الزواج الثاني بين الاباحة الشرعية و الاستنكار الاجتماعي (رأيك)

[the consultant]

باين من عنوانه/ بعيدا عن الدخول في جدل محسوم و مسائل قتلت بحثا . السؤال:

للرجال/ ما رايك الشخصي في الزواج الثاني (خلينا واقعيين لا تالت و لا رابع "صباح القناعة") و هل تفكر في التنفيذ. ( و يا سلام لو نفذت فعلا و تشاركنا تجربتك الحية).

للنساء/ ماذا تفعلين في المواقف الاتية

1: لو اكتشفت ان زوجك قد تزوج عليكي.

2: كان متزوج من قبلك(ولا يزال) و اتقدملك معترفا بذلك .

3: في لحظة صفاء كدة جمع كل مصادر الشرع المثبتة لاباحة الزواج مرة اخرى و المصادر الاجتماعية المثبتة لزيادة نسبة العنوسة و صرحلك بإنه عايز يشارك في حل هذه الازمة بالزواج.

[ابو محمد بن مصطفي]

ليه بس يا سياده المشتشار اثارة الفتنة العاطفية

انا عن نفسي اؤيد الزواج التاني وبشدة

بس للاسف مليش تجارب اخري هي تجربة واحدة

[the consultant]

ليه بس يا سياده المشتشار اثارة الفتنة العاطفية wst::

انا عن نفسي اؤيد الزواج التاني وبشدة :D

بس للاسف مليش تجارب اخري هي تجربة واحدة

لا والله يا ابو محمد مش قصدي فتنة و لا حاجة , بس الموضوع كان مفتوح متفرعا عن موضوع اخر و بدأت اسمع اراء مشوقة و مثيرة للاعجاب فقلت نخليه في موضوع لوحده و حاسس اننا حنلاقي ردود غير متوقعة كنساء مؤيدة للزواج الثاني مثلا يمكن !!! خلينا نشوف .

[doha]

بناء على العنوان فبسم الله الرحمن الرحيم الاجابة الثانية

قصدي معليش نقطه بس نحب نتفق عليها الاول

الزواج الثاني في الاسلام زيه زي الطلاق بالظبط ( رخصة ) مش ( ندب ) او تفضيل

يعني هو امر ربنا سبحانه اباحه فيما لو كان في حاجه اليه بينما الاصل فيه انه شيء لا يتم اللجوء اليه الا في الحالات القصوى او لما ميكونش في بديل

عمرنا ماسمعنا ان واحد بيطلق مراته لمجرد ان الشرع اباح له الطلاق ده وبناء عليه فمش من المنطق ابدا ان واحد يجي كده ويقول انا هتجوز تاني لمجرد ان الشرع اباح له ده

والله الي عنده صحه وفلوس تكفي فتح بيتين وانه يبقى عادل مابين الاثنين بحيث متحسش واحده فيهم انها متجوزه ( نصف راجل ) ويقوم معاهم جميعا بكل مايقوم بيه الزوج من نفقة واعالة وقوامه يبقى خلاص خير وبركه

لكن نبص لجانب المتعه في الزواج ونعتبره مندوب لهذا السبب فقط وننسى ان زوجه ثانيه يعني مسؤولية تانيه وبيت مفتوح وناس في رقبة الزوج هيسال عنهم يوم القيامه اهو ده الي محتاج وقفة بجد

بعد مااتفقنا نرجع بقى لسؤالك

لواكتشفت ان زوجي متزوج علي من غير مايقول لي طبعا اكيد هيكون لي وقفة واعتقد مش هستمر معاه ببساطه لان حياتي معاه مبنية على حبي واحترامي ليه ولما يروح الحب والاحترام فمش لازمني الزواجه دي خالص واعتقد مفيش وحده هتحترم واحد داخل طالع واكل شارب نايم وهو مخبي عليها حاجه خطيرة زي دي

اما لو متجوزش وفاتحني في رغبته في الجواز فاعتقد لكل حادث حديث ومش عاوزه اقدر ( البلا ) قبل وقوعه بس لو حصل اعتقد هناقشة وفي احتمال انه يقنعني واني اوافق

بس للامانة .. احتمال ضعيف

[mekkawy]

6 عدد القراء الحاليين لهذا الموضوع (1 الزوار 0 المتخفين)

5 الأعضاء: mekkawy, abaomar, مسافر زاده الخيال, the consultant, hanzalah

أهلاً أهلاً بالردالة

جايلك أنا يا مستشار الحب بس اصطبورلنج كدة لما أستمخ شوية في الموضوع الشائك ده ... يا خوفي يا مهراااان

مكاوى

[pocy]

وووواااااااااااااااااااااووووووووووووووو

عجبنى جدا الموضوع ده جدا

أنا أؤيد وبشده الزواج التانى للرجل بجد والله دى حاجه هتبقي ممتعه جدا ويا سلام لو كان متزوج وبعدها بفتره كام سنه قول كده 10 سنوات زواج تزوج تانى دانا هفرح فيه فرح هههههههههههههههههههههههههههههه

اخى الفاضل نتكلم بجد بقي شويه لا شويتين بص انا واحد تؤيد الزواج التانى وده لانه محلل له شرعا ولكن فقط إذا استوفى الشروط وهو انه يكون بعلم الزوجه وانه يكون بموافقتها ويا سلام لو كان بختيارها

لا خلينا نتكلم فى الشروط اللى بجد العدل ثم العدل ثم العدل واعتقد ان الحاج متولى دى اسطوره صعب جدا انها تنفذ لان القلب وما يريد وكمان الاولى تحلى حتى لو كانت وحشه

وكمان الراجل مش قوى لدرجه انه يتحمل مسئوليه بيتين مره واحده حتى لو كان مقتدر ماديا

بجد انا معنديش مانع ان زوجى يتزوج على بس مش يحسسنى ان فى واحده تانيه معاى wst:: وانه يعدل بينا وعلى اد ما بيحبنى يحبها وعلى أد ما بيحب اولادى يحب اولادها وعلى اد ما بيراعي ربنا في يراعي ربنا فيها فهل هناك مثل هذا الرجل ؟؟؟؟؟؟؟؟؟؟؟؟؟؟؟؟؟؟؟؟

لا اعتقد لذا فللاسف الان انا اعارضه وبشده ههههههههههههههه

ايه ده التناقض افظيع ده :D بجد انا لسه مش شوفت الراجل اللى قدر يتجوز اتنين ويعدل بينهم فى كل شئ ولما الاقيه يمكن احث زوجى على الزواج التانى ايه المشكله

وبطلوا يا رجاله تتمحكوا فى العنوسه علشان تتزوجوا تانى

[لماضة مصرية جدا]

اما لو متجوزش وفاتحني في رغبته في الجواز فاعتقد لكل حادث حديث ومش عاوزه اقدر ( البلا ) قبل وقوعه بس لو حصل اعتقد هناقشة وفي احتمال انه يقنعني واني اوافق

بس للامانة .. احتمال ضعيف

السلام عليكم و رحمة الله و بركاته

استاذتي ضحي.....عجبتني انا كلمة لكل حادث حديث.....مش عارفة ليه حسيت ان فعلا لو سبع الرجالة دخل عليا و قالي انه هيتجوز....فعلا هيكون "حادث"......و الاكيد انه هيبقي "حديث" الناس

لا انا بهزر طبعا....لانه مش هيهون عليا و بعدين انا يعني اضيع شبابي عليه

رايي بقي

هو لو احنا فهمنا دماغ اللي قدامنا و الله هنستريح...و هنعرف نريح بعض

يعني الست بتزعل ليه من موضوع التلميح و ليس التنفيذ بوجود زوجة تانية لانها ببساطة بتاخد ده ع اعصابها و بتفتكر انها مقصرة مثلا في حاجة....و في نفس الوقت الست متحبش المنافسة و خصوصا مع ست تانية....فده بيعمل عندها حالة استنفار عامة و بترفض الموضوع

الراجل و لا في دماغه الليلة دي خالص....مراته ممكن تبقي ست الستات بس هو كده...طبيعته كده.....عايز يعيش مغامرة.....هيقتله الفضول انه يشوف لون جديد...مع ان سبحان الله مراته مممكن تكون مورياله كل الوان الطيف....بس هو كده عايز يعيش قصة و حكاية و حركات

فيه ستات متستحملشي كده....و ده حقها جدا ..." لا يكلف الله نفسا الا وسعها"....يبقي تنسحب باحترامها لنفسها

فيه ستات ممكن يكون عندها طولة بال علي الزوج.....يا اما تحاول تخليه يغير اتجاه الجزمة......يعني يغير تفكيره و يرجع بيته و يكن كده و يركز.....و دي الستات اللي م نوع المقاتلة زينا....

او حتي لو عملها و اتجوز برضه هتقدر انها تتكيف مع الوضع لانه بيحقق ليها توازن حتي لو كان جزئي

فيه ستات بقي و الله و قابلت منهم كتير بتشجع جدا....اه و الله محدش يستغرب ليه بقي......لانها بتعجبها فكرة زوج بدوام جزئي.....يعني بتشوفه في الويك اند مثلا...و و بيعيشوا كانهم في مغامرة ...او في ايام خطوبة بس شرعية......و البيه بيقضي بقية الاسبوع مع ام العيال ما هي الزوجة في الحالة دي بتاخد اللقلب الجبار ده.....بس الستات دول بتبقي مكتفية بنفسها جدا...ممكن تتجوز عشان مثلا وجاهة اجتماعية او عشان تنجب طفل....لكن وجود الرجل في حد ذاته ككيان يسندنها امر منتفي

و متهيالي النوع ده من الستات بيعرف يريح الرجل اللي بيدور ع جواز للمرة التانية......لانهم من البداية داخلين واضحين

بس حلم الزواج عند الرجل

حقيقي جدا

مرة و اتنين ع الاقل

ربنا يوفقكم بقي

عايزة اسمع تجربة حقيقة هينفع و لا ايه

فوتكم بعافية

[mekkawy]

الراجل و لا في دماغه الليلة دي خالص....مراته ممكن تبقي ست الستات بس هو كده...طبيعته كده.....عايز يعيش مغامرة.....هيقتله الفضول انه يشوف لون جديد...مع ان سبحان الله مراته مممكن تكون مورياله كل الوان الطيف....بس هو كده عايز يعيش قصة و حكاية و حركات

شدتني أوي الجملة دي ... لو فعلاً ده الوضع و مع ذلك هو كدة ... خلقته كدة ... بالبلدي و على بلاطة ... فتنته في النساء و بيحب النساء .. ها ... يتجوز ولا يهوبص؟؟؟

سؤال يطرح نفسه

مكاوى .. استفسارات

[pocy]

الراجل و لا في دماغه الليلة دي خالص....مراته ممكن تبقي ست الستات بس هو كده...طبيعته كده.....عايز يعيش مغامرة.....هيقتله الفضول انه يشوف لون جديد...مع ان سبحان الله مراته مممكن تكون مورياله كل الوان الطيف....بس هو كده عايز يعيش قصة و حكاية و حركات

شدتني أوي الجملة دي ... لو فعلاً ده الوضع و مع ذلك هو كدة ... خلقته كدة ... بالبلدي و على بلاطة ... فتنته في النساء و بيحب النساء .. ها ... يتجوز ولا يهوبص؟؟؟

سؤال يطرح نفسه

مكاوى .. استفسارات

لا يتلم ويغض بصره ويقتنع باللى في ايده ويعرف ان الله حق وكده استحاله انه تفتنه النساء هههههههههههههههه

[أبو محمد]

الزواج الثانى والثالث والرابع (سيبنا من القناعة دلوقت ) مباح شرعا فى الإسلام ؟ .. نعم .. وقد تكون هناك حاجة "ملجئة" إليه .. لا شك فى هذا ..

أما كونه مندوب أو سنة مؤكدة "يجب" اتباعها تأسيا بالسلف الصالح (كما يبشرنا البعض) .. فعندى شك "قوى" فى هذا يرقى إلى مستوى الرفض

نيجى بقى للحاجة "الملجئة"

العقد شريعة المتعاقدين .. أعتقد أنه لا خلاف على ذلك .. طيب .. واحد مضى على عقد زواج من "غزال" سواء اسكندرانى أو حتى فيومى .. يعمل إيه لو بص لقى الغزال ده بيتحول تدريجيا إلى .. ثم إلى .. ثم إلى .. ؟ .. هل يحق له "اللجوء" إلى المباح ؟

[the consultant]

معادلة صعبة جدااااااااااااااااااا.

فعلا تحقيق المعادلة بين الدين و المجتمع صعب جدا جدا.

اطلاق اللحية (بالرغم من انه فرض) ---------- يجعلك مش وجهة اجتماعية في نظر المجتمع و الناس تنظر لك ارتيابا.

تقصير الازار ----------------------- يجعلك ملفتا للانتباه بطريقة سلبيه خصوصا لو ببدله (كارثة)

اذا رفضت حضور حفل او فرح فيه غناء و رقص-------------------------فانت غريب الاطوار

اذا دعوت الى منع الاختلاط-------------------------فانت متخلف

و اخيرا اذا حاولت انك تتزوج مره ثانيه لوجود سبب لعله يكون اتقاءا للفتنه مثلا ( والحكم هنا الاباااااحة و ليس الندب او الوجوب بالتأكيد الا اني اعتقد انه قد يرتقي الحكم لدرجة اعلى من مجرد الاباحة في حالة الخوف من الافتتان) ------------فانت ناكر للجميل جاحد خائن شهواني

انا مش بدافع انا بوصف الاساسيات اللي احنا اتربينا عليها , انا عن نفسي عقليا مقتنع تماما باهمية التعدد لكن نفسيا هناك ما يمنعني من مجرد التفكير و اجد نفسي انظر الى نفسي بذات النظرة التي ينظر بها المجتمع للمتزوج على زوجته. طيب هو مين الصح.

[engmido]

عموما ...لا يستطيع احدا ان ينكره

ومنعا للقيل والقال

هو مباح ولكن فى ظروف ما.....لست مؤهلا للحديث عنها

--------------

ولكن بالذمة كده ( الكلام للرجالة محدش يتدخل من نون التوكيد قصدى نون النسوة)

دى غلطة تتكرر؟؟؟؟؟؟؟؟؟؟؟!!!!!!!!!!!!!!!!!!

[engmido]

الراجل و لا في دماغه الليلة دي خالص....مراته ممكن تبقي ست الستات بس هو كده...طبيعته كده.....عايز يعيش مغامرة.....هيقتله الفضول انه يشوف لون جديد...مع ان سبحان الله مراته مممكن تكون مورياله كل الوان الطيف....بس هو كده عايز يعيش قصة و حكاية و حركات

شدتني أوي الجملة دي ... لو فعلاً ده الوضع و مع ذلك هو كدة ... خلقته كدة ... بالبلدي و على بلاطة ... فتنته في النساء و بيحب النساء .. ها ... يتجوز ولا يهوبص؟؟؟

سؤال يطرح نفسه

مكاوى .. استفسارات

لا يتلم ويغض بصره ويقتنع باللى في ايده ويعرف ان الله حق وكده استحاله انه تفتنه النساء هههههههههههههههه

طيب يا مدام بوسى

اذا لم هو نفسه...الستات اليومين دول مين يلمهم عنه....وهما لابسين المدندش وعاملين البدع

معلشى احنا بنتكلم برده

[mekkawy]

يا ست الكل مهو لو لم نفسه زي ما مهو مطلوب منه مكنش قال ان فتنته في النساء ... حضرتك مخدتيش بالك .. فتنته في النساء دي يعني مش عارف يلم نفسه

و بعدين مش شرط إن شخص ما فتنته في النساء مثلاً إنه مطلق البصر .. مهو بردو لو أطلق البصر مش هيحتاج للحلال .. صح ولا ايه ؟ هو ايه اللي بيخلي الشباب الملتزم يتجوز بدري ... هو انه مش مقضيها ... فالبتالي بيبحث عن الحل الحلال لهذه الغريزة بداخله فلا يجده الا في الزواج علشان كدة معظم الشباب الملتزم بيتزوج بدري.

عامة مش شرط إن أي شخص فتنته في أي شئ إنه يلجأ ليه في الحرام .. يعني أنا مثلاً بحب البرانس .. الفلوس يعني .. أكيد مش هأسرق ... و هكذا ... وضحت ؟

أنا بأة عندي حل للأخ النشيط ده إحنا نشوفله واحدة كمان بأة تهد حيله و تلففه حوالين نفسه بالتعاون مع الزوجة الأولى عشان يقدر يلم نفسه .. شفتي بسيطة ازاي

مكاوى

تم تعديل 11 مايو 2010 بواسطة mekkawy

[pocy]

على العموم يا اخي ميدوووووووووووووووو ويا اخى الفاضل مكاوى انا معاكم قلبا وقالبا انه مش قادر يلم نفسه فى وسط ....................ز اللى حوليه خلاص انا معاه انه يتجوز واحده تانيه ولو مش قدر يتلم وشاف واحده تاتله نجوزها وفى الاخر هو هيتعمى اكيد بالرابعه ههههههههههههههههههه

والله انا لست ضده بالعكس انا معاه دى حاجه محللها ربنا اجى انا احرمها عليه ليه ثم دانا افرح فيه علشان يعرف قيمتى كويس لان الاولى ياما بتستحمل لكن التانيه اجاركم الله هههههههههههههههه

ده تحذير وتنبيه مش اكتر ههههههههههههههه

[pocy]

معلش يا لماضه بس بجد موضوع حادث حديث ده فظيع جدا مقدرتش معلقش عليه وسبحان الله حصل الموضوع عن تجربه لجاره حماتى هههههههههههههههه

الست دى كانت متزوجه لواحد وكانوا عايشين على الاد ومشاكل الدنيا بينهم وبعد17 سنه زواج تفاجأ انه متزوج صديقتها اللى بتزورهم يوميا فى البيت والغريبه انها كمان بتساعده فى مصروف البيت كمان ولما كانت هتخرب على بيتها وهو قرر يطلق التانيه اكتشفوا انها حامل واضطر انه يبقي عليها علشان الطفله اللى اتولدت دى تخيلي بقي وضع الزوجه الاولى والتانيه الان دسائس ومكائد والزوج هو اللى غلبان فى النص لا بيحل ولا يربط هههههههههههههههههههههه وبجد حالته تصعب على اى حد

والمفروض انه محامى وقال علشان اعدل هقسم ايام الاسبوع وان ده ليها جمعتين ودى ليها جمعتين ومصاريف هنا زى مصاريف هنا بس هل عدل فى قلبه وميله الى احداهما انه دائما ما يشتكى الاولى للثانيه والعكس والله تشوفيه كبر 20 سنه قدام ومره واحده من ساعه ما مراته عرفت

وربنا يشفي كل راجل ويغص بصره عن مفاتن النساء غير زوجته

[mekkawy]

بـــــــــــــــــــس ... هوووووووووووووووس

عندي مثال حي و تجربة واقعية ... نازل بيها حالاً .. و أنا أراها ناجحة

مكاوى

[doha]

معادلة صعبة جدااااااااااااااااااا.

فعلا تحقيق المعادلة بين الدين و المجتمع صعب جدا جدا.

اطلاق اللحية (بالرغم من انه فرض) ---------- يجعلك مش وجهة اجتماعية في نظر المجتمع و الناس تنظر لك ارتيابا.

تقصير الازار ----------------------- يجعلك ملفتا للانتباه بطريقة سلبيه خصوصا لو ببدله (كارثة)

اذا رفضت حضور حفل او فرح فيه غناء و رقص-------------------------فانت غريب الاطوار

اذا دعوت الى منع الاختلاط-------------------------فانت متخلف

و اخيرا اذا حاولت انك تتزوج مره ثانيه لوجود سبب لعله يكون اتقاءا للفتنه مثلا ( والحكم هنا الاباااااحة و ليس الندب او الوجوب بالتأكيد الا اني اعتقد انه قد يرتقي الحكم لدرجة اعلى من مجرد الاباحة في حالة الخوف من الافتتان) ------------فانت ناكر للجميل جاحد خائن شهواني

انا مش بدافع انا بوصف الاساسيات اللي احنا اتربينا عليها , انا عن نفسي عقليا مقتنع تماما باهمية التعدد لكن نفسيا هناك ما يمنعني من مجرد التفكير و اجد نفسي انظر الى نفسي بذات النظرة التي ينظر بها المجتمع للمتزوج على زوجته. طيب هو مين الصح.

معليش ياكونسولتانت انا (هشوط ) وشكلها هتيجي فيك .. سامحني بس هو موضوع بيستفزني دائما ومعليش بقى حظك انك فتحته قدامي

مش واخد بالك حضرتك انك وبعفوية تامه لما حبيت تتكلم عن ( اصول الاسلام ) وازاي بقى صعب نتمسك بيها اليومين دول قلت ان الواحد ميقدرش يعمل يطول لحيته ولا يقصر ثوبه ولا يمتنع عن سماع الموسيقى ولا يتجوز على مراته .. دي عيشة ايه الي تخنق دي

ومجاش في بالك ان في اصول تانيه اسلامية برضه واعمق من السابقة ونظرا لوضعنا الحالي بقى صعب اوي تطبق .. خذ عندك

الواحد منكم ياولداه معادش يقدر يطبق الامر بغض النظر خاصه وهو بيقلب في قنوات الدش ليل نهار او حتى بيتصفح موقع في النت فظهر له ( بوب اب ) مفاجيء بما لايسر

محدش بيلوم نفسه ابدا انه بيبص على غزال معدي في الشارع و لابسه جينز محزق لكن يتحسر على شجرة الجميز الي ماشية جنبه ومنعاه من شم نفسه

مش بقول ان حضرتك مش بتغض بصرك .. ولكن اقول ان ثلاثه ارباع الرجاله الي مش بتغض بصرها بتبص وتبحلق وترجع تمصمص شفايفها على .. النصيب

محدش برضه من الي صدعونا كل يوم الحواجب حرام متعمليهاش ولو رقصتي لجوزك هتدخلي النار .. مفيش وحده منهم طلعت واتشمللت كده وقالت من الاسلام انك تأكل عبدك مما تأكل ولا تضربه ولا تهينه ولا ترفع عليه صوت .. ده العبد المملوك .. فمابالك بالخادمه الكسيرة الي جايه من بلدها متشحططه عشان لقمه العيش .. مسمعناش وحده منهم قالت عامليها كويس او طبطبي عليها وانما كلهم ملاعين انجاس ومخلصين اكل البيت الله يقطع اليوم الي دخلناهم عندنا فيه

وقيس على ذلك الاسلام ( المتفصل ) على عادات وتقاليد منطقة جغرافية بعينها بما يستحيل معه تطبيقه ( بحذافيره ) في مكان آخر او بيئات اخرى

سيدي الفاضل اللحية والجلباب والزواج الثاني شيء جميل لما يكون متماشي مع مجتمعك الي عايش فيه وهي امور لم يحرمها الاسلام بس برضه لم يندبها او يحث عليها ..

عارفه هتجيب لي الف دليل ان اللحية فرض ويمكن حالقها كافر .. بس فكر في كلامي كده هتلاقي ان في اصول تانيه ويمكن اهم ومحدش بيجيب سيرتها.. طب ليه ؟؟

[mekkawy]

تجربة واقعية للزواج الثاني:

خالي العزيز

خالي ده راجل سكرة كدة ... طوب الأرض بيحبه .. إنسان عادي و بسيط .. يعرف من الدين القدر اليسير .. بيعمل عمرة لما يقدر و بيصلى الجمعة في الجامع و لو شغله سمحله بيصلي الفروض التانية في الجامع بردو و لو مقدرش بيصلي في المكتب .. أكتر إنسان شفته في حياتي بيعمل خير .. كان مدخن و بطل .. راجل شيك أنيق لذيذ .. لبق و عسول و روش اخر حاجة و مع كل واحد بسنه (هو 48 سنة) عنده 3 أبناء ... ولد 21 سنة ... بنت 18 سنة ... بنت 9 سنين ... خالي ده فاكهة العيلة و حبيب الكل و مهما وصفت فيه مش هأكفيه

خالي جه في يوم من سنتين كدة و راح متجوز تاني ... بتقولوا ايه يا ولاد .. اتجوز تاني ؟؟؟؟ بتقولوا مين يا ولاد ... خالي اتجوز ... و من يوم ما اتجوز بأة ... خدوا عندكوا ....

شياكة و أناقة أكتر م الأول بكتييييير ... بال رايق ... فسح و خروجات هنا و هناك ... متزوج بالاتفاق على فكرة .. يعني ما ضحكش على زوجته ولا حطها قدام الأمر الواقع ... عايش هنا و عايش هنا ... جدد لزوجته الأولى الشقة بالكامل لسة من كام شهر كدة .. شقة جديدة بعفش جديد ... خالي مش من الأثرياء بس مجتهد ... زوجته الثانية متفهمة وضعه و أولاده متفهمين و الكل عايش و مبسوط .. ما بأقولش الدنيا وردي .. أكيد فيه وش بردو ... بس هو قادر عليه و ممشي الاتنين تمام .... و ما شفتش عليه إنه كبر ولا حاجة ولا كتافه دلدلت من الهموم.

عامة ما تاخدوش خالي مقياس ... أصل إحنا عيلة قادرة و رجالتها مخلصين

مكاوى .. مش قلتلكم سيطرة

[MZohairy]

الزواج الثاني في الاسلام زيه زي الطلاق بالظبط ( رخصة ) مش ( ندب ) او تفضيل

يعني هو امر ربنا سبحانه اباحه فيما لو كان في حاجه اليه بينما الاصل فيه انه شيء لا يتم اللجوء اليه الا في الحالات القصوى او لما ميكونش في بديل

عمرنا ماسمعنا ان واحد بيطلق مراته لمجرد ان الشرع اباح له الطلاق ده وبناء عليه فمش من المنطق ابدا ان واحد يجي كده ويقول انا هتجوز تاني لمجرد ان الشرع اباح له ده

كلام جميل و منطقي و متزن

فراغة العين و زوغانها مالوش رخصه و ميتحلش بالرخصه

العين الفارغه مايكفيهاش 10 ستات

لأن البصبصه عنده مبدأ

و كل ما يمتلك حاجه عجباه حيشوف الجديد و يبقى نفسه فيه (عدد لا نهائي من الاحتمالات في اشكال النساء)

التعدد مشروط بأمور أخرى و لأسباب أخرى ليس من بينها الطفاسه

تحياتي