سخان المياه الفورى tankless instant water heaters

[عادل أبوزيد]

قمت بتغييرات كبيرة فى شقتى و كنت قد فصلت الإمداد بالغاز الطبيعى قبل البدء فى التغييرات ، و طلبت من شركة الغاز أن تقوم بمقايسة لإعادة الغاز و فوجئت بهم يحددون لى عدد إثنين سخان و عدد واحد بوتاجاز للإستخدام بعدداد الغاز الحالى و لو طلبت زيادة فعلى التعاقد على عداد أكبر و ما يستتبعه من الحساب على شريحة فى السعر أعلى بكثير.

ما سبق كان إستهلالا لابد منه

و ما سبق كان السبب فى أن أفكر للعودة لإستعمال السخانات الكهربية بع أن كنت رفضتها لكلفتها العالية حيث وصلت فاتورة الكهرباء الشهرية إلى ما حول الستمائة جنيه فى الشهر و نحن لسنا أسرة كبيرة العدد.

قرأت و سمعت عن سخانات مياه جديدة لا تستخدم خزانا لتخزين المياه الساخنة و لكنها تقوم بالتسخين الفورى حسب الإحتياج فقط.

الرابط : http://www.tanklesswaterheaterguide.com/

و قمت بجولة فى الأسواق - جولة سريعة - فوجدت عند السلاب نوعين سعرهم 850 و 1200 جنيه و فى محل b.teck نوع ألمانى سعره 1500 و 2000 جنيه حسب السعة.

لم أستطع الوصول إلى قرار نهائى و إن كنت تقريبا سأشترى جهاز ليخدم المطبخ و حمام الضيوف و جهاز آخر ليخدم حمام الحاجة الكبيرة (والدة زوجتى)

هل أجد عندكم من له خبرة فى هذا النوع من السخانات و هل لها متاعب فى الإستخدام مقارنة مع السخانات الكهربائية العادية ؟

[عادل أبوزيد]

هناك سخانات فورية أخرى تعمل بالغاز و لم آخذها فى حسبانى عند البحث لأن الغرض من البحث هو الإبقاء على عدد السخانات فى حدود إثنين و عدد البوتاجازات فى حدود واحد ، رغم أن هذه الحدود لم تكن موجودة عند إدخال الغاز الطبيعى أول مرة.

[Folana]

السلام عليكم ورحمة الله....

هل أجد عندكم من له خبرة فى هذا النوع من السخانات و هل لها متاعب فى الإستخدام مقارنة مع السخانات الكهربائية العادية ؟

طبعا يا استاذ عادل دى سخانات هايلة ......لكن "سيمنس" هو الافضل على الاطلاق...مش عايزة اقول رأى حول التركى او غيره..ولكنى جربت "سيمنس" ...ده حضرتك بيشتغل مع فتح الحنفية فقط....وافضل طبعا فى استهلاك الكهرباء من السخانات

الكهربائية الاخرى اللى لها خزان...

بالاضافة الى ان حجمه صغير وشكله شيك ...بخصوص السعة..اظن هو بيتحسب بالوات...مالهوش سعة تخزين....وممكن يغذى طبعا حمام الضيوف والمطبخ لا سيما اذا كانوا على خط واحد..

يعنى انا عندى مثلا واحد بيغذى حمامين ومطبخ...وبيمدهم بالماء الساخن فى اى وقت وبنفس القوة...

واخر يغذى حمام ويعنى اقدر اقول مطبخ صغير كده.....وثالث....ولا كفاية كده :waf:

لم تواجهنى مشاكل فى الاستخدام ولا فى فاتورة الكهرباء...(تقريبا يعنى :lol: ).. يمكن بأدفع كهرباء فى شقتى القديمة واللى باستخدم فيها الغاز الطبيعى بقيمة تفوق الفاتورة لاولى بكثير....

المسألة نسبية وتخضع لرؤية شركة الكهربا.... :sad:

لاعلم لى بسخانات الغاز الطبيعى الفورية.....لكن حأسأل

تحياتى

[عادل أبوزيد]

عامل البيع فى محل إسمه - إسم المحل - شارع عبد العزيز فى مدينة نصر حذرنى من السخان الفورى و قال أن هناك عدد من زبائنه ألغوا فكرة إستخدامه على خلفية أنه يحتاج لتجهيزات خاصة .....

و ما سبق كان إستهلالا لابد منه

قمت بزيارة محلات السلاب و b.tech و شارع عبد العزيز و لم أحظى بأى معلومات مفيدة سواء مع أو ضد غير عامل البيع فى محل شارع عبد العزيز و كدت أغى الفكرة تماما.

رجاء إفادتى و إفادة القراء عن خبرتك مع السخانات الفورية ، فقد ذكرتى أن أفضل الأنواع هو سيمنس هل هذا يعنى أن لكى أو لأحد معارفك تجربة غير ناجحة مع ماركة أخرى.

هل لكى أن تفيدينا منذ متى تستخدمى هذه السخانات ؟

أنا أفكر فى إستخدامها كشئ جانبى لكنى لا أمانع أن أعتمد عليها كليا.

[doha]

عن نفسي اول مرة اسمع بالسخان الكهربائي بدون خزان ..

بس بما اني مجربة نفس التقنية ولكن غاز وبما انها ( ابهرتني ) لدرجه تعجبي من السنين الطويلة الي قضيناها من غيرها واحنا تحت اسر السخان الكهربائي العادي الي عاوز ميزانية لوحده في الكهرباء

فمش عارفه ان كان ده حل ولا لاه اعتقد ان حضرتك تعمل مقايسه خاصه بالسخان الاضافي وتركبه غاز احسن

على ايامنا كانت المقايسه تقريبا بالف وشويه وكان سعر السخان الغاز اقل من الالف برضه بشويه

اعتقد وبما ان حضرتك بتقول السخان بدون تنك سعره فوق الالف فلو حسبتها فممكن متكونش فارقة كتير وخلي كل السخانات عندك غاز وخلاص

[أسد]

خبرتي مع سخان سيمنز منذ سنوات ..

كنت قد اشتريته من السعودية وركبته في مصر

وبعد فترة عطل .. ولم أجد له قطع غيار في مصر أو أحد يصلحه

كونت خبرة سلبية عنه لأنه تعطل بسرعة

بالتأكيد حكمي غير موضوعي .. لأنها تجربتي الفردية .. ولم يكن وقتها متوفراً في مصر .. ولكنني رأيته وأنا أجهز بيتي الجديد في مصر وجدته منتشر في الاسواق ..

وللأمانه لم أعره أي إهتمام على أساس أنني سأركب سخانات (كهربائية عادية) ولكني سأختارها صغيرة الحجم في محاولة لترشيد إستهلاك الكهرباء ..

يمكن أيضاً ترشيد استهلاك الكهرباء إذا تم ضبط الثرموستات الخاص بالسخان على درجة حرارة غير مرتفعة جداً .. ولتكن 60 درجة مئوية مثلاً .. ستكون كافية .. وستوفر في استهلاك الكهرباء بشكل ملحوظ جداً

[اغابي]

انا مش حاقدر افيدكم - لكنى انا شخصيا استفدت

انا اول مرة اسمع بالسخان داه

حقيقي يا استاذ عادل شكرا للمعلومه الجديدة دى

وكتير بيقابل الواحد اجهزة مختلفة بس مش بيبقى عارف كل كم الاجهزة المختلفة دى وظايفها ايه ولا بهتم - انا دايما بدور بس على اللى داخلة مخصوص اشتريه

وممكن احيانا بيشدنى شكل جهاز يكون غريب ابتدى اسال عنه .

والسوق مليان بالجديد كل يوم - فحضرتك لفت انتباهى ان اشوف منه هنا فى الكويت لان

بصراحة محلات الاجهزة الكهربائية متنوعة - ويبقى فرصة نوفر فى فاتورة الكهرباء فى مصر

لان السخان فى مصر مش بيتقفل ابدا طول فترة وجودى اجازة هناك فداه بيضطرنا ندفع فاتورة جامدة .

اغابي

:lol:

[Folana]

السلام عليكم ورحمة الله.....

كلام الفاضلة "ضحى" منطقى جدا...لان إذا حضرتك بتستخدم الغاز الطبيعى ، ده حيكون أوفر وأسهل ..

بالنسية لى لجأت للسخانات الكهربائية ( الفورية) لان ماعنديش غاز طبيعى...!

فكان الحل..إما استخدم سخانات غاز واضطر لتوفير اكثر من خمس أنابيب بوتجاز.....ناهيك عن شكلها البشع طبعا وخطورة وجودها فى الحمامات او حتى المطابخ...خصوصا وانى متعودة على الغاز الطبيعى فى مسكنى الاخر....،.أو الحل الأخر انى استخدم سخانات كهرباء

ووجدنا سخانات الكهرباء الفورية...وعجبتنا الفكرة طبعا جدا....يعنى السخان يشتغل مع فتح الحنفية ويتقفل مع غلقها....مش حيكون شغال بصفة مستمرة لتوفير المياه الساخنة ..واللى برضه مش بتتوفر دائما مع السخان الكهربائى العادى

( ده مش اعلان ولا ترويج للسلعة والله..انا بأتكلم عن تجربتى الشخصية ) :blink:

طبعا زوجى الله يبارك له لازم يلف الاسواق ويبحث عن الافضل دائما....واختار الأفضل والأغلى اللى هو "سيمنس"...كان سعره اعلى تقريبا من الارقام المذكورة ....الكلام ده يمكن من ست سنوات

طبعا انا قلت الأفضل وألأغلى من وجهة نظر زوجى وقتها...أنا كنت لسه مش متخيلة فكرة تشغيله حتى...بعد الاستخدام..لم اواجه فعلا اى مشاكل للان الحمدلله...

وطبعا حتى أكون منصفة وما اعملش سمعة سيئة لانواع أخرى أنا ماجربتهاش....ولا اعرف عنها حاجة...أقول لحضرتك ان جملة الافضل على الاطلاق دى سمعتها من فنى تركيب..كان بيركب النوع التركى عند احدى قريباتى وتصادف وجودى...فلاحظت ان درجة سخونة المياه مش قوية وقلت له ان المياه عندى بتكون ساخنة اكتر من كده.....وبعد جدال وبدون ان اخبره نوع السخان اللى عندى...قال لى ان ماركة واحدة بس فى السوق هى اللى بتدى درجة سخونة عالية للماء...وانها الافضل على الاطلاق...طب ايه هى...قال سيمنس...

ومن هنا عرفت انه الافضل على الاطلاق..لانى سمعت الجملة من فنى تركيب للنوع التركى......لكن شخصيا .ماعنديش فكرة اذا كان التركى افضل ام أسوأ.....

بخصوص التجهيزات الخاصة دى....فمافيش تجهيزات خاصة اللهم الا توصيلات الكهرباء....يعنى يكون معمول حسابه فى امداد الاسلاك داخل الحائط...وسلك قوى...زى اجهزة التكييف كده...لانه مش بفيشة طبعا..ده زرار تشغيل

يعنى يكون متحدد مكانه علشان توصيلات الكهرباء وخلاص....

ارجع بس لاستاذ أسد واقوله ان صيانة سيمنس متوفرة دلوقت ...لا تقلق .. :lol:

تحياتى

:happy:

[أسد]

ارجع بس لاستاذ أسد واقوله ان صيانة سيمنس متوفرة دلوقت ...لا تقلق ..

أيوه .. أنا عارف

لكن انا باتكلم عن أكثر من أربعة عشر عاماً مضت ..

الحقيقة أن تلك المناقشة قد تعيدني للتفكير في الأمر

خصوصاً وأني لم أشتري السخانات .. وقد أتممت أعمال الكهرباء .. لكن معمول حساب السخان العادي .. أعتقد إنه ينفع

من هنا لشهرين كمان .. نشوف المناقشة دي حتوصل إلى اين

[عادل أبوزيد]

هذا الموضوع يعود إلى أربع سنوات مضت و اليوم لاحظت أن عدد من زوار محاورات المصريين يتصفحه فرأيت أن واجبي أضيف خبرتي

ما سبق كان إستهلالا لابد منه

النوع الذي إشتريته إسمه sem و أظن أنه تركي و قمت بكل التعديلات الكهربية المطلوبة و منها مفتاح قوة ٤٥ أمبير و هذا غير متواجد بسهولة المهم تم تكيبه في حمام بيجة و كانت تستعمله في الوضوء و الإستحمام.

مشكلته في الأحمال الكهربية حيث كان يسبب "قفلة" بين الحين و الآخر. و وجدتني مضطرا للتخلص منه بسخان كهربائي عادي من شركة أوليمبك مزود بترموستات و يقولون أنه متميز في إستهلاك الكهرباء و في نفس السياق أوصي بمجموعة أوليمبيك لأن خدمة بعد البيع عندهم مميزة .

قناعتي الآن أن السخان الفوري إختيار غير موفق.

[Alshiekh]

هذا الموضوع يعود إلى أربع سنوات مضت و اليوم لاحظت أن عدد من زوار محاورات المصريين يتصفحه فرأيت أن واجبي أضيف خبرتي

ما سبق كان إستهلالا لابد منه

النوع الذي إشتريته إسمه sem و أظن أنه تركي و قمت بكل التعديلات الكهربية المطلوبة و منها مفتاح قوة ٤٥ أمبير و هذا غير متواجد بسهولة المهم تم تكيبه في حمام بيجة و كانت تستعمله في الوضوء و الإستحمام.

مشكلته في الأحمال الكهربية حيث كان يسبب "قفلة" بين الحين و الآخر. و وجدتني مضطرا للتخلص منه بسخان كهربائي عادي من شركة أوليمبك مزود بترموستات و يقولون أنه متميز في إستهلاك الكهرباء و في نفس السياق أوصي بمجموعة أوليمبيك لأن خدمة بعد البيع عندهم مميزة .

قناعتي الآن أن السخان الفوري إختيار غير موفق.

تجربتي مع السخان الكهربي هنا في أمريكا، أنه "غول" في إستهلاك الكهرباء،

وللتغلب على ذلك فقد وصلته وحده على مفتاح كهرباء منفصل، أشغله قبل الإستخدام بعشر دقائق الى ربع ساعة واغلق الكهرباء عنه بعد انتهاء الاستخدام مباشرة، وحيث أن سعة الخزان كبيرة، فأظل استخدم مياهه الدافئة لمدة يةم الى يومين في الصيف.

[أبو محمد]

تجربتي مع السخان الكهربي هنا في أمريكا، أنه "غول" في إستهلاك الكهرباء،

وللتغلب على ذلك فقد وصلته وحده على مفتاح كهرباء منفصل، أشغله قبل الإستخدام بعشر دقائق الى ربع ساعة واغلق الكهرباء عنه بعد انتهاء الاستخدام مباشرة، وحيث أن سعة الخزان كبيرة، فأظل استخدم مياهه الدافئة لمدة يةم الى يومين في الصيف.

تمام

هو ده الصح للى عنده سخان كهربا