قناة العربية والتعليقات العبرية

[se_ Elsyed]

مما لا شك فيه لكل من يتابع موقع العربية نت .. سيلاحظ ان هناك ايادي خفية وظيفتها تسخين الحوار والتلبيخ في اي اخبار لتهييج فئة على فئة او مواطني دولة على مواطني دولة اخرى وهلم جرا

المهم .. قلت النهاردة ادخل اشوف التعليقات عل خبر فتح معبر رفح بدون سقف زمني ... بالمناسبة .. المعبر بيتفتح حوالي 3 ايام اسبوعياً للي ما يعرفش .. لكن هناك الكثيرون يردونها سداح مداح

المهم لقيت الصورة دي لمبارك مع الخبر

بصوا كويس الله يخليكم

شايفين اللي انا شايفه ؟

صورة مبارك ووراءه علم مصر ... صح ؟

ولا النضارة عندي بايظة ؟

حلو قوي

اقسم بالله كنت متوقع تعليقات من عينة " حريم العزا " مع كامل احترامي للجنس الاخر لكن معروف ان هناك فئة من النساء بيروحوا المياتم او الافراح وشغلانتهم الهمز واللمز والنميمة وما بيعجبهمش العجب

اهو في تعليقات من العينة دي .. ولانهم اتفه من الالتفات اليهم .. فلم اعرهم اهتماماً

نرجع لموضوعنا

ادخلوا بقى هنا وشوفوا التعليقات اللي ابصم بالعشره انها لصهاينه

بيقولوا فيما معناه في العديد من التعليقات

خبر كاذب وصورة العلم خلف صورة مبارك تفضح زيف ادعاءاتكم بمساعدة الفلسطينين .. والا لماذا تم وضع علم اسرائيل وراءه صورة مبارك ؟

يدخل ناس المفروض انهم طبيعيين وعندهم عقل يقولوا " فين علم اسرائيل ده ؟" ماحدش يرد

ويدخل واحد تاني يكتب نفس المعنى لكن بصيغة تانيه وهكذا

شوفوا رابط الخبر كده واستمتعوا معايا باللعب اللي على اصوله

العربية نت ..... الخبر حينما يكون من دورة المياة

[Salwa]

ياسى السيد يامصرى يامحترم ..

كان عندنا موضوع هنا (( زمان )) كان كتب فيه وعلق .... الغائب الحاضر (( الطفشان الكبير ))

عن قناة العربية ...و.... راديو سوا ..

دى حاجات تم وضعها خصيصا يعنى

لزوم غسيل المخ ... خصوصا ايام حرب العراق ..

لاتقلق ...

اللى فاهم فاهم ..وفاهم من زمان قوى ... ولا يتاثر بكل هذه الزوبعة ف الفنجان الصغير ..

دعهم يقولون .. ماذا يقولون ... كلام فارغ بالطبع لابيودى ولا بيجيب ..

سلام ..

[doha]

ياسى السيد يامصرى يامحترم ..

كان عندنا موضوع هنا (( زمان )) كان كتب فيه وعلق .... الغائب الحاضر (( الطفشان الكبير ))

عن قناة العربية ...و.... راديو سوا ..

دى حاجات تم وضعها خصيصا يعنى

لزوم غسيل المخ ... خصوصا ايام حرب العراق ..

لاتقلق ...

اللى فاهم فاهم ..وفاهم من زمان قوى ... ولا يتاثر بكل هذه الزوبعة ف الفنجان الصغير ..

دعهم يقولون .. ماذا يقولون ... كلام فارغ بالطبع لابيودى ولا بيجيب ..

سلام ..

كلام سليم 100 %

بس على فكره من قراءتي لاول خمس ست تعليقات في الموقع قبل مااكبر واقفل بدى واضحا لي ان الصورة بتاعت مبارك والعلم المصري تم تبديلها بالصورة الاصليه الي الكل بيعلق عليها وفيها مبارك وخلفه علم اسرائيل .. اتوقع ان ده الي حصل .. انهم كانوا حاطين صورة لحسني مبارك وعلم اسرائيل ولما تم التعليق بالشكل ده بدت الصورة مكشوفه اوي وهتحرج الموقع فتم استبدالها بالصورة الحاليه ..

والله اعلم ..

[herohero]

يا افاضل جمعنا نعلم ان العربية والجزيرة وراديو وقناة الحرة عليها العديد من علامات الاستفهام لكن السؤال لحد امتى بقى مصر اللي لغتها بتتفهم من كل العرب ياجماعه ده الهنود عارفين ازيك ويباشا وعامل ايه

بقى مصر مش قادرة تعمل شبكة اخباريه صح معقوه مش قادرين نعمل حاجه زي الجزيرة "انترنت وقناة فضائية " شغل بقى من اللي بيخلينا نبص ع الاماكن ده

انا لا الوم حد الا اعلامنا عاوزين قناة اخباريه صح والله ف ايدينا لو خدنا القرار اللي للاسف سياسي

يارجاله كله عامل قنوات اخباريه له دلوقتي ده تركيا عامله قناة لها باعربية يارب الخارجيه تفوق

اخبار موقع العربية ف معظمها ضد مصر ومعمولة عشان يتغلط ف مصر لكن انا مش عاوز ادخل عليها ولا اشوف الجزيرة لان الجزيرة مقتنع بعدم حيادتها لكن عاوزين شغل اخباري حو عاوين قناه اخبارية بموقع ع الانترنت يخلينا ما نشوفش الا هو

[dawn walker]

يارب الخارجيه تفوق

انسى ..الخارجية على راسها اضعف وزير فى تاريخ الخارجية المصرية

ومعلش يا سين سين ..حكاية محرر الموقع والغرض من الموقع واللبنانيين المورانة اللى مسيطرين عليه

بس التعليقات اللى بتتكتب عليه مش مفبركة

علشان لو دخلت على الجزيرة هتلاقيها نفس الوتيرة فىالتعليقات وان كانت الجزيرة اكثر مهنية

[عبيد الله]

القصة أكبر من موقع قناة العربية والتعليقات غير اللائقة المنشورة عليه..

المتابع الجيد للإعلام العربي.. المقروء منه بالذات.. يدرك أن هناك نسبة لا تقل عن 80% من الإعلام العربي معادي لمصر.. من خلال مقالات الرأي والأخبار والتعليقات في عدد غير قليل منها تدرك من أول وهلة أن العداء لا يقف عند حدود نظام الرئيس مبارك بحد ذاته.. بل عداء لمصر كدولة وشعب..

هذه المشاعر العدائية مردّها – من وجهة نظري – إلى بعض هذه الأمور:

أولاً: فشل السياسة الخارجية لمصر، خلال العقد المنصرم على الأقل.. غلق الحدود مع غزة وترك الساحة للأعداء الإقليميين ليرتعوا فيها على الأقل إعلامياً..

ثانياً: عدم امتلاكنا لجهاز دبلوماسي قوي.. أو جهاز إعلامي محترف، يبين وجهة نظرنا ويرد على ترهات الآخرين..

ثالثاً: فشل السياسة الداخلية للحكومة.. إحدى نتائج هذا الفشل انتشار صورة سيئة جدا لنا في الخارج: فمصر هي تعذيب في السجون، تحرش جنسي في الشوارع، طوابير العيش على الأفران، طوابير الجراكن المتكررة بين الفينة والفينة في محافظات كثيرة.. فساد "جميع" رجال الأعمال.. عشوائيات، نهب، سرقة، راقصات وفجور.. الخ الخ..

رابعاً: الشحن الإعلامي الذي تقوم به جهات بعينها، مثل الجزيرة في قطر.. بعض الأجهزة السورية التي أذاعت مصطلح "مصرائيل" لأول مرة بعد الحرب على غزة قبل عام ونصف.. مقالات عدد غير قليل من النخبة السودانية.. جميع الصحف الجزائرية.. بعض صحف المغرب.. بعض صحف لبنان.. وغيرها الكثير.. وتأثيرها المباشر على مواطنيها..

خامساً: عدد غير قليل من الدول العربية والأجنبية تضع على رأس أولوياتها هدم مصر ثقافياً، واقتصاديا.. ويساعدهم في ذلك الفشل السياسي للرئيس مبارك.. هذه الدول من أهمها الثلاثي الخطر: إسرائيل وإيران وقطر..

سادساً: الشحن الإعلامي من ذوي النية الحسنة في الغالب.. في برامج التوك شو على الفضائيات المصرية الخاصة.. تجد أغلب البرامج من أولها إلى آخرها.. لا تأتي إلا بالسواد.. لا ترى بقعة ضوء واحدة تظهرها لنا..

أخيراً: تدهور مصر في مجال التعليم.. وانتشار الواسطة والمحسوبية في الوظائف الحساسة والمهمة جدا.. وبالتالي، ترى من هم في الصورة جهلاء في الغالب.. وكثير منهم لا يستيطع نطق جملة عربية صحيحة.. ولما كان هؤلاء هم ممثلونا.. وصانعي قراراتنا.. وقائدي دفة ثقافتنا واقتصادنا.. تدهور حالنا..

باختصار: هذه القصة كلها سببها الرئيسي شيخوخة أداء عجزة الداخل وتجرؤ أراذلة الخارج..

[عشق الكلمات]

انا جربت اكتب تعليق كذا مرة فى العربية بس مش بينزل

هما عندهم ناس معينه هى اللى بتكتب

ويبدو والله اعلم انهم متعينين فى الموقع " معلقين مخصوص لاخبار مصر " ههه

لان مفيش غيرهم فى كل خبر

هما هما

وهى هى التعليقات

وعلى اى خبر حتى لو تافة

طب ده خبر سياسى

لكن من كام يوم كان فى خبر

عن عربة الفول

خبر funny يعنى

لكن برضه كان عليه تعليقات من نفس النوعيه

وشتيمة فى الفول بقى واللى بياكلوه

كالعادة

بس والله اعلم يعنى

بيتيهالى ان دول مش الشعوب الحقيقة

جى ناس زى ما بقولك متاجرة مخصوص عشان تعمل الدور ده