مهن اختفت من حياتنا

[فــيــروز]

الطرشجى

كان متخصص فى بيع الطرشى فقط باختلاف انواعه ha)

وعلى ما اتذكر كانت بضاعته تروج بشده فى رمضان mc:

واعتدت وانا صغيره ان اذهب قبل الافطار لشراء الطرشى وكان يبهجنى جدا شكل اكياس الطرشى واختار الاكثر امتلاء بالجزر المخلل :P

انا باحب الجزر و الخيار المخللين جدا .. و الزيتون الاخضر كمان يااااااه فظيع mf(

الآن اصبح الطرشى و المخلل يباع فى السوبر ماركت ولم اعد ار بائع الطرشى .. :angry: واختفت مية الطرشى الجميله اللى كان الواحد يقربعها و يتسطل mc(:

خاصة بعد قيام بعض الغشاشين بطلاء الزيتون الاسود بالورنيش كى يقاوم عوامل الزمن gt: "الهى يسد نفسك و يوجع بطنك قادر يا كريم ياللى توصلت لهذه الطريقه الهباب" gsm::

تم تعديل 10 مايو 2004 بواسطة فــيــروز

[se_ Elsyed]

الأخت نيروز ..

معامل الطرشي لسه موجوده في الأحياء الشعبية ويمكنك ان تخطفي رجلك وتاخدي السلطانية وتروحي عندهم تشربي مية طرشي حتى الثُمالة .

- من المهن التي اختفت أيضاً :

* بائع اللبن : أبو عجلة وزمارة زي النفير اللي يستخدموه في تشجيع الفرق الرياضية دلوقت وكنا نراه يدور ويلف في الأحياء بدراجته وهو يحمل أقساط اللبن وهو بيكون متعاقد مع كام شقة يعدي عليهم ويقيد الحساب على النوتة ويجي يقبض يا إما بالإسبوع او بالشهر ، وكان في واحد قريبه بنفس العجلة برضوا بس كان بيبقى شايل صندوق وفيه سلطانيات الزبادي الفُخار .. وكان طعمه خطير لا تقولي جهينة ولا نسلة .

* بائعة الخبز : ( فيلم بطولة أمينة رزق ) وده او دي كانوا بيعدوا على الشقق السكنية وهما شايلين قفه فيها العيش وكان التعامل كريدت برضوا .

* الدلالة : ودي ست ربنا مديها الصحة وبتروح تزاحم في الجمعيات التعاونية ولها شبكة من العلاقات مع اللي شغالين هناك وتحصل بموجبها على أكبر قدر من السلع المدعمه ( زيت سكر سمنه فراخ مجمدة ) وتبيعها في السوق السوداء بأضعاف الثمن ... وما فيش مانع إنها تتاجر في القماش والملابس بالتقسيط عشان تريح ستات البيوت بدل ماهما ينزلوا يلفوا على الأسواق ، وزي ما قال اخونا المطحون فهي تقريباً رجعت تزاول عملها في نهاية العصر المبارك وبعد عودة الجمعيات من رحلة العلاج في الخارج .

- الغطاس الفني : وده راجل صاحب مزاج ربنا مهيئه لمهنته .. حاكم زمان يا مرفهين يا بتوع البندر ماكنش في صرف صحي ولا بالوعات ولا حاجات مندي ففي الأرياف والمناطق الشعبية كان الصرف الصحي عبارة عن خندق مُغطى امام البيوت وكان بيتملي كل فترة وييجي الراجل أبو عربية فنطاس يشفط الصرف الصحي وممكن تضطرة الظروف غنه ياخد غطس في المواضيع دي لو في حاجة عايزة تتسلك ويروح يدلق الفنطاس في اماكن مخصصه لذلك وكانت غالباً ما تكون في مناطق نائية خارج النطاق السكني .

الفتوات الحريم : ( ويسمون الرداحات ) دول بصراحة سمعت عنهم وماشفتهمش وهما تقريباً زي الجنود المرتزقة الامريكان كده .. يعني مثلاً لو س س متغاظ من فيروز وعايز يقرص ودانها وهو بعيد وقاعد بيشرب الفايف كلوك تي بتاعه في التراسينة ساعة العصاري يقوم مأجر كام واحده من دول يروحولها البيت .. وحسب المقاولة بقى الشتيمة لها تسعيرة والضرب له تسعيرة ولو ضرب وشتيمة مع بعض يبقى السعر دوبل لأنها بتبقى 2 في 1 ويروحوا بقى يقفوا تحت شباكها زي روميو كده ويندهوا عليها تقوم فيروز بصه بحسن نية من المشربية زي جولييت الرومانسية كده وهي مش عارفه اللي مستخبيلها ويقوموا بادئين فاصل من الردح والكلام اللي متنقي خيار وكله بالسجع والقافية ولا أمير الشعراء يقدر يقوله .. ولو كانت المقاولة ضرب يبقى يستنوها قدام البيت وهي راجعة من الفرن وشايلة قفص العيش على دماغها وهاتك يا ضرب بدون مقدمات بكافة أسلحة الدمار الشامل النسائية .. وماحدش هايقدر يرمي نفسه في التهلكة ويحوش عنها لأنهم متدربين وبيشتغلوا بإسلوب المحترفين وغالباً ما تكون عمليات نضيفة ولا يُعرف الجاني ( اللي هو س س ) .

[فــيــروز]

الاخ س.س.

لازال بائع اللبن موجودا و الحقيقه نحن شخصيا نتعامل مع بائع لبن امير و طيب و حبوب ابقى اعرفك عليه mc:

وكذلك بائعة الخبز وعلى فكره مش فى حى شعبى .. انا كانت الشركه التى كنت اعمل بها حتى العام الماضى فى الباشمهندزين وكان فيه واحد بياع عيش يفضل طول اليوم ينادى "وطبعا سامعينه عشان الصبح الدنيا هس" و يفضل يقول : عيييييييييييييييييش ..

بقى عاوز تأجر لى فتوات يردحوا لى mf( .. آخ عرفت من اين تؤكل الكتف يا س.س. يا مفترى cbyb: .. روح إلهى ما يحكمك على ولايا vmp: .. انا فعلا اكتر حاجه تضايقنى ان حد يزعق لى :angry: ويا سلام بقى لو كان ردح .. ساعتها اعتقد هيجى لى خرس مضاعف mc(: لكن لو حاولوا يضربونى انا اؤمن جدا بالمثل اللى بيقول "الجرى نص الجدعنه" gsm:: وانا جدعه اوى فى الحاجات دى ha)

[عادل أبوزيد]

أظن لم يذكر أحد "القصانجى" وهذا عبارة ترزى متخصص فى تفصيل القمصان الرجالى و ربما يقوم أيضا بتفصيل البيجامات.

و كنت أستمتع جدا بتفصيل قميصين (أى عدد 2 قميص) إما تريكولين 620 أو لينوه الشوربجى رمش العين و أطلب من القمصانجى أن يضع لى "الإنسيال" على الجنب اليمين تحت يكون مكانه بالضبط فوق المصران الأعور ب 15 سنتى تقريبا و يكون لونه أزرق ...الأقمشة التى ذكرتها دى غالية القميص كان يتكلف يمكن 275 قرش أو يمكن ثلاثة جنيهات و كان مع كل قميص الإكسسوار الخاص به أو قل قطع الغيار الخاصة به و هى ياقة إتياطى و كذلك زوج من الأساور إحتياطى .... لمن لا يعرف كا أو شئ يدوب فى القميص الياقة فكنا نذهب لل "قمصانجى" و نطلب منه أن يقلب الياقة أو أن يقوم بإستبدالها بالياقة الإحتياطى .... نسيت أقول أننا أحينا كنا نحصل على قماش "لينو حلوان " و كان قماش جيد يشبه تقريبا لينوه الشوربجى العادى و لكنه رخيص لأننا كنا نشتريه من الشركة نفسها أو من الأزهر (كان أحد التجار يعلن يوميا عن أقمشة لينوه و تريكولين و بوبلين أرخص من الأسعار الرسمية).

هو مهنة أخرى لم يتطرق أحد لها و هى مهنة "الكونترجى" و هو "صرماتى" راقى و كان يقوم بتصليح الأحذية و كان يقوم أيضا بتصنيع الأحذية حسب المقاس و أذكر فى بلدنا الأسطى عبد الستار صنع لى أنا و الوالد زوجين من الأحذية أذكر كان لونهم أبيض و النعل جلد أخضر كنت إذا ضربت أحد (عيل تانى أو زميل فى المدرسة مثلا " فى قصبة رجله بهذا الحذاء "يتكسح أسبوع " و عاش هذا الحذات ربما أكثر من خمس سنوات و أعطاه والدى لأحد الأقارب الذى أظنه أورثه لأحد من الجيل الثالث)

و على ذكر ال "كونترجى" أذكر أنه تم تعيين أحد شخصيات العهد القديم فى الوزارة (يقال أنه كان فى العهد القديم أحد ياوران الملك و لا تسألونى ياور يعنى غيه) و تقاعس أمين الوزارة فى تأثيث مكتبه بأثاث لائق و ناداه رئيس فى العمل أقصد نادى أمين الوزارة (مسئول التأثيث فى الوزارة ) و قال له "إنت عارف ... بك ده بيفصل الجزمة بكام ...ب 8 جنيه يعنى أغلى من جوز خالتك"

أرجو ألا أكون اثقلت عليكم

[se_ Elsyed]

و كنت أستمتع جدا بتفصيل قميصين (أى عدد 2 قميص) إما تريكولين 620  أو لينوه الشوربجى رمش العين 

يا ترى الانواع دي لسه موجودة ؟ حاكم إنا ماعرفش الفرق بين الحرير والبافتة !!

[se_ Elsyed]

من المهن التى إنقرض أيضاً :

سيدنا : وسيدنا ده هو الشيخ اللي في الكُتاب ومع إني محضرتوش في القاهرة إلا إني فاكره طشاش لما كنت بأسافر الريف وأنا صغير فكأني كنت بأركب ألة الزمن وبأرجع للتاريخ للوراء حيث إن الكتاتيب في القاهرة تعتبر دلع وحاجة كده 5 نجوم بالنسبة للريف ، فلسه فاكر منظر العيال الصغيرين وهما رايحين الكتاب بتاع سيدنا وشايلين الكراريس اللي هي عبارة عن غطا صفيحة سمنة مربع الشكل بس دقينه ومسويينه كويس عشان مايتعوروش وكان إسمه " لوح " وبيكتبوا عليه بالقلم الكوبيا اللي ما يكتبش إلا إذا إتبل في الفم فكل واحد كان يرجع من الكتاب متلحوس وكإنه واخد غطس في بركة حبر .. والشنطة كانت عبارة عن قماش رديء متخيط وله ذراع طويلة عشان يبقى زي الهاند باج ويشيلوه في كتفهم ، اما الكُتاب نفسه فكان مقام في حتة أرض فاضية او جنب بيت ومعمول من خوص وجريد النخيل .. يعني في الهو ... وكانوا يتلقون فيه ن فيه بعض أيات القرآن الكريم ومباديء اللغة العربية وشوية جمع وطرح ... وكانت أُجرة التعليم بالمقايضة ففي موسم الحصاد سيدنا ييجي لأبو التلميذ من دول عشان ياخد كيلتين ذرة على كيلة رز على ما تجود به الأرض الطيبة من محاصيل...

بس والله كان العيال بيتعلموا وبيطلعوا ينفعوا نفسهم وبتبقى عندهم خلفية كويس للي يكمل في مدارس الحكومة .

المُنادي : بس مش زي اللي قال عليه مينا بتاع الامير شهريار والأميرة ضوء النهار ... فالمنادي ده هو اللي كان بيبلغ البلد بالمناسبات الهامة لأن ماكنش المساجد في الأرياف فيها زمان ميكروفونات ففاكر أنا مرتين تلاتة شوفت الرجل ده وهو ماسك طبلة كبيرة وماشي يبلغ البلد إن فلان إبن فلان مات وإن الدفنة هاتبقى بعد انهي صلاة ، أو يبلغهم عن إن فلان إبن فلان هايتجوز والخرجة هاتبقى من أنهي بيت ...

هـــــــــيه أيـــــــــــــــــام

وبعدين إيه حكايتكم وهو مافيش الا انا اللي كبير في المنتدى ده وكلكم بقيتوا تين إيجز أو حتى تين برشومي ؟!!!! .. فين الناس الاكابر بتوع زمان يكلمونا عن تشريفة المحمل وعن مذبحة القلعة ومصرع عز الدين أيبك على إيد شجرة الدر والأحداث الجميلة اللي عاصروها دي .

[Cleo]

- الغطاس الفني : وده راجل صاحب مزاج ربنا مهيئه لمهنته .. حاكم زمان يا مرفهين يا بتوع البندر ماكنش في صرف صحي ولا بالوعات ولا حاجات مندي ففي الأرياف والمناطق الشعبية كان الصرف الصحي عبارة عن خندق مُغطى امام البيوت وكان بيتملي كل فترة وييجي الراجل أبو عربية فنطاس يشفط الصرف الصحي وممكن تضطرة الظروف غنه ياخد غطس في المواضيع دي لو في حاجة عايزة تتسلك ويروح يدلق الفنطاس في اماكن مخصصه لذلك  وكانت غالباً ما تكون في مناطق نائية خارج النطاق السكني .

الفتوات الحريم : ( ويسمون الرداحات ) دول بصراحة سمعت عنهم وماشفتهمش وهما تقريباً زي الجنود المرتزقة الامريكان كده .. يعني مثلاً لو س س متغاظ من فيروز وعايز يقرص ودانها وهو بعيد وقاعد بيشرب الفايف كلوك تي بتاعه في التراسينة ساعة العصاري يقوم مأجر كام واحده من دول يروحولها البيت  .. وحسب المقاولة بقى الشتيمة لها تسعيرة والضرب له تسعيرة ولو ضرب وشتيمة مع بعض يبقى السعر دوبل لأنها بتبقى 2 في 1 ويروحوا بقى يقفوا تحت شباكها زي روميو كده ويندهوا عليها تقوم فيروز بصه بحسن نية من المشربية زي جولييت الرومانسية كده وهي مش عارفه اللي مستخبيلها ويقوموا بادئين فاصل من الردح والكلام اللي متنقي خيار وكله بالسجع والقافية ولا أمير الشعراء يقدر يقوله .. ولو كانت المقاولة ضرب يبقى يستنوها قدام البيت وهي راجعة من الفرن وشايلة قفص العيش على دماغها وهاتك يا ضرب بدون مقدمات بكافة أسلحة الدمار الشامل النسائية .. وماحدش هايقدر يرمي نفسه في التهلكة ويحوش عنها لأنهم متدربين وبيشتغلوا بإسلوب المحترفين وغالباً ما تكون عمليات نضيفة ولا يُعرف الجاني ( اللي هو س س ) .

مداخلتك يا س س جعلتنى أتامل و أفكر و أحلل أفكارى....

و فى النهاية لم أمنع نفسى من أن أسأل سؤال واحد....

ممكن تكلمنى شوية عن طفولتك ؟؟؟ :angry:

[حشيش]

الخاطبة

ودى كانت تحتفظ عندها بصورالفتيات الراغبات فى الزواج وتلف بالصور على التجمعات الشبابية لعرضها عليهم وتذكر نبذة مختصرة عن السيرة الذاتية للفتاة واسرتها... واذا اعجبت صورة الفتاة الشاب فتقوم بتنظيم زيارة له ليعاينها على الطبيعة...واذا كان فيه نصيب وتم الزواج تحصل على أجرها من الطرفين :angry: .

[سقراط المصري]

ممكن تكلمنى شوية عن طفولتك ؟؟؟

:angry: mc(: gsm:: mc: mf( ha) gt: :P lo:: ::

[se_ Elsyed]

ممكن تكلمنى شوية عن طفولتك ؟؟؟

clp:: lo:: clp:: lo:: lo:: lo:: lo:: lo:: lo:: ::

ولعها ولعها يا سقراط ...

يا كليو يا بنتي الواحد مهما عِلي وإغتنى مش لازم ينفصل عن واقع بلده وعن الطبقة العظمى المكونة لهذا البلد ... فلا نستطيع أن ننكر بإن الغالبية العظمى من المصريين هم من الناس البسطاء زي الموظفين والعمال والصنايعية ودول بنقابلهم يومياً في حياتنا فهل معقولة ممكن الواحد ينساهم أو يقول خليني في حالي وانا مالي بهم ... فاللي بأحكيه ده معظمه نماذج حقيقية شفتها في حياتي .. بكل بساطة وكل وضوح .

[se_ Elsyed]

النهاردة ياولاد هانكم بقيت كلامنا عن مهن إنقرضت من حياتنا :

1- المستوقد ( المكان اللي بيسووا فيه الفول زمان )

- ودي إسم الله على مقامكم كانت موجودة زمان - مش زمان قوي - حيث إن مطاعم الفول ماكانوش بيعملوا الفول داخل محلاتهم إما توفيراً للطاقة او لإن هناك ناس محترفين بيشيلوا عنهم هذا العبء... فالمستوقد ده كان عبارة عن مكان واسع وفيه ناس شغلتها تسوية الفول وتوزيعه على المطاعم او على العربيات الصغيرة اللي بتوزع الفول على المناطق وذلك كله يتم قبل صلاة الفجر كل يوم .. وكانوا يعتمدوا على مخلفات البيئة كمصدر للوقود ( أخشاب ، ورق ، أحذية قديمة ..... إلخ ) أما عن طريقة عمل الفول فهو إنهم بيضعوا المقادير المظبوطة في القدور وبيقفلوها بقطع من القماش بطريقة معينة ومحكمة ويضعوها في وسط الجحيم المستعر ...... وصراحة كان طعم الفول مالوش مثيل ... ويمكن يا جماعة نشعر بالفرق لو تذوقنا شاي معمول على البوتجاز واخر معمول على الفحم .. وطبعاً شتان ما بين طعم الأثنين .

واللي خلاني أفتكر المهنة دي .. إن زمان كان لي عمه ساكنة في منطقة العباسية فكنت وانا في المرحلة الإبتدائية وفي طريقي إلى بيتها أثناء زيارتها بأعدي على هذا المكان فسألت الناس دول بيعملوا إيه فقالوا لي القصة ....

2- الحمام البلدي :

- وده موجود بعض منه في مناطق مصر القديمة وهو من بقايا العصور المملوكية والفاطمية ويظهر إن الناس زمان كانوا أصحاب مزاج وواخدين موضوع الإستحمام ده على إنه مزاج فكان الكثيرون يذهبون إلى تلك الحمامات ويقضون فيها اوقات طويلة مثلما يفعل البعض في عصرنا هذا بالذهاب إلى السونا وحمامات البخار والجاكوزي .. ولكن زمان كان كله يدوي .. وكانت تلك الحمامات تعتمد بشكل كبير على الأفراح حيث أن كلا العروسين كانا يذهبان إلى الحمام سواء المخصص للرجال او للحريم وكانوا يصطحبوا المعازيم أيضاً كجزء من طقوس الفرح ...

وانا شخصياً أعتبر إن الحمامات دي إختراع فاشل وحرام كمان حيث إن الناس لم تكن تراعي العورات وحسب ما نسمع إن كانت بتحصل فيها تجاوزات .

وعلى ما اعتقد بإن بعضها مازال يعمل في تلك المناطق التي ذكرتها .

يُتبع

[فــيــروز]

الأفنديه

قرات عن هذه المهنه فى قصة السقامات ليوسف السباعى

وهم مجموعه من الرجال كان لهم زى معين .. اعتقد انه زى الافنديه قديما .. بدله كامله و طربوش يعنى .. كانوا يحضرون الجنازات ليتفاخر بهم اهل المتوفى على انهم من المعارف !! خاصة انهم كانوا يذكرون مآثره و يترحمون عليه cbyb:

حاجه مقبضه جدا ..

الغريب ان يستمر الناس فى التفاخر بهؤلاء حتى بعد ذيوع السر و معرفة طبيعة عمل هؤلاء وانهم ليسوا اقارب للمتوفى بالفعل وانما هم مجرد ممثلون !! سبحان الله هل نكذب الكذبه ثم نصدقها؟

تم تعديل 5 يونيو 2004 بواسطة فــيــروز

[se_ Elsyed]

العوالم :

وهي جمع عالمه ... مش من العلم ولكنها كانت مسئولة عن الأفراح والليالي الملاح .. وقد تطورت هذه المهنة وأصبح منتسبيها من علية القوم ويشار إليهم بالبنان مثل صاحبة العصمة فيفي عبدو والسيدة الفاضلة دينا ... وغيرهم ...

اما عن العوالم الغلابة بتوع زمان فكانوا يتخذون من شارع محمد علي الذي يصل بين منطقة العتبة ومنطقة القلعة وكراً لهم وكانت ومازالت المباني التي يقطنونها مصممة بشكل جميل وبها الكثير من شغل الأرابيسك البديع .. اما عن الأدوار الأرضية فكانت مخصصة للمحال التي تبيع الآلات الموسيقية أو مقاهي لتجمع الآلاتية والمتخصصين في المجال الفني .

منذ 3 سنوات ساقتني قدماي إلى منطقة العتبة انا واخي وأقترحت عليه أن نذهب إلي شارع محمد علي لكي نشاهد ما به من باب الفضول ليس أكثر وكنت اتوقع بأن أقابل هناك الست / زوبة الكلوباتية او على الأقل مساعدتها الست / سنية سيبني في حالي ولكن لم نقابل هذه ولا تلك لأن الشارع تحول إلى منطقة مليئة بمطابع الورق والأوفست وكروت الأفراح وما إلى ذلك .. اما الست زوبة فشكلها كده إتنقلت نقلة جامدة وراحت سكنت في شقة على النيل وبقى لها بودي جارد بعد ما بقى الزمن زمانهم وأنقلبت الموازين .

[تلميذ]

أحيي الأخ الفاضل se_ Elsyed علي مداخلاته الثريــة في هـذا الموضوع وليســمح لي أن أضيف معلومة بخصوص المســـتوقد. وهــو أن المســتوقــد كان وجــوده مرتبطا بوجــود الحمامات العامة التي أشــار إليها الأخ se_ Elsyed في المداخلة التالية للمســـتوقــد.

حيث أن الوقــود الذي كان يســـتخدم في تســـخين مياه الحمامات هـو نفســـه الوقود الذي كانت قــدور الفول توضع فية.

أي أن المســـتوقد علي حــد علمي كان يخــدم الحمام وفي نفس الوقت يفيــد في تســـوية الفول.

[se_ Elsyed]

أي أن المســـتوقد علي حــد علمي كان يخــدم الحمام وفي نفس الوقت يفيــد في تســـوية الفول.

شكراً يا تلميذ .. بس انا ماشوفتش حمامات جنب المستوقد اللي في العباسية !!! فهل معنى كده الناس بتوع العباسية ماكنوش بيستحموا ؟!!! :huh:

[lالمطحون]

وبعدين ياسى السيد مالك وبتوع العباسيه دول اجدع ناس وبيستحموا على طول

[se_ Elsyed]

وبعدين ياسى السيد مالك وبتوع العباسيه دول اجدع ناس وبيستحموا على طول

طبعاً اجدع ناس وانضف ناس يافندم ماحدش يقدر يقول غير كده ...

[تلميذ]

ياسي الســـيد,

بتــوع العباســـــية مكانوش محتاجــين حمامات عامـــة لأنهم كانوا أكثر تقــدما وعنــدهم حمــامات في بيوتهـــم. :o

يعني المســـتوقد اللي إنت شـــوفته أكيــــد كان في حته راقيـــة. :)

خالص تحيــــاتي. :huh:

[عادل أبوزيد]

موضوع جميل جدا

استمتعت بإعادة قرائته كله. في فترة حظر التجول و أرفعه لعلنا نجد إضافات جيدة

[AbuZeyad]

عمال الترحيلة اللى بيتنقلوا بين القرى لزراعة الأرض

اظنهم اختفوا بعد ما الميكنة انتشرت في الزراعة والحاجة قلت لعمال