مهن اختفت من حياتنا

[سقراط المصري]

في بعض المهن اختفت من بلدنا يمكن بحكم التطور او الزمن ، زي مهنه المكوجي ( حد فاكر مكوجي الرجل) ، وزمان قوي كان في مهنة السقا لو حد عمره كبير شويه هيفتكر المهنة دي.

حد فاكر مهن اخرى اختفت من حياتنا؟

سقراط

[مينا المصري]

شكرا يا عم سقراط على المعلومات الحلوة بتاع المهن القديمة و متنساش كمان منهة الزبال و عسكري الدورية .. يا ترى حد بيشوفهم اليومين دول..

[se_ Elsyed]

و متنساش كمان منهة الزبال و عسكري الدورية .. يا ترى حد بيشوفهم اليومين دول

إيه يا عم مينا .. الزبال لسه موجود يا باشا لأن مش كل مناطق القاهرة تم تطبيق موضوع الشركة الأسبانية فيها .

- وعسكري الدورية إترقى وبقى يركب عربيات الأتاري اللي بيسموها الدوريات .

ولحد يمكن 5 سنين فاتوا كنت بأشوف واحد مكوجي رجل في منطقة قريبة من حتتنا .. ومع إن الدنيا كلها بقت لاندري وكوي بالبخار وحركات إلا إنه كان متمسك بالموضوع ده ولو كنت معدي من هناك كنت احب أتفرج عليه .

- مبيض النحاس : من المهن التي انقرضت أيضاً و كان يؤدي رقصات أشبه ما تكون بالهيلاهوب وهو يؤدي عمله في جلي الحلل والصواني النحاس.

- الطرابيشي : ... هــــــــــــيه يرحم زمان وليالي زمان لما كنت اخد الطربوش أبو زر من على الجنب وأنا صغير في اوائل الأربعينيات كده وأروح لعم متولي الطرابيشي في المغربلين عشان يكويلي الطربوش في القالب ... أيـــــــــــــــــــــام .. الله يسامحك يا عبد الناصر .

- صانع القباقيب : ..... وهذه أيضاً حتى وقت قريب كانت موجوده حيث ان كثير من المساجد في مصر كان لسه فيها قباقيب عشان الناس تلبسها وهي بتتوضا وفي الرايحة والجاية تسمع صوت طرقعة القباقيب الخشب.

- صانع السلال : .... ده بقى لسه موجود اللي هم بيصنعوا الأقفاص ومنتجات الخوص ولكنها أصبحت قليلة .

- السمكري : مش بتاع العربيات .. ولكن اللي " بنصلح بوابير الجاز نعــــــــــــــــــــــــــمر .

- بائع الجاز : الراجل ده لسه فكره من زمان فكان بيلف بعربية يجرها حمار وهي شكل الفنطاس ولكن صغيرة وكان له نداء شهير من كلمة واحده بيطلعها من نخاشيش نخاشيشة " جعــــــــــــــــــــــــــــــــــــــاز " مش عارف ليه كان بيضيف حرف العين بعد الجيم .... الله يسامح بتوع أوبك من ساعة ما رفعوا سعر برميل البترول والرجل حاله أتوقف .

- قارئة الفنجان : او بمعنى أصح الست الغجرية اللي كانت بتعدي وشايله قفه فيها شوية رمل على كام محارة مستورداهم من راس البر وتطلق نداءها المعروف " أبين زين وأضرب الودع وأشــــــــــوف "

- الراجل بتاع صندوق الدنيا : حبيبي .. كنت زمان ساكن في شارع مصر والسودان وكان على طول الراجل ده يعدي وشايل البتاعه اللي شكل البيانو ولها منافيلة من الجنب وقدامها دكة خشب وإحنا نقعد على الدكة ونبص في عدسة مقعرة ونغطي راسنا بحتت قماش زى ما نكون هانصور وهو يدور المنافلة وتتعرض قدامنا صور عن حكايات الزناتي خليفة وعنتر إبن شداد والناس الحلوه بتاعة زمان دي .. واوقات كثيرة كنا نتعامل معاه بالمقايضة - آه والله - يعني سندوتش جبنه .. كحك وبسكوت لو كنا في العيد ... والأمور كانت بتمشي .

- حلاق الصحة : ده بقة سكر وعسل مكرر .. فهو طبيب إستشاري ومتخخص في جميع الامراض ، وتمرجي ، وإسم الله على مقامكم بيقوم بعمليات الختان ( صبيان بنات كله شغال ومافيش عنده مشاكل ) وتمرجي ، بالإضافة إلى إنه حلاق .. أما شنطة العدة قصدي شنطة الكشف التى غالباً ما تكون مصنوعة من الجلد او الخشب ففيها احدث الأجهزة الطبية والحلاقية الموجودة بالسوق وطبعاً كان طايح في القرى والنجوع وماكنش أي طبيب يقدر يقرب من منطقة نفوذه وكانت أزهى أيامه واللي بيعمل فيها قرشين نضاف هي أيام الموالد .. حيث ينصب الكشك الخشبي اللي الباب بتاعه عبارة عن حتة قماش زي الستارة كده في وسط المولد وما بيبقاش ملاحق شغل حيث ان الناس القرويين يستغلون هذه الفرصة عشان يختنوا أطفالهم في الليلة الكبيرة .

- المجبراتي : وده هو طبيب العظام بتاع زمان .. فشكارة الجبس موجوده والشاش موجود وأي كسر أو خلع في العظم يجيب الأراوانه وينقع الشاش في الجبس وشوف شغلك يا عم .

- صانع الطبالي : أصل عدم اللامؤخذه زمان ماكناش نعرف ترابيزة السفرة ولا الحاجات التى اخذناها من الفرنجة tth: وكان الراجل ده اساساً نجار بس بيبقى متخصص في صنع الطبلية وكمان الكنبة الإسطنمبولي ( الفوتية بتاع اليومين دول ) وكمان لما كان يبقى له مزاج كان بيصنع كراسي الحمام لأن زمان ما كنش في بانيو ولا حركات من دي برضوا ( كويس اللي كان فيه حمامات من أصله ) .

- الفخراني : مش يحي الفخراني لأ ده واحد تاني كان متخصص في الصناعات الفخارية من اول القلة لحد الزير فمكناش نعرف الثلاجة ولا الأيس ميكر ، وكان بيصنع برضوا المسقا اللي بنحط فيها ميه للفراخ والحمام ... والان تحولت هذه المهنة إلى صناعة التحف الفخارية التي تزين البيوت وماحدش بقى يفكر في القلل ولا دياولوا إلا القليل طبعاً .

- الأراجوز : وقد لقي حتفه منذ ان إنتشرت السنيمات والفيديو .

كفاية كده لحسن الناس هاتقول علي إن أنا من أيام الخديوي عباس حلمي .

ولو أفتكرت حاجة تاني هاجي احكيها .

[R.M.G.]

وبتاع المفاتيح صاحب النداء الشهير"كوالين اعمر"

وسنان السكاكين اليدوي اللي معاه بتاعه كده بيدورها برجله تقوم تلف حجر لسن السكاكين وكن نداءه"آسن السكينه والمقص"

والحاوي اللي كان بييجي الشارع ينام ع المسامير وينط من وسط حلقة النار اللي مليانه سكاكين واللي بيشرب الجاز وينفخ النار من بقه

[se_ Elsyed]

وبتاع المفاتيح صاحب النداء الشهير"كوالين اعمر"

وسنان السكاكين اليدوي اللي معاه بتاعه كده بيدورها برجله تقوم تلف حجر لسن السكاكين وكن نداءه"آسن السكينه والمقص"

دول موجودين بس تم تقنين عملهم ، يعني كل واحد فتح له محل وبقى يمارس فيه عمله وبلا لف بلا وجع دماغ ..

س س باحث في التراث

[فــيــروز]

الراجل بتاع صندوق الدنيا : حبيبي

ياااااااااااااااااااااااااااه

انت قديم اوى كده يا س.س. !! بتوعى على بتاع صندوق الدنيا؟ gsm::

من الناس الذين لم اعد اراهم فى الشارع صانع الطبل :P

يا سلام ده كان يعمل مهرجان فى الشارع اللى كان فيه بيت جدتى الله يرحمها gt:

الواحد كان يشترى الطبله بسبب الهيصه اللى الراجل عاملها ha)

كمان كان بيبيع مع الطبل ناى .. و الواحد لمجرد ان بتاع الناى بيعزف عليه بمهاره يتخيل انه مجرد ما يشترى الناى هيعزف هو كمان اعذب الالحان mc(:

مفيش الراجل يمشى من هنا و آجى اعزف الاقى الناى بيطلع الحان نشاز mf( احاول معاه مره و اتنين و اما اقتنع بفشلى الذريع ارميه فى اى حته لانه رمز الفشل و الخيبه القويه :angry:

دلوقت كل ما اشوف طفل صغير فى الشارع يشترى هارمونيكا ويبقى هيموت ايده تتلم عليها عشان يعزف هو كمان زى البياع ابقى هاموت على نفسى من الضحك و اقول والله زمان mc:

[abofasad]

الحقيقة .. والحق يقال

س. س. موسوعة معلومات

ما شاء الله عليك

اللهم لا حسد

بتجيب المعلومات دي منين؟

بيتيألي انك ممكن تاخد اي رواية وتعملها سيناريو وحوار ولا أجدع سيناريست محترف.. ايه رأيك ما تفكر في الشغلانه دي.

تحياتي لك أخي العزيز

[lالمطحون]

ربنا يديك الصحه يا س س حاجه جميله وبعدين عجبنى اكتر موضوع مصر والسودان لانى كنت فى النقراشى الاعدادى زمان قوى واحلى ذكريات الصياعه فى الحدائق كانت ايام رائعه فعلا

[se_ Elsyed]

فيروز كتبت

انت قديم اوى كده يا س.س. !! بتوعى على بتاع صندوق الدنيا؟

إنتي هاتعملي زي زوجتي كل شوية تقولي ده انت توعى على فحت البحر مع إن الفرق بيننا 9 سنين إلا شوية .. بس الفرق الحقيقي هو إن فيه ناس بتتولد ومعاها ذاكرة فوتغرافية ومابتنساش حاجة حلوه شافتها حتى لو كانوا صغيرين .

ومع إني مواليد 72 إلا إني فاكر حاجات كتير جداً من فترة السبعينيات .... هــــــيه دنيا

أبو فصاد كتب

بتجيب المعلومات دي منين؟

يا عم أبو فصاد إحنا اتودلنا وأتربينا في القاهرة لكن لحد إعدادي كده كنت لازم أسافر الريف كل إجازة صيف حيث الأهل والأجداد .. والريف بقى كان مليان حاجات من دي قبل ما تيجي المدنية الحديثة تمسخه ويبقى بتوع الريف زي اللي بيرقصوا على السلالم .. لا منهم محصلين ريف ولا منهم محصلين حضر.

بيتيألي انك ممكن تاخد اي رواية وتعملها سيناريو وحوار ولا أجدع سيناريست محترف.. ايه رأيك ما تفكر في الشغلانه دي.

إيدي على كتفك .. بس إنت عليك التمويل يعني نختار كام عيل من اللي طلعين جداد في التمثيل ونعمل حاجة كده زي فيلم اللمبي وناكل بقلاوة ومن ورا الإيرادات اللي هايحققها الفيلم .

المطحون كتب

لانى كنت فى النقراشى الاعدادى زمان قوى واحلى ذكريات الصياعه فى الحدائق كانت ايام رائعه فعلا

قشطة يا مطحون ... اخوك الصغنن كان من شارع أحمد شفيق ( مش كان إسمه كده ) بس طالما عم محمد أبو زيد بيقول إنك صديقه يبقى شكلك كده حضرت إغتيال النقراشي باشا على إيد عمر الشريف في فيلم " في بيتنا رِجل " .

كل الشكر لأخونا سقراط المصري على الموضوع الجميل اللي خلى الواحد يعمل بلاك فاش قصدي فلاش باك ويفتكر ذكريات جميلة بكرة نلاقيها منحوتة على جدران المعابد الفرعونية وولدنا يتندروا عليها ويقولوا هذا هو تراث الأجداد .

[سقراط المصري]

ابو السيد كتب:

كفاية كده لحسن الناس هاتقول علي إن أنا من أيام الخديوي عباس حلمي

يا بو السيد دا لو انت من ايام الخديو عباس تبقى لسه شباب ، معلوماتك موسوعيه وتدل على انك مصري اصيل.

على فكره بالنسبه لي انا فعلا مفتقد الناس دي ، زي بتاع الجاز والله لسه فاكره.

واللي فاكره قوي الرجل حلاق الصحه اصله.......طبعاً فهمت.

فعلاً الايام بتاع الناس دي كانت حلوه.

سقراط

[Lighthouse]

س س كتب

ومع إني مواليد 72 إلا إني فاكر حاجات كتير جداً من فترة السبعينيات .... هــــــيه دنيا

دلوقتي اقدر اقول لك يااونكل وضميري مرتاح mf(

ولا تحب اقول لك ياابيه ha)

_------------

الموضوع جميل جدا بصراحة وانتم ماسيبتوش حاجة ماقولتوهاش :angry:

gsm:: mc(: mc:

[se_ Elsyed]

واللي فاكره قوي الرجل حلاق الصحه اصله.......طبعاً فهمت.

إنت هاتقولي ... مانا كنت حاضر وعمال أهيص واغني مع العيال الصغيرة " يا عريس يا صغير علقه تفوت ولا حد يموت ... لابس ومغير .. راح تشرب مرقة كتكوت "

بس المرقة كانت دلعة شوية !! الظاهر كانت معمولة قورديحي .

من المهن اللي إنقرضت برضوا :

- الفواعلية : وهؤلاء طبقة من البشر تستخدم صحتها في العمل .. وللآسف فمنذ ظهور الميكنة الحديثة في مجال البناء فتكاد تكون الحاجة إليهم معدومه ، ومنهم الناس بتوع الخرسانة اللي كانوا بيشيلوا الأسمنت المسلح بالقصعة على كتفهم وكنت وانا صغير أستمتع جداً بمشاهدتهم وهم يعملون ويقومون بغناء مواويل شعبيه جميلة وأقل واحد فيهم كان صوته احلى من مصطفى قمر .

- الماشطة أو البلانة : ودي كانت موجودة في الريف والأحياء الشعبية وهي الكوافيرة واخصائية المكياج بتاعتهم وكانت تستلم العروسة من دول قبل فرحها وعليها الجلخ ييجي شبرين وتحاول معها بشتى الطرق لتصلح فيها ما أفسده الضهر ومن هنا جه مثل " إيش تعمل الماشطة في الوش العكر " وغالباً ما كانت تحضر مع والدة العريس ووالدة العروس ليلة الزفاف كرد للجميل :angry: ( إنتوا فاهمين يا لؤمه طبعاً )

- الدايه او القابلة : ودي طبيبة النساء والتوليد برضوا في الأرياف والأحياء الشعبية وعلى فكرة دي لسه موجودة ومعترف بها رسمياً من وزارة الصحة وغالباً ما تكون ست كبيرة وخبرة وبعون الله كانت تشوف الست من دول بعنيها بس وتدي تقرير عن حالة الحمل ووضع الجنين ولا تقولي سونار ولا متابعة حمل ولا يحزنون ... فمعرفناش متابعة حمل ولا الكلام ده الا مع الستات الفرافير بتوع اليومين .. فكان زمان الواحده ممكن تولد وهي بتخبز قدام الفرن وتركن الواد على جنب وتكمل خبيز عشان العجين مايخمرش زيادة ويبوظ.

[se_ Elsyed]

دلوقتي اقدر اقول لك يااونكل وضميري مرتاح  :angry:

ولا تحب اقول لك ياابيه  gsm::

أنا اُفضل أن تقولي لي " يابا الحاج سيد " فيها وقار وهيبة mc(:

الموضوع جميل جدا بصراحة وانتم ماسيبتوش حاجة ماقولتوهاش

لسه ياما في الجراب يا حاوي يا لايت

[فــيــروز]

إنتي هاتعملي زي زوجتي كل شوية تقولي ده انت توعى على فحت البحر مع إن الفرق بيننا 9 سنين إلا شوية .. بس الفرق الحقيقي هو إن فيه ناس بتتولد ومعاها ذاكرة فوتغرافية ومابتنساش حاجة حلوه شافتها حتى لو كانوا صغيرين .

ومع إني مواليد 72 إلا إني فاكر حاجات كتير جداً من فترة السبعينيات .... هــــــيه دنيا

لا طبعا انا عارفه انك من جيل اكتوبر يادوبك بتلعب فى تلاتينايه ولا حاجه mf(

بس صندوق الدنيا ده من ايام فيلم الزوجه التانيه بتاع صلاح ابو سيف mc:

ومن ساعتها سرقوا الصندوق يا س.س. لكن مفتاحه معايا gsm::

يعنى مش موضوع مذكره قويه و مذكره ضعيفه :angry:

والحقيقه انا شاكّه انك بتفشر علينا وتقول لنا حاجات شفتها فى الافلام على انك عشتها فى الحقيقه mc(:

[فــيــروز]

القرداتى taz::

ماعرفش اختفى بسبب ازمة القرود ام لان اصطحاب قرد اليف يعتبر من مظاهر التسول التى تحاربها حكومتنا الرشيده ha) .. كما انه اداه معاونه لبعض محترفى النشل :P

وكان القرداتى يمر فى شوارع القاهره بصحبة قرد فى الغالب يدعى ميمون يؤدى ادوارا تمثيليه مثل نوم العازب mf( "هو العازب بينام بطريقه غير اللى متجوز ولا ايه؟ الاخوه المتزوجين يا ريت يفيدونا" او عجين الفلاحه "ايام ما كانت بتعجن" .. وكانت الغنوه المميزه التى يترنم بها القرداتى غنوه شهيره تبدا و تنتهى ب "الليل الليل الليل يا ميمون" gt: ولا ادرى ما علاقة القرده بالليل او النهار

انا بقى كنت اقف فى شباك بيتنا اتفرج على القرد ده من وانا فى اللفه .. امّال .. هو يعنى س.س. اجدع منى فى ايه !! gsm::

نسيت اقول ان فيه فى مصر مكان اسمه عزبة القرود :angry: .. ويبدو ان مصطلح العزبه كان من المصطلحات المخدره للبعض حيث انه يشيع فى مناطق فى الغالب تتميز بالفقر وليس لها اى علاقه بلفظ العزبه mc: مثل عزبة القرود وعزبة الصعايده و غيرها من العزب التى لا تاتى على بالى حاليا mc(:

تم تعديل 9 مايو 2004 بواسطة فــيــروز

[lالمطحون]

من المهن اللى كانت معروفه الراجل بتاع الحلاوه الشعر والمداغه وكان بيقف فى العباسيه وتتابعه من اول مايغلى العسل لغاية مايعمل المداغه والحلاوه الشعر...........ومن المهن الموسميه فى الموالد 1- بتوع المراجيح 2- بتوع النشان سواء بتاع الملبن او بتاع البمب وطبعا من المهن اللى كانت انقرضت واحيتها الحكومه الرشيده البقال اللى بيدينا التومين كل شهر --تومين مش تموين --

[سقراط المصري]

سواء بتاع الملبن او بتاع البمب

فتح عينك تاكل ملبن.

طيب المهن اللي اختفت دي اصحبها دلوقت بيعملوا إيه ، يعني القرداتي مثلاً اخبار القرد إيه دلوقت :angry:

وفيه مهنه قديمه قوي وهي مهنه المعددة .

وهي الست التي تولول على المرحوم ، يعني واحده ست لا لها ولا في الطور ولا في الطحين والميت ولا تعرفه ولا يعرفها ، بيأجروها في المناسبات دي وأهي بترضى بقليلها يعني كوز دره شويه بيض وتعملك احلى شغل.

ياسبع يا جمل يا............... ال يعني المرحوم كان سبع ال.

سقراط

[سقراط المصري]

كل الشكر لأخونا سقراط المصري على الموضوع الجميل اللي خلى الواحد يعمل بلاك فاش قصدي فلاش باك ويفتكر ذكريات جميلة بكرة نلاقيها منحوتة على جدران المعابد الفرعونية وولدنا يتندروا عليها ويقولوا هذا هو تراث الأجداد .

العفو يابو السيد وربنا يسترها معاك يارب.

طريقك اخضر إن اشاء الله .

سقراط

[مينا المصري]

من المهن القديمه كمان المنادي ...و ده كان كل شغلته انه يلف في الشوارع و يبلغ الناس عن قرارات الملك مرجان و وزيره شهلان و بعدين اتطورت بعد كده للمناداه عن عيل تايه يا اولاد الحلال..

و كمان المسحراتي الأصيل بتاع الطبله و الحكايات الجميلة مش مسحراتي الفيديوكليب ..

مينا..

تم تعديل 9 مايو 2004 بواسطة مينا المصري

[R.M.G.]

أقولكم حاجة بقى هل تتصوروا ان مهن كتير من اللي حضراتكم ذكرتوها رجعت تاني بس متحرفة

مثلا القراداتي

في دلوقتي قراداتيه كتير قوي

فمثلا : بوش وشارون قرد وقراداتي

القذافي وبوش : قرد وقراداتي

نواب المجلس الموقر وعم فتحي سرور وكمال الشاذلي :قرود وقراداتيه

واختفت أيضا مهنة المدرس المحترم الوقور وتحرفت الى المدرس الذي نراه حاليا أبو كوشتي وتي شيرت وسنسله

واختفى أيضا الحرامي التقليدي أبو فانلة مخططة وحاجب على شكل ال8 وسلسلة المفاتيح وحل محلها رجال الأعمال الشيك المقطقطين واللي مدهونين فوزلين عشان كده مش بيعرفوا يمسكوهم