حمص الطبيخ .. بيطبخوا بيه ازاي ؟؟

[doha]

بجد بقى الموضوع كده قلب لمواضيع تانيه كعادتنا كمحاورين ومحاورات .....عاتى يعنى

ولهذا وجب فتح موضوع خاااااص به

معاكي حق ياقلب ابيض

لولا بعد اذنك .. البس جونتي وبالراحة كده افصلي المداخلات الخاصه بالكوريتشينو لوحدها عن مداخلات الحمص واطلعي بقلب جامد بموضوع جديد تحت عنوان

ياكرشة الهنا ياريتني كنت انا

[طبيبة مصرية]

طبيبة مصرية .. ياريت شرح لموضوع ملعقتين الرز على السبانخ ده لاني فاكره قريت زمان في كتاب اسمه الاكلات الشعبية المصرية الحكايه دي بس للاسف فقدت الكتاب وهموت من وقتها اعرف الطريقة تاني لان كانوا مادحينها اوي في الكتاب وبرضه والدي اكد على المعلومه وقتها وقال ان السبانخ بتبقى حاجه تانية مع وجود قليل من الرز فيها .. ياريت بعد اذنك الطريقة بالتفصيل ..

السلام عليكم

معلش اتاخرت شوية ولقيت ما شاء الله الكرشة عاملة شغل جااااااااااامد

تصورى بقى ان التوبيك بتاعك ده خلانى اسأل زوجى عن حكاية السبانخ بالحمص وطلع فعلا أكلها قبل كده

أتارى الكويتيين بيعملوا السبانخ بالحمص..........

المفاجاة بقى إن والدته الله يرحمها كانت بتعمله بالفريك وبيقولى إنها وهمية وأحلى من بتاعتى :flr1:

وادى ماما نونا بتعمله بالعدس الاصفر.........

وانا بعمله بالرز

كل شيخ وله طريقة

بس اعتقد ان الطريقة الكلاسيك هى اللى بالرز

الطريقة:

اولا يكون عندك لحمة كندوز مسلوقة وشوربتها انا اصلى البامية والسبانخ معرفش اكلهم غير مع لحمة وما بحبهمش ابدا مع فراخ

السبانخ انا بستعمل المجمدة مونتانا او بسمة ولو فريش بتطلع احلى طبعا

والرز تكونى غسلاه وناقعاه فى شوية ميه قبل ما تيجى تبداى الطبخة على طول حوالى معلقة ونص(المعلقة اللى بنشرب بيها الشوربة)

وبعدين بتقلبى بصلة متقطعة صغير فى معلقة زيت عباد الشمس على معلقة سمن ولما يبتدى يصفر تضيفى حوالى معلقة شاى ثوم مفروم ناعم

واول ما يصفر الثوم تضيفى عصير الطماطم حوالى 3او 4 حبات حجم متوسط وشوية من شوربة اللحمة جسب كمية السبانخ اللى هتعمليها علشان ما تطلعش سائلة اوى انا غالبا بضيف تلات او اربع كبشات فقط على كيس السبانخ المجمد .........

وصلصة حسب الرغبة ومكعب ماجى وحوالى ربع حزمة شبت وكزبرة خضرة متقطعين صغير وشوية كزبرة ناشفة بتدى طعم حلو فى الاخر والملح والفلفل الاسود

واسيبهم يغلوا شوية وبعدين احط السبانخ واقلب كويس لحد ما تفك تماما من التجميد..........

وبعدين اضيف الرز .......

واضبط الملح تانى..........

واضيف قطع اللحم المسلوق

واسيبها تغلى غلوة وبعدين اوطى عليها واسيبها تكمل سوا.........

تقريبا نصف ساعة او اقل هتكون السبانخ استوت

وبتطلع تحفة ......جربيها وان شاء الله تعجبك

وفيه ناس كمان فى الاخر خالص بتعمل لها تقلية زى بتاعة الملوخية بالضبط .........

تحمرى شوية ثوم مفروم فى شوية سمن ولما يصفر تحطى معلقة الكزبرة الناشفة وتقلبى شوية وتضيفى على وش السبانخ بعد ما تكون استوت وقفلتى النار عليها

انا مابعملش الخطوة دى .........

بحس انها حلوة ومضبوطة ومش محتاجة الخطوة دى..........

تم تعديل 13 مايو 2010 بواسطة طبيبة مصرية

[طبيبة مصرية]

بجد بقى الموضوع كده قلب لمواضيع تانيه كعادتنا كمحاورين ومحاورات .....عاتى يعنى

ولهذا وجب فتح موضوع خاااااص به

معاكي حق ياقلب ابيض

لولا بعد اذنك .. البس جونتي وبالراحة كده افصلي المداخلات الخاصه بالكوريتشينو لوحدها عن مداخلات الحمص واطلعي بقلب جامد بموضوع جديد تحت عنوان

ياكرشة الهنا ياريتني كنت انا

انا معاكم فى الاقتراح ده

بس يا ريت يبقى ملف شامل لكل الاحشاء بتاعة الخروف او العجل

يعنى مش الكرشة فقط

زوجى بيحب الحاجات دى جدا

وانا ما بحبهاش خالص

المشكلة ان انا لو حاجة مابحبهاش مبعرفش اعملها ولو عملتها اعملها من غير مزاج وبالتالى تطلع وحشة واتعقد انا منها اكتر.........

بتواجهنى مشكلة فى العيد الكبير لما بندبح

لانى مبعرفش خالص اعمل الاحشاء دى

الفشة والكرشة والممبار والعكاوى والكلاوى والكوارع ولحمة الراس واللسان والمخ والجوهرة (العينين) تقريبا بيسموها كده ولا ايه؟؟

بجد مابعرفش اتصرف خالص و غالبا بنبعتهم لاخته وهى كتر خيرها بتعمله كام صنف كده من كل حاجة(طاجن كرشة بالحمص على شوية ممبار محشى ومسلوق وانا يادوب احمره وخلاص وهكذا)

بس والله نفسى اتعلمها واعرف اعملها

فياريت تلحقونا بالملف الشامل

وكل واحد يدينا خبراته فى الموضوع ده

[doha]

طبيبة مصرية

ربنا يكرمك يارب على الشرح الوافي بتاع السبانخ .. باذن الله هجربها قريب بالرز

بس بالنسبة لنقع الرز فهمت انه يتنقع خمس دقائق كده ولا حاجه مسافة مانحضر السبانخ صح كده ؟

ملاحظتك بتاعت شوربة اللحمه في محلها تماما انا برضه بحب السبانخ والبامية بالذات على لحمه ولذتهم بتبقى اقل لو على شوربة فراخ

برضه لاحظت ان السبانخ بتاخذ شوربة اقل كتير من اصناف الخضار الباقية وكمان لاحظت حاجه مش عارفه توافقيني عليها ولا لاه ان طمطماية واحده متوسطه بس كافية جدا لحلة سبانخ كاملة بعكس انواع الخضار الاخرى الي بتاخذ طماطم او صلصة اكتر

بالنسبة لفتح توبيك ( لاحشاء ) الضاني فكرة راائعه وممتازه ومن هنا لغايه العيد الكبير نكون جمعنا افكار كتيرة بس ياريت بلاش كلمه احشاء دي احسن خضتني من التوبيك قبل فتحه

خلينا نقول توبيك للحوم المستعارة او الاندر ميت بتاع الخروف

:flr1:

عن نفسي مبعرفش اعمل غير الكرشة قصدي الكيرشوتشيني والكوراعونيز دول بس الحاجتين الي بعملهم مظبوط وياسلام بقى على الفته بالخل والتوم متقوليش لعدوك عليهم .. باذن الله باذن الله لما افوق بس اعمل لكم توبيك مصمطاوي محصلش .. . بس افوق

للاسف نفسي اعرف اعمل الممبار .. مامتي مع انها مش استاذة طبخ غير في اكلتين تلاته الا انها بتعمل الممبار روعه وخرافي .. مش عارفه ليه عمري ماجربته تقريبا عملية تنظيفه هي الي معقداني في حياتي ..

برضه لحمة الراس فاكره زمان ايام الرمرمة كنا بنجيب سندويتشات ( عبده تلوث ) كانت عباره عن لحمه راس في عيش بلدي اسمر سخن وعليها جرجير وحاجات كده .. ياااه تصدقوا جعت

كانت ايام

اللسان كمان بحبه موت بس مبطبخوش برضه لذات السبب زوجي العزيز لا يعترف بيه كصنف لحوم وعليه باكله في بيت بابا بس الي بيموتوا فيه ( طبعا واضح علي نتائج اكل اللسان )

اقولك يادوك .. افتحي التوبيك الحواوشي ده على بركه الله وسيري يانورماندي ونحن ورائك

ده احنا هناكل اكل ..

[pink rose]

ملاحظتك بتاعت شوربة اللحمه في محلها تماما انا برضه بحب السبانخ والبامية بالذات على لحمه ولذتهم بتبقى اقل لو على شوربة فراخ

و يا سلاااااااااااااااام بقى لو اللحمة ضاني

يا جماله يا جماله :blink:

البامية و السبانخ ما باعملهمش غير باللحمة الضاني

الحمدلله ان ربنا خلقلنا حاجه اسمها خروف دي نعمة كبيرة اوي يا ولادي و الله :flr1:

[طبيبة مصرية]

طبيبة مصرية

ربنا يكرمك يارب على الشرح الوافي بتاع السبانخ .. باذن الله هجربها قريب بالرز

ان شاء الله تجربيها وهتطلع حلوة

ده كفاية انها من ايدك

بس بالنسبة لنقع الرز فهمت انه يتنقع خمس دقائق كده ولا حاجه مسافة مانحضر السبانخ صح كده ؟

ايوة بالضبط كده قبل ما تبدأى التخديعة على طول تكونى غسلاه وناقعاه

ملاحظتك بتاعت شوربة اللحمه في محلها تماما انا برضه بحب السبانخ والبامية بالذات على لحمه ولذتهم بتبقى اقل لو على شوربة فراخ

برضه لاحظت ان السبانخ بتاخذ شوربة اقل كتير من اصناف الخضار الباقية وكمان لاحظت حاجه مش عارفه توافقيني عليها ولا لاه ان طمطماية واحده متوسطه بس كافية جدا لحلة سبانخ كاملة بعكس انواع الخضار الاخرى الي بتاخذ طماطم او صلصة اكتر

بالنسبة للشوربة ده صحيح لان السبانخ نفسها بتنزل مية كتير ولما بتبقى صلصتها خفيفة مش بتطلع حلوة ودى فايدة الرز انه بيخلى قوامها ماسك نفسه شوية زى ما قالت ماما نونا

بالنسبة للطماطم مش عارفة اصل انا بحب الخضار تكون صلصته تقيلة علشان كده بستعمل حوالى 3 حبات طماطم

بالنسبة لفتح توبيك ( لاحشاء ) الضاني فكرة راائعه وممتازه ومن هنا لغايه العيد الكبير نكون جمعنا افكار كتيرة بس ياريت بلاش كلمه احشاء دي احسن خضتني من التوبيك قبل فتحه

خلينا نقول توبيك للحوم المستعارة او الاندر ميت بتاع الخروف

:lol:

عندك حق هى فعلا كلمة مش عاطفية

بس ثوانى بقى

نقطة نظام

هو الكلام السابق ذكره ده كان على الكرشة الضاااااااااانى :blink:

لاااااااااااااا حاشا وكلاااااااااااااااااااااااا

انا كان قصدى احشاء العجل

انتى كمان عايزانى اكل كرشة ضانى

ده انا باكل اللحمة الضانى بالعافية

بس اعتقد مش هتفرق الطريقة من ضانى لعجالى

وبالنسبة لعنوان التوبيك عليكى وعلى شيكو هى اللى موهوبة فى الحاجات دى

ولو انها معترضة على الفكرة من اساسه

بس انا اصلى من ساعة التوبيك بتاع تعدد الزوجات ده وانا مقلقة

فقلت الحق نفسى واتعلم الأكلات اللى بيحبها

يعنى ممكن يا شيكو تعتبريها مساعدة انسانية

وانا عندى اسم دمه خفيف

يا كسوفى يا خروفى :flr1:

على اساس ان الخروف هيتبهدل ياعينى ومش هتفضل فيه حتة سليمة

وفى انتظار مقترحات شيكو

عن نفسي مبعرفش اعمل غير الكرشة قصدي الكيرشوتشيني والكوراعونيز دول بس الحاجتين الي بعملهم مظبوط وياسلام بقى على الفته بالخل والتوم متقوليش لعدوك عليهم .. باذن الله باذن الله لما افوق بس اعمل لكم توبيك مصمطاوي محصلش .. . بس افوق

للاسف نفسي اعرف اعمل الممبار .. مامتي مع انها مش استاذة طبخ غير في اكلتين تلاته الا انها بتعمل الممبار روعه وخرافي .. مش عارفه ليه عمري ماجربته تقريبا عملية تنظيفه هي الي معقداني في حياتي ..

فعلا انا فاكرة مرة اخت زوجى جت لنا مخصوص علشان تعمله اكلة ممبار وقعدت ياعينى واقفة على رجلها فى المطبخ بتاع 4 ساعات تنضف وتقلب وتكحت وتنقع فى مية وخل وملح وتشطف وترجع تاااااااااااانى تقلب وتكحت

ده قصة

وانا عملت الخلطة بتاعة الحشو

وفضلت واقفة ارغى معاها لما رجلى اتكسرت

ما هو مش معقول هاسيبها تشتغل لوحدها وامشى

برضه لحمة الراس فاكره زمان ايام الرمرمة كنا بنجيب سندويتشات ( عبده تلوث ) كانت عباره عن لحمه راس في عيش بلدي اسمر سخن وعليها جرجير وحاجات كده .. ياااه تصدقوا جعت

كانت ايام

اللسان كمان بحبه موت بس مبطبخوش برضه لذات السبب زوجي العزيز لا يعترف بيه كصنف لحوم وعليه باكله في بيت بابا بس الي بيموتوا فيه ( طبعا واضح علي نتائج اكل اللسان )

ماعنديش فكرة عن الحاجات دى وعمرى ما دقتها

بس من كلام زوجى كده

انا مضيعة نص عمرى

اقولك يادوك .. افتحي التوبيك الحواوشي ده على بركه الله وسيري يانورماندي ونحن ورائك

انا!!!!!!!!!!

انا اضيف!!!!!!!!!

ده انا غلبااااااااااااان

ما انا اصلا مابعرفش اعمل حاجة من الحاجات دى

افتحه ازاى؟؟؟؟؟؟؟؟

عموما فى انتظار الاسم من شيكو ونشوف

ده احنا هناكل اكل ..

[doha]

بس ثوانى بقى

نقطة نظام

هو الكلام السابق ذكره ده كان على الكرشة الضاااااااااانى :flr1:

لاااااااااااااا حاشا وكلاااااااااااااااااااااااا

انا كان قصدى احشاء العجل

انتى كمان عايزانى اكل كرشة ضانى

ده انا باكل اللحمة الضانى بالعافية

بس اعتقد مش هتفرق الطريقة من ضانى لعجالى

لاه مهو انا عندي اعتراف صغنون

انا اصلا معرفش هي كرشة ضاني ولا عجالي والاهم اني مبعرفش اشتريها اساسا

في مصر سألت واتقصت وعرفت انها مش بتتباع عند الجزار (سألت في الجزارة المحترمه يعني الي بنشتري منها عاده الراجل كان ناقص يحدفني بالساطور وكأني قلت كلمه أبيحه .. وافاد بانهم مبيبيعوش الحاجات دي هنا ) وكنت اصلا لاحظت من قبل انها بتتباع وياللهول في سوق الخضار في ستات بتبقى قاعده بطشت كده فيه الحاجات الحلوة دي كلها

سألت اختي الكبيرة دقرمه شويه في الحاجات دي فافادت مشكورة انها بتشتريها من حته اسمها السلخانة .. بس اروح ازاي او اختارها ازاي برضه معرفتش

سالتها فشرحت لي كلام كتير كده وان الكرشة بتبقى شاربة مية وعليه وزنها بيبقى زياده على الفاضي و وو .. المهم في النهايه قررت لما اروح عند بابا بفتح الديب فريزر فبلاقي حاجات زي كده محطوطه اطبخ لهم منها من سكات

ياريت لما التوبيك الي عليه العين ده ينفتح حد خبير يشرح لنا بالتفصيل برضه ازاي بيشتري الكرشة وايه الكمية المناسبة لاسرة متوسطه من فردين ونص يعني مثلا لو هنطبخ في الوجبه نصف كيلو لحمه يبقى يعادلهم قد ايه كرشة ؟

مشكلة الواحد محتاج بحث عميق في الموضوع ده

همتكم بقى معانا ياأكيلة ..

[doha]

من فترة كده جربت السبانخ بالرز الي قالت عليها طبيبه مصرية ..

نقعت ملعقتين رز خمس دقائق في كوباية مية بعدين صفيتهم واضفتهم للسبانخ تنطبخ معاها .. زودت صلصه مع وحده الطماطم الي كنت بحطها وسبت الجميع يستوو في سيمفونية عشق متناغمه ..

ايه ده يابنتي ..

بجد روحي .. الله يسعدك فين ماكنتي ..

الوصفة هااااااااااااايلة ..

انا بجد مش عارفه كنت بطبخ السبانخ من غير رز الاول ازاي ..

النتيجه طلعت حاجه تشبه حشوة الحمام او الفراخ المشويه لما تبقى عاوز تاكل الرز الي جواها ومش مهم الحمام نفسه .. اهو السبانخ بالرز طالعه حاجه قريبة من كده ..

بجد الوصفة ممتازه وياريت الي مجربهاش يجربها ..

تسلم ايدك يامصريه وكل الي اشار علي بنصائح مطبخيه في التوبيك ده وباذن الله كل ماجرب منها حاجه وتنجح هديلكم خبر ..

[طبيبة مصرية]

الف هنا وشفا يا ضحى

فعلا هى بتطلع حلوة جدا بالطريقة دى bv:-

ويا سلام يا سلام

لو السبانخ فريش

بتطلع فعلا روعة

ليكى عندى طريقة الكرشة بالحمص

وصفة زوجى العزيز بالطريقة اللى كانت بتعملها والدته

هابعتهالك فى السر :o

عالخاص

احسن هنا بيعتقلوا اللى بيتكلموا فى الحاجات دى :lol:

[عشق الكلمات]

جزاكم الله خيرا

انا اول مرة اعرف ان فى نوع حمص تالت غير حمص الشام وحمص القزقزة