تليفون كوول

[kfaya]

لو اتصل تونى ب جو بعد فضيحة الاعتداءات الجسدية والجنسية

على الاسرى العراقيين .... هل ممكن أن يدور هذا الحوار

تونى : مساء الخير مستر بريزيدنت .....

اية اللى حصل عندك دة ؟؟؟؟؟ معقولة اللى طلع فى ال TV دة

جو : مساء الخير مستر بريم منستر .....

و اللة انا فى شوك من امبارح لغاية دلوقتى .... مش قادر اتلم على

نفسى ..... دا انا لسة امبارح مزنوق 3 ساعات أنا و دك قدام لجنة

الكونجرس فى المكتب البيضاوى وهاتك يا سين و جيم لما أتعصرنا و

لولاش انهم عشرة , خمسة جمهوريين تبعنا و الخمسة التانيين

ديموقراطيين أخوك دك لعب لعبتة وكان لة يد فى اختيارهم كنا

رحنا بلاش ... أل اية كان فية اهمال ايام نين الفين ...... لكن نفدنا

منها زى الشعرة من العجين .. و لسة عاملين بارتى على الضيق نحتفل

بية , الا و نصطبح النهاردة على الكارثة دى ...

تونى : ازاى المخابرات عندك ما خدتش خبر ان ال C B S ناوية تعمل

العملة دى ؟؟؟؟؟ مش معقول دا انا طول النهار عمال ارئع وراك

المهم يا جو لازم حالا تطلع على ال TV و تشجب بقوة و تقول انك

دسجستنج على الاخر من اللى حصل

جو : حاضر

تونى : كلم كوفى ينزل كلمتين استنكار عشان يغلوش شوية ......

جو : حاضر

تونى : قول كمان انك هتعمل كود مارشل للمارينز و المارينزات دول

جو : حاضر

تونى : اما انا فورا هعمل برس كونفرس و أدين و اشجب و

استنكر ......

جو : حاضر

تونى : الحمد للة ان اخوانا محدش واخد بالة و كلهم ملهيين بحكاية تونس

دى و الفيلم الهندى اللى انت حطيتهلهم فى الفيديو و كلهم ضاربين

اخماس فى اسداس هيصلحوا و لا نصلح احنا ..... الا بالمناسبة هما

اتفقوا هيعملوة فين ولا لسة ؟ ؟ ؟ ؟ !!!!!!!

جو : لسسة ....... المشاورات شغالة , انا متابع الموضوع كويس و مربط

مع باول ...... انت عارف من كام شهر هو لف لفة فى دول

الشمال الافريقى و مفيش اى حاجة هتتم من غير ما نؤل عليها او

كية ..... متخافش ....... ..

تونى : انا بصراحة ابتديت اقلق منك .... عمال تخرج من حفرة تنزل فى

دحديرة ...... منظرك وحش قوى و انت خارج من الفلوجة بعد ما

خسرتلك ييجى 150 قتيل وييجى 2000 جريح ...... الا انت أصلا

دخلت هناك لية ؟ ؟

جو : انت نسيت يا تونى ..... عشان الاربعة امريكان سيفليان اللى اتأتلوا

و اتسحلوا هناك و دة طبعا مخالف لمعاهدة جنييف اللى بتمنع

التمثيل بالجثث زى ما انت عارف .......... ..

تونى : أيوة ايوة خلاص افتكرت .... بالمناسبة يا جو بلاش تكرر كلمة

جنييف دى كتير اليومين دول لغاية الحكاية ما تتنسى شوية .......

أنت قرأت اعترافات اللوتانت لوسى ولا لسة ؟؟

جو : ايوة

تونى : هى قالت جابت كهربا منيين ؟؟؟ عندنا أزمة فظيعة فى البطاريات

فى البصرة !!!!! كل طلبية استعواض اسلحة تلائيها مليانة

بطاريات .... مش فاهم ؟؟؟ ظاهرة غريبة !!!!!!

جو : أنا عندى أفكار بخصوص الموضوع دة ... للمستقبل يعنى

تونى : خير ...... قول

جو : احنا نعمل حملات تفتيش على كل قوات التحالف , فرش متاع يعنى

و هوب نروح مصادرين كل الكاميرات اللى هنلائيها .... اية رأيك ؟؟؟

تونى : اي التخريف دة ....... مش معقول انت بتتكلم جد !!!!! لما عملية

صغيرة الدنيا كلها عرفت بيها و سيرتنا على كل لسان .. ادى

بتوع حجوج الانسان ادى بتوع جنييف !!!! عملية بالحجم اللى انت

بتقترحة دة هتثير متاعب كتير جدا ....... ثم كل قوات التحالف

بياخدوا كميات صور مهولة عشان يعلقوها فى بيوتهم لما يرجعوا

جو : انا تحسبت للنقطة دى و هربط مع هوليوود نعمل لوكيشن شبية

لمدن عراقية و القوات وهى راجعة تنزل هناك الاول تتصور زى

ما هى عايزة و بعدين يروحوا ........

تونى : اية الافكار الشاذة دى ..... انت مش عارف ان مواعيد عودة

القوات بتكون معلنة ؟؟؟؟ عشان المديا و البرس و الجو العام بتاع

البلد يكون فية شوية بهجة ..... و نصور كل واحد راجع يحضن

الجرل فرند بتاعتة او أسرتة لو كان متزوج او جوزة لو برضة كان

متجوزة !!!!!! ألا قولى يا جو انت مشيت جواز المثل فى كام ولاية

لغاية دلوقتى ؟؟؟؟

جو : و النبى انت رايق يا تونى , جواز مثل اية دلوئتى دا انا أعصابى

زى الزفت .. . الجماعة بتوع التحالف عمالين يبتزونى كل ما يلؤونى

وائع فى بلوة خصوصا بعد ساباتيرو ما قال انا منسحب من التحالف

... و رجع بالكام عسكرى بتوعة ..... دا انا و باول عملنا مجهود

جبار عشان بقية الدول متنسحبش ...... الليلة كانت حتبوظ و رجعنا

رشينا رشة جريئة تانى على كل الدول حتا انا اتطريت أتدخل

بنفسى مع بعض الزعماء و اللى يقولى نفسى اجى اتصور معاك فى

البيت الابيض و اللى يقو لى نفسى اشوف مزرعتك فى تكساس

...... استغلال ما حصلش يا تونى , تصدق ان ال 80 مليار اللى

اختهم من الكونجرس بخلع الدرس من كام شهر قربوا يخلصوا

وعمال ارسم دلوئتى على 50 كمان .. الدنيا غلا نار يا تونى يا

خويا .........

تونى : عن أزنك خمسة يا مستر بؤيزيدنت و راجعلك تانى ......

جو : او كية واتيينج ........

[الأفوكاتو]

براقو كفاية, بس ده مش كفاية,

نريد المزيد

fsh:: fsh:: fsh::

[kfaya]

تأمرنى يا أفوكاتو .........

أسمع المكالمة دى و قولى رأيك ........

[kfaya]

تونى : سورى يا جو أنا أتأخرت عليك شوية ...... الموضوع اللى اتفتح عندك دة

عاملى مشاكل الدنيا و يبدو واللة اعلم ان فية بريطانيين هيطلعوا متورطين

فى حكاية مماثلة ..... ماهو مش معقولة كمية البطاريات الفظيعة دى تكون

رايحة للعربيات بس ... انا قلبى كان متوغوش .....

جو : قلبى عندك .... دا احنا ما لناش غير بعض ..... على العموم كويس انك

امبارح أول ريدى شجبت و استنكرت ..... دة يريح الحكاية شوية بالنسبة لك

تونى : انا مفروس فرسة من جماعة ال CBS دول ...... يعنى مخابراتك دى نايمة

على ودانها .... ازاى يعنى ما شموش ريحة الطبخة اللى بتترقدلك دى ....

هما أصحابها مش تبع اللوبى اياة ولا اية ؟؟؟؟؟ موضوع زى دة لو حصل

مع ناس عندهم شوية قوة ولا كرامة كانوا شقلبوا الدنيا و طيروك من

الانتخابات الجاية ... حظك بمب يا جو ......

جو : ربنا أعلم انا كنت خايف اد اية .....

تونى : لازم تكلم اريال و تشد علية شوية ....... مش معقولة سايبنا واحلانين و

عمال يعملك استفتاءات و نيلات ....... ما هو خد اللى كان عاوزة و زيادة

.... دا انتة لسة ماضيلة بتوقيعك على تعهد يبلع بية ييجى نص الضفة و

مفيش حد يرجع وايشى بحر و ايشى جو و ايشى سور ...... يا جو اريال

لازم يتحرك و يفتح عينية .... امال بس عامل نفسة ملك المديا و ممرمطنا

وراة و عامالين نرئع على مصايبة مرة بالفيتو و مرة بالجوابات ..... يا جو

لازم لازم لازم ......

جو : حاضر حكلمة تانى دلوقتى ...... دة هو لسة قافل معايا السكة من شوية

كان عمال يشتكيلى من الابراهيمى اللى فاضحة فى كل حتة وبيقول ان سياستة

المسمومة هى سبب تعكير الجو فى المنطقة كلها ... و كان عايز اذن

عشان يسيب علية الانتى سام ميديا بتاعتة .... طبعا انا لحقتة و قلتلة ابلعها

مؤقتا يا اريال .... انا محتاج الراجل دة جدا ..... هو اللى فى ايدة يظبط كل

حاجة , اشى مجلس حكم و اشى مؤقت و ايشى انتقالية و دلوقتى

طلعولى فى حاجة اسمها مجلس تنفيذى يا تونى الراجل دة خطير جدا جدا

و هو الوحيد اللى فاهم الفولة على الاقل حافظ اسامى الحاجات دى .... انا

حاسس ان اللعبة كبيرة علية ... دى حتة كبيرة عليا ... يس هو عايز يشيل

يا اللة بالسلامة !!! و ان باظت يلبسها هو و عنان ..... وان طابت , ساعتها

اسيب علية اريال يقطعة و يطلعة انتى سام و يدمرة ...... و أدخل انا الم

الكتاكيت ... انتة فاهمنى يا تونى ... أرجوك ركز معايا يا تونى ..... البرتيتة

سخنت على الاخر و الكو الاخرانى فية الصولد بتاع السهرة كلها .... اللى

هيلمة هيألع العالم كلها الساعات ...... ركز معايا يا تونى ركز ركز ركز ....

و انا اوعدك ان موضوع ابو غريب دة مش هيتكرر ..............................

تونى : أجرىى .... جود نايت مستر بريذي د نت ....

جو : جود نايت مستر بريم منستر ......

[الأفوكاتو]

الحق يا سى السيد,

هناك منافس جديد يحاول إنتزاع كأس خفة الدم منك.

كنت سأطلب المزيد, و لكنى سأستأنف غدا بقية رحلتى, و سأحاول إختلاس بعض الوقت لمتابعة التصنت على محادثات جو و تونى التليفونية.

[kfaya]

معقولة الزنبة دى يا متر !!!!!!

دا انا لسة داخل فى تحالف قوى جدا مع حبيبى و أخويا سى السيد ...... تقوم أنت مألئة منى و تقول انا داخل انافسة ؟؟؟ بالذمة و النبى أش جاب لجاب !!!

دا أنا لسة يادوبك مبتدء فى النتات و س س لسة متبنينى و وعدنى يخلينى استاذ منتدايات .... تقوم انت عامل العملة دى و مسخنة عليا ؟؟ !! و كمان بالسلامة مسافر طب كنت تستنى شوية لما تخلصنى من ايدية ..... حرام عليك دا انا لسا مظبط معاة و قايلة يجيرنى من عسف الادارة ...... أهو كدة هيجرجرنى من قفايا و يرمينى برا السرفر خالص ...

طب بالسلامة أنت بقى يا متر ..... و أنا هصلح الجو مع س.س. و أدخل قلبة تانى !!!!!!!

[الأفوكاتو]

عزيزى كفاية,

لحسن حظى أن أطل قبل سفرى على المنتدى, و أقرا مداخلتك.

و أحب أن أطمئنك أنى أتركك فى أيدى أمينة, ف سى السيد صديق عزيز, و أخ كريم, و سوف يتولاك بالعناية, و يجعل منك مشرفا, و ربما وزيرا, فى يوم من الأيام.

لذا, لا تقكر مطلقا بأنى خذلتك, أو فرقعتك, أو أى من هذه التعريفات.

أنا أرى لك مستقبلا متفتحا, و ربنا يعطيك أنت , و ابو السيد الصحة و العافية لتقودوا المنتدى نحو مجتمع أفضل..... آمين

[se_ Elsyed]

الحق يا سى السيد,

هناك منافس جديد يحاول إنتزاع كأس خفة الدم منك

س س دائماً عودنا بإنه بيتبنى المواهب الشابة وينتشلها من الوحل ويلمعها ويحميها ويقدمها للمجتمع ..

عندكوا مثلاً حشيش ولانسلوت ولينوكس ونيرون وأفيونة وموديست وسكوربيون - ربنا يفك سجنه - .. شوفوا كانوا إيه قبل ما يدخلوا المنتدى ما شاء الله بقوا دلوقت نجوم مجتمع ورجال صالونات - مش حلاقين - .

سر يا كفاية يابني على بركة الله وتأكد إن انفاسي ستلاحقك أينما ذهبت .

[kfaya]

لا و النبى بلاش حكاية أنفاسك دى اللى ناوى تلاحقنى بيها .....

دى بتفكرنى بكلمة " ملاحقات أمنية " اللى بيستعملها بتوع المباحث و

و مديرين المنتديات .....

انا بكرهها الكلمة دى ...

أنت كمان عايز تلاحقنى ؟ ؟ ؟ هو الواحد هيلاحق على مين ولا

مين ....

ألاولاد ملاحقينى بفلوس الدروس و أمهم بتلاحقنى بالزفت المحمول لحسن

ألعب بديلى ( بلا نيلة ) و مديرى ملاحقنى بالملفات و يقولى خدهم معاك

البيت خلصهم أل يعنى بيتكرم عليا .... و هكذا يعنى ..... ملاحقات

ورا بعضيها طول النهار .........

و انت كمان عايز تلاحقنى ؟؟؟؟؟؟؟؟؟؟؟؟؟؟ !!!!!!!!!!!!!

و بعدين أحنا أصلا معندناش أوضة صالون ف انا منفعش أكون نجم

صالونات ....... أما الامثلة اللى انت ذكرتها فمنهم مثلا ....

حشيش أخويا اتهرى كروت من كل لون ..... و نيرون هرشنى من اول

سطرين .. لينكس كان معزل بس ملقاش عربية نص نقل يشيل فيها

العفش بتاعة ...... و سكوربيون فى التخشبية .. .. و ما خفى كان أعظم

وكمان و النبى بلاها كلمة أنفاسك دى ...... أديك شوفت اللى حصل فى ألنخيلة

و فى كفر عبد الرسول ألحكومة بهدلت الدنيا و المدراعات كانت عمالة

تلف ليل نهار و طالع منها صوت البط و الوز ......

خلينى بعيد عنك أحسن , و مستعد أخدك شعر و دئن أنت وكل صحابك .....

[kfaya]

جو : بتعمل اية يا باول .... ما تجيلى شوية ...

باول : عايزنى ضرورى ؟؟ انا قاعد مع الناس بتوعى بنراجع اخر

الأخبار ......

جو : طب فية اية ؟ ؟ طمنى و النبى

باول : عمالين ننيم فى الموضوع ونضغط عشان التحقيقات تكون سرية

دى فضايح تشيييب يا فندم اللى عاملاها قوات التحالف

هناك دى ..... على فكرة كلنا لازم نستعمل مصطلح قوات التحالف

فى الموضوع دة يعنى عشان الموضوع يشيع و مايلزقش فينا لوحدنا ..

جو : دك أول واحد تنبة للنقطة دى و كان لة يد كبيرة فى دخول البريطانيين

جوة اللعبة و اهم بيحاكموهم هناك زينا و مفيش حد أحسن من حد ...

و كلها كام يوم ويدخل معانا عساكر طليان و اسبان كانوا بيعملوا الحاجات

الوسخة دى فى سجون تانية ..... الواد دك دة عفريت ... و ايدة سخية ....

باول : على العموم احنا لغاية دلوقتى مسيطرين على الموقف و هنخلى الحكاية

ترسى على كام سنة سجن لكل واحد و خلاص .... دفعنا بالهبل يا مستر

برزيدنت ...... ألا مالكش سكة مع منظمة العفو الدولية دى ؟ ؟

جو : هى دى تبع اليونسكو ؟ ؟ دول لسة من كام شهر لهفين منى

كام مليون .. تبرع يعنى , و مسز لورا عملت خطبة عندهم فى جنيف , أصلنا كنا

متخانقين معاهم و مقاطعينهم من ييجى 20 سنة برضوا عشان حركات زى دى ..

باول : لأ دى غير دى خالص !!!! دوكها بتاعة الثقافة و المتاحف .... منظمة العفو

الدولية دى منظمة أهلية غير حكومية و مش تبع الأمم المتحدة خالص ودى

بتحقق فى الجرائم ضد الأنسانية بمعرفة الحكومات و بتفضح الممارسات دى

و مقرها لندن و عايشة على التبرعات .... ممكن سعادتك تكلم تونى يشوف

أى سكة معاهم ......

جو : حاضر هكلمة ..... فية حاجة تانى ...

باول : شوية جمعيات صغيرة من بتوع حقوق الانسان فى مصر بيرغوا شوية ..

جو : انسان اية و جمعيات اية ؟؟؟؟ ومصر اية ؟؟؟ قولى يا باول قولى

باول : ما تخافش كدة دول تبعنا و أحنا اللى طالبنا بيهم و كمان ربطنا

المساعدات بتكوين شوية الجمعيات دول ..... وأخرهم اللى ماسكها

بيتر بيتر غالى .....

جو : مش دة اللى كان ماسك ال يو ان

باول : ايوا يا فندم

جو : كلمة يا باول لازم تكلمة ..... هوا أبويا اللى مشاة من ال يو ان ؟؟؟؟

باول : لأ يا فندم دا كلينتون .....

جو : طب امال اية ؟ ؟ ؟ يمكن عايز يرجع يمسكها تانى ؟ ؟ ؟

باول : مش معقول يا فندم دا راجل صعيدى و مخة قفل .... سعادتك فاكر

موضوع قانا ؟ ؟

جو : ايوة طبعا مش دة الحاخام اللى واحد فلسطينى قتلة من كام سنة

هنا فى نيويورك ؟ ؟ ؟ ؟

باول : لأ يا فندم !!!!!!! قانا مش كاهانا !!!!!!!!!

جو : لأ مش فاكر فكرنى يا باول ....... أنا مخى مقلوب خالص ....

باول : قانا دى قرية لبنانية صغيرة على الحدود مع اسرائيل و فبها موقع لقوات

الطوارئ الدولية و لما بيريز كان بيعمل عناقيد الغضب بتاعتة و بيضرب

الجنوب اللبنانى كان أهل القرية دى بيجروا يستخبوا فى موقع ا لقوات دة

و هوب راح نازل عليهم صاروخ اسرائيلى مباشر , قتل كل اللبنانيين اللى

كانوا جوا و كمان كل قوات الطوارئ الدولية و راح فيها يطلع خمسميت

قتيل ...... و كانت فضيحة ....

جو : بس ... خلاص ..... أنا زهئت من الكلمة دى ...... محدش ينطقها

قدامى .... ...... اللعبة كلها لعبة ميديا فى الكام شهر اللى فاضلينلى

دول ....

ألا انت عملت اية مع الشيخ جاسم بتاع قطر ؟ ؟ انا سمعت انة كان

عندك الاسبوع اللى فات ؟ ؟ المحطة بتاعتهم دى عاملة صداع للكل !!!!!

باول : حاجة غريبة جدا يا فندم ..... تصور سعادتك ان احنا اللى عملنا المحطة

دى و ادينالها قرض فى الاول ... وقلنا عشان نعلمهم يعنى اية ميديا مستقلة

و تكون قدوة لباقى المحطات .....

جو : مش معقول يا باول الاخطاء الفظيعة اللى بنعملها دى ..... اية البلاوى

اللى احنا بنعملها دى !!!!!!! أنا فاكر انى من فترة مضيت على

فلوس لمحطة ميديا ؟ ؟ ؟

باول : لأ مش دى يا فندم ...... دى واحدة جديدة أسمها الحرة ......

جو : و برضوا ناوية تقلب علينا بعد شوية ؟ ؟ ؟ !!!!!!!!

باول : لأ يا فندم ... احنا أتعلمنا خلاص ... دى ماسكينها من اية تو زيد

اعلام مباشر و موجة زى اللى هما متعودين علية بالضبط ... وكمان

بنديهم ايشى اكاديمى و ايشى فيرى هوت كليبس .... يعنى بنظبطهم

عشان يلحقوا بالحضارة الغربية .... بس هنأجل موضوع المثل دة شوية

لغاية البلاوى اللى عملها العساكر الشواذ بتوع التحالف دى ما تتنسى

و معليك عارف الناس دى ذاكرتهم زفت .....

جو : يا ساتر يا رب ...... المنطقة دى متعبة جدا يا باول ... لغاية

ما نستقر هناك و نظبطها زى ما أحنا عاوزين هتأخذ مننا مجهود فظيع

و فلوس بالهبل .... دا أحنا تقريبا بندفع لكل الكرة الارضية .... دى لو

كانت فلوسنا كنا أتخربنا و فلسنا ....

باول : .. .. من دقنة و أفتلة ..... يا فندم ...

جو : ايوة .. أيوة ... طبعا ... طبعا...

جو : أنا معملتش حاجة فى الدورة اللى قربت تخلص دى غير الشغل اللى

بيتعمل فى المنطقة الزفت دى ...... اييييية هنقول اية كلة يهون عشان

خاطر عيونك ( كسرة تحت النون ) يا اللى فى باااااااالى .

[kfaya]

باول : عمت مساء سيدى الرئيس ......

جو : صحيح يا كولين ان فية مسئول عراقى كبير قال " و اية يعنى اللى

عملوة الامريكان .... ما صدام كان بيعمل زيهم كدا و أكتر " وأن

الراجل دة بيلبس شوز عالية لغاية ركبة ؟

باول : أيوة يا فندم ...... سمعت حاجة زى كدا ......

جو : ازاى حاجة زى دى تسمعها و تفوتها يا كولي .... دى ممكن تعمل بلبلة

و تحول دفة الهجوم بعيد عنى شواية و ممكن توقعهم فى بعض ..... اهى

اى حاجة تخفف الضغط اللى نازل عليا من كل حتة دة ...... تصور يا

كولى ان فى وسط المعمعة اللى انا فيها دى , اضطريت أعمل انتر فيو مع

محطة العربية بخصوص القرف اللى عملوة المارينز بتوعنا هناك فى

ابو غريب وأهدئ الناس شوية ..... التقارير اللى امامى بتقول ان صورتنا

اصبحت زى الزفت ... فى كل دول العالم ...

باول : تحب سيادتك أسال بريمر يا فندم ؟

جو : ايو حالا قدامى ربع ساعة أقول كلمتين كمان لمحطة الحرة .... دى بتاعتنا

بقى ولازم نشجعها .... مش كان ممكن يقعودوا الاتنين جنب بعض امامى

بدل ما أعيد نفس الكلام هوا هوا تانى ...... وبعدين أنا خايف أنسى و أغير حاجة

فى الكلام اللى قلتة للأولانى ...... لازم تعملوا مونتاج صح و تشيلوا اللى انتوا

عايزينة ......

باول : ما تخافش سعادتك ...... احنا ممكن بشوية مكساج نحط معاهم حديث

حضرتك للمارينز وانت شايل الديك الرومى فى السانكس جيفن اللى فات

..... كان خطاب هايل جدا سعادتك .....

جو : تصور يا كولى انى اضطريت أقول ان الديموقراطية حبيبتى ممكن

تاخدوها بالراحة , و كمان حسب ظروف و ثقافة كل بلد ..... يا خسارة

كان نفسى اخدهم قفش و أهددهم بالمارينز .... ابو غريب قلب كل الاوراق

يا كولى .....يلا بقى شوف شغلك .....

باول : هالو بريمر .....

بريمر : جود ايفنينج مستر سكرترى أوف ستات ....

باول : صحيح فية عندك واحد فى مجلس الحكم قال الكلام دة .....

بريمر : أيوة يا فندم .... واحد أسمة جلال طلبانى .. ودة زعيم الاكراد و نفسة يعمل

حكومة مستقلة فى الشمال خصوصا ان معظم البترول عندة .....

باول : أسال الراجل دة يا بول لو كان عندة صور ولا شريط فيديو ولا أى حاجة

بخصوص الموضوع دة ...... وياريت يحكى ويقول لنا اللى كان بيحصل

اية بالضبط .... ياريت يا بول تبقى خدمت الادارة خدمة كبيرة ....

بريمر : هنعمل كل اللى ممكن يا فندم ....

باول : انا معتمد عليك يا بول ....... ميك ات فاست .....

بريمر : جنيرال ابا زيد ..... جود ايفنينج .....

أبا زيد : جود ايفينينج .. سير

بريمر : من فضلك هات لى جلال و كاميرة فيديو و ا تنين بلاك مارينز و تجيلى

فيرى فاست .....

ابا زيد : أو كى سير .... اون .. زا .. دبل ...............................

[kfaya]

هذة المداخلة لها ارتباط بالمداخلة السابقة ......."" ""

جو : هاتولى رامسفيلد على التليفون حالا ....

رامسفيلد : جود ايفينينج مستر بريذيدنت ....

جو : اية حكاية الشريط اللى انت قلتها قدام الكونجرس دى ؟ هوا احنا ملاحقين على الصور لما

تقول ان فية شرايط كمان ..... الا أنت شفت الشريط دة فية اية يا رامى ؟

رامسفيلد : لأ لسة يا فندم ما شوفتوش .... هوا دلوقتى مع لجنة التحقيق و عمالين يلموا كل المارينز و

المارينزات اللى طالعين فية ... أعداد مهولة يا فندم .....

جو : يا رامى أول ما تشوفة تيجى جرى تحكيلى على كل اللى فية .. و ياريت كمان تعملى نسخة

أهواذاكر فية كل ما أكون قاعد لوحدى ..... ألا قولى اية أخبار شريط جلال اللى انا طلبتة منك من

كام يوم....

رامسفيلد : جلال اية يا فندم ؟ ؟ أنا معنديش فكرة خالص عن الموضوع دة !!!!!!

جو : أيوة ..أيوة .. دة كان مع باول ..... معلش أنا دماغى مقلوبة خالص اليومين دول ....

جو : هاتلى يا ابنى باول على التليفون ....

باول : جود ايفينينج مستر بريذيدنت .....

جو : عملت اية يا كولى فى موضوع جلال اللى كلمتك علية من كام يوم ؟

باول : عملناة يا فندم ..... الراجل فضل يقول أنا ما قولتش الكلام دة , حاول ينكر يعنى ...

أضطرينا نضغط علية شوية .... شريط ساعتين يا فندم ....

جو : أنت شوفتة يا كولى ؟ ؟

باول : لسة يا فندم .... لكن بول بيقول انة حاجة بشعة جدا و هيعمل الغلوشة اللى احنا عايزينها

لدرجة ان اللى يشوفة يصدق فعلا ان الشعب دة بيحب كدا ..... !!!!!!!!!

جو : عايزينة بسرعة يا كولى أديك شوفت اللى حصل لرامسفيلد النهاردة ......

باول : أيوة شوفتة يا فندم ...... ألا سعادتك شوفت الشريط اللى بيقول علية دة......

ربنا يستر دا باين علية جامد قوى , رامسفيلد كان قاعد مرعوب .....

جو : خلاص ... خلاص ... هات أنت الامانة بسرعة من عند بول ......

جو : اعمل يا أبنى لونج ديستانس , مستر بلير فى لندن .....

بلير : جود ايفينينج مستر بريذيدنت ....

جو : فينك يا تونى ..... يعنى ولا حس ولا خبر يا خويا بقالك ييجى اسبوعين ما

سألتش عليا ...... خلاص أستغنيت .....

بلير : أبدا بحاول أظبط الامور شوية و أهدى المسائل ....

جو : طب قولى يا خويا بتعمل اية ..... دا الدنيا عندى مولعة .... شوفت رامسفيلد واللى

اتعمل فية النهار دة ....

بلير : ايوة شوفتة ...... اية حكاية الشريط دة ؟

جو : أرجوك .... ارجوك يا تونى بلاش سيرة الزفت الشريط دة ... بقيت بتعب منها خالص ..

بلير : أوكى ..... اقولك احسن حاجة تعملها دلوقتى اية .....

جو : يا ريت يا تونى .... قول

بلير : انت تخف ظهورك شوية ..... ولما يطلع اللى بالى بالك ( يقصد الشريط طبعا ) سيبلهم

رامسفيلد يقطعوة ..... أهو طول عمرة قليط و منفوخ خلية يتعك فيها لوحدة ..وفى الاخر يستقيل

و يشيل الليلة ........ بصراحة اللة يكون فى عونك وكفاية فرحة ش.ش. فيك ....

جو : مين ش.ش. دة ؟؟؟؟؟؟ دة غير س.س.

بلير : ش.ش. اختصار شيراك شرودر يا جو .....ولا كلمة طالعة من هنا ولا من هناك زى

ما يكونوا بيزغراطوا فى عبهم ...... هما فراحنين فيك ولا أية ؟؟

جو : بس لما أفضالهم ...... هما مش هيجولى هنا الشهر اللى جاى عشان اجتماع السبعة الكبار ..

بلير : أيوة يا جو فكرتنى .... دا لسة كويزومى قافل معايا السكة و سألنى أذا كنا ناويين نحط موضوع

الشرق الاوسط الكبير دة فى جدول الاعمال ولا لأ ...... أنا قلتلة يكلمك و يسألك ..... الراجل

اتخض و قال معقولة اكلمة فى الظروف دى عن الموضوع دة .. دا اللة يعينة على البلاوى اللى عندة

و كمان قال حاجة غريبة يا جو ...

جو : اية قال اية يا تونى .......

بلير: تصور قال لى ان زوجات العساكر اللى اليابان ارسلتهم الى العراق بعد الحاح من سعادتك

عاملين مظاهرات و عايزين أزواجهن يرجعوا من هناك بحجة اية ؟؟؟ مش هتصدق ....

جو : قول يا تونى ... متخبيش حاجة ....

بلير : خايفين عليهم من المارينز بتوع سعادتك ......

جو : مش معقول يا تونى !!!! للدرجة دى ؟؟؟؟؟

تونى : أنا قلتلة اوعى يا كونشى ... دة توقيت مش مناسب أبدا ... جو مجروح دلوقتى .. أرجوك

اوعى الميديا تأخذ خبر ... لم الموضوع على قد ما تقدر ........ انت عارف يا جو يا خويا ان

بالرغم من الديموقراطية و الاصلاح اللى عملناة فى اليابان من زمان , لكن لسة اليابانيات دول

لغاية دلقتى , راجعيات يعنى , وأخر حنبلة ......

جو : هقولك حاجة مش ممكن تصدقها ......

بلير : قول يا خويا ..... دا احنا ستر و غطا على بعض .....

جو : من كام يوم كان عندى ضيف شرق أوسطى .... وزى المعتاد البروجرام كان أجتماع

ثنائى مغلق ثم أجتماع موسع ثم عشاء .... تصور يا تونى ..... مش قادر احكى ..... الضيف

كنسل الأجتماع الثنائى !!!!! قال اية ... أنا مقعدش مع راجل أمريكانى فى حتة لوحدينا

و الباب مقفول علينا .....................................................

بلير : يانهار أسود ............. تصبح على خير ......... أنا رايح انام ........

جو : خير !!!!!!!!!!! هاييجى منين الخير ؟؟؟؟؟؟؟؟؟؟؟؟؟؟ أنا هسافر عند أبويا شوية.........

[se_ Elsyed]

ولإن حقوق الطبع لازم تبقى محفوظة ومُعلبة فبعد إذن اخونا كفاية انا هاطبع المكالمات دي وأروح أقرأها بمزاج .

[kfaya]

بلير : انا طالب واشنطن بقالى ساعة يا ابنى ...... عليز اكلم مستر جو ضرورى ....

جو : سورى يا تونى كان فية عندى ناس كتير .... جايين يهنونى ...

بلير : انا كمان من الصبح بحاول أطلبك عشان أهنيك ...... ضربة هايلة يا جو .... قمة التشويش ..

جو : عملنا مجهود فظيع يا تونى .... ثلاثة أيام عمل متواصل و اجتماعات لنصف الليل ....

بلير : احكيلى عملتها ازاى بالحبكة دى ...

جو : تيم وورك كامل يا تونى أنا و ديك و راما و رئيس المخابرات المركزية ..... و مين كمان مش هتصدق ...

بلير : مين ؟؟؟؟؟

جو : اكبر مخرج أكشن و ايموشن و كمان أكبر كاتب سيناريو فى هوليود ..... تيم كامل يعنى ......

بلير : دفعت كتير ؟؟؟

جو : جدا..... أبو مش عارف اية الخضراوى أخد أرنب ......و القبضايات اللى وراة كل واحد 100 أخضر كبير ...الجماعة بتوع هوليود كانوا متبرعين .....

بلير: رد الفعل السريع دة كان عامل حاسم ......

جو: طبعا انت فاكر جلسة الكونجرس الاسبوع اللى فات لما قطعوا راما حبيبى ......يومها كانوا هيطيروة ..كان لازم نتحرك بسرعة خصوصا ان راما تعهد بارسال مزيد من الصور و الشرايط للمجلس و الفضايح كانت هتكون للركب .......

بلير: و اية اللى حصل بعد كدة ......

جو : أول ما كل العالم شاف بيرج ابنى حبيبى و هو لابس أحمر وقاعد مرعوب و بعد شوية رأسة وهى بتطير.....الكونجرس أصدر قرار ان مشاهدة الصور و الشرايط تكون سرية , وأن المديا ماتنشرش أى صور تانى .......

بلير : ألف ألف مبروك ...... هايل .....دمك ما راحش بلاش يا بيرج .....

جو :قلبى كان بيتقطع و أنا بقول للخضراوى جو أهيد ... الولد كان صعبان عليا جدا , لكن مكانش فية طريقة ثانية ... أنت عارف يا تونى فى الاول راما كان مستعد يضحى بأكبر رتبة عندة , صن شييز أو حتى أبا زيد .. لكن الجماعة بتوع هوليود ما وفقوش , و قالوا دول عسكريين وكدا كدا من واجبهم يضحوا فى سبيل قائدهم الاعلى ...تصور الاقتراح التانى كان مين ؟؟؟؟

بلير : مين .... " رافعا حواجبة لاعلى "

جو : بول بريمر نفسة ....... راما قال انة ممكن يخدرة , و يقول انة أتخطف مثلا .......

بلير : للدرجة دى ....

جو : أنا كنت مستعد أديهم كونديليزا رايس نفسها ..... منظرها كان يبقى تحفة و هى لابسة أحمر ...... بس فى الأخر الجماعة بتوع هوليود أستقروا على بيرج و قالوا ...أولا : دة سفيليان و مالوش دعوة بالحرب ..ثانيا: مواطن أمريكى بسيط زى أى أمريكى غلبان ماشى فى الشارع .. ثالثا : بيحب مراتة و احنا عندنا تسجيلات بصوتهم و هم عمالين يحبوا فى بعض ...... دراما شنيعة ... كان لازم هوليود يا تونى كان لازم ............ هما اللى أختاروا التايمنج دة وقالوا دة أحسن توقيت ...... وكمان هما اللى أصروا ان موقع انتر نت عربى هو اللى يذيع الشريط ............

تونى : كدا قطعت حنفية الميديا خالص ...... خليهم بقى يبلوا الصور و الشرايط اللى عندهم و يشربوا ميتها .... بأمر البرلمان ممنوع عرض أو نشر اى صورة أو شرايط ....ألف مبروك , قول لراما تونى بيباركلك .....

جو: راما دلوقتى فى العراق ..... بيشرف على الاستجوابات بنفسة .......