عندى حالة زهق وقلق وتوتر بقالى شهر

[ذهبية]

ماما نونة حمد الهعى سلامة حضرتك و ربنا يقويكى بجد على المرحلة الجديدة و اى حد فى مكانك لازم يكون كدة و اكتر

طبعا المحاوراتية قالوا لك الخلاصة

انا بس هازيد حاجة ضغيرة مختلفة شوية

تعرفى ترمى كل دة مسئولياتك ورا ضهرك و الكراكيب و العفش و غيرة و تعملى العمرة

و بعدها تعرفى تدلعى نفسك

يعنى اية يعنى شوفى انتى بتحبى اية و تعملية لو بتحبى الازياء انزلى فورا اشترى لنفسك حاجة جديدة

لو بتحبى الديكور انزلى اشترى ركن جديد فى البيت

لو بتحبى الطبيخ و الاكل اخرجى فى عزومة انتى و جوزك فى احلى مكان فى جدة

لو بتحبى تكلمى اصدقائك و رغىالستات اتفقى مع واحدة من اقرب الناس ليكى و اخرجى معها

يعنى الخلاصة اعملى اى حاجة قريبة من قلبك تجلب لك السعادة

وربنا يسعدك و يخلى كل ايامك سعادة

[mama nona]

السلام عليكم و رحمة الله و بركاته

حمد لله ع سلامة حضرتك

وحشتيني كتير جدا جدا جدا

عارفة كل اللي حضرتك بتقوليه ده طبيعي جدا.....لانك لسه في الطلعة الاولانية يا كابتن طيار ....

انتي بس حضرتك لسه مش متكيفة مع الوضع بالاضافة انك قلقانة من حالة عدم الاستقرار....و فيه مليون فكرة بتنط في دماغك

رايي المتواضع.....اقنعي نفسك....انك كل يوم هتعملي حاجة واحدة من المسئوليات اللي عليكي....لو تمت كان بها لو متمتشي متكركبيشي الدنيا علي دماغك

اهم حاجة دلوقتي انك....تحسي بالاستقرار في البيت.....حكاية العفش....و الشغالات هتيجي واحدة واحدة و لما تتعرفي ع الناس اكتر....و لو حضرتك بتشتغلي ممكن تستشيري كتير من زميلاتك...

هقول لحضرتك علي حاجة بقي بتريحني كتير.....تليفونات لمصر....هو اينعم اسرة حضرتك معاكي...بس اتصلي رخمي (سوري في اللفظ) علي حد من اخواتك.....او حد من اصحابك......او حد تزعقي فيه...كده يعني

هي مسالة وقت بس مش اكتر

و بعد كده هنخش في الاكتشئاب الكبير.....يوووووووووووووه قصدي....حضرتك هتتكيفي مع الوضع...و هتجيبيه كمان تثبيت اكتاف ع الارض...

ربنا ييسر امور حضرتك يا رب و طمنينا عليكي

لو عملتي بقي عمرة امانة الدعاء

ارجعي بقي للمخحاورات بسرعة.......يووووووووه ده احنا هنهريكي ضرب....... :unsure:

فوتك بعافية

اهلا ست لماضة هانم

دعواتك معايا استقر كده وربنا يصلحلى الحال وهروح اعمل عمرة وههريكى دعوات .........

تم تعديل 15 مايو 2010 بواسطة mama nona

[mama nona]

ماما نونا

ازيك يا قمرة وحشتينا جدا :unsure:

حمدالله على سلامتك في جدة

معلش استحملي شوية كده و هاتتأقلمي

مش اول ما جيتي الرياض كان عندك نفس الاحساس قبل كده؟

عشان بس المكان جديد لكن لما تنظمي حياتك و تتعودي عليه هاترتاحي

و زي ما الاخوة قاعدين يقروا عليكي كده اعملي اللي قالوه و غيظيهم

يعني كل اسبوع روحي مكة اعملي عمرة

كل يوم بالليل بعد الشغل اطلعوا اتمشوا على الكورنيش شوية

اعصابك هاتهدي ان شاء الله و الامور هاتبقى فل فل

صحيح انا زعلانة جدا انك روحتي هناك و سيبتي الرياض

بجد و الله كان نفسي نتقابل بس تتعوض ان شاء الله

المهم يكون شغلك هناك احسن من الرياض عشان تحسي بالاستقرار

و ربنا معاكي و روق يا جميل الدنيا و الله ما هياش مستاهلة اننا نقرف نفسنا بالاكتئاب كمان

وفري طاقتك لحاجه اهم و ان شاء الله خير

و بعدين بيقولوا جدة زي اسكندرية حد يطول يا شيخة يقعد في اسكندرية :unsure:

اهلا ريمو ....

خدعوكى فقالو ... انه جدة زى اسكندرية .....

يا شيخة اش جاب لجاب

متزعليش اننا متقابلناش فالرياض

ملحوقة لما تنزلى مكة او جدة نتقابل

ربنا يديم المودة والمحبة

[mama nona]

الفاضلة ماما نونا

انا اول مااشتغلت فى السعودية كنت فى جدة ولكنى طلبت نقلى مباشرة الى الرياض

ومدام ريم بتقول ان جدة مثل اسكندرية طبعا لا اسكندرية اجمل وليس لها مثيل بالعالم

جدة جوها حار جدا حتى فى الشتاء والرطوبة عاليا جدا حتى مع تشغيل المكيف احيانا ليس لة تاثير فى الرطوبة الا اذا كان تبريدة عالى جدا

وحضرتك طبعا لما انتقلتى لجدة حسيتى انك فعلا فى غربة ولكن تذكرى اول ايام غربتك كانت فى الرياض وكنتى حاسة نفس الاحساس بس الفارق انك وانتى جديدة بتستكشفى المكان

ماقالة الاخوة الافاضل فية الكفاية وانتى فعلا محظوظة انك اصبحتى جنب الحرم حاولى تخرجى كثير ولا تجلسى فى البيت بعد الدوام خليها استكشافات للمكان واعرفى مكان بيتك فين بالضبط واحذرى من الجيران نعم السلام والتحية واجبة ولكن الاختلاط اكثر من اللزوم او الثقة الزيادة غير محببة

نعم اعتبرى كل جيرانك ممتازات ولكنك اكثر امتيازا وكونى حذرة وانت اكيد خبيرة فى علاقات حضرتك

اللهم اذهب عنكى الباس والهم والمرض

شكرا لمرورك

وشكرا على النصيحة

[mama nona]

ماما نونا اهلا و سهلا بك فى جدة و نورتى الدنيا لن اضيف الكثير و لكن نحن مستقرين فى جدة منذ فترة ليست بقصيرة و تحت أمرك فى اى استفسار و اعتبرينا أسرتك التانية - شوية و حتحبى جدة جدا على فكرة جانى نقل من سنتين على الرياض ولادى رفضوا بشدة و فى النهاية احنا تحت أمرك فى اى استفسار

على فكرة انا عندى ولد فى أى جى و توأم فى جريد 6

والله لو يا ريت نعمل تجمع محاوراتى عائلى للناس ال فجدة

ويا ريت حضرتك تدلنى على احسن المدارس للمنهج البريطانى وتكون قريبة من فلسطين والحمرا

ولو امكن زوجى يتواصل مع حضرتك

[mama nona]

ملحوظه

يا جماعه ماما نونه مغتربه قديمه وكان فاضل لها شوية وقت بس ومش عارف كان هبحصل ايه

هم الاول كانوا فى الرياض وبعدين حالياً فى جده بعد طبعا فترة ترانزيت فى مصر

بس احب اقولك ان جده بس شوية وقت وهتلاقيها ليها رونق تاااااانى وطعم تانى خالص

وعلى راى واحد حبيبى بيقول كده مكه وكده مدينه

انتى بس اطلعى اعملى عمره وربنا هيسير الامور

هو بس المشكله شوية الضغطه بتوع تظبيط السكن والمدارس والعفش والخدامات

ووو .........الخ

ودى حاجه بتتعمل مره واحده يعنى وهتعدى

فان شاء الله ربنا هيسيرلك الامور

واطلعى خدى عمره او روحى المدينه وانتى هتبقى تمام

شكراً

اهلا عنبى

شكرا للتعريف

بس مش فاهمة دى (وكان فاضل لها شوية وقت بس ومش عارف كان هبحصل ايه )

معناها ايه؟

وبعدين تعالى هنا .... مشفتش اى مساعدة ولا خدمة يعنى ولا حتى عرضت ؟؟؟؟

شاطر بس فالكلام ؟؟

ياللا شد حيلك واتحول الى خانة المتزوجين علشان نعمل لقاءات عائلية

وياللا اول كشف مجانى ....

[mama nona]

ماما نونه

حمد الله على السلامه يا قمر

اخبارك ايه واخبار الاولاد والاسره الكريمه يارب تكونى بخير اللهم امين

يا ستى الحاله دى هتروح وتيجي طوول ما احنا فى الغربه ةكمان بتزيد بس اول شهر وانتى شويه كده وهتلاجعى الشغل وبعد كده مش هتلاقي وقت تزهقي يا قمر ورتابه الحياه ان شاء الله هتروح

يا سلام انتى فى جده يا قمر يعنى قريبه من المدينه وقريبه من مكه ربنا يجازيكى خير روحى عمره وادعيلنا معاكى بجد ده موقعك ممتاز والله اعلم

انتى بس استهدى بالله علشان منطقه جديده ومش تعرفي حد اعملى عمره وانتى هناك هتتعرفي على مليون حد ومن مختلف الجنسيات وان شاء الله ربنا يباركلك يارب وييسرلك امورك قولى امين

منتظرين موضوع منك عكس الموضوع ده ان شاء الله قريبا

شكرا يا بوسى

وعقبالك ما نشوفك قريب جاية تعملى عمرة ان شاء الله

[mama nona]

ماما نونه .....يااااااااااااه ....اخيرا شوفتك هنا تاني؟

صحيح انا كمان بقالي فتره بعيده عن المحاورات wst:: بس لما كنت بادخل مش بالاقيكي

ثم تعالي هنا

مين اللي كان بيصبرني اول ما جيت الرياض ويقول لي بكره تتعودي وماتبقيش عاوزه تنزلي مصر خالص ....ها؟؟؟؟؟؟ :unsure:

ومين اللي كان بيلف معايا ومدوخاه على الشقق والعفش ؟؟؟؟

مش انت برضو؟؟؟؟؟

يعني المفروض انك خضتي التجربه معايا من فتره مش بعيده وانت اللي كنت بتصبريني

اصبرك انا بقه :unsure:

والله انا ماروحتش جده غير يوم واحد بس قبل ما اسافر على مصر ..بس سبحان الله ليها طعم تاني غير الرياض .

انا لما كنت هناك .حسيت اني في مصر

جده فيها روح .....وحياة ...وفُسح ...وبحر....و.....و...........و......و.........ورطوبه ...وده العيب الوحيد في جده

لكن صدقيني انا ارتاحت جدا ليها اكتر من الرياض

وبعدين زي ما الكل نصحك روحي اعملي عُمره ,كمان روحي المدينه

والمساْله مساْلة وقت بس وبكره تتعودي

وموضوع العفش ده بيجي واحده واحده ....زي ما كنتي بتعملي معايا في الرياض...فاكره؟

طب فاكره الطرابيزه اللي قدمت عليها الشاي اول مره زورتيني فيها في الشقه؟؟؟؟ :lol: :lol: :lol: (اظن كانت كرتونة الميكرويف)

وواحده واحده الواحد بيجيب حاجته وربنا بيوقف له ولاد الحلال اللي يساعدوه والدنيا بتمشي

روقي كده بس

على فكره ....

انت اللي مضايقك وتاعبك هوه موضوع الشغاله .وكمان انك بتشتغلي والوقت عندك ممكن يكون ضيق وكمان التوفيق بين الاولاد والشغل.

بس كل حاجه بتتحل وماتحاوليش تعقدي نفسك اكتر ...خدي الامور ببساطه

ولو زهقتي من جده

انزلي مصر .....خميس وجمعه :lol:

اهلا روشة

انا لما كلمتك قولت لك انا حسيت بال كنتى فيه بس عالاقل كان فيه حد بتخرجى معاه وبتفضفضى معاه

انما هنا تحسى انك مقطوعة من شجرة

وخصوصا انه زوجى بيسيبنا ويسافر بالايام

الواحد بيحس انه لو مات هنا مش هيلاقى حد يسأل عنه

الحمد لله اشتريت اغلب العفش والبركة فى صاحبتك برده

[mama nona]

ماما نونة ايام وهاتعدي ان شاء الله وتتعودي عالجو الجديد

مجرد تغيير المكان بيعمل حالة من النفور بسبب تغير الطاقة والمحيط الخارجي

لا تقلقي كله بسبب الغربة والمكان الجديد ان شاء الله تعدي علي خير

ربنا يعديها علي خير ويحلي أيامك

عادي طلعي ف جوزك هو انتي ليكي غيره (كل الستات بيطلعوه علينا واحنا غلابة ) :unsure:

علي فكرة لو أكلتي واحدة كيتكات قبل النوم هاتبقي تمام اوي حتي اسألي اولادك :unsure:

والله الستات هما ال غلابة

بس تقول ايه بقى ......؟

شكرا عالعزومة دى .ونردهالك فالافراح

[mama nona]

بصي هقولك ياماما نونه تعملي ايه ..

اول حاجه امسكي ورقة وقلم واكتبي كل الحاجات الي ( متكركبة ) على راسك ومفروض تنجزيها خلال الفترة الجايه ومسببة لك اللخبطه في تفكيرك انك لسه مانجزتيهاش

يعني مثلا اكتبي مطلوب نلاقي عفش واكتبي العفش الناقص .. اكتبي مثلا مصاريف مطلوبه محتاجين الف عشان كذا وتقريبا الفين عشان كذا .. الخ اكتبي كل حاجه بالتفصيل واحسبي الاجمالي

بعد ماتكتبي الورقة وتشوفي بالظبط ايه الي ناقصك وايه الي ( منكد عليكي ) 99% هتكتشفي ان الموضوع بسيط وان الحاجه الي مدوخاكي دي ممكن تنجزيها ومش مستاهله شيل الهم ده كله

دي اول خطوة

ثاني خطوة نظمي نومك واصحي بدري بالكتير 9 الصبح وحاولي تنامي بدري

ثالث خطوة حطي في بالك ان مش لازم كل حاجه تبقى كاملة ومظبوطه بمعنى انتي محتاجه سكن اسكني في اول حاجه معقولة تقابلك ومتقعديش بقى تقولي الشقة فيها عيوب كذا او كان نفسي تبقى كذا .. لاه .. قولي بعد ست شهور من دلوقت لو معجبتنيش هبدأ ادور على شقة تانيه براحتي كده وفي خلال سنة هننقل على شقة تانيه وممكن تالته او رابعه .. قولي كل مايقابلني شقة حلوة هنقل لها والعفش وشيله وحطه مش مشكلة هنجيب شركة هتعمل كل حاجه .. فكري كده ومتشيلش هم التفاصيل الدقيقة

كل يوم والثاني انزلي لفي انتي وزوجك في الشوارع ( على غير هدى ) عشان تستكشفي المكان .. وحاولي تركزي على المحلات والمطاعم وغيرها من الاماكن الي ممكن تحتاجيها مستقبلا

ادخلي منتديات نسائية وشوفي الاقسام الي بتسأل على المحلات في جده وحاولي تعرفي في منها ايه متوافر .. روحي واتفرجي وشوفي عندهم ايه مش مهم تشتري بس شوفي الدنيا عندك شكلها ايه

خلي كل تركيزك في الفترة الجايه انك ( بتبني نفسك ) مش بتعدلي ( ظروفك ) بمعنى ركزي انك تتعلمي شيء جديد او تتقني مهارة جديده ومتركزيش ابدا ان يكون لك علاقات عامه او اصحاب واقارب توديهم ويودوكي .. الي انتي فيه مرحلة مؤقته يمكن تطول شويه فاستغلي وقت الفراغ الناتج عن وجودك بمفردك في بناء شخصية ليكي تنفعك بعدين لما ترجعي تختلطي بالناس

واخيرا حياتنا كلها مراحل ومحطات مفيش نهائيا حد فينا بتفضل حياته على حال واحد او الي تعود عليه بيفضل هو نفسه .. طبيعي جدا انك تغيري حياتك من وقت للتاني وتقلبيها راس على عقب .. واجمل مافي حالتك انك ماشاء الله غيرتيها للاحسن حتى لو مش حاسه دلوقت بكده بس مصيرك تكتشفي ذلك

والله يا ضحى حاولت اعمل كل ال قولتى عليه

الفكرة بقى انه الواحد بيرجع من الشغل هلكان

ويدوب بقعد مع الولاد شوية علشان تأثير الشغالات عليهم

اما مرحلة الاستكشافى دى صعبة فالوقت الحالى ...انا محتاجة افرش بسرعة

والحمد لله بدأت الامور تستقر الى حد ما

بس نصيحتى للناس كلها

بلاش التغيير ده مهما كان له مميزات ......الاستقرار فى مكان اهم ميزة والله

[mama nona]

شكر خاص لكل الستات المحاوراتيه ال هنا فجدة

طبعا الاتصالات اشتغلت ..

والواحد حس بشوية راحة انه فيه ناس يعرفها

وانه ممكن يتزنق ليهم

كمان حد يقولى ازاى اعمل اقتباس متعدد لانى حسيت انى عبيطة اوى

[ساره احمد]

صدقينى حضرتك انا كمان مش بعرف اعمل الحاجات دىلدرجة ان خطيبي بيقول علي جاهلة

عجبنى اوى موضوع حضرتك بس كنت عايزة اقول ان مش شرط علشان انتى برا مصر تحسي بالغربة والزعل احساس الغربة دة جوانا مش مرتبط بالمكان حاولى تلاقي الراحة في حاجة كنتى بتعمليها بعد شغلك انزلى اعملي اي حاجة انشالة حتى تجيبي حاجات للبيت قسمى وقتك بعد الشغل كل يوم اعملي حاجة بدل ماكنتي بتجيبي حاجات البيت اخر الاسبوع قسميها كل يومين هاتى حاجة وادينا اهه ع النت علي طول وهنسليكى