الزواج الثاني بين الاباحة الشرعية و الاستنكار الاجتماعي (رأيك)

[doha]

تجربة واقعية للزواج الثاني:

خالي العزيز

خالي ده راجل سكرة كدة ... طوب الأرض بيحبه .. إنسان عادي و بسيط .. يعرف من الدين القدر اليسير .. بيعمل عمرة لما يقدر و بيصلى الجمعة في الجامع و لو شغله سمحله بيصلي الفروض التانية في الجامع بردو و لو مقدرش بيصلي في المكتب .. أكتر إنسان شفته في حياتي بيعمل خير .. كان مدخن و بطل .. راجل شيك أنيق لذيذ .. لبق و عسول و روش اخر حاجة و مع كل واحد بسنه (هو 48 سنة) عنده 3 أبناء ... ولد 21 سنة ... بنت 18 سنة ... بنت 9 سنين ... خالي ده فاكهة العيلة و حبيب الكل و مهما وصفت فيه مش هأكفيه

خالي جه في يوم من سنتين كدة و راح متجوز تاني ... بتقولوا ايه يا ولاد .. اتجوز تاني ؟؟؟؟ بتقولوا مين يا ولاد ... خالي اتجوز ... و من يوم ما اتجوز بأة ... خدوا عندكوا ....

شياكة و أناقة أكتر م الأول بكتييييير ... بال رايق ... فسح و خروجات هنا و هناك ... متزوج بالاتفاق على فكرة .. يعني ما ضحكش على زوجته ولا حطها قدام الأمر الواقع ... عايش هنا و عايش هنا ... جدد لزوجته الأولى الشقة بالكامل لسة من كام شهر كدة .. شقة جديدة بعفش جديد ... خالي مش من الأثرياء بس مجتهد ... زوجته الثانية متفهمة وضعه و أولاده متفهمين و الكل عايش و مبسوط .. ما بأقولش الدنيا وردي .. أكيد فيه وش بردو ... بس هو قادر عليه و ممشي الاتنين تمام .... و ما شفتش عليه إنه كبر ولا حاجة ولا كتافه دلدلت من الهموم.

عامة ما تاخدوش خالي مقياس ... أصل إحنا عيلة قادرة و رجالتها مخلصين

مكاوى .. مش قلتلكم سيطرة

ياسيدي الفاضل دي ازمه منتصف العمر وهو ده بالظبط موعدها وهي دي بالظبط اعراضها

متحكمش على تجربة خالك النهرده فالزواج الثاني مش شياكه ومتعه وفسح وخروج .. ادينا خلاصة التجربة بعد سنتين تلاته او حتى خمسه من دلوقت لما يدخل في الخمسين والصحه تتعب ويبقى عاوز بس هدوء وحد يناوله ازازة الدوا

خالك هيندم لانه اخذ الخطوة الغلط في الميعاد الصح ..

[engmido]

أصل إحنا عيلة قادرة و رجالتها مخلصين

ياجاااااااااااااامد.....ممكن اعمل اشتراك فى عيلتكم

[the consultant]

معليش ياكونسولتانت انا (هشوط ) وشكلها هتيجي فيك .. سامحني بس هو موضوع بيستفزني دائما ومعليش بقى حظك انك فتحته قدامي

حقك طبعا يا مدام ضحى و حقي اني ارد

مش واخد بالك حضرتك انك وبعفوية تامه لما حبيت تتكلم عن ( اصول الاسلام ) وازاي بقى صعب نتمسك بيها اليومين دول قلت ان الواحد ميقدرش يعمل يطول لحيته ولا يقصر ثوبه ولا يمتنع عن سماع الموسيقى ولا يتجوز على مراته .. دي عيشة ايه الي تخنق دي

اولا انا ولا مطلق لحية ولا مقصر ازار ولا متجوز على مراتي ( مقدمه فقط للتدليل على كوني بتكلم من وسط الصفوف العريضة المستسلمة للواقع لعلني اجد من يشدني للحق او اجد في كلامي نصيحه لنفسي) . و في نفس الوقت اسمحيلي اعترض على صياغة الجملة من حضرتك و في نفس الوقت احييكي على مهارتك في تغيير تووون الكلام (اعيدي قراءة مداخلتي والله مكانتش بتون ده عيشة ايه اللي تخنق ولا حاجة) و طبعا حضرتك بالباس مدخلتي هذا اللباس الملفق افقدتيها ذاتها و هدفها (فتجدي من يقرأ تعليقك يقول ياااه يا ضحى فعلا كونسلتانت ده زيه زي كل الناس اللي بيبصو للدين كمظهر و لحية و سايب الاصل و الاساس) و بالتالي كل ما بني على ذلك فهو غير صحيح (اي خارج نطاق ما قصدته).

ومجاش في بالك ان في اصول تانيه اسلامية برضه واعمق من السابقة ونظرا لوضعنا الحالي بقى صعب اوي تطبق .. خذ عندك

الواحد منكم ياولداه معادش يقدر يطبق الامر بغض النظر خاصه وهو بيقلب في قنوات الدش ليل نهار او حتى بيتصفح موقع في النت فظهر له ( بوب اب ) مفاجيء بما لايسر

بالنسبة لي الدين كل لا يتجزأ وعندما كنت (في احسن ايام حياتي) مطلقا لحيتي و مقصر و ملتزم بصلاة الجماعة في المسجد و السنن و غيرها كنت من المستحيل ان انظر نظرة حرام ايا كان مصدرا لاني كنت صافي من الداخل و ملتزم ايضا من الخارج.

محدش بيلوم نفسه ابدا انه بيبص على غزال معدي في الشارع و لابسه جينز محزق لكن يتحسر على شجرة الجميز الي ماشية جنبه ومنعاه من شم نفسه

نفس الاجابه السابقة

مش بقول ان حضرتك مش بتغض بصرك .. ولكن اقول ان ثلاثه ارباع الرجاله الي مش بتغض بصرها بتبص وتبحلق وترجع تمصمص شفايفها على .. النصيب

محدش برضه من الي صدعونا كل يوم الحواجب حرام متعمليهاش ولو رقصتي لجوزك هتدخلي النار .. مفيش وحده منهم طلعت واتشمللت كده وقالت من الاسلام انك تأكل عبدك مما تأكل ولا تضربه ولا تهينه ولا ترفع عليه صوت .. ده العبد المملوك .. فمابالك بالخادمه الكسيرة الي جايه من بلدها متشحططه عشان لقمه العيش .. مسمعناش وحده منهم قالت عامليها كويس او طبطبي عليها وانما كلهم ملاعين انجاس ومخلصين اكل البيت الله يقطع اليوم الي دخلناهم عندنا فيه

للاسف هنا حضرتك عممتي (لان في ناس مع تحريم النمص و التنمص كجزء من التعاليم الاسلامية و تجديه على خلق زو ملتزم بكافة التعاليم الاسلامية و يراعي الله في خدمه .

و

قيس على ذلك الاسلام ( المتفصل ) على عادات وتقاليد منطقة جغرافية بعينها بما يستحيل معه تطبيقه ( بحذافيره ) في مكان آخر او بيئات اخرى

سيدي الفاضل اللحية والجلباب والزواج الثاني شيء جميل لما يكون متماشي مع مجتمعك الي عايش فيه وهي امور لم يحرمها الاسلام بس برضه لم يندبها او يحث عليها ..

تاني حضرتك اصبغتي كلامي بصبغة من ساوى بين اللحية (التي هي فرض) و الجلباب (الذي قد يكون مندوبا بشروط) و الزواج الثاني (الذي هو مباح). و ارجو منكي مراجعة الاصول الشرعية المتعلقة بكل مسألة منهم للتأكد من صحة كلامي

عارفه هتجيب لي الف دليل ان اللحية فرض ويمكن حالقها كافر .. بس فكر في كلامي كده هتلاقي ان في اصول تانيه ويمكن اهم ومحدش بيجيب سيرتها.. طب ليه ؟؟

هو دليل واحد امرنا الله عز و جل بطاعة اوامر النبي (ص) بدليل قوله تعالى" وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا وَاتَّقُوا اللَّهَ إِنَّ اللَّهَ شَدِيدُ الْعِقَابِ" من المتفق عليه في اصول الفقه ان الواجب هو ما جاء في صيغة امر (اي إفعل) (أقيموا الصلاه) و الحرام هو ما جاء في صيغة نهي (اى لا تفعل) (ولا تقربوا الزنا) و قول رسول الله (ص) عن اللحية جاء بصيغة الامر (اطلقوا اللحى........) اذن......., اما عن باقي الاصول فهي غير مختلف فيها و ليست محل للنقاش يعني هل معنى كلام حضرتك ان لو واحد بيصلي و يصوم و يتصدق و حسن الاخلاق مع خدمه يبقى ده له الحق في الكلام عن الزواج الثاني و اللحيه و تحريم النمص و اسبال الازار .

هل معنى ان سيارتك محتاجه عمرة موتور (بس ماشية) يبقى مش لازم تنضفيها أو تركنيها كويس او تحافظي عليها لمجرد ان العمرة امر اهم , ولو اتى اليك احد ناصحا بنظافة السيارة تردين بقولك "كلمني في العمرة لان العمرة اهم , النضافة دي مسألة شكليه و كل اللي بينضفوا عربياتهم مواتيرهم بايظه" سيدتي العمرة هنا (في المثال البسيط) امر بديهي و لا خلاف على اهميته اما المسائل الاخرى هي محل الخلاف فالاولى الحديث عنها.

[mekkawy]

ياسيدي الفاضل دي ازمه منتصف العمر وهو ده بالظبط موعدها وهي دي بالظبط اعراضها

متحكمش على تجربة خالك النهرده فالزواج الثاني مش شياكه ومتعه وفسح وخروج .. ادينا خلاصة التجربة بعد سنتين تلاته او حتى خمسه من دلوقت لما يدخل في الخمسين والصحه تتعب ويبقى عاوز بس هدوء وحد يناوله ازازة الدوا

خالك هيندم لانه اخذ الخطوة الغلط في الميعاد الصح ..

طب ليه بس نحكم على تجربة بالفشل و الندم ... مندعيله بالخير و ربنا يسعده و يوفقه .. و على فكرة لأني عارف خالي فبأكد انه مش من النوع اللي يمشي ورا أزمة منتصف العمر و كان ممكن أوافقك جداً و الله يا أخت ضحى لو هو اتجوز واحدة عشرينية مثلاً أو ثلاثينية .. هو تزوج امرأة أربعينية و أدت رسالتها في الحياة و لديها أحفاد و أرملة ... و هو بالفعل بقاله سنتين دلوقتي ... ربنا يعينه و يسعده يا رب و يسعد كل المسلمين.

مكاوى

[mekkawy]

بالله بلااااااااااااااااش نقفل الموضوع ده كمان

مكاوى

[MZohairy]

تجربة واقعية للزواج الثاني:

خالي العزيز

خالي ده راجل سكرة كدة ... طوب الأرض بيحبه .. إنسان عادي و بسيط .. يعرف من الدين القدر اليسير .. بيعمل عمرة لما يقدر و بيصلى الجمعة في الجامع و لو شغله سمحله بيصلي الفروض التانية في الجامع بردو و لو مقدرش بيصلي في المكتب .. أكتر إنسان شفته في حياتي بيعمل خير .. كان مدخن و بطل .. راجل شيك أنيق لذيذ .. لبق و عسول و روش اخر حاجة و مع كل واحد بسنه (هو 48 سنة) عنده 3 أبناء ... ولد 21 سنة ... بنت 18 سنة ... بنت 9 سنين ... خالي ده فاكهة العيلة و حبيب الكل و مهما وصفت فيه مش هأكفيه

خالي جه في يوم من سنتين كدة و راح متجوز تاني ... بتقولوا ايه يا ولاد .. اتجوز تاني ؟؟؟؟ بتقولوا مين يا ولاد ... خالي اتجوز ... و من يوم ما اتجوز بأة ... خدوا عندكوا ....

شياكة و أناقة أكتر م الأول بكتييييير ... بال رايق ... فسح و خروجات هنا و هناك ... متزوج بالاتفاق على فكرة .. يعني ما ضحكش على زوجته ولا حطها قدام الأمر الواقع ... عايش هنا و عايش هنا ... جدد لزوجته الأولى الشقة بالكامل لسة من كام شهر كدة .. شقة جديدة بعفش جديد ... خالي مش من الأثرياء بس مجتهد ... زوجته الثانية متفهمة وضعه و أولاده متفهمين و الكل عايش و مبسوط .. ما بأقولش الدنيا وردي .. أكيد فيه وش بردو ... بس هو قادر عليه و ممشي الاتنين تمام .... و ما شفتش عليه إنه كبر ولا حاجة ولا كتافه دلدلت من الهموم.

عامة ما تاخدوش خالي مقياس ... أصل إحنا عيلة قادرة و رجالتها مخلصين :lol:

مكاوى .. مش قلتلكم سيطرة

تجربه مفيده لإثبات نجاح الفكره

لكن التجارب الفرديه لا يبنى عليها الحكم ابدا

فمن الممكن جدا ان يقابل هذه القصه عشرات القصص المعاكسه تثبت فشل الفكره ايضا

[mekkawy]

تجربه مفيده لإثبات نجاح الفكره

لكن التجارب الفرديه لا يبنى عليها الحكم ابدا

فمن الممكن جدا ان يقابل هذه القصه عشرات القصص المعاكسه تثبت فشل الفكره ايضا

تمشي معاك تجربة جماعية يا باشا ولا هتخالف بردو ؟؟؟

يمشي معاك لو جدودي الاتنين كانوا معددين الزوجات ؟؟

أي خدمة يا عمدة .. جماعية أهي

لو تحب أخد ولاد عمامي و ولاد خالاتي و نروح نتجوز تاني جماعة و ننجحلك الفكرة ... أه فوتر سيرفيز مسيه

مكاوى ... أبو عيلة مخلصة

[mekkawy]

أصل إحنا عيلة قادرة و رجالتها مخلصين

ياجاااااااااااااامد.....ممكن اعمل اشتراك فى عيلتكم :lol:

هأحاولى يا هندسة أكلمك جدي الله يرحمه .. هو اللي كان معاه الكارنيهات ... يا تروح تجبهم منه يا تستنى الطبعة الجديدة

أنا حبيت بس و الله يا جماعة أسوق تجارب واقعية ... و في زي عيلتنا آلالاااااااااااااااااااااااااف العائلات ... الموضوع ده عندهم عادي و منتشر و بالعدل ... و احنا الحمد لله معندناش حد سيكو ولا معقد عشان أبوه اتجوز اتنين ... شرع و دين و عرف ... هنعمل ايه بأة

مكاوى .... اشتراكات

[MZohairy]

تجربه مفيده لإثبات نجاح الفكره

لكن التجارب الفرديه لا يبنى عليها الحكم ابدا

فمن الممكن جدا ان يقابل هذه القصه عشرات القصص المعاكسه تثبت فشل الفكره ايضا

تمشي معاك تجربة جماعية يا باشا ولا هتخالف بردو ؟؟؟

يمشي معاك لو جدودي الاتنين كانوا معددين الزوجات ؟؟

أي خدمة يا عمدة .. جماعية أهي

لو تحب أخد ولاد عمامي و ولاد خالاتي و نروح نتجوز تاني جماعة و ننجحلك الفكرة ... أه فوتر سيرفيز مسيه

مكاوى ... أبو عيلة مخلصة

ما اقصده يا مكاوي انك على قد ما تجيب قصص تثبت نجاح الفكره او نجاح تطبيقها سيأتي المخالف لك بقصص تثبت فشل الفكره

و بالتالي طرح القصص الناجحه او الفاشله لن يثبت نجاح او فشل النظريه

[doha]

الفاضل كونسولتانت

مهو عشان مسمعش رد زي الي حضرتك كتبته قلت في بداية كلامي السابق اني هشوط وانها هتيجي فيك بمعنى انك مش المقصود نهائيا بكلامي وانما بتكلم بشكل عام ان الواحد يوم مابيفكر يتدين بيدور حواليه ايه الي يخليه متدين فميلاقيش غير اطالة اللحية وتقصير الثوب

ده الي قصدته وده الي اكده رد حضرتك علي

مكانش قصدي نهائيا ان حضرتك بتعمل حاجه وحشة ولا كنت بتكلم في حكم اللحية ولا انك ناوي تتجوز وانما قصدت ان الي بينادوا ( بينكشوا ) في الدين عشان يثبتوا بيئات ثقافية معينة انها هي دي اصل الدين وبالتالي فهم بس الي على حق صوتهم للاسف اعلى كتير من اي صوت تاني بينادي باصول اسلامية تانيه يمكن اهم من الي هم بينادوا بيه

مش هقول انهم غلط في معتقداتهم لكن بؤكد ان في ناس تانيه أصح

اتمنى كده تكون الامور واضحه عند حضرتك واني مكنتش ( بهاجمك ) انت شخصيا او حتى النموذج الي بتمثله والي بدى لي ان حضرتك فهمت كده من ردك الي كله دفاع عن نفسك وكانك ارتكبت جريمة

اطمئن سيدي الفاضل موقفك سليم تماما انا بس كنت ( بفضفض ) وبالتاكيد وطالما كده فانا مش مضطره الوي حقائق او اصور امور على غير حقيقتها عشان حضرتك تتصور اني عملت كده واظهرتك بتتأفف من العيشه

انا بقول ناس كتير بتفكر بالطريقة دي وناس كتير بتقول دي عيشه هباب الي الواحد مش عارف يعيش دينه فيها ربنا يخرجنا منها على خير .. والواقع بطبيعه الحال مش كده ابدا هم بس الي مضيقينها على انفسهم ومحجرين واسع .. وواسع اوي

[جنه]

تجربه مفيده لإثبات نجاح الفكره

لكن التجارب الفرديه لا يبنى عليها الحكم ابدا

فمن الممكن جدا ان يقابل هذه القصه عشرات القصص المعاكسه تثبت فشل الفكره ايضا

تمشي معاك تجربة جماعية يا باشا ولا هتخالف بردو ؟؟؟

يمشي معاك لو جدودي الاتنين كانوا معددين الزوجات ؟؟

أي خدمة يا عمدة .. جماعية أهي

لو تحب أخد ولاد عمامي و ولاد خالاتي و نروح نتجوز تاني جماعة و ننجحلك الفكرة ... أه فوتر سيرفيز مسيه

مسيو مكاوي.. انا شايفه ام سلمى بتقرا اللى انت كاتبه ده و بتقول لك :lol:

مكاوى ... أبو عيلة مخلصة

[shiko]

....بصولى هنا ....

قسماً بالله العظيم ...ويمين الله ....

اللى هايدخل يكتب فى التوبيك ده ....والكلام للسوالمة وهما عارفين نفسهم

والغايب يبلغ الحاضر ...

هو حـــــــــــــــــــــر ....

ويبقى يسيبلى وصيته على بابا المنتدى ... :lol:

يا جماعة الخير ...لا يلدغ المؤمن من جحر مرتين ... :lol:

انا قاعدلكم على باب التوبيك اشوف نفر ...هوب النواحى دى ...

يبقى جاب لنفسه الاذية .....

نون .....عاوزة اسمع صوت طبول الحرب ...استعدادا للمعركة

=================================

مطاوى ...رحمة الله عليه ..انت عارف انى اقدر اوصل لسلمى وبسهوووووووولة ...

والله يرحمك بقى يابنى ساعتها ....... :lol:

اللى مستغرابة له لا وبجد بقة اول ماانتهيت من الكتابة لاقيت اعلان عن موقع زواج

اسمه بنت الحلال ...مقصودة ...دى ....انا شامة ريحة خيانة ....

تم تعديل 11 مايو 2010 بواسطة shiko

[mekkawy]

يا بنت الحلااااااااااال يا بنت الحلال .... شيكو بليز تسلميلي على سلمى عشان وحشتني :blush2:

مكاوى

[Abu Reem]

تجربه مفيده لإثبات نجاح الفكره

لكن التجارب الفرديه لا يبنى عليها الحكم ابدا

فمن الممكن جدا ان يقابل هذه القصه عشرات القصص المعاكسه تثبت فشل الفكره ايضا

يعني تعقيبا على عبارتك يا عزيزي زوهيري ، أتمنى ان تطبقها انت ايضا في جميع مواضيعك ، حتى يتسم كلامك بالموضوعية ، فمعظم استشهاداتك على اي موضوع الاحظ دائما انه يتعلق بالفئة النادرة او الأقلية ، والدليل موضوع ( الدعوة الى الدين بالموعظة الحسنة ...وتع، وحتى موضوع النقاب ) فدائما وابدا تستشهد بما يحدث من الأقلية لتدلل على صحة وجهة نظرك التي دائما ما يكون تصرف الأقلية فيها هو معيار حكمك على الفئة التي تشكل الأكثرية......

مهلش تعقيب كان لابد منه لان جملتك أعلاه عجبتني

[مغتربة]

باين من عنوانه/ بعيدا عن الدخول في جدل محسوم و مسائل قتلت بحثا . السؤال:

للرجال/ ما رايك الشخصي في الزواج الثاني (خلينا واقعيين لا تالت و لا رابع "صباح القناعة") و هل تفكر في التنفيذ. ( و يا سلام لو نفذت فعلا و تشاركنا تجربتك الحية).

للنساء/ ماذا تفعلين في المواقف الاتية

1: لو اكتشفت ان زوجك قد تزوج عليكي.

2: كان متزوج من قبلك(ولا يزال) و اتقدملك معترفا بذلك .

3: في لحظة صفاء كدة جمع كل مصادر الشرع المثبتة لاباحة الزواج مرة اخرى و المصادر الاجتماعية المثبتة لزيادة نسبة العنوسة و صرحلك بإنه عايز يشارك في حل هذه الازمة بالزواج.

استاذ كونسلت

الزواج الثانى حلال من الله و لا يستطيع احد القول بغير ذلك

و بالنسبه لى لا احكم على الفكره بهذا الشكل المطلق و انما بيكون حكمى على كل حاله منفرده

لمعرفتى بان كل حاله اكيد ظروفها غير التانيه

و ان كنت فى كل الاحوال بشفق على الزوجه الاولى

و بالنسبه لسؤالك عن لو زوجى جى قالى انه هيتجوز او عايوز يتجوز

فانا بكل صراحه لا اقبلها على نفسى ابدا

و كذلك لا استطيع اجباره على العدول عما اعتزم

و بالتالى فاما يقتنع بترك الفكره بشكل ودى

او يغنى الله كلا من فضله و كل واحد يشوف الى يريحه و برضه بشكل حضارى و متحضر

هذا ما لى و لا الزم به غيرى

بس كلمه اخيره

على كل راجل عايز يعدد لازم يكون متاكد من انه قادر يصرف على البيتين فروم اى تو زيد

يعنى مثلا منينفعشى تكون مراته بتساعده فى مصروف البيت بكدها و تعبها

و يجى هو بكل بساطه يقولها انها هتجوز

لان الى زى دا ميتقلوش غير كلمه واحده بلاش نكتبها هنا احسن :blush2:

[Howayda Ismail]

احل الله الزواج للرجل مثني وثلاث ورباع ولكن القضية ليست قضية زواج بقدر ماهي قضية عدل (فانكحوا ماطاب لكم من النساء مثني وثلاث ورباع فان خفتم الاتعدلوا فواحدة) بالامانة كده كم واحد عادل مع زوجته الاولي حتي يثقل كاهله بذنوب جديدة وموضوع العنوسة الذي يتخذونه ذريعة للزواج الثاني فله الف حل ابسطها التبرع بمصاريف الزواج الثاني لاعفاف الاف الشباب الغير القادر ومساعدته لتكوين اسرة ولو نظرنا لعوائد هذه الفكرة : اولا ستمنع خراب منزل وهدم اسرة لان اكثر الزوجات يطلبن الطلاق عند زواج ازواجهم .ثانيا منع كثير من انحرافات الشباب لعدم قدرتهم علي تكاليف الزواج .ثالثا زواج كثير من الفتيات الذين تخطوا سن الزواج .رابعا سيكون فتح هذا البيت صدقة جارية .ولكن معني كلامي هذا لايجرم الزواج الثاني فلكل زواج ظروفه الخاصة به فهناك زوجات لايجدي معها شى الا الزواج عليها وازواج لايعرفون مقدار زواجتهم الا بعد الغرق في دوامة الزواج الثاني

[Princesse]

باين من عنوانه/ بعيدا عن الدخول في جدل محسوم و مسائل قتلت بحثا . السؤال:

للرجال/ ما رايك الشخصي في الزواج الثاني (خلينا واقعيين لا تالت و لا رابع "صباح القناعة") و هل تفكر في التنفيذ. ( و يا سلام لو نفذت فعلا و تشاركنا تجربتك الحية).

للنساء/ ماذا تفعلين في المواقف الاتية

1: لو اكتشفت ان زوجك قد تزوج عليكي.

2: كان متزوج من قبلك(ولا يزال) و اتقدملك معترفا بذلك .

3: في لحظة صفاء كدة جمع كل مصادر الشرع المثبتة لاباحة الزواج مرة اخرى و المصادر الاجتماعية المثبتة لزيادة نسبة العنوسة و صرحلك بإنه عايز يشارك في حل هذه الازمة بالزواج.

يمكن لو كان حد سألني السوأل دا قبل كدا كنت هبقي اكتر واحدة معترضة على فكرة الزواج الثاني ....و كنت هلقي خطبة طويلة عريضة من نوعية الخطب بتاعة الجمعيات النسائية...

بس سبحان الله...تفكير الواحد بيتغير كل ما بيشوف ظروف الناس الي حواليه...و بجد الزواج الثاني ساعات بيكون رحمة للزوجة الاولى و الثانية

بالنسبة للاجابة السوأل الاول : ماذا تفعلي لو اكتشفت زوجك متجوز عليكي؟

اكيد طبعا هزعل جدااا...و الدنيا كلها هتبقي سودة في وشي...بس هحاول افكر بالعقل....و سأل نفسي طيب هو ليه اتجوز عليا؟ ايه الي كنت مقصرة فيه من ناحيته؟

في وجهة نظري المتواضعة ان النساء بيزعلوا من موضوع الزواج الثاني و بيعتبروه خيانة لسبب بسيط...اعز شئ عند اي امرأة هو انوثتها...والزواج التاني بيطعن في انوثة الزوجة الاولي ...وكأن الزوج بيقول لزوجته (لقد وجدت من هي اجمل منك و اكثر احتواء منك)...و هكذا تجرح كرامة الانثى عند الزوجة الاولى

المشكلة الثانية: اننا في مصر نعتبر عقد الزواج هو عقد امتلاك ابدي...و النتيجة المترتبة على ذلك ان اول ما الواحدة فينا اول ما تتجوز خلاص بقي هي كدة وصلت لنهاية الطريقة..فتهمل في نفسها و مظهرها ... و تحط بقي في بطنها بطيخة صيفي ان مفيش منافسة ليها (خصوصا لو كاتبة على زوجها مؤخر صداق كبير) ...وهكذا فالزواج الثاني طبيعي ان ترفضه اي زوجة لانه هيخليها تعيش طول الوقت في منافسة مع زوجة الثانية...

بالنسبة لي اعتقد ان زوجة واحدة تكفي ....ولكن بعض الاحيان تفشل الزوجة في توفير الهدوء و الاحتواء و التفهم للزوج ...وهي بذلك تصبح زوجة فاشلة...وبالرغم من ذلك الإسلام حريص عليها و على اولدها فيسمح للزوج انه يبدأ حياة جديدة مع زوجة تستطيع ان تمنح ما عجزت عنه الزوحة الاولي...ولكن هنا الانانية عند الزوجة الاولي تظهر و تعترض ..وتطلب الطلاق..و المفروض الزوجة الاولى تسأل نفسها انها كانت هي الزوجة الوحيدة ومع ذلك لم تحافظ على زوجها طيب ما تسيب ليه فرصة تانية مع غيرها و باش تكون سبب في شقاء كل افراد الاسرة من اول الابناء لحد زوجها

السوال الثاني : 2: ماذا تفعلين في المواقف الاتية كان زوجك متزوج من قبلك(ولا يزال) و اتقدملك معترفا بذلك .

في الحالة الاولى : اذا كان هذا الشخص مطلق او أرمل هقبل

في الحالة الثانية : في حالة اني اكون الزوجة الثانية : هقبل بس بشرطين : 1 - اكون بحب الانسان دا جداااااا جدااا ومقتنعة بيه جدا

2- انه يكون راجل بجد ويقدر يعدل بينا..و ميظلمش حد فينا

السوال الثالت :

3: في لحظة صفاء كدة جمع كل مصادر الشرع المثبتة لاباحة الزواج مرة اخرى و المصادر الاجتماعية المثبتة لزيادة نسبة العنوسة و صرحلك بإنه عايز يشارك في حل هذه الازمة بالزواج

يا الف نهار ابيض...طبعا هكون فرحانة ان زوجي قلبه حنين و بيحب الخير....بس لو كان دا بس هو السبب في زواجه الثاني ..ساعتها اقترح عليه انه يساعد اي شاب غير قادر على الزوج على نفقات الزواج..و بكدة برضه هيكون بيساهم في حل مشكلة العنوسة و مش لازم هو شخصيا الي يتجوز لان فيه شباب كثير مش عارفين يتجوزوا و هم اولى منه

اخر حاجة اتمنى ان كلامي مكينش ضايق حد

تم تعديل 11 مايو 2010 بواسطة Princesse

[the consultant]

الفاضل كونسولتانت

مهو عشان مسمعش رد زي الي حضرتك كتبته قلت في بداية كلامي السابق اني هشوط وانها هتيجي فيك بمعنى انك مش المقصود نهائيا بكلامي وانما بتكلم بشكل عام ان الواحد يوم مابيفكر يتدين بيدور حواليه ايه الي يخليه متدين فميلاقيش غير اطالة اللحية وتقصير الثوب

والله يا استاذه ضحى انا بدافع عن المبدأ و الفكرة نفسها مش عن نفسي لاني تاني و للاسف مش قادر اطبق اللى انا مقتنع بيه يمكن ضعف ايمان و للاسف مقتنع تماما انه صح .

ده الي قصدته وده الي اكده رد حضرتك علي

مكانش قصدي نهائيا ان حضرتك بتعمل حاجه وحشة ولا كنت بتكلم في حكم اللحية ولا انك ناوي تتجوز وانما قصدت ان الي بينادوا ( بينكشوا ) في الدين عشان يثبتوا بيئات ثقافية معينة انها هي دي اصل الدين وبالتالي فهم بس الي على حق صوتهم للاسف اعلى كتير من اي صوت تاني بينادي باصول اسلامية تانيه يمكن اهم من الي هم بينادوا بيه

مش هقول انهم غلط في معتقداتهم لكن بؤكد ان في ناس تانيه أصح

اتمنى كده تكون الامور واضحه عند حضرتك واني مكنتش ( بهاجمك ) انت شخصيا او حتى النموذج الي بتمثله والي بدى لي ان حضرتك فهمت كده من ردك الي كله دفاع عن نفسك وكانك ارتكبت جريمة

اطمئن سيدي الفاضل موقفك سليم تماما انا بس كنت ( بفضفض ) وبالتاكيد وطالما كده فانا مش مضطره الوي حقائق او اصور امور على غير حقيقتها عشان حضرتك تتصور اني عملت كده واظهرتك بتتأفف من العيشه

اسف على سوء التفاهم بس انا فعلا فهمت كدة

انا بقول ناس كتير بتفكر بالطريقة دي وناس كتير بتقول دي عيشه هباب الي الواحد مش عارف يعيش دينه فيها ربنا يخرجنا منها على خير .. والواقع بطبيعه الحال مش كده ابدا هم بس الي مضيقينها على انفسهم ومحجرين واسع .. وواسع اوي

فكرتك وصلت يا فندم و شكرا على التعقيب

[the consultant]

....بصولى هنا ....

قسماً بالله العظيم ...ويمين الله ....

اللى هايدخل يكتب فى التوبيك ده ....والكلام للسوالمة وهما عارفين نفسهم

والغايب يبلغ الحاضر ...

هو حـــــــــــــــــــــر ....

:blush2:

ايه يا باشموهندسة شيكو , ده تهديد صريح و محاوله لارهاب الاعضاء الاحرار و تحجيمهم عن ابداء ارائهم في موضوع هام و شائك و ده مخالف قوانين المنتدى نناشدك بالعدول عن هذا الاتجاه المتطرف و مشاركةالاعضاء افكارك المؤيدة لتعدد الزوجات

[مسافر زاده الخيال]

اولا تعدد الزوجات هو في صالح (جنس المرأة) بالاساس.......

ثانيا دائما في الطبيعة نوع الانثى اكثر عدديا من الذكر (في الانسان والحيوان والجماد) فمن يكون لفائض النساء (اذا منع الحلال)؟؟؟؟؟؟؟؟؟؟؟

ثالثا عمليا التعدد هو السائد في العلاقات بين المراة والرجل في جميع الازمان والاماكن (واتحدى لو كانت نسبة الرجل ذو علاقة مع امراة واحده تتجاوز 1%)

رابعا على المرأة ان تعي ان لها القدرة (حقا) على جذب الرجل غالبا بل حتى لو كان الرجل رافضا في البداية وخاصة مع ظهور المرأة الساحر والجذاب في كل مكان الاعلام -العمل-بل حتى في الماء والهواء فكيف نمنع الرجل من الا يتنفس الهواء؟؟؟؟؟؟؟؟؟؟؟؟

ومهما ادعى (ادعياء المثالية)بغير ذلك ففي داخلنا نعلم علم اليقين ان هذه هي الحقيقة(الطبيعية) عبر التاريخ

اذن طالما ان علاقة التعدد (هي الاساس والواقع ولن تتغير الطبيعة وفقا لاهوائنا) فهناك طريقين

1.طريق الحلال(المحفوف بالمشقة والمجاهدة لكن بنهاية سعيدة)

2.طريق اخر (لذيذ و ممتع و مثير لكن بنهاية غير جيدة)

ولا يوجد طريق ثالث (في العالم الواقعي) فاي الطريقين نختار؟؟؟؟؟؟؟؟

واعتقد انه يجب علينا النظر لممارس التعدد نظرة تقدير واحترام لان التعدد(وان كان في بداية لذة ومتعة-حلال)الا انه بعد ذلك تكون نسبة المسؤولية الشاقة اكثر واكبر من جانب المتعة........

نقطة اخيرة....غضب المرأة و تمنيها عدم تجوز بعلها عليها طبيعي ومنطقي و مبرر (لان الله من وضع فيها هذا الشعور) لكن من يدرينا ان الله جعل ذلك اختبارا ليكأفي الزوجة الصابرة (كرها منها) بدرجات عليا في الاخرة او يحط عنها سيئاتها ....وهذا النوع من النساء نادر يستحق ان توضع في مكانة تفوق غالبية النساء....من يدري

اضافة ان الغضب والضيق من هذا الامر يكون في البداية فان (اعتصمت بالله) و عدت تلك المرحلة كان ذلك اكبر دعم نفسي و روحي لها و عامل قوة غير طبيعي لزيادة جانب الامومة(على سبيل المثال)......

وهذا ما لحظته في بلدي السعودية حيث ان التعدد (لغاية الثمانينات فيما اذكر) هو الغالب والساحق ولم تجن النساء ولم تكن نسبة الطلاق عالية

بل ان النساء يكن في فعاليتهن حتى بعد الاربعين فيلدن ويرضعن وينشئن ابناء وبناء على خير ما يكون بعكس الوضع الحالي للاسف حيث اصبحت النسوة اكثر كسلا وانانية وجهلا بشؤون الامومة وامور المنزل

اذن نعم للتعدد دون قيد او شرط (الا ما شرطه الدين) وان منعنا تعدد الزوجات فالبديل لا محالة تعدد الخليلات