القذافي يلغى القوانين الإستثنائية

[kokowawa1979]

أعلنت قناة الجزيرة أن القذافي قد أمر بإلغاء كافة القوانين الاستثنائية في ليبيا وهي تماثل قانون الطوارئ في مصر وكذلك إلغاء محمة الشعب التي تماثل المحاكم العسكرية في مصر

ياترى إيه اللي جرى له !!!

أمال مال رئيس جمهورية الموز ماسك بإيده وطقم سنانه على البلد بقانون الطوارئ والمحاكم العسكرية

والآخر يقولوا احنا بدأنا الإصلاح من 10 سنين -طب بإمارة إيه !!

كدة القذافي هيورط حبيبنا لأن بكرة أمريكا هاتثني على شجاعة القذافي وتقول يجب على العائلات المالكة الأخرى أن تحذو حذو القذافي قائد الأمة العربية الجديد wst::

[DARWEEN]

الرجل القذافي دا يجنن بجد ...

يعني لما يقلب يقلب 180 درجه

يعني من عربي قومي لأفريقي منحاز

ومن شمولي متشدد لأخضر متوحد لأمريكي ديمقراطي

وشويه يقولك أمريكا الأمبرياليه الأستعماريه وشويه يقولك أنا بأحب أمريكا

دي حاجه تراللالللللييييي عالآخر

wst:: :angry: :angry: ;) ha) ha) ha)

[se_ Elsyed]

مجرد وجود القذافي على كرسي العرش طوال هذه الفترة هو حالة إستثنائية في حد ذاتها وبصراحة شعبه وشعب نفاقستان المجاور يستهلوا كل اللي يجرى لهم ... حتى لو أصدر رؤساءهم إن الأكلة الشعبية للبلاد تبقى البرسيم - لا مؤخذه يعني -

لأن زي ماحنا شايفين الحال في مثل هذه الديكتاتوريات .. الراجل الكبير ياخد القرار - أي قرار - يسقفوا له ، ييجي بعد شوية ويلغي نفس القرار يرقصوا له ....

إيه ده ... دي حاجة تقرف وناس مالهاش كبير .

[Abouhemeed]

بسم الله الرحمن الرحيم

مالك يا سيدي رجعت ف كلامك ليه؟

دا الراجل مننا كلمته محسوبة عليه

يوم تقول كلام و تمشي متلفع بيه

خايف اليانكي يزعل فتطولك اديه ؟

يتغير كلامك و تقول حرمت يا بيه

أديك شايف بيكم حالنا ما يسرش حد

سواء قلنا اللي ف قلبنا و لا بقنا إنسد

كل الناس الدنيا أخذينها جد في جد

و إنتم أخذينها عبط و هجص ماله حد

و الله لو بإيدي ع الرجلين لنزلت فيكم مد

من طفولتي بتسمعوني كلام كبير حسبتكم منقذين

لنا من فقرنا و جهلنا و لشأننا في وسط الأمم رافعين

قضيت شبابي أهتف لكم و أعتبر معارضيكم خاينين

تقولوا دا العدو أجري بالسلاح و معايا شباب كتير آخرين

أحاربهم عشانكم و لا عشان الوطن كنتم واحد لنا لتنين

جعت أنا و عيالي و تقولوا أصبر على طرح البساتين

زرعناها عشانك و عشان عيالك لتعيشوا مبسوطين

و مدارس فتحناها لكم و بكره راح تصبحوا متعلمين

لا أكلنا و لا اتعلمنا و كل العيال جعانين عاطلين

و انتم و حبايبكم في هارديز و كنتاكي قاعدين

من زمان و إنتم على كراسي الحكم لازقين

تحكموا و تتأمروا علينا كأنكم من ربنا مبعوتين

جبتونا ورا مليون سنه و على جهلكم صابرين

نشكي لمين ظلمكم ... لكم؟ و لا لعدا متربصين

فوضنا الأمر لله ياخدكم و يرحمنا من المجانين

أبو حميد المصري

[se_ Elsyed]

الجمهورية 29/4/2004

دعوة لاعبي شطرنج اسرائيليين لزيارة ليبيا

القاهرة 'د. ب. أ'

قالت صحيفة يديعوت احرونوت الاسرائيلية ان دعوة وصلت الي اتحاد لاعبي الشطرنج في اسرائيل للمشاركة في بطولة العالم التي ستجري في العاصمة الليبية طرابلس في منتصف يونيو المقبل.

وقال موقع الصحيفة علي الانترنت ان الدعوة تحمل توقيع محمد معمر القذافي نجل الزعيم الليبي والذي يرأس اللجنة الاوليمبية في بلده.

يالا إشمعنى إسرائيل اللي مش هايبقى لها نفس تحضر عروض الإستربتيز التى ينظمها القذافي وأولاده .. وبكره نعيش ونشوف .. بس بكره تفتكر كلام س س يا أبو القذاذيف ... كان غيرك أشطر واللي خديته القرعة بكرة تاخده ام الشعور .....وصدقني يابني نهايتك في الاخر هاتبقى بشوز أمريكي طائش على دماغك وبرضوا هاتتفلى وهايخرجوا بلاوي من شعرك الكنيش .. أما إبنك الساعدي فمش هايتفلى لأن ماعندوش شعر .. بس برضوا الأمريكان هايشوفوله صرفه ومش هايغلبوا فيه .

[حشيش]

الموضوع ببساطة أن القذافى لما شاف صدام حسين وهوه شعره منكوش وواد عسكرى أمريكانى عمال يقلب فيه وهوه لابس جوانتى مخافة أن يصاب منه بالجرب وعمال يدور على أسلحة دمار شامل داخل فمه قد استوعب الدرس وعرف إن الكلام الفارغ بتاع الكتاب الأخضر والكلام عن الإمبريالية التوسعية مش حينفع مع العالم دى وإنه سيواجه نفس المصير عما قريب راح جايب زيت وقلب على الوش التانى fsh:: me0: art:)