اقتراح باضافة بابين للمحاورات ..

[doha]

لاحظت من فترة اختفاء باب رساله الى مسؤول مش عارفه ان كان الاختفاء ده حقيقي ولا انا الي مش عارفه ادور ولا ان كان مؤقت او دائم بس هو على كل حال مش ظاهر عندي ..

بقترح بعد اذنكم ولو في امكانيه وطالما الباب ده معادش موجود ان يتم انشاء بابين جديدين عوضا عنه ..

الباب الاول يكون بنفس فكرة رساله الى مسؤول تقريبا بس ميكونش شكاوى ولا يكون رصد سلبيات وانما يكون باب لتقديم المقترحات الايجابية لتحسين الوضع الداخلي في مصر .. يعني باب للحلول او الخطط الي ممكن تصلح حاجه مهما كانت صغيره وطالما ان في عقل ممكن يفكر فيها فياريت يكون هناك باب يوصل صوت العقل ده ..

المواضيع الي هتضاف للباب ده متكونش باسم المسؤول الي يفترض بيه الاطلاع عليها وانما تكون بعنوان المشكلة الي الموضوع بقدم لها حل ..

الباب التاني الي بقترح اضافته هو باب بعنوان مصر بخير ..

اي حد شاف اي حاجه ايجابيه سواء بقى كانت الايجابيه دي في انجاز تم عمله او شخص بيعمل حاجه تستحق نسلط عليها الضوء او مشكلة وتم حلها .. اي حاجه مهما كانت بسيطه بل بالعكس مطلوب اوي تكون بسيطه .. اي حاجه من الي بتتجاهلها وسائل الاعلام عاده وبيتجاهلها المغرضون عن عمد .. الحاجات الصغيره دي الي معدناش بنشوفها من كتر مابقينا بنركز على السلبيات والنقد ..

نعمل باب ( لبروزه ) الايجابيات في حياتنا ومين عارف يمكن يجي اليوم وزي ماسبق وانتقلنا من دولة محترمه هي كبرى الدول العربية وفضلنا نجلد في ذاتنا ونعيب عليها بحجه نقد العيوب وتعريتها لما بقينا عريانين وعلى عينك ياتاجر .. نرجع تاني مع تركيزنا على الايجابيات ونستعيد ولو جزء من الي كنا فيه ..

اتمنى برضه ان يكون في عنوان بريد الكتروني واضح ومثبت في اعلى الباب للمراسلة عليه في حاله ان الي عنده اقتراح ومفيش عنده عضويه يقدر يشارك عبر ارسال اقتراحه للعنوان ده .. محدش يقولي ان في امكانيه لمشاركه الزوار في المحاورات لاني هرد واقوله مش كل الزوار عندهم خبرة في التعامل مع النت وفعلا في ناس بتستصعب جدا انها تكتب في منتدى وتدخل كلمه سر ومش عارف ايه وعندها المراسله عبر الايميل افضل بكتير ده من جهة ومن جهة تانيه اتمنى ان يتم نشر الايميل ده في المواقع الاجتماعية زي الفيس بوك او عبر رسائل بريديه نطلب فيها من كل واحد عنده اقتراح كويس في اي مجال مهما كان صغير او بعيد اي فكرة تساعد وتطور او تحل مشكلة قائمه ياريت يرسلها على الايميل ده والمحاورات بدورها هتنشرها على صفحاتها لعل وعسى يجي يوم حد من الي في ايدهم الامر يقراها ويعمل بيها ..

اعتقد ممكن تساعدنا صفحه المحاورات على الفيس بوك في الحكايه دي كتير ..

برضه يتم تفريغ الايميل ده من قبل المشرفين ( معليش بقى بزود عليكم الحمل بس حمل على حاجه مش خساره فيها التعب ) .

اتمنى دراسة الاقتراحين دول وامكانية تنفيذهم ..

وشكرا على سعه الصدر ..

[الغريب]

معاكي يا ضحى

وأعتقد أن المغتربين "الجمهور العام للمحاورات" لديهم إمكانيات للحلول الإيجابية للبلد

[لماضة مصرية جدا]

السلام عليكم و رحمة الله و بركاته

استاذتي الفاضلة ضحي

انا كنت بقرا من فترة عن قصص نجاح مصرية و كنت بفكر فعلا ان احنا نتشاركها عشان تورينا صور حقيقية اوي...و اجمل ما فيها انها مصرية اوي اوي

بس الحقيقة كنت بفكر احطها في توبيك قيم لاستاذنا احمد سيف بعنوان "جنود مصر المجهولين" في باب انجازات المصريين

او نخليها باب لوحده....او موضوع بدماء متجددة

تحياتي استاذتي