مبارك أسطورة لن تتكرر

[herohero]

القاهرة - محرر مصراوى - وصف صفوت الشريف رئيس مجلس الشورى الرئيس حسني مبارك بأنه "أسطورة وليس له بديل في حجمه السياسي، لأنه زعيم هذا الوطن والحزب ".

وقال الشريف في حوار تبثه قناة "العربية" الإخبارية الثلاثاء ان مصر "تملك الكثير من الشخصيات القيادية الصالحة للترشح لمنصب الرئيس في ظل الحرية وتعدد الأحزاب ووفق الدستور والمعايير السليمة".

وأضاف الشريف "الحزب الوطني بأكمله يأمل في ترشح الرئيس مبارك لفترة رئاسية جديدة، حيث انه بحجمه السياسي أسطورة وليس له بديل فهو زعيم هذا الوطن وهذا الحزب والكل معه".

بصراحه حسيت بحاجه غريبة لما قريت الخبر ع مصراوي بقولكم ايه هو فيه كده

ع كده بقى احنا بلد الاساطير ياه اسطورة 30 سنة ياه انا حاسس ان الواحد عايش ف بلد تانيه

احمدك يارب اني انتمى لبلد انجبت مثل هذه الاساطير

يااااااااااااااااااااااااااااارب ارحمنااااااااااااااااااااااااااااااااااااااااااااااااااااااااااااا

[اغابي]

اخويا herohero

بصراحة انا قريت الخبر دا نهارده فى صحف الكويت وجانى مغص منه .

- طبعا مين يشهد للعروسة - لما صفوت الشريف ما يقولشي كلمة زى دى مين حيقولها

المهم السؤال الحقيقي ؟؟

هو الشعب المصري ايه رايه فى مبارك كرئيس

- احنا الشعب

واحنا اللى نحكم عليه اذ كان اسطورة ولا مش اسطورة

هو داه السؤال المهم مش كلمة صفوت الشريف

تحياتى للجميع

اغابي

[se_ Elsyed]

الظاهر صفوت اللاشريف بيظهر كل 6 سنين

في مثل هذا الوقت من 6 سنين وقبل المهزلة الأنتخابية الرئاسية الخزعبلية

طلع المعلم صفوت في حديث وقال " إن مبارك لا ينطق عن الهوى "

وعادي الجرايد نشرت البؤين دول ومافيش مشكلة وكنا ناقص يعملوا له مقام

لكن عزائي الوحيد إن ماحدش بيتعمل له مقام إلا لما يموت ..

وأنا موافق .. بس يعملها هو ...

............

تحليلاً لكلامه ..

هو مبارك فعلاً أسطورة

لكن أسطورة في الفساد وأسطورة في جعل البلد في الحضيض ... يكفي أن ترى صور العُمال المتشردين المعتصمين أمام مجلس الشعب لترى الأسطورة بعينك .

أو ترى طوابير مرضى السرطان ولاأورام وأمراض الكبد الوبائي

أو طوابير الراغبين للهجرة أما السفارات الأجنبية حتى سفارات الصومال وجيبوتي وجُزر ماكرونيزيا

----------------------------

آه بالمناسبة .... الأمن أمبارح نزل ضرب في العمال المعتصمين دي كإنه بيضرب في ناس كفره .. أنا بكيت من المنظر خصوصاً لما تلاقي واحد كبير في السن أتكعبل ووقع وهجم عليه التتار بالعصيان وبالركل بالأرجل كإنه أسير في معركه مع الأعداء ...

ومشوهم من أمام مجلس الشعب وغسلوا الرصيف بالمياه والصابون ابو ريحه ... لأن رئيس وزراء كينيا جاي يزور أحمد نظيف في مكتبه بجوار مجلس الشعب ...

[se_ Elsyed]

أستغفر الله العظيم

أخشى ما أخشاه إن الجُمل المأثورة دي تتناقل بين فئات المنافقين لحد ما نلاقيها بقت في القرآن مثلاً أو في حديث شريف ...

[fatfouta]

عادى جدا انه يقول كده.....طب ما احمد نظيف بيقول انه يتمنى ان مبارك يرشح نفسه فى انتخابات الرئاسة

طبعا عشان يفضلوا فى مراكزهم ويستمر مسلسل النهب اكتر من كده

شوفوا اليوتيوب ده وقولوا رأيكم فى الأسطورة الى خلى الناس تعتصم عالرصيف وخلى بنات صغيرين من العمال يهتفوا بالشكل ده وفى الاخر يضربوا

وهيلاهوبا هيلاهوبا........إصحوا يا اللى تحت القبة

وتحت القبه رجال أعمال.......ضيعوا حق العمال

بصراحة فعلا الراجل ده اسطورة ماشوفناش المنظر ده الا فى عهده ويارب مانشوفه تانى

[herohero]

عارفين هواسطورة فعلا لانه وصلنا لكده تخيلوا نبقى ف بلد 80 مليون روح وللاسف نبقى مشعارفين مصيرنا تخيلوا حضراتكم اننا ف بلد one man show

شوفوا مهزلة قضية حوض النيل معقولة ده القصه دلوقتي اتاخدت جد لماالبيه فاق من الغيبوبة وبدا يتحرك بذمتكم ده شيئ يشرف اي مصري ان بلده تبقى ماشية بالاسلوب ده

يانهار اسود بقى ع80 مليون مصير بلدهم ف ايد شخص ومش عارفين كمان مين اللي بعده ياترى هو مين اللي اسطورة

هل هو اللي اسطورة ولا احنا اللي شعب اسطورة وشعب صعب تكراره ف اي بلد تانيه

صدقوني انا مقدرش الوم الا نفسنا هتقولوا جلد ذات ومش عارف ايه انما الحقيقه كلنا اسطورة كلنا كده بقينا ننتمي لهذا الشعب الاسطورة وورثنا ده ف حياتنا تلاقي معظمنا هايمين وحايرين مش عارفين هيعملوا ايه اهو بنقولك نهاجر نروح كندا او استراليا وبرده مش عارفين ليه طلعنا ع الخليج ونقدر نقول هروب او طفشان طبعا احنا بنقول سعيا وراء الرزق

طب ارجع يا بطل هتلاقي نفسك يوم ورا التاني بتهرب اكتر وتقول هرجع اعمل ايه ويظهر السبب الرئيسي احنا هربنا من المركب انا لا اعمم هكلم عن نفسي عشان محدش يزعل

عشان كده انا بقول فعلا انه اسطورة لانه شخص واحد قدر .... معرفش نسميها ايه ؟؟؟ ذكاء فساد ذكي قمع ذكي هو بصوا هي حاجه وحشة بس اتعلبت بذكاء

المهم هذا الذكي !!!! ف الفساد ها نجح ف انه يحولنا الى دمى يتلاعب بمقدراتنا ومستقبلنا وبقينا كده 80 مليون ف الطراوة لا عارفين هيعملوا ايه ولا عندهم خطط ولا غيره

يبقى بذمتكم الراجل ده اسطورة ولا لا بجد انا ف الاول كنت مستغرب لكن فعلا هو اسطورة ازاي خلانا كده ياريت بجد حاولوا تتخيلوا ان كلنا استسلمنا واللي هرب واللي طفش واللي هاجر واللي هايم ع وجهة وكل ده للاسف بفضل قيادة شخص واحد

يبقى اسطورة واحنا اللي صنعنا الاسطورة

[Alattar]

أستغفر الله العظيم

أخشى ما أخشاه إن الجُمل المأثورة دي تتناقل بين فئات المنافقين لحد ما نلاقيها بقت في القرآن مثلاً أو في حديث شريف ...

علي رأيك يا سي السيد يا خويا

و مش بعيد كمان صفوت الشريف يعمل له مسند كده و لا حاجة..و يحط فيه الأحاديث الصحيحة بتاعته دي

و يبقي الحديث علي شرط "صفوت" زي شرط البخاري كده.

[أسد]

طيب ..

ما هو صفوت الشريف هو كمان أسطورة ..

وأحمد فتحي سرور .. أيضاً أسطورة ..

وزكريا عزمي أسطورة ..

ويوسف والي أسطورة ..

كلهم أساطير ..

[herohero]

طيب ..

ما هو صفوت الشريف هو كمان أسطورة ..

وأحمد فتحي سرور .. أيضاً أسطورة ..

وزكريا عزمي أسطورة ..

ويوسف والي أسطورة ..

كلهم أساطير ..

مااحنا قولنا اننا بلد اساطيرومازلت مصر اننا شعب اسطورة خيالي خالص 80 ملبيون اسطورة

[fatfouta]

آه بالمناسبة .... الأمن أمبارح نزل ضرب في العمال المعتصمين دي كإنه بيضرب في ناس كفره .. أنا بكيت من المنظر خصوصاً لما تلاقي واحد كبير في السن أتكعبل ووقع وهجم عليه التتار بالعصيان وبالركل بالأرجل كإنه أسير في معركه مع الأعداء ...

ومشوهم من أمام مجلس الشعب وغسلوا الرصيف بالمياه والصابون ابو ريحه ... لأن رئيس وزراء كينيا جاي يزور أحمد نظيف في مكتبه بجوار مجلس الشعب ...

ايوه صحيح عملوها فعلا ونظفوا الأرصفة من المعتصمين تحت شعار (لا أحد ينام على الرصيف)

طب انا نفسى اسأل سؤال هو العسكرى اللى بيضرب واحد مصرى ولا ست او بنت مصرية ده مش بيصعبوا عليه مش شايف حال البلد......مبسوط من اللى هو فيه؟؟؟؟؟

اذاى يضرب مصريين ذيه وهو عارف ومتأكد من ان الحكومة فاسدة وهى اللى تستاهل الضرب مش العكس.....والله بستعجب ودايما السؤال ده بييجى فى بالى اول ماشوف عسكرى بيضرب بافترا كده!!!!

وفعلا العسكرى ده كمان اسطورة لوحده بعد مانضفوا الارصفة بتاعة مجلس الشعب من الى نايمين عليها قام هو اللى نام

لا حول ولا قوة إلا بالله العلى العظيم

..

[engmido]

ما هو صفوت الشريف هو كمان أسطورة ..

وأحمد فتحي سرور .. أيضاً أسطورة ..

وزكريا عزمي أسطورة ..

ويوسف والي أسطورة ..

تماااااااااااااااام

[صافى]

فعلا كلهم اسااااااااااااااااااااااااطير واحنا بقا الى هنطيررررررررررررررررررررررر ربنا يستر ونلاقى بعد كدة حتى كوباية مية لولادنا :P الحمد للة قبل ما جدة مليت كام جردل وكام جركن مية عشان لما ارجع الاقى حاجة نشربها ومش لازم الشقة تتمسح زمنها اتمسحت من زمان ودا لية عشان مبارك والضيشة يرتاحو بقا وصلو الشباب لللقتل والسرقة ووووووووووووووووووووووووووووو الخ من البطالة والمحسوبية اللة المستعان

:P

[شريف مان]

يارب نشكى بيهم ليك

( وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ )

[Sherief AbdelWahab]

أقول لكم ع اللي أغرب..

ينسب في نفس التصريح لصفوت الشريف القول بإن في الوطني فيه خمسين شخصية ممكن تتولى مهام الرئاسة..

طب قول لنا أربعة بس.. :P

خلص الكلام

[mostafamaher]

ارحمنا ياااااااااااااااارب

[mamdowh]

فعلا اسطورة لن تتكرر

خلاصة كل اللى هو عايز يقوله عن الاسطورة

هو مش ماشى قاعد على قلوبكم ( هى الاسطورة بتنزاح من على القلب)

هو عاجباه البلد كده عاجبكم والا مش عاجبكم

هو مش هايغير رئيس الوزراء ولا الوزراء الموجودين عشان شاطرين وبيسمعوا الكلام عاجبكم والا مش عاجبكم

هو بيقولكم مفيش حد يفتح بقه هو فاهم كل حاجه ومدكن واللى هايتكلم مش هاسمعه ولو سمعته مش ها عبره واللى عنده مراره ها يفقعهاله.

اللى عايز يهج من البلد يهج ولما يرجع بعد ما يزهق خاااااااااااااااااااااااالص من الغربه برضه هايلاقينى مستنيه

ولو انت واثق من نفسك قوى وناوى تعيش لحد لما هو بعد الشر بعد الشر يعنى يموت هتلاقى برضة حد من ريحته لييييييييه عشان يكبس على نفسك معقوله يسيبك دا انت حبيبه , دانت اللى اخترته.

وبيقولكم دا انا صاحب الضربه الجويه وانا اللى غليت الفول والطعميه وانا اللى بوظت المنظومة التعليميه ولغيت المجانيه وخليتها صوريه وانا الى عملت ضريبه المبيعات والعقاريه وانا اللى زودت اسعار كل ما يخطر على بالك من السلع الغذائية والغير غذائية والدروس الخصوصيه والادويه واللحمة والمخالفات المروريه وخليتكوا تشتروا شنطة اسعاف للعربيه (خايف عليكم) وجبت لكم كاس افريقيا 3 مرات متتاليه (انجاز غير مسبوق) وشحت لكم ثلات عبارات جداد بدل اللى غرقت يوم كاس افريقية وجبت المبيدات السرطانية والتوك توك والميكروبصات اللى بيسوقها البلطجية واللى مش عاجبه ينزل المحطه الجاية واول من ادخل شركات الزباله الاجنبيه وفى عهدى اصبح كل الناس شمحطجية ( اخد حقى باديه) ولغيت الشرطة وخليتها رشوه وجباية ومحسوبيه وانا اللى حافظت على وزودت المناطق العشوائية وبعت القطاع العام واهملت النقل العام ونامت فى عهدى البلدية , وانا وبكل فخر خليتكم ملطشة جوه مصر ومن كل الدول العربية والاجنبية.............آآآآآآآآآآاه لو اقدر اتحكم فى الهوا ماكنتش عتقتكم .......هاقولكم ايه والا ايه دانتم شعب ناكر للجميل بس برضك مش هاسيبكم وطابق على نفسكم

( فعلا اسطورة لن تتكرر)

[fatfouta]

الشريف‏:‏ كوادر الوطني كلها تتمني ترشح مبارك للأنتخابات الرئاسية المقبلة

5/26/2010 10:04:00 AM

القاهرة - محرر مصراوى - أكد صفوت الشريف الأمين العام للحزب الوطني الديمقراطي أن الحزب بكافة كوادره يتمني أن يرشح الرئيس مبارك نفسه لفترة رئاسية قادمة‏.

وقال صفوت الشريف أن " الرئيس مبارك هو وحده صاحب القرار‏ فى ترشيح نفسه لفترة رئاسية قادمة‏".

‏وأضاف الشريف مساء الثلاثاء أن مصر بها الكثير من القيادات‏ في ظل عهد الحرية والديمقراطية‏ يمكن أن تتقدم للترشيح‏، لكن لا يوجد أحد بحجم الرئيس مبارك‏ فهو أسطورة لن تتكرر‏ فى تاريخ مصر .

ونوه الشريف أن الحزب الوطني لديه قواعد‏ وأسس ، وفي كل لقاءاته واجتماعاته الكل يري أن الرئيس مبارك هو زعيم هذا الوطن وهذا الحزب والكل معه‏.‏

ومن ناحية اخرى ، برر الشريف ضم الحزب للفائزين فى انتخابات مجلسي الشعب والشورى من المستقلين، بقوله: "الظاهرة كانت أوسع فى انتخابات 2005، لكنها لن تتكرر هذه المرة، ولن نسمح، بأى حال من الأحوال، بضم الخارجين عن الحزب إذا نجحوا، لكننى لا أستطيع أن أقول ذلك عن مجلس الشعب، لأن العمل السياسى ليس حكومة، ففى كل مرحلة أفكر بالطريقة التى أحقق بها الأغلبية المناسبة لحزبى، ولولا أن المستقلين هم أعضاء قدامى فى الحزب الوطنى لما فكرت فى ضمهم، وقد رفضت من قبل فصلهم، وقلت إنهم لم يجدوا طريقهم فى المجمعات الانتخابية فاختاروا الطريق المستقل".

وحول إمكانية تأسيس الأحزاب بمجرد الإخطار كما هو مطبق في الخارج، أصر الشريف على عدم الموافقة على هذا الاتجاه للمحافظة على شروط إقامة الأحزاب في مصر ألا وهي أن يكون حزبا ليس فئويا، يتوفر له الانتشار وملتزما الدستور والقانون والمجتمع، ولا يكون حزبا يعمل لحساب فرع في الخارج.

ومين يشهد للعروسة غيركم يا بتوع الحزب الوطنى

المصدر

[hebapharm]

يارب نشكى بيهم ليك

( وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ )

هذه الأيه الكريمه كلما تذكرتها سبحان الله ..كأنها نزلت في حزب الأساطير

حسبنا الله ونعم الوكيل

[DIA ELDIN]

أكيد طبعاً اسطورة ودي حاجة عايزة كلام في ظل التقدم منقطع النظير اللي بنعيشة والرفاهية والبذخ والدلع اللي فية الشعب لدرجة ان الشباب مبقاش يشتغل بسبب الرفاهية الزايدة عن الحد

بصراحة ان شعب مش بيعجبة العجب

[jasmin hamed]

اسطوره اكيد الراجل عمل فى مصر الى ماقدرش يعمله الاحتلال الانجليزى فى 75 سنه

انما لن تتكرر اشك