هل الشغل فى السعودية و الخليج مفيهوش تحويش؟

[myusername]

السلام عليكم...

لاحظت فى اكثر من مناسبة.. ان بعض الاعضاء الافاضل هنا فى المنتدى.. و حتى فى الواقع اللذى اعيشه.. يصرون على ان السعودية و الخليج مقلب :unsure: و الواحد بيروح و يرجع يا مولاى كما خلقتنى

و آخر مناقشة فى الموضوع ده كانت النهاردة الفجر مع الاخت ضحى... و قالت ان الواحد عامل زى التعلب اللى فى بستان العنب.. بيروح يشتغل بس بيصرف كل اللى معاه هنااك, و بيرجع من غير اى فلوس... على عكس ما الناس فى مصر معتقدة.

طبعا الكلام ده انا مش مقتنع بيه و مش مصدقه.. و مش هصدقه الا لو اتقال كلام مقنع...

انا مش مقتنع بسبب سؤال بسيط و منطقى جدا.. طيب انتوا بتعملوا ايه هناك؟!!

يعنى انا اسمع ان السعودية بالذات مقرفين فى تعاملهم, خصوصا اللى رايحين تبع كفيل او شركة خاصة... على عكس اللى شغالين فى الوزارات هناك..

و كمان الغربة.. و كمان الاحساس بالوحدة.. و المشاكل اللى الواحد بيقابلها هناك..

سؤالى هو: ايه المبرر اللى يخليكم تستحملوا كل القرف ده و الغربة.. طالما انكم مبتعملوش فلوس؟ بجد انا عايز افهم الدافع..

طبعا انا شفت قدامى نماذج كتير جدا لشباب بيشتغلوا فى السعودية.. و ما شاء الله بشوفهم جايين يشتروا شقق فاخمة و غالية.. و ربنا يبارك لهم.. و ده حقهم لانهم بيتعبوا و بيستحملوا..

و طبعا دى تعتبر اسرار.. و لكنهم لانهم اصحابى... فطبيعى انهم ميخبوش حاجة و يقولوا الحقيقة.... و ميخافوش من الحسد :lol: :lol:

لكن انتوا يا حرام يا للى شغالين هناك و كمان مبتعملوش حاجة ولا فلوس ولا تحويشة عمر... طيب بتعوضوا نفسكم ازاى؟ و لو لا قدر الله نزلتوا مصر فجأة.. بتعيشوا هنا ازاى و انتو لسه هتبدأوا من الصفر, طالما ان مفيش معاكم فلوس تعيشوا بيها حياة كريمة؟ :unsure:

المشكلة ان الموضوع ليه ابعاد اكثر خطورة...

افرضوا حد جاله عقد فى السعودية و سمع الكلام ده.. و انه لو راح و اشتغل هناك مش هيحوش.. و زى ما يروح زى ما هيرجع... طيب مش ده ممكن يأثر على قراره و مستقبله؟

على فكرة انا مش عايز اعرف مربتات.. و مش عايز اعرف انتوا حوشتوا كام... انا عايز اعرف حاجة واحدة بس... هل قدرتوا تحققوا حاجة مادية من سفركم, زى شقة او عيادة او عربية الى آخره؟ و هل فعلا قدرتوا تحوشوا؟

مستنى ردودكم... :lol:

تم تعديل 15 مايو 2010 بواسطة myusername

[لماضة مصرية جدا]

السلام عليكم و رحمة الله و بركاته

هو انا داخلة التوبيك دهون عشان كلمة تحويش اللي فوق دي في البانر اللي عمالة تطلعلي لسانها في الرايحة و الجاية

اصلها وجعتني اوي اوي

ليه بقي

عشان انت قولتها الناس فاكرة في مصر ان اللي بيشتغل في الخليج.....بيغرف...ايون ....بيصحي كل يوم الصبح يروح رابط السبت ابو حبل دوبارة و بعدين ينزله من البلكونة (طبعا اخواتنا اللي في السعودية لا ممكن يكون عندهم بلكونات.... :unsure: ).....وبعدين ينزله كدهون و يشد الحبل هووووووب يلاقي الجردل....قصدي السبت ملوي لتمة عينه فلوس

مقدرشي اقول اني خبرة اوي في الموضوع ده لاني تقريبا جزء كبير من معيشتي في الخليج كان مع اهلي...بس ممكن اقولك:

1- المعيشة في الخليج بشكل عام بتبقي غالية جدا و خصوصا لو انت ابن ناس و هتعيش حياة كريمة......و مالكشي في قصة كل يوم ترو البقالة تجيب علبتين صلصلة و كيس مكرونة.....او اك تدق مسامير ع الباب تعملهم شماعة

لما بيجيلك الاوفر للتعاقد في مصر بتقوم ع طول تحسب المرتب و بتقارنه باللي بتاخده في مصر و اللي بيحسم اختيارك لا محالة.....لكن الواقع العملي بيفرض عليك مصاريف كتيرة اوي.

2- مجتمعات الخليج خنقة اوي.....لانها استهلاكية في المقام الاول.....ممكن تحوش السنة الاولانية بعد كده هتلاقي نفسك ماشي مع الموجة الاستهلاكية.....طب انا امبارح شفت طوق شعر.....اللي في مصر الخمسة بجنيه.....و الله العظيم شفته بحوالي 80 درهم اماراتي...يعني ما يقارب 120 جنيه...اللي تعبني مش سعره....لا انا قولت اصحاب العقول في راحة...بس الي تعبني ان صديقتي المصرية لقيتها شبطانة فيه و جايباني علي ملا وشي عشان اشوف الحتة اللوقطة دي......عليه العوض و منه العوض

انا رايي الناس بتبقي عايشة في الخليج عشان هي عيشة هادية...معاك مرتب كويس...بتاكل كويس....بتعلم ولادك في مدارس كويسة...بتمشي يف شوارع نضيفة.....مأنتخ ع الاخر.....و احتمال يف اخر السنة...يبقي عندك حاجة كده ع جنب........و دي لو انت برضه قدرت تربط الحزام

فيه نوعية تانية.....دي مسافرة مغامرة...و اكتشاف أرض جديدة و خصوصا لما يتعلق الخليج بالامارات او بقطر...لانهم نسبيا مختلفين عن باقي الخليج......و دول يا سيدي الفاضل اوعي تسالهم عن حاجة......دول محتاجين اصلا مساعدة..........لانهم الصيت و لا الغني.....العيشة غالية جدا جدا...و ما تراه في مصر هو الهنا بعينه....يدوب يخلي الواحد يكمل الشهر مستريح........بس برضه ممكن يعمله طلعتين سفاري....علي كام طلعة كده علي وندرلاند في دبي.

الميزة في البلدين دول تحديدا ان لو طبيعة شغلك بتكون مع اجانب مثلا او مكان متعدد الثقافات...لو انت شخصية متعطشة للتعرف علي الناس و الاكتشاف هتبقي دي الفايدة الوحيدة و السبب الاقوي للبقاء لفترة لكن مش ع طول.

تحيااتي

[الحر الأشقر]

هو مش مقلب مقلب ..

هو بإختصار إننا إتعودنا على نمط صرف معين ..

و لما نسافر في الاجازه على مصر بنلاقي إننا رجعنا كإننا خليجيين أو سعوديين جايين ع السياحة في مصر .

تم تعديل 15 مايو 2010 بواسطة الحر الأشقر

[MZohairy]

اللي بيروح و مابيحرمش نفسه مش حيحوش لأنه بيصرف اللي يخليه مايحسش بالغربه و عدم الآدميه

اللي حيسكن في كمبوندات بستين الف (وانت طالع) سنويا

و اللي بيدخل ولاده مدارس رسومها للواحد عشرين الف و انت طالع سنويا

و جايب شغاله بألف ريال شهريا

و عربيه محترمه ووووووووووووووووووووووووووو

صعب جدا يحوش حتى لو راتبه فوق العشرين الف ريال شهريا

و على العكس ممكن واحد راتبه 3 الاف ريال و يحوش نصهم شهريا

بس بتلاقي نفسك اتدبست في دخل معين و نمط انفاقي و معيشي معين و خلاص

[عماد حمدي]

بكل بساطة هلخص تعليقي في ثلاث جمل ..

- بالرغم من المساويء اللي ذكرتها بخصوص أصحاب العمل والشركات الخاصة والصغيرة والبهدلة ومع ذلك الناس بتسافر وقاعده

فتأتي جملتي الأولي بعنوان ..

ربنا سبحانه وتعالي كاتبلة رزق في السعودية او الإمارات أو الهند أو مدغشقر .. رزقه مقسوملة في البلد دي فلا مفر من القدّر

جملتي التانية ..

إية اللي رماك ع المرّ .. bv:- .. قالك الأمرّ منه

تعليق آخر ..

الغربة إدمان إذا لم تستطع السيطرة ع نفسك في باديء الأمر ..

فلا تستطيع الإقلاع عن مرض الغربة حتي ولو كانت بدون عائد مادي مناسب

تحياتــــــــــــــــــي ,,

:happy: :lol:

عماد حمدي

[doha]

ولو اني سبق وقلت رايي زي ماحضرتك ذكرت في مداخله النهرده في الموضوع ده

http://www.egyptiantalks.org/invb/?showtopic=102375

الا ان مفيش مانع ارجع انسخها هنا تاني خاصه واني ملحقتش من الفجر لبليل اغير رايي ..

بس للاسف ومن تجربتي مع السعوديه في ملاحظة كل من حولي وفي المرتين الي انا شخصيا غزيت السعوديه فيهم اقولك بثقة

السعوديه بالظبط ولناس كتير اوي خاصه لما يكونوا ولاد ناس عامله بالظبط زي قصة الثعلب وبستان العنب .. لما دخله جعان من فتحه في الجدار ولقي البستان مليان من اشكال والوان قعد ياكل ياكل ياكل ومش ملاحق في جمع الاكل وملأ البطن .. لما خلص اكل خاف بقى الصبح يطلع واصحاب البستان يشوفوه قام جري عشان يطلع مطرح مادخل لقي نفسه طخن ومبقاش قادر يعدي من الفتحه الي دخل منها

قعد حابس نفسه ومجوعها يومين تلاته لما رجع خس تاني وقدر بسهولة ينفذ من الفتحته

بص للبستان وهو ماشي وقاله ايها البستان خرجت منك كما دخلتك

ان كنا حوشنا اول مرة ياسيدي الفاضل القرشين الي هم يبقى هنحوشهم تاني مرة برضه وان مكانش يبقى متوجعش دماغك من اولها شكلها كده قدر ومكتوب والي عاوز يفضل شبعان من عنب البستان لازم يفضل فيه وميحاولش يطلع عنقود واحد بره لانه مش هيقدر

هي معادلة اما انك ( تعيش ) كويس او تحوش كويس

ايوه ياسيدي الفاضل احنا في السعوديه ( بنعمل فلوس ) خاصة لما الوقت يمر وتقعد لك كام سنة .. لكن لما تيجي في الآخر وتبص لورا وتشوف عدى كام من عمرك وعملت ايه هتلاقي ان كتير اوي تكون بعت سنين عمرك عشان تجيب ثلاجه او بوتاجاز ..

عايز تعمل فلوس اكتر وتستاهل يبقى انسى انك عايش والمشكلة انك بعد سنين وسنين من الغربة والبهدلة راحت فيهم زهرة العمر هتلاقي ان الي عملته ده كله ملوش قيمه وهتستمتع بيه امتى وفين ؟

هترجع تقولي امال انتم قاعدين في السعوديه بتعملوا ايه لما مبتحوشوش .. هقولك لو قريت كلامي الاولاني من البداية كنت عرفت اننا مش قاعدين في السعوديه احنا ( عايشين ) فيها ..

تحياتي ..

[وطني حر]

اولا الغربه ليها ثمن وثمنها كبير .

ثاني حاجه الغربه يجب ان تكون في سن الشاب او في بدايه حياته الزوجيه

اخر حاجه . الغربه زيها زي اي تجاره اخري فيه من كسب وفيه من عزل وفي من يصرف على العمال ويسدد ايجار المحل وعلى رأي المثل عيشه رهيه وليس لها بقيه

خلص الكلام

[kitkat]

السلام عليكم...

طبعا انا شفت قدامى نماذج كتير جدا لشباب بيشتغلوا فى السعودية.. و ما شاء الله بشوفهم جايين يشتروا شقق فاخمة و غالية.. و ربنا يبارك لهم.. و ده حقهم لانهم بيتعبوا و بيستحملوا..

و طبعا دى تعتبر اسرار.. و لكنهم لانهم اصحابى... فطبيعى انهم ميخبوش حاجة و يقولوا الحقيقة.... و ميخافوش من الحسد :happy: bv:-

هل قدرتوا تحققوا حاجة مادية من سفركم, زى شقة او عيادة او عربية الى آخره؟ و هل فعلا قدرتوا تحوشوا؟

مستنى ردودكم... :lol:

وعليكم السلام ورحمة الله وبركاته

شوف يا عم اليوزر نيم

انا مسافر خلال أيام النيلة السعودية ان شاء الله وكنت هناك من يجي 8 سنين

زي ماالناس قالتلك هنا الي ابن ناس ومش بيعرف يحرم نفسه ويدبأ القرش عالمليم مش سهل يحوش الا لو زنق نفسه في قسط أرض ولا فيلا

الي معاه ولاده هناك وعايز يعلمهم في مدارس أجنبية (تعليم نضيف يعني ) طبعا بيدفع دم قلبه

بس كده ده الي عندي

فيه ناس كتير اشتروا اراضي وعمارات من شغلهم ف الخليج وفيه ناس بتنزل تصرف الي بيحوشوه كل سنة في مصر في الشهر الاجازة

بس غالبا لو انت أعزب هاتحوش هناك :)

[Simba]

انا هتكلم عن حدود رؤيتي المتواضعة جدا للشغل في الكويت عموما وعن شغلي انا خاصة

اعتقد ان العاملين في الكويت متقسمين للفئات فيه ناس فيه رؤساء ومديرين بمختلف المجالات ودي رواتبهم تمام

ودول فيه منهم اللي بيحب يعيش حياة كريمة ويجيب اسرته معاه ومش مهم هيحوش كام ولا هيعمل ايه وفيه منهم اللي رابط علي بطنة حجر وعلبتين فول وكارت شحن بدينار بيكفيه لاخر الشهر والله اعلم علشان يطلع له بعمارتين تلاتة في مصر

فيه فئة اللي شغالين في الوزرات زي المدرسيين والفنيين وكده ودول رواتبهم نقدر نقول اوك لكن بالنسبة للحياة في الكويت هتلاقي نص المرتب اقساط سيارة وايجار واجهزة وماشي والحال وفي الاخر اهم عايشين حياة كريمة

وفيه النكبة الكبيرة الشغل الخاص زي حراس الأمن تلاقيه استلف من هنا وهناك علشان يجي الكويت او دفع تحويشة عمره وفي الاخر يتصدم صدمة عمره لا هو عارف يقعد ولا عارف يرجع ولا شايف مستقبل قدامه

عن نفسي

راتب شهر واحد في الكويت بيعادل راتب اكتر من سنة ونص في مصر فطبيعي لازم اوافق وانا مغمض

والحقيقة مهنة التمريض لها احترامها ووكيانها هنا وانا بصراحة مالقيتش نفسي غير هنا

طبعا الحياة هنا غالية ومكلفة خصوصا لو مش متعود انك تحرم نفسك من حاجة وهتيجي اخر السنة هتلاقي نفسك معملتش اللي كنت بتفكر تعمله وهتقول معلش ان شاء الله قدام تعمل اللي انت عايزه

انا لما جيت الكويت كنت ببعت تقريبا كل الراتب واخلي مصاريفي الشخصية وهي بصراحة كتير مش شوية مصاريفي

السنة دي عملت فالح وقولت ابعت لهم مصاريفهم هما في مصر واجرب احوش كده مع نفسي صدقني والله ما حوشت اي حاجة غير ان كان علي دين بسيط في مصر سددته وان شاء الله مش ناوي اكرر العملة دي تاني

وكمان في نيتي لما اعمل اللي انا عايزه زي اي مصري بيسافر الخليج بيكون عايز شقة كويسة او بيت كويس

ان شاء الله هاجيب الاسرة كلها هنا ومش مهم اني احوش فلس واحد وانا عارف انهم هيحبوا هنا

[زعلان]

سيبك منهم يا عم دول بيحوشوا و على قلبهم قد كده

طبعا الناس بتختلف يعني في ناس دخلها الشهري بيعدي 6-7 الاف دولار (خلينا بالدولار علشان كل واحد يحول ويتمعنن) مش حنقول على الاكثر من كده في بيعدوا ال 10 بس ملناش دعوه بيهم ودول بره المقارنة سامع يا عم زوهيري

وفي ناس دخلها في حدود 3-4 الاف دولار

وفي ناس دخلها في حدود 2-3 الاف دولار

مش حنتكلم على الاقل من كده علشان برضه دول بره المقارنة

بمعنى ان في تراوح في الدخل بيبقى قدامه تراوح في عدد افراد الاسرة

انا طبعا متأكد ان في ناس كتير بتحوش كويس وفي ناس بتحوش بالمعقول بس مش كل الناس بتقدر

في اسر ممكن تكتفي بسيارة اقتصادية عادية جديدة و في ناس مظطرة يبقى عندها سيارتين واحدة منهم بتكون كبيرة الفورويل وده اغلب الي اعرفهم كده ومستوى انفاقهم يعتبر معقول ما بين فسح و اندية ومدارس الاولاد و السفر العادي لمصر ودول ممكن يحوشوا او ان بعضهم نفذ الي هو عايزه جاب بيت او فيلا او شقتين في مصر و عمل حساب مش بطال في البنك وبعدين قرر يستمتع اكثر بحياته او الزم نفسه بقرض كبير و اشترى بيه بيت في مصر علشان يجبر نفسه انه يحوش ده نموذج اعرفه لأنه مكنش بيعرف يحوش ومكنش قدامه غير الطريقة ده اغلب الناس حتلاقيهم مكبلين بديون قروض السيارات و القروض الشخصية وفي نموذج ما بيحبش نظام القروض فده بيتأخر في تحقيق اشياء في مصر بسبب التضخم

بالنسبة للفسح و السفر بتفرق من اسرة لأخرى حسب ما اتعودوا يعني في ناس بتحب تتفسح في مصر تروح شرم الشيخ الساحل الشمالي وبيحطوا ميزانية معقولة لذلك ومش بطالة

في ناس بتتفسح في اوروبا و شرق اسيا و بتحب السفر وده بيكلف كتير

اعرف صديق مدير مالي مرتبه كان بناهز ال10 الاف دولار شهريا كان من النوع الي بيحب السفر هو واسرته ورغم انه عدى الاربعين الا انه مكنش عمل اي مدخرات في مصر ولا اشترى حتى شقه وكل الي في جيبه دلوقتي 9500 جنيه

طبعا بتوع الاقتصاد الجامد هنا بعض الهنود و بعض الفلبينين مش كل الناس برضه بعضهم عنده اساليب غريبة للاقتصاد رغم تدني دخول هؤلاء البعض (لأن في هنود و فلبينين دخولهم عالية جدا طبعا )

المهم دول بقى ممكن تلاقي دخله في حدود الف الى الف و500 دولار بس تلاقيه عنده فيلا في بلده و فاتح شركة او مصنع هناك

كنت اعرف واحد تشوفه وهو لابس بدلته الوحيدة بتاعت المناسبات الي حتنفجر عليه و تفاجأ انه صاحب مصنع الماس في الهند

بعض هؤلاء بتلاقيه متقشف جدا في حياته يعني سيارة مستعملة حالتها حالة و سكن مشترك حتى لو اسرة و بالطبع بيحاولوا يخلصوا شغل خارجي يعين سمسار عربيات سمسار عمال من بلده وده هو وشطارته

[زعلان]

بالنسبة للمدارس وما ادراك ما المدارس هنا في الخليج حاتكلم عن الامارات اسعار ال KG

1- في مدارس حكومية بمصاريف معقولة في حدود الف دولار تقريبا (طبعا لها اشتراطات خاصة)

2- مدارس حكومةي نموذجية بمصاريف معقولة في حدود الفين دولار (ده بالواسطة والاشتراطات)

3- مدارس عربية خاصة بمصاريف تبدأ من الفين دولار وحتى 5 الاف دولار

4 - مدارس اجنبية - عالمية- خاصة وتنقسم حسب المنطقة يعني اذا في الشارقة حتكون في حدود 3-4 الاف دولار

5-اذا كانت المدرسة في دبي حتبدأ من 5 ألاف دولار وتصل الى 15 الف دولار

اما الحضانات في دبي فتبدأ من 6 الاف دولار على اقل تقدير ولو الحضانة كويسة لا تقل عن 9 الى 10 الاف دولار

[زعلان]

الخلاصة من كده انك لو حتشتغل في الخليج لازم يكون مرتبك محترم علشان تقدر تعيش -- يعني ايه مرتب محترم ده نتركها لتقديرك الشخصي

على فكرة المرتبات حاليا في مصر زيها زي الخليج يعني بتتراوح ما بين الفين دولار الى 10 الاف دولار عادي جدا و الارقام ده ما بقتش تخض

اعرف مدير موارد بشرية لشركة اجنبية في مصر مرتبه الشهري في حدود 20 الف دولار

مصر فيها فرص ممتازة برضه

بحسبة بسيطة الي بياخد في مصر 5 الاف جنيه مرتب لو عايز يجي الخليج لازم ياخد 15 الف درهم يعني يضرب مرتبه في مصر في 3 على الاقل علشان يجرب و يغامر

[الغريب]

شوف يايوزر يابني وجهة نظري ، هو أشمعنا أنا اللي مش هقول وجهة نظري ، بس هقولهالك ببساطة قوي

الخليج هنا زي شباك بيبص منه ناس كتير

واحد بيبص على السيارة وواحد بيبص على الأكل وواحد بيبص على المتعة والرحلات وواحد بيبص على مصر

كل واحد بدماغه ، فيه اللي بيحوش وفيه اللي بيصرف ، وفيه اللي بيحوش وينزل مصر يصرفهم ، وفيه اللي بيوازن بين التحويش والعيشة

كله موجود يايوزر وكل واحد بدماغه ومتقدرش تحط قاعدة عامة للناس كلهم

[the consultant]

التحويش موهبة . لو تعرف تحوش في مصر حتحوش في الخليج و العكس بالعكس .

يعني اللي عايز يحوش حيحوش من 1000 جنيه . لكن لو انت من الاساس كنت بتصرف كل ال 1000 جنيه في مصر يبقى حتصرف كل 5000 ريال/درهم او حتى دينار في الخليج. الادخار ثقافة. بالنسبة ليا انا و الحمد لله لا عندي ثقافة الادخار و لا عندي ثقافة الاستثمار و للاسف لما كنت في مصر بالرغم من ان دخلي كان الحمدلله كبير الا اني مكنتش بحوش و التالي لما جيت على السعودية على الدخل الاكبر و الله و لا مليم /هلله.

هي عيشة و لا اكتر أهم حاجة ما تحرمش اولادك و اسرتك من شئ و خاصة التعليم . تطلع ابنك كواليفيد (يعني تديله مفتاح سكة الفلوس)احسن من انك تسيبله فلوس.

يمكن مشكلتي ان انا جيت السعودية بعد ما اتجوزت و خلفت و جبت شقتي. يعني من النهاية كونت نفسي في مصر و بعدين سافرت.

و بالنسبة حضرتك للكاسيت الدبل و المروحة و البططاين والله انا شايفه انقرض بنسبة كبيرة و لو ان برده لا زالت نسبة موجودة.

[زعلان]

الناس الي ما بتحوش ده محيراني عايزين نفتح استطلاع سري يبين اوجه الانفاق للناس الي عايشه في الخليج يتضمن

1- نوع السكن

2-نوع الفسح

3-نوع مدارس الاولاد

4-نوع السفريات

5-العربيات

6- متوسط الدخل

علشان نشوف موضوع البطانية و الكاسيت

ولا هما بتوع المنتديات ناس مضروبة بجد ولوا كده مكنتش شفتهم في المنتديات

[doha]

الناس الي ما بتحوش ده محيراني عايزين نفتح استطلاع سري يبين اوجه الانفاق للناس الي عايشه في الخليج يتضمن

1- نوع السكن

2-نوع الفسح

3-نوع مدارس الاولاد

4-نوع السفريات

5-العربيات

6- متوسط الدخل

علشان نشوف موضوع البطانية و الكاسيت

ولا هما بتوع المنتديات ناس مضروبة بجد ولوا كده مكنتش شفتهم في المنتديات

في رايي المتواضع اكتر حاجه بتصرف فلوس في السعودية

السكن

التعليم

المواصلات

واخيرا ان ملكش حياه اجتماعية تقدر تقضي فيها وقت فراغك ـ ان وجد ـ وتقدر تلاقي نفسك فيها فبتتجه للبديل وهو التسوق او تحقيق قدر من الرفاهية لنفسك ولاسرتك فتلاقيك وبجانب تكرار ( التنزه ) في الاسواق حريص انك تجيب لنفسك موبايل غالي مثلا ولا بدله شيك ولا تحدث لابتوبك من وقت للتاني والستات تلاقيها عماله تجيب في اجهزه كهربائية ولا حاجات لشقتها في مصر الي يمكن مش ناوية تعيش فيها قبل عشر سنين من دلوقت وطبعا مش هتقدر تحرم عيالك من اي شيء ( تافه ) بيطلبوه يعني هتبقى حبسة وحرمان كمان لتفاجأ بعد كده ان الـ ( توافه ) الي بيصرفها ابنك او بنتك ممكن تتجاوز مرتب رب اسرة في مكان آخر من العالم

ربنا يعين ..

[Melhakim]

الشغل فى السعودية او الخليج فيه تحويش طبعا واللى يقول غير كده يبقى بيضحك على نفسه وبيضحك على غيره

بس هيا بتختلف نسبة التحويش من فرد لاخر

ومش شرط علشان الفرد يقدر يحوش انه يمسك على نفسه ويحرم نفسه من متع الحياة ويفضل رابط الحزام لحد ما يقضى فترة الحبس الاحتياطى فى الغربة وينزل يصرف اللى حوشه لا ممكن الواحد يحوش وفى نفس الوقت يعيش حياة طبيعيه جدا

[Mr MAGED]

بتهيألي ربنا ادي لكل واحد عقل يفكر بيه .... وقسم الارزاق بين البشر

وكتب لينا اننا نتغرب عشان ندور علي الرزق الحلال "هو الذي جعل لكم الأرض ذلولا فامشوا في مناكبها وكلوا من رزقه وإليه النشور"

وعشان العقل اللي ربنا ادهلنا ده لازم نستخدمه يبقي لازم كل واحد يعرف هو المفروض يعيش ازاي

"والذين إذا أنفقوا لم يسرفوا ولم يقتروا وكان بين ذلك قواما" ..... "وكلوا واشربوا ولا تسرفوا إنه لا يحب المسرفين" ... "ولا تغلل يدك إلى عنقك ولا تبسطها كل البسط فتقعد ملوما ً محسورا "

كل الأيات القرأنية دي وغيرها كتير بتوجهنا وبتعلمنا ازاي نعيش وازاي منحرمش نفسنا طالما ربنا رزقنا ... بس من غير سفه ولا اسراف ولا هبل

يعني مش معقول كل الردود اللي انا قريتها ان كله جاي الخليج او السعودية عشان بس يعيش !!!!! يا سلام ... طيب ما يخليه عايش في مصر بدل المرمطة والبهدلة وقلة القيمة

الموضوع اكيد بيختلف من شخص لشخص ... بس المفروض نبعد عن التقتير وكمان نبعد عن السفه.

ومظنش فعلا ان فيه حد في الخليج أو السعودية مش بيحوش مهما كان مستوي التحويش بتاعه .... لأنك ان شاء الله لما ترجع بلدك بعد عمر طويل ...

وأكيد قدرتك علي العمل هتكون قلت ... واولادك كبرت ... ومصاريفك زادت .... وأكيد الأسرة الكريمة متعودة علي مستوي عيشة معين ....

ساعتها ايه هيكون ردك علي ولادك لما يطلبوا منك !!!! ..... هتقلهم والله انا عيشتكم قبل كده خلاص !!!!

أكيد فيه حاجة غلط ... أنا هتكلم عن نفسي وعن غيري كتير أعرفهم ... الحمد لله عايشين عيشة كويسة جدا ً ... وبرضه بنحوش ... لا بنحرم نفسنا هنا ولا هنحرم ولادنا هناك

بس كل شيء لازم يكون بالعقل .. وعلي مستوي امكانياتك ... وزي ما بيقولوا في المثل .... علي قد لحافك مد رجليك

مع احترامي لكل الأخوة اللي علقوا ووضعوا ردود .... لو سيادتك جاي السعودية عشان اللي تقبضوا تصرفوا يبقي انت خالفت أمر ربنا ... وفرطت في حق أسرتك وأولادك

وأكيد ربنا هيحاسب كل واحد فينا علي مالنا ... من أين اكتسبناه وفيما أنفقناه

تحياتي

[the consultant]

بتهيألي ربنا ادي لكل واحد عقل يفكر بيه .... وقسم الارزاق بين البشر

وكتب لينا اننا نتغرب عشان ندور علي الرزق الحلال "هو الذي جعل لكم الأرض ذلولا فامشوا في مناكبها وكلوا من رزقه وإليه النشور"

وعشان العقل اللي ربنا ادهلنا ده لازم نستخدمه يبقي لازم كل واحد يعرف هو المفروض يعيش ازاي

"والذين إذا أنفقوا لم يسرفوا ولم يقتروا وكان بين ذلك قواما" ..... "وكلوا واشربوا ولا تسرفوا إنه لا يحب المسرفين" ... "ولا تغلل يدك إلى عنقك ولا تبسطها كل البسط فتقعد ملوما ً محسورا "

كل الأيات القرأنية دي وغيرها كتير بتوجهنا وبتعلمنا ازاي نعيش وازاي منحرمش نفسنا طالما ربنا رزقنا ... بس من غير سفه ولا اسراف ولا هبل

يعني مش معقول كل الردود اللي انا قريتها ان كله جاي الخليج او السعودية عشان بس يعيش !!!!! يا سلام ... طيب ما يخليه عايش في مصر بدل المرمطة والبهدلة وقلة القيمة

الموضوع اكيد بيختلف من شخص لشخص ... بس المفروض نبعد عن التقتير وكمان نبعد عن السفه.

ومظنش فعلا ان فيه حد في الخليج أو السعودية مش بيحوش مهما كان مستوي التحويش بتاعه .... لأنك ان شاء الله لما ترجع بلدك بعد عمر طويل

وأكيد قدرتك علي العمل هتكون قلت ... واولادك كبرت ... ومصاريفك زادت .... وأكيد الأسرة الكريمة متعودة علي مستوي عيشة معين ....

ساعتها ايه هيكون ردك علي ولادك لما يطلبوا منك !!!! ..... هتقلهم والله انا عيشتكم قبل كده خلاص !!!!

أكيد فيه حاجة غلط ... أنا هتكلم عن نفسي وعن غيري كتير أعرفهم ... الحمد لله عايشين عيشة كويسة جدا ً ... وبرضه بنحوش ... لا بنحرم نفسنا هنا ولا هنحرم ولادنا هناك

بس كل شيء لازم يكون بالعقل .. وعلي مستوي امكانياتك ... وزي ما بيقولوا في المثل .... علي قد لحافك مد رجليك

مع احترامي لكل الأخوة اللي علقوا ووضعوا ردود .... لو سيادتك جاي السعودية عشان اللي تقبضوا تصرفوا يبقي انت خالفت أمر ربنا ... وفرطت في حق أسرتك وأولادك

وأكيد ربنا هيحاسب كل واحد فينا علي مالنا ... من أين اكتسبناه وفيما أنفقناه

تحياتي

والله نسبة كبيرة جدا من اللي بيحوش او بمعنى اصح اللي واخد التحويش تارجت اساسي (مابيرجعش مصر اصلا) و الامثلة كتيييييييييييير (وممكن يرجع يعمل مشروع و يفشل او ميتاقلمش و يرجع يسافر تاني) و الناس اللي في المنتدى اللي اتولدت و كبرت و اشتغلت بره خير دليل.

المفهوم اختلف جدا/ حضرتك بتقول مش معقول ميحوش و كده بيخالف امر ربنا (ليه بس) هو انا عايش في اسرائيل يعني . انا عايش عيشه كويسه مناخ كويس تعليم كويس للاولاد و بكتسب خبرة كويسه و هي دي اللي تامن مستقبلي اكتر من مبلغ ممكن يتصرف في في وقت اقل من اللي قضيته في الغربه اصلا.

اللي عايز اقوله انا واحد من الناس اللي مش بتارجت الادخار تماما و مش معنى كده اني بصرف في تفاهات لا والله بس انا ممكن بدل محوش مثلا 60 الف ريال في السنه لا احطهم احسن في تعليم ولادي. بالاضافة اني اكيد مش حعيش نفسي في مستوى اقل مما كنت فيه في مصر لمجرد اني عايز احوش. فلوسي في قدراتي و قدرات اولادي وليست في البنوك.

يعني ياريت منعممش موضوع اني اللي مسافر لازم يكون رايح يحوش والا يعتبر مخالف للمنهج السليم أو بيغزي العين و هو على قلبه اد كدة زي الناس ما بتقول.

امثلتي كتيييييييييييييييييييييييير على اللي رايح يحوش يا بيعيش طول عمره في الخليج وولاده و مراته ينزلو مصر و يتشتتوا و يصبح مجرد اله طبع اموال و مصيبه لو العيال انحرفوا . يا بينزل بتحويشة العمر ويحاول يعمل مشروع و لا يستطيع التكيف ( ولا اعمم واكيد لكل قاعدة شواز) بس بقول النسبة الاكبر.

[عبير يونس]

اسمحوا لي يا إخواني أدلي بدلوي في هذا الموضوع

حيث إني مقيمة في السعودية منذ نعومة اظفاري

مع والدي ثم مع زوجي

المسألة مش سعودية و خليج

التحويش ده طبع و مهارة من المهارات التي تحتاج إلى صبر و تدريب

يعني ببساطة اللي يجيد التحويش حيحوش و هو في مصر و من غير ما حتى يسافر

و حتى مع سوء الأوضاع الاقتصادية

و اللي ميعرفش يحوش

لو كل يوم بيلاقي الجردل اللي مليان لتمة عينه فلوس (كما ذكرت لماضة باشا) فبرضه مش حيعرف يحوش

بس خلاص