يادى النعيم اللى انت فيه يا قلبى

[فــيــروز]

يادى النعيم اللى انت فيه يا قلبى :P

عفوا اذا كان العنوان طويلا

فقد اعتدت ان اغنى هذه الجمله مؤخرا لاسباب قد تبدو للبعض فى غاية التفاهه :D

كنت فى العام الماضى او بتحديد اكبر فى شهر ديسمبر قبل الماضى قد تحمست للاشتراك فى كورس لدراسة لغة الجافا rs:

كان عيبه الوحيد انه يبدا بعد العمل فى السادسه مساء و ينتهى فى العاشره لمدة ثلاثة ايام فى الاسبوع rs:

وفى الحقيقه فقد كانت ايام الدراسه فى هذا الكورس ورغم تخوفنا من الا نستطيع انهاؤه بنجاح -كانت مدته ستة اشهر- الا ان الايام عدت سريعا سريعا حتى وصلنا الى نهاية الكورس فى يونيو الماضى et:(

وللاسف تغير مكان الدراسه وصار الى مكان بعيد جدا عن مكان عملنا

الا انى حين كنت ادخل مقر الدراسه فى مدينة نصر فى شقه عاليه باحدى شركات الكمبيوتر وبعد معاناه طويله فى الطريق من الحر .. ليستقبلنى الهواء العليل -هواء طبيعى وليس هواء التكييفات السخيفه- داخل الشركه ابدا فى الغناء "بينى وبين نفسى طبعا" واردد

يادى النعيم اللى انت فيه يا قلبى من بعد العذااااااااااااااااب rs:

وحبذا لو كان اليوم هو الخميس مما يعنى انتهاء الاسبوع وتوقع الاجازه و الراحه فى اليوم التالى .. ساعتها يكون الغناء بحماس اكبر "ايضا بينى وبين نفسى" rs:

وحين زرت الاسكندريه فى اجازة شم النسيم القصيره كانت هذه الغنوه "يادى النعيم" هى الفاصل الذى يملا الفراغ بين كلماتى

لم تكن الاسكندريه مزدحمه زحامها الخانق فى الصيف .. الذى يجعلك تكره حياتك لو فكرت فى الخروج الى وسط المدينه

ولم يكن الجو رطبا قائظا كما اعتدت ان اشعر به

بل كانت الاسكندريه فى كلمه واحده : فاتنه mc:

تم تعديل 13 أبريل 2004 بواسطة فــيــروز

[فــيــروز]

كان اليوم الاول مخصصا للقاء بعض الاصدقاء الذين تصادف وجودهم فى الاسكندريه فى ذات الوقت rs:

وقررت التحلى بالشجاعه و الذهاب للقائهم بالمواصلات العامه من العجمى حيث نقضى الاجازه الى المعمووووووووووووره .. لا ادرى لم تخيلت انى ساحلف بغربتى بعد قطع تلك المسافه التى تخيلتها طويله .. et:(

وحين وصلت الى محطة الرمل .. وسالت احدهم كيف اذهب الى مصطفى كامل "هكذا اخبرنى الجمع ان انتظر هناك" كانت الاجابه ببساطه : اركبى الترام rs:

وكانت فرصتى الذهبيه التى قررت التمسك بها للنهايه فسالت : واين الترام

فاشار الى محطة قريبه ما ان وصلتها حتى وصل الترام

واشار على السائق ان اركب فى عربية السيدات افضل .. وقد كان

وحين سالت سيده يبدو فى ملامحها اللطف و الرقه : كم محطه نمر بها قبل مصطفى كامل

اجابت باندهاش : ياما .. mc:

وابتسمت وجلست فى مقعدى

لا ادرى لم تصورت انى لو دققت فى ملامح الركاب ساجد ما يمكن تمييز سكندريتهم به !! واندهشت حين صدمت ان ملامحنا متقاربه rs:

لابد ان من اخترع الترام كان شخصا هادئ الاعصاب مطمئن البال rs:

والا بم نفسر هدوءه الجميل وهو يتهادى على قضبانه ليعطى الغرباء مثلى فرصه للتامل و الابتسام بسعاده لكل شئ يمر بهم .. سواء كان عمارات قديمه يبدو حسن معمارها باقيا حتى الآن او كان مقاهى تجمع عليها البعض لقراءة جريدة الجمعه وشرب الشاى

فى الحقيقه لم اعرف فى هذا الوقت لم اشعر بسعاده غير مبرره على الاطلاق

وكالمعتاد بدات ادندن بينى وبين نفسى بغنوة هذه الحاله : يادى النعيم اللى انت فيه يا قلبى من بعد العذاب .. ويا سلام اما الواحد يستحلى صوته حتى لو لم يكن حلو

نزلت من الترام فى مصطفى كامل

ووجدت انى ينبغى ان اركب محطه ترام اخرى فى اتجاه آخر وفعلت هذا بكل سرور طبعا .. واندهشت بشده حين عرفت ان هناك من يكره الترام ويراه مناسبا فقط لمن لديهم وقت زائد يريدون تضييعه

كان مكان لقاء الجمع عند مستشفى القوات المسلحه التى تقع على الكورنيش

وكنت قد وصلت الى بداية شارع يقع به سور المستشفى وينتهى الشارع بتقاطعه مع الكورنيش

حين تسير فى هذا الشارع -لا اعرف اسمه للاسف- تشعر انه صاعد قليلا

وكلما صعدت كلما كان الهواء القادم من البحر مباشرة اكثر ترحيبا بك

هواء تشعر معه انك تريد ان تاخذ شهيقا فقط .. فقط حتى لا تتوقف عن تنفسه وملء صدرك به

يااااااااااه .. ما هذا الحرمان الذى نعيشه فى القاهره

كنت اشعر بالضيق كلما اقترب الشارع من نهايته .. حزن يختلط بسعاده لقرب رؤية الكورنيش فى هذا اليوم البديع .. ما اجمل شم النسيم فى الاسكندريه الجميله .. هيييييييييييه "تنهيده عميقه"

حين وصلت لنهاية السور وبدات ارى وجهه المطل على الكورنيش اقتنعت فعلا بغربتى فى المكان

لماذا؟ لانى وجدت السور مزينا بنوافير "جمع نافوره يعنى" صغيره وعليه زخارف بارزه ولوحه لقرص الشمس حتى انى لم اصدق انه لازال هذا هو سور المستشفى

وحين اتصل بى اصدقائى و اخبرونى انهم قد يئسوا من انتظارى بعد طول فسحتى فى الترام و ذهبوا للمعموره وعلى اللحاق بهم فى تاكسى ابتسمت فى سعاده وقلت فرصه اتامل السور على راحتى

وبعد انتهاء التامل اشرت لتاكسى للذهاب الى المعموره

تم تعديل 13 أبريل 2004 بواسطة فــيــروز

[amir]

منك للى كلت دراع جوزها

يعنى انتى تشمى النسيم فى اسكندريه , و انا اشم الهواء هنا فى مكان ما فى الصحراء الغربيه فى درجه حراره تقترب من الاربعين !

بس بجد فكرتينى بالذى مضى , ايام ما كنا ناخدها مشى تقريبا من نفس منطقه مستشفى القوات المسلحه على الكورنيش لغاية المعموره , أو نعمل مسابقه بالعجل ( جمع بسكليته ) من سيدى جابر للعجمى ...... ايييييييه ايام ......هو مين اللى قال ليت الشباب يعود يوما لأخبره بما فعلت فيروز فينا ؟؟

[Peace74]

يا فيروز الترام ده مضيعه وقت للهواه آما محترفى الترام ( أبونيه) فهو أستثمار للوقت

- مراجعه قبل الامتحانات

- قراءة القصص و المجلات

- سماع الراديو

- شغل التريكو

- النوم

و هو فسحه شيقه للأطفال خاصة الدور التانى ( لو الحظ ابتسم لك و مر الترام أبو دورين من أمامك)

الترام أيضاً يقوى الروابط الاجتماعيه لو داومت على ركوبه فى نفس الوقت كل يوم ستجد نفس الناس تقريباً و بمرور الوقت ينشأ الود.

[se_ Elsyed]

الترام أيضاً يقوى الروابط الاجتماعيه لو داومت على ركوبه فى نفس الوقت كل يوم ستجد نفس الناس تقريباً و بمرور الوقت ينشأ الود.

ده نفس اللي اللي بيحصل في القاهرة ، مع إن المترو ( مش الانفاق .. لأ التاني بتاع مصر الجديدة والنزهة وصلاح سالم ... وحاسب يا عم العيال اللي متشعبطة ورا دي ) تقريباً قرب ينقرض من القاهرة ورفعوه من اماكن كثيرة إلا أنه مازال يطلق عليه مترو بتوع المعاشات نظراً لبطئه وأوقات بأعدي من على المحطة وقلما ألاقية بيمر ... زي ما بيكون اللي بيروح مابيجيش .

[abofasad]

كنت عمال أقرأ خواطر الأخت فيروز في الاسكندرية وانا مبسوط اوي وميت من الضحك

وسألتني زوجتي بتضحك مع مين ، قلتلها مع فيروز، فجاءت على الفور لتعرف من هي فيروز الي اضحكتني كثيرا

ووجدتها هي ايضا تضحك بصوت عالي فسألتها انت كمان بتضحكي مع فيروز، قالت لا ، انا بضحك مع سي السيد

واحنا الاتنين عندنا حق لأن اظرف اتنين في المنتدى هما فيروز وسي السيد وخصوصا لما يردوا على بعض

مش كده والا ايه؟

[mnman]

فكرتونا بالذي مضي ...ايام التمشية علي الكورنيش من سابا باشا لفيكتوريا ونرجع في الترام..عالم فاضية بقة....

ولا الجيلاتي عند عزة في بحري...ياعيني علية...

ولا كشري المدهش في محطة مصر....

ولا محمد احمد (فول وطعمية)....

والبحر و الصيد... كان زماااااااااان عندي بدلة غطس كاملة وكانت هواية عندي صيد السمك بالبندقية و خاصة كمان الاخطبوط... ياسلام علي طعمة..هممممممممممممممممممم

كانت ايام... وايام الجامعه كنا نروح المعمورة و اسرق مفتاح الشقة من ماما و نحتفل هناك و يتصل البواب بالبيت وهوب بابا علي راسي... وياسلام.... بس والله كانت حفلات جميلة و ايام جميلة........

فكرتونا بالعجمي وايام العجمي.... كنا بنروح نتسنكح هناك...ونرجع بالليل.......

والبحر الساعة خمسة العصر... وياسلام علي العصير وكتاب تقرا فية وانت مدد علي الشيزلونج... احلي عيشة....

ولا لعبة الشايب.. والاحكام العبيطة... مرة طلبوا مني اخد الشنطة واروح عند شمسية طبعا تحتها اسرة واقولهم ممكن اربط الفيل عندكم.... طبعا الناس تفهموا الوضع والحمد لله fsh::

الاسكندرية اجمل بلد في العالم...

منمان رحالة مصري معاصر وبياع بليلة....

[se_ Elsyed]

ووجدتها هي ايضا تضحك بصوت عالي فسألتها انت كمان بتضحكي مع فيروز، قالت لا ، انا بضحك مع سي السيد

يا جسوفي يا جسوفي يا ناس ..

أضحك الله سنك ومتعكم بالصحة والعافية يا عم أبو فصاد ..

هي دي رسالتنا في الحياة إننا نضحك الناس وقلبنا يعتصر ألماً من الداخل ( وش شكوكو في فيلم عنتر ولبلب )

[se_ Elsyed]

ولا الجيلاتي عند عزة في بحري...ياعيني علية...

إظهر وبان عليك الامان يا سي مانمان ... مين عزه دي ؟

اتاري كل ما أقابلك ألاقي بؤك متلحوس أيس كريم حتى في عز الشتا وأقول يمكن بيعمل زي الروس عشان يعادل برودة الجسم ... اتاري الموضوع طلع حاجة تانية خالص ..

بس عايز أقولكوا سر خطير ماحدش يعرفوا لحد دلوقت غيري أنا وس س بجد وجديد ..

انا لو ماكنتش قاهري كنت اتمنى أبقى عايش في إسكندرية ..

وإن ماكنش جذوري الأصلية من محافظة الشرقة كنت إتمنيت أبقي صعيدي من الصعيد الجواني ( بس من فرع العزايزة عشان الفقر هناك وحش جداً )

[فــيــروز]

فاصل سريع قبل استئناف الرحله

الحقيقه وانا اكتب هذه الكلمات بالامس كنت اشعر بثقل ظلها واشفقت على نفسى من الحرج الذى اتوقعه لو وجدها البعض بالفعل ثقيلة الظل كما شعرت بعد الانتهاء من كتابتها .. لكن يبدو ان اعضاء المنتدى من الكرم بحيث انهم مش بيكسفوا حد خالص ..

امير :

الحقيقه انا كتبت هذه السطور فقط لانى كان نفسى امقل لكم بدقه اكبر احساسى فى الاجازه الاخيره لانى فعلا و الحمد لله كنت اشعر بسعاده خارقه وغير معتاده على الاطلاق .. طيب ايه رايك تعمل موضوع عن الذكريات الجميله و تسميه احلى الاوقات وكل واحد يدخل يكتب اجمل اوقاته؟

Peace

الحقيقه المره الوحيده التى ركبت الترام فيها فى القاهره كانت ايام الكليه .. كنت اذهب الى شارع الميرغنى فى مصر الجديده لاتلقى تدريب فى شركه معروفه .. ونظرا لانى وقتها كانت معلوماتى المواصلاتيه ضعيفه كنت اركب الترام من عبد المنعم رياض الى الميرغنى لكن الرحله لم تكن جميله مثل ترام اسكندريه .. او يمكن هى الحاله النفسيه هى التى تجعل الانسان مستعدا لان يفرح باشياء قد لا تسعده فى اوقات اخرى .. سمعت فعلا عن الترام ابو دورين لكن للاسف لم يكن هناك وقت لركوبه .. المره الجايه ان شاء الله

س.س.

فعلا كما قلت .. ترام القاهره بسبيله الى الانقراض للاسف .. وان كنت اشعر انه بهدوئه وبطئه غير منسجم مع ضجيجها وزحامها .. القاهره مدينه سخيفه

استاذنا ابو فصاد

رببنا يكرمك يا رب على كلامك اللطيف .. الحقيقه س.س. لا يبارى فى خفة ظله ما شاء الله

mnman

احنا رحنا نتغدى عند واحد اسمه حسنى فى بحرى تعرفه ده؟ السمك بتاعه جبار انا اكلت عنده مره قبل كده باحس انى بيجيلى انهيار تام بعد الانتهاء من اكل السمك اللذيذ بتاعه .. وباتنح ومايبقاش فيه حل غير الشاى بالنعناع الذى يقدمه بعد الاكل ..

انا زمان كنت باكره المعموره دى .. لكن الحقيقه الآن هى شاطئ فى غاية الجمال و لاحظت ان الاسكندرانيه معتزين به جدا هو و المنتزه

ايه رايك تشترك مع امير فى موضوع عن احلى الاوقات وتحكى فيه ذكرياتك فى الاسكندريه الجميله

( وش شكوكو في فيلم عنتر ولبلب )

يعنى ايه بقى !! انا سراج منير ولا عاوز تقول ايه بالظبط !! rs:

[amir]

ايه رايك تشترك مع امير فى موضوع عن احلى الاوقات وتحكى فيه ذكرياتك فى الاسكندريه الجميله

تعملوها ..... تعملوها

مش اعمليها !!

صعب اوى يافيروز يا بنتى .... صعب الواحد يفتكر حاجات حصلت من ييجى ...... تلات أو اربع سنين

انتى عندك ناس اسكندرانيه زى العسل هنا , هما يقولوا و تلاقينى انا كمان بقول على طول

انا خريج تجارة اسكندريه ... سنة ... سنة ... ولا بلاش , المهم كانوا بيقولوا علينا اخر جيل العمالقه.... يعنى قبل الغزو الفكرى ما يقضى على كل شئ جميل فى الجامعه

يعنى ايام الجواله و الاسر الجامعيه و الرحلات و المعسكرات ..... فين الايام دى

rs: rs:

[se_ Elsyed]

يعنى ايه بقى !! انا سراج منير ولا عاوز تقول ايه بالظبط !!  rs:

لأ يا فندم العفو ..

سراج منير كان ماشاء الله هجمه وحاجة كده 200 * 120 .... أما حضرتك فحاجة تانية خالص ، بس شكلك كده يدي على سعاد محمد بنت عبد الوارث عسر في الفيلم برضوا وكانت طالعه خطيبة لبلب ....

بالمناسبة دي بقى يا ست سعاد ماتمسعينا أغنيتك المشهورة " فتح الهوا الشباك والنونو طار مني " ....

والله العظيم كنت بأسمع الأغنية دي كده وأقول لنفسي شوف يا جدع أهمال الأمهات يعني الست واقفه في الشباك وماسكه طفلها فلذة كبدها وفجأة بمنتهى الإستهتار يقوم فالت من إيدها وواقع من الشباك من رابع دور ... لحد ما كبرت في السن وبقيت في أولى كليه كده وعرفت أنها " النوم طار مني " .. بس ماهي برضوا مصيبة .. أيه الست دي اللي كل حاجة عماله تطير منها وكأنها ساكنه فى الرن واي بتاع مطار أمبابة .

س س مؤرخ سينمائي وطيار سابق ونسر من نسور حرب أكتوبر كان عندو ساعتها سنتين ( إشمعنى أنا اللي مش هاتلزق في حرب أكتوبر )

[DARWEEN]

[b]

ولا الجيلاتي عند عزة في بحري...ياعيني علية...

ولا كشري المدهش في محطة مصر....

ولا محمد احمد (فول وطعمية)....

وسندويتشات عبده صواريخ في بحري

وخروب سامي في كامب شيزار

وهريسة العصافيري في محطة مصر

منك للي كلت دراعات الناس كلها يافيروز ماكنا قاعدين ساكتين :) :) :)

يابنتي المدام بتقرا المنتدى ودلوقتي الزن على الأجازه حيشتغل بعد موضوعك ده :lol: cof):

brd:: :lol:

احنا رحنا نتغدى عند واحد اسمه حسنى فى بحرى تعرفه ده؟

حسني على أيامي كان بتاع كباب وكفته ... يمكن فتح فرع سمك ؟؟؟

بس السمك عليكي وعلى قدوره و سمكمك ... ولو ناويه تبعزقي يبقى السي جل

باقولكم أيه ....

كفايههههه حرامممممممممممممممممم

[arabawy]

لكن ابو رية الكبابجي .بيعمل كباب من اللحمة اياها وللا لحمة اصلية ؟

[SANAA]

الغريب اعمي ولو كان بصير

المثل ده كنت باسمعه كثير جدا قبل ماسيب مصر بس عمري مفكرت فيه الا لما تغربت وايضآ اتذكره كل مره انزل فيها مصر لان معدل نزولي مصر مش كثير ودائما لما انزل بيكون في الاجازه ومعي زوجي واولادي وطبعا الاهل من الجانبين بيفرضوا الوصايه اللي هي في الحقييقه حب ولكن ده بيجعلنا نشعر باننا اغراب في بلدنا كل ما نسأل علي حاجه ليجبوها ليجوا معانا عشان منتهش

الاسكندريه من اجمل البلاد التي احببتها علي كبر بعد الزواج ف زوجي من الاسكندريه وطبعا لما بننزل الاسكندريه يقود هو السفينه يعني باكون وراه زي مايروح باروح

في يناير الماضي اضطررت لظرف عائلي ان انزل بمفردي بيني وبينكم قلت فرصه اكتشف مصر والاسكندريه وكل مصر من غير عيل ولا سيد

خلصت الظرف اللي انا نزله عشانه وبعدين سفرت الاسكندريه وبدأت اقول للناس اللي هناك انني ورايا مشاوير خاصه شغل يعني

وكنت كل يوم انزل من اول رشدي لغاية محطة الرمل مشي علي البحر قمه في الجمال وبعدين اروح جوه شويه اشرب قهوه في اي مكان في محطة الرمل وبعدين ابدأ في المشي الي القلعه علي بال ما اصل القلعه بكون خلصت بس اجلس علي البحر يجي ساعه او اتنين وبعدين اخد تاكسي لمحطه الرمل وبعدين انزل من التكسي واخد الترام من محطه الرمل الي المكان اللي انا ساكنه فيه كل يوم كنت باعمل العمله دي والناس يعيني فهمين ان انا ورايا مشاوير ياما بس لاول مره احس ان انا في بلدي قمه في الجمال علي البحر والترام لماذا لا يركبه الناس ويعتبروه مضيعه للوقت مع العلم ان معظم التكوسه(جمع تاكسي)موش مريحه واه لو ركبت بجانب السواق تحس ان رأسك ستضرب في سقف التكسي تصدقوا بالرغم انني لم اقضي في الاسكندريه الا 8 ايام كنت باروح كل يوم مكان لوحدي زي مارجلي تاخذني وبدون هدف كانت من احسن الايام كنت مع نفسي وايضا باكتشف الاسكندريه حتي الحواري وكم تمتعت بها كثيرا بالرغم ان دي كانت اقل مده قضيتها في الاسكندريه

يتبع--------

[se_ Elsyed]

كفاية حرام عليكوا بقى أحسن أنزل بالهليكوبتر بتاعتي أولع في القاهرة والزحمة وعدم النظافة .. بحيث نبقى قدام الأمر الواقع وتبقى إسكندرية هي العاصمة غصبٍ عن التخين .

[فــيــروز]

سراج منير كان ماشاء الله هجمه وحاجة كده 200 * 120 .... أما حضرتك فحاجة تانية خالص

يافندم العفو

بس خلى بالك .. مش يمكن انا فعلا مش سراج منير بس كوكا .. brd:: عموما سعاد محمد احسن من كوكا بردو نمشيها سعاد محمد

على فكره "كوكا دى تقريبا بطلة فيلم عنتر و عبله قريب فيلم عنتر و لبلب" :)

يابنتي المدام بتقرا المنتدى ودلوقتي الزن على الأجازه حيشتغل بعد موضوعك ده

الحقيقه انا منشكحه ايما انشكاح ان مدام حضرتك و مدام الاستاذ ابو فصاد متابعين المنتدى :lol: .. وممكن تقول لها على بال ما تيجى الاجازه نصبر نفسينا بمداخلات فيروز وهى ان شاء الله تقتنع

حسني على أيامي كان بتاع كباب وكفته ... يمكن فتح فرع سمك ؟؟؟

هذا صحيح .. حسنى عنده محل للحوم و آخر للاسماك ما شاء الله mfb:

لكن ابو رية الكبابجي .بيعمل كباب من اللحمة اياها وللا لحمة اصلية

انا اما اروح اسكندريه اشجب و اندد باكل اللحمه .. عشان كده مش هاقدر افيدك فى الموضوع ده :)

الغريب اعمي ولو كان بصير

تمام جدا .. ده كان احساسى وانا فى المواصلات رغم بساطتها و سهولتها :lol:

بس لاول مره احس ان انا في بلدي قمه في الجمال علي البحر والترام لماذا لا يركبه الناس ويعتبروه مضيعه للوقت

ده صحيح جدا انا فعلا شعرت انى لن اشعر بهذه السعاده فى اى مكان خارج مصر cof):

اما الترام فيحتاج يركبه شخص غير مرتبط بموعد عاجل حتى يمكنه الاستمتاع به على رواقه :)

يتبع--------

بس ماتغيبيش علينا cof):

[فــيــروز]

المعموره؟ :lol:

وافق سائق التاكسى رغم بعد المسافه حسب ظنى

اليوم جميل للغايه و الجو منعش جدا و الكورنيش غير مزدحم على الاطلاق cof):

سالنى : اين تريدين الذهاب فى المعموره؟ فقلت .. عند البوابات

فسالنى اى بوابه :)

حمدت الله ان اخبرنى الاصدقاء ان اطلب توصيلى عند بوابه يجاورها مزلقان و محطة بنزين

وكشخص حافظ الدرس جيدا طلبت توصيلى عند هذه البوابه المحدده

الحقيقه لا ارحب كثيرا بتبادل الحديث مع سائقى التاكسى لكن يبدو ان هذا السائق كان مصر على الحديث خاصة حين ادرك انى لست من الاسكندريه brd::

فوجدته يقول لى : لقد عرفت انك لست من الاسكندريه

الحقيقه شعرت بالغيظ لانى لم اجد اى فرق فى الشكل بينى وبين اى فتاه قابلتها فى الترام

فسالته : وكيف هذا؟

فاجاب لاننا حين نذهب للبحر ننزل مره واحده فقط فى اليوم لانه موجود دائما بينما المصيفون يقضون النهار بالكامل تقريبا فى البحر !! وهم يريدون ان يبدو فى ملامحهم آثار التصييف

فقلت فى نفسى : لكن انا لم تبد على ملامحى اى علامات للتصييف بعد !! :) فقد وصلت فى الثانيه صباح نفس اليوم .. ما علينا

الطريف ان ساكنى الاسكندريه يحبون القاهره !! هكذا قال السائق لكنه يفضلها ليلا .. بينما صرت لا افضل القاهره فى اى وقت من الاوقات :)

كما قلت فى السابق .. لمست اعتزازا من السائق بشواطئ المعموره و المنتزه .. ولم يكن هو الوحيد الذى يرى انهما من المعالم المميزه للاسكندريه .. وهم سعداء انها صارت شواطئ لا يدخلها المصطافون سوى برسوم عاليه بعد ان غزتها الجلاليب و حلل المحشى "طيب و اصحاب الجلاليب وحلل المحشى مالهمش نفس يصيفوا !! احتفظت برايى لنفسى طبعا" وكانت فرصه ان اسال بعد ان سالنى عن رايى فى الكورنيش الذى اتسع بشده .. cof):

ترى هل اهتم المحافظ بالاسكندريه كلها ام كان اهتمامه على الجزء الظاهر منها على الكورنيش؟ mfb:

فاجاب ان الاهتمام توجه فى البدايه الى الكورنيش و امتد بعد هذا للداخل "عكس ما سمعت من البعض ان الاسكندريه فى الداخل لم تمتد اليها يد التطوير التى امتدت الى الكورنيش"

بالمناسبه .. ابديت تعجبى للسائق من تزيين سور المستشفى بالنوافير و الرسوم البارزه التى خدعتنى وجعلتنى اظن انى اقتربت من مكتبة الاسكندريه .. فوجدته يقول ان هناك مشروع لتزيين واجهات جميع المبانى المطله على الكورنيش .. شئ جميل فعلا :lol:

وصلت اخيرا الى المعموره .. والتقيت باصدقائى و جلسنا فى كافيتريا مطله على البحر اسمها "ابيدوس" على ما اظن

منظر البحر غايه فى الروعه .. الهواء بارد لكنه لا يصيبك بالبرد ولكن بالانتعاش و السعاده خاصة ونحن نجلس فى مواجهة البحر مباشرة .. فى الماضى كنت اكره المعموره بشده .. حين كنا اطفالا نحاول السباحه فى بحرها حيث كان دائما هائجا .. لكنها هذه المره جميله للغايه حتى تعجبت من كراهيتى السابقه لها .. ليست مزدحمه .. حين رايتها آخر مره كانت فى شهر يناير الماضى .. خاليه و موحشه ينطبق عليها بشده المثل "جنه من غير ناس ما تنداس" لكنها هذه المره جنه بجمالها و ناسها

اكثر فئه تستمتع بوقتها فى المعموره او فى اى مكان على الارض هى الاطفال .. كانت هذه هى الافكار التى سرحت فيها ونحن جالسون فى ابيدوس .. وقلت فى نفسى سبحان الله الذى يغرس فى نفوس البشر غريزة الامومه او الابوه التى تجعل الآباء و الامهات

يتحملون فوق طاقاتهم لاسعاد هذه المخلوقات الصغيره التى تجرى و تمرح فى سعاده و براءه .. وجال بذهنى خاطر بشان النظام الاجتماعى المسمى الزواج ويراه البعض نظاما اثبت فشله .. فلو لم يكن هناك زواج يعرف فيه الابناء آباءهم ربما لم يجد كثير من

الاطفال من يرعاهم ويحنو عليهم وهم صغار ضعفاء .. ولم يجد الآباء و الامهات من يهتم بهم فى كبرهم و عجزهم .. فسبحان الله ntw:

تم تعديل 15 أبريل 2004 بواسطة فــيــروز

[Lighthouse]

حرام عليكو كفاية

شعري شعري

لا ده فيلم الحرمان

حرام عليكم ياجماعة يااللى شغالين سفر في كل حتة وبتغيظوا الغلابة المحبوسين في القاهرة وزحمتها وخنقتها .

لو مااخدتونيش معاكم في الاجازة الجاية ح انق عليكم :)

واصلوا

نحن معكم :)

[فــيــروز]

ماشى يا لايت من عيونى بس بلاش الطاسه اللى فى الصوره الرمزيه بتاعتك دى brd::

دى طاسه مش كده؟ :) :) :)