طلب مساعدة

[hosambob]

ممكن أخد رأيكم يا جماعة في موضوع كدة شاغلي بالي

انا هنا في السعودية بقالي سنتين تقريبا ً

و من كام شهر اشتغل في الشركة اللي انا شغال فيها ( دكتور في كلية الهندسة )-- مصري -- محترم جدا جدا جدا جدا

و بدون ما طول عليكم

بعد مدة من التعامل معاه -- جه يوم و عرض عليه عرض ( في حالة اني انوي انزل مصر و استقر هناك -- ممكن يساعدني بالفلوس لعمل مشروع خاص و يكون طريقة المساعدة ( أما سلفة و تسدد علي أقساط ) أو ( تكون مشاركة بنسبة هو بالفلوس و أنا بالإدارة ) مع ذكر أنه ملوش دعوة خالص بالإدارة

و زود علي العرض ان الموضوع دة مفتوح لمدة سنة سنتين مش مشكلة

و بعد فترة من الشغل في الشركة -- جتله سفرية إلي كند ( فقرر انه يسافر ) و قبل ما يسافر كلمني تاني و أكد علي الموضوع

اعمل اية ؟؟؟؟ استلف منه فلوس و لا اخد منه الفلوس علي سبيل المشاركة

و اية المشروع اللي ممكن يشتغل في مصر ؟؟؟

مع خالص تحياتي

مع العلم انا لدي خبرة في مجال ( الكمبيوتر ) ( تدريب و دورات ) لمدة تزيد عن 5 سنوات

بالمناسبة من كلامه كدة كان المبلغ المرصود للموضوع ( لا يتعد 100000 جنية ) مائة الف جنية مقلهاش صريحة بس كانت ضمنية

[hosambob]

اية يا جدعان --- مفيش حد عاوز يعبرني لية -- كل قراءة قراءة كدة مفيش رد

طييب نغير الموضوع و نخلية لو انت مكاني تعمل اية ؟؟؟؟؟؟؟؟

أو نخلية --- عرض أو فرصة لكل من يرغب العودة إلي مصر

حد يرد عليه -- متخلوش حرتي تزيد

[se_ Elsyed]

لو فكرت في الموضوع بهذا الشكل اللي عرضته علينا يبقى هاتورط نفسك وتورطه .. لغن ببساطه لا توجد لديك أهداف محدده ولا دراسة جدوى لفكره معينه ..

والفكرة دي لازم تكون نابعه منك إنت .. حسب قدراتك وميولك

يعني مثلاً أنا لو عندي مطعم فول وطعميه ومشروع كويس .. هاقول لك أشتغل في المجال ده ..

وبالتالي قد لا يناسبك ولا توجد لديك الخبرة الكافية لإدارته وهاتكون النتيجة هي الخسارة الفادحة ..

يبقى شوف إنت عاوز إيه الأول وبعدين تعالى نناقشك في الفكرة اللي تكون محددها

[hosambob]

علي فكرة انا عندي فكرتين -- الفكرة الأولي ( مركز تدريب حاسب آلي ) ( متوفر الخبرة من عندي )

الفكرة التانية ( مطعم للوجبات السريعة ) علي غرار ( مؤمن أو ماكدونلز بس مصري الأصل ) ( متوفر الخبرة من عندة ) صديق حميم لاصحاب سلسلة مطاعم مؤمن بمصر

و بعدين ممكن اسألك سؤال --- هما كل اللي عملوا مشاريع كان عندهم خبرة -- متهيألي لو كل أصحاب المشاريع فكروا انه لازم يبقي عندهم خبرة قبل ما يفتحوا ما كنش حد فتح حاجة من اصله ... ممكن يكون عنده خلفية أو عندة اللي يساعدة و هو بيكتسب خبرة بعد كدة

شكرا ً علي رد -- كفاية انك سألت فيه -- و انا مستني افكاركم يا شباب

تم تعديل 31 مايو 2010 بواسطة hosambob

[pocy]

والله انا زمان اول ما جيت الكويت فكرت انى اعمل مشرو ع فى مصر لما يتوفر معاى الفلوس دى وبصيت ع المشاريع االممتازه اللى دايما الناس محتجاها ومش بتستغنى عنها لقيت انها كلاتى

1- مشروع تاكسي او ميكروباص

2- مشروع صالون حلاقه والراس بعشره يعنى ايه هتلعلع معاك هههههههههههههه

3- مشروع سوبر ماركت

4- مشروع ملابس حريمى واطفال ودى بقي ايه هتشتغل نار

5- مشروع تجهيزات العروسه ودى برضه شغاله 100%

بس لازم بقي يا استاذي الفاضل تشوف انت معاك كام والحاجات اللى هتشتغل فيها وكمان لاحظ ان المكان بيحدد برضه انت هتشتغل في ايه مش يبقي فى اتنين سوبر ماركت فى نفس المكان وانت تروح تعمل التالت ولا ايه ؟؟؟؟؟؟؟؟؟؟؟؟؟؟؟؟؟؟؟؟؟؟؟

ولو عرفت اى شئ او افتكرت حاجه تانيه هقولك

اه صحيح وبالنسبه للمركز تدريب الكمبيوتر فاعتقد ان التراخيص ممكن تاخد المبلغ اللى معاك والله اعلم وكمان الاعلانات والدعايه غاليه جدا علشان كده اقدر اقولك ربنا يوفقك ومش عايزه ادها فى وشك وربنا يوفقك يارب

بس قبل اتخاذ اى اجراء يارب يكرمك كده صلي استخاره الاول وكمان تكون دراسه الجدوى متخرش الميه زى ما بيقولوا وربنا يوفقك ان شاء الله

[mekkawy]

شوف يا باشا

مفيش فعلاً أحسن من المشاريع الخاصة

انا عن نفسي عندي مشروع و هأنفذه إن شاء الله لما أرجع و أستقر في مصر في أقرب وقت

ليمــــــــــــــــــــــوزين

مشروع رائع و مكسبه مضمون .. يمكن أنا باتكلم عن المكان اللي انا عايش فيه (العاشر من رمضان) المشروع ده هناك يكسب دهب و عامة في أي حتة هو مشروع ناجح .. خاصة مع انتشار التأمين و ضمان حقك و حسن الادارة و قبل ده كله طبعاً توفيق ربنا

حضرتك لو معاك 100 ألف .. هتروح ندفع مقدمات 3 عربيات فيرنا مثلاً .. و تقسط الباقي و تجيب سواقين و يفضل ان حضرتك تسوف واحدة منهم عشان اللي بيحضر ولدة معزته بتولد واحد و يعيش و اللي ما بيحضرش بتولد 3 و يموتوا .. المهم .. تخرج السيارات مشاوير عائلية و تعمل كروت و اعلانات و كدة .. هتلاقي آلاف العائلات المحترمة اللي معندهاش سيارات لكن عندها إمكانية إيجار سيارة سواء بسائق أو بدون .. الأفراح .. أي مناسبة .. المشاوير عامة .. لكن ما أنصحكش تأجر السيارات بدون سائق في الأول إلا لما تكون خلصت تمنهم و جبت غيرهم .. و ده ماكسيمم في ظرف سنة أو اتنين بالكتير .. المشروع جميل بس محتاج سوق كويس و نشيط .. كمان محتاج معارف و علاقات كتير أوي و دي سهلة إن شاء الله

أنا عن نفسي لا أحبذ مشروعات المأكولات فمش هأفتي فيها كتير

أما بالنسبة لمركز التدريب ... مشروع رائع و أكثر من رائع خاصة إنه مجال شغلك و خبرتك و إنت أدرى بيه مني و لكن له أساسيات نناقشها لاحقاً

إيه رأيك في مشروع الليموزين ؟؟

مكاوى

[doha]

انا مش هتخيل اني مكانك لان سبق فعلا وكنت في مكانك ..

من ثمان سنين تقريبا كان عندي مكتب كمبيوتر وانعرض علي نفس العرض تقريبا من جهتين مختلفتين ناس اعرفهم طلبوا مشاركتي وناس تانيه عرضت قرض حسن وتقريبا كانت المبالغ مفتوحه في الحالتين ..

بعد تفكير قصير رفضت العرض ده وده ..

ببساطه شديده لاني كنت شايفه ( المستقبل مظلم ) امام المشروع وقلت مش معقول اخذ فلوس الناس واغامر بيها ولو خسرتها هي في رقبتي في النهايه حتى لو مطالبوش بفلوسهم لكن هم من البدايه ادوهالي وهم عارفين اني مكنتش هاخذها الا وانا مالية ايدي ولو 50 في المية ان الفلوس دي ممكن تتضاعف او على الاقل ترجع لهم سليمه ..

كنت بقول وقتها ان لو امامي صفقة مثلا محتاجه مبلغ معين عشان افوز بيها يمكن كنت اخذت فلوس الناس دي وقلت اهو على الاقل امامي شيء اعمله .. لكن اخذ فلوس ومفيش اصلا شغل في السوق يستوعب الفلوس دي يبقى حرام اني اغامر بحاجه زي كده ..

بالنسبة لك فلاحظ ان نشاط الكمبيوتر في مصر دلوقت مياكلش عيش خاصه للي مش ( معجون ) في السوق وعارف يتصرف فيه ازاي لكن انت وبصفتك عايش برا صعب جدا انك تشق طريقك في وسط المجال ده فحرام انك تجازف بالفلوس وانت لا دارس السوق ولا حتى الفكرة مختمره في رأسك

الفلوس في مصر وحوالين المصريين زي الرز مش قضية ابدا البحث عنها لكن المعضلة الكبرى انك تلاقي مصرف مضمون تصرف فيه الفلوس دي بحيث ترجع لك تاني بارباحها مش تروح عليك ..

مش عاوزه اكون بحبطك بس هو ده الواقع .. استنى لما تلاقي المشروع المناسب الاول ويكون ( مسيطر عليك ) ومسألة حياه او موت بالنسبة لك انه ينجح ويكبر وبعد ماتلاقيه ابدأ ابحث عن التمويل ..

واكيد طبعا استخير الاول ولازم ربنا باذن الله بعد الاستخاره هيدلك على الي فيه الخير ..

[pocy]

انا معاكى قلبا وقالبا يا ضحى فى كلامك

بس مكنتش عايزه احبطك وخصوصا انى فكرت فى موضوع مركز تدريب قبل كده بس الالانات تاعته اكتر من اللى هتجيبه فبلاش احسن