خواطر وافلام .. تثير الآلام

[achnaton]

هذا الموضوع قد يكون صالح لباب مكافحة الفساد أو السياسة الداخلية .. ولكن لأن البداية إعلام .. فأستذن اخونا الفاضل شريف عبد الوهاب فى إستضافتنا عنده ..

بسم الله الرحمن الرحيم

فى السنوات الأخيرة .. بيمر على خاطرى أفلام تسجيلية قصيرة بين الحين والآخر وخاصة فى اوقات حساب النفس الذى تعودت عليه من زمان .. الأفلام دى قام الكمبيوتر الربانى بتخزينها بنجاح بالغ .. وإستدعاء تلك الملفات المخزنة لا يتطلب منى تعديل برامج أو تحميل برامج .. فالواحد كل ما بيروح فكرة أو تسقط عينة على حدث .. يجرى الكمبيوتر الربانى عملية ربط سريعة .. ولا يكتفى بعرض الوابط ولكن يستعرض معها مقطفات من صور الملف ..

ومن يوم النكسة الأقتصادية .. اللى حققها مماليك مصر الجدد - بكل أنواعهم -.. وبصفة خاصة " المماليك العبيدية "{ وعلى فكرة " العبيديون " دول جماعة معروفة تاريخيا بأنها جماعة رافضة لكل شئ تكره النجاح وتسعى الى الأفلاس وظهرت فى مصر فى القرن الثالث الهجرى ولم يخلصنا منها سوى الناصر صلاح الدين يوسف بن أيوب رحمة الله عليه ... }

والنهاردة قرأت فى احد الجرائد المصرية أن قائد القوات الجوية المدنية { وده منصب جديد إستحدثه الدولة للأستفادة من أرباب المعاشات والمحالين الى الإستيداع من السلاح الجوى فى النهوض بالطيران المدنى المصرى .. فقاموا بإحتلال مصر للطيران بل ولوزارة الطيران المدنى بالكامل وللتمويه لبسوا بدل وكرفاتتات ولفظوا الكابات ) قرأت أن معاليه رفض بعد دراسة طلب وزير السياحة بتأجيل إلغاء بعض الخطوط حتى نهاية الموسم السياحى الحالى .. ويحيا الثبات على المبدأ وعلى ابعاد حقل التجارب الجديد .. والناس بتوع السياحة دول ناس ما بتفهمش فى السياحة .. والطيارين أنصح وادرى .. والأدهى والأمر .. معالى الفريق طيار يفكر حاليا وبجد مش هزار أن يرفع أسعار تذاكر الطيران وحسب ما جاء فى الخبر .. أسوة بما اتبعته الشركات الأجنبية ومحدش حد أحسن من حد .. واحنا برضه ممكن نرفع .. وياريت معاليه يقولنا من هذه الشركات .. وكيف رفعت الأسعار ولمن ولماذا ؟؟

ومن باب الفضول .. النهارده عملت جوله فى النت أشوف أسعار الطيران .. من المانيا الى مصر .. شفت العجب .. ولا أريد التطويل .. ممكن آى رابط للسفر فى النت يكشف لكم الأسعار ..

ومن الأفلام اللى شفتها النهاردة وانا متفرغ للأفطار .. الفيلم التسجيلى بتاع كتائب النفاق الإعلامى .. وكنت ساعتها أتفرج على على نشرة الأخبار فى قناة تليفزيون الريادة .. { طبعا عرفوتها } .. وتأكيدا للفزورة حنساعد شوية حتى لا تحتاجوا لصديق أو رأى الجمهور .. القناة دى بنصرف عليها من اموال الزكاه اللى بتصب فى بيت المال .. ولها فى كل خرابة عفريت .. لأ .. كذا عفريت .. فلها فى كل دولة مكتب تابع للهيئة العامة للأستعلامات .. موظفين وسعاه وعربات .. وسكن .. وقولوا اللى انتم عاوزينه .. ولها كذلك مراسل .. بنصرف برضه عليه وعلى أعما له .. ولها زى ماهو حاصل فى برلين " ممثل " صحيح هو مش عضو فى نقابة السينمائيين .. ولكن معاه صك وزارى بإعتبار سنه " ثلاثين " بدل " سبعين " وعينة ممثلا لمبنى الفساد إياه بمكافأه شهرية تكاد تكون ضعف آى ماهية { وزغردى ياللى انت مش غرمانه .. حيودوا مليارات المساعدات فين ؟؟ .. واللى معاه قرش محيره يعين فى الشغل مستشارين حسب القوانيين ويطيره } .. وبجانب دول .. لكل مؤسسة صحفية مندوب أو أثنين وماكتب ثابته ومتنقله .. وسكرتارية ومدير مالى ومدير ادارى وخلافة .. والشهادة لله بيت المال ما بيصرفش عليهم .. دى خزينة المؤسسة .. المكتوب على بابها " يا ناس ياشر بطلوا قر " .. وحنبطل قر .. ولكن حنسأل سؤال محدد .. ما ينفعش كل دول فى تغطية زيارات رئيس الدوله للدول المختلفه .. ولا لازم اللى يغطى أخبار الزيارة أصحاب السعادة رؤساء التحرير .. أمثال سى ابراهيم وسى سمير ؟؟ ويا ترى على حساب مين ؟؟ بيسافروا وبيناموا وبيأكلوا .. وبيأخدوا كذلك بدلات ؟؟؟ طب شرم الشيخ .. والأمر يعنى مش دباح قوى حندفع بالجنيه المصرى والحساب يجمع .. لكن فنادق امريكا واوربا هل ستقبل الجنيه بتاعنا .. ؟؟ وإيه الإضافات الإيجابية اللى أضافها سفرهم لحالتنا الإقتصادية .. وعملوا كام تعاقد مع المستوردين فى تلك الدول .. لإستيراد إنتاجنا المتاح مثلا .. واللى يقول إنه فعلا كان هناك تعاقدات .. مش كذاب .. ولا مهرج .. عملوا فعلا تعاقدات .. لكن مع " المولات " الكبرى فى تلك الدول لملئ شنط الهديا .. ماهى برضه تعاقدات .. !!

اللى يغيط فعلا .. ويرفع ضغط الدم .. بعثة التلفزيون المرافقة .. بالكاميرا والكارفته .. حتى المذيع الشاب .. راسم نفسه تمام ..وبيقمص شخصية طاهر ابو زيد او واحد من جيل الريادة .. ولكن طريقة كلامة تكره الواحد فى الأنصات

يبدأ بجملة واحدة صح فى علم الخطابة .. وبعدين يظهر على حقيقته .. مد فى الكلمة وتقطيع للجملة حيث لا يجب التقطيع .. والإصرار على عزف نشيد النفاق فى كل رسالة .. فى البداية والنهاية .. ما علينا .. عاوزين نعرف أمال مراسلى التلفزيون هناك .. وللى عايشين فى المجتمع راحوا فين ؟؟ وإيه مناسبة بعثة مرافقة .. وهناك بعثات مقيمة ومن جميع الأصناف .. ؟؟

طولت عليكم .. طيب نكمل بعدين ..

أخناتون المنيا

taz:: taz:: taz:: :)

[مصر عشقى]

يسلم قلمك يا عمنا اخناتون المنيا

ياريت تسأل جدك الشيخ حسن لانة راجل طيب ومكشوف عنة الحجاب عمنا ابراهيم عمل القصر اللى عايش فية ازاى وهية المرتبات والبدلات فى مصر المحروسة بعمل قصور زى قصور الف ليلة وليلة دى

[Sherief AbdelWahab]

عمي الكبير أخناتون..

ماأظنش إنك محتاج استئذان لدخول باب الإعلام ;) ..البيت بيتك و أنا مجرد ضيف..

صلب الموضوع:

فيه مواضيع كتير بتلخبطني..مش عارف أبوبها فين..خصوصا تلاحظوا معايا ان فيه قفلة بين مواضيع الإعلام و الفساد مش عارف ليه..فيه مواضيع هنا ممكن تيجي هناك و العكس بالعكس!..

لكني شايف ان الموضوع له علاقة بالضغط و ارتفاعه و انخفاضه أكثر من الفساد و سنينه ..

الفقع إللي على أصوله في تغطيات زيارات السيد الرئيس لبلاد أنكل سام..بيبتدي من قبل الزيارة و أثناء وبعد الزيارة..خاصة بعد أن تفتق ذهن صفوت الشريف عن فكرة جهنمية نارية ملتهبة لملء فترة النشرة عندما لا تكون في الدنيا أخبار يغطيها الجميع قبلنا..وهي فكرة"اهتمت وسائل الإعلام بحديث سيادة الرئيس أول أمس..."..الجديد السنة دي الاكليشيهات الجديدة "الاصلاح من الداخل أولا..الشرق الأوسط الكبير..مش عارف إيه"....برضه مساحة لملي النشرة الفاضية و البرامج الفاضية و التليفزيون الفاضي..أصل احنا فاضيين لهم..يكونش احنا فاضيين لهم و لا فاضيين لهم؟! wst:: :angry:

كمان حاجة..لاحظوا إن المنافسة دخلها بن حمودة بتاع صويت الأمة المستقلة التي تغسل أكثر بياضا..هو من ناحيته حاسس إن فيه مرحلة جديدة عايزة راجل جديد..وهو متصور إنه ح يقدر يلعب الدور زي ما لعب علينا أدوار بالجملة و القطاعي ..

آه يا كانتري.. :angry:

و للحديث بإذن الله تعالى بقية..

خلص الكلام