ليلة جميلة يا محلالاهاا...

[Folana]

السلام عليكم ورحمة الله....

" ليلة جميلة يا محلالاهااا...فاتت وعمرى ما انسااهااا

قررت من فترة قصيرة أن أرحم نفسى وأنقذ اولادى من مطاردة الأغانى الحديثة لنا....من عينة " دول خبلانة..اللى فاهمهم رأسه تعبانة..تفهم ايه..يحموك فى كنكة"..

ومن عينة "انا مش خرنج..أنا كنج كونج"

وقلت فى عقلى بالى ده كلام مرسل وتهديد انا ما أحبوش. :lol: ...ويانى يانى مش حأسمع كده تانى..

وعنها وأخدت اسرتى الكريمة لحضور حفل "كلثوميات"...

وياسلالام...عشنا أجمل أوقات مع أنغام وكلمات غاية فى الروعة ...رق الحبيب...لسه فاكر...

وافتكرت أيام زمان لما كنت بأستنى الساعة خمسة علشان أجرى وأفتح الراديو واستمع لمحطة أم كلثوم...مش عارفة هى لسه موجودة ولا اندثرت؟

المهم انها كانت ليلة..أحلى ليلة...

وخرجنا وأنا بأغنى ليلة جميلة يا محلاها....

وفيه ليالى كتير يا محلاها...حأكتب عنها تباعا...

مين حيحكى معانا

:huh:

[fatfouta]

الله أحب انا المواضيع اللى فيها ذكريات دى جدااا

فيه ليلة فعلا عمرى ماهنساها وهى ليله الحنة بتاعة ابن خالتى الصغير هو مش صغير ده اكبر منى بـ12 سنة بس عشان هو اصغر اخواته

لغايت دلوقتى لما افتكر الليلة دى اقعد اضحك ولو فكرت اخواتى وبنات خالاتى بيها مانبطلش ضحك ابدا

بصى بقى يا فولانة ركزى معايا عشان ماتوهيش منى

كنا فى ليلة حنة ابن خالتى وخالتى دى ساكنة فى الخانكة (ماحدش يتريق مش فى المستشفى لا طبعا) هى حتة ارياف شوية

عندها بيت تلات اداورا متحضر ومدنى كده وجميل وكنا بنحب نروح نقعد عندها بالكام يوم

بس للاسف جوزها بخيل شوية

المهم فى الليلة دى كنا كلنا عيلة واحدة ماحدش بيننا كان غريب لان ليلة الحنه اهل العروسة مش بييجوا عند العريس طبعا

وبعدين كنا احنا وولاد خالتى وولاد عمام ابويا وامى وكل اهالينا اللى شوفناهم واللى ماشوفناهمش فى حياتنا كلها

كنا فرحانين جدااااااا وقلبناها هيصة ولان جوز خالتى قال لا مش هعمل الحنه فى البيت جمعت العيلة وعملوله حنه فى ارض فاضية كده جمب البيت وفرشوا فراشة وكرسى وانبسطنا جداااا

واحنا كنا مع خالتى من الصبح طبعا وجت قالت ادامنا لجوزها نعمل عشا قالها لا كفاية علب رز بلبن

وكل مايقول حاجة احنا وبنات خالتى نبص لبعض ونكتم ضحكنا ورسيت الامور فى الاخر ان عمامى كل مايقول مانعملش كذا يقوموا هما اللى عاملين بداله......لدرجة ان عمى بالليل بعد الفرح قال.....ايه الفرح اللى جايبنا نشتغل فيه حكم ذاتى ده وكل حاجة نعملها احنا

المهم اخر الليله خلصنا كولنا وطلعنا بقى بيت خالتى بعد مالناس مشيت وفضل احنا وولاد خالتى التانيين وبسم الله ماشاء الله احنا خمسة وولاد خالتى سبعة وخالتى التانية وجوزها اللى هو عمى يعنى كنا حوالى فوق العشرين نفر

وبعدين خالتى اكسفت وقالت هقوم اعمل عشان واحنا كنا هنموت من الجوع كووووووولنا قومنا بصينا لبعض وقولنا الحمد لله هناكل

وبعدين يا ستى دخلت المطبخ ودخلت معاها خالتى التانية الاصغر منها وقامت جايبة كرتونة بيض ولسه هتسلقها قامت خالتى الصغيرة قلتلها......ايه ده ليه كل البيض ده؟؟؟؟ واحنا نغمزها ونقولها اسكتى احنا جعانين ده لو قضوا بس

وبعتت ابنها يجيب حلاوة طحينية وهنالك عندهم سرج كتير فقام جاب حاجة كده ذى المستطيل كبيررررررررة عبارة عن حلاوة طحينية وحطها عالترابيزة ذى ماهى وخالتى برضو تقوله ليه ده كله يا طارق؟؟؟..... واحنا نغمرزها ونقولها ماتقعدى بقى فى حته احنا جعانين

المهم عملنا العشان وحطيناه وابتدينا ناكل وجوزها قاعد هيطق ومن حسرته مارضيش ييجى ياكل معانا وبعدين ابن خالتى لقى الجبنة هتخلص يا عينى قام قال هنزل اجيبلكوا جبنه من شقتى تحت.....وبعدها جاب الجبن وطلع

قووووم ايه لقى العيش خلص قال هنزل اجيبلكوا عيش من شقتى تحت......وجاب العيش وطلع

قوووووم ايه لقى البيض المسلوق خلص قال هنزل اجيبلكوا بيض من شقتى تحت ونسلق تانى

قوووووم ايه طلع يا عينى مالقاش حاجة وكان هو جعان وكان لسه فيه ناس بتاكل......وبتلقائية شديدة جدااااااا قام مزعق وقال الرحمة حلوووووووووة

واحنا مابطلناش ضحك من ساعة مابتدينا ناكل على منظر جوزها اللى قاعد مقهور وخالد ابن خالتى اللى يا عيينى طالع نازل يجيب فى المؤن ومش مكفى

وبعد العشا طبعا ماعرفناش نروح لان هما ساكنين فى حته لازم تستنى القطر عشان يوديكى المرج وتركبى المترو من هناك فقولنا نستنى اول قطر وجوزها سمع كده وقالها حطيهم ككلهم فى اوضة واحدة

قومنا قعدنا كلنا فى الاوضة لغايت الساعة 5 ونص واول ماجوزها سمع القطر من بعيد وقف يسقف من برا ويقول القطر يا جماعة هيفوتكم.......من الضحك ماعرفناش نقوم والله

وتانى يوم كان الفرح طبعا قالنا واحنا ماشيين كله ييجى على بالليل هه؟؟؟؟؟

وبجد من الضحك فى اليوم ده بطننا وجعتنا بس عمرنا ماهننسى الليلة دى فعلا لغايت دلوقتى

يارب ترجع كل ليالينا الحلوة

استنى ده انا عندى لياااااااالى