ما رأيك في جواز علي من إنجي في فيلم رد قلبي؟

[لماضة مصرية جدا]

السلام عليكم و ورحمة الله و بركاته

شوفوا انا كنت لردح من الزمن مقتنعة ان التفاهم و الحب (قوطع و قوطعت سيرته) ممكن يعمل المعجزات....بس الحمد لله الحمد لله قمت الصبح بالليل و لقيت اخويا بيكب عليا جردل ميه سائعة عشان اصحي من العالم الخيالي اللي انا عايشة فيه

مش تكبرا....لاني اصلا والدي والدتي من الطبقة المتوسطة....و لا انا اصلا اسمي انفي...قصدي انجي

بس انا لقيت ان التكافؤ الاجتماعي المقصود هو طريقة الحياة

اينعم مش بنرتبط بحد شبهنا موووووت لكن ع الاقل التفاصيل الصغيرة اللي في حياتي متبقاش مستهجنة عنده...

يعني لما ااقوله مثلا احنا في بيتنا بنعمل كذا و كذا .....مافيش داعي الاقيه واقف و حاجب عينه اليمين بيضرب تعجبا و استنكار في منبت شعره من فوق

دلوقتي بقيت مؤمنة جدا ان فيه تفاصيل حياتية...ممكن ناس تشوفها صغيرة اوي.....بس ع الاقل التكافؤ و التقارب فيها مش هنقول التشابه....هيخلي الجواز يمشي لبر الامان

بس خلاص

فوتكم بعافية

(أهو انا بقول فوتكم بعافية...المفروض بقي اتجوز زينة الحتة.....شاب عترة....ايييييييييه فين ايامك يا شوكري سرحان في فيلم العلبة دي فيها ايه....فيها فييييييييل...... :) )

[مسافر زاده الخيال]

اتفق مع غالبية المعقبين في توخي مسألة التكأفو في الوضع الاجتماعي والاقتصادي دون ان يعني ذلك افضلية طرف على طرف اخر و دون ان يعني ذلك حرمانية او منع الزواج من طبقتين مختلفتين في اضيق الحدود والمبرر المنطقي(من وجهة نظري )في الزواج غير المتكافيء ماديا و اجتماعيا هو الكفاءة الدينية لان من اتصف بالرقي الديني يستطيع تجاوز كافة العقبات الاجتماعية والمادية اما السبب الرومنسي والحب والكلام الفارغ فلن يجني الا التعاسة على المدى الابعد

[Diab]

وانا كمان متفق معاك يا زوهيري بغض النظر عن ان جد الأمير كان قائد طابية

الزواج تكافوء

[مغتربة]

على كده انا كمان من الاحرار

انا كنت فاكره ان انا بس الى رايه كده طلع اغلب المنتدى كمان

فعلا الفروق الطبقيه بين الناس بشوفها من بديهيات الحياه

و انا شايفه ان كل التيارات السياسيه الى قامت على الغاء الطبقات بين البشر باءت كلها بالفشل لانها كانت بتعاند الطبيعه

الفوارق الاجتماعيه من باب دفع الله الناس بعضهم ببعض

علشان يفضل دايما هناك تباين و احتياج بين البشر بعضهم لبعض

لكن الموضوع برضه مش بالمطلق

لان فى حالات تزاوج كسرت القاعده دى و نجحت لكن اعتقد ان نجاحها كان بسبب قوه العامل الى ادى بيهم لكسر القاعده من الاساس

يعنى انا شايفه ان التزاوج بين الطبقات المختلفه ممكن لكن يعتمد على شخصيه الاثنين الى داخلين فيه هل هما يقدروا يتخطوا العقبات الكبيره الى هتواجههم و الى بيولدها الاختلاف الطبقى بالاضافه الى التحديات العاديه بتاعه كل جوازه و لا لا

علشان كده فى الموضوع ده بميل الى ان تكون القاعده هى مراعاه الفوارق و الاستثناء هو مخالفتها

و بحكم على كل حاله استثناء بشكل منفرد عن التانيه على اساس ظروفها و طبيعه اطراف العلاقه فيها عندهم الرصيد الى يساعدهم على النجاح و لا لا

[فــيــروز]

لأ معلش جاء دورى لأعترض :lol:

يعنى كون "على" إبن جناينى و الأمير كان صاحب قصر كبير لا يجعل الأخير أفضل بشكل آلى !! لأن فى الحقيقه طريقة تحصّل هذا الأمير و أسرته العلويه كلّها على هذه الثروه -ومن ثمّ هذا الوضع الاجتماعى- تجعلهم فى الحقيقه فى وضع أسوأ كثيرا من أسرة الجناينى !!

قد يكون رجال الثوره و من حولهم أسائوا استغلال نفوذهم و لم يفوا بما وعدوا الناس به و يمكن كانوا أوّل من قلّد الأسره التى جائوا لإزالتها من على عرش "مصر" فى عبثها و إساءة استغلال ثروات الشعب .. لكن كل هذا لا ينفى فكرة أن الأسره العلويه امتصّت دماء المصريين و من هذا جاءت ثروتها و ثروة المنتمين لها و من ثمّ ليس هناك أى مبرر لهم أو لورثتهم لأى شعور بالأفضليه على المصريين .. يمكن اللىّ بيخلّينا ننسى ده إنّنا شُفنا الصوره فى الآخر خالص على هيئة قصور جميله و بنات حلوين بشعور و عيون ملوّنه و حدائق غنّاء فتخيّلنا إن "مصر" كانت كلّها جميله وقت الباشوات .. افتكروا إن فى نفس الفيلم كان بديهى جدّا -من وجهة نظر الباشا الأمير- إنّه يضرب الجناينى بالكُرباج لمجرّد تفكيره فى مصاهرته !! و طبعا ده غيض من فيض يحلو للبعض التغافل عنه و تناسيه !! الأسره العلويه هى التى ابتدعت السُخره التى سحبت إليها المصريين لحفر قناة "السويس" التى أُهديت بعدها على طبق من ذهب للمحتلّين !! و هى الأسره التى استدعت الأمراء و الأميرات لحضور حفل افتتاحها و أنفقت على هذا -من ثروات "مصر" مش من جيبها ولا جيوب أفرادها- الكثير جدّا للفخفخه و المناظر الفارغه .. الأسره العلويه رائدها -محمد على- كان ممّن مارسوا احتكار الثروات كى يكون هو المتحكّم الأوحد فيها و الغريب إنّنا درسنا ده فى التاريخ دون تعقيب كثير على هذه النقطه .. حاجه كده كانت شبه ما يمارسه أخونا و حبيبنا "حماده عزّو" بس على نطاق أوسع .. فهل كون "عزّو" ساكن فى قصر بحدائق غنّاء و أولاده فى مدارس دوليه و بيعرفوا فى الإتيكيت يبقى التاريخ سينسى له ممارسته للاحتكار و دوره فى إشعال أزمة السكن أكتر ما هى مشعلله و غيرها كتير ..

مش صحّ أبدا أن نحكم على الصوره النهائيه و مفروض -كنوع من الموضوعيه- نعرف الناس اللىّ فيها ظهروا حلوين و نُضاف فيها كده إزّاى و على حساب إيه و مين ..

تم تعديل 10 مايو 2010 بواسطة فــيــروز

[MZohairy]

كلام فيروز سليم من وجهة نظر تفسيريه

و لكن هناك اجيال مالهاش لا في الطور و لا في الطحين و معندهاش اي ذنب فيما اقترفه الاباء و الاجداد

زي الأمير او الملك أحمد فؤاد مثلا

انسان اتربى و اتعلم و اتثقف بطريقه خاصه جدا

مانقدرش نلومه اعتقد على أي شيئ

و هو بالفعل افضل بشكل آلي

[doha]

فيروز اسمحي لي احكي لك الحكايه دي وان كانت خروج عن الموضوع

ناس نعرفهم عندهم جنينة برتقال .. والمتبع عندهم ان الجنينة دي بتتاجر لتاجر برتقال لمده سنتين في كل مرة ليه ؟ لان البرتقال سنة بيجيب انتاج كويس وسنة تانيه مبيجيبش فالعرف ان التاجر بياخذها سنتين على بعض

عشان البرتقال يبقى حلو وغزير الانتاج لازم يتسمد له كويس ويتحط له مبيدات ويتم العناية بيه بطرق معينة .. طبعا الي بيقوم بالمهمة دي الشخص الي مأجرها لانه هو الي بيجمع انتاجها بعد كده .. طبعا العناية دي بتكلف وعشان كده في بعض التجار بتستهبل وبتهمل فيها ظنا منهم ان ده هيعظم ربحهم وده بيحصل احيانا لكنه بالتاكيد بيضر اصحاب الارض نفسهم الي بتنزل قيمة حديقتهم ان مكانش معتنى بيها كويس . .

المشكلة انك متعرفيش التاجر الحلو من الوحش في ساعتها .. لازم تنتظري السنتين وتشوفي بعدهم انتاج الجنينة شكله ايه فتعرفي التاجر الي اخذها ده اعتنى بيها صح ولا كان بيستعبط ..

على مدار السنين بقى حصل انهم أجروها لـ س من التجار الي استلموها منه يانعه وبعافيتها .. قعدوا فترة بعدها يأجروها لـ ص . الي لاحظوا ان الشجر في ( عهده ) عمال يذبل كده والانتاج تعبان

طبعا صاد رجع وبيطالب بتخفيض الايجار على اساس ان الحديقة ( مبتجيبش )

وطبعا اصحاب الحديقة عارفين ان ص ده هو الي تاجر مهمل عاوز يوفر في مصاريف صيانة الحديقة وبالتالي ضر نفسه وضرهم لما مخدمهاش بالشكل ده

عن نفسي ورغم ان مليش في الثور ولا في الطحين ولا بفهم في البرتقال ولا اعرف سين التاجر الا اني متاكده انه تاجر ممتاز وكان بيعامل الحديقة كويس جدا لاني شايفه خرجت من تحت ايده ازاي واصحابها استلموها منه ازاي .. ومقارنة بالوضع الي ( بيحكوا ) عنه من انتاج للحديقة في عهد سين فانا متاكده ان الوضع كان كويس وان كل الاشاعات الي بتتقال دي مصدرها ص نفسه الي بيحاول يداري خيبته فبيجيبها في غيره

هو انا كنت داخله اقول ايه ؟ ايوه افتكرت

صباح الخير ..

تم تعديل 11 مايو 2010 بواسطة doha

[فــيــروز]

كلام فيروز سليم من وجهة نظر تفسيريه

و لكن هناك اجيال مالهاش لا في الطور و لا في الطحين و معندهاش اي ذنب فيما اقترفه الاباء و الاجداد

إزّاى مالهاش فى الطور ولا فى الطحين !!

نحن لا نمنحهم نفس الميزه فى كل المواقف .. يعنى وقت ما نحب نقيّمهم اجتماعيا نحن لا نعزلهم عن آبائهم و أجدادهم و إنّما ننظر للصوره توتاله و نقول دول من الأسره المالكه .. يعنى البرستج .. يعنى الإتيكيت .. يعنى الدماء الزرقاء .. و نحتفظ لهم بكل مميزات انتمائهم لهذه الأسره .. لأننا لو قيّمناهم بمعزل عن هذا الانتماء -لو استطعنا أصلا القيام بهذا العزل- ربّما لا نجدهم مستحقين لكل هذا الانبهار ..

[فــيــروز]

عن نفسي ورغم ان مليش في الثور ولا في الطحين ولا بفهم في البرتقال ولا اعرف سين التاجر الا اني متاكده انه تاجر ممتاز وكان بيعامل الحديقة كويس جدا لاني شايفه خرجت من تحت ايده ازاي واصحابها استلموها منه ازاي .. ومقارنة بالوضع الي ( بيحكوا ) عنه من انتاج للحديقة في عهد سين فانا متاكده ان الوضع كان كويس وان كل الاشاعات الي بتتقال دي مصدرها ص نفسه الي بيحاول يداري خيبته فبيجيبها في غيره

صباح النور :gather:

الحقيقه أنا احترت فى كلمة "شايفه" .. هل هى تعبر عن حضور فعلى لهذه المرحله الزمنيه و من ثمّ "شايفه" مقصود بها الحضور الفعلى للموقف !! لأن ظنّى أن سِنّك غالبا ليس كبيرا لدرجة حضور هذه المرحله الزمنيه من تاريخ "مصر" و من ثمّ الشوف هنا مجازى من خلال حكايات المعارف أو كتب التاريخ أو أفلام السينما أو مصادر مشابهه ليس من ضمنها الحضور الفعلى .. فهل يمكن توضيح الموقف حتى أستطيع التعليق فى الاتجاه الصحيح؟

:)

تم تعديل 11 مايو 2010 بواسطة فــيــروز

[اغابي]

طول عمري اتفرج على فيلم رد قلبي و اضرب كف على كف

و استغرب من منطق المؤلف و المخرج

ازاي عايزين انجي بنت الأمير تتجوز علي ابن الجنايني؟ :blink:

و ازاي عايزين الأمير يتبسط من عرض زي ده؟ mfb:

و ليه مطلعين الأمير في منظر المفتري الجبار بسبب رفضه لهذه الزيجه؟

و مطلعين الجنايني في منظر الغلبان المقهور بسبب الرفض ليه؟

هو فيه مقهور و غلبان و عاقل يروح للأمير يطلب منه ايد بنته و هو عارف انه مش من مقامه؟

و الغريب ان غسيل المخ خلى الناس اللي بتتفرج كلها تقريبا تتعاطف مع الجنايني و ابنه و يكرهوا الأمير بشده (الا انا على رأي انغام)

فأنا كنت شايف ان العكس هو الصحيح

فالزواج تكافؤ

و مثل هذا الزواج لا توجد به ذرة تكافوء في اي شيئ

بل و جنون و غباء و تسلق و كثير من الصفات السيئه من الجنايني

ملحوظه: لست متعاليا و لا طبقيا لكني افكر بمخ و عقل الطرفين قبل الحكم

و لكنني كنت اغرد خارج السرب كالعاده

و لو كنت الجنايني مكنتش عملت اللي عمله

و لو كنت الأمير كنت عملت اللي عمله تماما

ازاي بس انجي بنت الأمير تتجوز علي ابن الجنايني؟ :sad:

استاذى زوهير انا حاتكلم عن الفترة دى بشكل عام

الفترة دى فى السينما كانت بتخدم فقط الرئيس جمال عبد الناصر وكل المخرجين والمطربين والشعراء كانو منافقين لانهم كانو

بيقدمو للشعب السم فى طبق رز بلبن ومحلى بالمكسرات

هذا السم – هو تبرير سرقه جمال عبد الناصر لاموال الاغنياء وسياسته وحزب الوفد – والرز بلبن هو قصة انجى وعلى اللى لا تمس المنطق باى شئء

كان جمال عبد الناصر يبرر ويقدم الاسباب لسرقة اموال الاغنياء وعلى وتيرة النفاق والمجاملات الرخيصة التى تقدم للسيد الرئيس هى

كل الافلام اللى كانت تقدم فى هذه الفترة – وتصور للشعب ان الاغنياء فقط يعيشون من اجل حفلات الرقص والسكر والمجون والخلاعة والخيانات الزوجية

والتعسف ضد الفلاحين - كل هذا كان مبالغ فيه الى حد التلفيق

السينما ساهمت كثيرا فى خدمه جمال عبد الناصر وسياسة - الذى لم يكتفي بسرقة اموال الاغنياء بل وتعذيبهم فى السجون وكان منهم كتاب عظماء وصحفيين ايضا .

استاذى / زوهير –

ماذا تفعل لو كنت اب وعندك 6 من الابناء فى جميع المدارس وتعيش فى قصر فخم وتملك الكثير من الاراضي الزراعية وفجأه فى خلال 24 ساعة لا اكثر

تجد نفسك باولادك فى شقة صغيرة جدا ولا تملك وظيفة ولا اموال لتربيتهم وتبدأ من الصفر

كانت مذيعة فى قناه المحور التقت بوزير الصناعة ( رشيد محمد رشيد )

وسالته عن فترة حكم جمال عبد الناصر– فوصفلها - انه كان صعب جدا علي والده ومؤلمة لانه من احد الاثرياء وكبار التجار – لان جمال عبد الناصر اخد القصر بتاعهم وارضهم وتجاراتهم وبدأ ابيه من جديد مشوا الكفاح ليربي ابناؤه - ووصف كل ما فى الافلام مبالغ فيه لانهم لم يتعاملو مع الفلاحين بالصورة التى وصفتها السينما اطلاقا وكان والده شخصية قوية ومحترم ومتدين وبعد استيلاء جمال عبد الناصر على اموالهم بدأ ابيه من الصفر مرة اخرى يكافح – وكان يشجعه ويقول له – جمال عبد الناصر اخد فلوسنا لكن ما يقدرش ياخد عقولنا ولا ارادتنا – لازم نجتهد وننجح وفعلا اشتغل وفعلا والده بدأ من الصفر لغاية لما وصل انه بقي رجل اعمال من جديد وهونفسه ابتدأ رجل اعمال وورث تجارة ابيه ثم تدرج فى المناصب الى ان اصبح وزير الصناعة -

بغض النظر عن حكوميتنا الحالية والوزراء لكن انا كنت باسمع وقتها قصة رجل كافح من قمة الغنى لاقل ما يوصف عن الفقر فقد حكى الوزير مواقف كثيرة مع والده ووالدته والفـقـر – ولم يمتنع ابدا عن البكاء لانه تذكر مأساه وضعه فيها جمال عبد الناصر

- دى قصة مختصرة تفيد المقصد الحقيقي من افلام السينما فى تلك الحقبة الزمنية ..

اغابي

:blink:

[فــيــروز]

هو طبعا سرقة "جمال عبد الناصر" لأموال الأغنياء لا يمكن تبريرها ..

لكن السؤال هو لماذا لا يتساءل أحد بنفس الحميّه عن مصادر أموال الأغنياء و ثرواتهم و كيف آلت إليهم !! ولاّ هى السرقه بتبقى مبرّره و مبلوعه أمّا يقوم بيها باشا تُركى لكنّها مستهجنه لو قام بيها فلاّح مصرى !! ولاّ سرقة شعب و ثرواته من خلال أسره حاكمه مالكه جريمه تسقط بالتقادم .. نوّرونا أثابكم الله :blink:

[زعلان]

التعيميم مخل ليس كل الاغنياء كانوا امراء ومن العائلة المالكة وليس كل الاغنياء كانوا اتراك و ليس كل الاغنياء كانوا لصوص وبيضربوا الفلاحين بالكرابيج

[فــيــروز]

التعيميم مخل ليس كل الاغنياء كانوا امراء ومن العائلة المالكة وليس كل الاغنياء كانوا اتراك و ليس كل الاغنياء كانوا لصوص وبيضربوا الفلاحين بالكرابيج

:blink:

التعميم مرفوض طبعا بس يا ترى مرفوض دى one way ولاّ two ways?

يعنى خُد عندك مثل بسيط خالص من نفس الموضوع

هو ده نتاج مجتمع الانقلاب العسكري الي جاب افراد الطبقات الدنيا من المجتمع وخلها تتولى امور الشعب وتفرض عليهم سياساتها الاقتصادية و الاجتماعية المجحفة و نتيجة لأن ابن البواب هو احسن من الامير و لأن الداعرة اشرف من الشرف وصلنا الى ما وصلنا اليه اليوم على المستوى الاقتصادي و الاجتماعي و النفسي

ده غير أمثله كثيره من مداخلات عديده لا ترى فى عصر الباشوات غير كلّ جميل و راقى !! هو ده مش كان تعميم بردو ولاّ أنا مش واخده بالى !!

على أى حال الحمدُ لله إن الزميل س.س. فكّرنا بدروس التاريخ البعيده تماما عن نفاق من أرادوا أن يطبّلوا للثوره بأفلامهم و أعمالهم و ذكر لنا من تاريخ "الجبرتى" نبذه بسيطه خالص عن أحوال الناس فى "مصر" فى ظل عهد الباشوات و أجدادهم .. و يظل السؤال .. طالما نحن نطلب معرفة أصل ثروة رجال الثوره فى جُمله منطقيه جدّا كهذه

اللى مش مصدق يروح يشوف اجمل مواقع مصر ملك مين او كام على ابن الجناينى يملكون ثروات

مش عاوزينّنا نسأل ليه نفس السؤال فيما يتعلّق بالباشوات و أجدادهم؟

[زعلان]

بصراحة مليش في لعبة القص و اللزق بس عموما وفين التعميم في كلامي ممكن نغير جملة "ده نتاج" ونخليها ده "من نتاج" اوكيه ده نقطة

لكن بالفعل الفلم ده و افلام اخرى كثيرة مجدت الانحطاط و الدعارة و جعلت من الداعارت و الزانيات نماذج مثالية خضعت لقهر العهد البائد

عشرات الافلام تحكي على نفس المنوال تخلط القيم و المباديء و تجعل من الخطأ صواب بعضها مقصود مثل الفلم المشار اليه وبعضها قد يكون غير مقصود نتيجة للترجمة والاقتباس

ولا شك انه بوابة العبور الى ما نحن فيه

وكثير من سلبيات عصر الانقلاب هي نتاج للانقلاب ذاته

هذا لا يعني ان ننفصل عن واقعنا

أو اننا غير مسؤلين عما ال اليه حالنا

وان كان نقد القيم المغلوطة و التاريخ المشوه الذي حملنا اياه جزء من نفض الغبار حتى نسنتطيع تصحبيح مسارانا

[اغابي]

التعيميم مخل ليس كل الاغنياء كانوا امراء ومن العائلة المالكة وليس كل الاغنياء كانوا اتراك و ليس كل الاغنياء كانوا لصوص وبيضربوا الفلاحين بالكرابيج

فعلا يا استاذ زعلان التعميم مرفوض - والمنطق مقبول - وانا بضم صوتى لصوت حضرتك . .

وكمان الموضوع كان اوفر اوى وكان واضح تماما المبالغة - فقط لخدمة اغراض سياسة - و اى منطق هذا الذي يسمح لرئيس جمهورية انه يسرق املاك الناس تحت اى مبرر

بالاضافة الى ان هذا النظام - بسببه نحن نعانى الان ومشاكل قانون الاصلاح الزراعى - نعــــــم

- حيث ان بدايه التجريف للاراضي الزراعية والزحف العمرانى - بسبب جمال عبد الناصر - عندما قام بتقسيم الاراضي على الفلاحين و سمح لهم ببناء البيوت على اجود واخصب الاراضي الزراعية ومن هنا بدأ انتشار البناء على الاراضي الزراعية - حتى وقتنا هذا جتى فى وجود نصوص القانون التى تسمح ببناء جزء معين - الناس اعتادو ذلك.

اغابي

:blink:

تم تعديل 11 مايو 2010 بواسطة اغابي

[زعلان]

بالتأكيد كان هناك اخطأت ادت الى سلسلة من الاخطاء المتراكمة لكن من الخطأ ايضا ان نحيل حاضرنا ومستقبلنا للتاريخ ونحمل التاريخ سواء بشخوصه او ازماته مسؤلية ما نحن فيه

صمتنا و ضعفنا و مشاركتنا في صنع الخطأ هي اسا ما نحن فيه لا نريد ان نكرر طريقة اصحاب الانقلاب ونصنع افلاما لا اظنها متجنية كما حدث في فترة انور السادات وكما حدث بعد ذلك في فترة حسني مبارك

نريد ان نخرج من السينما بواقعها و بخيالها و بتاريخها بغبائها احيانا و بمصداقيتها و ابداعها احيانا اخرى فنحن لا نستطيع ان نعيش في شريط سينما نعيش وهما عاشه ابناء الانقلاب

نحتاج ان نعي اننا جحزء من المشكلة وان بداية حلها في ايدينا وعلينا ان نعمل على هذا الاساس بدلا من ان نحمل التاريخ مشاكلنا المعاصرة و القادمة

[فــيــروز]

الموضوع مش موضوع لعبة قص و لزق .. الموضوع موضوع طلب قليل من الموضوعيه و الإنصاف فى التعامل مع ما يُطرَح من أفكار و كما نرى التعميم فيما لا نتفق معه علينا ألاّ ننساق لنفس الموقف مانبقاش زىّ اللىّ شايف القشّه فى عين جاره و غافل عن الخشبه فى عينه .. و الغريب أنّى كتبت فى نفس المداخله عن مصدر آخر ليس له علاقه لا بالأفلام و لا بالثوره و هو تاريخ الجبرتى لكن تمّ المرور عليه مرور الكِرام ربّما لنفس السبب وهو عدم قبولنا إلاّ لما يؤيد وجهة نظرنا و التعامى عمّا سواه .. الأفلام عُمرها ما كانت ولا هتكون مصدر للمعلومات بس يا ريت يكون ده فى فِكر من يعتمدونها كذلك لتمرير فكرة إن "مصر" كانت أجمل خاصة و نحن لم نعرف المعلومه دى -كانت أجمل- مصدرها إيه بالظبط :blink:

[اغابي]

الاستاذة فيروز

قائمة اغنياء وبشوات مصر - هم / تجار من اصول

يهودية / تركية / مصرية / شامية /

لك سيدتى ان تقسميهم الى شرفاء ومجرمون ومجتهدون وعصاميون بدأو من الصفر ..... الخ

ليس الجميع ينطبق عليهم ما سجلته اقلام كتاب الروايات فى فترة اواخر الخمسينيات وبداية الستينيات وقام بتصويره مخرجين السينما

- فاغلبيتهم يرثون الاراضى وقامو بتطوير تجارتهم وزراعتهم وليس كلهم بشوات - القلة القللة من اغنياء ذلك العصر - فاسدون - على عكس تماما عصرنا الحالى

فحاليا الاغنياء الاكثرية هم الفاسدون - ولا اعلم لو كان حاليا الذى يحكمنا جمال عبد الناصر ... ماذا سيكون فاعل بهم

شكرا

هو زوهير - سمح لنا بفرصة بصراحة انا بادور عليها من زمان

لانه لو كان عاوز يجيب سيرة فلم حب بين الاغنياء والفقراء او ابن الباشا وبنت الفقير كان عنده مثلا فلم غرام الاسياد - احمد مظهر ولبنى عبد العزيز لما كانت

بنت السايس بتاعهم - والقصة دى بعيد عن المغزى السياسي

- لكن زوهير اختار فلم له ابعاد سياسية - خطيرة - وانا بشكره لانه سمح لي القاء الضوء على مساوئ حكم جمال عبد الناصر

- كبداية حقيقية للفساد الاعظم فى مصر - وانا اعترف باننى اكره الفكر الناصري . .

اغابي

:blink:

[jasmin hamed]

السلام عليكم

طبعا الموضوع كعادة معظم الواضيع فى المنتدى خرج من التكافئ الزوجى لطبقيه و الثوره و كلام كبير كده

المهم انا اكيد مش مع القهر و السخره و الظلم و الكرابيج و لا هقول الحياه كانت بامبى بامبى زمان و دلوقت مطينه بطين

و لان مافيش حد فينا تقريبا شاهد عيان و كلنا كلامنا لا يتعدى معلومات اما من الاباء او من الكتب لكن انا هاخد مقياس صفير قوى

فى الفارق بين العاصرين مع اقرار ان لكل عصر عيوبه لكن النتيجه الاجماليه ان عصر الملكيه كان افضل من وجهة نظر

المقياس الى هاخده هوه السينما كونها كانت بتصور لنا الى ماشوفنهوش و انا هنا مش بتكلم عن الافلام هل كانت هدفه زمان او لا

انا بس عايزه اخد صورة شوارع القاهره من الافلام القديمه و الحديثه و لو جبنا واحد مش من البلد دى حتى و قلنالوا اختار بتهيئلى الاختيار سهل اوى

الفقر موجود زمان و دلوقتى افلام زمان صورت النجوع و الحوارى و مواصلات كانت شكلها اذاى

ايه رايكم مصر تحت حكم الاتراك مش كانت نظيفه اكتر مرتبه اكتر مش كان فى امان فى الشارع اكتر مش كان فيه ذوق عام فى المعمار و البناء

رغم بساطة الدخول و فقر الناس و القهر و الذل الى بيحكى عنه فى العصور القديمه انما لو قدر الاختيار بين عصر و عصر بما فى كل منهما من عيوب و مميزات

عصر الاتراك فى مجمله كان افضل من عصر شوقيه و الاستاذ على ابن الجناينى

[زعلان]

احب اعيد تلخيص فكرتي و رؤيتي للموضوع :blink:

ان كثير من نتائج الانقلاب مأسلوية على مستوى الحريات و الاقتصاد و التعليم و الطب تدهور مستمر ومن سيء لأسوأ وصولا الو واقعتا الذي نعيشه فما يهمنا هو واقعنا

وان نقرأ التاريخ بالطبع فلم تكن مصر جنة قبل الانقلاب كما انها لم تكن افضل بعد الانقلاب

لا يهمنا ان ناحاكم اصحاب الانقلاب الان او نناقشه

لعل من المجديو الافضل ان نناقش حاضرنا ومستقبلنا بعيدا عن تحميل التاريخ فقط المسؤلية

و اذا كنا سنناقش الفلم المثار والذي بطبيعة الحال ادى الى عرض تحليل الفكر السياسي الشمولي الذي كان جزء من نتاجه هذه النوعية من السينما