لماذا الطواريء في انجلترا وفرنسا وألمانيا ؟

[se_ Elsyed]

أه صح ... إيه الأفترا ده ؟

والله إحنا شعب ما نستحقش الحكومة دي ... يا ريت يعملوا فينا زي الثورة البلشفية ما عملت في كتير من الدول الروسية اللي تمردت .. وكانوا بينقلوهم بالقطارات الى سيبريا حيث درجة الحرارة اللي 45 تحت الصفر لحد ما يقولوا إن الله حق

بطلوا بقى ... ما هي كل الدول عندها طواريء أهي وزي الفل

جريدة الجمعورية

لماذا الطوارئ في إنجلترا وفرنسا وألمانيا؟!

كتب رئيس التحرير :

وكأن الحكومة ارتكبت إثما فظيعا وشرا مستطيرا عندما قررت مد الطوارئ عامين وقصرها علي جريمتي الإرهاب والمخدرات.. المداخلات التليفزيونية والحوارات ومقالات الصحف الخاصة كلها اثبتت ان مصر حالة شاذة بين دول العالم في تطبيق الطوارئ. ( على ما أفطر بس وأشد حيلي ممكن ارجع أرد على اللي جابوك يا سيادة المنافق رئيس التحرير .. بس خدها مني كلمة أيها الأفاق الدلدول .. وياللي كتبت بنفسك ... كل المداخلات التليفزيونية والمقالات والجرايد وبياعين الطعمية قالوا لأ للظلم والفسق والطواريء ... يبقى كلهم غلط وأنت وسيدك وتاج رساك اللي صح ؟ بصراحة أنا ريقي ناشف .. عشان كده هاسيبك دلوقت ... حظك حلو ...

والحقيقة أن هناك قوانين في أمريكا وانجلترا وفرنسا وألمانيا اسوأ بكثير من قانون الطوارئ ولكن بمسميات مختلفة وصياغات متنوعة وإن كان بعضها أشد وطأة وأقسي تطبيقا من قانون الطوارئ في مصر.

بداية لابد أن نؤكد أن صدور قانون الإرهاب في مصر لن يعني أن الجدل حوله انتهي أو أن المعارضين والمستقلين سيتقبلون التسمية من دون مناقشة للبنود ومحاولة تفريغها من مضمونها ودحض الدوافع التي أدت إليها وأهمها إحداث الذعر لدي العامة وليس فقط الحوادث الإرهابية.. أتوقع أن يكون الجدل حول قانون الإرهاب أشد عنفا مما شاهدناه في اليومين الماضيين.

ففي فرنسا لم تكن أحداث المترو التي وقعت عام 1995 هي السبب الوحيد وراء تعديل قانون العقوبات "وإضافة" إجراءات استثنائية إليه لمواجهة كل ما من شأنه زعزعة الأمن والاستقرار لدي العامة.. ولكن الأحداث تعود إلي مظاهرات الطلبة في الجامعات الفرنسية عام 1968 وسيطرة تيار يساري شيوعي علي الشارع الأمر الذي أدي إلي إصدار "تشريع" خاص لأول مرة في التاريخ الفرنسي وينص علي احتجاز أي طالب يتظاهر ويدمر منشآت عامة.. وكان هذا أول تعديل تضطر فرنسا لادخاله علي قانونها الجنائي.. أقول ذلك وأطالب الذين يصرخون بأن حق التظاهر مكفول في كل القوانين بأن يعودوا إلي ما فعله البوليس الفرنسي في مظاهرات الطلبة أثناء حكم ديجول.. بالمناسبة التعريف الفرنسي للإرهاب هو الأكثر مطاطية بين كل التعريفات المستخدمة في العالم ونص التعريف هو "أي عمل يقوم به فرد أو جماعة لترويع أو إرهاب العامة أو إفساد النظام العام".. وبالنسبة للمقبوض عليهم للاشتباه في تحريضهم علي الإرهاب أو ارتكابه فإنهم لا يقابلون محاميهم إلا بعد 72 ساعة ولا يسمح له بأكثر من 30 دقيقة.. ولا يسمح لأي متهم في جرائم ذات صلة بالبقاء صامتا!! وتأكدوا بأنفسكم من نصوص القانون الفرنسي.

بالنسبة لألمانيا لم تلجأ لتعديل قانون العقوبات إلا بعد ما حدث في دورة الألعاب الأوليمبية في ميونيخ عام 1972 ثم الهجمات التي شنتها منظمة الجيش الأحمر علي أهداف حيوية في ألمانيا وبدأت تتخذ إجراءات أهمها تعديل المادة "129 أ" من قانون العقوبات بحيث اصبح تعريف الإرهاب شاملا "أي فعل غير قانوني يهدد أي كيان إداري أو منظمة دولية في ألمانيا كما شمل أيضا معاقبة أي فعل من شأنه تهديد كيانات دستورية أو سياسية أو اقتصادية في البلاد".

في عام 2006 قامت المانيا بتعديل قانون احتجاز المتهمين في جرائم تحريض علي الإرهاب أو ممارسته إلي 30 يوما.. وقد طالبت حكومة جيرهارد شيرودر في أيامها الأخيرة من البرلمان اضافة تعديل علي مدة احتجاز المتهمين بحيث تصبح "غير محددة المدة" متي ارتأت جهة التحقيق ذلك! بمعني انه يمكن احتجاز المتهم إلي ما لا نهاية.

في انجلترا كانت هناك قوانين مقيدة للحريات أثناء هجمات الجيش الجمهوري الايرلندي في السبعينات والثمانينات وحتي منتصف التسعينات.. اطلقت لندن عليها اسم "إجراءات استثنائية" أو Exceptional Procedures وتسمح بمراقبة الشقق وتصويرها وتسجيل المكالمات وفتح رسائل البريد وحسابات البنوك ومراقبة الأفراد المشتبه بهم. كما كان من أهم هذه الإجراءات اقتحام الشقق دون اذن من جهة التحقيق لو ثبت وجود مشتبهين داخلها.. في عام 2006 وبعد الهجمات الإرهابية في لندن في شهر يوليو قدمت حكومة توني بلير اقتراحا لمجلس العموم بزيادة مدة احتجاز المشتبهين إلي 90 يوما. لكن البرلمان خفضها إلي 28 يوما وهم يستعدون لرفعها هذه الأيام إلي 40 يوما.

الأهم من ذلك ان انجلترا طبقت لأول مرة نظام الاقامة الجبرية للمشتبه بهم أو Control Orders وتقضي بعدم مغادرة المتهم منزله وعليه ابلاغ قسم البوليس يوميا بأنه مازال في نفس العنوان. كما أن هذا الإجراء يمنع المشتبه بهم من التوجه للمطارات أو لمحطة السكك الحديدية حتي لمجرد "النزهة".

وبعد.. فكل دولة تطبق ما تراه ضروريا لحماية أمنها ومواطنيها وكلها تلاقي معارضة في البرلمان. لكنهم يختلفون عنا في انه بعد التصويت عليها لا يتكلم عنها أحد.

[الغريب]

والله يا سي السيد أنت اللي بتجيب لنفسك حرقة الدم

يعني عاوز تقرا الجمهورية وهتلاقي أيه فيها يعني

أول أمبارح أتشليت بس لما قريت عنوان سخيف في الأهرام بيقولك " إلغاء قانون الطوارئ وقصره على الإرهاب والمخدرات "

شوفت مدى الاستخفاف بالعقول والبله والعته في عنوان زي ده

بس بصراحة مينفعش منظومة جميلة زي منظومة الحكم في بلدنا ميكونش معاها قانون طوارئ كان هيبقى شكلها بايخ صح :lol:

[Tafshan]

والله يا سي السيد أنت اللي بتجيب لنفسك حرقة الدم

يعني عاوز تقرا الجمهورية وهتلاقي أيه فيها يعني

كنت ح اقولها :blush2:

و بعدين بصراحه عداهم العيب .. الطوارئ مدت في سنتين الانتخابات بس :ninja:

[se_ Elsyed]

الشعب المصري في السخرية مالوش حل .. وفي ثواني تلاقي النكته طلعت ...

واحد باعت تعليق مالوش حل على مصراوي .. بيقول لك

يعني معنى كده اللي هايعتقلوه .. هايخيروه .. تحب تبقى أرهابي ولا تاجر مخدرات

ههههههههههههههههههه

[MoHaMMeD EgYpT]

والله مواضيعك يا س س بقت ولعة خالص :ninja: لدرجة اننا شكلنا هنحتاج قسم اطفاء في المحاورات قريب

اقولك بقا رايي , بصراحة واحد ..... ولا يستاهل يكون رئيس تحرير عربية فول حتي :lol:

و كلامه فعلا صح , بس هو شكله ما قراهوش و راح لطخه في الجرنان كده و خلاص

الارهاب في مصر غير اي بلد , اي واحد مشبوه يبقي ارهابي , واحد ماشي في امان الله و من غير ما يعمل حاجة يتمسك و يقال عليه ارهابي , اي واحد شكله مش عاجب ضابط بقا ارهابي و يا ريت ضابط ده ممكن يكون شكله مش عاجب امين شرطة ههههههههههههههه , قانون مصر للارهاب هو المزاج = مزاج الحكومة

اما الدول التانية الارهاب = فعلا الارهاب , و يا ريت الارهابي اللي في الدول التانية بيحصل له ربع اللي بيحصل للارهابي المصري :blush2:

[ابو محمد بن مصطفي]

نفسي اعرف

لا مش عايز اعرف

هو سؤال هما بيجيبوا رؤساء تحرير الجمهورية دول منين

قلنا علي سمير رجب انه حمار

لما شلوه وجابوا محمد علي ابراهيم

قلنا يمكن ينصلح حال الجمهورية شوية

بس محمد علي ابراهيم ده طلع حمار ببردعه

[الباشمهندس ياسر]

أعلن تجار المخدرات والارهابيون عزمهم القيام بوقفة احتجاجية امام مجلس الشعب اعتراضا على قصر تطبيق قانون الطوارئ على الارهاب والمخدرات فقط، متهمين الحكومة بالكيل بمكيالين.

م مصراوي

[kitkat]

والله يا سي السيد أنت اللي بتجيب لنفسك حرقة الدم

يعني عاوز تقرا الجمهورية وهتلاقي أيه فيها يعني

أول أمبارح أتشليت بس لما قريت عنوان سخيف في الأهرام بيقولك " إلغاء قانون الطوارئ وقصره على الإرهاب والمخدرات "

شوفت مدى الاستخفاف بالعقول والبله والعته في عنوان زي ده

بس بصراحة مينفعش منظومة جميلة زي منظومة الحكم في بلدنا ميكونش معاها قانون طوارئ كان هيبقى شكلها بايخ صح

والله صحيح يا سي السيد

انا شايف انك بتحرق دمك لما تقرأ الجمهورية والأهرام والأخبار انت عارف كويس رؤساء تحرير هذه الصحف وصلوا ازاي للمناصب دي وهايستمروا فيها بناء علي ايه !!

انا باحس ان ضغطي هايعلي لو قريت بمحض الصدفة مقال في هذه الصحف لهؤلاء الافاقين الي باعوا الدنيا بالدين

هو صحيح ايه تعريف الارهابي في قانون الطوارئ المفدي

[hazemtara]

الشعب المصري في السخرةي مالوش حل .. وفي ثواني تلاقي النكته طلعت ...

واحد باعت تعليق مالوش حل على مصراوي .. بيقول لك

يعني معنى كده اللي هايعتقلوه .. هايخيروه .. تحب ولاتبقى أرهابي تاجر مخدرات

ههههههههههههههههههه

:lol: ههههههههه

أعلن تجار المخدرات والارهابيون عزمهم القيام بوقفة احتجاجية امام مجلس الشعب اعتراضا على قصر تطبيق قانون الطوارئ على الارهاب والمخدرات فقط، متهمين الحكومة بالكيل بمكيالين.

م مصراوي

الشعب المصرى دة لذيذ والله :) :blink:

والله يا سى السيد أنت والباشمهندس ياسر أضحكتمُنى كثيراً.

[doha]

امبارح قاعده اتصفح النت في امان الله وسامعه صوت التلفزيون حد مشغل العاشرة مساءا

كان فيها علي الدين هلال وعمال يتكلم كما العاده عن انجازات الحكومه

سمعت طراطيش كلام خير اللهم اجعله خير

فمما قال لا فض فوه

ان الزياده السكانية السنوية كارثة على اساس ان ( الموارد ) مش بتزيد بنفس النسبة

طبعا سيادته بيتجاهل حقيقة علمية مثبته وهي ان السكان انفسهم الي بيزيدوا دول في الاصل ( موارد ) بل ومارد الموارد كمان يعني لو في نية انهم يعمروا البلد ويستغلوا الزياده دي كانوا عملوا

ردت عليه منى الشاذلي على استحياء وذكرته بالتجربة الصينية

فرد عليها بكل قوة عين

وهو انتي عارفه القوانين في الصين شكلها ايه ؟ هل انتي تقدري تتحملي تعيشي زي مالصينيين عايشين؟

واستطرد قائلا

في الصين قانون بان الطفل الثاني محروم من الدعم محروم من التامين الطبي (( ياحلااوة .. انا عندي طفله واحده بس وهي واهلها والي خلفوهم محرومين من الدعم محرومين من التامين الطبي ايه المشكلة ؟

ولما لقيها ساكته قام صدق نفسه فكمل

وعارفه كمان حضرتك انك لو ساكنه في حته ـ شربين مثلا ـ لازم تفضلي عايشه فيها طول عمرك عشان انا عامل حسابي في شربين ان لك مكان في المدرسة ومكان في الشارع ومكان في كل حته فعلى اساس متهاجرش يعني لمدينة تانيه فتبوظ له الخطه

وهكذا يرى سيادته ان التنظيم والتخطيط مشكلة تستاهل اننا نحمد ربنا على عدم معايشتنا لها

يعني في الآخر طلع الصين هي الي ( كخه ) وهم الي مش عارفين يعيشوا شعبهم متهني زي ماحنا عايشين

مستغربتش بصراحه كلامه فشيء طبيعي ان يكون ده تفكيره وتكون هي دي مؤهلاته حيث القدرة الهائلة على لوي الحقائق واسباغ الحق باطل والعكس .

كنت زعلانه عشان ( بيلسنوا) على الصين مكنتش اعرف انها وصلت لانجلترا وفرنسا كمان

لنا الله .