تحذير هام خاص بالتأمينات الإجتماعية بالسعودية

[se_ Elsyed]

أحد أصدقائي بلغني إن صديق له تُوفي من يومين بالرياض نتيجة سقوط وزن ثقيل على رأسة .. فمات في الحال ( رحمه الله ورحم جميع موتانا )

لكن ده اللي بيسموه موت وخراب ديار ..

ففي مثل هذه الحالات بيتم إثبات الوفاة على إنها إصابة عمل لو مات أثناء العمل أو في الطريق إليه ذهاباً أو إياباً .. وبيتم صرف تعويض من المؤسسة العامة للتأمينات الإجتماعية يساوي 84 راتب شهري للورثة .... وهو مبلغ غير هين ..

طب فين المشكلة هنا ؟

المشكلة إن المرحوم ظلم نفسه كما يفعل الكثيرون وفرط في حقه وحق أولاده ... فمرتبه كان 12 الف ريال ... غير بدل السكن بالتأكيد ..

لكن الكفيل اللي بيدفع مبلغ وقدره مرتب شهري .. مستخسر يدفع مبلغ زهيد لا يأتي ثمن وجبه غذاء له شهرياً كتأمينات إجتماعية ....

وعلى سبيل المثال في حالة المرحوم ده .. كان الكفيل مُلزم بالقانون إنه يدفع له 300 ريال تأمينات شهريه تُدفع للمؤسسة العامة للتأمينات الإجتماعية ..

فراح الله يهديه إتفق مع أخينا المرحوم إنهم يخلوا المرتب على الورق 700 ريال فقط ... سبعمائة ريال لا غير عشان يدفع 14 ريال تأمينات بس .. وأهو يا عم إحنا بنستفيد إيه من التأمينات ... ودي فلوس بتحصلها الدولة على عمل الاجانب وليس لها أي مردود أو نفع على الكفيل أو الموظف ... والاعمار بيد الله وهكذا إلخ من تلك الحجج الفارغة ..

إلى أن حدثت الكارثة وتوفي الشخص أثناء عمله .... والتأمينات دلوقت بتقول للورثة .. مالكمش عندي غير 58 الف ريال فقط لا غير ... حسب الورق اللي للأسف موقع عليه المرحوم أيضاً برضاه ..

بعد ما كان هاياخد بالمستريح مليون ريال تعويض وفاة .... مليون ريال وأكثر ...

ولا حول ولا قوة إلا بالله ..

وربنا يهدي كل من يُفرط في حقه وحق أولاده ...

لكن أنا نصحت زميلي بإن يتم توكيل محامي كويس وأمين ويُثبت تحايل الكفيل وإثباته راتباً غير حقيقياً وإنه أجبر الموظف على ذلك ... والإثبات بسيط جداً .... عن طريق كشوف حسابات البنك التي يتم تحويل المرتب عليه أو بأي ألية أخرى كدفاتر الحصول على الراتب ...

بالمناسبة القانون هنا بيبقى في صف الموظف ... وتخيلوا حتى لو كفيلك بيمضيك كل شهر على إنك حصلت على مكافأة نهاية الخدمة .. فلا يتم الإعتراف بها ... ومن حقك الحصول مره أخرى على مكافأة في نهاية خدمتك

وأيضاً في حالات كثيرة .. لا يتم الإعتراف بموضوع تخفيض الراتب أو التنازل عن ميزة من المميزات كان الموظف يحصل عليها حتى لو وقع الموظف على ذلك .. لإنهم بيبقوا عارفين إن ده لوي دراع وإذعان

لكن على أرض الواقع ... الامر بيختلف وناس كتير بتمشي جنب الحيط وبتقول انا مش حمل قضايا ومحاكم في أمور تتطلب التحمُل ... أينعم هناك أمور اخرى يُمكن التغاضي عنها ... لكن تظل هناك أشياء لا يجب أن يتنازل صاحب الحق فيها عن حقه ...

[Mr MAGED]

لا حول ولا قوة الا بالله

رحم الله موتانا وموتي المسلمين

أتمني أن يحصل الورثة علي حقهم

لأنه لا يجوز أن نعلق علي تصرف المتوفي

وتفريطه في حق أبنائه قبل أن يفرط في حق نفسه

[ozoozo]

طيب والواحد يعرف ازاي انه متامن عليه

انا ما مضتش علي اي ورق للتامينات لكن مضيت علي العقد لكن فيه الراتب الصحيح

[se_ Elsyed]

طيب والواحد يعرف ازاي انه متامن عليه

انا ما مضتش علي اي ورق للتامينات لكن مضيت علي العقد لكن فيه الراتب الصحيح

يبقى أنت في السليم كده طالما مش ماضي أوراض ضد تانيه ..

لأ دلوقت لازم يتأمن عليكم وصعب الكفيل يهرب من الموضوع ده ...

كان زمان كل جهة شغاله في جزيرة منعزلة .. التأمينات غير مكتب العمل غير الجوازات ..

دلوقت كله مربوط ببعضه ..

يعني بمجرد دخولك المملكة ... بيوصل تقرير للتأمينات بوصول أجنبي إسمه أوزوزو عبد العزيز أوزوز إلى المملكة وبالتالي مش هايستخرج إقامة إلا لو كان متأمن عليه ...

لكن للأسف اللي الموظف ما يعرفهوش إن تأمينات الاجانب بيتعمل فيها أحلى لعب ..

بمعنى .. إن الكفيل لما ييجي يأمن عليك مش شرط يُرفق صورة عقدك الأول ...

حتى لو أرفقه وكان مرتبك 5 الاف مثلاً ... وحصلت على زيادات سنوية ووصلت بعد 4 سنين 7 الاف مثلاً ... بيفضل الكفيل مبلط في الخط وما بيبلغش التأمينات بالزيادات دي عشان ما يدفعش ملاليم ... وده في الغالب الأعم بتعمله كللللللللللللللللللللللللللللل الشركات

وكل فين وفين بتيجي لجنة من التأمينات الإجتماعية بتختار عينة عشوائية من العقود عشان يشيكوا عليها ..

لكن للأسف برضوا لا يُعطون أي إهتمام للأجانب وكل تركيزهم على السعوديين لإن ضربتهم جامده ..

ففي حين تدفع الشركة على الموظف الاجنبي 2 % من مرتبه الاساسي + بدل السكن ... كتأمينات

بتدفع على السعودي 20 % شهرياً .... وتُخصم 9 % على الموظف و 11 على الشركة ..

لإنه بعد ذلك بيحصل على معاش بعد وصوله للسن القانوني لذلك ..

وبالتالي صعب إنه يتلعب في مرتب السعودي ..

يعني مش معقول يخصموا منه 9 % على اساس إن مرتبه 5 الاف ... وهما مأمنين عليه بتلاته .... كه بيبقى نصب علين ولو شكاهم يروحوا في داهيه لو أكتشف الأمر ..

وأكتشاف الأمر سهل ... فأي حد بيروح المؤسسة العامة للتأمينات الإجتماعية المقابلة للمستشفى العسكري بحي السليمانية .... يُمكنه بسهولة الحصول على برنت بالتأمينات الإجتماعية ...

كان من سنة وشويه كده بيطلبوه لما تيجي تقدم على تأشيرة زيارة عائلية بيطلبوا منك برنت تأمينات ..

وبأختصار الفوايد اللي بيحصل عليها الأجنبي من التأمينات الإجتماعية :

1- في حالة إصابة العمل بيتم علاج الموظف في مستشفى التأمينات مجاناً ... وبيتم دفع مرتب له أثناء فترة العلاج .

2- التعويض في حالة العجز الجزئي أو الكلي أو الوفاة نتيجة العمل ..

3- ربنا يعافينا جميعاً .. شحن جثة المتوفي إلى بلده على نفقة مؤسسة التأمينات ... ولو إن دي كمان حملوها لشركات التأمين الطبي في حدود 10 الاف ريال كتكلفة ...

[Guest saf1966]

الأن الوضع أسوء بالنسبة للتأمينات
زمان لو روحت أي مستوصف كشف عادي وليست اصابة كنت تلاقي شيك جاي ليك من غير اي تعب
دلوقتي لو طالوا يقلعوك هدومك هيعملوها
من حوالي شهرين اخذت ستة ايام راح نتيجية اصابة عمل اليوم باعتين لي الحضور لمقر التأمينات للتحقق من صحة الحادث
بيدوروا على أي ثغرة إللي بيها يلغوا مصاريف الراحة وإن طالوا مصاريف الكشف والعلاج
بقوا يلعبوا في مسميات البلاغ كالعنوان ومكان الحادث بيتعمدوا وضع غلطات عشان يهربوا من الحقوق إللي عليهم
صارت السعودية من ابشع البلاد في أكل حقوق العمال حكومة ابشع من الحكومة المصرية