السفر من جدة إلي مصر بالسيارة عبر ميناء ضبا

[tahereyad]

سلاموا عليكم يا شباب النيل..

أنا ان شاء الله مسافر السنة دي من جدة علي مصر بالعربية,, السفر ان شاء الله هايكون يوم الاربع 30 يونيو بالليل هاطلع من جدة علي ميناء ضبا,, المشوار تقريبا بياخدله 9 ساعات مرتاح بالوقوف و الراحات. و ان شاء الله الوصول لمينا ضبا يوم الخميس 1يوليو الساعة 6 الصبح,, و بعدين ان شاء الله الحجز و العبور في نفس اليوم إلي الغردقة أو سفاجا علي حسب العبارة,, أنا دايما بحب أقضي أربع ايام في الغردقة قبل مانزل علي السويس.

أنا نزلت السنة اللي فاتت برضه بنفس الطريقة أنا و أولادي و الموضوع خيّش فدماغنا بصراحة نعملها تاني السنة دي

أنا السنة دي بادور علي رفقة للطريق,, لو في حد نازل من جدة في نفس اليوم بالعربية, ممكن ان شاء الله نطلع سوا,,, و اللي عنده أي استفسار يبعتلي و ان شاء الله هارد عليه, و نرتب سوا للرحلة..

و ياريت الأخوة اللي عندهم ذكريات مش حلوة عن النزول بري بلاش يكتبوها فالموضوع,, عشان الموضوع تقريبا بيكون نسبي و تجارب فردية.

[tahereyad]

آسف لتكرار الموضوع,,, الفايرفوكس كان بيهنج... و أرجو الأخوة المشرفين يمسحوا المواضيع المكررة

[raouf]

انا ان شاء الله طالع فى نفس اليوم بالسيارة بس من الخبر ههههههههههه

نتقابل فى العبارة بقى ان شاء الله

[AbkaReno]

اعتقد مشكلة تكرار المواضيع من الموقع نفسه لان انا ايضا بيحصلي الموضوع ده

وتروح وتيجي بالسلامه وياريت تاخد معاك كاميره تصور فيها كل الملحوظات بتاعت حضرتك زي المداخل الطرق وجمال الطبيعه الي هتقابلها علشان الكل يستفيد

[elrasy]

سلاموا عليكم يا شباب النيل..

أنا ان شاء الله مسافر السنة دي من جدة علي مصر بالعربية,, السفر ان شاء الله هايكون يوم الاربع 30 يونيو بالليل هاطلع من جدة علي ميناء ضبا,, المشوار تقريبا بياخدله 9 ساعات مرتاح بالوقوف و الراحات. و ان شاء الله الوصول لمينا ضبا يوم الخميس 1يوليو الساعة 6 الصبح,, و بعدين ان شاء الله الحجز و العبور في نفس اليوم إلي الغردقة أو سفاجا علي حسب العبارة,, أنا دايما بحب أقضي أربع ايام في الغردقة قبل مانزل علي السويس.

أنا نزلت السنة اللي فاتت برضه بنفس الطريقة أنا و أولادي و الموضوع خيّش فدماغنا بصراحة نعملها تاني السنة دي

أنا السنة دي بادور علي رفقة للطريق,, لو في حد نازل من جدة في نفس اليوم بالعربية, ممكن ان شاء الله نطلع سوا,,, و اللي عنده أي استفسار يبعتلي و ان شاء الله هارد عليه, و نرتب سوا للرحلة..

و ياريت الأخوة اللي عندهم ذكريات مش حلوة عن النزول بري بلاش يكتبوها فالموضوع,, عشان الموضوع تقريبا بيكون نسبي و تجارب فردية.

ممكن تقولنا تكلفة البرى فى حدود كام؟؟ لانى بفكر فى الموضوع دة رغم انى مستصعبة شوية.

[جميلة الكون]

توصل انت ومن معك بالسلامة ان شاااااااااء الله

رحلة موفقة بتمنى اعرف تكاليف الموضوع من اجل العلم بالشئ مش اكتررررررر

فى امان الله

[hOuSsAm]

توصل بالسلامة يا بشمهندس

دعواتنا كلهاليك بالتوفيق :happy:

[tahereyad]

أنا آسف يا جماعة علي التأخير فالرد,, بس أنا عارف ان قلوبكم كبيرة و هاتستحملوني

أشوفك علي خير يا استاذ رؤوف فالعبارة,,, يا ريت تطبع شعار المحاورات و تعمله استيكر عالعربية عشان نعرف بعض فالعبارة :unsure:

أخي عبقرينو,, أنا فعلا السنة اللي فاتت كان معايا كاميرا... بتاعت الموبايل يعني,, بس أنا باطلع من جدة بالليل و باخد الطريق فالضلمة,, فللأسف مش بيكون في مناظر أشوفها,, و لما باوصل ضبا باجري عالفندق احجز غرفة و انام لحد معاد العبارة,, و التصوير بيبتدي فالعبارة. و عندي صور جميلة جدا للعبارة القاهرة الجديدة.

أخي الفاضل الراسي,, و أختي الجميلة جميلة,,, الموضوع بالنسبة لي مالوش علاقة يالتكاليف,, و فحالتي التكاليف بتكون تقريبا زي الطيران أو أكتر كمان,, لأني باحب السواقة الطويلة جدا,,, و لو أجازتي أطول, هاسوق لحد سوريا و تركيا,, بس باحب أقضي اطول مدة ممكنة فالاجازة مع أهلي و اصحابي في مصر

السنة دي مثلا اشتريت عربية جيب عشان السفر و صرفت عليها قد تمن عربية صغيرة فالحمراني,, وانا عارف انها اشتغالة

و كمان باحب أعدي عالغردقة افضل فيها كام يوم قبل زحمة الأجازة فالسويس بلدي حبيبتي,,, و وجود عربيتي معايا في مصر ميزة كويسة برضه لأاني جربت الايجار و التكسيات و السلف و تعبت أوي.

حبيبي حسام باشا,, ازيك... انت هاتنزل امتي

[عنبو]

حبيبي حسام باشا,, ازيك... انت هاتنزل امتي

هههههههههههههههههههه

تصدق نسى يسألك

توصل بالسلامه يا مهندس

[tahereyad]

حبيبي حسام باشا,, ازيك... انت هاتنزل امتي

هههههههههههههههههههه

تصدق نسى يسألك

توصل بالسلامه يا مهندس

هاهاهاها,,, يا راجل دا كان هايطلعني من احرامي,,, أنا زهقت من السؤال دة,, زي بتاع انتي جاية اشتغلي ايه؟؟

ها يا جماعة,,, مين قال أنا جاي

[الممول العجيب]

الاخ الفاضل / طاهر رياض

انا مسافر في نفس اليوم والتوقيت تقريبا 30 يوليو ونازل عن طريق ضبا الغردقه علي اساس ان اللانش السريع ياخذ الي السويس ثلاث ساعات فقط بعكس العباره العاديه 8 او 9 ساعات

والواحد بيحاول يقلل الوقت قدر الامكان

المشكله اني متردد كثيرا بين النزول بالسياره او عن طريق شركة النقل الجماعي او البلاغه ، مع العلم ان سيارتي موديل 2005 وكوري وصغيره ومعي الاولاد

ما هي نصائحك خصوصا انك جربت البري سابقا

انا في انتظار ردك.

[tahereyad]

الأخ الفاضل/ الممول العجيب وانا مش فاهم الاسم يعني.

أولا أنا ان شاء الله هانزل أول شهر سبعة (يوليو) مش آخره,, يعني تقريبا في فرق توقيت شهر بيننا,, يا ريت كنا نبقي مع بعض والله عشان الطريق و التعارف

ثانيا: الطريق فعلا بالعبارة السريعة 3 ساعات مسافة الابحار من ضبا للغردقة أو لسفاجا, بس دة غير التأخير الطبيعي و الاستعباط في مينا ضبا و الغردقة, اعمل حسابك علي كدة, السويس مالهاش دعوة لأن المسافة بين الغردقة و السويس حوالي خمس ساعات لو مش معاك كاشف رادار.

بالنسبة لموضوع عربيتك, أنا نزلت السنة اللي فاتت باللانسر 2007 و كانت زي الفل عالطريق و الأولاد ارتاحو,, و كنت وديتها مركز خدمة عملولها صيانة لأن بتوع الوكالة قالولي ماعندهمش صنايعية و هاتقعد 4 ايام. مدام انت حاسس ان عربيتك كويسة و أهم حاجة الكاوتش و العفشة كويسة,,, و الموتور مش بيسخن,, وديها مركز خدمة يغيرو الزيت و الفلاتر و يظبطولك الموتور و يتأكد من الاتزان و الفرامل و اتكل علي الله.

السنة دي ان شاء الله هانزل بعربية 2005,,, وديتها الصيانة تعمل صيانة ال100000 عشان ابقأة مطمن,, ظبطوني ف 6500 ريال قبل الخصم.

مدام انت اعصابك هادية و نفسيتك مرتاحة و بتحب السفر و السواقة الطويلة, يبقي الولاد هايرتاحو,,, بس المهم اول ماتحط رجلك في ضبا,, تجري علي الفندق الاول تاخد غرفة عشان الاولاد يرتاحوا فيها,, و بعدين انزل علي مكتب البلاغة شوف العبارة.,,, و ماتنساش عالطريق انك لازم تفول العربية بنزين كل ماتعدي علي محطة,, و بالذات ان بين جدة و ينبع في حوالي 280 كيلو مافيهمش بنزينات عالطريق, لو احتجت بنزين بتسيب الطريق و تسوق بتاع 2 كيلو عمودي.

موضوع النقل الجماعي دة غير مطروح بالمرة,,, انا ماجربتوش و مش باحب المواصلات العامة, و في الغالب الأولاد مش هايرتاحوا خالص.

و حظ موفق ان شاء الله و توصل بالسلامة

[mohsen]

انا السنة اللى فاتت نزلت بالسيارة بس عن طريق العقبة وكانت كويسة الحمد لله وان شاء الله هكررها السنة دى

[tahereyad]

أنا سمعت عن طريق العقبة بس مش عارف تفاصيله و هل في خطورة المرور علي إيلات ولا لأ, لأن الواحد كمان بيدخل الأردن و الاجراءات بتزيد, بس يمكن أفكر فالموضوع و ادرسه لما أفكر أعدي علي شرم الشيخ في طريقي لمدينتي

من أهداف الرحلة الكام يوم اللي الواحد بيغير فيهم جو قبل مايبتدي مراسم الاجازة و الزيارات العائلية و قائمة الأشغال ,, لأن مش سهل أوي الواحد يقطع الاجازة من النص عشان يروح يغير جو.

بالنسبة لأخوة اللي مركزين عالمصاريف,,, تقريبا تكاليف الرحلة(تذاكر ركاب و شحن عربية و جمارك في مصر) + تكاليف الاقامة و الفسح كام يوم في الغردقة + تكاليف إيجار عربية في مصر لو مش عندك عربية في مصر (أقل من) < مصاريف الطيران بس

يالا يا جماعة,,, مين تاني قال أنا جاي...

ضبااااااااااااااااااا,, غردءااااااااااااااااااااااااااااا,,,نفر ضبااااااا,, نفر ضباااااا غردءاااا عالسريع و طالع

[pepoo]

طيب انا عايزه اسأل بالنسبه للسفر من الرياض

ياريت اللى عنده خبره يفيدنى

[Mr MAGED]

طيب انا عايزه اسأل بالنسبه للسفر من الرياض

ياريت اللى عنده خبره يفيدنى

بالنسبة للسفر من الرياض بيكون عن طريق الرياض - بريدة - حائل - تبوك - العقبة ثم الي نويبع ان شاء الله

المسافة من الرياض لبريدة 300 كم تقريبا وزيهم من بريدة لحائل

في حائل لازم تريحوا شوية يعني تشوفوا أي فندق ترتاحوا فيه وتناموا فيه شوية ... وفيه محطات كبيرة ممكن تشيكوا فيها ع العربية

لأن الطريق بعد كده من حائل لتبوك مش بيكون فيه استراحات كتير او مدن كتيرة

الاستراحات بتكون موجودة علي الطرق بس ودي مانصحش انكم تنزلوا فيها

حائل هي آخر مدينة كبيرة هتمروا بيها قبل تبوك فيفضل الراحة تكون فيها

من حائل لتبوك حوالي 600 كم

برضه نصيحة تانية متقفوش في الطريق الا علي المحطات الكبيرة بس واللي تلاحظوا ان فيه عربيات كتير وانوار موجودة فيها

بلاش المناطق اللي تحسوا انها مقطوعة او مافيش فيها غيركم ... ودايما تكونوا متابعين البنزين ماينزلش عن نص التانك وده للامان

بعد كده من تبوك للعقبة مرورا ً بمنطقة اسمها حقل ... المسافة قصيرة لكنها جبلية ودي غالبا ً بتكون أصعب منطقة علي الطريق

ويفضل انكم تمشوا فيها بالنهار مش بالليل ... يعني تظبطوا المسافة بتاعتكم والتوقيتات بحيث توصلوا هناك بالنهار

المسافة دي بتاخد تقريبا ً ساعتين لحين الوصول لميناء العقبة لأنكم بتكونوا ماشيين بالراحة عشان الجبل

بتخلصوا شوية اجراءات ادارية بسيطة جدا عند منفذ العقبة وبتدفعوا شوية رسوم ..ز وبتدخلو بعد كده ع المينا

وبتحجزوا تذاكر العبارة وبتنتظروا الميعاد ...

بعد ما تركبوا العبارة بتتجهوا بعد كده لميناء نويبع ... وهو من وجهة نظري افضل الموانيء المصرية في كل شيء

وبافضل ان كل المسافرين سواء لمصر او جايين من مصر ييجوا من خلاله ... المعاملة فيه ممتازة جدا

والتفتيش فيه خفيف جدا ... مش عايز اقولكم ان مافيش كيس بلاستيك نزل من عربيتي ساعة التفتيش

وده بعكس باقي المواني المصرية ... اللي كل حاجة فيها سيئة للغاية

بتخلصوا شوية اجراءات في المينا بتاخد تقريبا ساعتين كمان مع دفع الرسوم طبعا

وبعد كده بتتجهوا لوجهتكم النهائية

وعلي فكرة ... بيكون فيه خريطة ممتازة جدا ً بتساعدكوا كتير علي الطريق ممكن تكون موجودة مع مكاتب التريبتك

أو ممكن تجيبوها من حد سافر قبل كده

وتوصلوا بالسلامة ان شاء الله

تحياتي

تم تعديل 24 مايو 2010 بواسطة INVESTOR

[hyyyr]

السلام عليكم ورحمة الله وبركاته

فعلا الطريق مثل ما قال الاستاذ في الرد السابق

الرياض - بريده - حائل - تبوك - العقبة ثم الى نويبع

انا سافرت منه من سنتين وكان ممتاز والحمد لله

رحلة ميسرة والعودة بنفس الطريق

يا رب كل اللي مسافر يوصل بالسلامة

[pepoo]

مشكورين اخواتى على التعليق والرد

وان شاء الله يرجع كل مسافر لبلده بالسلامه

[الممول العجيب]

الاخ العزيز / طاهر اياد

انا نازل 30/6/2010 وانا فعلا ذكرت الشهر خطأ

المهم انا طبعا اتشرف بصحبتك علي الطريق ولكن للاسف انا غالبا مش هقدر انزل بسيارتي لاني بصراحه خايف وخصوصا ان زميل لنا كان نازل بسيارته وربنا يعافيك ويسلمك

الطريق من جده الي ضبا صعب جدا جدا ويسمونه طريق الموت.

ربنا يسلم طريقك وتوصل بالسلامه

مع تحياتي

[tahereyad]

الأخ الممول,,, ميرسي جدا لدعائك الرقيق,,, و فعلا الطريق مش سهل جدا,,, خصوصا ان السنة اللي فاتت كان في وصلات فالطريق طريق مفرد رايح جاي,,, و كانوا وقتها شغالين في ازدواج الطريق. و ربنا يسهل و يكونوا خلصوه.... الحمد لله ربنا سترها معانا السنة اللي فاتت,, و ان شاء الله ربنا يسلم طريقنا السنة دي برضه...

بس زي مانا قولتلك,,, أنا باحب السواقة الطويلة,,, و مؤمن بإن لو مكتوب شئ هانشوفه سواء بحرا أو جوا او برا,,,, أو حتي فالبيت واحنا نايمين تحت اللحاف... ان شاء الله نبقي نتقابل فالعبارة السريعة علي خير,,, و هابعتلك رقم تليفوني عالخاص و نتواصل ان شاء الله.

أخوك طاهر رياض