطر على بالك ومش بعيد شويه شويه نلاقي حيوانات مفترسة خرجت من الأحراش دي وبدات في مهاجمة المواطنين الأمنين ...

اما بقى وسط المدينة :) فتوجد بالوعات الصرف التى تشفط مياه الأمطار وبعد 5 دقائق من إنتهاء المطر تحس كأن شيء لم يكن بالإضافة إلى إني بأشوف عمال بنجلاديشيين تبع هيئة النظافة بيعدوا الصبح وشايلين أنابيب المبيدات على ضهرهم وبيرشوا صناديق القمامة والبالوعات والحاجات دي بالمبيدات ...

س س خبير إستراتيجي

[Handicraft]

يا عم هاندي فك الكيس شوية .. وإصرف على التسليح .. وسيبك من الأسلحة البدائية ...

في حاجة إسمها بف بف أو أي مبيد للناموس ..

في حاجة تاني أغلى شوية .. البتاع اللي عامل زي معطر الجو وبفيشه بتتحط في الكهرباء وبيقض على الناموس ويكفيك 90 يوم .. متوفر في الصيدليات ولدى الباعة الجائلين ..

أو إخطف رجلك لحد أي محل أجهزة كهربائية وهات الجهاز اللي بيكهرب الناموس وعامل زي قفص الفراخ بس حديد .

يا ابو السيد يا حبيبى المشكلة مش مشكلة فلوس انا راجل اكس اكس لارج زى ما انت عارف أولا بيف باف والمبيدات دى مواد كيماوية يعنى أكيد لها ضرر أو بالعربى كده سيد افيكت وهنا يبرز البعد البيئى وبعدين شوية وجماعة الخضر الاقيهم احتلوا البيت او لبدوا تحت البيت علشان باضر البيئة، ثانيا البتاع الكهربا ده جهاز ملعون طول ما انت قاعد تسمع صوت طرقعة وصعق الناموس وممكن وانت فى احلاها نومه تتفزع على واحده مقلبظة شويه بتنفجر زى القنابل العنقودية بتاعة امريكا، المشكلة الحقيقية بقى ان بعد فترة اللمبات دى ما تموتش حاجه والظاهر ان الناموس بيغير تكتيكه الهجومى ويناور ويلف من ورا الجهاز

لذلك انا عايز حل بسيط وسهل ملائم لأجواء الصحراء وفكرالناموس التقدمى والتطور الطبيعى للمناعة عند الناموسات الشقيات.

على فكرة بقى فيه حل جميل ومتجرب وجه على بالى الا وهو الناموسية ودى جربتها فى اعماق الصحراء الغربية وانا فى الجيش وكانت فكرة بس ايه ميه ميه تجيب كام عسكرى وتمسكهك ناموسية ويقفوا حاولين السرير بتاعك وانت نايم ... وهنا يبرز السؤال طيب اجيب منين عساكر يمسكوا الناموسية دلوقتى .... أريد حله

[فــيــروز]

ثانيا البتاع الكهربا ده جهاز ملعون طول ما انت قاعد تسمع صوت طرقعة وصعق الؤاموس وممكن وانت فى احلاها نومه تتفزع على واحده مقلبظة شويه بتنفجر زى القنابل العنقودية بتاعة امريكا،

4!--QuoteEEnd-->

فعلا rs:

ده حتى مره كنا عند بتاع عصير قصب مركب البتاع ده وكل شويه اسمع صوت حاجه بتطرقع :unsure:

فسرحت شويه كده وقلت اذا كان صاعق الناموز بيعمل صوت كده امال لو عملوا صاعق للصراصير كان صوته بقى ازاى .. mfb: يععععععععععععععععع gt:

ما تركبوا سلك على الشبابيك طيب .. يعنى ناموسيه مثبته :)

[مصر عشقى]

ممكن تعطى كل ناموسة ربع جنية وقول لها اقرصى برة

[disappointed]

أحسن شيئ و أكثر شيئ فعالية هو طارد الناموس الشبيه بمعطّر الجو والذى يتم وضعه بصورة مستمرة فى الفيشة الكهربائية و يستمر تأثيره لشهرين أو ثلاثة , وليس له أى أعراض جانبية على صحة الإنسان

ولكن ....

يوجد به مشكلة واحدة جعلتنا لا نشتريه فى السنتين الأخيرتين , وهو أنه من إنتاج شركة Johnson & Johnson وهى من الشركات التى تأتى على رأس قائمة الشركات الأمريكية/ اليهودية التى أقاطعها أنا و زوجتى (و أعتقد أننا سنكون بصدد مشكلة أخرى بسبب هذه المقاطعة فى الشهور القادمة نظراً لمقاطعتنا للــ"بامبرز" - لنفس السبب "شركة بروكتور آند جامبل"- فى ظل وجود عمر أفندى , ورغم إقتناعنا بجودة البامبرز التى لا تـُضاهى...لكن ما باليد حيله)

و بمناسبة الناموس :

هناك شخص(صديق لوالدى) كان يُمَثـِّل ظاهرة غريبة جدا ولم أجد أى من أساتذتى فى الطب قادرا على تفسيرها.....لقد كان الرجل قاتلاً للناموس.....آه و الله..... كانت الناموسه من دول تقف على ذراعه و تقرصه من هنا تموت فى ساعتها...آه والله..... شفتها بعينى وأنا فى زيارة ليهم (كنت فى ثانوى).....ناموسه مكلبظه و مدملكه كده وقفت على ذراعه...بص لها.... وسابها.....بعد 20 ثانية تقريبا راح قايم من على الكرسى و جايب منديل كلينكس ماسكها بيه و راميها فى الطقطوقة اللى قدّامه , ولمّا روّحنا والدى حكى لينا عن هذا الموضوع الغريب....(يعنى الراجل ده تلاقيه لمّا كان فى الجامعه و بيقعد يذاكر فى أوضه فيها ناموس أكيد كنت تلاقى على مكتَبُه طقطوقة مليانه ناموس مش مليانه أعقاب سجاير :) )

كل ما أحكى لحد من أساتذتى أو زمايلى على الموضوع ده يضحكوا و يصمموا إنى بأهرّج.... واحد زميلى بس بيدرس أمراض دم فى أيرلندا قابلته فى أجازه مرّه و حكيت ليه فقال لى إحتمال يكون الراجل عنده أجسام مناعية فى دمّه بتعمل تجلّط للدم أول ما يدخل فى جوف الناموسه فبيجيب ليها جلطه كبيرة جدا فى الأمعاء و فشل فى الدورة الدمويّة (حاجه كده زى : نداء إلى الناموسة القاطنة فى درب النحّاس...لا تقرصى السيّد عزيز-إسم صاحب والدى-..... السيّد عزيز به سم قاتل :unsure: )

ممممم....

بأقول لك يا هاندى كرافت

إحتمال يكون موضوع صديق والدى ده وراثى.... أنا معلوماتى إنه عنده إبن فى الجيش اليومين دول..... إيه رأيك أسال ليك هوّه فى أنهى وحدة و تبقى تطلب تتنقل معاه فى وحدته؟؟؟

mfb: gt: rs:

تم تعديل 13 أبريل 2004 بواسطة disappointed

[White heart]

اما انا فمن مستخدمى مثل تلك الأجهزة البسيطة فى بعض الرحلات الخلوية ، و التى تعتمد على تقنية الUltrasound، و هى تتميز بعدة مميزات، فهى "صديقه للبيئة"، ليس لها أى أضرار جانبيه، رخيصه الثمن، خفيفه الوزن جدا وبالتالى يمكن حملها معك اينما ذهبت، اقتصاديه جدا حيث انها تعمل بالبطارية، و فكرتها تعتمد على اصدار ذبذبات صوتيه ذو تردادات عاليه نعجز نحن البشر على سماعها، ولكنها مزعجه جدا لبعض الحشرات ( خاصه الناموس) ... فهذا الجهاز لا يقتلها !، بل يبعدها فى المحيط الذى يعمل به، و الذى يختلف قوه ترددة من جهاز، الى أخر.....

أنصحك بتجربته يا عزيزى Handicraft، ربما يساعدك قليلا، ( و لو انه ما عرفش اذا كان مسموحلك تدخل أى حته (ملكية) :) من دول وحدتك و اللا لأ؟؟ و من ناحيه تانيه و على حسب ذكرياتى، الناموس اللى من النوع الصحراوى ده ما لوش حل، يعنى ما فيش حاجه بتحوق فيه، اسألنى انا عن الخدمات الشنجى ، والبرنجى، و الناموس اللى كان بيلحس أى مادة سامه و يقول " كـــــــــــا مــــــــــا ن " :unsure: ، فمين عالم احتمال أجهزة من النوع دة يعتبرها، طقطوقه من اسطوانات "جرامافون" !!!! mfb:

يمكنك بالضغط على الصور التالية، الوصول الى مواقع الشركات، و شراء احداها أو غيرها online ....

تم تعديل 13 أبريل 2004 بواسطة White heart

[abofasad]

هناك طريقة مبتكرة وهي

تعمل عجينة مكونة من السكر والزلط الصغير والنشوق (إسألوا عواجيز المنتدى يعني ايه نشوق)

توضع قطع صغيرة من هذه العجينة بجوار السرير

ييجي الناموس علشان ياكل السكر .. فيشم النشوق .. فيعطس ..تتخبط راسه في الزلطة .. فيموت

هذه الطريقة تنفع ايضا لإبادة الصراصير

[Handicraft]

فيروز السلك فعلا راكب بس ده للجحافل انما الكتئب الصغيرة بتدخل عادى من الباب لأن دى وحدات استطلاع ومعاهم اجهزة توجيه بالقمر الصناعى فغنت يدوبك تفتحى الباب من هنا وهوب تلاقى عملية انزال خلف خطوط العدو بتم بهدوء.

استاذ ديس أبوينتيد :

والله لو عم عزيز ده بره كان كسب دهب من الأبحاث اللى ممكن يعملوها على حقنه واحده من دمه لأنهم ممكن عن طريقها يطلعوا بعلاج للحشرات طبيعى وصديق للبيئة وبعدين يا سلام لو نلاقى زى عم عزيز هنا كان الواحد جاب واحد يوقف يستلقى الناموس بدالى.

أستاذ : مصر عشقى

الناموس اللى عندنا لسه بخيره ومظاهر المادية مظهرتش فيه وميعرفش يعنى ايه فلوس ولسه عايش بالمقايضة يعنى ياخد من حضرتك دم ويديك وجع وقلة نوم فالحل بتاع حضرتك لسه عايز حل.

أستاذ : وايت هارت

الأجهزة دى تعرفها حشرات العالم المتقدم والدول اللى فيها الحيوانات متربيه على الغالى والنفيس انما عندنا هنا الحشرات مستبيعة وفاتحه صدر القميص وبعدين جربت انا جهاز من دول ايام الكلية فى مصر ومن الواضح ان التجربة عجبت الناموس جدا لأنه كان بيتجمع ويسمع الطنين وهو بيتمايل وساعات كده كنت تلاقى نموس وناموسه بيرقصوا سلوو على عزف جهاز الطرد.

استاذ أبو الفصاد :

الوصفة بتاعة حضرتك هايله انت مبدع بس من فضلك المقادير علشان الطعم يعنى وهل ينفع انى احط حولين طبق العجينه زيت على الأرض علشان الناموسة لما تتخبط تقوم تتزحلق وتتخبط فى الأرض وبكده تبقى ضربة مزدوجه.

على فكرة من مداخلة الأستاذ وايت هارت افتكرت ان فيه برنامج كمبيوتر بيصدر اصوات من السماعة غير مسموعة للبشر فعلا بتطرد الناموس وكمان للعلم شركة المحمول الكورية بتقدم خدمة طرد الناموس فى الموبايل عن طريق نغمه ترددها برده عالى تسمعها الناموسات بس.

يا عينى يا عينى دا انا حابهدل الناموس فى بيتنا بشكل

[Handicraft]

وسع يا جدع انت وهوووووووووووووووووواااااااا

وجدتها وجدتها

الحل الطبيعى اهوه

[se_ Elsyed]

مشكلة فلوس انا راجل اكس اكس لارج زى ما انت عارف أولا بيف باف والمبيدات دى مواد كيماوية يعنى أكيد لها ضرر أو بالعربى كده سيد افيكت وهنا يبرز البعد البيئى

طب خليك يا عم يا بتاع البيئة لحد ما نيجي نفتح الأوضة بتاعتك الصبح ونلاقي شراب على السرير .. فين هاندي يا جدعان ؟.. ده الناموس كان عامل عليه حفلة أمبارح بالليل وأكلوه ولم يتبقى منه إلا الشراب علشان الناموس بيخاف من الحاجات دي لتقف في زوره ..

وكمان للعلم شركة المحمول الكورية بتقدم خدمة طرد الناموس فى الموبايل عن طريق نغمه ترددها برده عالى تسمعها الناموسات بس.

الأن يمكنك الاتصال على زيرو 900 أربع نموسات وأستمتع بجو هاديء وهواء خالي من الناموس والزززززززززززززن...

2345 نغمة " إمشي يا ناموسه يا غلوسه ماتقرصنيش "

2625 نغمة " يا خارجه من باب الحمام وكل خد عليه ناموسه "

2489 نغمة " بت يا ناموسه يا ناموسه شايلة البسبوسة "

بس الناس اللي محمولها كرت مش خط تموت من القرص بقى ولا أيه ؟

ربنا يخليلنا البيرسول أبو 3 ج ...

أهو الناموس ده كان هايبقى سبب في إفشال شهر العسل بتاعي اللي روحت الأول أقضيه في مرسى مطروح .. وهناك يابا الناموس أيه .. الواحده قد الطياره الأباتشي كده .. ووالله العظيم يا جماعة بيشرب المبيدات دي شرب ففي خلال 3 أو 4 أيام خلصت أكثر من 5 علب وبرضوا مافيش فايدة انا اللي كنت هاموت مش هو وأعتقد ان البيرسول والبف باف هو المشروب الرسمي للناموس في مرسى مطروح عشان كده بيسمن ويربرب عليها .. ولما يئست خالص روحت سايب له مرسى مطروح باللي فيها وروحت إسكندرية فهناك قرايبي على الأقل وهابقى في وسط حماية ...

[se_ Elsyed]

هاندي ... إحمد ربنا يابني إنت وقعت من السما وانا إستلقيتك ..

وجدت حل نوهائي لمشكلتك وهايريحك ... وماتخافش الحل صديق للبيئة الروح بالروح ومتربيين سوا ..

الوصلة اللي جايه فيها برنامج مجاني عشان عيونك بيعمل ذبذبات وحركات تطفش أجدعها ناموسه شايفه نفسها وبتفتري على خلق الله

إمشي يا ناموسة يا غلوسة بعيد عن هاندي

وده شكل الشاشة بتاعته يا باشا

كل اللي مطلوب من سيادتك

أنك تخطف رجلك لأقرب محل إلكترونيات وأجهزة إتصال وتشتري جهاز كمبيوتر كفي او بيسموه بالإنكليزية PDA زي ده

أو ده

وده بيبقى في حدود 700 دولار وتنزل عليه السوفتوير المجاني وسيبوا شغال بالليل وإنت نايم واتحدى إي ناموسه تقرب لك ...

أنا مجربه وعلى ضمانتي ......

إيه العالم المستفزة دي .... بقى الراجل مش هاين عليه يجيب علبة بيرسول بجنية وربع نقوم نورطوا في 700 دولار من أبو ستة جنية ونص يعني 4550 جنية يعني ممكن يتجوز بهم واحده تبقى كل مهمتها في الحياه هش الناموس عنه وبرضوا هايبقى حل صديقة للبيئة ..... أاففففففففففف  مليتوا البلد

[Handicraft]

طيب يا ابو السيد ما تدعبس كده جوه الجراب rs: وتطلعنا بحته تمشى على النوتبوك الجديد بتاعى rs: او على الكمبيونر علشان انت عارف ان انا من اعداء التليفونات ولسه الكوز أبو حبل راكب فى الشقة عندى ،

انت عارف من ساب قديمه تااااااااااااااااااااه

يا هناااااااااااااااااااااااااااااادى

[afiona]

فيه مبيد حشرى كانوا بيرشوه فى معسكر التدريب فى الجيش كمكافأة لنا لما بنكون كويسين.... كان مالوش إسم (تركيب يعنى) وكان بيقضى على الناموس ونسبته 20% فى البنى آدمين.......وبيسبب إدمان.....

[R.M.G.]

طب عدم المؤاخذه ليه ماتحطش ولامؤاخذه ناموسيه على السرير اوتنام في الأوضه التانية اللي مافيهاش ناموس ؟

[doha]

تصدقوا فيه معلومات اول مرة اسمعها

يستاهل الرفع

[ساره احمد]

بص ياسيدى انا هقولك علي حاجة حلوة خالص جربها وانا شاء الله هتدعيلي ونسمع خبر النموسات دول قريب انت تقفل شبابيك الاوضة والازاز كمان والباب طبعا وتحط كمامة زى كدة :closedeyes: وتجيب قرصين ناموس وتولع فيهم هيطلعو دخان كدة كتير ريحتو صعبة اوى انت بقي تطلع برا الاوضة وتقفلها وتسيبها كدة قد 10 دقايق الناموس جوة هيبقي بيخبط راسة ف الحيط من الريحة دى بس اوعي تشم الدخان دة(ممكن يموت البنى ادمين)وادعيلي

[عماد حمدي]

بص ياسيدى انا هقولك علي حاجة حلوة خالص جربها وانا شاء الله هتدعيلي ونسمع خبر النموسات دول قريب انت تقفل شبابيك الاوضة والازاز كمان والباب طبعا وتحط كمامة زى كدة :closedeyes: وتجيب قرصين ناموس وتولع فيهم هيطلعو دخان كدة كتير ريحتو صعبة اوى انت بقي تطلع برا الاوضة وتقفلها وتسيبها كدة قد 10 دقايق الناموس جوة هيبقي بيخبط راسة ف الحيط من الريحة دى بس اوعي تشم الدخان دة(ممكن يموت البنى ادمين)وادعيلي

هههههههههه حلوه ع فكرة الحركة دي ,,, :closedeyes: اهو بدل ما نحط قرص الكيتو في الجهاز ولسة ع ما يسخن والرائحة تفوح نكون اتهرينا قرص

بس فيه حركة بقا الجماعة الأرياف عارفينها .. وهي الدخـــــــــــــــــــــاااااااااان !! أيو الدخان بيخنق الناموس

بيعملوا اية بقا ..

بيجيبوا ورق كراتين اللي هوه الطخين دا .. ويحطوه في طبق ألومينيوم ويولعوا في ورقة الكرتون دي وبعدين ينفخوا فيها هتطلع دخاااان كتير جدا ً دا بقا بيخنق الناموس ..

بس طبعا ً الفكرة بالرغم من ناجحها الباهر في تطفيش الناموس إلا أنها من وجهة نظري تخلف وبخل :closedeyes:

ليلتك هادئة بدون ناموس :closedeyes:

[رضوي]

بصراحة مجموعة افكار هايلة جداً

وخاصة الفكرة بتاعت الكراتين دي .......... هي مش بس هتقضي ع الناموس ...... لا والبني آدمين كمان

:closedeyes: :closedeyes:

بس بجد الفكرة اللي موتتني م الضحك .......... فكرة استاذ ابو الفصاد ......... حلوة اوي العجينة دي

جامدة جاااااااااامدة يعني

لا بجد فيه فكرة شجرة النيم دي

.......... أصل المشكلة اننا عندنا في البلد اكتر من شجرة نيم ........ طبعاً في الجنينة ...... وكنت بستغرب ليه برده فيه ناموس بيدخل البيت ...... وجو المعسكرات اللي بابا عامله علي كل منافذ البيبت ........ كل شباك له سلك علشان الناموس ....... حتي الباب

بكدة بقي اول لما اروح البلد ان شاء الله ........... هجيب كام ورقة نيم واولع فيهم

واقول اختراع بقي

:closedeyes: :closedeyes: :closedeyes:

بدل الاقراص والمبيد والكلام الفاضي دة

ميرسي بجد يا ضحي علي رفعك للموضوع .......... قدرتي بجد تضحكيني من قلبي

[ساره احمد]

كويسة برضو فكرة الكراتين دى اهو الواحد لما يلاقي شوية ناموس ينزل يجيبلو كرتونتين لأ وببلاش كمان ويولع فيهم بس ياريت الواحد مايموتش معاهم بس مع احترامى ليك ا/ عماد دة مش تخلف ولا حاجة دى بقي اسمها الحاجة ام الاختراع وبعدين الناس دى نيتها كويسة يعنى لقو الناس زادت والعيال كترت فاخترعو حكاية الكراتين دى علشان لما يولعو فيها الناموس هيموت والعيال معاهم بالمرة شفت بقي؟