سؤال ..... اطرحه الى كل أب و أم فلا تبخلوا علي بالرد.........!!!

[اغابي]

الصــــدق - والصـــــداقة - و الحــــــــرية

وباختصار شديد يجب معاملة وتربية طفلك الا تخرج عن اى ضلع من الاضلاع الثلاثة للمثلث

اغابي

[doha]

لو تسمحي لي اشارك في الموضوع في جزئية محدده منه وهي ( حلمنا لابنائنا ) سواء بهدف محدد او مجرد انهم يكونوا ( حاجه كبيرة ) ايا كانت الحاجه دي ..

حكت لي وحده اثق فيها عن قريبه لهم كانت بتدعي دائما وابدا لابناءها انهم يكونوا ناس مشهورين وانها ( تقرأ اسمائهم في الجرائد ) .. مكانتش دي مجرد دعوة الام بتدعيها من القلب وخلاص وانما كان ( منهج ) وعقيده عندها ان عيالي دول لازم يكونوا شيء بغض النظر بقى الشيء ده ايه صح ولا غلط المهم انهم يكونوا مشهورين وانها كسيده عاديه مغموره عيالها دول لازم يجي يوم وتقرأ اسمائهم في الجرائد

انا معرفش عيالها كلهم طلعوا ايه بس اعرف ان واحد منهم هو الاسم الغني عن التعريف ( رشاد خليفه ) الي سافر برا واشتهر واتعلم وكان له افكار ابرزت اسمه في الجرائد والاوساط الثقافيه .. واعرف برضه انه غالى في افكاره وفلسفته الخاصه حتى وصل لادعاءه النبوه قبل مايتم اغتياله على يد احد اتباعه !!

كما العاده خضيتك مش كده ؟

عادي جدا .. الي بيركز على حاجه في تربيه ابنائه وينذر حياته كلها لتحقيقها لازم هينالها وسبق وقلت ان دي مش شطاره اني احلم بحاجه لاني لازم حققها طالما اصررت عليها وانما الشطاره اني اعرف احلم بايه عشان مضيعش مني حاجه اهم ..

مينفعش اني اربي ابني على انه يبقى داعية القرن ولا ينفع برضه ازرع فيه بالغصب حب العلم او حتى تذوق الشعر . .

في فترة من فترات دراستي كان عندنا دكتور هو زميل للدكتور زويل في كلية العلوم لسنوات الدراسه كلها قبل مايسافروا هم الاثنين لامريكا ويرجع ( دكتورنا ) ويبقى زويل هناك ..

قال لنا الدكتور عن زويل انه هو ( خلقته ) كده من يوم ماكان في ثانيه كليه كان بيقعد الدكاتره في السكشن وهو يشرح لهم .. قال بان زويل ـ على حد تشبيهه ـ حاجه في التفكير متفرده تماما زي ام كلثوم في الغناء ..

بمعنى ان الدكتور احمد زويل مش نتاج تربية فقط ولا بيئة كويسه تلقفته فاحسنت استغلاله وانما هو من البدايه موهوب موهبة غير طبيعيه لقيت الظروف المناسبة الي نمت فيها ..

نفس الشيء تقريبا سبمعته عن الشيخ القرضاوي ربنا يحفظه كان زميل لوالد زوجي في سنين الدراسه الثانوية والجامعيه .. سنة بسنة .. قال عنه نفس الكلام .. هو القرضاوي من صغره متفرد ومن صغره خطيب مفوه ومن صغره وهو ( نبيه ) .. كانوا كلهم عارفين ان يوسف ده هيبقى في مجال الدعوة ذو شأن ..

يبقى المفروض يكون هدفي اني اسخر كل امكانياتي عشان ابني ده يبقى شخصية رائعه بقدر الامكان .. اراقبه من بعيد ولو لاحظت تفوقه او نبوغه في مجال ما ابدأ احاول بكل مااوتيت من سبل اني انمي الجانب الكويس ده فيه واصقل موهبته الربانيه لعل وعسى تكون هي دي رسالته في الحياه ..

طيب وافرض لاقدر الله ملاحظتش حاجه ؟

خلاص هعمل الي علي تجاهه وبما يرضي ضميري ويسترني يوم القيامه لما انسأل عملتي ايه في تربية الامانه الي كانت تحت ايدك ..

متاكده لو كل واحد فينا ( راعى ربنا ) في تربيه ابناءه علمهم الصح والغلط .. نمى شخصيتهم واتخاذ القرار عندهم .. زرع فيهم محبة الله ومخافته .. وقف جنبهم بقدر احتياجهم وبما لا يتداخل مع اعتمادهم الذاتي على النفس .. اتوقع لو عملنا كلنا كده مش هيبقى في اي مشكلة ..

[صافى]

اغابي

أسمحيلي يا أغابي أختلف معاكي

مش معنى الكلام هنا في الموضوع أن لازم الولد يبقى رمز ديني

بس لازم نربي ولادنا تربية القادة المغيرين

النهاردة كل الشعب المصري متربي بنفس القواعد اللي وردت في مشاركتك والنتيجة أنهم منتهى السلبية في حل مشاكل بلدهم ، ولسان حالهم "وهو أنا اللي هصلح الكون"

عاوزين نماذج زي أحمد زويل ، زي البرادعي ، زي مصطفطفى محرم ، زي سمير بانوب

تحياتي

استاذ غريب - حضرتك اكيد قريت مداخلتى ؟ ؟ - متاكد ؟؟

لان - العكس - تماما

كلنا اتربينا فى بيوتنا على عدم الديمقراطية وعدم الحرية وكبرنا على هذا النمط من التربية - راجع موضوع كان كاتبه مكاوى بخصوص النقطة دى حاحاول اجمع اللينك .

( ملحوظة :

انا اختلف لان والدى ووالدتى كانت طريقتهم فى تربيتنا مزيد من الحرية ) لكن 99% من النماذج التى حولى - العكس تماما لدرجة كنت باسال ليه بابا وماما مختلفين

عن كل اهالى اصحابي وقرايبى وخالاتى وعماتى .

- عدم الديمقراطية فى تربيتنا كمصريين اصبحنا بها كما تفضلت - فى منتهى السلبية في حل مشاكل بلدنا - والعقد والخوف

الاساس من البيت يا استاذى -

لك ان توافقنى الراى او تختلف معى

- هل اهالينا اعطونا مزيد من الحرية فى طفولتنا - اننا نختار لبسنا - اكلنا -

ميولنا وهوايتنا والكلية اللى بنحبها ؟؟ سؤال للجميع ؟

الى هذه اللحظة - التى نتبادل فيها الحوار - الاسلوب الخاطىء فى التربية مستمر - للاسف .

مش معنى كدا انى بقلل من شان الاب والام وسلطتهم فى البيت - بالعكس

انا باطلب فقط من الاب والام يعطوا مساحة من الحرية لاولادهم ويكونوا اصدقاء ليهم وديمقراطيين معاهم

- فيها ايه لما ابنى يطلب انه يغيب مرة حتى فى الاسبوع من المدرسة - مفيش مشكلة غيب .

- فيها ايه لما ابنى يطلب نهاردة وفى الوقت داه تحديدا ما يحلش الواجب ويلعب جيمز على الكمبيوتر

- ليه الكمبيوتر والكرتون مكافأه بعد المذاكرة و ليس قبل المذكرة كنوع من التشجيع .

ليه الذهاب الى مكان العبادة - مرتبط بعذاب الضمير مع الطفل ؟؟؟؟

شوف يا ابنى لان ربنا حيودبنا النار وحنبقى من الكفار لو ماروحناش نصلى - ويبدأ عذاب الضمير مع الولد من طفولته مقترن باسم مكان العبادة -

وما يكونش علشان مبنى على محبة ربنا - ونفهم الطفل ان ربنا موفقنا فى حياتنا وبيساعدنا فى كل امورنا زمدينا صحة ونجاح وبابا وماما

وفى اولاد كتيررررررر - ما عندهمش اهل ولا بابا وماما ولا فلوس ولا اكل ولا بيت ولا لبس واقل واجب يا حبيبى اننا نروح نصلى

ونشكر ربنا ونروحله كمان لغاية بيته ونقوله احنا جينا لغاية عندك يا رب علشان نقولك شكرا

وبراحتك يا حبيبي عاوز تروح تصلى وتشكر ربنا روح مش عاوز مش مشكلة براحتك - خليه يروح باقتناع وبمحبة لله مش خوف ورعب وعذاب ضمير وعذاب الجحيم .

ليه المدرسة مش عنصر تشويق كانه رايح نادى مثلا - بدل ما هى عنصر عقاب لا ينتهى مع الولد

- كل يوم الصبح عقاب متجدد بالذهاب الى المدرسة

ليه الحوار بينى وبين اولادى ما يبقاش مبنى على الحكاوى والاحداث اليومية والالغاز والضحك والنكت

اومناقشه تفاصيل ما حدث بالمدرسة - واتعامل مع ابنى على انه صديقي وراجل فى وقت الزنقة استنجد بيه

ليه الحوار بينى وبين اولادى ما يكونش فى صيغة طلب بدل امر - كله اوامر فى اوامر - مثلا لو سمحت علشان خاطرى

ليه ما يتحولش عندهم لمشاركة فى الراى - فيها ايه انى اوافق وابقى راى من رايه

- فعلا يا حبيبى عند حق - بد ما اقول ايه انت بتعند معايا انت عنيد ليه - وابدأ سلسلة من التهديد والوعيد

مزيد من الحرية مع الابناء من فضلكم - - اعكسوا كل الطرق التقليدية والعتيقة - اللى اتربينا بيها ونفذوها فى اولادنا

فى راى حضرتك كام فى الميه من الشعب المصري اتعاقب فى طفولته من الاب او الام بالضرب العنيف جدا جدا - والاهانات - نقول 99 %

كام فى الميه من المصريين كانت لغة الحوار الراقى والحرية هى اللغة السائدة فى بيوتنا وبين الاب والابن نقول 1 %

دا احنا كنا نشوف ابونا بيتعاقب من جدنا وهو و اب وقدام الاولاد والاحفاد - داه - اسلوب خاطىء جدا فى التربية - والنتيجة شعب سلبي وبيخاف

مزيد من الحرية مع الابناء من فضلكم

اخيرا يا استاذ غريب من قال لحضرتك ان أحمد زويل ، البرادعي ،

مصطفطفى محرم ، سمير بانوب سعداء فى حياتهم

ومش يمكن ابنك يكون اسعد وانجح منهم بمراحل ؟؟

تحياتى استاذى

اغابي

انا معاكى فى الرد دة يا اخت اغابى بس مع كل ذلك لا اترك الحبل على الغارب لازم يكون فى حدود للحرية دى ويكون عنينا عليهم بمعنى اصح نديهم الحرية فى ذلك ونراقبهم من بعيد لبعيد يعنى ممكن انزل استفسر واسال وكلة من بعيد لبعيد مع توخى الحذر

[عشق الكلمات]

عندى سؤال معلش

هى ليه الست المصرية مبتحلمش لنفسها ابداااااا؟؟؟؟؟؟؟؟؟؟؟؟؟؟؟؟؟

كل احلامها يا لابنها او بنتها يا لجوزها

وكلها احلام مبالغ فيها

يعنى عاوزة جوزها يبقى رئيس شغله

وابنها يبقى الاول ع الفصل

وبنتها اجمل واحدة وتتجوز اغنى راجل

؟؟؟؟؟؟؟؟؟؟؟؟؟؟؟؟؟؟؟؟؟؟؟

انا عن نفسى بحس اننا لما بنحلم لولادنا حلم تفصيل يعنى عالمقاس يعنى عاوزك تبقى دكتور وياريت لو جراح وتشترى عيادة فى شارع كذا ناقص نحلم بمواصفات العيانين كمان هههه

بحسها تقل على الولاد

يعنى بنتقل عليهم ولو هما متربييين ومؤدبين بيتعبو اوى لما يحسو انهم فشلو فى تحقيق احلام اهاليهم وده اللى غالبا بيحصل

ولو مش مؤدبين بيبجحو فينا واحنا اللى بنحس بالندم ع العمر اللى ضيعناه عليهم هدر

اكيد بحلم انهم يكون كويسين وناجحين بس بدون تفاصيل

يعنى فى المجال اللى يحبوه وبالطريقة اللى تناسبهم ويقدرو عليها