انت/ى كنتوا الأوائل؟؟ قـــولوا الحقيـــقة

[fatfouta]

امبارح بنعمل الهوم وورك ان اوابنى فبيقولى انا تعبان مش قادر هو كل يوم كده

انا عاوز اروح المدرسة العب بس لكن ماخدش هوم وورك وقرف

قعدت اضحك وقلتله لا لاااازم عشان تطلع الأول السنة دى عالكلاس او عالمدرسة بحالها

سـألنى سؤال كسفنى الحقيقة

قاللى .........ماما..هو انتى كنتى الأولى؟؟؟

قلتله...طبببببببعاااااااااااا يا خبيبى

بس بينى وبينكم انا لا كنت اولى ولا تانية حتى وحدود تفوقى كان لغايت ابتدائى

انما بقى بعدين....اقولكوا ؟؟ طب هحكيلكم بعدين

مين فيكوا كان من الأوائل؟؟

ومين كان ذكى وفى نفس الوقت شقى؟؟

ومين كان مافيش خالص؟؟

اللى يقول...يقول الحقيقة

واهو كلنا ستر وغطا على بعض

[لولا]

قاللى .........ماما..هو انتى كنتى الأولى؟؟؟

قلتله...طبببببببعاااااااااااا يا خبيبى

طب حاسبى بس يدخل هنا ويبقى شكلك وحش قصاده :wub:

الحقيقه ومن غير مبالغه انا كنت الحمدالله بطلع ديما من الأوائل فى المدرسة ..

كنت بنت هادية غالبا فى الإبتدائى وبعد كده بدأت انحرف شويه على اعدادى :lol:

يعنى معرفش ليه بدأت الشقاوة تظهر فى الوقت دوت بس كنت لسه برضو شاطره وم الأوائل .

لغااااااااااااااااااااااااية تالته ثانوى .. تخيلى خرجت من ترتيب الخمسة الأوائل .. والخمسه اللى بعدهم .. احم احم واللى بعدهم كمان

نجحت بتقدير جيد جدا وكانت صدمة جامده لماما وبابا

احم احم .. السبب ورا اللى حصل مش حقدر اقوله بس كانت نفسيتى تعبانه جدا وقتها وبسرح كتير لدرجة مكنتش بركز فى اى حاجه ..

تقريبا كنت كده زى اليس فى بلاد العجايب منفصلة عن العالم ..آه والله بجد :wub:

بعد الوعكة دى فوقت لنفسي طبعا لأنى زعلت انى زعلت ماما وبابا كده وقتها .

اممم بس عارفه انا حاليا مؤمنه ان مش مهم ترتيب الطفل ومجموعه العاااااااالى جدا لأنه ممكن يكون ذكى ومميز وشاطر وبيوزع وقته على اهتمامات

وانشطة مختلفه هيكون اثرها على تكوينه وشخصيته اهم من صرف كل الطاقه على المذاكره بس وكأنه داخل سباق .

تكوين الطفل وطريقه تفكيره وفهمه الواعى للماده اللى بيدرسها وانه يكون بيفكر فى كل شيء مش بيحفظه و بيتبع منهج التحليل كفيل انه يبقى شخص ناجح

فى المستقبل .

بس كده يا ستى :lol:

لولا

[myusername]

الاوائل مرة واحدة؟ طيب قولى كنتوا بتنجحوا ولا لا

انا كنت شاطر جدا... و تقريبا من الاوائل.. خصوصا فى رابعة و خامس ابتدائى...

فى الاعدادية.. ماكنتش شاطر فى اولى و تانية.. بس كنت شاطر جدا فى تالتة اعدادى... و جبت مجموع كبير على ما اتذنكر..

فى الثانوى... متفكرونيش بقى :lol: ساعتها كان كل تفكيرى ازاى اروح امريكا... و طبعا لا حصلت امريكا و لا حصلت اى حاجة خالص و دخلت خدمة اجتماعية... اهىء اهىء

[pocy]

ايه الموضوع الحلو ده

انا ياستى بقي ولله الحمد من الاوائل شاطره منيومى لحد ما دخلت الثانويه العامه وحسيت انى بنت والمفروض انى اهتم بنفسي شويه زى بقيه البنات بس برضه فضلت شاطره بس مش زى زمان ولما رحت الكليه واعتمدت كليا على نفسي مانا من زمان وانا معتمده على ربنا يكرمك ياماما انتى وبابا ويكرمنى بيكم وبدعائكم على بس لقيت عينات غريبه وناس اغرب وتعاملات من تحت لتحت وضغط عصبي فى المدينه الجامعيه وسبعه فى اوضه واحده اربعه فى اربعه كل ده طبعا كان ليه تاثير واختلاف الطبايع ومراعاه الناس خلت الشطاره راحت وبقيت بدور على المقبول كل سنه فى كليه هندسه وسبحان الله السنه الوحيده اللى التزمت بيها وكنت انسانه جديده جدا جبت فيها تقدير كبير بس الحمد لله

وناويه ان شاء الله ابنى يبقي اشطر منى واخليه يعتمد على نفسه بس يكبر شويه علشان دلوقتى هو لسه صغنون وانا بدأت معاه من الان فى الالعاب التعليميه وبيحب يذاكر فيها كل يوم معاى وكرهنى فى البطه والقطه والله العظيم بيقلي ب بطه ويجيب الكتاب بتاعه وياسلام على القلم والسبوره لازم نذاكر عليهم هههههههههههههههههههه

بس انا قلت احببه فيهم علشان لما يجي وقت الجد مش يكرهم

ايه الرغي ده كفايه كده ولى عوده ان شاء الله بعد كا م مشاركه كده ان شاء الله

[لى لى]

فى الجامعة فقط

تم تعديل 26 أبريل 2010 بواسطة لى لى

[hyyyr]

السلام عليكم ورحمة الله وبركاته

فيييين ايام زماااان فكرتينا بالذي مضى

الحمد لله كنت من الاوائل دايما ولأني

كنت في شبرا الخيمة يعني تبع القليوبية

طلعت الأول على المحافظة في الثانوية العامة

وكنت علمي رياضة ودخلت هندسة عين شمس

يااااه كانت ايام جميلة ولسه محتفظ بالجرايد

اللي فيها اسمي وصور تكريم فتحي سرور

اصله كان وزير التربية والتعليم ايامها

بالتوفيق لكل احبابنا المصريين

[joo]

انا كنت من الخمسة الاوائل لحد الصف الثانى الثانوى

ولقد قرر ابى اللة يسامحة انى اذاكر مع اخويا الكبير فى نفس الحجرة علشان اشجعة على المذاكرة

وطبعا حدث العكس تماما بدلا من انى اشجعة على المذاكرة شجعنى هو على كيفية تضييع الوقت فى اى كلام على اى كلام

وكانت النتيجة بدلا من دخولى كلية الصيدلة دخلت تجارة والحمد للة

[Alrefaey]

فى الابتدائى عمرى ماذكرت ولا حد ذاكرلى

وطلعت الاول على المدرسه اذاى ما اعرفش

فى الاعدادى الاول ايضا طول الثلاث سنوات وبردة بدون مذاكرة

فى الثانوى بدأت اذاكر واخد دروس طلعت الاول طوال الثلاث سنوات وفى الثانوية العامه لم احضر يوما واحد فى المدرسة وكلة مذاكرة فى البيت والدروس

وجبت مجموع يدخلنى جميع كليات القمة ولكنى للأسف صممت على صيدله

فى الجامعة

تقدير عام امتياز وثالث الدفعة .

خمسة وخميسة اوعى حد يحسد

[engmido]

فترة ابتدائى .....من الاوائل

فترة اعدادى.......مستوى متميز ولكن مش من الاوائل

فترة ثانوى......مجاميع عالية ثم هندسة القاهرة

فترة الجامعة.....مستوى متقلبا بين عالى ومتوسط ومنخفض لكن طلعت بتقدير جيد وجيد جدا بكالوريوس

-----------------------------------

ايه ده يابوسى انتى مهندسة؟؟؟؟؟؟؟؟؟

طب هندسة ايه دفعة كام؟؟؟؟

[لولا]

فى الابتدائى عمرى ماذكرت ولا حد ذاكرلى

وطلعت الاول على المدرسه اذاى ما اعرفش

فى الاعدادى الاول ايضا طول الثلاث سنوات وبردة بدون مذاكرة

فى الثانوى بدأت اذاكر واخد دروس طلعت الاول طوال الثلاث سنوات وفى الثانوية العامه لم احضر يوما واحد فى المدرسة وكلة مذاكرة فى البيت والدروس

وجبت مجموع يدخلنى جميع كليات القمة ولكنى للأسف صممت على صيدله

فى الجامعة

تقدير عام امتياز وثالث الدفعة .

خمسة وخميسة اوعى حد يحسد :happy:

احب اقولك انى قريت سيرتك الذاتيه .. وحيث انك كنت بتنجح بامتياااااااااااااااز وتفوق من غير ما تذاكر فى الإبتدائى و الإعدادى فأنا مش حقول ماشاء الله mfb:

يعنى كنت بتلعب واحنا مش ملاحقين من الهوم وورك والمذاكرة .. وفى الآخر بتطلع الأول

فكرتنى باخويا ... كانت عنده كتب تيجى تفتحها تلاقى فى صفحات ملزقه فى بعض عمره ما فتحها كان بيعتمد على الشرح فى الحصه غالباوكان متفوق وعنده قدرة مخيفه على التحليل والمناقشة ..اساتذته كانوا معجبين بيه جدا وبقى شخص هايل وناجح دلوقتى ماشاء الله .

سبحان الله يعطى من يشاء بغير حساب

طيب .. ماشاء الله يا سيدى ربنا يوفقك ديما mfb:

لولا

[ابوهنا]

انا كنت الاول على المدرسه من اولى ابتدائى حتى تانيه ثانوى

فى تالته ثانوى حبيت (يخرب بيت الحب وسنينه) طبعا مابقتشى الاول وجبت 80%

00000000000

00000000000

سنه تالته حبيت تانى (يخرب بيت الحب وسنينه) جبت جيد

000000000

000000000

000000000

فى السنه التالته....اتجوزت (يخرب بيت الجواز وسنينه) فشلت وجبت فى الماجيستير جيد

فعلا انا معاك يخرب بيت الحب وسنينه

بتفكرنى بقصه وحده صاحبتى

[Damo]

في المدرسة كنت average . طول عمري كان عندي مشكلة فظيعة. مهما ذاكرت و اكلت الكتب اكل مستوايا بيفضل زاي ما هو!!! و كنت بتنرفز قوي لان اختي كانت العكس تماما. ايام الامتحانات انا كنت اقفل الاوضة على نفسي و اقعد اذاكر و هي تسهر على التلفزيون. و بعدين في الاخر اطلع انا average بردو و هي تطلع الاولى او التانيه

كنت بفرحلها طبعا بس في النفس الوقت بتقهر قوي. المادة الوحيدة اللي طول عمري اجيب فيها درجات عالية البيولوجي.

بعدين لما بدأت الجامعة كل حاجة اتغيرت. درجاتي كلها ضربت لفوق و اقل وقت زياة في المذاكرة بيعمل فرق جااامد في النتيجة. عشان كده انا مفضله الجامعة اكتر كتير و المدرسة مش وحشاني خالص. الواحد بيحس ان تعبو له فايده

[Alrefaey]

فى الابتدائى عمرى ماذكرت ولا حد ذاكرلى

وطلعت الاول على المدرسه اذاى ما اعرفش

فى الاعدادى الاول ايضا طول الثلاث سنوات وبردة بدون مذاكرة

فى الثانوى بدأت اذاكر واخد دروس طلعت الاول طوال الثلاث سنوات وفى الثانوية العامه لم احضر يوما واحد فى المدرسة وكلة مذاكرة فى البيت والدروس

وجبت مجموع يدخلنى جميع كليات القمة ولكنى للأسف صممت على صيدله

فى الجامعة

تقدير عام امتياز وثالث الدفعة .

خمسة وخميسة اوعى حد يحسد mfb:

احب اقولك انى قريت سيرتك الذاتيه .. وحيث انك كنت بتنجح بامتياااااااااااااااز وتفوق من غير ما تذاكر فى الإبتدائى و الإعدادى فأنا مش حقول ماشاء الله mfb:

يعنى كنت بتلعب واحنا مش ملاحقين من الهوم وورك والمذاكرة .. وفى الآخر بتطلع الأول

فكرتنى باخويا ... كانت عنده كتب تيجى تفتحها تلاقى فى صفحات ملزقه فى بعض عمره ما فتحها كان بيعتمد على الشرح فى الحصه غالباوكان متفوق وعنده قدرة مخيفه على التحليل والمناقشة ..اساتذته كانوا معجبين بيه جدا وبقى شخص هايل وناجح دلوقتى ماشاء الله .

سبحان الله يعطى من يشاء بغير حساب

طيب .. ماشاء الله يا سيدى ربنا يوفقك ديما mfb:

لولا

يافندم لى الشرف انى فكرتك باخوكى , بس عارفه مدام لولا التفوق له اساسيات مثلا المذاكرة وحضور المحاضرات وتنظيم الوقت كل ده جيد بس ممكن شخص ما يعمل الكلام ده كله وما يجبش امتياز او ممكن جيد جدا

بالاضافة الى العوامل الاساسية اعلاه لابد من التوفيق وتشغيل الدماغ فى بعض الامور

بمعنى اثناء المحاضرات يمكنك تخمنى الدكتور هيجيب ايه فى الامتحان ومش هيجيب ايه

هضرب لحضرتك مثل الكليات العمليه زى ماحضرتك عارفه فيها شفوى والشفوى يكاد درجته تساوى التحريرى

عايز اقول لحضرتك انى كنت احيانا بستدرج الممتحن انه يسألنى فى اسأله انا اجيد اجابتها وبكون عارف انها هتعمله اعجاب واندهاش smk:

وكنت بحاول انى اتلاشى انه يدخلنى فى جزئية انا ضعيف فيها .

وقبل كل شىء هى توفيق وبركة دعاء الوالدة

دومتم بخير :happy:

[بركة]

قاللى .........ماما..هو انتى كنتى الأولى؟؟؟

قلتله...طبببببببعاااااااااااا يا خبيبى

طب حاسبى بس يدخل هنا ويبقى شكلك وحش قصاده smk:

الحقيقه ومن غير مبالغه انا كنت الحمدالله بطلع ديما من الأوائل فى المدرسة ..

كنت بنت هادية غالبا فى الإبتدائى وبعد كده بدأت انحرف شويه على اعدادى mfb:

يعنى معرفش ليه بدأت الشقاوة تظهر فى الوقت دوت بس كنت لسه برضو شاطره وم الأوائل .

لغااااااااااااااااااااااااية تالته ثانوى .. تخيلى خرجت من ترتيب الخمسة الأوائل .. والخمسه اللى بعدهم .. احم احم واللى بعدهم كمان :happy:

نجحت بتقدير جيد جدا وكانت صدمة جامده لماما وبابا

احم احم .. السبب ورا اللى حصل مش حقدر اقوله بس كانت نفسيتى تعبانه جدا وقتها وبسرح كتير لدرجة مكنتش بركز فى اى حاجه ..

تقريبا كنت كده زى اليس فى بلاد العجايب منفصلة عن العالم ..آه والله بجد :sad:

بعد الوعكة دى فوقت لنفسي طبعا لأنى زعلت انى زعلت ماما وبابا كده وقتها .

اممم بس عارفه انا حاليا مؤمنه ان مش مهم ترتيب الطفل ومجموعه العاااااااالى جدا لأنه ممكن يكون ذكى ومميز وشاطر وبيوزع وقته على اهتمامات

وانشطة مختلفه هيكون اثرها على تكوينه وشخصيته اهم من صرف كل الطاقه على المذاكره بس وكأنه داخل سباق .

تكوين الطفل وطريقه تفكيره وفهمه الواعى للماده اللى بيدرسها وانه يكون بيفكر فى كل شيء مش بيحفظه و بيتبع منهج التحليل كفيل انه يبقى شخص ناجح

فى المستقبل .

بس كده يا ستى mfb:

لولا

كلام في الصميم يا لولا انا بعمل كده مع ولادي عشان يحبوا العلم والاستكشاف وتشغيل الدماغ

عشان كل واحد منهم اسيبله فرصة يخرج لي الموهبة اللي فيه ويعبر عنها كويس

وبالتالي ننميها سواءا تفوق علمي او فني او ادبي ..

عشان مايحصلهمش زينا

واللي مشجعني على كده ان والدهم فنان في الرسم والنحت طول عمره لكن موهبته اتدفنت

في كلية تجارة عشان مجموعة ومكتب التنسيق وفضل محروم من التمتع بنعمة ربنا دي

لحد ما جيت انا mfb: وصدقت موهبته وشجعته و لحد ما ربنا وفقه وبقى مصمم جرافيك

له بصمته ....

ربنا يخليهولنا :wub:

[فــيــروز]

أنا بقت نظرتى لموضوع الأوائل ده تختلف ..

لحد الإعداديه كنت دائما من الخمسه الأوائل على الفصل ..

فى ثانوى الموضوع كان فقد قيمته و معناه و كان يكفى جدّا بالنسبة لى إنّى أذاكر كويّس و أبقى فاهمه اللىّ بادرسه فقط لأنّه هيكون مهم فى الثانويه العامّه اللىّ جبت فيها مجموع كبير نسبيا ..

دلوقت أنا باشوف موضوع الأوائل ده عديم القيمه .. المهم يكون التلميذ بيحب المذاكره .. بيحب يفهم و يتعلّم .. بيحب يسأل و يعرف و يجرّب .. بيحب -طبعا- يقرا .. فى النهايه يطلع من الأوائل أو مايطلعش مش قضيه المهم يكون بيحب فكرة التعلّم نفسها و أى شئ بعد كده مقدور عليه ..

[doha]

عن نفسي عمري ماطلعت برا العشرة الاوائل بس برضه عمري ماكنت من الخمسة الاوائل غير في سنة واحده اظن ثاني اعدادي واخذت جائزه يومها

الغريب اني اصلا عمري مااهتميت اذاكر غير بعد الجامعه يعني في الدراسات العليا ومابعدها اما قبل ذلك ففعلا كنت بلعب طول النهار وبدخل الامتحانات بدون مذاكرة كمان وبنجح وبجيب درجات نهائيه فيها

كنت بحب اوي احضر الحصص واشارك واجاوب على اسئلة المدرسات وكنت بحب اشترك في الانشطه المختلفة في المدرسة وكان لي شعبيه بس مكنتش احب اني اقعد اذاكر ساعات وطول عمري بذاكر ليلة الامتحان بس ده ان ذاكرت اصلا

عمري ماكنت مشاغبه معرفش ليه دائما بلتزم بالقوانين بالحرف والنص . كنت تلميذ مطيع وان كنت كثيرة الاسئلة جدا بدرجه تزهق المدرسات احيانا لما يكونوا لسه جداد وفي احيان اخرى تخلي المدرسة ( تتبناني ) وتشيد بي في كل محفل وتقولي هيكون لك مستقبل

اييه كانت ايام ..

بس بقولها بثقة مطلعتش الاولى ومش هنصب على بنتي وافهمها العكس بس اكيد اتمنى برغم كده انها هي تطلع الاولى لاني بعد ماكبرت اكتشفت ان حرام الواحد ربنا يديله نعمه وميكونش حاسس بيها وحرام اني كنت بنجح بدون مذاكرة واساوي نفسي بالي مموت نفسه مذاكرة ليل نهار .. كان المفروض اعمل زيهم واموت نفسي مذاكرة لان الواحد المفروض يعمل اقصى مايقدر عليه مش يكتفي بالوصول لاقرب ماامكنه الوصول اليه

(( واثقة ان لو رجع الزمن هتصرف نفس التصرفات بيني وبينكم الحياه حلوة نضيعها في المذاكرة ليه ؟ ))

[fatfouta]

بس بقولها بثقة مطلعتش الاولى ومش هنصب على بنتي وافهمها العكس

قصدك ايه يا ضحى انا نصابة يعنى :sad:

ماكانش العشم :blink:

[doha]

بس بقولها بثقة مطلعتش الاولى ومش هنصب على بنتي وافهمها العكس

قصدك ايه يا ضحى انا نصابة يعنى :sad:

ماكانش العشم :blink:

لا والله يافتفوته العفو

بس وانا بكتب كان في ذهني يحيى الفخراني في محاكمه علي بابا لما قال لابنه انه الاول على مدرسة التوفيقية وازاي كلنا اكتشفنا بعد كده ان اهالينا كلهم متخرجين من التوفيقيه !!

انا متخرجتش منها وعلى هذا مش هنصب على بنتي زي الفخراني ماعمل مع ابنه

معليش جات فيكي يافتفوته ومش انتي المقصوده

[MZohairy]

طول عمري الأول

[fatfouta]

هقولكم انا بقى

انا طول عمرى بكره المذاكرة وزمان وانا صغيرة كنت فى تانية ابتدائى وكان بابا بيذاكرلى فسألته ليه بنذاكر يعنى؟؟ قاللى عشان الامتحانات

قلتله وهما بيمتحنونا ليه هما شاكين فينا؟؟؟ :blink:

طبعا كنت بكره الامتحانات جداااااااا وماينوبنيش منها غير وجع البطن وخلاص

فى ابتدائى كنا راهبات كان لازم اذاكر طبعا انضباط مافيش كلام...بس هقولكوا على حاجة سر انا ساعات كنت بعتمد على ان بابايا مدرس وماحدش هيقدر يعملى حاجة لان كل المدرسين يعرفوه وبيحبوه

انا أقرأ بمزاجى ماشى لكن تدينى كتاب وتقولى اقرى عشان هتمتحنى فيه اكرهه عما وماطيقوش

ولما طلعت اعدادى حسيت بمسئولية شوية فبقيت اذاكر وبرضو وانا مضايقة وزهقانة ويا دوب الامتحانات تخلص

اجرى اطلع ابر التريكو واقعد اشتغل تريكو...هواياتى بقى

كنت اقعد فى الاوضة اعمل نفسى بذاكر واقعد اشتغل تريكو واخلص بلوفرات كمان وماما تقولى انتى بتعملى ده امتى...كنت اقولها بعمله فى المدرسة

فى ثانوى لما جيت دخلت كانت اختى فى سنة تالتة وانا فى سنة اولى....كانت هى آية فى الهدوء فطبعا قالوا دى بنت هادية ذى اختها وقبلونى لان مدرستى رغم انها كانت حكومة ماكانوش بيقبلوا اى حد

ولما دخلت بعد كام شهر بانت المواهب....بقى المدرسين يقولوا سبحان الله اختك حاجة وانتى حاجة...بس كنت شاطرة والمدرسين بيحبونى جدااااااا والله بس من غير مذااااااااااكرة

اختى مشيت بقى ودخلت الكلية وانا وصلت لسنة تالتة قوم ايه بقى دخلت معايا اختى اللى بعدى بقت هى سنة اولى...اخده المدرسين عنها فكرة انها شقية وهى كانت آية فى الهدوء :)

وكنا شبه بعض قوى انا وهى وفى مرة مشرف الدور شافها عندنا قام مزعق لها وقالها هو انتى مش هتبطلى تزويغ؟؟ :lol:

تعالى اما اوديكى للمديرة وقام وداها وهى يا عينى قعدت تعيط لغايت مانا روحت خلصتها wst::

كنت كل يوم اخد حكم ذاتى لانى انا وواحدة صاحبتى كنا بنتلكع فى الشارع عشان نوصل متأخرين وناخد حكم ذاتى ومانحضرش فى تالتة ثانوى

بس عمرى مانطيت سور والله كانت متعتى انى افضل فى حوش المدرسة واول ماشوف مشرفين الادوار استخبى ورا المبانى ونقعد نرغى بلا مذاكرة بلا كلام فاضى

وكنت علمى ساعتها جيت ساعة الامتحانات حصلى تسمم فى يوم امتحان الجبر والسنة دى كان امتحان الجبر ده من صعوبته اتكتب عنه فى الجرايد

ودخلت المستشفى فى ليلتها وطلعت من المستشفى محمولة عالاكتاف عاللجنة وماحلتش حاجة ونزلت فى الجبر وكان مجموعى كله على بعضة 79%

وانا كان نفسى ادخل هندسة وهندسة فى السنة دى اخدت 72 وتلتين فى المية...وانا طبعا كنت ساقطة :sad:

جالى احباط والسنه اللى بعدها بابا قعد يهديكى يرضيكى كملى فى علمى وانا ابداااااااااااا ودخلت ادبى وماكنتش حابا الجغرافيا والتاريخ طول عمرى بحب الرياضة والعربى بس :wub:

جبت مجموع دخلنى كليه تجارة عين شمس وخلاص على كده

لسه ماخلصتش ده حصلت كوارث فى الكلية وهقولكوا قعدت فيها كام سنه بس إيدى وجعتنى من الكتابة

لنا عودة wst:: wst::

تم تعديل 27 أبريل 2010 بواسطة fatfouta