مبروك للزمالك بطولة الدوري لعام 2003/2004

[se_ Elsyed]

كان فوز الزمالك على فريق الإسماعيلي بالإمس 2-1 ( كالعادة ) هو بمثابة إعلان رسمي لفوز فريق القلعة البيضاء ببطولة الدوري للعام الثاني على التوالي حيث ان الإسماعيلي كان اهم عقبة امام الزمالك ولكن أنا شخصياً كنت لا اعتبرها عقبة حيث أن الفريق البرتقالي غالباً ما يكون وديعاً أمام الزمالك وينهزم منه عن طيب خاطر رايح جاي .. ويمكن الرجوع إلى السجلات الكروية في الاعوام الاخيرة ....

ما علينا .

وحيث ان المتبقى لبطولة الدوري هو ست مباريات فيكفي الزمالك الحصول على 11 نقطة منهم لكي يضمن الفوز بالدوري حتى لو فاز الاهلي بجميع المباريات المتبقية .

وهكذا سنستمر في التشطر على بعضينا ، والزمالك يكسب الدوري من الاهلي والاهلي يكسب الكأس من فريق أسمنت سوهاج .. اما لما نيجي للمنافسات العربية والأفريقية بنبان بقى على حقيقتنا وبتبقى فضيحتنا بجلاجل لأن النظام الفاسد لا تتوقع أي نجاحات منه وحتى لو حصل نجاح فبيبقى عشوائي ولا يستمر كثيراً ..

س س ناقض ريادي .

[afiona]

وحيث ان المتبقى لبطولة الدوري هو ست مباريات فيكفي الزمالك الحصول على 11 نقطة منهم لكي يضمن الفوز بالدوري حتى لو فاز الاهلي بجميع المباريات المتبقية

ماتفولش يا حاج س.س......

دى مش بعيدة على الزمالك أبدا إنه يخسر 8 نقاط فى 6 مبارايات، وخصوصا وإن أجواء كوماسى بتسيطر على النادى.

على فكرة، لما قطبى الكرة الحلوة (الزمالك والإسماعيلى) يلعبوا، الأهلوية صعب يفهموا الكرة الجميلة دى...بلاش تتفرجوا أحسن...

[se_ Elsyed]

على فكرة، لما قطبى الكرة الحلوة (الزمالك والإسماعيلى) يلعبوا، الأهلوية صعب يفهموا الكرة الجميلة دى...بلاش تتفرجوا أحسن...

يا عم صلي عالنبي في قلبك ...

قطبي إيه ويلعبوا فين ؟

هما بصراحة بيلعبوا أيه حاجة غير الكوره ... بأمارة الأربعات اللي عماله ترف إيشي في تونس وإيشي في الهوتو التوتسي ...

مصر يا أفيونة يابني مافيهاش كورة ... انا جالي كساح من ساعة ما قناة الجزيرة الرياضية بقت تذيع الدوري الأسباني وأصبحت اواظب على مشاهدة مبارياته وهم بصراحة بيلعبوا حاجة تانية غيره الكوره اللي نعرفها واللي عندنا من برطعة وجس النبض اللي ممكن يقعد 90 دقيقة وغير الطرق الدفاعية بتاعت شيخ المدربي العقيد متقاعد محمود الجوهري ووالله زمان يا سلاحي وغير اللعيبه اللي عندها انيميا البحر الأحمر المتوسط ....

خليها عالله وماتقولش قدام حد إن أحنا بنلعب كوره عشان مايقولش عليك بتكدب .

[afiona]

وحد قالك تتفرج على الدورى الأسبانى ؟ ماله دورى الشركات وكأس الرئيس والدورة الصيفية ؟

أنا كل لما أتنمرد على كرتنا المصرية الحبيبة، أحط شريط ماتش أيرلندا ومصر 1990 .....فكر عالى غير تقليدى فى شل المنافس والحكم والجمهور...