عاش جمال مبارك إبن صاحب الضربة الجوية ...

[se_ Elsyed]

صورة جمال مبارك تتصدر فيلم عن انتصارات أكتوبر

تصدرت صورة جمال مبارك رئيس لجنة السياسات بالحزب الوطنى، فيلما قام بعرضه الحزب الوطنى فى المؤتمر الجماهيرى الحاشد الذى نظمته مساء أمس دائرة أمانة سيدى جابر بالحزب الوطنى، فى انتخابات التجديد النصفى للشورى بالإسكندرية.

كان موضوع الفيلم هو "انتصارات أكتوبر" والذى تضمن صورة فى بدايته لجمال مبارك استمر عرضها على الشاشة 5 دقائق متصلة تلاها مشاهد عن انتصارات للمنتخب المصرى ومشروعات افتتحها الدكتور أحمد نظيف واللواء عادل للبيب محافظ الإسكندرية وعدة صور للرئيس مبارك.

والله كتبتها زمان ... إن لازم هايلكلكو حاجه تدل على إن جمال مبارك ساهم بشكل جذري وجاد وإيجابي في حرب أكتوبر

أينعم كان عنده 12 سنة ولابس شورت وبيقول على السُكر .. أوكر .. والميه أمبو

لكن كان عمال يدعي لباباه اللي كان بيفطر ويتناول فنجان القهوة صباحاً يوم المعركة ( مع العلم إن المعركة كانت في رمضان .. لكن إحنا مش بنقف عند التفاصيل الصغيرة دي ) ... وكان جمال عمال بيدعي لباباه ويقول " يارب تنجح يا تتح .. يارب تنجح يا تتح "

وفعلاً .. باباه رجع مكلل باكاليل النصر ... وحط أكليل من دول على دماغ جمال وقال له .. تسلم يا جيمي .. دعاويك وصلت وكانت تحُفنا وتحوم حولنا في المعركة

ولم ينسى التاريخ دور جمال في مفاوضات إستعادة سينا .... ومن يستطيع أن ينسى مقولته التاريخية الخالدة " هي سينا مش هاترجع بقى لينا يا بابا ؟ "

وجاء الرد الحاسم من الأب .... " هاترجع يا حبيبي ومصر اليوم في عيد "

ومن هنا أستلهمت الست شاديه اغنيتها اللي كانت بتطير فيها قُصة شعرها وقالت " سينا رجعت كاملة لينا ومصر اليوم .... ترالام لام لام ... مصر اليوم في العيد ... مصر اليوم في عيد "

ومن منا ينسى مساهماته في إستعادة طابا ورفع علم مصر خفاقاً عالياً عليها - ده قبل ما تتباع لوجيه سياج المتر بجنيه - ... فلن تنسى لك مصر يا جمال إن العلم اللي كان ماسكه الريس زي الكفن ده متفصل من هدومك - أي هدوم بقى ما حدش يدقق ويتبت في النقطة دي - .... فعندما علمت أيها القائد العظيم أنا اباك ذاهباً ليرفع العلم على طابا إعلاناً لتحررها من ايد الصهاينة الخنازير .... صممت بل حلفت بالطلاق إن ما فيش علم هايترفع إلا وهو متفصل من هدومك إن شالله تقعد من غير هدوم ..

وفعلاً ... أستدعيت الأسطى عبد الحميد الترزي .. وأحطيته فالنتك الداخلية البيضاء ... وبلوزتك الخارجية الحمراء .. وقلنوصتك الشتوية السوداء .... وكان هذا هو علم مصر ...

يااااااااااااااااه ... ده تاريخ يا جماعة ... تاريخ ولازم الكل يبقى عارفه

[stricker]

ونسيت يا عمنا اهم مقوله للزعيم القادم وهى :( زى ما قال الريس ...منتخب مصر كويس ) انها اعظم من مقولة مصطفى كامل ....ولم يستطع سعد زغلول وزعماء مصر قديما ان ينطقوا بمثلها

وفى حرب أكتوبر كان الزعيم وقتها صغير ولكنه حارب ...نعم حارب بالنبله ومسدسات او رشاشات المياه

انها بطولات فى سجلاته لن يمحوها الزمن او حقد اى حاقد

ربنا يخليه لينا ولمنتخب مصر وللحزب الوطنى الحاكم الديمقراطى

وفى الرابط التالى الشعب بيهتف ومبسوط وكله عال العال

http://www.youtube.com/watch?v=kpTg9XHi5zc

تم تعديل 22 مايو 2010 بواسطة stricker

[Diab]

هي خلاص بقت كدة

انجازات البلد كلها هي المنتخب الكروي

فين العلماء

والتكنولوجيا

[myusername]

من فترة قريبة... اعتقد بعد 6 ابريل مباشرة... كنت رايح مع واحد صاحبى علشان يطلع رخصة سواقة.. و احنا ماشيين بالعربية لقينا يفط حديد متعلقة... عليها صورة جمال و جنبها صورة مبارك... و مكتوب من فوق: القيادة و المستقبل :blink:

اليفط دى ممكن تشوفوها على طريق الاوتوستراد... قبل مستشفى المقاولين العرب كده... ناحية منشية ناصر تقريبا.. و كمان متعلق منها على صلاح سالم :happy:

ايـــــه دنيا... عاش الكائد العذيم

[fatfouta]

يعنى مش كقاية ظلم كده يا ناس فى الراجل وابنه

مش جمال ده اللى يبقى باباه صاحب اول ضربة جوية فتحت باب الحرية؟؟ :happy:

يبقى لازم صورته تتصدر طبعا

[engmido]

على فكرة فتفوتة وسى السيد

بالخصوص ...اسمكم اتحط خلاص فى البلاك ليست

وللاسف مش هاقدر اعملكم حاجة

واوعى حد يطلب من اتوسط لكم :lol: