مبارك رداا على سؤال من الذى سيخلفة قال الله اعلم

[ذهبية]

مبارك ردا على سؤال حول خليفته: الله وحده يعلم

الخميس20-مايو-2010

روما (رويترز) - تفادى الرئيس المصري حسني مبارك (82 عاما) يوم الاربعاء الاجابة عن سؤال بشأن من سيخلفه في الرئاسة قائلا ان الله وحده يعلم.

ولم يقل مبارك ما اذا كان سيرشح نفسه لفترة رئاسة سادسة في انتخابات عام 2011 لكن كثيرا من المصريين يفترضون أن ابنه جمال (46 عاما) سيكون منافسا رئيسيا فيها اذا لم يفعل.

وبدا مبارك وكأنه فوجيء بالسؤال الذي وجهه اليه صحفي في مؤتمر صحفي مشترك مع رئيس الوزراء الايطالي سيلفيو برلسكوني في روما.

وقال باللغة الانجليزية عندما سئل عمن يفضله خليفة له "من يعلم.. من يعلم.. الله وحده يعلم من سيكون خليفتي."

وحين كرر الصحفي السؤال أشار مبارك الى السماء وأجاب "أفضل من يفضله الله." وأضاف مبتسما "هذا سؤال لطيف على كل حال."

ومن غير المتوقع على نطاق واسع في ظل القواعد المعمول بها حاليا أن يواجه مرشح الحزب الوطني الديمقراطي الحاكم منافسة قوية في انتخابات 2011.

هو بصراحة اجابة الرئيس الالطف من السؤال جدااا

ياترى المفهوم من الاجابة اية بالضبط؟؟؟؟

دولة كبيرة زى مصر و قائدى يرد رئيسها الحالى الله اعلم طبعا كلنا عارفين ان الله اعلم ربنا يقوى ايمانة

لكن مفيش اى دولة مش عارفة رئيسها القادم مين الا لو سيادتة عايزها حرب اهلية والناس تقطع بعضها على الكرسى

ساعتها بس الله اعلم من اللى هيكسب

يعنى حتى مش قادر يطلعها على لسانة و يقول الشعب يختار كان نفسى اسمعها

ما سمعتها منتهى الاستفزاز بجد

كان يقول انتخابات حرة نظيفة منظر قدام الناس الاجانب حتى ما طلعت

كان يقول احنا بلد ديمقراطى فية اكتر من مرشح و الاصلح يقود ما قالها

لو حد فيكم فهم معنى الرد دة اية يفهمنى

[mekkawy]

الله أعلم يا ذهبية

الله أعلم

الريس من حبه للشعب عارف إن إختيار الله هو أحسن إختيار

بس بجد ... فعلاً إختيار الله هيكون أحسن إختيار و هيكون هو الاختيار اللي نستحقه

و متنسيش إن الملك بيد الله يؤتيه من يشاء .. فمحدش هياخدها شطارة أو فهلوة ولا فتونة .. اللي هياخدها هو اللي ربنا أذنله ياخدها و سبحان مغير الأحوال.

مكاوى

[ذهبية]

الله أعلم يا ذهبية

الله أعلم

الريس من حبه للشعب عارف إن إختيار الله هو أحسن إختيار

بس بجد ... فعلاً إختيار الله هيكون أحسن إختيار و هيكون هو الاختيار اللي نستحقه

و متنسيش إن الملك بيد الله يؤتيه من يشاء .. فمحدش هياخدها شطارة أو فهلوة ولا فتونة .. اللي هياخدها هو اللي ربنا أذنله ياخدها و سبحان مغير الأحوال.

مكاوى

طبعا يا مكاوى هو احنا لنا الا الله ما احنا الان و قبل وبعد بين يدى الله لا اعتراض طبعا على قضاء الله

مش المقصود بقوة الايمان الرئيس و لا شك فى ايمانا

الفكرة الردنفسة ما بين السطور الباطن و ليس الظاهر ما المقصود بها

[عماد حمدي]

ذهبية

طبعا ً ميقدرش يصرح نهائيا ً في الوقت الحالي للشخص الذي سيكون خليفته في مصر ..

لان الأوضاع السياسة الداخلية الآن ع درجة حرارة 522220 مئوية ..

ومجرد تصريحة بس بأي إسم كان الدنيا هتتقلب .. وبعدين هوه معودنا ع المفاجأت :happy:

وردة كان منطقي الله تعالي أعلي وأعلم ..

تقبلوا مروري ,,

[التونسى]

ياترى المفهوم من الاجابة اية بالضبط؟؟؟؟

الاجابه واضحه .. والرئيس قالها قبل كده .. قال انه طول ما فيه نفس داخل وخارج ....مستمر فى مزاولة عمله كرئيس لمصر .. الى أن بشاء الله

يعنى من الاخر مش حيسيب الحكم الا بالموت او لظروف صحيه قهريه جدا .. يعنى زى منا متوقع كمان عشر سنين على اقل تقدير

عشان كده مسالة مين حيخلفه مش شاغله دماغه .. يعنى تخرب ما تعمر .. انا ومن بعدى الطوفان ... يااااااااااااارب تكون رؤيتى وتصورى لتفكير الرئيس خاطئ

تم تعديل 19 مايو 2010 بواسطة التونسى

[fatfouta]

مالكيش حق يا ذهبية يعنى الراجل هيقولهم ايه ماهما برضوا احرجوه :happy:

استفزك ليه بقى عاوزاهم يقول الاسم اللى فى باله صراخة كده؟

طب الاولى كان يقول انا هرشح نفسى ولا لأ......أهو انا نفسى اعرف هو فعلا هيرشح نفسه ولا هيدعم ابنه ولا ايه

عندى احساس انه من كتر حبه للسلطة عاوز طول ماهو عايش مايبقاش حد غيره الرئيس ولو حتى ابنه

عارفة افتكرت كلمة لجوز خالتى قالها مرة لما خالتى كانت المفروض تعمل عملية والراجل ده كان بخيييييل جدااااا فالدكاترة قالوله انها ممكن تعملها وممكن لأ وتعيش عادى

فقال.........اخرتها موتها

فاهمة؟؟؟ يعنى كل حاجة بتنتهى بالموت

ربنا يرحمنا جميعا

[doha]

ضحكت اوي لما سمعت التعليق ده اصل مش بعيد ابدا يكون قصده الله اعلم مين فينا ـ انا ولا شعب مصر ـ الي هيخلف التاني ..

على كل حال السؤال في حد ذاته يقترب من ( قلة الذوق ) لما يوجه لواحد في ( سن ) مبارك تفرق معاه اوي فكرة التصور ان النهاية قربت

الصحفي بالظبط كأنه بيقوله وانت بقى وبصفتك بتودع بعد ماتموت ان شاء الله قريب تفتكر مين هيجي بعدك ؟

معتقدش ومن وجهة نظر انسانية بحته ان كان من اللياقه توجيه السؤال ده ليه وبالصيغه دي وفي هذا التوقيت على وجه الخصوص ..

[herohero]

رد منطقي واستكمال لمرحلة بناء الوضى اللي هتحصل شيئ مستفز جداجدا ولا مبالاة مطلقة لمستقبل بلد

ربنا يختاره بقى ويرتاح ويستريح

[اغابي]

دى طريقته المعتادة - التثبيت

اولا : الموضوع متأزم جدا فى مصر كل يوم مظاهرات جديدة ومشاكل جديدة واحتجاجات .. .. ..الخ

داه غير طبعا صفحات الصحف والمواقع الالكترونية - والناس فعلا بدأت فى - الصحوة بعد الغفوة

وكل الدول عارفة كدا كويس - فمبارك كالمعتاد بيحب يثبت اللى قدامه بكلمتين ( طبعا كدب × كدب )

- له 30 سنة كل ما يقول خطبة جديدة يدينا مخدر او كلمة تثبتنا مكانا

الرد داه مش جديد - هى دى طريقة مبارك - التثبيت وبعدين حنتفاجأ انه كان يعرف مين بعده ومرتب كل حاجة :blush2:

و.....و ....

الله واعلم !!

اغابي

:happy:

[mamdowh]

رد فى منتهى الشفافية

:blush2: :happy:

ايه اللى مش عاجبكم فى الرد ... هه هة

[sarmar]

واثق الخطوة يمشى ملكا

طبعا رئيس كلنا بنحبة ولا نتخيل ابدا ان مصر تكون موجودة اصلا فى الحياة بدونة وسبحان من لة الدوام

الريس اللة يخلية ياما اتكلم وياما خطب وياما قال لنا اشمعنا دى اللى ماسكين فيها يامصريين ماتسيبوة

يبحبح برة شوية وعلى المحترمة فتفوتة كلة اية يافتفوتة ؟ بينتهى باية ؟ ايوة سبحان من لة الدوام

[ابو محمد بن مصطفي]

ياسلالالالالالالالالالالالالالالالالالالالالالالالالام

اجابة ف الجون ياريس

وبس

[Sherief AbdelWahab]

هل توجد آلية واضحة لتعيين خليفة رئيس جامعة ، أو اتحاد رياضي ، أو نقابة مهنية؟

هل فيه ترحاب بمجرد الكلام عن خليفة حسن شحاتة؟

فما بالكم بالكلام عن خلافة رأس الدولة بشكل عام .. عن قواعد عامة وثابتة ومحترمة في الدستور وفي الممارسة السياسية المصرية..

طبيعي الريس يقول كدة..

خلص الكلام

[ssmaly]

الله اعلم

اعترضوا على كلام ربونا

انتوا مش مؤمنين ولا أيه؟

وبعدين ليه السؤال الان ؟

صحة الريس ممتازة

المفروض انهم يسألوه

ياسعادة الرئيس ممكن تقول لنا هل سترشح نفس سيادتك (مش معقولة اقول نفسك كدة حاف)لانتخابات سنه 2047 ولا سوف تتركها للشباب الصغير اللى حيكون عنده 85سنه؟

[ذهبية]

أفضّل من يفضّله الله».. بهذه الجملة مع «إشارة» من أصابعه إلى السماء، واصل الرئيس حسنى مبارك فتح باب الجدل حول من سيخلفه فى الرئاسة خلال المرحلة المقبلة، حيث كرر الرئيس هذا الرد ٣ مرات عندما أعاد أحد الصحفيين الأجانب على مسامعه سؤالاً بشأن من سيخلفه فى الرئاسة ومن يفضله، وذلك أثناء مؤتمره الصحفى المشترك مع رئيس الوزراء الإيطالى سيلفيو برلسكونى، فيما أجمع خبيران من علم النفس والسياسة وعالم دين على أن إجابة مبارك تمثل الثقافة المصرية ولكنها لا تمثل السياسة العالمية، وتخلط الأقدار السياسية بالدينية.

قال الدكتور أحمد عكاشة، رئيس الجمعية العالمية للطب النفسى، لـ«المصرى اليوم»: «إن الثقافة المصرية تعتمد فى كل أحداث الحياة على (أمر الله)، ولكن الغرب لا يفهمون هذه الثقافة». وأضاف عكاشة: «تكرار الصحفى لسؤاله ٣ مرات يؤكد أن رد الرئيس مبارك لا يفى بالغرض عند الثقافة الغربية والنخبة المتعلمة»، منوهاً بأن «الغرب على أساس ثقافته سيأخذ هذه الإجابة باستخفاف أو أنها نكتة.

وأكد الدكتور عمرو هاشم ربيع، الخبير بمركز الأهرام للدراسات السياسية والاستراتيجية، أن «إجابات الرئيس لم تزل شكوك المصريين حول خليفته خلال المرحلة المقبلة»، مبدياً دهشته من عدم إفصاح مبارك عن نيته خوض انتخابات الرئاسة المقبلة، فى الوقت الذى يتحدث فيه طوال الوقت عن مخططات ٢٠٥٠ فى الاستثمار والمرور والبطالة.

وأوضح الدكتور عبدالمعطى بيومى، عضو مجمع البحوث الإسلامية، أن الإسلام يأمر بالتوكل على الله، وتفويض الأمر إليه فى علم المستقبل، مستطرداً: «لكن يجب على كل إنسان فى أى موقع، مهما كان كبيراً أو صغيراً، أن يأخذ بالأسباب.

[ذهبية]

ضحكت اوي لما سمعت التعليق ده اصل مش بعيد ابدا يكون قصده الله اعلم مين فينا ـ انا ولا شعب مصر ـ الي هيخلف التاني ..

على كل حال السؤال في حد ذاته يقترب من ( قلة الذوق ) لما يوجه لواحد في ( سن ) مبارك تفرق معاه اوي فكرة التصور ان النهاية قربت

الصحفي بالظبط كأنه بيقوله وانت بقى وبصفتك بتودع بعد ماتموت ان شاء الله قريب تفتكر مين هيجي بعدك ؟

معتقدش ومن وجهة نظر انسانية بحته ان كان من اللياقه توجيه السؤال ده ليه وبالصيغه دي وفي هذا التوقيت على وجه الخصوص ..

اختلف يا ضحى معاكى لانة مش بيسالة انت هتموت امتى ؟؟؟

بيسالة مين هيجى بعدك ؟؟؟

علشان احنا اتعودنا فى تراثنا العربى ان الملك لا يقوم من الكرسى الا بالموت او الاغتيال او السم علشان كدة اعتبرنا دة شتيمة

يعنى لو السؤال دة اتسال لاى رئيس دولة غربية كان هياخدة رد عادى جدااا لانهم عارفين انهم مجرد فترة فى الحكم

وماشين لكن احنا اعتبرناها شتمية و قلة ذوق الصحفى

لان عيب يتسال كدة لان الاجابة معروفة انة مش ماشى الا بالشديد القوى بالموت

بالذمة دى سياسة

بالذمة دولة بجلالة قدرها و اقتصادها و رجالها الافاضل قاعدين على روح انسان و الكل خايف يموت

مين اللى اعطى الرئيس تلك القدسية مين اللى اعطى الرئيس كانة يوم موتة كان موت دولة بها اكثر ملاين البشر

دولة تتوقف فيها كل شىء و كل مقدراتها على فرد واحد

احنا رجعنا لورا قوى كدة زى ايام الفراعنة

[عشق الكلمات]

بس ممكن التدين اللى نزل عليه ده

وتسليم كل حاجة لله

يبقى اشارة انه هيودع

اصل الانسان بيحس قبل ما يموت وتلاقيه هايم فى ملكوت الله كدةوبالذات حركة ايده للسما دى معناها جايلك هههههه

[doha]

ضحكت اوي لما سمعت التعليق ده اصل مش بعيد ابدا يكون قصده الله اعلم مين فينا ـ انا ولا شعب مصر ـ الي هيخلف التاني ..

على كل حال السؤال في حد ذاته يقترب من ( قلة الذوق ) لما يوجه لواحد في ( سن ) مبارك تفرق معاه اوي فكرة التصور ان النهاية قربت

الصحفي بالظبط كأنه بيقوله وانت بقى وبصفتك بتودع بعد ماتموت ان شاء الله قريب تفتكر مين هيجي بعدك ؟

معتقدش ومن وجهة نظر انسانية بحته ان كان من اللياقه توجيه السؤال ده ليه وبالصيغه دي وفي هذا التوقيت على وجه الخصوص ..

اختلف يا ضحى معاكى لانة مش بيسالة انت هتموت امتى ؟؟؟

بيسالة مين هيجى بعدك ؟؟؟

علشان احنا اتعودنا فى تراثنا العربى ان الملك لا يقوم من الكرسى الا بالموت او الاغتيال او السم علشان كدة اعتبرنا دة شتيمة

يعنى لو السؤال دة اتسال لاى رئيس دولة غربية كان هياخدة رد عادى جدااا لانهم عارفين انهم مجرد فترة فى الحكم

وماشين لكن احنا اعتبرناها شتمية و قلة ذوق الصحفى

لان عيب يتسال كدة لان الاجابة معروفة انة مش ماشى الا بالشديد القوى بالموت

بالذمة دى سياسة

بالذمة دولة بجلالة قدرها و اقتصادها و رجالها الافاضل قاعدين على روح انسان و الكل خايف يموت

مين اللى اعطى الرئيس تلك القدسية مين اللى اعطى الرئيس كانة يوم موتة كان موت دولة بها اكثر ملاين البشر

دولة تتوقف فيها كل شىء و كل مقدراتها على فرد واحد

احنا رجعنا لورا قوى كدة زى ايام الفراعنة

مبارك مش صغير في عالم السياسه وبقاله 30 سنة بيعمل لقاءات صحفية وبيتسأل كرئيس جمهورية

مش محتاجه ذكاء او كثير من التفكير عشان يدرك ماوراء سؤال زي ده

لو ان الصحفي سأله هل انت ناوي ترشح نفسك واتبع ده بسؤال تاني طيب لو فرضنا انك مترشحتش مين هيخلفك كان بقى سؤال عادي ومن حقه يحصل عنه على اجابه شافية

لكن السؤال بالطريقة الي انطرح بيها وفي التوقيت ده بالذات ملوش اي معنى تاني .. كلنا عارفين انك بتودع وانك مش هتكمل وانك مش هتترشح تاني لو حتى كملت يبقى في رايك مين الي هيجي بعدك

كلنا على فكره متكلمناش عن موضوع خليفة لمبارك ـ بالكثافة دي ـ غير بعد ماوصلتنا اخبار تدهور صحته

مبارك مش مستجد عشان تفوته لمحه زي دي وعشان يفهم انه لولا حالته الصحية لما سؤل هذا السؤال الي مظنش حد تجرأ يسأله له وعلى مدار الثلاثين عاما الماضية

لو بصينا ان مبارك راجل كبير في السن وان اي بني آدم في سنه ده خاصه مع تعرضه لوعكه صحيه بيكون الحديث عن الموت او الرحيل اشبه بالذبح بسكين تلمه لعرفنا الى اي مدى كانت ( قلة ذوق ) الصحفي في سؤاله

الكلام ده نقوله بينا وبين بعض او حتى نكتبه في وسائل الاعلام لكن مش نروح في ( وش الراجل ) ونرميها ..

انا مش بدافع عن مبارك ولكن الاعراف والمواثيق بتقول لو واحد محكوم عليه بالاعدام واصيب بما يستدعي تدخل جراحي بيعملوا له العمليه الاول ويستنوا لما يخف خالص وبعدين يعدموه .. في ابعاد انسانية لازم يتم مراعاتها ومش معنى اننا مخنوقين من الجدع ومستنين بقى اليوم الي يجي ويفك الخنقة اننا منراعيش الاصول واحنا بنعبر عن الخنقة دي

ذهبية ..و قبل ماتحدفيني بحاجه .. فكري في كلامي احتمال تلاقيه منطقي

[لماضة مصرية جدا]

السلام عليكم و رحمة الله و بركاته

طب ممكن افترض افتراض صغير

يعني هو لو كان رد و قال اللي هيخلفني هو "ابني حبيبي ضونايا"

ايه كان هيتغير

كانت الناس برضه مش هتبطل جدل

ده مش السؤال اللي يتسال...لاني اصلا مش شايفة سؤال عشان يتجاوب.....(زمان قالولنا ان السؤال هو موضوع غامض او معلومة ناقصة"....يبقي ده مش سؤال اصلا...ده بقية الزفة الاعلامية اللي عمالة تترسم مشهد ورا التاني و بتلمع فيه لغاية آخر نفس

الا ما حد ساله يا ريس هتعمل ايه في حالة ال 15 كشك اللي ناويين يطردوا اصحابهم منهم...و الناس دي غلابة مش لاقية تاكل؟؟؟

الا ما حد ساله و قاله هو ليه سرطان الاطفال انتشر اوي اوي.....و المعاهد مش مكفية؟؟؟

الا ما حد ساله و قاله......هو يعني ايه ابويا بيخدم في الحكومة اكتر من 40 سنة و انا بنت امبارح اللي مساوشي بصلة جنبه باخد مرتب اضعاف اضعاف ما كان يحلم بيه....بس بالمقابل سبت البلد و هجيت....؟؟؟

المشكلة مكنتشي في الاجابة

المشكلة كانت في السؤال اصلا

ربنا يتولانا برحمته

[se_ Elsyed]

لو بصينا ان مبارك راجل كبير في السن وان اي بني آدم في سنه ده خاصه مع تعرضه لوعكه صحيه بيكون الحديث عن الموت او الرحيل اشبه بالذبح بسكين تلمه لعرفنا الى اي مدى كانت ( قلة ذوق ) الصحفي في سؤاله

في عالم السياسة .. وخصوصاً السياسة الغربية المحترمة .. ما فيش حاجه إسمها قلة ذوق أو كخ كده ...

لكن كل الأسئلة قابلة للطرح ... وياما بنقرأ أكتر وأفظع من كده ..

أما مجرد التفكير في سؤال " من سيخلفك في الرئاسة " لرئيس غربي محترم ... فهو سؤال غير موجود في مصطلحات الغرب أصلاً .. لإنها مش تكيه ولا خلافة سلطانية عشان واحد يخلف التاني ...

وأعتقد إنه كان سؤال تهكُمي ساخر من الصحفي .. لأنه شايف البزرميط اللي عندنا ... فلا إحنا حصلنا دولة ديمقراطية .. ولا خلافة ملكية ولا حاجه أبداً ... لكن نظامنا يرقص على السلالم

قبل ما أنسى ..

سمعتوا تصريحات نظيف في إجتماعه مع رؤساء تحرير الصُحف

نظيف: أتمنى ترشح مبارك للرئاسة.. والنظام لم يخُرج البديل

هو كان عاوز يقول إن النظام ملبسنا طُرح وما فيش راجل مع مبارك في النظام .... بس أتكسف يا ولداه ...

30 سنة حُكم وما فيش واحد يصلح لحكم دولة بحجم مصر .... يا حلاوه !!!!