ما رأيك في جواز علي من إنجي في فيلم رد قلبي؟

[MZohairy]

طول عمري اتفرج على فيلم رد قلبي و اضرب كف على كف

و استغرب من منطق المؤلف و المخرج

ازاي عايزين انجي بنت الأمير تتجوز علي ابن الجنايني؟ :lol:

و ازاي عايزين الأمير يتبسط من عرض زي ده؟ :blink:

و ليه مطلعين الأمير في منظر المفتري الجبار بسبب رفضه لهذه الزيجه؟

و مطلعين الجنايني في منظر الغلبان المقهور بسبب الرفض ليه؟

هو فيه مقهور و غلبان و عاقل يروح للأمير يطلب منه ايد بنته و هو عارف انه مش من مقامه؟

و الغريب ان غسيل المخ خلى الناس اللي بتتفرج كلها تقريبا تتعاطف مع الجنايني و ابنه و يكرهوا الأمير بشده (الا انا على رأي انغام)

فأنا كنت شايف ان العكس هو الصحيح

فالزواج تكافؤ

و مثل هذا الزواج لا توجد به ذرة تكافوء في اي شيئ

بل و جنون و غباء و تسلق و كثير من الصفات السيئه من الجنايني

ملحوظه: لست متعاليا و لا طبقيا لكني افكر بمخ و عقل الطرفين قبل الحكم

و لكنني كنت اغرد خارج السرب كالعاده

و لو كنت الجنايني مكنتش عملت اللي عمله

و لو كنت الأمير كنت عملت اللي عمله تماما

ازاي بس انجي بنت الأمير تتجوز علي ابن الجنايني؟ :ninja:

[se_ Elsyed]

لأول مره اتفق معاك يابو شوكري

التوافق الاجتماعي والثقافي والمادي مطلوب مطلوب مطلوب يا ولدي

ومهما الزوجين قاوموا وعملوا عصافير في الاولاد ... فالمجتمع للأسف مش هايرحمهم ..

خصوصاً إننا في مجتمعات فيها نسبة التلاحم كبيرة وكل واحد حاطط مناخيره في حياة التاني

أعتقد ده نادر بره في الغرب وماحدش له دعوه بحد ان شالله أنجي تتزوج الزبال حتى

لكن عندنا صعب صعب بصراحه وهي الدنيا كده

ولو رجعنا لموضوع أنجي

على فكرة القصر اللي كانت عايشه فيه انجي واتصور الفيلم فيه ... هو قصر الزعفران مقر إدارة جامعة عين شمس ... تعرفوا كده ؟

فبالله عليكم .... علي كان هاياخد انجي يفرش لها أوضتين وعفشة ميه في العباسية جنب بيت عيلته بعد حياة القصور والخدم والحشم .... معليش يعني

أه في حب وحركات

لكن مش بالحب وحده تستمر الحياة خصوصاً في زماننا ده

[se_ Elsyed]

موقف بقى له اكتر من عشرين سنه لم انساه

اخويا كان في السعودية وانا كنت طالب ... وفي مره بعت لنا خطابات وحاجات مع احد اصدقاءه فروحت بيته اخدهم منه وكان عماره وبيت عيله يعني فقابلني اخوه واستلمت الحاجه منه ... فكنت باتكلم مع اخويا وجه وسط الحديث ان الاخ اللي قابلني ده سائق تاكسي لم يتعلم ........... ومتجوز طبيبه ..... لا تعليق

كان في فيلم زمان باين اسمه الطقم المدهب عن سائق ميكروباص غير متعلم اتجوز فتاة جامعيه .. فاكرينه ؟ ودي قصة للمرحوم عبد الوهاب مطاوع اتنشرت في بريد الاهرام .. والحياة الزوجية فشلت طبعاً بعد كده

يارب فيروز ما تشوف الموضوع ده عشان انا عارف هاتكلمني عن البعد البؤري للبرجوازية المتعفنه والانحدار الاجتماعي للرأسمالية المتسلقة

[doha]

عن نفسي عمري ماتفرجت على رد قلبي الحمد لله ده مبدأ عندي كل الافلام السطحية او الي تحرق الدم من سذاجتها مبشوفهاش فمبالكم لما فيلم اعرف مما قراته عنه ومما فرضوه علينا من لقطات له بتذاع كل شويه انه بيجمع الاثنين

طبعا تصور ان انجي ممكن تتجوز علي وتعيش معاه في سعاده هو قمه الخيال العلمي الغير هادف بالمرة واتوقع لو للفيلم جزء ثاني كانوا جابوا انجي اما مطلقة او ماسحه بكرامه علي الارض على اساس ان السكرة راحت وجات الفكره

بس هلتمس عذر واحد بس للمؤلف وهو ان علي فعليا اصبح ( باشا ) بمقاييس الزمن الجديد ومكانش قدام انجي بعد الثورة غير الجوازه دي عشان تفضل مرات واحد ( كبير )

التكافوء الاجتماعي احد اركان الزواج الاساسية الي لايمكن يستمر بدونها

[فــيــروز]

يارب فيروز ما تشوف الموضوع ده عشان انا عارف هاتكلمني عن البعد البؤري للبرجوازية المتعفنه والانحدار الاجتماعي للرأسمالية المتسلقة

لا واللهِ أبدا :rolleyes:

أصل كُلّه إلاّ السيما !! :happy: أنا ماحترمش الأفلام اللىّ تستغفل المشاهد و تفهّمه إن الحياه بمبى و الدنيا ربيع و بعد ما يخرج م السيما يقع على بوزو "هى بوزه بس مشّيها بوزو" :lol:

و فيه فارق كبير بين ما أعتبره الوضع المثالى و بين الوضع الذى أعرف أنّه قائم فعلا .. يعنى ممكن نقول "مفروض" مايكونش فيه تمايز طبقى حاد بين الناس .. أو ممكن نقول مفروض يكون تقييم الإنسان من خلال فكرة أنّه يعمل عمل شريف و أهله كذلك بصرف النظر بيقبض كام من مرتّبه آخر الشهر و وضع وظيفته فى السلّم الاجتماعى ..

لكن لا يصحّ فى غمرة هذه الأحلام السعيده أن ننسى كيف يعيش الناس فى مجتمعاتنا المحترمه و كيف يفكرون و كيف يقيمون بعضهم البعض .. لن أنكر أنّى أشعر بألم شديد حين أفكّر فى شاب متفوّق و يعمل فى وظيفه مرموقه مثلا لكن لأن أهله من طبقه بسيطه اجتماعيا يكون مستغرب أن يحلم بالارتباط بفتاه من مستوى اجتماعى أرقى حتى لو كانوا أهلها عاطلين بالوراثه !! بجد المواقف الشبيهه بتؤلمنى جدّا من أجل طرف ليس له أى ذنب فى ظروفه الاجتماعيه و عمل اللىّ عليه كى يرتقى بنفسه مطلوب منّه إيه تانى !! يولّع فى أهله عشان ينسف جذوره العائليه دى :blink:

على أى حال فيلم "رُجّ قلبى" نموذج مثالى على التهجيص السينمائى اللىّ مايدخلش ذمّتى بتعريفه

[se_ Elsyed]

ههههههههههههه انتي بتيجي عالريحه يا بنتي ؟؟؟

من القصص المؤلمة التي قرأتها في التسعينات برضوا لعبد الوهاب مطاوع وهي رسالة حقيقة من فتاة جامعية لديها عدة اخوة بنات وكلهم جامعيين وعلى قدر عالي من الجمال وماحدش اتقدم لهن جميعاً وتقدم بهم العثمر .. لا لشيء إلا إن والدهم بيشتغل " حانوتي " تُربي بيدفن الموتى يعني

اتفق معكي يا فيروز في إننا إحنا عملنا موضوع التوافق الاجتماعي ده

تخيلي ساعات بيبقى المستوى الأجتماعي العالي للفتاة عائق يجعل الكثيرين يحجموا عن التقدم لهن

يعني لا كده عاجب ولا كده عاجب

بس بيني وبينك اللي يشوف بلاوي الناس تهون عليه بلوته

يعني هنا في الخليج الموضوع ده بشع بل رهيب

ويصل الا ان البنت البيضا - البت بيضا بيضا بيضا .. البت بيضا وانا اعمل ايه - لو بتشحت .. تخيلي لو بتشحت ... ما فيش شاب أسمر يقدر يتقدم لها .... يتحدف من خامس دور على طول

وبرضوا هي لو شحاته وقبليه من قبيله يعني ... وهو الولد زي ما بيسموه " خضيري " يعني من قبيلة غير معروفه او مالوش اصل ... لا يجروء انه يتقدم لها

والاهل بيفضلوا يخرطوا البنت للوز على انهم يجوزوها جوازه زي دي

لا تعليق

[se_ Elsyed]

بس شوفوا ... مهما اتكلمنا عن المثالية .. خلي كل واحد يفكر ويطبق على نفسه

كان في موضوع قديم بالمناسبة لشعنونه عن الحكاية دي وقلت رأيي

يعني أنا مثلاً من الأخر ... لو باحب بنت ... معليش يعني .. وكله تمام ومتفاهمين وهي جامعية وحاصلة على درجة الدكتوراة في علم نفس النمو ... بس أبوها تُربي يعني وساكنين في تُرب الغفير أو في الدراسة

طب أصل يعني ... لما أروح أزورهم ... أروح التُرب يعني ولا أعمل ايه ؟

طب وعيالي .... جدهم وخالهم هايبقوا أيه ؟

صعب بصراحه وخلينا نجيب من الاخر ونتكلم بصراحة

[فــيــروز]

بس شوفوا ... مهما اتكلمنا عن المثالية .. خلي كل واحد يفكر ويطبق على نفسه

كان في موضوع قديم بالمناسبة لشعنونه عن الحكاية دي وقلت رأيي

يعني أنا مثلاً من الأخر ... لو باحب بنت ... معليش يعني .. وكله تمام ومتفاهمين وهي جامعية وحاصلة على درجة الدكتوراة في علم نفس النمو ... بس أبوها تُربي يعني وساكنين في تُرب الغفير أو في الدراسة

طب أصل يعني ... لما أروح أزورهم ... أروح التُرب يعني ولا أعمل ايه ؟

طب وعيالي .... جدهم وخالهم هايبقوا أيه ؟

صعب بصراحه وخلينا نجيب من الاخر ونتكلم بصراحة

هو السؤال دلوقت انت مشكلتك فى شغلانة أبوها ولاّ محلّ سكنهم ولاّ وظيفة الخال اللىّ ممكن يكون بيشتغل مغسّل بس مش ضامن جنّه؟ :happy: حدّد موقفك معانا بالظبط :rolleyes:

[MZohairy]

السينما استغفلتنا كتير يا جماعه

سواء بأهداف حكوميه او ثوريه أو تغفيليه

لا انسى مجموعة الستات اللي كانوا بيتفرجوا على فيلم العار و بكوا بالدموع على ضياع ثروة تاجر المخدرات بسبب ذوبان الحشيش في الماء

[عبير يونس]

مع احترامي لكل فئات المجتمع

بس منطق الفيلم ده

اللي خللى السينما بعد كده يبقى ابطالها

سواق الأتوبيس

المشبوه

المتسول

الهلفوت

و كلها في الآخر بتفرض الشخصيات دي على المجتمع

و بتسيدها عليه كمان

فعشنا و لا زلنا نعيش التمجيد للحرامية و النصابين و المسجلين خطر

وقاع المجتمع

و العشوائيات

و السخرية من الموظفين الكبار

و دكاترة الجامعة

و انهم مبقاش حيلتهم حاجة

و من محدودي الدخل

و من بعدها

بقت البنت تختار اللي يستتها و يسيغها (حلوة يسيغها دي) و يجيبلها كل اللي نفسها فيه

حتى لو كان زبال

(انتبهوا أيها السدة)

و على رأي ضحى

بس هلتمس عذر واحد بس للمؤلف وهو ان علي فعليا اصبح ( باشا ) بمقاييس الزمن الجديد ومكانش قدام انجي بعد الثورة غير الجوازه دي عشان تفضل مرات واحد ( كبير )

و عجبي

[Howayda Ismail]

السلام عليكم :كلام الاخوه الافاضل صحيح والعاقل لابد ان يراعي التكافؤ في موضوع الزواج وخاصه الرجل لكي تكون له القوامه في بيته ولا يكون مجرد زوج الست ولعبه في يد حماته قبل زوجته وقد كانت لي صديقه علي قدر عال من الجمال ومستوي مادي متواضع تقدم للزواج منها شابين كل منهما يفوق الاخر ثراء ولكنها كانت تفوقهم حبا واحتراما لابيها فخافت من مجرد فكره التعالي او امتهان كرامه والدها بغض النظر عن احلامها فرفضت دون تفكير وارتبطت بشاب من مستواها الماده ويشاء الله ان تتحسن ظروف هذا الشاب ويصبح من الاثرياء بعد رحله كفاح وصبر حب واهم من ذلك الرضا

[pink rose]

طبعا التكافؤ الاجتماعي من اهم مقومات الزواج الناجح و الحب وحده لا يكفي

و الهبل اللي في الافلام دا خيال علمي فعلا لا ينطبق على ارض الواقع الا نادرا جدا جدا

بس ما تنسوش يا جماعه الوقت اللي اتعمل فيه الفيلم و اتعرض

كانت الثورة لسا بخيرها بقى و لازم الكل يطبلها و يقولوا انها دوبت الفروق بين طبقات الشعب

زي ما دلوقتي بيطبلوا للبنات المش كويسين و انهم بيعملوا كده بسبب ظروفهم القاسية و انها بنت كويسة و قلبها طيب و نيتها زي الفل و بتبقى الناصح الامين و هي اللي ماشية تطبطب على خلق الله و يطلعوها في الاخر هي الكويسة

و اهو كله لعب بعقول الناس للاسف

بس على فكرة و الله الفيلم باتفرج عليه من باب الترفيه عن النفس اصله كوميدي بشكل غير عادي

فاكرين الظابط صاحب علي لما وقف كده و اتحمق اوي و كسر الكوباية بايده باضحك ضحك عليه

اللطيف انهم لما عملوا الفيلم دا مسلسل هند رستم و مريم فخر الدين قلبوا الدنيا قال يعني تاريخ و بيتشوه ناس دماغها فاضية

تم تعديل 9 مايو 2010 بواسطة remo

[enjisultan]

ازاي بس انجي بنت الأمير تتجوز علي ابن الجنايني؟

تخريف بجد

دا حتى ييقى عيب فى حق كل الانجيهات

[Amr Elgbaly]

انا تقريبا اعترض علي وجهة نظركم كلكم (خُلقنا لنعترض)

التكافؤ طبعا مطلوب ومطلوب جدااااا بس واضح انكم فاهمين التكافؤ غلط

المقصود بالتكافؤ الاجتماعي في ديننا هو التكافؤ في مستوي التفكير والتعامل وماالي ذلك

محدش فينا اختار مهنة والده او والدته او عيلته او او او بالتالي من الظلم نتحاسب بيهم

بس كلنا اختار نفسه بالتالي المفروض يحاسبوا الانسان علي مركزه الاجتماعي هو مش عيلته

قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلو تكن فتنة في الأرض وفساد كبير " رواه الترمذي وغيره

نركز كده من بعد الا تفعلوا

فتنة

وفساد

الفتنة حدها القتل

والفساد حد الحرابة

بس طبعا التكافؤ المادي مطلوب والمقصود بيه ان الزوج يضمن لزوجته حياة كريمة

فقال المصطفي " من يستطع منكم الباء فليتزوج "

بالنسبة للفيلم

علي : شاب مجتهد ظابط بيخدم بلده مختارش والده ولا والدته ولا اختار مهنتهم علشان يتحرم من حبه بسببهم

الامير : شخصية متكبرة سطحية ينظر للناس بما يملكون من مال

معلش انا اشتراكي شوية هما مش شوية هما شويتين تلاتة اربعة

علي فكرة والله بابا مش حانوتي ولا جنايني :rolleyes:

خالص التحية والتقدير

[ابو محمود]

طول عمري اتفرج على فيلم رد قلبي و اضرب كف على كف

و استغرب من منطق المؤلف و المخرج

ازاي عايزين انجي بنت الأمير تتجوز علي ابن الجنايني؟ :rolleyes:

و ازاي عايزين الأمير يتبسط من عرض زي ده؟ :blink:

و ليه مطلعين الأمير في منظر المفتري الجبار بسبب رفضه لهذه الزيجه؟

و مطلعين الجنايني في منظر الغلبان المقهور بسبب الرفض ليه؟

هو فيه مقهور و غلبان و عاقل يروح للأمير يطلب منه ايد بنته و هو عارف انه مش من مقامه؟

و الغريب ان غسيل المخ خلى الناس اللي بتتفرج كلها تقريبا تتعاطف مع الجنايني و ابنه و يكرهوا الأمير بشده (الا انا على رأي انغام)

فأنا كنت شايف ان العكس هو الصحيح

فالزواج تكافؤ

و مثل هذا الزواج لا توجد به ذرة تكافوء في اي شيئ

بل و جنون و غباء و تسلق و كثير من الصفات السيئه من الجنايني

ملحوظه: لست متعاليا و لا طبقيا لكني افكر بمخ و عقل الطرفين قبل الحكم

و لكنني كنت اغرد خارج السرب كالعاده

و لو كنت الجنايني مكنتش عملت اللي عمله

و لو كنت الأمير كنت عملت اللي عمله تماما

ازاي بس انجي بنت الأمير تتجوز علي ابن الجنايني؟ :happy:

دة من تبعات العصابة ولسة الى الان الناس مصدقين ان ما تم هو استقلال

الاستقلال الحقيقى ان يتم فسخ العقد لهذا الزواج الغير سليم والرجوع الى الأصل ويتم معه تحرير مصر من المحتل الغاصب الذى احتال على الامير وتزوج انجى واصبح الان كل ربوع مصر محتلة بواسطة اشباة على ابن الجناينى واللى مش مصدق يروح يشوف اجمل مواقع مصر ملك مين او كام على ابن الجناينى يملكون ثروات لو كان ابهاتهم جواهرجية ما تملكوها ابدآ ... نعيمآ الحلاقة خلصت

[jasmin hamed]

انت من الاحرار يا على قصدى يا استاذ زوهيرى

( ابن الجناينى بقى ظابط يا انجى)

مع الاسف مع الالم انا مع الطبقيه بشده و بعنف يعنى شوف مصر زمان ايام البشوات كان شكلها جميل و مرتب و نظيف ايام اذاى

كان كل واحد عارف مقامه و عارف يروح فين مش موضوع فلوس بس انما اناس الباشاوات كانوا راقين فعلا

ايه ايام يارتها تعود او اروحلها انا

بس هو للامانه الشديده على كان راجل مهذب جدا متعلم مش صورة ابن الجناينى انهارده

المشكله ان الناس الى مقتنعه بفكره ابن البلد و بنت السلطان

بينسوا تفاصيل كتير فى الحياه اليوميه ممكن تكون عاديه فى حياة على بتاع اليومين دول

ذى اللسان الزالف و الصوت العالى و طرييقة الكلام حاجات ممكن بنت السلطان ماتشقهاش فى ايام الحب و التنهيدات

على فكره مش معنى كده ان واخده جانب بنت السلطان بس

حتى ابن الجناينى هيتخنق لما يحس انها بتنتقد سلوكه و طريقة فى الكلام

بجد معادله هتخلى الحياه فى منتهى التعاسه

[زعلان]

هو ده نتاج مجتمع الانقلاب العسكري الي جاب افراد الطبقات الدنيا من المجتمع وخلها تتولى امور الشعب وتفرض عليهم سياساتها الاقتصادية و الاجتماعية المجحفة و نتيجة لأن ابن البواب هو احسن من الامير و لأن الداعرة اشرف من الشرف وصلنا الى ما وصلنا اليه اليوم على المستوى الاقتصادي و الاجتماعي و النفسي

[se_ Elsyed]

مع الاسف مع الالم انا مع الطبقيه بشده و بعنف يعنى شوف مصر زمان ايام البشوات كان شكلها جميل و مرتب و نظيف ايام اذاى

كان كل واحد عارف مقامه و عارف يروح فين مش موضوع فلوس بس انما اناس الباشاوات كانوا راقين فعلا

ايه ايام يارتها تعود او اروحلها انا

طب أسكتي بدل ما زوار الفجر يسمعوكي ..

الله لا يعودها .. وإلا كنا زماننا بناخد بالكرباج

الباشاوات كانوا ولاد ستين ................. تييييييييت

ومصر لا كانت راقيه ولا حاجه ..

فإذا كنا نقصد بالرقي الكام قصر اللي كان الباشوات عايشين فيهم وبعض الشوارع اللي كانت بتتغسل بالميه والصابون في القاهرة ..

فليذهب الرُقي إلى الجحيم ... إذا كانت 99 % من البلد تحت خط الفقر وتعيش في ظلام دامس ... وقلة قليلة تتحكم في كل شيء بالبلد .. والاف بيُنتزعوا من أحضان أهلهم وأولادهم عشان يشتغلوا في السُخرة ويشقوا الترع ويحفروا قناة السويس للباشاوات .. ويموتون ميتة الكلاب ويدفنوا في أي مكان ولا يُعرف عنهم شيئاً .

تصدقي بالله ....

الكام كتاب اللي قرأتهم ومنهم كتب للجبرتي وغيره من المؤرخين ... أصابوني باكتئاب عن حال البلد في تلك الفترة الظالمة ...

يكفي أن يقول لك إن الناس في عهد العثمانلية وبالذات الفلاحين .. كان قوت يومهم ( المين كورس والأبايتزر كمان ) الذُرة والبصل ... مافيش غيرهم

بيسفوا الدُرا وبيبلعوه بالبصل حضرتك لأنهم كانوا لا يعرفوا معنى الفقر حتى من كتر ما هما تحت

ولما تعرفي بقى إن ثروات الأوباش الأتراك اللي برشتوا - جايه من باراشوت - على البلد وإن محمد علي نفسه وزع عليهم الاف الفدادين والأبعديات اللي أنتزعها من المصريين وخلى المصري في أرضه مش محصل أُجري حتى ... لسه تقولي برضوا إنهم كانوا راقيين ؟

------------

هو السؤال دلوقت انت مشكلتك فى شغلانة أبوها ولاّ محلّ سكنهم ولاّ وظيفة الخال اللىّ ممكن يكون بيشتغل مغسّل بس مش ضامن جنّه؟ حدّد موقفك معانا بالظبط

كله كله وبطلي نكش

---------

المقصود بالتكافؤ الاجتماعي في ديننا هو التكافؤ في مستوي التفكير والتعامل وماالي ذلك

محدش فينا اختار مهنة والده او والدته او عيلته او او او بالتالي من الظلم نتحاسب بيهم

كل ده كلام معروف للجميع لكن للأسف الواقع حاجه تانيه يا عمرو

[se_ Elsyed]

زُهيري ..

إنت حاطط الموضوع ده في باب موضوعات شخصية ليه ؟

سؤال خبيث ويارب ما يكون اللي في بالي عشان زهيري ما يخربش بيته بنفسه .. الجدع لسه صغار .. أي نعم هو مجتهد .. لكن مش للدرجة دي ... عُمر الميه ما بتطلع في العالي الا بالمواتير

[زعلان]

التكافؤ الاجتماعي مهم جدا و التقارب المادي يأخذ في الحسبان

لو مكنش فيه تكافيء اجتماعي ستتولد مشاكل كثيرة وسيصاب احد الطرفين بصدمة في الطرف الاخر حيث ان النمط الاجتماعي الذي اعتاده كل منهما اذا لم يكن متقارب سيدخلان في صراع معلن او غير معلن

بمعنى ان شاب مهندس لكنه من اسرة متواضعه ووالده حرفي بالطبع تربى في وسط معين ولديه قيم ومثل متسقة مع هذا الوسط ايضا كما ان الوسط يشمل اسلوب الحديث و الحياة و التعامل بما في ذلك الاكل و الشرب و الملبس

و شابة برضه خريجة جامعية لكنها من وسط اجتماعي مختلف والدها خبير محاسبي مثلا لديهم ايضا قيم ومثل متسقة مع الوسط الاجتماعي الذي نشأت فيه يشمل اسلوب الحديث و الحياة و التعامل

هل هناك شك انه بعد قصة الحب العنيفة سيصطدمان بالواقع اكثر كيف يمكن للاسرتين ان يجتمعان سواء في مكان خاص او عام ما القواسم المشتركة التي من الممكن ان يتجاذبوا اطرف الحديث حولها