تجربتي الكاملة مع طيران سما من اول الحجز ولغايه حمد لله على السلامه

[doha]

بما اننا داخلين على فترة اجازات او سيزون يعني بلغه اهل الطيران فقلت انزل الموضوع ده الي بقالي فترة بفكر احطه بخصوص تجربتي مع طيران سما ..

وبما اني سافرت خلال السنتين الي فاتوا كذا مرة وبما اني استخدمت طيران سما في مرتين منهم وبما انها كانت تجربتي الاولى معاهم والي اتت عكس ماكنت اظنه فاعتقد ان عندي شيء اقوله بهذا الخصوص .

طول عمري بسافر على الخطوط السعوديه على درجه الضيافه العاديه .. في الفترة الاخيرة اكتشفت ان عندهم تذاكر مخفضة سعر التذكرة ذهاب وعوده في حدود 1500 ريال .. طبعا في فترة خارج السيزون او الاوقات الي مبيكونش فيها ضغط ..

سافرت على الخطوط السعوديه من الرياض للقاهرة .. الطياره كانت صغيره اوي تكاد تشبه الاوتوبيس .. تاخرت حوالي ساعتين قبل ماتطلع وبرضه في العوده والي كانت على الخطوط السعوديه تاخرت هم نفس الساعتين معرفش ليه ..

الكلام ده كان السنة الي فاتت وكنت خلاص اعتمدت السفر الاقتصادي المخفض ( v class ) وقلت هبقى اراعي اوقات عدم الزحام وانزل مصر فيها خاصه وانا مكنتش مرتبطه وقتها بمواعيد مدارس او ماشابه ..

كنت كتير بسمع عن الطيران المخفض زي سما او ناس او الشرق الاوسط لكن عمري مافكرت مجرد تفكير اني استخدمه خاصه والتجارب الي كنت بقراها عنه في النت غير مشجعه نهائيا ..

حصل ان والدي نزل مصر اجازه على ان يعود بعد العيد مباشرة واكتشف بالصدفة ان اقامته هتنتهي في العيد وعليه لازم يحضر باسرع مايمكن .. كان معاه تذكرته على الخطوط السعوديه لكن مكانش في اي حجوزات لان كان موسم الحج شغال .. ملقيش امامه غير يجي على اي خطوط طيران متوافرة وبالصدفة كانت سما ..

جاء وحكى لنا عن التجربة وقال بانه مواجهش اي صعوبات في الطياره وانه محسش بفرق كبير بينها وبين الخطوط السعوديه .. الحكايه دي شجعتني اني اختار طيران سما عن عمد المرة دي وانا بخطط لنزول مصر في الكام شهر الي فاتوا .. وقد كان ..

اولا دخلت على موقع سما على الانترنت وكذلك موقع الخطوط السعوديه وكذا موقع مصر للطيران .. ببحث طبعا في الجوجل جبت كل المواقع دي ..

اول ماتدخل الموقع بتلاقي على الشمال ابلكيشن صغير بتكتب فيه انت عاوز تذكرة من فين لفين وذهاب وعوده ولا ذهاب بس وعدد الافراد الي هيسافروا كام وكبار ولا صغيرين وطبعا بتختار التاريخ الي هتسافر فيه بالظبط او بالتقريب ..

كتبت كل البيانات دي في اقل من دقيقة وضغطت على زر البحث فعرض لي جدول بالرحلات المتاحه في هذا الوقت والاسعار الموجوده ..

قارنت الاسعار مابين خطوط الطيران المختلفة لقيت ان سما هي الارخص وبفارق كبير .. قررت استمر معاهم ..

بعد مااخترت الرحلة المطلوبه بدأت ادخل بيانات الاشخاص الي هيسافروا الاسم والجنسية ورقم الهاتف .. الخ

المرحلة التالية كانت سداد ثمن التذكرة كان مكتوب بان السداد الالكتروني غير متاح بس هو عاده ممكن تسدد عن طريق التليفون او ماكينة الصراف لو بتتعامل مع الخطوط السعوديه بس مش عارفه الفكرة نفسها ممكنه في سما ولا لاه ..

اخترت السداد لاحقا .. وطبعت على البرنتر الورقة الي طلعت لي والي عليها رقم تاكيد الحجز الي مفروض نروح نسدد بيه ..

كان من المسموح اني اسدد في خلال 12 ساعه والا هيروح علي الحجز .. وفعلا ذهب زوجي وسدد في مكتب سما الموجود في المطار وده كان البديل الثاني بعد المكتب الرئيسي لهم والموجود في حي المروج خلف الخطوط السعوديه .. قلنا مكتب المطار اضمن لان ده الي فاتح 24 ساعه .. بيقال والعهده على الراوي الي هو زوجي انه تعب اوي على ماقدر يلاقي الموظف المسؤول عن استلام الفلوس وداخل عليه في نص المطار لغايه مالقيه .. عن نفسي لا اشك في هذا الكلام ..

اكتشفت اثناء متابعتي لاسعار التذاكر بحثا عن الاقل سعرا الامور التاليه ..

اولا كل ماتحجز بدري كل مايكون الحجز ارخص بس مش دائما على فكره .. يعني كل تذكرة لها ثلاث اسعار في حاله كان في اقبال بتباع باعلى سعر لها واذا كان الاقبال ضعيف بيتم اصدارها بالاسعار الاقل لترويج المقاعد وطبعا لو حجزت بسعر معين خلاص هو ده الي هتاخذ التذكرة بيه حتى لو رجعت غليت بعد كده او حتى رخصت ..

ثانيا .. التذاكر الرخيصه اوي اوي مينفعش ترجع او تستبدل يعني زي تذكرة القطار لو فاتك خلاص راحت عليك التذكرة .. وطبعا الكلام ده هو نفسه في الخطوط السعوديه الي بتسمي النوع ده من التذاكر الضيافه التشجيعي اما سما فبسموه ( المخفض ) .

ثالثا .. الخميس بيكون اغلى سعر للتذاكر وكذلك الاثنين معرفش ليه وارخص سعر للتذاكر بيكون يوم الاحد والثلاثاء او الاربعاء الصبح .. بمعنى لو انت مش مرتبط بشغل مثلا او موعد ثابت لازم تسافر فيه فحاول تحجز تذكرة على الايام الي مفيهاش ضغط دي هتلاقي اسعارها مناسبة اكتر بكتير من الايام العاديه ..

رابعا . . ارخص سعر الواحد يسافر فيه بشكل سنوي هو فترة الشهور 3 و 4 و 5 فترة ميته من السنة والاسعار فيها بتكون اكثر من رائعه ..

خامسا .. كل يوم اثنين سما بتنزل عرض احيانا بيكون غير عادي في التخفيض .. لو انت مشترك في موقعهم يعني حاطط ايميلك هيبعتوا لك العروض الي تهمك .. لاحظت انهم بعتوا لي مرة واحده بس لما كان العرض تخفيض على مصر يجوز لاني سبق وحجزت عليهم لمصر ..

سادسا .. ساعات مبتلاقيش تذكرة بالسعر المخفض ولو انت مش مزنوق اوي انتظر يوم او اثنين ودور تاني في الموقع ساعات بترجع التذاكر المخفضه تظهر ..

يتبع ..

[doha]

احد المميزات للحجز عن طريق الانترنت عرفته من الموقف التالي ..

كان في عرض على طيران سما ان خذ تذكرة والثانيه مجانا .. طبعا التذكرة نفسها مكانتش غاليه هي سعرها وقتها 90 ريال فقط بس بعد اضافة الضرائب وماشابه بتوصل 600 ريال .. طبعا يابلاش وبلاش البلاش كمان لو عرفنا انها رايح جاي ..

وقتها كنت مسافره انا وبنتي بس ثم قرر زوجي مرافقتنا .. كان حجزي انا وبنتي رايح جاي الرياض ـ الاسكندرية ـ الرياض بـ 950 ريال فقط .

خلص العرض وكان مدته يومين تقريبا تحجز فيهم على ان تسافر خلال فترة اظن شهر ..

لما قرر زوجي السفر حجزنا عن طريق الانترنت برضه بس كان السعر اغلى له هو لوحده رايح جاي بـ 950

ولما رحنا نسدد المبلغ اخترنا مكتب طيران سما قريب مننا بس مكناش نعرف ان في فرق مابين المكتب الرئيسي ووكالة الطيران وكان المكتب القريب ده ماهو الا وكاله وعليه لم يهتموا بالحجز بتاع النت وعملوا حجز من اول وجديد لزوجي واخذوا سعر التذكرة 1100 ريال تقريبا .. يعني فرق الحجز مابين النت ومكاتب الطيران حوالي 200 ريال !!

ده طبعا غير الفرق في السعر مابين تذكرتي وتذكرته واحنا الاثنين على نفس الرحلة ..

واقترب موعد السفر ..

كانت المشكلة عندي في الوزن بصراحه .. هم محددين لكل راكب 30 كيلو وعشرة كيلو هاندباج .. دخلت على الموقع عشان اتأكد من موضوع الهاندباج هل داخل فيه شطنة اليد يعني هيحسبوها ولا ايه .. لقيت ان شنطه اليد والابتوب كمان مش محسوبين الاثنين .. لك عفش زائد شنطه هندباج عاديه محددين حجمها بالسانتي كمان ميزيدش عن كذا ووزنها طبعا لايزيد عن 7 كيلو بحال .

برضه وانا بوضب العفش خفت يكون عندهم نظام ان الشنطه تكون قطعه واحده زي ماخطوط طيران كتير بتعمل يعني يقولوا لكل راكب شنطه وحده كبيرة وشنطه هندباج ..

طبعا لما رحت المطار للوزن مكانش في الكلام ده كل الشنط مهما كان عددها مسموح بيها ورغم اني كنت حريصه وزن الهاندباج ميزيدش عن سبعه كيلو الا ان محدش سأل ولا وزن اصلا شافوها كده لقيوها صغيره خلاص عدوها ..

كان معانا 6 كيلو زياده اصروا على اخذ ثمنهم ودي ملاحظه مهمه مش بيفوتوا ولا كيلو .. بس مش فاكره كان سعر السته دول كام بس هو عمل لنا تخفيض وقال عادي هاتوا 150 ريال بس .. واحنا لسه هندفع الراجل بتاع التذاكر اكتشف انه محسبش تذكرة زوجي وبالتالي لسه لنا 30 كيلو مش محسوبين وعليه مدفعناش حاجه .. بصراحه انا مش عارفه هو فعلا كده معليناش ولا هو اتلخبط بس مدام الاستاذ قال معليكوش يبقى انا مش هفهم اكتر من الاستاذ ..

ورحنا صاله الانتظار ..

يتبع . .

[shawshank]

كلام حضرتك سليم جدًا ومنطقي ...

واسمحي لي حضرتك أضيف الكام سطر دول عن العوامل اللي على أساسها ممكن تختلف أسعار تذاكر الطيران عمومًا ، واللي حضرتك ذكرتي بعضها في سياق الكلام ...

- الدرجة

- الموسم

- الميعاد المطلوب ، تقريبي أم محدد (يوم وساعة) .

- المدة الزمنية الفاصلة بين تاريخي الحجز والسفر .

- الحجز من وكيل (شركة سياحة) أو من خطوط الطيران .

- إمكانية تغيير الميعاد (الرحلة) .

- غرامة تغيير الميعاد إن كان مسموحًا .

- إمكانية الغاء التذكرة .

- غرامة الغاء التذكرة أن كان مسموحًا بذلك .

- الوزن المسموح به .

- عدد الحقائب المسموح بها .

- عدد مرات الترانزيت .

- مدة الترانزيت .

- تغيير المطار إن كان هناك ترانزيت .

- الضرائب والرسوم .

- مدى حركة الرحلات على الخط المطلوب .

- التذكرة الكترونية أم ممكن استلامها بالبريد السريع مثلا .

- الوجبات على الطائرة .

فدي عوامل كتير أوي ، بتدي فرصة لعروض أسعار كتيرة من شركات السياحة ، بحيث تحاول ترضي كل الأذواق وكل المتطلبات ، وبالتالي تحقق أعلى عائد . وده كمان بيدي مؤشر إن انخفاض السعر ممكن يكون راجع لواحد من العوامل دي ، فلازم الشخص اللي بيعمل الحجز يتأكد من المواصفات دي ويتأكد إنها مناسبة ليه ، ومايبصش بس للسعر .

وبشكل عام ، تحديد أسعار تذاكر الطيران عملية معقدة ومعاييرها أحيانًا مش منطقية .

وعذرًا على قطع كلام حضرتك .

[doha]

فدي عوامل كتير أوي ، بتدي فرصة لعروض أسعار كتيرة من شركات السياحة ، بحيث تحاول ترضي كل الأذواق وكل المتطلبات ، وبالتالي تحقق أعلى عائد . وده كمان بيدي مؤشر إن انخفاض السعر ممكن يكون راجع لواحد من العوامل دي ، فلازم الشخص اللي بيعمل الحجز يتأكد من المواصفات دي ويتأكد إنها مناسبة ليه ، ومايبصش بس للسعر .

كلام حضرتك سليم وكل ده كنت حطاه في اعتباري وانا باخذ قرار السفر على سما ولهذا قارنت اسعار تذاكرها باسعار تذاكر الشركات التانيه الي بتقدم نفس الخدمه بنفس المواصفات وفي النهايه رجحت كفة سما الي كانت ارخص كتير سعرا مقابل التخلي عن خدمات لا تذكر زي الوجبة مثلا والي متستاهلش طبعا اني ادفع في مقابلها حوالي الف زياده في كل تذكرة ..

===============

ونعود لموضوع رحلتي مع سما ..

لما رحنا منطقة الانتظار امام بوابة الدخول للطائرة كان الموظفين الواقفين هناك موظفين سما .. لاول مرة ومع اول احتياج لهم لاحظت بوضوح ماسبق وقيل عن تعامل موظفي سما من انه ( مش ولابد ) فعلا مش ودودين وبيخدموا من طرف المناخير او بتكاسل بعكس المعتاد من موظفي الطيران عامه الي مفروض يكونوا اكثر ترحيبا من كده .. باستثناء موظفي الكاونتر في مكتب الحجز الرئيسي في الخطوط السعوديه الي هم الاسوأ على الاطلاق في التعامل وسرعه الانجاز فموظفي طيران سما تقريبا بلا استثناء مش على الدرجه المطلوبه برضه وتاكدت من الملاحظه دي اكتر على الطائرة ..

اقترب موعد الاقلاع وقبلها بنصف ساعه تقريبا تم فتح باب الطائرة وصعدنا اليها ..

طياره صغيره زي الاوتوبيس برضه هي نفسها تقريبا بتاعت الخطوط السعوديه الي ركبت فيها قبل كده ( في الفئة المخفضه ) بس بدون تلفزيون في ظهر المقعد ( بناقص ) .. المقاعد جديده ونظيفة والجدران مفيهاش حاجه بعكس الي كنت بقرأه قبل كده من ان الطيارات متهالكه وتسمع صوت المحرك وانت راكب فيها وهو التعليق الي خلاني ارفض التعامل مع سما لفترة طويلة .. الحمد لله مشعرتش باي من ده اثناء الرحله ..

كذلك لاحظت حجم الكراسي او المسافة بينها وهو الملاحظة الي قالوها برضه قبل كده من ان الواحد بيكون ( مزنوق ) في الكرسي .. بصراحه محسيتش باي شيء من ده وان كان زوجي وهو اطول مني شويه وممتلأ اكتر بيقول ان فعلا الكرسي مش مريح اوي . . على كل حال في صف الكراسي الامامي بيكون الجلوس فيه اكثر راحه وممكن للي حابب يحجز فيه خصيصا بس بزياده اظن 25 ريال على كل كرسي ( معليش هم طيران جلده شويه وبيحاسب على النفس بس ان جيتم للحق .. حقهم ) .

طبعا مفيش وجبات على الرحله وبما ان الطريق بالنسبة لنا طويل ( نصف ساعه من بيتنا للمطار وثلاث ساعات قبل الطياره وساعتين داخلها وثلاثه بعدها بخلاف الوقت المقطوع في الجوازات ) يعني بما ان رحلتنا لا تقل عن 12 ساعه في كل ده وبما ان معايا طفله فطبيعي اني باخذ معايا شنطه صغيره فيها اكل ..

كنت مجهزه شنطتي وفيها زجاجتين مياه .. كام علبة عصير صغيره .. سندويتشات برجر دجاج وجبن شرائح وكيسين تلاته شيبسي وحبتين تلاته فاكهة ..بعض البسكويت ..

طبعا السندويتشات كل واحد متغلف في كيسه ومعاه منديل ورق والفاكهة كذلك وطبعا مغسوله من الاول .. وطبعا اثناء السفر مع الاطفال يفضل جدا مناخذش اي حاجه فيها شوكلاته ولا موالح كتير عشان ميوسخوش نفسهم او يضطروا يدخلوا الحمام كتير ودي نصيحة قالتها لي واحده زمان وبصراحه اراها في محلها ..

الراكب الي قدامنا الظاهر مكانش عامل حسابه ومكانش متوقع موضوع الاكل .. فوجيء ان مفيش وجبه بس قالوا له ممكن تشتري لو حبيت .. ولان الناس الي اشترت قبل كده قالت ان الاكل بتاعهم نظام سندويتشات فمن البدايه مكنتش عامله حسابي نشتري منهم بس شفت الي قدامي اشترى وهو متضايق ( مش عارفه ليه ) .. ويجوز لانه دفع فحب يستغل الوضع فكان كل شويه ينادي للمضيف الي كان ناقص يشيله ويرميه من شباك الطياره .. بقولكم مش ودودين ابدا ..

اثناء الطيران كنت عاوزه انام موت بس بما اننا في عز الشتا كنا فكان عندي رغبه في تجربة التعرض للمطبات الهوائية .. كان نفسي اجرب واشوف كده شوية اكشن من الي بيحكوا عليها دي .. كل شويه اصحى لعل وعسى يحصل حاجه .. ابدا .. اعتقد والله اعلم اما ان الجو كان كويس وقتها او ان الطيار كان محترف ويجوز الاثنين ..

نسيت اقولكم امر في غايه الاهمية .. موعد اقلاع الطائرة المعلن عنه كنا 9 وعشرة .. تسعه بالدقيقة كنا بدأنا نتحرك .. .. يعني مش بس مفيش تاخير وانما قبل موعدها ببضع دقائق كانت في الجو ..

وصلنا في الموعد المحدد وهبطت الطائرة في مطار برج العرب في الاسكندرية . . بصراحه ده احلى مافي الرحلة كلها .. مطار ( محندق ) وصغير تحسه كله على بعضه كده اوضه وصاله ..

الطائرة كانت صغيره جدا ومش مليانه على الاخر وتقريبا كنا الوحيدين احنا وطياره كمان الي وصلنا وبالتالي فمفيش نصف ساعه كنا مخلصين اجراءاتنا وطالعين من المطار .. بما اننا مش من سكان القاهرة وبما ان المسافه هي نفسها تقريبا سواء من برج العرب او القاهرة لبيتنا فمفرقتش معانا حته المطار دي .

بصراحه خرجت مبهورة .. هي دي بقى سما الي خوفونا منها .. صحيح الي تخاف منه ميجيش احسن منه ..بس فضلت اخذ انطباع نهائي عنها لما اجربها مرة تانيه في رحلة العوده .. وقد كان ..

يتبع ..

[se_ Elsyed]

المطار الذي تهبط فيه الان خطوط طيران ناس وسما ليس مطار برج العرب .. ولكنه قاعده عسكرية صغيرة .. ومطار برج العرب مازال تحت الانشاء

[tahereyad]

المطار الذي تهبط فيه الان خطوط طيران ناس وسما ليس مطار برج العرب .. ولكنه قاعده عسكرية صغيرة .. ومطار برج العرب مازال تحت الانشاء

أنا كنت نزلت مرة من الامارات علي طيران العربية,, و هو من الشارقة الي مطار النزهة فالاسكندرية,, هو دة اللي تقصده يا سين سين ولا في مطار تالت في اسكندرية

[pink rose]

المطار الذي تهبط فيه الان خطوط طيران ناس وسما ليس مطار برج العرب .. ولكنه قاعده عسكرية صغيرة .. ومطار برج العرب مازال تحت الانشاء

أنا كنت نزلت مرة من الامارات علي طيران العربية,, و هو من الشارقة الي مطار النزهة فالاسكندرية,, هو دة اللي تقصده يا سين سين ولا في مطار تالت في اسكندرية

مطار النزهة دا داخل مدينة الاسكندرية

اللي يقصده س س مطار برج العرب اللي شغال دلوقتي و دا قاعدة عسكرية اصلا مشغلينه لحد افتتاح مطار برج العرب الجديد في الصيف

و قريت خبر دلوقتي انهم هايقفلوا مطار النزهة ابتداءا من اول يوليو لتجديده

[doha]

المطار الذي تهبط فيه الان خطوط طيران ناس وسما ليس مطار برج العرب .. ولكنه قاعده عسكرية صغيرة .. ومطار برج العرب مازال تحت الانشاء

يبدوا لي ان كلام حضرتك صحيح وده يفسر ملاحظة لفتت نظري واحنا مسافرين منه وهي وجود يافطه كبيرة على المدخل مكتوب عليها شروط وتعليمات امن وسلامه من ضمنها ان ممنوع دخول المدنيين او ان الدخول لازم يكون بالزي العسكري .. ضحكت في سري ان واضح ان اليافطه قديمه بس هم ( نسيوا ) يشيلوها .. يبدوا اني تسرعت في الحكم لان وبناء على كلامك يبقى الوضع مؤقت في المطار ده وعليه فلاداعي لشيل اليافطه على اساس انها يومين وهترجع تاني ..

نعود لموضوعنا ..

لما جينا نسافر رحنا المطار انا وبنتي وزوجي جاء لتوصيلنا فقط حيث قرر التاخر عن السفر معانا لظروف مرض والده..

وانتظرنا شويه في ساحه المطار لغايه مايفتح !! بتاع عشر دقائق كده على مالظابط سمح لنا بالدخول ..

احد الموظفين وشكله مريب كده عرض علي انه يساعدنا في الوزن بتاع الشنط يعني ( ياخذ قرشين ) ويمرر موضوع الوزن الزائد .. رفضت وشكرته لاني كنت مظبطه شنطي مش جايبه معايا حاجات كتير والاهم لاني تذكرت موقف حكاه لي والدي وهو جاي ان برضه قالوا له هات حاجه ونمرر لك الوزن وعرفت ان دي قاعده عامه مش مسألة مساعده او كده .. لما رفضت وهو انسحب مباشرة ولاحظت برضه انه واقف على البوابه ( بيوشوش ) كل الداخلين تقريبا ..

رحت وزنت وخلصت وكان في عندهم ماكينة التغليف الي بتغلف الشنط والي كنت خايفه متكونش موجوده غير في مطار القاهره بس .. دي طبعا بيغلفوا فيها شنطه ( العهده ) اياها الي بيوصوني عليها ماما وبابا دائما والي فيها البط والذي منه ..

لو علي احب اسافر بدون ولا شنطه وطبعا مبدأ الهاند باج مرفوض بالنسبة لي ولا احملها الا في اضيق الحدود لكن معرفش ليه ( قداما المغتربين ) لهم رأي آخر ..

المهم وزنا وخلصنا ورحنا ننتظر في قاعده الانتظار .. صالة صغيره اوي بس رايقة ونظيفة ..

اقصى حاجه دفعتها في الموضوع ده كانت اثنين جنيه تقريبا دفعتهم للراجل الي شال لي الشنطه من باب المطار للسير بتاع التفتيش واثنين زيهم للراجل الي شالها من السير وحطها على العربيه .. خذوها وهم فرحانين محدش قال هاتي حاجه وبرضه محدش قال قليل او كتير ..

في اثناء الانتظار لفت نظري حوار بين واحد مسافر والعسكري الي واقف .. المسافر بيقوله منا لسه دافع برا عشرين جنيه او حاجه زي كده . رد عليه العسكري بصوت مسموع وهو بيضحك .. هو النظام هنا كده كل نقطه ( تدفع ) .. وفعلا المسافر ادى للعسكري حاجه تاني وشكله مسكين عمال ( ينقط ) طول ماهو ماشي ..

بصراحه دي الحاجه الي ضايقتني شويه او لنقل الحاجه الوحيده الي اخذتها على المطار ده ان الناس فيه ( غريبة شويه ) من ناحية انهم مش بيدققوا في حاجه ولا بيسالوا على حاجه طالما انك دفعت المعلوم ولو دفعت فمش هتبطل تدفع طول ماانت ماشي .. الي اعرفه ان الواحد يدي بقشيش للعامل الغلبان الي هيشيل له الشنطه او الي بينظف الحمام لكن كل من هو واقف ياخذ دي اول مرة اشوفها بصراحه وللامانة عمرها ماحصلت معايا طوال فترة سفري لمئات المرات عبر مطار القاهرة ..

الي حصل في رحلة الذهاب كان هو نفسه في رحلة العوده من ناحية دقة الموعد بتاع الطائرة اقلعت في موعدها تماما ووصلت الرياض في الموعد المحدد للوصول ..

وكذلك ورغم اننا كنا مسافرين وقت عاصفة على ماقالوا في الاخبار الا ان محسيتش باي حاجه في الجو .. بكل اسف ..

وبس دي كانت قصة سفري مع طيران سما وتوتا توته خلصت الحدوته ..

وبالمناسبة اسعار السفر اليومين دول على سما مخفضة بعض الشيء لكن مش كتير .. وهتبدأ تغلى في خلال الاسبوع ده وهو بدايه شهر سته لتصل ذروتها في 7 و 8 ثم ترجع تنخفض تاني وتصل ذروة الانخفاض في يناير بقى وعليكم خير ..

[شريف مان]

حكاية ممتعة يا مدام ضحى

[elshafey]

طبيعة شغلي تحتم عليا السفر بين السعودية والامارات كتير وبطبيعة الحال أحيانا بضطر اركب طيران سما وبصراحة انا بعتبره أسوء طيران اقتصادي ممكن الواحد يركبه مقارنتة بالعربية وناس

وبناءا علي خبرتي لعام ونصف تقريبا مع شركات الطيران الخليجية فأحسن شركات طيران تعاملت معها في المواعيد هي (العربية وناس وسما)

وأسوأهم ( طيران الامارات والسعودية) ......

أيوة اللي مكتوب فوق صحيح الامارات والسعودية أسوأ الشركات في المواعيد (بناء علي تجربتي)

وأحسنهم في الخدمة داخل الطائرة هم العربية وطيران الامارات ( والعربية أحسن من طيران الامارات)

قد تستغربون رأيي ولكن هذه هي تجربتي

تحياتي

[hOuSsAm]

موضوع جميل مدام ضحى

من تجربتى مع خطوط الطيارن

سافرت على ناس مرتين من جدة للرياض رايح جاى يعنى ركبتها 4 مرات والاربعة كانوا مظبوطين جدا فى مواعيدهم وكانوا زوق اوى فى التعامل والمضيفين عالطيارة بردوا كويسين

واذكر مرة كنت راجع من الرياض فتاخرت 10 دقايق وقفلوا الكونتر وكانت مشكلة ان التذكرة بتتلغى عالطول وروحت للمشرف وشرحتله الموقف قالى اللى اقدر اعملهولك اديك تذكرة مجانية عالرحلة الجاية ومقدرش اعملك حاجة اكتر من كدة

بصراحة هو كان زوق فى الحتة دى وعمل اللى عليه واكتر (بصراحة انا اللى اتاخرت وكان لازم احترم المواعيد اكتر من كدة)

فى نفس الوقت وانا رايح اركب ناس كان فيه زحمة فى المطار سالتهم ايه ده قالوا لى مستنين طيارة تبع الخطوط السعودية رايحة ابها مستنين من 5 الفجر وكنا ساعتها الساعة 10 الصبح

تجربتى على الخطوط السعودية 3 مرات

بس اللى فاكره الرحلة بتاعة القاهرة - جدة

اتاخرنا فى القاهرة حوالى ساعة او يمكن اكتر كمان

واحنا داخلين على جدة الطيار مكنش عارف ينزل واعد يلف حوالين جدة كتير يمكن 5 لفات والاطفال بداوا يعيطوا والستات كمان والشيوخ بداوا يدونا عظات واننا نتشاهد وكدة بس مش عارف ليه كنت قاعد متطمن

بس الحمد لله فى الاخر الطيار عرف يهبط بامان الله وفضله (اللى مستغرب منه اننا كنا فى الصيف)

تجربة واحد صحبى كان رايح من جدة للقاهرة بردوا عالخطوط السعودية بعد مالطيارة طلعت فيه واحد من المواتير وقف وكانت مشكلة كبيرة لان الطيارة مكنش ينفع تنزل عالطول الا لما يفضى البنزين اللى فيها الاول لان وزنها وقت الهبوط لازم يبقى اقل من وزنها وقت الاقلاع وبردوا الاطفال والسيدات بداوا يعيطوا والناس تتشاهد والطيار راح البحر ونزل لمستوى منخفض جدا عشان يفضى البنزين ويعرف يرجع تانى المطار والحمد لله رجعوا بالسلامة وصلحوا الماتور

انا نازل فى نهاية الشهر على الخطوط السعودية :happy: باذن الله

ادعولى ان ربنا يسترها معايا

[doha]

تجربة واحد صحبى كان رايح من جدة للقاهرة بردوا عالخطوط السعودية بعد مالطيارة طلعت فيه واحد من المواتير وقف وكانت مشكلة كبيرة لان الطيارة مكنش ينفع تنزل عالطول الا لما يفضى البنزين اللى فيها الاول لان وزنها وقت الهبوط لازم يبقى اقل من وزنها وقت الاقلاع وبردوا الاطفال والسيدات بداوا يعيطوا والناس تتشاهد والطيار راح البحر ونزل لمستوى منخفض جدا عشان يفضى البنزين ويعرف يرجع تانى المطار والحمد لله رجعوا بالسلامة وصلحوا الماتور

:closedeyes: :blink:

ربنا يطمنك اصلي اضطريت احجز على الخطوط السعوديه عشان اكون مع والدي ووالدتي الي تذاكرهم عليها ..

هتشاهد من دلوقت ..

[ام بيدو]

انا كنت عايزة احجز لوالدتى من القاهرة الدمام زهاب وعودة يس لقيت ان اسعار الحجز من النت اغلى من شركات السياحة بحوالى300 ريال وحجزتلها طيران سعودى ب1100 ريال زهاب وعودة

[doha]

انا كنت عايزة احجز لوالدتى من القاهرة الدمام زهاب وعودة يس لقيت ان اسعار الحجز من النت اغلى من شركات السياحة بحوالى300 ريال وحجزتلها طيران سعودى ب1100 ريال زهاب وعودة

مستحيل تكون اسعار الحجز من النت اغلى من شركات السياحه لان النت في الخطوط السعوديه على سبيل المثال ارخص 10 في المية من لو حجزتي من المكتب الرئيسي فمابالك لو الحجز عن طريق وكيل سياحي او ماشابه هيكون طبعا اغلى بكتير ..

اتوقع ان حضرتك متقصديش طيران سما لان اصلا ملهمش رحلات مباشرة القاهرة الدمام ..

اما بالنسبة للطيران السعودي فلو وجدتي رحلة مباشرة على الضيافه التشجيعية خارج الموسم طبعا فسعرها ذهاب وعوده اقل من الالف ريال بشويه .. وتقدري تتأكدي من الموقع بنفسك ..

اعتقد ان حصل خطأ اثناء اجراءك للحجز بحيث اخترتي ايام مزدحمه او رحلة غير مباشرة هتقف ترانزيت الاول في الرياض او درجه ضيافه مميزه او رجال اعمال ..

[ام بيدو]

انا فعلا مش قصدى سما انا بتكلم عن الطيران السعودى انا حجزت لماما يوم 6 _7 انا كنت هحجز من النت خلاص على 1400 بس المحاسب الى فى الشركة الى بيشتغل فيها جوزى قالة احجز من شركات السياحة ارخص وقال على شركة بيتعاملوا معاها علطول وفعلا انا اتصلت بيهم وسالت عن الاسعار لقيتها ارخص بكتير مش عارفة لية وحجزت فعلا بس قالى لازم تدفعوا فى خلال يومين

[doha]

انا فعلا مش قصدى سما انا بتكلم عن الطيران السعودى انا حجزت لماما يوم 6 _7 انا كنت هحجز من النت خلاص على 1400 بس المحاسب الى فى الشركة الى بيشتغل فيها جوزى قالة احجز من شركات السياحة ارخص وقال على شركة بيتعاملوا معاها علطول وفعلا انا اتصلت بيهم وسالت عن الاسعار لقيتها ارخص بكتير مش عارفة لية وحجزت فعلا بس قالى لازم تدفعوا فى خلال يومين

بصي ياستي وعشان مكونش بقول معلومه مش متاكده منها ..

رحت دلوقت موقع الخطوط السعوديه وعملت تشيك على اسعار التذاكر في التاريخ الي حضرتك اخترتيه وهو سته يوليو والعوده بعدها بشهر على خط سير القاهرة - الدمام - القاهرة .. كان سعر التذكرة على الموقع ضيافه اقتصاديه مع عوده على ضيافه تشجيعيه ميتين وثمانين دولار اي بالظبط الف وثمانية واربعين ريال. . عندك توفير عن شركه الطيران اثنين وستين ريال

اخذت الخيار مواعيد مرنة عشان ابحث عن سعر اقل فلقيت ان ممكن لو حجزتي السفر من القاهرة قبلها بيوم بس يعني الاثنين كان هيبقى سعر التذكرة ذهاب وعوده 264 دولار يعني بالظبط 988 ريال بمعنى توفير عن الي دفعتيه فعليا للمكتب بمقدار 220 ريال

وممكن تجربي وتتأكدي بنفسك على تاريخ حجز 5 يوليو ذهاب وعوده في 14 اغسطس ..

زي ماقلت قبل كده مستحيل يكون في ارخص من الحجز عن طريق النت لو احسنا اختيار الوقت المناسب .

بس في نقطه برضه يجب الاشاره لها ان لو الذهاب والعوده في اقل من خمسة واربعين يوم بيكون السعر ارخص من لو كان ثلاث شهور الي هو بدوره ارخص من لو كان الشخص هيرجع خلال سنة .. السعر الي حسبته لك فوق طبعا هو الارخض على الاطلاق على افتراض انها راجعه بعد شهر ..

تم تعديل 2 يونيو 2010 بواسطة doha

[ام بيدو]

السلام عليكم بصى يا جميل انا حجزت الزهاب يوم 6_ 7 والعودة 29_9 يمكن دة الى على السعر وقبل ما احجز دخلت على النت على موقع مصر للطيران والطيران السعودى بس ياريت تتاكدى يمكن فى حاجة عندى غلط وشكراااااا ليكى

[Bassem Nabil]

انا فعلا مش قصدى سما انا بتكلم عن الطيران السعودى انا حجزت لماما يوم 6 _7 انا كنت هحجز من النت خلاص على 1400 بس المحاسب الى فى الشركة الى بيشتغل فيها جوزى قالة احجز من شركات السياحة ارخص وقال على شركة بيتعاملوا معاها علطول وفعلا انا اتصلت بيهم وسالت عن الاسعار لقيتها ارخص بكتير مش عارفة لية وحجزت فعلا بس قالى لازم تدفعوا فى خلال يومين

تيوة الحجز بالنسبه للخطوط الوطنيه زى مصر للطيران والخطوط السعوديه بيكون ارخص من الوكيل السياحى عن الشركه لانهم بياخدوا تخفيض يعنى ممكن تقولوا سعر جمله بس اللى انا ملاحظة السنه دى ان مصر للطيران بدات تدى نفس التخفيض اللى بتديه الوكلاء

[KAhamid]

موضوع جميل مدام ضحى

من تجربتى مع خطوط الطيارن

سافرت على ناس مرتين من جدة للرياض رايح جاى يعنى ركبتها 4 مرات والاربعة كانوا مظبوطين جدا فى مواعيدهم وكانوا زوق اوى فى التعامل والمضيفين عالطيارة بردوا كويسين

واذكر مرة كنت راجع من الرياض فتاخرت 10 دقايق وقفلوا الكونتر وكانت مشكلة ان التذكرة بتتلغى عالطول وروحت للمشرف وشرحتله الموقف قالى اللى اقدر اعملهولك اديك تذكرة مجانية عالرحلة الجاية ومقدرش اعملك حاجة اكتر من كدة

بصراحة هو كان زوق فى الحتة دى وعمل اللى عليه واكتر (بصراحة انا اللى اتاخرت وكان لازم احترم المواعيد اكتر من كدة)

فى نفس الوقت وانا رايح اركب ناس كان فيه زحمة فى المطار سالتهم ايه ده قالوا لى مستنين طيارة تبع الخطوط السعودية رايحة ابها مستنين من 5 الفجر وكنا ساعتها الساعة 10 الصبح

:blink: باذن الله

ادعولى ان ربنا يسترها معايا :rolleyes:

انا برضو ليا 4 تجارب مع طيران ناس

الصراحة موضوع المواعيد من اكتر الاشياء اللي بتميزهم عن غيرهم ال 4 مرات الطيارة بتتطلع من علي الارض تظبط عليها الساعة والخدمة محترمة والتعامل جيد من المضيفين وصراحة بعد تجربتها لغيت الفكرة اللي كنت مكونها عنها من السمع

[doha]

السلام عليكم بصى يا جميل انا حجزت الزهاب يوم 6_ 7 والعودة 29_9 يمكن دة الى على السعر وقبل ما احجز دخلت على النت على موقع مصر للطيران والطيران السعودى بس ياريت تتاكدى يمكن فى حاجة عندى غلط وشكراااااا ليكى

معليش مشفتش ردك الا دلوقت

دخلت من شويه على موقع الخطوط السعودية وشفت سعر الحجز القاهرة - الدمام - القاهرة في التواريخ الي حضرتك قلتيها بالظبط ذهاب من القاهرة 9 يوليو على طيارة سبعه الاربع وعوده من الدمام تسعه وعشرين سبتمبر على طائرة اثنين وربع فطلع

262.73 دولار يعني

983.490 ريال

طبعا ارخص من السعر الي عملتيه في حجز الوكاله وبرضه كان ممكن يكون ارخص من كده لو انك اخترتي يوم غير الجمعه للسفر او لو كان الحجز بدري عن كده ..