السويد و النرويج

[freestyle]

السلام عليكم ورحمه الله وبركاته

كان في موضوع كده بفكر فية بقالي فترة و كنت محتاج رأيكم معايا , (لا خاب من استخار ولا ندم من استشار) .

اسمي محمد و عندي 23 سنة . من الباسلة (بورسعيد) :closedeyes: , مهندس ميكانيكا , شغال في احدى الشركات في البحر الأحمر , مهندس مشروعات

مرتبي الحمد لله مش معترض علية خالص , رزقي , بيكفيني و بحوش منة .

بس طبعا المشكلة كلها في النظام و طريقة اداء الشغل , و انا اكيد بتعلم و بتقدم في المكان ,بس بمعدل بطئ شويتين (عادي يعني , مشاكل البلد كلها )

من زمان نفسي اسافر و كنت سعيت اكتر من مرة بس ماكنش فية نصيب , بس في نفس الوقت مش عايز اروح الخليج

طبعا زي اي واحد عايز اعدل من اوضاعي , نفسي اسافر احد الدول الاسكندنافية وبالتحديد السويد او النرويج

بالنسبة لطريقة الدخول , بفكر اقدم على فيزا سياحة , وهاخد اجازة من الشغل 3 شهور

بالنسبة للغة . الانجليزي بتاعي كويس

بالنسبة لتكاليف السفر والمعيشه , مخبيلي انا قرشين من الـ 15 شهر اللي اشتغلتهم دول

وهروح وانا ونصيبي , عرفت اشتغل هناك اي حاجة كان ماكنش هشوف دراسة . انا عارف ان الجامعات هناك مجانية لانها جامعات حكومية

ماكنش بقى خالص هرجع .

مش هنكر اني خايف , لاني اول مرة اسافر , بس اكتر حاجة مخوفاني

اروح و مايكونليش نصيب اكمل هناك واجي هنا وتكون مداركي اتفتحت على طريقة معيشة الناس دي و ارجع هنا تاني والمره دي انا عارف اني ماليش سبيل

مش عارف , محتاج رأيكوا ...

[Amenhotep]

اللي هقولهولك ده ياابو حميد رأي مش من واحد خبرة , بس اهو ممكن يلفت نظرك لحاجة كدا ولا كدا

هاقولك حاجة صغيرة, كان فيه scholarship ماجستير تبع الجامعة الامريكية مدفوع بالكامل في مصر, وكانت شروط التقديم مناسبة ليا, لكن الدراسة full time ونظام الحضور معمول بحيث اني مش هينفع اشتغل اطلاقا خلال السنتين .... طبعا ماجستير من الجامعة الامريكية يعني حاجة محترمة, لكن انا ظروفي متستحملش اني افضل قاعد سنتين من غير شغل.

كنت هاكسب ماجستير محترم ايوا, لكن هخسر سنتين خبرة انا محتاجهم جدا في شغلي علشان اقدر اعمل Rank كويس واترقى في شغلي, لان في مجالي (ومجالك), الخبرة اهم من الماجستير اللي من غير خبرة

اولا علشان تروح السويد سياحة هتحتاج فلوس اد كدة في البنك علشان يوفقولك, هنفترض ان دي مش مشكلة

لو روحت سياحة وقعدت 3 شهور هناك, هتصرف مبلغ فيهم اكتر بكتير من مجموع مرتبك في الفترة اللي انتا اشتغلتها كلها

الفيزا هتخلص وبعدين ؟؟؟

هتدور على شغل:

هنا فيه حاجتين , اولا مستحيل تشتغل, لانك قانونا زاير ومعكش تصريح بالشغل وهتتمسك وتترحل

هاعتبر ان المشكلة دي عدت ( وهي مستحيل تعدى بس هاعتبر كدا علشان اقولك باقي قصيدة الكفر )

مستحييييييييييل تشتغل بشهادتك , لان متازعلش مني ( الكلام علينا كلنا كمصريين ) الشهادات العليا بتعاتنا ةلا ليها اي لازمة هناك, لازم تعمل معادلات وامتحانات وحورات ملهاش اول من اخر , الحاجات دي محتاجة ( وقت وفلوس ومجهود)

هتقول اجيب فيزا تعليم, ماشي

هتقدم على بكالريوس مالاول, الاول هتحتاج تعادل ثانوية عامة ( اه امال ايه مهي ملهاش لازمة بردو زي البكالريوس بالزبط) يبقى هتحتاج تصرف على نفسك 5 سنين من غير شغل ( ازاي دي بتاعتك انتا )

وبعدها هيقولولك مع السلامة , ارجع بلدك

هتقدم على ماجستير ( عادل شهادتك وهيشوفوا التقديرات واللغة, اللي هيا مش انجليزي بس, وبعدين يقرروا )

هتحتاج مصاريف سنتين, ومش هيدخل في السنتين دول جنية يتيم في جيبك, هتخسر سنتين خبرة في مجالك

وبعدها ارجع بلدك بردو.

معلش هاصدمك

انسا اوروبا :lol: