صنــــدوق ازاااز ....... مطلب جماعي

[ابو محمد بن مصطفي]

الاعلان عن انتخابات مجلس الشوري في التليفزيون المصري هو عبارة عن

اعلان يظهر فيه مجموعة من الفنانين واللاعبين وبعض الجمهور يقفون في طابور

ال ايه مستنين دورهم علشان يصوتوا .....

والمكان اللي هما واقفين فيه مدهون باللون الابيض حتي حجرة الانتخاب كمان باللون الابيض

متقولش وقفين ينتخبوا حزمة فجل

المهم الكاميرا تتنقل بينهم الي ان تصل الي الباب

ويدخل الفنان هشام سليم ويحط الورقة الانتخابية في الصندوق ويخلص الاعلان علي كده

وكام بؤيين حلوين تشجع الناس علي الانتخاب

كلام جميل وكلام معقول

المهم بقي احنا عايزين المشهد الاخير

الا و هو الصندوق اللي بيوضع فيه الاوراق مصنوع من الزجاج

ايه والله صندوق ازاااز

احنا عايزين صناديق الانتخاب تكون مصنوعة من اي ماده شفافة

يبان اللي جواها

واهي بردوه تبقي سبوبة يسترزق منها حد من رجال الاعمال من بتوع الحزب

ماهو مش معقول الانتخابات في دارفور ايه والله في دارفور ويكون الصنادق الانتخابية مصنوعة من البلاستيك الشفاف

واحنا السبع تلاف سنه حضارة لسه بننتخب في صناديق خشب بني

ما تظهرش اللي وقت الانتخاب و بعد كده تترمي فوق اسطح اقسام الشرطة

احنا عايزين نصوت في صناديق ازااااز

اظن ده اقل شئ ممكن نطالب بيه

[رضوي]

السلام عليكم ورحمة الله وبركاته

معلش يااخي الفاضل سؤال ع الماشي

تفتكر ان لو الصندوق بقي شفاف دة هيحل أزمة الثقة من الشعب تجاه النظام ؟؟؟؟؟

أكيد لأ

الحكاية مش حكاية صندوق شفاف .......مع ان دة حقنا

ولازم نطالب به

بس أعتقد ان الموضوع اكبر بكتير من صندوق

تحياتي :rolleyes:

[ابو محمد بن مصطفي]

تفتكر ان لو الصندوق بقي شفاف دة هيحل أزمة الثقة من الشعب تجاه النظام ؟؟؟؟؟

طبعا لا

ولكن هي دي البداية في انتخابات 2010

مع انتخابات 2015 نطالب بان الانتخابات تكون ببطاقة الرقم القومي

ومع انتخابات 2020 نطالب بان الانتخابات تكون عن طريق الانترنت

ومع انتخابات 2025 نطالب بان الانتخابات تكون تحت الاشراف القضائي

ومع انتخابات 2030 نطالب بان تكون هناك لجنة عليا للانتخابات بعيد عن الحزب الوطني

ومع انتخابات 2035 نطالب بتعدد الاحزاب

وبكدا نكون حققنا مطالبنا البسيطه

هي ليه كل حاجة في البلد دي بتكون بطلوع الروح

[hOuSsAm]

هو يا استاذنا الفاضل لسه بنفكر فى الصندوق والحجات القديمة دى ونزاهة القضاة

لا حول ولا قوة الا بالله ...... هنفضل كدة اقل من شعوب العالم

الانتخابات اللى فاتت فى الفلبين واللى كانت من حوالى شهر

كان الصندوق ده مكانه ماكينة شبه الاسكانر المواطن بيعلم عالمرشح اللى هو عايزه ويدخل الورقة فى الماكينة اللى شبه الاسكانر وهى اوتماتيكى تسجل الصوت لصاحب الاختيار يعنى بدون قضاء ولا اى حاجة

وكنت بحقد على زملائى فى الشركة لانهم يوم الانتخابات استاذنوا يتاخروا شوية ورواحوا يسجلو اصواتهم فى القنصلية فى جدة

وكانوا حرصين جدا انهم يحطول صوتهم

بجد بحقد عليهم وبحسدهم عالاقل بيحسوا بمشاركتهم فى الحياة السياسية

انا نفسيتى تعبت من موضوع الانتخابات ده

شوف الخبر ده

تصدر السيناتور بنينو أكينو نجل رئيسة الفلبين السابقة كورازون أكينو، النتائج الأولية للانتخابات بحصوله على أكثر من 40% من أصوات الناخبين بعد فرز الأصوات في معظم الدوائر.

وقال رئيس اللجنة الانتخابية جوزيه ميلو إن فرز الأصوات في 78.55% من الدوائر الانتخابية أشار إلى أن أكينو الابن يتصدر بفارق يزيد عن أربعة ملايين صوت عن أقرب منافسيه.

وبحسب تلك الإحصاءات حصل أكينو على 12.23 مليون صوت، في حين حاز الرئيس المخلوع عام 2001 جوزيف إسترادا على 7.74 ملايين صوت.

وحل السيناتور مانويل فيلار ثالثا بـ4.32 ملايين صوت، تلاه مرشح الحزب الفلبيني الحاكم غيلبرت تيودور في المركز الرابع بـ3.24 ملايين.

ولم تخل العملية الانتخابية من أعمال عنف أودت بحياة عشرة أشخاص، مع العلم أن نحو 30 آخرين قتلوا خلال الحملة الانتخابية في الأشهر الثلاثة المنصرمة.

وشهدت أول عملية فرز بواسطة الحاسوب لأصوات الناخبين البالغ عددهم نحو خمسين مليونا، أعطالا فنية طالت نحو 300 مركز اقتراع.

وتعرضت أكثر من 400 آلة فرز لمشكلات فنية، الأمر الذي دفع اللجنة الانتخابية إلى تمديد عملية التصويت لمدة ساعة واحدة.

وامتدح رئيس اللجنة الانتخابية الإقبال الواضح على التصويت، حيث قال إن نسبته بلغت 75% من الناخبين المسجلين.

يذكر أن السيناتور بنينو أكينو الأب الذي عارض حكم الدكتاتور فيردناند ماركوس عندما عاد إلى بلاده من المنفى عام 1983، وهو ما فتح الباب لزوجته كورازون للفوز بمنصب الرئاسة بعد انتخابات ديمقراطية جرت عام 1986.

واعتبر مساعد سابق لكورازون أكينو التي توفيت في أغسطس/آب الماضي بالسرطان أن أكينو الابن يسير على درب السياسة التي سلكها والداه، وأن مكافحة الفساد الذي استشرى في عهد الرئيسة غلوريا أرويو ستكون من ضمن أولويات أكينو في حال وصوله إلى الرئاسة.

كان نفسى اجيبلك ضورة الماكينة دى بس مش لاقيها عالنت خالص مع ان زميلى ورهانى على موقع

ولا اقولك شوف يا باشا الفيديو ده وشوف اد ايه احنا لسه ورا اوى اوى اوى كمان

http://www.masrawy.com/News/Videos/Reuters...24.aspx?ref=rss

الفلبين دولة صغيرة اوى بالنسبة لمصر ومواردها ضعيفة جدا وشعب غلبان ومش طموح اوى (بس للاسف تفوقوا علينا)

[محمد عبدالعزيز]

المشكلة مش فى الصندوق زجاج ولا بلاستيك, لأن بقى عندنا فعلاً صناديق زجاج من الانتخابات الماضية.

المشكلة الحقيقية إنك مش بتقدر توصل للصندوق عشان تقول رأيك بحريتك, ولو وصلت وقلت رأيك فى الصندوق بحرية, فى ناس تانية بتفهم مصلحتك أكتر منك وبتغير رأيك من غير ما تاخد بالك.

[اغابي]

يا استاذى الفاضل

هو احنا حنتجمع علشان يبقي مطلبنا برضوه صندوق ازاز وتعبين نفسنا وخبطين مشوار وتاكسيات علشان نطلب صندوق ازاز

اعتقد ان مطلب الشعب المصري عمره ما كان مظاهر او شكل الصندوق ايه او لونه ايه

او عضو مجلس الشورى لابس الكرافت لون البدلة ولا مافيش تنسيق الوان

او بيقول حاجة وبيتصرف عكسها ولا .... ولا ...ولا .... ولا ...ولا .... ولا ...

ولا .... ولا ...ولا .... ولا ...ولا .... ولا ...ولا .... ولا ...

اعتقــــد ان المطلـــب الجمـــاعى لينـــا -

عمــره ما حيكـون صناديـــق ازاز

اغابي

[مغتربة]

تفتكر ان لو الصندوق بقي شفاف دة هيحل أزمة الثقة من الشعب تجاه النظام ؟؟؟؟؟

طبعا لا

ولكن هي دي البداية في انتخابات 2010

مع انتخابات 2015 نطالب بان الانتخابات تكون ببطاقة الرقم القومي

ومع انتخابات 2020 نطالب بان الانتخابات تكون عن طريق الانترنت

ومع انتخابات 2025 نطالب بان الانتخابات تكون تحت الاشراف القضائي

ومع انتخابات 2030 نطالب بان تكون هناك لجنة عليا للانتخابات بعيد عن الحزب الوطني

ومع انتخابات 2035 نطالب بتعدد الاحزاب

وبكدا نكون حققنا مطالبنا البسيطه

هي ليه كل حاجة في البلد دي بتكون بطلوع الروح

لا لسه مطلب مهم

2040 نطالب بحق المصريين المغتربيين فى الانتخاب

[fatfouta]

لا لسه مطلب مهم

2040 نطالب بحق المصريين المغتربيين فى الانتخاب

معاكى فى المطلب ده يا مغتربة جداا

بس اشمعنى سنة 2040؟؟

[مغتربة]

لا لسه مطلب مهم

2040 نطالب بحق المصريين المغتربيين فى الانتخاب

معاكى فى المطلب ده يا مغتربة جداا

بس اشمعنى سنة 2040؟؟

ما هو انا مشيت على التسلسل الى مشى عليه ابو محمد

فوصلت ل 2040

لكن كلام فى سرك لو مفيش اى حاجه من المطالب الى اتذكرت قبليه اتحقق

يبقى ضيفى عليهم كمان 100 سنه

[ابو محمد بن مصطفي]

طول ما فيش فصل في السلطات والعملية سايحة وعايمة يبقي كل اللي فات احلام واوهام

دلوقتي الدعاية لانتخابات مجلس الشوري بيقت حاجة تغيظ اي والله

فجأة تلاقي جمعية فولان العلاني الترتاني للاعمال الخيرية (لم نسمع عنها من قبل في المنطقة السكنية)

تم انشاء الجمعية طبقا لدخول الانتخابات

شوفو الانشطة

كفالة الايتام

الارامل

تشغيل الشباب

العلاج المجاني

الدروس الخصوصية المجانية (الملازم مجانا)

لصاحبها كذا ابن كذا مرشح مجلس او الشوري الشعب 2010

لا وايه كمان ايام الهوجة والفره بتاعت ماتش الجزاير تلاقي الاعلان دي

رجل الاعمال كذا بن كذا يدعوكم لشجيع المنتخب ويسره بان يقوم بعمل تشجيع جماعي بميدان *** مجانا (دي حقيقة)

ويكتب علي اليافطة يلا نشجع مصر - مصر امانة في ايدينا

شوفتوا انا بتكلم في ايه وهما بيفكروا الزاي

طالما لم يبعهد رجال الاعمال عن دخول مجلس الشعب او الشوري

يبقي كل اللي فات دي اوهام

وليه واشمعني رجال الاعمال لان هما فعلا اللي بدءوا الدعاية لانتخابات مجلس الشعب من دلوقتي

فعذرا فتوفتة ومغتربة لو البلد هتمشي بالنظام ده

يبقي ممكن المطالب تتحقق علي 2200

المقترح دي كان حالة من الشعور بالاحباط مما يحدث في البلد