معى 3 جنيه و ربع... كيف أصبح رجل اعمال؟

[myusername]

السلام عليكم...

انا معاية 3 جنيه و ربع.. و أمنية حياتى انى اكون رجل اعمال..

عايز اعرف ابدأ منين؟ مع العلم إن ان شاء الله الشهر الجى هيجيلى 2 جنيه و نص عالاقل...

انا مايفرقش معاية انها تكون حاجة مضمونة... يعنى عندى استعداد للمخاطرة.. صحيح انا تعبت قوى علشان اجمع المبلغ ده.. بس انا عشمى فى ربنا كبير..

بعض الافكار المطروحة:

عربية كبدة

عربية سجق

عارفين البتاع اللى زى الدرة بس بيتشرب فى السعودية؟ فكرنا نعمل له عربية هو كمان.. و تبقى فكرة جديدة فى مصر

عربية فول..

اللى عنده افكار تانية يا ريت يقولها.. و النص بالنص :wub:

[doha]

مدام مفيش فلوس. . اشتغل بدراعك

[ذهبية]

لا انا هاقولك فكرة على قد امكانياتك الكبيرة دى احسن مشروع لك انك تشترى علبة بسكوت بالجملة ام البسكوتة بربع جنيهة

و تبعها انت بخمسين قرش بعنى هتكسب الضعف

اتفق انت كدة مع كام تلموذ ضغنن فى المدرسة يوزعوة على اصحابهم

لما بقى يجى لك الشهر الجاى 2 جنيهة عليك بقى تكبر التجارة و العلبة يبقوا اتنين

و هكذا لحد ما تحدد هدفك انك تجيب محل جنب المدرسة مين عارف يمكن الحلم يتحقق و تصبح صاحب مصنع بسكويت

[myusername]

مدام مفيش فلوس. . اشتغل بدراعك

مين قال ان مفيش فلوس؟ انا معايه 3 جنيه و ربع :P مين قال هات؟ wst::

حتة ع جنب كده (وش لماضة :wub: ) ثبت لى بالدليل القاطع... بغض النظر عن اذا الواحد معاه فلوس او لا... طالما ان فيه صحة و دماغ.. يقدر دايما انه يبدأ من اول و جديد.. و يوصل للى هو عايزه.

و اعتقد ان احد المشاكل الرئيسية اللى بتقابل الشباب فى بلدنا... انهم مش مؤمنين بكده.. او مش عارفين كده... و مفيش ثقافة الكفاح و العمل..

[myusername]

لا انا هاقولك فكرة على قد امكانياتك الكبيرة دى احسن مشروع لك انك تشترى علبة بسكوت بالجملة ام البسكوتة بربع جنيهة

و تبعها انت بخمسين قرش بعنى هتكسب الضعف

اتفق انت كدة مع كام تلموذ ضغنن فى المدرسة يوزعوة على اصحابهم

لما بقى يجى لك الشهر الجاى 2 جنيهة عليك بقى تكبر التجارة و العلبة يبقوا اتنين

و هكذا لحد ما تحدد هدفك انك تجيب محل جنب المدرسة مين عارف يمكن الحلم يتحقق و تصبح صاحب مصنع بسكويت

يا حلاوة يا ولاد wst::

ذهبية.. انتى مش ذهبية.. انتى منجم ذهب بحاله

تصدقى و تؤمنى بايه؟ و انا صغير عملت حاجة مشابهة... و ساعتها كسبت يجى 100 جنيه كده.. و كانت ثروة بالنسبة لى.. لانى حققتهم من اصل 10 جنيه فى فترة صغيرة..

كان فيه محل فاتح جنبينا.. و فيه حاجات قليلة.. قمت انا اقترحت عالراجل صاحب المحل اجيب له علبة بسكويت.. و احطهاله فى المحل علشان يزود بضاعته :P و آخد انا ال3 تربع و هو الربع من المكسب الصافى :wub: و دارت البلية... بس لما الفلوس وصلت 100 جنيه حليت فى عينيه و قلت مش لاعب smk:

تم تعديل 17 مايو 2010 بواسطة myusername

[MZohairy]

تجيب محل جنب المدرسة مين عارف يمكن الحلم يتحقق و تصبح صاحب مصنع بسكويت

او صاحب المدرسه

[Mr MAGED]

طب وكلف نفسك ليه كده

أكيد الحيتان اللي في السوق مش هسيبوك فحالك

انت حطهم في البنك يستثمرهملك أحسن

مش كده ولا ايه

[اغابي]

اعمل زى مسلسل عائلة شلش - اللى كان بيجي زمان

بنته فى الجامعة ابتدت بكام سندوتش وكانت بتخبى بترمانات المخلل تحت سرير اوضة نومها

وتروح الجامعة هى وهانى عوض ويعملو سندوتشات للعيال فى الجامعة وكل حاجة كانت بتعملها بنفسها علشان التكلفة تبقي اقل

وجملتها المشهورة ( قطيعة محدش بياكلها بالساهل wst:: )

الكفــــــــــــاح مع شوية تشغيل دماغ هو الحـــــــــل

ماتنساش ان رجل الاعمال البريطاني محمد الفايد صاحب سلسلة محلات هارودز

لما ابتدا حياته كان بيبيع على عربية تتجر باليد - حبة مشاط ومشابك وبنس شعر ويلف كورنيش اسكندرية .

اغابي

[ابو محمد بن مصطفي]

مدام انت حاسس انهم ثروة

اذن فعليك بالمكان المناسب الذي يناسب الثلاثة جنيهات والنصف

اكيد السوق

انزل تاجر بيهم وتعالي مع نهاية اليوم وقلنا بقي معاك كام

دي نظرية اقتصادية بحته

اكيد المبلغ مش كبير ويستحق المغابرة فغامر ليه لا

ثلاثة جنية ونصف دول رأس مال عامل شوف سرعة دورنهم هتبقي كل اد ايه

هقولك فكرة

تجيب نص كيلو كنافة شعر 2.5 جنية وربع كيلو سكر 1 جنية

وربع جنية فانيليا (خلية بالاجل يعني حاسب الراجل في نهاية اليوم)

التسوية في الفرن 1 جنية (بالاجل برده)

وقطع الصنية الي قطع صغيرة ممكن 35 قطعة

وبيع الحتة بربع جنية امام اي مدرسة

الايام دي امتحانات يعني مش هتلاحأ

متنساش المكسب بالنص

يجعل صباحك كنافة

[لماضة مصرية جدا]

السلام عليكم...

انا معاية 3 جنيه و ربع.. و أمنية حياتى انى اكون رجل اعمال..

عايز اعرف ابدأ منين؟ مع العلم إن ان شاء الله الشهر الجى هيجيلى 2 جنيه و نص عالاقل...

انا مايفرقش معاية انها تكون حاجة مضمونة... يعنى عندى استعداد للمخاطرة.. صحيح انا تعبت قوى علشان اجمع المبلغ ده.. بس انا عشمى فى ربنا كبير..

بعض الافكار المطروحة:

عربية كبدة

عربية سجق

عارفين البتاع اللى زى الدرة بس بيتشرب فى السعودية؟ فكرنا نعمل له عربية هو كمان.. و تبقى فكرة جديدة فى مصر

عربية فول..

اللى عنده افكار تانية يا ريت يقولها.. و النص بالنص

السلام عليكم و رحمة الله و بركاته

عجبااااااااني اوي انا بقي الكلمة اللي فوق دي....طب يا خويا اديني امارة عليها

طب انا مش خايفة من المخاطرة ع ال 3 جنيه....انا خايفة ع الربع جنيه بصراحة.....لاني قعدت اقلبها في دماغي و اقول يا ربي ده بكرة يبقي عملة اثرية و نحطه مع المليم الاحمر....و خايفة اخونا يخاطر بيها و يضيع ع نفسه الفرصة الل زي دي

بس برضه خوووووووود جرعة تفاؤل كده

انا متباشرة فيك خير

مش عارفة ليه افتكرت مسلسل "سنبل و المليون"

هيديك افكار في الجووووووووووووووووون

فوتك بعافية

صبااااااااااااااااااااحك ربع جنيه.......... wst::

سؤال ع جنب بقي

ايه البتاع اللي زي الدرة....اللي قولت عليه فووووووووق...يكونشي قصدك حلبسة...!!!!

تم تعديل 18 مايو 2010 بواسطة لماضة مصرية جدا

[fatfouta]

انت تااااااااانى يا يوزر؟؟

بص هو احسن حاجة اللى ذهبية قلته

كان زمان عندنا واحد بيقعد ادام بيته كده بيبيع حلويات وبسكويت والله كان بيكسب

بص بقى انت تجيب قفص......عارف القفص؟؟؟ بتاع الفراخ ده ايوووووه هو ده

وتغطيه بحاجة مثلا ملايه قديمة ولا اى حاجة

وتحطه ادام البيت وتطلع على اى واحد من بتوع الحلويات والبسكويتات الجمله وتديله المبلغ اللى معاك وتقوله هديلك الباقى لما المشروع يمشى معايا

وتاخد منه ايه بقى......كرتونة كراتيه اللى هو اهلاوى ده مش اى حاجة و كرتونة لبان من اللى هو ابو عسل ده و علبه بسكوت لوكس

وبعدين ترجع للقفص تحطهم عليه وتقعد ورا القفص

هتلاقى الزباين جتلك تشترى والعيال الصغيرة بالذات.....بس خد بالك من العيال اللى بتخطف وتجرى

وان شاء الله الرجل هتمشى عالقفص....قصدى على مشروعك وشوية شوية يبقى كشك وهكذا وممكن يوصل لمحل كمان

بس ايااااااااااك والسجاير الفرط.....ماشى؟؟؟

وبالتوفيق ان شاء الله

الايقونة بتاعتك اللى دايما بتحطهالى wst::

ربنا معاك

تم تعديل 18 مايو 2010 بواسطة fatfouta

[fatfouta]

اه صحيح نسيت اقولك على حاجة

لو المشروع اللى انا قولتلك عليه ده مشى.......ممكن شوية ادام تبقى تجيب بقى ايه؟؟ تلاجه آزوزة وتبيع كمان حاجة ساقعة

وهتبقى فل قوى ان شاء الله

ومش هقولك تانى...... اوعى تبيع سجاير فرط

واى خدعة انت بس تؤمر يا يوزر wst::

[ssmaly]

3 جنيه وربع مرة واحدة؟

والله مصر فيها فلوس وبيقولوا بلد فقيرة

انا عمال افكر ايه المشروع الكبير اللى ممكن يتحمل المبلغ ده

تشترى عبارة وتمشيها خط جدة السويس بالنفر؟

ولا تعمل فكرة التاكسى الطائر

تجيب طايرة صغيرة كدة مثلا هونداى اكسنت وتدهنها ابيض فى اسود( اذا كنت فى القاهرة وعلى السادة خارج القاهرة مراعة فروق الالوان)

وتشغلها العتبه الكتكات بس بالعداد

او ممكن (ودى بجد)تبنى قرية سياحية

بجد مش هزار

ازاى

اقولك انا ازاى

شوفلك واحد من الواصلين يعطيك ارض تخصيص سعر الفدان جنيه واحد تاخد عشرة افدنة تدفع عشرة فى المية (جنيه واحد) تجيب ورق فلوسكاب باتنين جنيه وقلم بربع جنيه وتكتب اعلانات فيلا بالتقسيط ادفع عشرة الاف جنيه والباقى بالتقسيط تلم فلوس تبنى القرية السياحة وتكسب دهب(بس ابقى افتكرنى بفيلا هدية لاخوك حبيبك)

[sarmar]

مدام مفيش فلوس. . اشتغل بدراعك

ماشاء اللة على الافكار انت ياولدى عندك بنك افكار شغال لحسابك من جميع الاخوة والاخوات واللى عدا وفات

لكن صراحة وبجد الجد لفت نطرى رد الاخت المحترمة ضحى وكمان لفت نظرى ردك انت عليها وكانت عابرة ولم يركز عليها احد على الرغم انها بيت القصيد

وعندما قالت الاخت ضحى اشتغل بدراعك هذة العبارة اذا وضعتها كشعار فى مصر لن نحتاج الى وزارة قوة عاطلة اقصد عاملة

احنا عرفنا من زمان حتى والان ان ليس المال وحدة هو الذى يتيح لك ان تتحول الا رجل اعمال ابدا انما ماقالتة الاستاذة ضحى اشتغل بدراعك اشتغل بس انت اشتغل مش لازم يكون الشغل على مكتب ولا زم يكون الشغل فى مكان مليان معطر جو وناس حلوة داخلة وخارجة

انها دعوة لكل اولادنا الشباب ان لايعتمد الا على نفسة ( دراعة وعقلة وضميرة وصحتة ) هذة هى عوامل الانتاج الذى حددها اسمو اية دة ادم سميث حين حدد قال اول شىء هو الانسان والاستاذة ضحى قالت بتحضر او باختصار شوية دراعك اعتمد علية

ممكن احد الاخوة الافاضل يقوللى خد الدراع دى وادينى شقة فى شبرا ؟؟

من دراعك ممكن تاخد شقة فى التجمع وشبرا وكل مكان ابسط مثال وهذة حيلة ذوى الاحتياجات الخاصة انك تجيب مشروع القفص مثلا بتاع مدام فتفوتة ولا مدام ذهبية ومدام اغابى ايضا وابو محمد لكن بدراعك وانت شاب وبصحتك واذا صدقت النوايا الشخصية منك سوف تجد الفرص الكثيرة لكى تصبح يوزر عز

كلامى مش نظرى ولا كلام دردشة وخلاص ولكن انا طبقتة على نفسى وكنت شابا فقيرا جدا جدا لااملك اى شىء وانتظرت بعد التخرج من الجامعة قطار التعيين سنين وسنين وانا نايم وعندما قررت انا اعتمد على دراعى

ربنا وفقنى والحمد للة بس اعتمد على دراعك وتفكيرك وعقلك وصحتك ولن تندم

[sarmar]

اسف يااستاذ يوزر الاعتماد اولا واخيرا على اللة سبحانة وتعالى ثم على نفسك

استغفر الله العظيم

[الغريب]

لسه قاري مشاركة جميلة لسي السيد مفادها

ممكن يكون عندك فلوس كتيير ومتقدرش تستفيد بيها وهتحب تشارك واحد لأنه عنده عقل كويس وأفكار رائعة

أنت عندك بردو رأس مال متستهونش بيه wst::

[Diab]

يعني معاك 3 جنيه وربع وعاوز كمان تبقي غني أكتر من كدة

ايه الافترا ده

[om marawan]

طب هأقولك على حاجة بجد

انت تصرف الفلوس دى على التعليم

اه والله تاخد بيهم شهادة محترمة فى تخصصك بس فى فرع متخصص يعنى وتكون شهادة غالية

وعليها وتدور على شغل بيها هتلاقى نفسك بتاخد مرتب أضعاف اللى كنت بتاخده

تقدر بعد كام سنة تفتح شغل حر زى مانت عاوز وممكن يكون برضه جنب شغلك على فكرة معظم المديرين فى الشركات الكبيرة لهم شغل خاص

عشان لو فى يوم الشركة استغنت عن خدماتك يكون قفص البسكوت موجود تقوم تاخد التعويض بتاع الشركة وتشترى صندوق الحاجة الساقعة ولوحين التلج وتوسع الشغل

[fatfouta]

عشان لو فى يوم الشركة استغنت عن خدماتك يكون قفص البسكوت موجود تقوم تاخد التعويض بتاع الشركة وتشترى صندوق الحاجة الساقعة ولوحين التلج وتوسع الشغل

دودى يا حبيبتى انتى معايا فى فكرة القفص برضو؟؟؟

مش عارفة يوزر غاب ليه!!!!!!1

خايفة لا يكون اخد التلاتة جنيه وربع وهرب بيهم.....ربنا يستر

[مغتربة]

3 جنيه و ربع بحالهم

احنا معانا فى المحاورات على كده مليونيرات و احنا مش عارفين

عموما يا سيدى ال3 جنيه و الربع برضه مش قليلين

و تقدر تعمل بيهم مشروع محترم

اقولك ازاى

انت ممكن تشترى بيهم مناديل كلينكس و تنزل تبعها فى الاشارات

و الاشيه هتبقى معدن

على جنب بقى

الانترنت دلوقتى خلا كل انسان ممكن يشتغل و يكسب بدون اى راسمال اللهم الا اشتراك الانترنت و فاتوره الكهرباء

و شغل على تقيل بجد

يعنى مثلا ممكن تشترى بضاعه من على النت و تبعها للناس

و انت مش هتشترى و تدفع الفلوس الا لما الاول تجمع الطلبيه

و كل المطلوب منك انك تكون مشترك فى كذا منتدى عدد اعضاؤه كبير و تعمل دعايه لبضاعتك فيه بشكل مشوق

كمان فى مواقع على النت بتيح لك انك تبيع قبل ما تشترى

بمعنى انها لا تطالبك بتمن المنتج الا بعد بيعه و تقوم هى بالتوصيل لعنوان المشترى دايركت و تحصل منه التمن و تديلك نصيبك منه

كمان ممكن تشتغل كوسيط فى سلع كتيره جدا اساسيه و تعثر على البائع و المشترى ايضا من المواقع المختلفه

فى افكار كتير جدا

بس للى ياخدها بجد

و فى الاخر لكل مجتهد نصيب

تحياتى