حدث معي أثناء تمديد الزيارة العائلية

[Alattar]

طبعا زي ما اتعودنا هنا في السعودية

كل يوم بقرار جديد..

في البداية لما كنت أحب أمدد تأشيرة الزيارة..قالولي اشتري كوبون بقيمة 100 ريال

و ده تشتريه من أحد المكتبات اللي بتكون أمام الجوازات

و الكلام ده طبعا بعد ما كنت سددت ال 100 ريال عن طريق موقع الراجحي

لكن طبعا اشتريت الكوبون و استرديت ال 100 ريال من علي موقع الراجحي برضه

بعد كده غيروا النظام...قالوا..لازم تروح أي بنك و تطلع شيك لصالح مؤسسة النقد السعودي

بند تمديد تأشيرة زيارة..و فعلا طلعت الشيك..ومشيت الأمور و الحمد لله

كنت امبارح بحدد الزيارة تاني..لقيتهم لغوا نظام الشيك..و قالوا ممكن تسدد المبلغ

عن طريق أي صراف أو حتي عن طريق الانترنت.

أنا حبيت بس أنبه علي الأخوة اللي ان شاء الله عندهم تمديد زيارة اليومين دول

بالنسبة للرياض..تمديد الزيارة ما بقاش في جوازات الوافدين (الترحيلات) اللي في شارع الخزان

لأ..بقي في جوازات السعوديين اللي في حي المربع

و بالنسبة لتسديد الرسوم..أصبح عن طريق موقع الراجحي أو من أي صراف..و مش محتاج حتي الوصل

التسديد بيكون برقم دخول الحدود..و الموظف بيشوف التسديد من عنده.

اللي حصل معايا أنا بأه شيء غريب جدا..أنا زوجتي كده كملت معايا 8 شهور..و كان فيه هناك واحد برضه زوجته كملت 8 شهور

دخل علي الشباك قبلي..و لما خلص سألته..عملت ايه..قاللي الحمد لله مددت 3 شهور..يعني كده هتقعد معايا 11 شهر.

قلت بشرة خير..و دخلت بقلب جامد..لقيت الموظف بيقوللي روح دلوقتي احجزلها تذكرة سفر..و امضي علي التعهد ده..!!!

قلتله يعني هتمشي في خلال أد ايه؟؟..قاللي في خلال شهر...و مضيت علي تعهد بكده.

دخلت علي المدير بتاعهم و حاولت أتكلم معاه...قاللي زي ما الموظف قاللك اعمل.

المهم..رحت حجزت التذكرة و رجعت خد صور من التذكرة و دبسها مع التعهد اللي أنا مضيته و مع بقية الورق

و حط في الجواز ختم التمديد و معاه ختم مغادرة نهائية

العجيب في الموضوع..اني شفت اكتر من واحد من اللي كانوا معايا يومها

و تقريبا كل واحد عملوا معاه حاجة غير التاني.

فعلا..كل موظف ماشي بمزاجه0.

عموما حبيت بس أنبه علي اي واحد عنده زيارة عائلية و قربت من ال 9 شهور يعمل حسابه انه ممكن ما يمددش تاني

مع اني سمعت والله أعلم قبل كده..انها كانت ممكن تتمدد حتي سنة..بس بصراحة ده ما حصلش معايا في المرتين اللي عملت فيهم

الزيارة.

[wayfarerr]

احنا عندنا هنا بقه في المدينة المنورة اصعب شيء ممكن تعمله انك تمدد زيارة عائلية

بس الحمد لله ان زوجتي بقالها معايا 10 شهور اخر مره لما روحت امدد الضابط قالي روح احجزلها طيران ومشيها مافيش تمديد

جيبتله تقرير طبي فشنك كده المهم قالي يكفيك شهر ؟ حاولت معاه زياده قالي شهر بس

لما روحت للموظف قاللي امضي على تعهد بانك تمشيها بعد شهر

المهم اتكلمت معاه شوية وكان ابن حلال ومددلي 3 شهور وقالي اجري على برة من غير ماحد يشوفك